ཧུང་ཡོན་རྫོང་སློབ་གསོ་ཅུས། མཐུན་སྒྲིལ་གྱི་རྩ་བར་བརྟེན་ནས“སེ་འབྲུའི་མེ་ཏོག་སྐྱོང་བ”

ཧུང་ཡོན་རྫོང་སློབ་གསོ་ཅུས་ནི་སི་ཁྲོན་ཞིང་ཆེན་ཧུང་ཡོན་རྫོང་དུ་གནས་ཤིང་ཡུལ་ཤོག་གི་ཁོའོ་རིམ་པའི་ཏང་སྲིད་ལས་ཁུངས་སུ་གཏོགས། ད་ལྟ་རྒྱ་རིགས་དང་བོད་རིགས། ཆའང་རིགས་སོགས་མི་རིགས་ཁག་གི་ལས་བྱེད་པ་དང་ལས་བཟོ་པ་39ཡོད་པ་དང་། ཐུན་མོང་ཐོག་ཧུང་ཡོན་རྫོང་གི་སློབ་གསོ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ལས་འགན་ལྗིད་པོ་ཕྲག་ཏུ་འཁུར་ཡོད། ཅུས་དེ་གས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་བྱ་རྒྱུ་མཐའ་འཁྱོངས་བྱས་ཏེ་ཞི་མཐུན་སློབ་གསོ་འཛུགས་སྐྱོང་དང་མི་རིགས་མཐུན་སྒྲིལ་ལ་སྐུལ་འདེད་གཏོང་བ་དང་། སློབ་ཁྲིད་ཀྱི་སྤུས་ཚད་མཐོ་རུ་གཏོང་བའི་འདུ་ཤེས་རྒྱུན་འཛིན་བྱས་ནས་སློབ་གསོའི་ས་གཤིན་གཏིང་ཟབ་ཏུ་བཏང་སྟེ། “ཏང་འཛུགས་སྐྱོང་གིས་སྣེ་ཁྲིད་པ་དང་། སློབ་ཚན་གྱིས་བཞའ་སིམ་པ། ལག་ལེན་གྱིས་མི་གསོ་སྐྱོང་། སྤེལ་རེས་མཉམ་འདྲེས”བཅས་རྩ་བཞིའི་མཉམ་འགུལ་ལ་བརྟེན་ནས་མི་རིགས་མཐུན་སྒྲིལ་ཡར་ཐོན་གྱི་སློབ་གསོ་དེ་མི་གསོ་སྐྱོང་བྱེད་པའི་བརྒྱུད་རིམ་ཧྲིལ་པོའི་ནང་མཉམ་འདྲེས་གཏིང་ཟབ་བྱས་ཏེ། སྔ་རྗེས་སུ“སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་དཔེ་སྟོན་ལས་ཁུངས”དང་“རྒྱལ་ཡོངས་སྐབས་བརྒྱད་པའི་སློབ་གྲྭ་འབྲིང་ཆུང་གི་སྒྱུ་རྩལ་འཁྲབ་སྟོན་བྱེད་སྒོའི་ཕུལ་བྱུང་རྩ་འཛུགས་བྱ་དགའ”སོགས་ཀྱི་མཚན་སྙན་ཐོབ།

ཏང་འཛུགས་སྐྱོང་གིས་མཉམ་ཤུགས་གཅིག་སྒྲིལ་ལ་སྣེ་ཁྲིད་བྱས་ཏེ། བློ་གཅིག་སེམས་གཅིག་གིས་མཐུན་སྒྲིལ་མེ་ཏོག་ལ་ཆུ་བླུགས་པ།

