སི་ཁྲོན་རྒྱང་བསྒྲགས་བརྙན་འཕྲིན་ཁང་རྒྱང་བསྒྲགས་མཉམ་འདྲེས་འཕྲིན་སྦྱོར་ལྟེ་གནས་མི་རིགས་རླུང་འཕྲིན་ལས་ཁུངས་ནི་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་དུ་གཞིས་ཆགས་ཡོད། འདི་ནི་སི་ཁྲོན་རྒྱང་བསྒྲགས་བརྙན་འཕྲིན་ཁང་གི་ཐད་གཏོགས་སྡེ་ཁག་ཅིག་ཡིན་ལ། རིག་གནས་དང་ལུས་རྩལ། རོལ་རྩེད་བཅས་ཀྱི་ཁོངས་སུ་གཏོགས། སི་ཁྲོན་རྒྱང་བསྒྲགས་བརྙན་འཕྲིན་ཁང་རྒྱང་བསྒྲགས་འཕྲིན་སྦྱོར་ལྟེ་གནས་མི་རིགས་རླུང་འཕྲིན་ནི་སྔོན་གྱི་སི་ཁྲོན་མི་དམངས་རྒྱང་བསྒྲགས་བརྙན་འཕྲིན་ཁང་མི་རིགས་རླུང་འཕྲིན་ཡིན། 1955ལོར་གཏོང་འགོ་བརྩམས་པའི་བོད་སྐད་རྒྱང་བསྒྲགས་དང་། 1979ལོར་གཏོང་འགོ་བརྩམས་པའི་དབྱིས་སྐད་རྒྱང་བསྒྲགས་བཅས་འདུས་ཡོད་ལ། རྒྱལ་ཡོངས་སུ་བོད་སྐད་དང་། དབྱིས་སྐད། རྒྱ་སྐད་བཅས་སྐད་གསུམ་དུས་ཐོག་ཏུ་མཉམ་དུ་རྒྱང་བསྒྲགས་བྱེད་པའི་ཞིང་ཆེན་རིམ་པའི་འཕྲིན་སྦྱོར་གཅིག་པུ་དེ་རེད། མིག་སྔར་ལས་སྒྲུབ་མི་སྣ་41ཡོད་ལ། དེའི་ཁྲོད་དུ་བོད་རིགས་23དང་། དབྱིས་རིགས་12 རྒྱ་རིགས་6བཅས་ཡོད། དེའི་ཁྲོད་ལས་མི་22ནི་ཀྲུང་གུང་ཏང་ཡོན་ཡིན་པ་དང་།
ལས་མི་15ལ་རབ་འབྱམས་པའི་ཡོན་གནས་ཡན་ཐོབ་ཡོད། མཐོ་རིམ་ཡན་གྱི་ཆེད་ལས་གོ་མིང་ཐོབ་པའི་ལས་སྒྲུབ་མི་སྣ་17ཡོད་ལ། དེ་ཡིས་ལས་མི་ཡོངས་ཀྱི་41%ཟིན་ཡོད། ཉིན་རེར་ཆུ་ཚོད་19རིང་གི་རྒྱང་བསྒྲགས་ལེ་ཚན་གཏོང་གི་ཡོད་པ་དང་། བསྡོམས་པས་ལེ་ཚན་32གཙོ་སྒྲུབ་བྱེད་བཞིན་ཡོད། གསར་འགྱུར་ལེ་ཚན་གཙོ་བོར་འཛིན་པ་དང་། སྤྱི་ཚོགས་སློབ་གསོ་དང་རིག་རྩལ་ལེ་ཚན་སོགས་སྤེལ་བཞིན་ཡོད། ཉིན་གཅིག་གི་སྔ་དྲོ་དང་ཉིན་གུང་། ཕྱི་དྲོ། དགོང་མོ་བཅས་དུས་བཞི་ཡི་ལེ་ཚན་གྱི་རྣམ་པ་མི་འདྲ་ཡང་། ཕན་ཚུན་གཅིག་གིས་གཅིག་ལ་རྟེན་པའི་ལེ་ཚན་གྱི་སྒྲིག་གཞི་ཞིག་ཆགས་ཡོད། དེ་དང་ཆབས་ཅིག་དུས་རབས་ཀྱི་འཕོ་འགྱུར་དང་བསྟུན་ནས། འཕྲིན་སྦྱོར་གསར་པའི་ལམ་དུ་བསྐྱོད་གང་ཐུབ་བྱས་ནས། མི་རིགས་རྒྱང་བསྒྲགས་ཀྱི་འཕྲིན་སྦྱོར་གསར་པའི་དཔུང་ཁག་འཛུགས་པར་ཤུགས་རྒྱག་བཞིན་ཡོད་ལ། མིག་སྔར་དྲ་རྒྱའི་ཐོག་ཞེན་མི་འབུམ་6ལ་ཉེ་བ་ཡོད། ཉེ་བའི་ལོ་ལྔ་ཡི་རིང་ལ། མི་རིགས་རླུང་འཕྲིན་གྱི་བརྩམས་ཆོས《འཆི་མེད་རྡོ་རྗེ》ཞེས་པར་ཀྲུང་གོའི་གསར་འགྱུར་བྱ་དགའ་ཐོབ་པ་དང་། 《ས་ཁུལ་གསུམ་དང་ཁུལ་གསུམ་གྱི་ཆུ་ཚོད་ཉེར་བཞིའི་ཐག་གཅོད་རང་བཞིན་གྱི་འགྲན་སྡུར》ཞེས་པར་སི་ཁྲོན་གསར་འགྱུར་བྱ་དགའ་ཐོབ། དེ་མིན་སྡེ་ཁག་ཐུན་མོང་གི་བརྩམས་ཆོས་156ལ་ཞིང་ཆེན་རིམ་པ་ཡན་གྱི་བྱ་དགའ་ཐོབ་ཡོད།
འདུ་ཤེས་འཛིན་སྟངས་ཀྱི་གཡུལ་ས་བརྟན་པོར་སྲུང་ནས། གཙོ་རྒྱུག་གླེང་ཕྱོགས་ཀྱི་སྐད་གདང་ཇེ་ཆེར་གཏང་དགོས།
གཙོ་རྒྱུག་འཕྲིན་སྦྱོར་ཡིན་པའི་ཆ་ནས། མི་རིགས་རླུང་འཕྲིན་གྱིས་བསམ་བློའི་འགན་འཁྲི་བློ་བརྟན་འགྱུར་མེད་ཀྱིས་ལག་བསྟར་བྱས་ཏེ། ཏང་དབུ་བརྙེས་ནས་ལོ་ངོ་བརྒྱ་འཁོར་པ་དང་ཚོགས་ཆེན་ཉི་ཤུ་པ་སོགས་ལོ་རྒྱུས་ཀྱི་ལམ་ཆེན་སྟེང་གལ་འགངས་ཤིན་ཏུ་ཆེ་བའི་དོན་ཆེན་དང་། དེ་བཞིན་དབུལ་སེལ་འགག་སྒྲོལ་དང་གྲོང་གསེབ་དར་རྒྱས་སོགས་འགག་རྩའི་དུས་སྐབས་སུ་ཆེད་དོན་དྲིལ་བསྒྲགས་བྱེད་སྒོ་ཆེ་གྲས་རབ་དང་རིམ་པ་འཆར་འགོད་ཞིབ་ཚགས་བྱས་པར་མ་ཟད། རྒྱལ་ཁའི་ངང་སྤེལ་ཡོད། བསྟུད་མར་ཐེངས་བདུན་ལ་ཞིང་ལྗོངས་ལྔ་ཡི་བོད་སྐད་རྒྱང་བསྒྲགས་ལས་ཁུངས་རྩ་འཛུགས་བྱས་ནས། 