རྔ་བ་བོད་རིགས་ཆའང་རིགས་རང་སྐྱོང་ཁུལ་སྤྱི་བདེ་ཅུས། མཐོ་སྒང་བདེ་སྲུང་གི་དཔུང་སྟོབས།

རྔ་བ་ཁུལ་སྤྱི་བདེ་ཅུས་ནི་སི་ཁྲོན་ཞིང་ཆེན་འབར་ཁམས་གྲོང་ཁྱེར་དུ་ཡོད་པ་དང་། སྲིད་འཛིན་རང་བཞིན་དང་ཁྲིམས་འཛིན་རང་བཞིན་གཅིག་ཏུ་བསྡུས་པའི་ཏང་སྲིད་ལས་ཁུངས་ཤིག་ཡིན། མིག་སྔར། རྒྱ་དང་བོད། ཆའང་། ཧུའེ་སོགས་མི་རིགས་ཁག་གི་མི་དམངས་ཉེན་རྟོག་པ་དང་རམ་འདེགས་ཉེན་རྟོག་པ་5452ཡོད། དེ་ནི་མི་རིགས་མང་པོ་འདུས་སྡོད་ས་ཁོངས་དེའི་བདེ་འཇགས་བརྟན་ལྷིང་སྲུང་སྐྱོང་བྱེད་པའི་སྲོག་ཤིང་སྟོབས་ཤུགས་ཤིག་ཡིན། ཉེ་བའི་ལོ་ཤས་རིང་ལ། རྔ་བ་ཁུལ་སྤྱི་བདེ་ཅུས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ལེགས་པོ་བསྐྱེད་རྒྱུ་གཙོར་བཟུང་སྟེ། མི་རིགས་ལས་དོན་གྱི་ཁྱད་ཆོས་མངོན་པར་དོད་པའི“ཡུལ་སྐོར་དང་སྐྱེ་ཁམས། སྦྲ་གུར”བཅས་ཀྱི་ཉེན་རྟོག་ལས་རྣམ་གསར་པ་གཏོད་དེ། ཁོངས་ཡོངས་ཡུལ་སྐོར་འཕེལ་རྒྱས་ལ་སྲུང་སྐྱེལ་བྱས། རྨ་འབྲིའི་སྟོད་རྒྱུད་དང་ཁྲོན་ཀན་མཚོ་མཉམ་འབྲེལ་ས་ཁོངས་སྐྱེ་ཁམས་བདེ་འཇགས་སྲུང་ཡོལ་བརྟན་པོ་བསྐྲུན། མཐོ་སྒང་གི་འབྲོག་ཁུལ་གྱི་དམངས་འཚོར་ཞབས་འདེགས་ཞུ་བའི་ལག་ལེན་ཁྲོད། ལས་སྟེགས་བཙུགས་པ་དང་ཆ་རྐྱེན་བསྐྲུན་ནས་མངལ་ཁུལ་གྱི་མི་རིགས་ཁག་གི་མང་ཚོགས་དང་། ཉེན་རྟོག་པ་དང་མང་ཚོགས་བར་ཕྱོགས་ཡོངས་ནས་འབྲེལ་འདྲིས་ལ་སྐུལ་འདེད་བཏང་། སྐལ་བཟང་མེ་ཏོག་བཞིན་གངས་རིའི་ལྗོངས་སུ་རྣམ་པར་བཞད་ལ། སེ་འབྲུ་བཞིན་དམ་དུ་སྦྲེལ་ནས་བརྟན་བརླིང་སྲུང་སྐྱོབ་ཀྱི་ཐུན་མོང་བྱ་བཞག་ཁྲོད་མཐུན་སྒྲིལ་དམ་ཟབ་བྱས། རྒྱལ་ཡོངས་སྤྱི་བདེ་ཆབ་སྲིད་བདེ་འཇགས་ལས་དོན་སྔོན་ཐོན་ཚོགས་པའི་གཟེངས་བསྟོད་ཐོབ་མྱོང་།

“ཐིག་གསུམ་གཅིག་ཏུ་བསྣོལ་བའི”ཡུལ་སྐོར་ཉེན་རྟོག་ལས་དོན་ཟབ་སྤེལ་སྒོས་མི་རིགས་འགྲོ་འོང་གི་འབྲེལ་ཟམ་བསྐྲུན།

“ཡུལ་སྐོར་ཉེན་རྟོག”ནི་རྔ་བ་ཁུལ་སྤྱི་བདེ་ཅུས་ཀྱིས་ཁོངས་ཡོངས་ཡུལ་སྐོར་འཕེལ་རྒྱས་ལ་འདེགས་སྐྱོར་བྱེད་ཐབས་གལ་ཆེན་ཞིག་ཡིན་ལ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་ཐད་ནུས་པ་གལ་ཆེན་འདོན་བཞིན་ཡོད། རྔ་བ་ཁུལ་སྤྱི་བདེ་ཅུས་ཀྱིས“ཡུལ་སྐོར་ཉེན་རྟོག”ལ་གཞིགས་ནས། “འགྲིམ་འགྲུལ་ལམ་ཐིག་དང་ཁྲོམ་རའི་ལམ་ཐིག །བདེ་འཇགས་ལམ་ཐིག”བཅས་ལམ་ཐིག་གསུམ་མཉམ་འདྲེས་བྱས་ཏེ། “ཡུལ་སྐོར་ཉེན་རྟོག”ཁྱད་ལྡན་སྤུས་རྟགས་བཏོད་ནས་ཁོངས་ཡོངས་ཡུལ་སྐོར་ལ་སྲུང་སྐྱེལ་བྱས།

ཝུན་ཁྲོན་རྫོང་ཝོ་ལུང་གྲོང་རྡལ་གྱི་སྡེ་མི་ལིན་ཡོན་ཧྥ་ཡིས་སྤེན་ལ་རུ་བསྲེག་ཟས་བཙོང་ནས་ལོ་གསུམ་ལྷག་ཙམ་ཕྱིན་ཡོད། ཁོས་རྒྱུན་པར་བསྲེག་ཟས་ཉོ་མཁན་ཡུལ་སྐོར་བར“ཉེན་རྟོག་པས་རྒྱུན་དུ་ང་ཚོར་དངོས་པོ་བཙོང་ན་རྒྱ་ཁར་ལྕི་ཡང་ཤོར་མི་རུང་ཅེས་དྲན་སྐུལ་གནང་སྲིད། ཁྱེད་ཅག་རྟག་ཏུ་གནས་འདིར་ལྗོངས་རྒྱུར་འབྱོར་ན། ང་ཚོས་སྒོར་མོ་བཙལ་ཐུབ”ཅེས་བཤད། བདེ་འཇགས་ཀྱི་ཡུལ་སྐོར་ཁོར་ཡུག་བདེ་འཇགས་ཡིན་པའི་དབང་གིས་མི་རིགས་ཁག་གི་ཡུལ་སྐོར་བ་མང་པོ་གནས་འདིར་ལྗོངས་རྒྱུར་ཡོང་མཁན་མང་ལ། ཁོ་ཚོས་ཡུལ་སྐོར་ཁྲོད་ཕན་ཚུན་སློབ་སྦྱོང་བྱས་ཏེ་མི་རིགས་དབར་གྱི་བརྩེ་ཞེན་ཇེ་ཟབ་དུ་བཏང་། པེ་མོ་སྒང་ནི་གྱ་གྱུ་ལའི་དྲ་གྲགས་གནས་མཆོག་དང་འགྲིམ་འགྲུལ་གྱི་འགྲོ་ལམ་གཙོ་བོ་ཞིག་ཡིན། ཁུལ་དང་རྫོང་སྤྱི་བདེ་ལས་ཁུངས་ཀྱི་འགྲིམ་འགྲུལ་ཉེན་རྟོག་པས་ནུས་ཤུགས་གཅིག་སྒྲིལ་གྱིས་ཡུལ་སྐོར་བདེ་འཇགས་ལ་འགན་སྲུང་བྱ་ཆེད། ཉིན་ལྟར་པེ་མོ་སྒང་དུ་ལས་རེས་བ་མངགས་ནས་འགྲིམ་འགྲུལ་སྒྲིག་ལམ་ལ་ཁྲིད་སྟོན་བྱས། རླངས་འཁོར་འཇོག་སར་ཕྱོགས་རྐྱང་འགྲོ་སྐྱོད་བྱེད་པ་དང་ཚོང་ཁང་གི་ལས་གཉེར་མི་སྣ་འོས་འགན་འགྲིམ་འགྲུལ་གཞོགས་འདེགས་དོ་དམ་པར་བསྡུ་ལེན་བྱས།

ཉིང་ཞ་ནས་ཡོང་བའི་ཡུལ་སྐོར་བ་སྐུ་ཞབས་ཡན་གྱིས“ཉེན་རྟོག་ཕེང་ལགས་ཀྱིས་འབད་པ་ཧུར་ལེན་བྱས་ཏེ་དམངས་ལ་ཞབས་འདེགས་ཞུ་བའི་སྟོབས་ཤུགས་དང་། བརྩོན་པ་ཆུ་བོའི་རྒྱུན་བཞིན་བསྟེན་པའི་སྙིང་སྟོབས་ལ་རྗེས་སུ་ཡི་རང་ཡོད”ཅེས་བཤད། ད་ལོ་སྐུ་བླ་རི་བོར་ཡུལ་སྐོར་ལྗོངས་རྒྱུ་བྱེད་དུས་སྟབས་མ་ལེགས་པར་མི་མེད་གནམ་གྲུ་བོར་སོང་བས། ཉེན་རྟོག་པ་ཕེང་གིས་རུ་སྣེ་ཁྲིད་དེ་སྤྱི་ལེ་400བརྒལ་ནས། མཐོ་སྒང་གི་ཁོར་ཡུག་ཁྲོད་བཀོད་སྒྲིག་ཞིབ་ཚགས་དང་རིག་ནུས་རྗེས་འདེད་སྒྲིག་ཆས་བཀོལ་ནས་བརྙན་ཕབ་གནམ་གྲུ་དེ་རྙེད། ད་ལྟ། སྐུ་ཞབས་ཡན་གྱིས་ཉེ་འཁོར་གྱི་གྲོགས་པོ་རྣམས་ལ“བདེ་འཇགས་དང་སྤྲོ་སྐྱིད་མཉམ་གནས་ཀྱི་གནས་མཆོག”དེ་ངོ་སྤྲོད་བྱས་ཏེ། ཉམས་མྱོང་དེ་མི་རིགས་མཐུན་སྒྲིལ་ཡར་ཐོན་གྱི་གསོན་ཉམས་ལྡན་པའི་མཚོན་ཚུལ་ཡིན་ཞེས་བརྗོད།

“ཕྱོགས་བཞིའི་སྟོབས་ཤུགས་གཅིག་སྒྲིལ”གྱིས་སྐྱེ་ཁམས་ཉེན་རྟོག་ལས་དོན་སྤེལ་ནས་མི་རིགས་མཐུན་སྒྲིལ་གྱི་སྐྱེ་ཁམས་རི་མོ་བྲིས།