ཉེ་བའི་ལོ་ཤས་རིང་། ཧུང་ཡོན་རྫོང་སློབ་གསོ་ཅུས་ཀྱིས་གསར་གཏོད་ལག་བསྟར་བྱས་པའི“གསར་བརྗེའི་སྣེ་ཁྲིད་དང་སེམས་མཐུན་སྨྱུག་གསོའི”རྣམ་གྲངས་དེས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སློབ་གསོ་དེ་ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་བརྒྱུད་རིམ་ཧྲིལ་པོའི་ནང་མཉམ་འདྲེས་དམ་ཟབ་ཐུབ་ནས། “ཏང་འཛུགས་སྐྱོང་+མི་རིགས་མཐུན་སྒྲིལ་ཡར་ཐོན”གྱི་ཁྱད་ལྡན་མི་སྣ་གསོ་སྐྱོང་མ་ལག་ཅིག་བསྐྲུན་ཡོད་པ་རེད། “མི་རིགས་མཐུན་སྒྲིལ་གྱི་སློབ་གསོར‘ཏང་གི་བྲོ་བ’ལྡན་ལ‘བྲོ་གསར’ཡང་ལྡན་པ་བྱེད་དགོས” འདི་ནི་སློབ་གསོ་ཅུས་ཏང་ཨུའི་ཧྲུའུ་ཅིས་ལས་དོན་བཀོད་སྒྲིག་བྱེད་སྐབས་ནན་བཤད་བྱེད་པའི་གཙོ་གནད་ཅིག་རེད། དེར་བརྟེན་ཅུས་དེ་གས“ཧྲུའུ་ཅིས་མཐུན་སྒྲིལ་ལ་སྣང་ཆེན་བྱེད་པ”དང་“ཏང་ཡོན་གྱིས་བློ་སེམས་གཅིག་མཐུན་ཡོང་བ་བྱེད་པ”སོགས་ཁྱད་ལྡན་ཏང་གི་སློབ་ཚན་གྱི་སྤུས་རྟགས་བཏོད་དེ། རིམ་རྩིས་བྱས་ན་ཆེད་དོན་ཏང་གི་སློབ་ཚན་ཐེངས་22འཚོགས་པ་དང་“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བའི”བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་ཐེངས་6སྤེལ་བ་རེད། མིག་མཐོང་ལག་ཟིན་དང་མྱོང་ཚོར་ཐུབ་པའི་བྱ་ཐབས་སྤྱད་དེ་ཏང་ཡོན་ལས་བྱེད་པས་བསམ་བློ་དང་བྱ་སྤྱོད་ཐད་མི་རིགས་མཐུན་སྒྲིལ་གྱི་རྨང་གཞི་བརྟན་དུ་གཏང་རྒྱུར་སྐུལ་འདེད་བཏང་ནས། མི་རིགས་མཐུན་སྒྲིལ་གྱི་སློབ་གསོ་དངོས་སུ་གསོན་ཉམས་དོད་པོ་ཡོང་བ་བྱེད་པ་དང་མི་རིགས་མཐུན་སྒྲིལ་གྱི་མེ་ཏོག་དེ་ཏང་དར་གྱི་འོད་མདངས་འོག་དེ་བས་མཛེས་སྡུག་ལྡན་པའི་འོད་མདངས་འཕྲོ་བ་བྱས་དང་བྱེད་བཞིན་ཡོད།

སློབ་གསོའི་གཡུལ་ས་གཙོ་བོར་གཞི་ཚུགས་ཏེ་ཧུང་ཡོན་རྫོང་སློབ་གསོ་ཅུས་ཀྱིས“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི”སྲིད་དོན་བསམ་བློའི་སློབ་ཚན་རྩེ་གྲ་7ཞིབ་ཚགས་ངང་བཏོད་དེ། “སློབ་ཁང་གི་སློབ་ཁྲིད+ལག་ལེན་ཉམས་ལེན+རིག་གནས་བཞའ་སིམ་པ”བཅས་ཀྱི་ལངས་གཟུགས་ཅན་གྱི་སློབ་གསོའི་རྣམ་པ་བཏོད་པ་རེད། “མི་རིགས་མཐུན་སྒྲིལ་གྱི་སློབ་ཁང་ཆེན་མོ”དང་“དབྱིས་ཧའེ་མནའ་འབྲེལ”གྱི་གཏམ་རྒྱུད་ཀྱིས་སློབ་མ་ཚོར་མི་རིགས་ཁག་ཚང་མ་ཁྲག་རྒྱུན་གཅིག་ཏུ་འབྲེལ་བའི་ཁྱིམ་ཚང་གཅིག་གི་མི་ཡིན་པ་ཤེས་སུ་བཅུག “ངོས་འཛིན་གཅིག་མཐུན་ལྔའི”བརྗོད་དོན་གཙོ་བོའི་སློབ་གསོ་ལག་ལེན་བྱེད་སྒོའི་ཁྲོད་སློབ་མ་རྣམས་ཀྱིས“མི་རིགས་ཀྱི་གོས་ཤོམ”དང་“མི་རིགས་ཀྱི་གླུ་གཞས་ཚང་མས་ལེན་པ”སོགས་ཁྱད་ལྡན་བྱེད་སྒོ་བརྒྱུད་མི་རིགས་མཐུན་སྒྲིལ་ཡར་ཐོན་གྱི་ས་བོན་ཕྲུ་གུ་ཚོའི་སེམས་ནང་རྩ་བ་ཚུགས་པ་དང་མྱུ་གུ་འབུས་ཐུབ་པ་བྱས་ཡོད། ད་ཆ་སློབ་གྲྭའི་བར་ཁྱམས་ནི་དགེ་སློབ་ཚོས་ཐུན་མོང་ཐོག་བྲིས་པའི“མི་རིགས་མཐུན་སྒྲིལ་གྱི་གྱང་”དང་ལུས་རྩལ་ཐང་འགྲམ་ནི་ཐུན་མོང་ཐོག་བཙུགས་པའི“མཐུན་སྒྲིལ་ནགས”ཡིན་པ་དང་། གླུ་དབྱངས་སློབ་ཚན་ཐོག་གྲགས་པ་ནི《ང་དང་ངའི་མེས་རྒྱལ》ཞེས་པ་དེ་ཡིན་པ་དང་དེ་ནི་ཧུང་ཡོན་སློབ་གསོ་པས་ཏང་དར་གྱི་སྣེ་ཁྲིད་འོག་སེམས་རྣལ་དུ་ཕབ་ནས་གསོ་སྐྱོང་བྱས་པའི་འབྲས་བུ་ཞིག་རེད།

སློབ་ཚན་གྱིས་མཐུན་སྒྲིལ་མེ་ཏོག་ལ་ཆུ་གཏོར་བ་དང་། གསར་བརྗེའི་སློབ་ཞིབ་ཀྱིས་བྱིས་བློར་དྲོད་ཁོལ་སྟེར།

ཧུང་ཡོན་རྫོང་སློབ་གསོ་ཅུས་ཀྱིས“དཔེ་ཆ་དང་ཡི་གེ་གཅིག་པ། སྐད་ཆ་དང་སྒྲ་གདངས་གཅིག་པའི”ལྟེ་བའི་འདུ་ཤེས་བྱས་ཏེ་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་དང་སློབ་གསོ་སློབ་ཁྲིད་མཉམ་འདྲེས་གཏིང་ཟབ་བྱས་ནས། “སློབ་ཞུགས་མ་བྱས་གོང་སྤྱི་སྐད་སློབ་སྦྱོང་བྱེད་པའི་2.0”འཆར་གཞིར་ཕྱོགས་ཡོངས་ནས་སྐུལ་འདེད་བཏང་སྟེ། མི་རིགས་ཁག་གི་བྱིས་པ་རྣམས་སྤྱི་སྐད་ཁྲོད་མཉམ་འགུལ་ཐུབ་པ་བྱས། ལོ་5ལ་སླེབས་པའི་དབྱངས་ཅན་བུ་བཅོལ་ཁང་དུ་སླེབས་མ་ཐག་བོད་སྐད་མ་གཏོགས་ཤོད་ཤེས་ཀྱི་མེད་ཅིང་། ད་ཆ《ང་མེས་རྒྱལ་ལ་དགའ》ཞེས་པ་ཐོགས་པ་མེད་པར་གྱེར་འདོན་བྱེད་ཐུབ་པར་མ་ཟད་ད་དུང་སྤོ་བོ་ལགས་དང་རྨོ་བོ་ལགས་ལ་སྤྱི་སྐད་ཐོག་ནས“ང་ཚོ་ཁྱིམ་ཚང་གཅིག་གི་མི་ཡིན”ཞེས་བརྗོད་སྟངས་བསླབས་ཡོད། དགེ་རྒན་སྒྲོལ་མས། སྐད་ཆ་ཕན་ཚུན་འབྲེལ་ན་སེམས་པ་གཞི་ནས་ཕན་ཚུན་འབྲེལ་ཐུབ། བྱིས་པ་ཚོས་སྐད་རིགས་གཅིག་གིས་འབྲེལ་འདྲིས་བྱས་ན་མཛའ་བརྩེ་སྔར་ལས་ཟབ་པ་རེད་ཅེས་བཤད།

ལོ་གསུམ་རིང་། ཧུང་ཡོན་རྫོང་སློབ་གསོ་ཅུས་ཀྱིས་ས་གནས་དེ་གའི་གསར་བརྗེའི་ཐོན་ཁུངས་སྔོག་འདོན་གཏིང་ཟབ་བྱས་ཏེ་གསོན་ཉམས་ལྡན་པའི“འགྲོ་སྐྱོད་སློབ་ཁང་”ཞིག་ཏུ་བསྐྲུན་པ་དང་། “རྒྱང་སྐྱོད་ལམ་བུར་བསྐྱར་དུ་བསྐྱོད་དེ་ཀྲུང་ཧྭའི་བླ་སྲོག་མཉམ་དུ་གཏོད་པའི”སྤུས་རྟགས་སློབ་ཞིབ་བྱེད་སྒོ་རྒྱུན་མཐུད་ངང་སྤེལ་ནས་དགེ་སློབ་མི་ཐེངས་9000ལྷག་ཙམ་སྒྲིག་འཛུགས་བྱས་ཏེ་རི་རྒན་ཟམ་པའི་འདམ་ར་དང་ཡར་ཁེ་ཤ་གངས་རིའི་སྔོན་གཤེགས་དཔའ་བོའི་བང་སོ་སོགས་གསར་བརྗེའི་སློབ་གསོའི་རྟེན་གཞིར་བསྐྱོད་དེ་མི་རིགས་ཁག་གི་གཞོན་ནུ་ལོ་ཆུང་ཚོས་སྔོན་བྱོན་པའི་རྐང་རྗེས་འཚོལ་སྙེག་བྱེད་པའི་ཁྲོད་མི་རིགས་མཐུན་སྒྲིལ་གྱི་སྟོབས་ཤུགས་ཤེས་སུ་བཅུག་ཡོད།