《གངས་ལྗོངས་ཀྱི་འགྲུལ་བཞུད་གསར་པ》དང་《བདེ་སྐྱིད་ཀྱི་ལམ་བུའི་ཐོག་ཏང་གི་བཀའ་དྲིན་ཚོར་བ་དང་། བོད་མིས་འཕོ་འགྱུར་གླེང་བ》སོགས་མཉམ་འབྲེལ་གྱི་བཅར་འདྲིའི་བྱེད་སྒོ་སྤེལ་པ་དང་། བཅར་འདྲིའི་ཞབས་རྗེས་མདོ་དབུས་ས་མཐོའི་རི་ལུང་ཀུན་ཏུ་ཐོན་ཡོད་ལ། 《མི་རིགས་མཐུན་སྒྲིལ་གྱི་མེ་ཏོག་གསེར་རྟ་རུ་བཞད་པ》དང་། 《ནས་འབྲུ་ཆུང་ཆུང་དང་ཐོན་ལས་ཆེན་པོས་འབྲོག་པའི་ཕྱུག་འགྱུར་གྱི་ཕུགས་འདུན་མངོན་འགྱུར་བྱས》ཞེས་པ་སོགས་རྩམ་དྲི་མ་ཡལ་ཞིང་དྲོད་ཁོལ་ལྡན་པའི་བརྩམས་ཆོས་150ལྷག་ཞིང་ཆེན་ལྔ་ཡི་བོད་སྐད་རྒྱང་བསྒྲགས་ཀྱི་འཕྲིན་སྦྱོར་སྟེགས་བུ་གསར་པ་བརྒྱུད་ནས། གངས་ཅན་མཐོ་སྒང་གི་མཐུན་སྒྲིལ་གྱི་འབོད་སྐུལ་དང་བདེ་སྐྱིད་ཀྱི་བསྟོད་གླུ་ཡི་བྲག་ཆ་ཕྱོགས་བཞིར་ཁྱབ་བཅུག་ཡོད། ཞིང་ཆེན་ཡོངས་ཀྱི་དབྱིས་སྐད་འཕྲིན་སྦྱོར་གཙོ་བོར་སྣེ་ཁྲིད་པ་དང་སྒྲིག་འཛུགས་བྱས་ནས《མཛེས་སྡུག་ལྡན་པའི་དབྱིས་གྲོང་གི་འགྱུར་ལྡོག་ཆེན་པོ་མཐོང་བ》དང་། 《དབྱིས་གྲོང་དུ་བསྐྱོད་ནས་དར་རྒྱས་མཐོང་བ》སོགས་གསར་འགྱུར་ལས་འགུལ་འཆར་འགོད་བྱས་ནས་བདེ་ལེགས་ངང་སྤེལ་བ་དང་། 《ཀྲའོ་ཅུའེ་སན་ཧོ་གྲོང་ཚོ། རི་ཀླུང་ལྟ་ན་སྡུག་ཅིང་འཚོ་བ་སྦྲང་རྩི་ལས་མངར་བ》ཞེས་པ་དང་། 《ཡུས་ཞིའི་བྱང་ཕྱོགས་ཀྱི་འདུས་སྡེ། ཞང་གྲོང་གི་མི་གྲོང་ཁྱེར་གྱི་མི་ལ་འགྱུར་པ》ཞེས་པ་སོགས་འཕྲིན་སྦྱོར་གསར་པའི་བརྩམས་ཆོས་40ལྷག་སྒྲིག་བཟོ་བྱས་ལ། གསོན་ཉམས་ལྡན་པའི་སྒོ་ནས་དུས་རབས་ཀྱི་འཕོ་འགྱུར་ཟིན་ཐོར་བཀོད་ནས་འཕེལ་རྒྱས་ཀྱི་སྟོབས་ཤུགས་སྲ་བརྟན་བཏང་། འཕྲིན་སྦྱོར་གསར་པའི་གསར་འགྱུར་རིགས་ཀྱི་དཔྱད་བརྗོད་ལེ་ཚན《སྐབས་དོན་གསར་འགྱུར》གསར་བཟོ་བྱས་ཏེ། དམངས་ཀྱི་དོ་སྣང་བྱེད་བཞིན་པའི་དམངས་འཚོ་དང་སྲིད་ཇུས་སོགས་མང་ཚོགས་ཀྱི་གོ་སླ་བའི་སྐད་ཆའི་ཐོག་ནས་བརྒྱུད་བསྒྲགས་བྱས་པས། ལེ་ཚན་རེར་ཆ་སྙོམས་ལྟད་མོ་བ་འབུམ་གཅིག་ཁྲི་གཉིས་ཡན་འདུག་པས། སྲིད་ཇུས་དྲིལ་བསྒྲགས་བྱེད་པའི་ཡིད་རྟོན་རུང་བའི་སྟེགས་བུ་གཙོ་བོ་ཞིག་ཏུ་གྱུར་ཡོད། བསྟུད་མར་ལོ་བཞིའི་རིང་ལ་ཁྲིམས་ལུགས་སློབ་གསོའི་མུ་འབྲེལ་བརྙན་ཐུང་《མི་ཚེའི་སྤང་བླངས》ཞེས་པ་བཏོན་པ་ན། དྲ་ཐོག་ནས་ལྟ་མཁན་ས་ཡ་བདུན་འབུམ་དྲུག་ལྷག་ཡོད་པ་དང་། མི་རིགས་སྐད་ཡིག་གི་ལམ་ནས་བཅའ་ཁྲིམས་སློབ་གསོ་སྤེལ་པའི་ལེ་ཚན་ལས་དཔུང་ཁག་དང་པོ་རུ་ཚུད་ཡོད།
མི་སེམས་གཅིག་ཏུ་བསྡུས་ནས་མཐུན་སྒྲིལ་ལ་སྐུལ། རིག་ནུས་གཅིག་དུ་བསྡུས་ནས་ལེའུ་གསར་པ་བསྐྲུན།
མི་རིགས་རླུང་འཕྲིན་གྱིས་བརྗོད་སྟངས་རྣམ་པ་གསར་གཏོད་བྱས་ཏེ། སྤོབས་པ་ཆེན་པོས་ཀྲུང་ཧྭ་མི་རིགས་ཁྱིམ་ཚང་གཅིག་ཏུ་གཅེས། ཀྲུང་གོའི་ཕུགས་འདུན་མཉམ་དུ་འཛུགས་སྐྲུན་བྱེད་ཅེས་པའི་བརྗོད་དོན་གཙོ་བོའི་དྲིལ་བསྒྲགས་ལས་ཀ་ཧུར་ཐག་གིས་སྤེལ་པ་དང་། ཕུལ་བྱུང་བརྩམས་ཆོས་དང་ཞབས་ཞུ་ལ་བརྟེན་ནས་མི་དམངས་ལ་མཐུན་སྒྲིལ་དང་མཐུན་སྒྲིལ་ལ་སྐུལ་འདེད་བྱེད་པ་དམིགས་ཡུལ་དུ་འཛིན་པའི་ལས་ཀ་སྤེལ་ཡོད། བསྟུད་མར་ལོ་བཅུའི་རིང་ལ་མི་རིགས་ས་ཁུལ་དུ་སོང་ནས་སི་ཁྲོན་མི་རིགས་རླུང་འཕྲིན་བོད་རིགས་དང་དབྱིས་རིགས་ས་ཁུལ་དུ་བསྐྱོད་པ་ཞེས་པའི་རིག་གནས་སྤྱི་ཕན་བྱེད་སྒོ་ཐེངས་ཉེར་གཉིས་སྤེལ་ཏེ། མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ཡོང་བར་འབད་འཐབ་བྱ་དགོས་ཞེས་པའི་བརྗོད་དོན་གཙོ་བོའི་བྱེད་སྒོ་སྤེལ་ཏེ། བྱེད་སྒོ་དེར་མི་ཁྲི་ལྷག་