རྔ་བ་ཁུལ་སྤྱི་བདེ་ཅུས་གྱིས“སྐྱེ་ཁམས་ཐུན་མོང་སྒྲིག་གཞི”འཛུགས་པ་གཙོར་བཟུང་སྟེ། “སྡེ་ཁག་མཉམ་འབྲེལ་དང་མང་ཚོགས་ལས་སྒོར་ནས་རྒྱབ་སྐྱོར་བྱེད་པ། ཚན་རིག་ལག་རྩལ་གྱི་ཕན་འབྲས་མངོན་པ། ནང་ཁུལ་ཕུགས་ཕན་ལམ་སྲོལ་འཛུགས་པ”ཞེས་པའི་ཕྱོགས་བཞི་ལ་དམིགས་ནས། སྐྱེ་ཁམས་དང་འབྲེལ་བའི་ཁྲིམས་འགལ་ཉེས་གསོག་ལ་རྡུང་རྡེག་གཏོང་བ་དང་། སྐྱེ་ཁམས་དང་འབྲེལ་བའི་འགལ་བ་དང་རྩོད་གཞི་འདུམ་འགྲིག་བྱེད་པ། སྐྱེ་ཁམས་དང་འབྲེལ་བའི་དྲིལ་བསྒྲགས་སློབ་གསོ་སྤེལ་བ་སོགས་མི་རིགས་ཁག་གི་མང་ཚོགས་ཀྱི་སྐྱེ་ཁམས་སྲུང་སྐྱོང་གི་ཐུན་མོང་ངོས་འཛིན་གཅིག་གྱུར་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ནུས་ཤུགས་ཡོད་རྒུས་ཇེ་བརྟན་དུ་བཏང་།

ཝུན་ཁྲོན་རྫོང་དུ“ཝུན་ཁྲོན་རྨ་བྱ་ཕུ་བོ”ལིའུ་ཝུན་ཅུན་གྱིས་སྤྲོ་སེམས་འཁོལ་བའི་ངང་ནས་ཡུལ་སྐོར་བར་ངོ་སྤྲོད་བྱེད་བཞིན་པའི་རྣམ་པ་རྟག་ཏུ་མཐོང་ཐུབ། རྔ་བ་ཁུལ་སྤྱི་བདེ་ཅུས་ཀྱིས་སྐྱེ་ཁམས་ཉེན་རྟོག་པའི་སྤུས་རྟགས་གཏོད་པའི་བྱེད་སྒོ་བཀོད་སྒྲིག་བྱས་རྗེས། མི་དམངས་ཉེན་རྟོག་པའི་གཞོགས་འདེགས་ཉེན་རྟོག་པའི་དྲིལ་བསྒྲགས་དང་ཁྲིད་སྟོན་འོག་བོད་མི་དེ“སྐྱེ་ཁམས་ཉེན་རྟོག་པ”ཞིག་ཏུ་གྱུར། ད་སྐབས་ཁོས“རྨ་བྱ”དེ་དག་ལ་སྲུང་སྐྱོབ་བྱས་པར་མ་ཟད། གསུས་དམར་བྱ་དེ་ལ་ལྟ་སྐོར་དུ་ཡོང་བའི་ཡུལ་སྐོར་བར་གནས་འདྲེན་པ་བྱས་ཏེ། ཉེན་རྟོག་པ་དང་མི་དམངས་ཀྱི་འབྲེལ་བ་ཇེ་དམ་དུ་བཏང་ནས་སྐྱེ་ཁམས་སྲུང་སྐྱོང་དང་དཔལ་འབྱོར་འཕེལ་རྒྱས། མི་རིགས་མཐུན་སྒྲིལ་ཡར་ཐོན་གྱི་བགྲོད་ལམ་ལེགས་པོ་བསྐྲུན།