སྦྲ་ཆེན་གྲོང་རྡལ་སློབ་ཆུང་གི་བསམ་བློ་ཆབ་སྲིད་ཀྱི་སློབ་ཚན་ཐོག་མི་རིགས་ཁག་ནས་ཡོང་བའི་ཕྲུ་གུ་ཚོས“ཀྲང་སི་ཏེ་ཡིས་རྩྭ་བརྒྱའི་བྲོ་བ་མྱོང་བའི”གཏམ་རྒྱུད་འཁྲབ་སྟོན་བྱས་ནས། གསར་བརྗེའི་ལོ་རབས་ཀྱི་མི་རིགས་ཁག་གི་སྤུན་ཟླ་ཤི་གསོན་མཉམ་གནས་ཀྱི་མཛའ་བརྩེ་ཟབ་མོ་དངོས་འབྲེལ་ཚོར་ཐུབ་པ་བྱས། སློབ་ཚན་གྲོལ་རྗེས་ཕྲུ་གུ་ཚོས་སེམས་འགུལ་ཐེབས་པའི་ངང་དེ་སྔོན་དམར་དམག་འཐབ་འཛིང་པ་དང་མི་རིགས་ཁག་གི་མང་ཚོགས་ཁྱིམ་ཚང་གཅིག་ལྟར་ཡིན་པས་ང་ཚོས་ཀྱང་ཁོང་ཚོ་ལྟར་མཐུན་སྒྲིལ་བྱེད་དགོས་ཞེས་བཤད་དེ། མི་རིགས་མཐུན་སྒྲིལ་ཡར་ཐོན་གྱི་སློབ་གསོ་དེ“ཕྱོགས་གཅིག་ནས་དྲིལ་བསྒྲགས་བྱེད་པ”ནས“ཕྱོགས་གཉིས་ནས་མཉམ་སྒྲོག་བྱེད་པར”འགྱུར་བ་མངོན་འགྱུར་བྱུང་།

ས་ཁོངས་བརྒལ་ནས་སྤེལ་རེས་དང་མཉམ་འདྲེས་ལ་སྐུལ་འདེད་བཏང་སྟེ། བློ་སེམས་གཅིག་མཐུན་གྱིས་རི་མོ་གཅིག་འབྲི་བ།

མི་རིགས་ཁག་གི་དགེ་སློབ་ཚོས་འགྲོ་འོང་སྤེལ་རེས་དང་མཉམ་འདྲེས་ཁྲོད་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུར་སྐུལ་འདེད་གཏོང་ཆེད། ཧུང་ཡོན་རྫོང་སློབ་གསོ་ཅུས་ཀྱིས་སློབ་གསོའི་སློབ་ཁང་དེ་མེས་རྒྱལ་གྱི་ཡངས་ཤིང་རྒྱ་ཆེ་ལ་མཛེས་སྡུག་ལྡན་པའི་ས་གཞི་ཆེན་པོར་སྣུར་སྲིང་བྱས་ནས། ནང་དོན་གཏིང་ཟབ་པའི་རིག་གནས་ཀྱི་ས་གཞི་ཆེན་པོར་རྩ་བ་ཚུགས་པ་དང་། “ཕ་ཡུལ་གྱི་འཕོ་འགྱུར་ཆེན་པོར་ལྟ་བའི”བརྗོད་དོན་གཙོ་བོའི་ལག་ལེན་བྱེད་སྒོ་རྒྱུན་མཐུད་ངང་སྤེལ་ནས་སློབ་མའི་སྣེ་ཁྲིད་དེ་དེང་རབས་ཅན་གྱི་འབྲོག་ར་དང་ས་གནས་དེ་གའི་ཁེ་ལས་སུ་བསྐྱོད་དེ་ཏང་གི་འགོ་ཁྲིད་འོག་ཕ་ཡུལ་ལ་གནམ་ས་བླ་འོག་ཏུ་བསྒྱུར་བ་ལྟ་བུའི་འགྱུར་ལྡོག་བྱུང་བ་དངོས་སུ་མྱོང་ཚོར་ཐུབ་པ་བྱས། ཀྲེ་ཅང་ནས་ཡོང་བའི་སློབ་སྐྱོར་དགེ་རྒན་ཧྲའོ་ཡུང་པོ་ཡིས་ཕྲུ་གུ་ཚོས་ཐག་རིང་འབྲོག་སར་ཡང་རིག་ནུས་ལག་ཐོགས་ཁ་པར་སྤྱོད་ཐུབ་པའི་སྐོར་གླེང་སྐབས་ཁྱིམ་ཚང་ཚང་མར་རླངས་འཁོར་ཆུང་གྲས་ཡོད་པ་དང་། ཕྱུགས་འཚོ་སྐབས་མི་མེད་གནམ་གྲུའི་སྤོབས་སེམས་མཚོན་པར་བྱེད་པ་དེ་ནི་མི་རིགས་མཐུན་སྒྲིལ་ཡར་ཐོན་གྱི་དཔང་པོ་ཡག་ཤོས་ཤིག་རེད་ཅེས་བཤད། མི་རིགས་ཁག་གི་དགེ་སློབ་500ལྷག་ཙམ་སྒྲིག་འཛུགས་བྱས་ཏེ་ས་ཁོངས་ཀྱི་བཀག་རྒྱ་ལས་བརྒལ་ནས་སི་ཁྲོན་མེན་དབྱང་དུ་བསྐྱོད་དེ“འབར་མདེལ་གཉིས་དང་འཁོར་སྐར་གཅིག”གི་བྱས་རྗེས་ཆེན་པོ་འཇོག་མཁན་ཚོས“གནམ་ས་འགུལ་བའི་བྱ་བ་སྒྲུབ་པ་དང་རུས་མིང་སྦས་པའི་མི་སྣ་བྱེད་པའི”རྒྱལ་གཅེས་ལེགས་སྐྱེས་འབུལ་བའི་སྙིང་སྟོབས་མྱོང་ཚོར་བྱས་པ། ཀྲེ་ཅང་ཡུང་ཅ་རུ་བསྐྱོད་དེ་དམག་ཤོག་བཅུ་གསུམ་པའི་དཔུང་ཁག་གི་གནས་ཡུལ་རྙིང་པར་འཚམས་འདྲི་བྱས་པ་དང་། “སྐར་དམར་འོད་ཆེམ་ཆེམ། དམག་འཁྲུག་གི་མེ་ལྕེ་མཚེར་བའི་ཡུང་ཅ”ཞེས་པའི་བརྗོད་བྱ་གཙོ་བོའི་སྦྱོང་བརྡར་སྒར་སར་གསར་བརྗེའི་དམག་འཁྲུག་གི་མེ་ལྕེའི་ཁྲག་དྲོན་ལ་མྱོང་ཚོར་བྱས་ཡོད། ས་ཁོངས་མི་འདྲ་བ་དང་མི་རིགས་མི་འདྲ་བ་ནས་ཡོང་བའི་རོགས་ཟླ་ཚོས་ཐུན་མོང་ཐོག་ཞིབ་འཇུག་སློབ་སྦྱོང་གི་ལས་འགན་ལེགས་སྒྲུབ་དང་། ཚན་རྩལ་གྱི་གསང་བ་འཚོལ་ཞིབ། གསར་བརྗེའི་གཏམ་རྒྱུད་ཉན་པ། ས་གནས་དེ་གའི་དམངས་སྲོལ་ཉམས་ལེན་བཅས་བྱེད་པའི་བརྒྱུད་རིམ་ནང་སྐད་ཆ་ཕན་ཚུན་འདྲེས་པ་དང་སེམས་པ་ཕན་ཚུན་འབྲེལ་ཡོད།

ཉེ་བའི་ལོ་གཉིས་རིང་། ཀྲེ་ཅང་དང་ཧུང་ཡོན་ས་གནས་གཉིས་ཀྱི་སློབ་གྲོགས་ཚོས་ཕན་ཚུན་འཕྲིན་ཡིག་བརྒྱ་ལྷག་ཙམ་སྤེལ་རེས་བྱས་པ་བརྒྱུད། སློབ་སྦྱོང་གི་མྱོང་ཚོར་ལྷུག་པོར་གླེང་བ་དང་ཕ་ཡུལ་གྱི་འཕེལ་རྒྱས་ལ་བསམ་བློ་ཡང་ཡང་བཏང་བ་རེད། ཆེས་ཐོག་མར་གོམས་སྲོལ་དང་སྐད་གདངས་ལས་བྱུང་བའི་རྒྱུས་མེད་ཀྱི་ཚོར་བ་དེ་དག་ལྷག་བསམ་རྣམ་དག་གི་མཉམ་འགུལ་དང་རོགས་རེས་ཁྲོད་འཇམ་ཐིང་ངེར་ཞུ་བ་དང་། ས་ཁོངས་མི་འདྲ་བའི་ཐུན་མོང་མ་ཡིན་པའི་རིག་གནས་ནི་འགལ་ཟླའི་སྒྲིབ་དངོས་མིན་པར་ཐུན་མོང་གི་བསམ་པའི་རི་མོའི་སྟེང་གི་མཚར་སྡུག་ལྡན་པའི་ཁ་དོག་ཏུ་གྱུར། ཚང་མས་ལྷག་བསམ་གྱི་སྨྱུ་གུ་དང་།བསམ་ཤེས་ཀྱི་སྣག་ཚ། མཉམ་ལས་ཀྱི་ཚོན་མདངས། མཛའ་མཐུན་ཀྱི་དབྱངས་རྟ་བཅས་ལ་བརྟེན་ནས་མེས་རྒྱལ་པང་གི་ཡངས་ཤིང་རྒྱ་ཆེ་བའི་རི་མོའི་རས་ཆའི་ཐོག་སྐྱིད་སྡུག་མཉམ་མྱོང་དང་། ཕན་ཚུན་ལྟ་རེས་རོགས་རེས་བཅས་བྱེད་པའི“ཁྱིམ་ཚང་ཆེན་པོའི”རི་མོ་མཉམ་དུ་བྲིས་ཡོད་པ་དང་། “སེ་འབྲུའི་འབྲུ་གུ་བཞིན་དམ་པོར་འཁྱུད་པའི”བསམ་འདུན་ཟབ་མོ་གསོན་ཉམས་ལྡན་པའི་སྒོ་ནས་གསལ་བཤད་བྱས་ཡོད། ཧུང་ཡོན་རྫོང་གི་མི་རིགས་ཁག་གི་དགེ་སློབ་རྣམས་ཀྲུང་ཧྭ་མི་རིགས་ཀྱི་སྔར་བས་དམ་ཟབ་དང་སྔར་བས་མཛེས་སྡུག་ལྡན་པའི་འབྱུང་འགྱུར་གྱི་ཕྱོགས་སུ་དཔུང་པ་མཉམ་གཤིབ་ཀྱིས་མདུན་སྐྱོད་བྱེད་དུ་བཅུག

སློབ་ཁང་ནས་རྩྭ་ཐང་དང་། དཔེ་དེབ་ནས་ལག་ལེན། རིག་གནས་མཉམ་འདྲེས་ནས་བརྩེ་དུང་གི་མཉམ་སྒྲོག་བར། ཧུང་ཡོན་རྫོང་སློབ་གསོ་ཅུས་ཀྱིས་འགན་འཁྲི་འཁུར་ཕོད་པ་དང་། མི་རིགས་མཐུན་སྒྲིལ་ཡར་ཐོན་གྱི་སློབ་གསོའི་གཡུལ་ས་གཙོ་བོ་བརྟན་སྲུང་བྱས་ཤིང་། ཧུང་ཡོན་སློབ་གསོ་པས“ཏང་འཛུགས་དམར་པོའི”བླ་སྲོག་སྐྲུན་པ་དང་། “སྤྱི་སྐད”ཀྱི་ཟམ་པ་བཙུགས་པ། “གསར་བརྗེའི་བགྲོད་ལམ”གྱིས་སྣེ་ཁྲིད་བྱས་པ། “ལག་གདང་སྦྲེལ”ནས་སྟོབས་ཤུགས་སྒྲིལ་བ་བཅས་ལ་བརྟེན་ནས་མི་རིགས་ཁག་གི་དགེ་སློབ་རྣམས་ལ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སེམས་སུ་འཇགས་པར་ཁྲིད་སྟོན་བྱས་པ་དང་། མི་རིགས་མཐུན་སྒྲིལ་ཡར་ཐོན་གྱི་ས་བོན་སློབ་རའི་ས་གཤིན་ཁྲོད་འཚར་ལོངས་འབྱུང་དུ་བཅུག་ཡོད།