ལྷན་དུ་འཛོམས་ཤིང་། ལྟད་མོ་བ་འབུམ་གསུམ་ལྷག་གིས་ཐད་གཏོང་ལ་བལྟས་ཡོད་ལ། མི་རིགས་ས་ཁུལ་གྱི་ལྟད་མོ་བ་ཚོའི་དགའ་བསུ་ཆེན་པོ་ཐོབ་པའི་སྤྱི་ཕན་ཚོང་རྟགས་ཤིག་ཏུ་གྱུར་ཡོད། མི་རིགས་མཐུན་སྒྲིལ་དང་ཕུལ་བྱུང་སྲོལ་རྒྱུན་རིག་གནས་སོགས་བརྗོད་བྱ་གཙོ་བོར་བཟུང་ནས། སྤུས་ཀ་ཡག་པའི་རླུང་འཕྲིན་ཟློས་གར《ལུག་མིག་མེ་ཏོག་བཞད་པ》ཞེས་པ་དང་། 《རི་འདིའི་ཕར་རྒྱབ། གཡང་གཟར་སྡེ་པའི་བྱིས་པ་ཚོ》ཞེས་པ་སོགས་ཕུལ་དུ་བྱུང་བའི་རླུང་འཕྲིན་ཟློས་གར་གསར་རྩོམ་བྱས་པས། གཏམ་རྒྱུད་རྣམ་པའི་སྒྲ་ཕབ་བརྩམས་ཆོས་ལ་བརྟེན་ནས་མི་རིགས་ས་ཁུལ་གྱི་མི་དམངས་ལ་སྤྱི་ཚོགས་རིང་ལུགས་ལྟེ་བར་འཛིན་པའི་རིན་ཐང་ལྟ་བ་དྲིལ་བསྒྲགས་བྱས་པ་དང་། མི་རིགས་སོ་སོའི་མི་དམངས་མང་ཚོགས་ཀྱིས་ཏང་ལ་བཀའ་དྲིན་ཞུས་པ་དང་ཁྱིམ་གཞིས་འཛུགས་སྐྲུན་བྱེད་པའི་བརྒྱུད་རིམ་ཁྲོད་བྱུང་བའི་མི་སེམས་འགུག་པའི་གཏམ་རྒྱུད་དྲིལ་བསྒྲགས་བྱས་ཡོད། ལོ་རེ་རེར་ཁམས་པའི་བརྙན་འཕྲིན་ཁང་དང་མཉམ་འབྲེལ་བྱས་ནས《བོད་ཀྱི་ལོ་གསར་དགོང་ཚོགས》འཚོགས་ནས། མདོ་དབུས་ས་མཐོའི་སྲོལ་རྒྱུན་རིག་གནས་དང་དུས་རབས་གསར་པའི་འཕོ་འགྱུར་གྱི་རྣམ་པ་གསར་པ་དང་། གངས་ཅན་ཁ་བའི་ལྗོངས་ཀྱི་བུ་དང་བུ་མོ་རྣམས་མཐུན་སྒྲིལ་བྱས་ནས་བདེ་སྐྱིད་འཚོ་བར་འབད་པའི་རྣམ་པ་གསར་པ་མངོན་གང་ཐུབ་བྱས་ལ། རྒྱལ་ཕྱི་ནང་གི་ལྟད་མོ་བ་མི་ཐེངས་ཁྲི་སྟོང་ཕྲག་ལས་བརྒལ་ཡོད།
