ཀྲུང་གུང་ལིས་རྫོང་མྱག་ལོ་གྲོང་རྡལ་སྐྱིད་ཁོག་གྲོང་ཚོའི་ཀྲི་པུའུ་ཨུ་ཡོན་ལྷན་ཁང་ནི་སི་ཁྲོན་ཞིང་ཆེན་ལི་རྫོང་དུ་གནས་པ་དང་། ཀྲི་པུའུ་ཡི་ཁོངས་མི་ནི་རྒྱ་དང་བོད། ཆའང་སོགས་མི་རིགས་ཁག་ལས་གྲུབ་ཡོད། སྐྱིད་ཁོག་གྲོང་ཚོའི་རྒྱ་ཁྱོན་སྤྱི་ཆིང་34072.8དང་། ཆ་སྙོམས་མཚོ་འཕགས་སྨི་3200ཡོད། གྲོང་མིའི་ཚོགས་ཆུང་3དང་། དུད་ཚང་106ཡོད་ལ། མི་འབོར་308ཡོད། སྐྱིད་ཁོག་གྲོང་ཚོ་ནི་2020ལོར་གྲོང་ཚོ་རིམ་པའི་སྒྲིག་གཞིའི་སྒྲིག་སྲོལ་ལེགས་སྒྲིག་དང་སྒྱུར་བཅོས་བྱས་པར་བརྒྱུད། དེ་སྔའི་ཅིན་ཐོའུ་གྲོང་ཚོ་དང་ཏ་བད་པ་གྲོང་ཚོ་ཟླ་སྒྲིལ་བྱས་པ་ནས་བྱུང་བ་དང་། མྱག་ལོ་གྲོང་རྡལ་གྱི་ལྟེ་བའི་གྲོང་ཚོ་བཞིའི་ཡ་གྱལ་ཡིན། གྲོང་ཚོའི་ཀྲི་པུའུ་ཨུ་ལྷན་གྱིས་ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་བརྟན་དུ་གཏོང་རྒྱུ་གཙོ་བོར་བྱས་ཏེ། ཏང་འཛུགས་སྐྱོང་དང་དྲ་མིག་ཟུང་འབྲེལ་གྱི་དོ་དམ་བྱེད་སྟངས་དང་། ཚེག་གསུམ་དང་ཐིག་གཅིག་འཕེལ་རྒྱས་ཀྱི་རྣམ་པ་གསར་གཏོད་ལག་ལེན་བྱས་ཏེ། མི་རིགས་ཁག་གི་མང་ཚོགས་ཐུན་མོང་མཉམ་སྤྱོད་ཀྱི་གྲོང་གསེབ་ཀྱི་ཁོར་ཡུག་ཧུར་ཐག་བསྐྲུན་ཏེ། མི་རིགས་ཁག་གི་མང་ཚོགས་མཐུན་སྒྲིལ་སྣེ་ཁྲིད་དེ་གཉེན་ཉེ་དང་འདྲ་བར་འབྲེལ་བ་དམ་ཟབ་བྱས་ནས། མི་རིགས་ཁག་གིས་བདེ་སྐྱིད་མཛེས་སྡུག་ལྡན་པའི་ཁྱིམ་གཞིས་ཐུན་མོང་འཛུགས་སྐྲུན། ཐུན་མོང་མཉམ་སྤྱོད་ཀྱི་སྐྱིད་ཁོག་རྣམ་པ་བཏོད། སྔ་རྗེས་སུ་ཞིང་ཆེན་རིམ་པའི་མེད་པ་དྲུག་གི་བདེ་འཇགས་གྲོང་ཚོ་དང་། སི་ཁྲོན་ཞིང་ཆེན་གྲོང་གསེབ་ཀྱི་རིག་གནས་དར་རྒྱས་གཏོང་བའི་བརྒྱ་སྟོང་ཁྲིའི་ལས་གྲྭའི་ཞིང་ཆེན་རིམ་པའི་དཔེ་མཚོན་གྲོང་ཚོ་སོགས་ཀྱི་གཟི་བརྗིད་ཐོབ་ཡོད་པ་རེད།
