མུ་ལི་དགོན་ཆེན་ནི་མུ་ལི་རྫོང་ཐང་གུར་གྲོང་རྡལ་ཐོབ་པ་སྡེ་པ་ཉིང་ཡཱ་པུའུ་ཡི་འདབས་རོལ་དུ་ཆགས་ཤིང་། མིང་རྒྱལ་རབས་ཝན་ལི་ཁྲི་ལོའི་དུས་སུ་ཐོག་མར་བཞེངས་ལ་བོད་བརྒྱུད་ནང་བསྟན་གྱི་དགེ་ལུགས་པའི་དགོན་སྡེར་གཏོགས། ད་ལྟ་བླ་མ་དང་བཟོ་པ་113ཡོད། ཉེ་བའི་ལོ་འདི་དག་གི་རིང་ལ། མུ་ལི་དགོན་ཆེན་གྱི་དགེ་འདུན་པ་ཡོངས་ཀྱིས་ཏང་དང་སྲིད་གཞུང་གི་ཡང་དག་པའི་འགོ་ཁྲིད་འོག་རྒྱལ་གཅེས་ཆོས་གཅེས་རྩ་བར་འཛིན་པ་དང་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་རྒྱུ་འགན་འཁྲིར་བརྩིས་ནས་གངས་ལྗོངས་ས་མཐོའི་ཡུལ་ནས་མི་རིགས་མཛའ་མཐུན་དང་། ཆོས་ལུགས་ཞི་མཐུན། སྤྱི་ཚོགས་འཆམ་མཐུན་གྱི་བརྗིད་ཉམས་ལྡན་པའི་བསྟོད་གླུ་ཞིག་བརྩམས་ཏེ་དུས་རབས་གསར་པའི་རང་རྒྱལ་གྱི་ཆོས་ལུགས་ཀྲུང་གོ་ཅན་དུ་འགྱུར་བའི་ལག་ལེན་ཁྲོད་ཀྱི་མིག་དཔེ་རུ་གྱུར་ཡོད།
རླབས་ཆེན་དར་ཆ་མཐོ་རུ་བསྒྲེངས་ཏེ་བསམ་བློའི་རྨང་བརྟན་ཟུངས་སྐྱེད་སྒོས་རྒྱལ་གཅེས་ཆོས་གཅེས་ཀྱི་ཕུགས་འདུན་གཅིག་ཏུ་སྦྲེལ་བར་སྣེ་འཁྲིད་བྱས།
ཆབ་སྲིད་ཀྱི་སྣེ་སྟོན་ལ་ཤུགས་སྣོན་བརྒྱབ་ནས། བསམ་བློའི་ཐུན་མོང་གི་ངོས་འཛིན་གཅིག་ཏུ་བསྒྲིལ། དགོན་པས་ཐོག་མཐའ་བར་གསུམ་དུ་བསམ་བློ་ཆབ་སྲིད་འཛུགས་སྐྱོང་བྱ་རྒྱུ་དེ་ལས་འགན་དང་པོར་བརྩིས་ཏེ། དུས་བཅད་ལྟར་དགེ་འདུན་པ་སྒྲིག་འཛུགས་བྱས་ནས་རྒྱལ་ཁབ་ཀྱི་བཅའ་ཁྲིམས་ཁྲིམས་སྲོལ་དང་ཏང་གི་མི་རིགས་ཆོས་ལུགས་སྲིད་ཇུས་སློབ་སྦྱོང་བྱས་ནས། དགེ་འདུན་པའི"མོས་སེམས་ལྔ"ཟབ་ཏུ་གཏོང་བར་ཁྲིད་སྟོན་བྱས། "རྒྱལ་ཁབ་ཀྱི་སྲིད་ཇུས་སློབ་སྦྱོང་དོ་ར"བཙུགས་ནས་གཙོ་རྒྱུན་ཚགས་པར་དང་དུས་དེབ་མངགས་ཉོ་བྱས་ཏེ། ཏང་གི་གསུང་སྐད་དང་ཐུགས་ཁུར་དུས་ལྟར་དགེ་འདུན་པའི་སེམས་སུ་ཟུག་ཐུབ་པར་འགན་ལེན་བྱས། རྒྱལ་གཅེས་སློབ་གསོ་ཟབ་ཏུ་བཏང་ནས། ཁྱིམ་ཞེན་རྒྱལ་ཞེན་གྱི་བརྩེ་བ་ཟབ་མོ་འཆང་། དགོན་པས་རྒྱུན་རྣམ་ཅན་གྱི་རྒྱལ་གཅེས་རིང་ལུགས་ཀྱི་སློབ་གསོའི་བྱེད་སྒོ་སྣ་མང་སྤེལ་བ་རྒྱུན་འཁྱོངས་བྱས་པ་སྟེ། རྒྱལ་སྟོན་དུས་ཆེན་སྐབས་སུ་རྒྱལ་དར་བསྒྲེངས་པའི་མཛད་སྒོ་གཟབ་རྒྱས་ངང་འཚོགས་པ་དང་།