2023ལོར། མི་རིགས་རླུང་འཕྲིན་གྱིས་སི་ཁྲོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ལྷན་དང་མཉམ་འབྲེལ་བྱས་ཏེ། སྐབས་བདུན་པའི་སི་ཁྲོན་ཞིང་ཆེན་གྱི་རྒྱ་དབྱིས་སྐད་གཉིས་ཀྱི་གཏམ་བཤད་འགྲན་བསྡུར་བདེ་ལེགས་ངང་སྤེལ་བ་དང་། སི་ཁྲོན་དང་ཁྲུང་ཆིང་། ཡུན་ནན། ལིའོ་ཉིང་། ཀན་སུའུ་སོགས་ཞིང་ཆེན་དང་རང་སྐྱོང་ལྗོངས་ནས་རྒྱ་རིགས་དང་། དབྱིས་རིགས། བོད་རིགས། ཧུའེ་རིགས། ཆའང་རིགས་སོགས་མི་རིགས་བཅུ་ལྷག་གི་འགྲན་ཞུགས་མི་སྣ་238གདན་ཐོག་གཅིག་ཏུ་འཛོམས་པ་དང་། འགྲན་ཞུགས་པ་རྣམས་ཀྱིས་སེམས་ཤུགས་གཅིག་སྒྲིལ་གྱིས་ཀྲུང་གོའི་ཕུགས་འདུན་མངོན་འགྱུར་བྱེད་ཅེས་པ་བརྗོད་བྱ་གཙོ་བོར་བཟུང་སྟེ། མི་རིགས་མཐུན་སྒྲིལ་གྱི་དཔེ་བཟང་གཏམ་རྒྱུད་གསོན་ཉམས་ལྡན་པའི་སྒོ་ནས་བཤད་པ་དང་། ལྷད་མེད་ཀྱི་བརྩེ་བ་ཟབ་མོ་དང་ཆེས་སྤྱིར་བཏང་གི་སྐད་ཆའི་ལམ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་ནང་དོན་ལ་གོ་བ་གཏིང་ཟབ་མོ་ཞིག་བླངས་པ་རེད། ཐོག་མའི་འགྲན་ཞུགས་མི་སྣ་238ཁྲོད་ནས་བརྩམས་ཆོས་84སི་ཁྲོན་དབྱིས་སྐད་རྒྱང་བསྒྲགས་ཀྱི་སྐད་འཕྲིན་སྤྱི་སྟེགས་དང་། སི་ཁྲོན་མི་རིགས་དང་ཆོས་ལུགས་ཞེས་པའི་སྐད་འཕྲིན་སྤྱི་སྟེགས་སྟེང་ཟླ་གཅིག་རིང་འགྲེམས་སྤེལ་བྱས་པ་དང་། ཁྱོན་བསྡོམས་ལྟ་མཁན་ས་ཡ་གཉིས་ལྷག་ཟིན་ཡོད། ཐེངས་འདིའི་འགྲན་བསྡུར་ཁྲོད་འགྲན་ཞུགས་མཁན་དང་མི་རིགས་ཆེས་མང་བ་དང་། ཁྱབ་རྒྱ་ཆེ་ཤོས། བརྩམས་ཆོས་འགྲེམས་སྟོན་ལ་མཐོང་ཆེན་བྱེད་ཚད་མཐོ་ཤོས་བཅས་ཀྱི་ཟིན་ཐོ་བཏོད་ཡོད། མི་རིགས་ཁག་དབར་ཕན་ཚུན་འབྲེལ་འདྲིས་དང་། འགྲོ་འོང་། མཉམ་འདྲེས་བཅས་ཀྱི་ལས་ཀར་སྐུལ་འདེད་ནུས་པ་ཆེན་པོ་ཐོན་ཡོད་པས། སྐབས་དེའི་ཞིང་ཆེན་ཏང་ཨུའི་རྒྱུན་ལས་ཨུ་ཡོན་དང་འཐབ་ཕྱོགས་གཅིག་གྱུར་པུའུ་ཡི་འགོ་འཛིན་བློ་མཐུན་ཀྲའོ་ཅུན་རྨིན་གྱིས་ཁས་ལེན་རང་བཞིན་གྱི་གདེང་འཇོག་ཆེན་པོ་གནང་ཡོད།