ཏང་འཛུགས་སྐྱོང་གི་སྣེ་ཁྲིད་ཀྱིས་སྟོབས་ཤུགས་གཅིག་སྒྲིལ་བྱས་ནས། མི་རིགས་མཐུན་སྒྲིལ་གྱི་རྨང་གཞི་བརྟན་པོ་བཙུགས།
སྐྱིད་ཁོག་གྲོང་ཚོས་ཏང་འཛུགས་སྐྱོང་དང་དྲ་མིག་དོ་དམ་བྱེད་སྟངས་བརྒྱུད་ནས། ཀྲི་པུའུ་ཡི་སྣེ་ཁྲིད་དང་། ཐོན་ལས་འཕེལ་རྒྱས། སྐྱེ་ཁམས་འཛུགས་སྐྲུན། གྲོང་གསེབ་ལེགས་བཅོས་སོགས་འགག་རྩའི་ལྷུ་ཚིགས་ལ་བརྟེན་ནས་རྩ་ལྔའི་ཏང་འཛུགས་སྐྱོང་ས་ཚིགས་ཀྱི་དོན་གྲོས་སྟེགས་བུ་བསྐྲུན་ཏེ། མི་རིགས་ཁག་གི་མང་ཚོགས་ཀྱིས་ཐུན་མོང་གྲོས་མོལ་དང་ཐུན་མོང་འཛུགས་སྐྲུན་དང་། ཐུན་མོང་ཐོག་འཕེལ་རྒྱས་ལ་སྐུལ་འདེད། གྲུབ་འབྲས་མཉམ་སྤྱོད་བཅས་ཀྱི་གྲོང་གསེབ་ཀྱི་ཁོར་ཡུག་གསར་སྐྲུན་བྱས་ཏེ། བསམ་བློ་དང་བྱ་སྤྱོད། བརྩེ་དུང་བཅས་ཐད་ཀྱི་མཐུན་སྒྲིལ་གཅིག་གྱུར་ལ་སྐུལ་འདེད་བཏང་སྟེ། མི་རིགས་ཁག་གི་མཐུན་སྒྲིལ་མདུན་སྐྱོད་ཀྱི་མཉམ་སྡེབ་སྟོབས་ཤུགས་ཆེན་པོ་འདུ་འཛོམས་བྱས་ཡོད།
སྐྱིད་ཁོག་གྲོང་ཚོ་ཟླ་སྒྲིལ་བྱས་མ་ཐག་པའི་སྐབས། གྲོང་ཚོ་གཉིས་ཀྱི་གྲོང་མི་མཉམ་འདྲེས་བྱེད་དཀའ་བ་དང་འགལ་བ་འབུར་དུ་ཐོན་ཡོད། གྲོང་ཚོའི་ཏང་ཀྲི་པུའུ་ཧྲུའུ་ཅིས་སེམས་ཁྲལ་ཆེན་པོས་བཤད་རྒྱུར། ཟླ་སྒྲིལ་བྱེད་སྐབས་ཚང་མར་རང་རང་གི་འདུན་པ་ཡོད་པས། ཚོགས་འདུའི་ཐོག་གཅིག་མཐུན་ཡོང་དཀའ་མོ་རེད། རྗེས་སུ་ཏང་འཛུགས་སྐྱོང་དང་དྲ་མིག་ཟུང་འབྲེལ། རྩ་ལྔའི་ཏང་འཛུགས་སྐྱོང་ས་ཚིགས་ལ་བརྟེན་ནས། རྒྱ་དང་བོད། ཆའང་རིགས་བཅས་ཀྱི་གྲོང་མི་རྣམས་ཀྱིས་སེམས་ཀྱི་སྐད་ཆ་ལྷུག་པོར་བཤད་པས་རིམ་བཞིན