རྒྱལ་གཅེས་རིང་ལུགས་ཀྱི་གློག་བརྙན་ལ་བལྟ་བ། གསར་བརྗེའི་སློབ་གསོའི་རྟེན་གཞིར་ལྟ་སྐོར་བྱེད་པ་སྒྲིག་འཛུགས་བྱས་ཏེ། དམར་དམག་རྒན་པ་དང་སྔོན་ཐོན་དཔེ་བཟང་གདན་དྲངས་ནས། ཁོ་ཚོའི་འབད་འཐབ་ཀྱི་གཏམ་རྒྱུད་རེ་རེ་དང་རྒྱལ་གཅེས་ཀྱི་བརྩེ་བ་ཟབ་མོ་དགེ་འདུན་པའི་སེམས་སུ་འདྲེས་པར་བྱས། ཁྲིམས་སྐྱོང་དྲིལ་བསྒྲགས་ལ་སྐུལ་འདེད་བཏང་ནས། ཞི་མཐུན་གྱི་རྨང་གཞི་སྲ་བརྟན་དུ་བཏང་། "བཅའ་ཁྲིམས་དགོན་སྡེ་རུ་བསྐྱོད་པའི"བྱེད་སྒོ་ཧུར་ཐག་སྒོས་སྤེལ་ནས། ཁྲིམས་འཛིན་དང་མི་རིགས་ཆོས་ལུགས་སྡེ་ཁག་གདན་དྲངས་ཏེ"སྐད་གཉིས་ཁྲིམས་ལུགས་ཁྱབ་གདལ"གྱི་འཆད་ཁྲིད་སྤེལ། ཉེ་བའི་ལོ་གསུམ་གྱི་རིང་ལ་རིམ་རྩིས་བྱས་ན། ཁྲིམས་ལུགས་ཁྱབ་གདལ་གྱི་བྱེད་སྒོ་ཐེངས་30ལྷག་སྤེལ་བ་དང་། དགེ་འདུན་པའི་སྡེ་དང་དེ་བཞིན་མཐའ་འཁོར་གྱི་དད་ལྡན་མང་ཚོགས་ཁྲི་ལྷག་ལ་ཁྱབ། དགེ་འདུན་པའི་ཁྲིམས་སྐྱོང་འདུ་ཤེས་མངོན་གསལ་དོད་པོས་ཆེ་རུ་ཕྱིན་པ་དང་རང་རྟོགས་ངང་བཅའ་ཁྲིམས་སྤྱད་དེ་རང་ངོས་ཀྱི་ཁེ་དབང་སྲུང་སྐྱོང་དང་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་ནུས་པ་རྒྱུན་ཆད་མེད་པར་ཆེ་རུ་ཕྱིན་ནས། ཆོས་ལུགས་ལས་དོན་ལ་ཁྲིམས་ལྟར་དོ་དམ་དང་མི་རིགས་མཐུན་སྒྲིལ་ལ་སྐུལ་འདེད་གཏོང་ཆེད་ཁྲིམས་སྐྱོང་གི་རྨང་གཞི་བརྟན་པོ་བཞག
ལག་ལེན་གཏིང་ཟབ་བྱས་ནས་འགྲོ་འོང་མཉམ་འདྲེས་ལ་སྐུལ་འདེད་བཏང་སྟེ་མི་རིགས་འཆམ་མཐུན་གྱི་སེམས་སྦྲེལ་ཟམ་པ་བཙུགས།
སྲིད་ཇུས་སྒྲོག་འགྲེལ་གྱི"གཏམ་སྒྲོག་མཁན"བྱས་ནས། མཐུན་སྒྲིལ་གྱི་ངོས་འཛིན་གཅིག་ཏུ་བསྒྲིལ། དགེ་འདུན་པས་ཆོས་འཆད་ཉན་དང་ཆོས་ལུགས་བྱེད་སྒོ། རྒྱུན་ལྡན་འབྲེལ་གཏུག་སོགས་ཀྱི་གོ་སྐབས་སྤྱད་དེ། དད་ལྡན་མང་ཚོགས་ལ་ཏང་གི་མི་རིགས་སྲིད་ཇུས་དང་ས་ཁོངས་འཕེལ་རྒྱས་ཀྱི་གྲུབ་འབྲས། དེ་བཞིན་རྒྱལ་ཁབ་ཀྱིས་མི་རིགས་ས་ཁུལ་ལ་ཕན་པའི་བྱེད་ཐབས་ཁག་དྲིལ་བསྒྲགས་དང་རྒྱས་འགྲེལ་བྱས་ལ། ཁ་གསལ་གོ་བདེའི་སྐད་ཆ་དང་འཚོ་བ་དང་ཉེ་བའི་དཔེ་དྲངས་པ་ལ་བརྟེན་ནས། "ཁ་འབྲལ་ཐབས་མེད་པ་གསུམ"དང་"མོས་སེམས་ལྔ"ཡི་བསམ་བློའི་སྙིང་བཅུད་ཀྱི་ས་བོན་དད་ལྡན་མང་ཚོགས་ཀྱི་སེམས་པའི་ཞིང་སར་བཏབ། འགལ་ཟླ་འདུམ་འགྲིག་གི"བར་འདུམ་པར"བྱས་ནས། ཁྱིམ་མཚེས་འགྲིག་མཐུན་ལ་སྐུལ་འདེད་བཏང་། དགོན་པས་གཞི་རིམ་གྱི་འགལ་བ་དང་རྩོད་གཞི་འདུམ་འགྲིག་ཁྲོད་ཧུར་ཐག་སྒོས་ཞུགས་ནས། སངས་རྒྱས་བསྟན་པའི་བྱམས་སྙིང་རྗེ་དང་བཟོད་སྒོམ། འདུམ་པ་སོགས་ཀྱི་དགོངས་པ་ཡིས། བརྩེ་སེམས་ལ་བརྟེན་ནས་མི་སེམས་འགུལ་བ་དང་གནས་ལུགས་ལ་བརྟེན་ནས་མི་སེམས་འགུག་པའི་བྱེད་ཐབས་སྤྱད་དེ། ས་རྩོད་ཆུ་རྩོད་དང་རུ་ཁ་ཁྱིམ་མཚེས་བར་གྱི་ཁ་རྩོད་དེ་ཐབས་དང་བློ་གྲོས་ལ་བརྟེན་ནས་སེལ་གང་ཐུབ་བྱས། ཉེ་བའི་ལོ་ལྔའི་རིང་དམངས་ཁྲོད་ཀྱི་འགལ་རྩོད་གྱོད་གཞི་བརྒྱ་ལྷག་འདུམ་འགྲིག་བྱས་ནས། གཞི་རིམ་བཅོས་སྐྱོང་ཁྲོད་མེད་དུ་མི་རུང་བའི"འགལ་བ་འདུམ་འགྲིག་མཁན"དང"བརྟན་ལྷིང་བརྟན་སྲུང་མཁན་དུ"གྱུར། རིག་གནས་ཀྱི་གར་སྟེགས་ཆེན་པོ་བསྐྲུན་ནས། བསམ་པའི་ཁྱིམ་གཞིས་མཉམ་དུ་བསྐྲུན། རིག་གནས་འབྲེལ་ཐག་གི་ནུས་པ་འདོན་སྤེལ་ཧུར་ཐག་བྱས་ཏེ་ས་གནས་ཀྱིས་སྤེལ་བའི་བོད་ཀྱི་ལོ་གསར་དང་དཔལ་འབར་དུས་ཆེན་སོགས་མི་རིགས་ཀྱི་སྲོལ་རྒྱུན་དུས་སྟོན་བྱེད་སྒོའི་ནང་ཞུགས་པ་དང་འཕེལ་རྒྱས་ལ་རམ་འདེགས་བྱས། སྲོལ་རྒྱུན་གྱི་ཆོས་ལུགས་རོལ་དབྱངས་དང་ཞབས་བྲོ་ལ་གསར་གཏོད་རང་བཞིན་ཞུགས་ནས། དེའི་ཁྲོད་དུ་དུས་རབས་གསར་པར་བསྟོད་གླུ་ལེན་པ་དང་འཚོ་བ་གསར་པར་བསྔགས་བརྗོད་བྱེད་པའི་གཞི་རྒྱུ་འདྲེས་པར་བྱས་ནས། ངོ་མཚར་བའི་མཛེས་ཉམས་མངོན་ཚུལ་ཁྲོད་ནས་སྲོལ་རྒྱུན་གྱི་མི་རིགས་རིག་གནས་འགྲེམ་སྟོན་བྱས། དུས་བཅད་ལྟར་རིག་གནས་འགྲེམ་སྟོན་ཁུལ་སྒོ་ཕྱེ་ནས། བཟོ་རྩལ་ཕུལ་དུ་བྱུང་བའི་ཆོས་ལུགས་སྒྱུ་རྩལ་དང་མི་རིགས་རིག་གནས་འགྲེམས་སྟོན་བྱས་ཏེ། རིགས་སོ་སོའི་མང་ཚོགས་ལྟ་སྐོར་དང་སྤེལ་རེས་བྱེད་པར་ཡིད་དབང་བཀུག་ནས་མི་རིགས་ཁག་སོ་སོའི་རིག་གནས་ཕན་ཚུན་དཔྱད་གཞིར་འཛིན་པ་དང་བརྩེ་བ་མཉམ་འདྲེས་ཡོང་བ། སེམས་པ་གཅིག་ཏུ་འདྲེས་པའི་སྟེགས་བུ་གཙོ་བོར་འགྱུར་བར་སྐུལ་འདེད་བྱས།
བྱམས་དང་སྙིང་རྗེས་འགྲོ་དོན་བསྐྱངས་ཏེ་ཐུན་མོང་འཕེལ་རྒྱས་ཀྱི་བདེ་སྐྱིད་ལམ་བུ་གཏོད།
དབུལ་སེལ་འགག་སྒྲོལ་ནང་ཞུགས་ནས། ཐུན་མོང་ཕྱུག་འགྱུར་ཡོང་བར་རམ་འདེགས་བྱས། མུ་ལི་དགོན་ཆེན་གྱིས་ཏང་ཨུ་དང་སྲིད་གཞུང་གི་དབུལ་སེལ་འགག་སྒྲོལ་གྱི་འབོད་སྐུལ་དང་ལེན་བྱས་ནས། རང་འགུལ་ངང་དངུལ་དང་དངོས་པོ་ཞལ་འདེབས་ཕུལ་བ་དང་། རིམ་རྩིས་བྱས་པ་ལྟར་ན། དགེ་དངུལ་སྒོར་ཁྲི་བཅུ་ཕྲག་ལྷག་དབུལ་ཕོངས་གྲོང་ཚོའི་རྨང་གཞིའི་སྒྲིག་བཀོད་འཛུགས་སྐྲུན་དང་། དབུལ་ཕོངས་ཁྱིམ་ཚང་གི་ཁང་བ་ཉེན་ཁ་ཅན་སྒྱུར་སྐྲུན། དཀའ་ཁག་ཆེ་བའི་སློབ་མའི་སློབ་སྐྱོར་ཆེད་དུ་བཀོལ་སྤྱོད་བྱས། དགེ་འདུན་པས་རང་འགུལ་ངང་དང་བླངས་རོགས་སྐྱོར་རུ་ཁག་བཙུགས་ནས་ལུང་ཐག་རིང་བའི་འབྲོག་ཁུལ་གྱི་དཀའ་ཁག་ཆེ་བའི་ཁྱིམ་ཚང་དང་འགན་ལེན་ལྔའི་ཁྱིམ་ཚང་། དབང་པོ་སྐྱོན་ཅན་གྱི་ཁྱིམ་ཚང་ལ་འཚོ་བའི་མཁོ་ཆས་བསྐྱལ་ནས། རང་ནུས་ཅི་ལྕོགས་ཀྱིས་ངལ་རྩོལ་རོགས་རམ་དང་བསམ་པའི་སེམས་གསོ་མཁོ་འདོན་བྱས་ཏེ་བྱ་སྤྱོད་དངོས་ལས"བྱམས་སྙིང་རྗེས་འཇིག་རྟེན་སྐྱོབ་པའི"དགོངས་པ་ལ་འགྲེལ་བཤད་ཟབ་མོ་བརྒྱབ།
སྤྱི་ཕན་དགེ་སྒྲུབ་ཀྱི་ལས་ལ་འབད་དེ། བརྩེ་སེམས་ཆེན་མོ་བརྒྱུད་སྤྲོད་བྱས། དགོན་པས་དགེ་སྒྲུབ་ཐེབས་རྩ་བཙུགས་ནས་ནམ་ཡང་ཉེན་སེལ་དཀའ་སེལ་དང་གནོད་སེལ་མྱུར་སྐྱོབ་ཐད་སྤྱད། ནད་གཞི་ལྕི་མོ་ཕོག་པའི་ཁྱིམ་ཚང་དཀའ་ཁག་ཅན་ལ་ཞལ་འདེབས་སློང་བའམ་ཡང་ན། གནོད་ཐེབས་ས་ཁུལ་གྱི་དཀའ་ངལ་སེལ་བའི་ལས་གང་ཡིན་རུང་། མུ་ལི་དགོན་པས་དགེ་འདུན་པ་རྣམས་ནམ་ཡང་མགོ་བོ་དགྱེས་ནས་དཀའ་སྡུག་གི་མདུན་དུ་མཆོངས། དགེ་བའི་སྤྱོད་པའི་ལས་འདི་ལ་སྤྱི་ཚོགས་ལས་རིགས་ཁག་གི་བསྔགས་བརྗོད་ཐོབ་ལ། ས་གནས་དེ་གའི་སྤྱི་ཕན་དགེ་སྒྲུབ་བྱ་གཞག་གི་དར་ཆ་ཞིག་ཏུ་གྱུར་ཏེ་མི་རིགས་མི་འདྲ་བའི་མང་ཚོགས་དཀའ་ཁག་ཅན་དག་ལ་མེས་རྒྱལ་ཁྱིམ་ཚང་ཆེན་མོའི་དྲོ་སྐྱིད་དངོས་སུ་ཚོར་ཐུབ་པ་བྱས། སྔོ་ལྗང་རི་ཀླུང་སྲུང་སྐྱོང་བྱས་ནས། མཛེས་པའི་ཁྱིམ་གཞིས་མཉམ་དུ་བསྐྲུན། མུ་ལི་དགོན་ཆེན་སྐྱེ་ཁམས་ཚོར་སྐྱེན་ཁུལ་དུ་ཆགས་ཡོད་ལ་དགེ་འདུན་པར་རི་ལྗང་ཆུ་སྔོ་ནི་གསེར་རི་དངུལ་རི་ལས་ཀྱང་ལྷག་པའི་འདུ་ཤེས་ཟབ་མོ་ཆགས་ཡོད། དགོན་པས་སྐྱེ་ཁམས་ཁོར་ཡུག་སྲུང་སྐྱོང་གི་འདུ་ཤེས་དར་སྤེལ་ཤུགས་ཆེན་བཏང་ནས་དད་ལྡན་མང་ཚོགས་ལ་རྩྭ་དང་རྩི་ཤིང་། རི་སྐྱེས་སྲོག་ཆགས་ལ་སྲུང་སྐྱོང་བྱ་རྒྱུའི་ཁྲིད་སྟོན་བྱས། དགེ་འདུན་པ་དང་དད་ལྡན་མང་ཚོགས་སྒྲིག་འཛུགས་བྱས་ཏེ་དུས་བཅད་ལྟར་དགོན་སྡེའི་མཐའ་འཁོར་གྱི་གད་སྙིགས་གཙང་སེལ་གྱི་བྱེད་སྒོ་སྤེལ། འོད་ནུས་སོགས་ནུས་རྒྱུ་གཙང་མ་ཁྱབ་གདལ་དང་བེད་སྤྱོད་བྱས་ནས་སྲོལ་རྒྱུན་གྱི་འབར་རྫས་ཟད་གྲོན་ཉུང་དུ་བཏང་ནས་མུ་ལིའི་གནམ་སྔོན་པོ་དང་སྤྲིན་དཀར་པོ། རི་ལྗང་ཆུ་སྔོ་ལ་སོགས་པ་སྲུང་སྐྱོབ་བྱེད་པ་ཁ་ནས་བཤད་པ་ཙམ་མ་ཡིན་པར། དངོས་སུ་ལག་ལེན་དུ་བསྟར་ཏེ་བུ་རབས་ཚ་རྒྱུད་ལ་རྒྱུན་མཐུད་ངང་འཕེལ་རྒྱས་འགྲོ་བར་སྐྱེ་ཁམས་ཀྱི་རྨང་གཞི་བཏིང་།
དུས་བསྟུན་མདུན་སྐྱོད་དང་དྲང་སྲུང་གསར་གཏོད་རྒྱུན་འཁྱོངས་བྱས་ནས་ཆོས་ལུགས་ཀྲུང་གོ་ཅན་དུ་འགྱུར་བའི་ལམ་བུ་གསར་པ་འཚོལ་ཞིབ་བྱས།
དམངས་གཙོའི་དོ་དམ་འཐུས་ཚང་དུ་བཏང་ནས། བཅོས་སྐྱོང་གི་ཕན་ནུས་ཆེ་རུ་བཏང་།
དགོན་པས་དམངས་གཙོ་དོ་དམ་ཨུ་ལྷན་སྲོག་ཤིང་རུ་བྱས་པའི་དེང་རབས་ཀྱི་དམངས་གཙོའི་དོ་དམ་ལམ་ལུགས་འཐུས་སྒོ་ཚང་བའི་སྒོ་ནས་བཙུགས། དམངས་གཙོ་དོ་དམ་ཨུ་ལྷན་གྱི་ཁོངས་མི་ནི་གྲྭ་དམངས་ཀྱིས་དམངས་གཙོའི་འདེམས་བསྐོ་བྱས་ནས་གདམ་པ་དང་དོ་དམ་ལས་དོན་ཡོངས་བསྒྲགས་ཁ་གསལ་ཡིན། དོན་དག་གལ་ཆེན་ལ་ཐུན་མོང་གིས་ཇུས་ཐག་བཅད། ནོར་དོན་ལམ་ལུགས་ཚད་ལྡན་དང་གཟབ་ནན་ཡིན་ལ། དུས་བཅད་ལྟར་དགེ་འདུན་པ་དང་གཙོ་གཉེར་སྡེ་ཚན་ལ་གཏོང་ཡོང་གི་གནས་ཚུལ་སྙན་ཞུ་བྱས་ནས་དགོན་སྡེའི་དོ་དམ་ཚད་ལྡན་ཅན་དང་། དམངས་གཙོ་ཅན། ཁྲིམས་སྐྱོང་ཅན་གྱི་ཆུ་ཚད་མཐོ་རུ་ཕྱིན། སློབ་དོན་བྱེད་སྒོ་ཚད་ལྡན་དུ་བཏང་ནས། སྐྱོན་བྲལ་ངང་རྒྱུན་འཛིན་བྱ་རྒྱུར་སྐུལ་འདེད་བཏང་། རྒྱལ་ཁབ་ཀྱི་ཆོས་ལུགས་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ནན་པོ་བྱས་ནས་ཆོས་ལུགས་བྱེད་སྒོ་ཆེ་གྲས་ཚང་མ་ཁྲིམས་ལྟར་ཆོག་མཆན་ཐོབ་རྗེས་གོ་རིམ་ལྡན་པའི་ངང་སྤེལ། ཆོས་སྦྱོང་འཛིན་གྲྭར་དོ་དམ་བྱེད་ཤུགས་ཆེ་རུ་བཏང་ནས་སྲོལ་རྒྱུན་ནང་བསྟན་གྱི་གསུང་རབ་རྒྱུན་འཛིན་བྱེད་པ་དང་ཆབས་ཅིག་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་། བཅའ་ཁྲིམས་ཁྲིམས་སྲོལ། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་སོགས་ཀྱི་ནང་དོན་སློབ་ཁྲིད་ནང་འདྲེས་པར་བྱས་ཏེ། ན་གཞོན་དགེ་འདུན་པ་རྣམས་ཆོས་འཆད་ཉན་ལ་མཁས་ཤིང་དེང་རབས་ཀྱི་བྱང་ཚད་ལྡན་པ། རྒྱལ་གཅེས་ཆོས་གཅེས་ཀྱི་ཤེས་ལྡན་མི་སྣ་ཚད་ལྡན་ཞིག་ཏུ་འགྱུར་བར་ཁྲིད་སྟོན་བྱས། ཞབས་འདེགས་ཞུ་སྟངས་གསར་དུ་བཏོད་ནས། དེང་རབས་འཚོ་བའི་ཁྲོད་འདྲེས་པར་བྱས། དགོན་པས་ཆ་འཕྲིན་ཅན་གྱི་དུས་རབས་ཀྱི་བླང་བྱ་དང་རང་འགུལ་ངང་འཚམ་པ་བྱས་ཏེ། ཆོས་ལུགས་ཀྱི་བརྗིད་ཉམས་ལྟ་སྒོམ་སྤྱོད་གསུམ་རྒྱུན་སྐྱོང་བའི་སྔོན་འགྲོའི་ཆ་རྐྱེན་འོག