ལོ་ངོ་བདུན་ཅུའི་རིང་གི་འབད་བརྩོན་ལོ་ཟླའི་ཁྲོད། སྤྱི་ཡོངས་ལ་ཞབས་འདེགས་ཞུ་བའི་འགན་འཁྲི་མངོན་ཡོད།
ལོ་ངོ་བདུན་ཅུའི་རིང་ལ་རྩལ་ནུས་རྒྱུན་འཛིན་བྱས་པས། མི་རིགས་རྒྱང་བསྒྲགས་ལས་ཁུངས་ཀྱིས་ལོ་ཙཱ་དང་རྒྱང་བསྒྲགས་ཀྱི་ཉམས་མྱོང་ཕུན་སུམ་ཚོགས་པོ་བསགས་ཡོད། དུས་རབས་20བའི་ལོ་རབས་80པ་ནས་བཟུང་།
སི་ཁྲོན་ཞིང་ཆེན་གྱི་ཚོགས་ཆེན་གཉིས་ཀྱི་མི་རིགས་སྐད་ཡིག་གི་ཡིག་ཆ་སྤུས་ཀ་མཐོ་བའི་སྒོ་ནས་ལོ་ཙཱ་བྱེད་པ་དང་ཡུལ་དངོས་སྐད་སྒྱུར་བྱེད་པའི་འགན་ཁུར་ནས། ལོ་རེར་ཡིག་འབྲུ་འབུམ་བཞི་ཙམ་ལོ་ཙཱ་བྱས་པས། ཆེད་ལས་ཀྱི་སྙིང་སྟོབས་དང་གཟབ་ནན་རང་བཞིན་ལ་བསྟོད་བསྔགས་ཚད་མཐོན་པོ་ཐོབ་ཡོད། ཉེ་བའི་ལོ་གསུམ་གྱི་རིང་། ལོ་ཙཱའི་ཁོངས་མི་གཙོ་བོ་དག་རྒྱལ་ཡོངས་ཚོགས་ཆེན་གཉིས་ཀྱི་ལོ་ཙཱའི་ལས་ཀར་ཞུགས་པར་གདན་འདྲེན་ཞུས་པར་མ་ཟད། གྲོས་ཚོགས་ཀྱི་དྲུང་ཡིག་ཁྲུའུ་ཡི་ཁས་ལེན་གང་ལེགས་ཐོབ་ཡོད། ཡུལ་དངོས་སྐད་སྒྱུར་ལོ་ཙཱ་འགན་ལེན་གང་ལེགས་བྱེད་པ་དང་དུས་མཚུངས་སུ། ཚོགས་འདུའི་ཡུལ་དངོས་སུ་སོང་བའི་བོད་སྐད་དང་དབྱིས་སྐད་རུ་ཁག་གི་ལོ་ཙཱ་བ་དང་གསར་འགོད་པ་རྣམས་ཀྱིས་ཚོགས་འདུའི་ཡུལ་དངོས་ཀྱི་སྐད་སྒྱུར་ལས་ཀ་འགན་ལེན་བྱས་པར་མ་ཟད། དུས་ཐོག་ཏུ་ཚོགས་ཆེན་གཉིས་ཀྱི་དགོངས་དོན་བརྒྱུད་བསྒྲགས་བྱས་པ་རེད། གཞན་ཡང་ཉེ་བའི་ལོ་ཤས་རིང་ལ། མི་རིགས་རླུང་འཕྲིན་ལས་ཁུངས་བོད་སྐད་དང་དབྱིས་སྐད་ཡིག་རུ་ཁག་གིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། འབྲེལ་ཡོད་སྡེ་ཁག་བཅས་ལ་སྲིད་ཇུས་དང་ཁྲིམས་སྲོལ་ལོ་ཙཱའི་འགན་འཁུར་ཡོད། མི་རབས་མང་པོའི་མི་རིགས་རྒྱང་བསྒྲགས་པ་རྣམས་ཀྱིས་སྔ་ཕྱི་བར་གསུམ་དུ་མཐུན་སྒྲིལ་རྡོག་རྩ་གཅིག་སྒྲིལ་དང་། ཆེད་ལས་ཀྱི་སྙིང་སྟོབས་ལ་བརྟེན་ནས་ཁྱོན་ཡོངས་ལ་ཞབས་འདེགས་ཞུ་བ་དང་། སི་ཁྲོན་མི་རིགས་ས་ཁུལ་གྱི་འཕེལ་རྒྱས་དང་བརྟན་ལྷིང་གི་གླེང་ཕྱོགས་ཀྱི་རྨང་གཞི་སྲ་བརྟན་བཏང་ཡོད་པར་མ་ཟད། འཕྲིན་སྦྱོར་སྟེགས་བུ་མང་པོ་བརྒྱུད་ནས་ཁ་བྲལ་རིང་ལུགས་ལ་ངོ་རྒོལ་བྱེད་པའི་འཐབ་རྩོད་ལ་ཤུགས་བརྒྱབ་སྟེ། དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་གྱི་བསྟོད་གླུ་འབུལ་ཡོད།
ལོ་ངོ་བདུན་ཅུའི་འགྲུལ་བཞུད་ཀྱི་ལོ་ཟླ་ལ་ཕྱིར་མིག་ཅིག་བལྟས་ན། སི་ཁྲོན་རྒྱང་བསྒྲགས་བརྙན་འཕྲིན་ཁང་རྒྱང་བསྒྲགས་འཕྲིན་སྦྱོར་ལྟེ་གནས་མི་རིགས་རླུང་འཕྲིན་ནི་བློ་དཀར་པོའི་ལོ་ཙཱ་བ་དང་འགྲེལ་བཤད་པ་མནལ་མ་ཞིག་ཡིན་པ་མཐོང་ཐུབ་ལ། མི་རིགས་རླུང་འཕྲིན་གྱིས་འགན་འཁྲི་ལྕི་མོ་ཕྲག་ཏུ་ཁུར་ནས་ཏང་དང་སྲིད་གཞུང་གི་སྲིད་ཇུས་གནད་ལ་འཁེལ་པའི་སྒོ་ནས་དྲིལ་བསྒྲགས་བྱེད་པ་དང་། ཀྲུང་ཧྭ་མི་དམངས་ཐུན་མོང་ཚོགས་པའི་འདུ་ཤེས་ཇེ་དྲག་ཏུ་གཏོང་བ་གཙོར་བཟུང་ནས། མི་རིགས་ས་ཁུལ་འཆམ་མཐུན་བརྟན་ལྷིང་དང་། དཔལ་འབྱོར་འཕེལ་རྒྱས། རིག་གནས་དར་རྒྱས་བཅས་ཡོང་བར་ཚབ་བྱེད་ཐབས་བྲལ་བའི་བྱས་རྗེས་ཆེན་པོ་བཞག་ཡོད། མི་རིགས་མང་པོ་འདུས་པའི་ཕུལ་བྱུང་དཔུང་སྡེ་འདི་ཡིས་ལྷག་བསམ་རྣམ་དག་དང་། འགན་འཁྲི་གཙང་ཁུར། ཆེད་ལས་དང་དགའ་ཞེན་བཅས་ལ་བརྟེན་ནས། ཏང་དང་མི་རིགས་ས་ཁུལ་གྱི་མི་དམངས་མང་ཚོགས་བར་སེམས་དང་བརྩེ་བ་སྦྲེལ་བའི་འབྲེལ་ཟམ་བསྐྲུན་ཡོད་ལ། འདི་དག་ནི་དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་གྱི་མིག་དཔེ་གསོན་པོ་ཞིག་རེད། །