་མཐུན་སྒྲིལ་ཨ་ལོང་གཅིག་ཏུ་སྒྲིལ་ཐུབ་པ་བྱུང་ཞེས་བཤད། གྲོང་ཚོའི་ཏང་ཀྲི་པུའུ་ཡིས་རྣམ་པ་དེ་ལག་བསྟར་བྱས་རྗེས། མང་ཚོགས་ཀྱི་གནད་དོན་20ལྷག་བསྡུ་རུབ་དང་ཐག་བཅད་བྱས་པ་དང་། ཝུན་ཁྲོན་ནས་འབར་ཁམས་བར་གྱི་མྱུར་བགྲོད་གཞུང་ལམ་གྱི་འགལ་བ་དང་རྩོད་གཞི་བརྒྱད་ཐག་གཅོད་བྱས་ཏེ། གྲོང་མི་རྣམས་གྲོང་ཚོ་འཛུགས་སྐྲུན་ནང་ཧུར་ཐག་ཞུགས་རྒྱུའི་ཁྲིད་སྟོན་བྱས་ནས་མི་ཐེངས་500ལྷག་ཙམ་གྱིས། རིན་མེད་ངང་ངལ་རྩོལ་བྱས་པར་མ་ཟད། ད་དུང་ཞིང་པ་རྣམས་ཀྱིས་རང་འགུལ་ངང་སྒོར་ས་ཡ་གཅིག་དང་འབུམ་བརྒྱད་ལྷག་དངུལ་བུན་བླངས་ནས་གྲོང་ཚོའི་ཐུན་མོང་འཛུགས་སྐྲུན་ལ་མ་དངུལ་བཏང་ནས། གྲོང་ཚོ་ཕན་ཚུན་མཉམ་འདྲེས་མཉམ་འཕེལ་གྱི་རྣམ་པ་སྔར་བས་ཟབ་ཏུ་ཕྱིན་པ་རེད།
ཆའང་རིགས་གྲོང་མི་ཨ་ཅེ་དབྱང་གིས། སྔོན་ཆད་རྟག་ཏུ་ཟླ་སྒྲིལ་བྱས་རྗེས་དོན་དག་མང་པོ་འདུག་སྙམ་གྱི་ཡོད་མོད། གྲོང་ཚོའི་ཀྲི་པུའུ་ཡིས་ཚང་མ་མཐུན་སྒྲིལ་བྱས། ཁྱིམ་གྱི་ཞིང་ལས་བྲེལ་འཚུབ་ཆེ་བའི་སྐབས་སུ་བོད་རིགས་ཁྱིམ་མཚེས་ཀྱིས་ངའི་ཁྱིམ་གྱི་རྒན་རྒོན་ལ་ལྟ་སྐྱོང་བྱེད་རོགས་བྱས་པ་དང་། རྒྱ་རིགས་སྤུན་ཟླས་ང་ཚོ་ཁྲིད་ནས་ཞིང་ཆས་གསར་པར་ཞིབ་འཇུག་བྱེད་ཀྱི་ཡོད། ད་ལྟ་ལས་ཀ་བྱེད་པར་ངར་ཤུགས་ཡོད་ལ་འཚོ་བ་ལའང་རེ་སྙེག་གིས་ཁེངས་འདུག་ཅེས་བཤད།
ད་ལྟའི་སྐྱིད་ཁོག་གྲོང་ཚོར་མི་རིགས་ཁག་གི་མང་ཚོགས་རང་རྟོགས་ངང་གྲོང་གསེབ་བཅོས་སྐྱོང་དང་འཛུགས་སྐྲུན་ནང་ཞུགས་པ་དེ་རྒྱུན་ལྡན་གྱི་རྣམ་པ་ཞིག་ཏུ་གྱུར་ཡོད། ཆུང་བ་ནས་ཁོར་ཡུག་ལེགས་སུ་གཏོང་བ་དང་། ཆུ་རགས་འདིང་བ། ལམ་ངོས་བཟོ་བཅོས་བྱེད་པ་དང་། ཆུང་ས་ནས་ཡུལ་སྐོར་ཕྱོགས་བསྡུས་ཞབས་ཞུའི་ཁུལ་དང་རྒྱལ་ལམ་317གྱི་རླངས་འཁོར་ཆེ་རིགས་ཀྱི་ས་ཚུགས་འཛུགས་སྐྲུན་ནང་ཞུགས་པ་སོགས་མི་རིགས་ཁག་གི་མང་ཚོགས་ཚང་མས། གྲོང་ཚོའི་ཏང་ཀྲི་པུའུ་ཡི་འགྲམ་དུ་དམ་པོར་བསྐོར་ནས་བསམ་བློ་གཏོང་ས་གཅིག་དང་ནུས་ཤུགས་འདོན་ས་གཅིག་བྱས་ཏེ། མི་རིགས་མཐུན་སྒྲིལ་ཞེས་པའི་མི་རིགས་ཁག་མི་དམངས་ཀྱི་སྲོག་རྩ་ཐུན་མོང་ཐོག་སྲུང་སྐྱོབ་བྱེད་ཀྱི་ཡོད།
ཐོན་ལས་མཉམ་འདྲེས་འཕེལ་རྒྱས་སྐུལ་འདེད་བཏང་ནས། མཐུན་སྒྲིལ་ཡར་ཐོན་མེ་ཏོག་གསོ་སྐྱོང་བྱེད།
སྐྱིད་ཁོག་གྲོང་ཚོས་ཐོན་ལས་སྐུལ་འདེད་ལ་བརྟེན་ནས་འཕེལ་རྒྱས་སྟེགས་བུ་བསྐྲུན་པ་དང་། ཡུལ་སྐོར་ཕྱོགས་བསྡུས་ཞབས་ཞུའི་ས་ཚུགས་དང་། རླངས་འཁོར་ཆེན་པོའི་ས་ཚིགས། གློག་བསྒྱུར་ས་ཚིགས་བཅས་ལ་བརྟེན་ནས་མཐུན་སྦྱོར་ནུས་ཤུགས་བཏང་ནས། མི་རིགས་ཁག་གི་མང་ཚོགས་ཀྱིས་འཕེལ་རྒྱས་ཀྱི་ཁེ་སྤོགས་མཉམ་སྤྱོད་བྱེད་པའི་ཁྲོད་མཐུན་སྒྲིལ་གྱི་རྨང་རྡོ་སྲ་བརྟན་དུ་བཏང་ནས། མི་རིགས་མཐུན་སྒྲིལ་གྱི་མེ་ཏོག་དེ་བས་མཛེས་སྡུག་ལྡན་པའི་ངང་བཞད་དུ་བཅུག།
གྲོང་ཚོའི་ཏང་ཀྲི་པུའུ་ཡིས་ཐོན་ཁུངས་བསྡུ་སྒྲིལ་བྱས་ནས་ནུས་པ་མང་བའི་ཡུལ་སྐོར་ཕྱོགས་བསྡུས་ཞབས་ཞུའི་ཁུལ་བསྐྲུན་པ་དང་། ཞིང་ལས་ཐོན་རྫས་ཕྱིར་འཚོང་དང་མི་རིགས་ཀྱི་ཡུལ་སྲོལ་ཉམས་ལེན་སོགས་ཀྱི་ལས་སྒོ་ཀུང་སི་ཅན་དུ་གཉེར་སྐྱོང་བྱས་ཏེ། རྫོང་ཡོངས་ཀྱི་ཏང་འཛུགས་སྐྱོང་ཡུལ་དངོས་ཚོགས་འདུ་སོགས་བྱེད་སྒོ་ཐེངས་2000ལྷག་དང་ལེན་བྱས། རི་བོའི་ལེགས་ཆར་བརྟེན་ནས་རྒྱལ་ལམ་317གྱི་རླངས་འཁོར་ཆེ་གྲས་ཀྱི་ས་ཚུགས་མཛེས་སྡུག་ཆེ་ཤོས་བསྐྲུན་ནས། རླངས་འཁོར་འཇོག་ས་དང་ཞག་སྡོད་སོགས་ཀྱི་ཞབས་ཞུ་མཁོ་འདོན་བྱས་ནས། ཟོག་འདྲེན་རླངས་འཁོར་གྱི་ཁ་ལོ་བ་ཚོར་ཕན་ཐོགས་ཡོད། འགྲོ་འོང་བྱེད་པའི་རླངས་འཁོར་ཆེ་གྲས་མང་བ་དང་ནུས་རྒྱུ་གསར་པའི་རླངས་འཁོར་དར་བའི་འཕེལ་ཕྱོགས་ལ་དམིགས་ནས། ཉིང་ཏེ་དུས་རབས་དང་སི་ཁྲོན་ནུབ་རྒྱུད་ཟོག་འགྲེམས་ཀུང་སི་ནང་འདྲེན་བྱས་ནས་མཉམ་ལས་འཛུགས་སྐྲུན་བྱས་ཏེ། ས་ཞིང་བོགས་གཏོང་གི་ལོ་རེའི་བོགས་དངུལ་སྒོར་འབུམ་གཉིས་ཁྲི་དགུ་ཐོག་ནས་གླས་པ་དང་།
རླངས་འཁོར་ཆེན་པོའི་ཞབས་ཞུའི་ཁྱུ་ཚོགས་འཕེལ་རྒྱས་གཏོང་བའི་ཐབས་ལམ་གསར་པ་སྦྲེལ་མཐུད་བྱས་པ་རེད། ད་ཆ་འཛུགས་སྐྲུན་ལེགས་གྲུབ་བྱུང་བའི་ཐོན་ལས་ལ་སྡེ་པའི་ཐུན་མོང་ཡོང་འབབ་སྒོར་ས་ཡ་གཅིག་འབུམ་ལྔ་ལྷག་འཕར་བ་དང་། 2024ལོར་ཐུན་མོང་དཔལ་འབྱོར་ཡོང་འབབ་སྒོར་འབུམ་ལྔ་ལྷག་ཟིན་ཡོད།
གྲོང་ཚོའི་མཉམ་སྡེབ་ཡུལ་སྐོར་ཞབས་ཞུ་ཀུང་སིས་གྲོང་མི་རྣམས་དྲིལ་བསྒྲགས་པར་བསྒྱུར་ནས་ཡུལ་སྐོར་གྱི་ཁེ་སྤོགས་ཐད་ཀར་མཉམ་སྤྱོད་བྱེད་དུ་བཅུག །གྲོང་ཚོའི་ཧྲུའུ་ཅི་ཀེང་ཀྲང་གིས། ཡུལ་སྐོར་པ་ཇེ་མང་དུ་འགྲོ་བཞིན་ཡོད། རླངས་འཁོར་ཆེན་པོའི་ས་ཚུགས་ཀྱི་དུས་རིམ་གཉིས་པ་བསྐྲུན་ཉེར་ཡོད། གློག་བསྒྱུར་ས་ཚུགས་ཀྱི་ཚོང་འགུག་ལེགས་གྲུབ་ཟིན་ཡོད། མ་འོངས་པར་ཚོང་རྫས་སྔར་ལས་རྒྱང་རིང་པོར་བཙོང་ཐུབ་པ་དང་། བྱིས་པ་ཚོ་ཉེ་འགྲམ་དུ་ལས་ཞུགས་བྱེད་ཐུབ་པས། འཚོ་བར་རེ་བ་དང་མདུན་ལམ་གྱིས་ཁེངས་ཡོད་ཅེས་བཤད།
རིག་གནས་ཡུལ་སྐོར་གྱིས་མི་སེམས་གསོས་ནས། མི་རིགས་ཀྱི་བསམ་པའི་ཁྱིམ་གཞིས་ཐུན་མོང་བསྐྲུན།
སྐྱིད་ཁོག་གྲོང་ཚོས་གཞུང་རྟ་གསུམ་གྱི་སྟོབས་ཤུགས་གཅིག་བསྡུས་ཐོག་ནས་དཔལ་ཡོན་ཡུལ་ལྗོངས་བསྐྲུན་ནས། སྐྱེ་ཁམས་སྲུང་སྐྱོང་དང་། རིག་གནས་རྒྱུན་འཛིན། གཞི་རིམ་བཅོས་སྐྱོང་བཅས་མཉམ་འདྲེས་གཏིང་ཟབ་བྱས་ཏེ། མི་རིགས་མཐུན་སྒྲིལ་གྱི་དྲི་ཞིམ་སྔར་བས་རྒྱང་ཐག་རིང་པོར་ཁྱབ།
རི་སྔོན་མོ་དང་ཆུ་དྭངས་མོ་དེ་རྒྱལ་རོང་རིག་གནས་དང་ཟུང་འབྲེལ་བྱས་ཏེ། སྐྱིད་ཁོག་གྲོང་ཚོས་ས་མཐོའི་འབག་མེད་སྔོ་ཚལ་དང་། ནོར་གནག་སོགས་སྐྱེ་ཁམས་རྟགས་བཏོད་པ་དང་། རང་བྱུང་ལྟ་སྐོར་དང་གངས་འཁྱགས་ཉམས་ལེན་སོགས་རིག་གནས་ཡུལ་སྐོར་རྣམ་གྲངས་བཏོན་ཏེ། མི་རིགས་ཁག་གི་མང་ཚོགས་ལ་སྐྱེ་ཁམས་སྲུང་སྐྱོང་བྱེད་པའི་ཁྲོད་ཐུན་མོང་གི་ངོས་འཛིན་གཅིག་གྱུར་ཡོང་བ་བྱས་ཡོད། འགོག་སྲུང་གསུམ་རེས་འཁོར་དང་རྫ་མྱོ་དུས་ཆེན་སོགས་ཀྱི་བྱེད་སྒོ་བརྒྱུད། མི་རིགས་མཐུན་སྒྲིལ་གྱི་སྟེགས་བུ་བསྐྲུན་པ་སྟེ། བོད་དང་ཆའང་མང་ཚོགས་ཀྱིས་ཚང་མས་སྐོར་བྲོ་འཁྲབ་པ་དང་རྒྱ་རིགས་གྲོང་མིས་ཞིང་ལས་ཐོན་རྫས་ཁྱབ་གདལ་གཏོང་བ་སོགས། མི་རིགས་ཁག་གི་མང་ཚོགས་ཀྱིས་ཐུན་མོང་ཐོག་མི་རིགས་མཐུན་སྒྲིལ་གྱི་ལམ་ཁ་གཏོད།
གྲོང་ཚོའི་རིག་གནས་བྱེད་སྒོ་ཁང་ནི་མི་རིགས་ཁག་གི་མང་ཚོགས་ཀྱི་བསམ་པའི་སྤྲོ་སྐྱིད་གླིང་དུ་གྱུར་ཡོད། དུས་ཆེན་སྐབས་ཚང་མ་ཕྱོགས་བསྡུས་ཚོགས་ཁང་དུ་འཛོམས་ནས། མཉམ་འཛོམས་དང་ཐང་ཆེན་ཐོག་ལག་རྩེད་སྤོ་ལོ་རྩེ་བ། བོད་པས་པི་ཝང་འཐེན་པ་དང་ཆའང་རིགས་ཀྱི་ཧྲ་ལང་དཀྲོལ་བ། རྒྱ་རིགས་ཀྱི་གཡང་འཁོར་འཆམ་པ་སོགས་ལྷང་ལྷང་དགོད་སྒྲ་རྒྱུན་མི་ཆད།
གཅིག་སེམས་གཅིག་མཐུན་གྱིས་རི་མོ་གསར་པ་འབྲི་ནས་མཐུན་སྒྲིལ་ཁྱིམ་གཞིས་ཀྱི་མཛེས་སྡུག་ལྡན་པའི་ལེའུ་མུ་མཐུད་དུ་འབྲི་དགོས།