འཕྲིན་སྦྱོར་སྟེགས་བུ་གསར་པ་སྤྱད་དེ་ཏང་གི་སྲིད་ཇུས་དྲིལ་བསྒྲགས་དང་། དད་སྦྱོར་ཡང་དག་དར་སྤེལ། ཉམས་འགྱུར་བཟང་པོ་མངོན་པའི་སྐོར་ལ་འཚོལ་ཞིབ་དང་བཀོལ་སྤྱོད་བྱས། དུས་མཚུངས་སུ་ནང་བསྟན་གྱི་ཆོས་དོན་དགོངས་འགྲེལ་ཁྲོད་སྤྱི་ཚོགས་འཆམ་མཐུན་དང་ཀུན་སྤྱོད་ལེགས་སྒྱུར། སེམས་ཁམས་གསོ་བ་སོགས་ཀྱི་ཐད་ལ་དགེ་མཚན་ལྡན་པའི་རྒྱུ་རྐྱེན་ལ་བསམ་གཞིགས་ཧུར་ཐག་བྱས་ཏེ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་སྔར་ལས་གཏིང་ཟབ་བྱས་ནས། དེ་ལ་དུས་རབས་ཀྱི་ནང་དོན་གསར་པ་དང་དེང་རབས་ཀྱི་མཚོན་སྟངས་གསར་པ་བསྩལ་ནས་དེའི་སྤྱི་ཚོགས་དཔལ་ཡོན་ཡར་ཐོན་ལ་སྐུལ་འདེད་ཁྲོད་ཐོན་པའི་ནུས་པ་ཆེ་རུ་བཏང་།
མུ་ལི་དགོན་པས་ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་ཕན་ཚུན་འཚམ་པ་ནི་དགོས་ངེས་ཤིག་ཡིན་པར་མ་ཟད་དངོས་སུ་སྤྱད་ཆོག་པ་དེ་ཡང་ལག་ལེན་དངོས་ཀྱི་སྟེང་ནས་ར་སྤྲོད་གཏིང་ཟབ་བྱས། དེའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཐད་ལ་བཞག་པའི་བྱས་རྗེས་ལ་ཏང་དང་སྲིད་གཞུང་གི་གདེང་འཇོག་ཚད་མེད་ཐོབ་པར་མ་ཟད།"སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་དཔེ་སྟོན་སྡེ་ཚན"སོགས་ཀྱི་གཟི་བརྗིད་མཚན་སྙན་ཐོབ། རྒྱལ་གཅེས་ཆོས་གཅེས་ཐད་བཅངས་པའི་བསམ་པ་ལྷག་བསམ་ཅན་དང་མཐུན་སྒྲིལ་ལ་སྐུལ་འདེད་གཏོང་བའི་གོམ་སྟབས་བརྟན་པོ། སྤྱི་ཚོགས་ལ་ཞབས་འདེགས་ཞུ་བའི་སྙིང་རྗེ་དགེ་སྒྲུབ་ཀྱི་ལས་བཅས་ཀྱིས"ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། བློ་སེམས་གཅིག་གིས་ཀྲུང་གོའི་ཕུགས་འདུན་མཉམ་དུ་བསྐྲུན"ཞེས་པའི་དུས་རབས་ཀྱི་བརྗོད་བྱ་གཙོ་བོ་གསོན་ཉམས་ལྡན་པའི་སྒོ་ནས་གསལ་འགྲེལ་བྱས། བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་དང་བོད་འབྲེལ་ས་ཁུལ་གྱི་ཁུལ་དང་དང་རྫོང་གི་ཡུན་རིང་བདེ་འཁོད་དང་དར་རྒྱས་གོང་འཕེལ་ཆེད་དུ་འོད་སྟོང་འཕྲོ་བའི་མིག་དཔེ་བཏོད་ནས། མཐུན་སྒྲིལ་འབད་འཐབ་དང་དར་རྒྱས་གོང་འཕེལ་གྱི་བགྲོད་ལམ་སྟེང་བསྐྱོད་པར་འོད་སྣང་སྦྱིན། །