སྐྱིད་ཁོག་གྲོང་ཚོའི་ཏང་ཀྲི་པུའུ་ཡིས་ཐོག་མཐའ་བར་གསུམ་དུ་ཁྱིམ་གཞིས་གསུམ་ཐུན་མོང་དུ་འཛུགས་རྒྱུ་དེ་དམིགས་འབེན་དུ་བཟུང་ནས། མི་རིགས་ཁག་གི་མང་ཚོགས་ལ་མཐོང་ཐུབ་པ་དང་ཚོར་ཐུབ་པའི་སྐྱིད་སྣང་ཆེ་རུ་གཏོང་གི་ཡོད། སྔོན་ཆད་ཟླ་སྒྲིལ་བྱེད་སྐབས་མཉམ་འདུས་བྱེད་མི་ཐུབ་པར་སྐྲག་བཞིན་ཡོད་མོད། འོན་ཀྱང་ད་ལྟ་ཚང་མ་གཅིག་ལ་གཅིག་རྟེན་ཆགས་ཡོད་ཅེས་ཏང་ཡོན་རྒན་པ་ཕུ་བོ་ལིའུ་ཡི་སྐད་ཆ་ལས་ཚང་མའི་སེམས་པ་མཚོན་ཐུབ། སྐྱིད་ཁོག་གྲོང་ཚོར་འགྱུར་ལྡོག་བྱུང་བས་མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་ཡིན་པ་ར་སྤྲོད་བྱུང་ཡོད། མ་འོངས་པར་གྲོང་ཚོའི་ཏང་ཀྲི་པུའུ་ཡིས་ཚེག་གསུམ་དང་ཐིག་གཅིག་གི་རྣམ་པ་མུ་མཐུད་གཏིང་ཟབ་ཏུ་གཏོང་བ་དང་། རླངས་འཁོར་ཆེན་པོའི་ས་ཚུགས་ཀྱི་དུས་རིམ་གཉིས་པའི་འཛུགས་སྐྲུན་ལ་སྐུལ་འདེད་གཏོང་བ་དང་།
གངས་འཁྱགས་ཡུལ་སྐོར་ཐོན་ལས་འབྲེལ་ཐག་རྒྱ་སྐྱེད་བཏང་སྟེ། མི་རིགས་ཁག་གི་མང་ཚོགས་ཀྱི་འཚོ་བ་གྲོང་ཚོའི་རྒྱབ་ཕྱོགས་ཀྱི་ནགས་རི་དང་འདྲ་བར། དུས་བཞིའི་མཛེས་ལྗོངས་རེས་མོས་ཀྱིས་བསྒྱུར་ནས་ཇེ་ལེགས་སུ་གཏོང་གང་ཐུབ་བྱ་རྒྱུ་ཡིན་པ་རེད།
འགལ་བ་འབུར་དུ་ཐོན་པའི་ཟླ་སྒྲིལ་གྲོང་ཚོ་ནས་མི་རིགས་མཐུན་སྒྲིལ་ཡར་ཐོན་དཔེ་སྟོན་གྲོང་ཚོ་བར་སྐྱིད་ཁོག་གྲོང་ཚོས་ལག་ལེན་ཐོག་ནས་ར་སྤྲོད་བྱས་པ་ལྟར་ན། སེམས་གཅིག་ཏུ་བསམ་བློ་གཏོང་བ་དང་། སྟོབས་ཤུགས་གཅིག་ཏུ་སྤེལ་ན། མི་རིགས་ཁག་སེ་འབྲུ་དང་འདྲ་བར་དམ་པོར་བསྡུས་ནས་གྲོང་གསེབ་དར་རྒྱས་གཏོང་བའི་ལམ་བུའི་ཐོག་ཐུན་མོང་བདེ་སྐྱིད་ཀྱི་ལེའུ་འབྲི་ཐུབ། །