གཟི་རྩ་སྡེ་དགུ་རྫོང་པའེ་ཧོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་ཟླ་རེའི་སྲོག་ཆགས་ལྐོག་རྔོན་དང་རྩི་ཤིང་ལྐོག་འཐུ། ནགས་ཚལ་གཏོར་བརླག་བཅས་ལ་འགོག་རྒོལ་གྱི་ཆེད་དོན་ཞིབ་བཤེར་ལས་སྒོ་དེ་རྒྱུན་རྣམ་ཅན་དུ་གྱུར་ཡོད། དམངས་འདེགས་ཉེན་རྟོག་པ་མི་རིགས་ཁག་འདུས་སྡོད་ཁུལ་དུ་བསྐྱོད་དེ། སོ་སོའི་རིག་གནས་སྲོལ་རྒྱུན་དང་འཚོ་བའི་གོམས་གཤིས་དང་འབྲེལ་ནས། སྡེ་མི་རྣམས་ལ་འཚོ་གནས་དང་འཕེལ་རྒྱས་ཁྲོད་སྐྱེ་ཁམས་སྲུང་སྐྱོང་གི་གལ་ཆེའི་རང་བཞིན་སྒྲོག་འགྲེལ་བྱས། ཉེ་བའི་ལོ་ཤས་རིང་ལ་སྲུང་སྐྱོང་ཁུལ་གྱི་ནགས་ཚལ་དང་རི་སྐྱེས་སྲོག་ཆགས། ཐོན་ཁུངས་བཅས་དང་འབྲེལ་བ་ཡོད་པའི་གྱོད་དོན་བྱུང་མེད་ལ། སྐྱེ་ཁམས་ཁོར་ཡུག་ཇེ་ལེགས་སུ་ཕྱིན་ནས་སི་ཁྲོན་སྤྲེའུ་སྤུ་སེར་གྱི་གྲངས་འབོར་དེ་སྔའི་བཅུ་ཕྲག་ཁ་ཤས་ནས་ད་ལྟའི་1000ལྷག་ཙམ་དང་ཁྱུ་ཚོགས་7ལ་འཕེལ་ཡོད།

“འགག་གསུམ་སྒྲོལ་བ”དང་སྦྲ་གུར་ཉེན་རྟོག་ལས་དོན་སྤེལ་ནས་མི་རིགས་ཁག་གི་མང་ཚོགས་ལ་ཞབས་འདེགས་ཞུས།

“སྦྲ་གུར་ཉེན་རྟོག་ལས་དོན”ནི་རྔ་བ་ཁུལ་སྤྱི་བདེ་ཅུས་ཀྱི་འབྲོག་ཁུལ་གྱི་ཞབས་ཞུའི་དཀའ་གནད་སྒྲོལ་བའི་སྤྱི་ལེ་མཐའ་མ་ཡིན་པ་དང་། མི་རིགས་མཐུན་སྒྲིལ་ལ་སྐུལ་བའི་བྱ་སྤྱོད་ཡང་ཡིན། འབྲོག་ཁུལ་དང་དབྱར་རྩྭ་དགུན་འབུ་བརྐོ་གནས། རུ་སྤོ་བའི་ལམ་བར་དུ་སྦྲ་གུར་སྔོན་པོ་མཐོང་ཐུབ། སྤྱི་བདེ་མི་དམངས་ཉེན་རྟོག་པས་རྒྱབ་ཁུག་འཁུར་ནས་མང་ཚོགས་ལ་སྒོ་འགྲམ་ནས་ཞབས་ཞུ་འདོན་ངེས། ཡུལ་སྐད་ཀྱི་ལམ་ནས་སྲིད་ཇུས་སྒྲོག་འགྲེལ་བྱས། རང་འགུལ་གྱི་ཉེན་རྟོག་ལས་དོན་སྤེལ་ནས་བརྟན་ལྷིང་ལ་སྐོར་ཞིབ་བྱས། འབྲོག་ཁུལ་མང་ཚོགས་ཀྱི་རི་ལམ་རིང་ལ་སྐད་བརྡ་མི་འཕྲོད་པ། ས་ཁྱོན་ཆེ་ལ་མི་ཉུང་བ་ལས་བསྐྱེད་པའི་དཀའ་གནད་ཐག་གཅོད་བྱས།

རྔ་བ་ཁུལ་སྤྱི་བདེ་ཅུས་ཀྱིས“སྦྲ་གུར་ཉེན་རྟོག་ལས་དོན”ལ་བརྟེན་ནས“སེ་འབྲུའི”ལས་གཞི་ལག་ལེན་དུ་བཏབ། རྔ་བ་རྫོང་རྔ་བ་གྲོང་རྡལ་གྲོང་སྡེ་བདུན་ལ་མཐིལ་འདེགས་རོགས་སྐྱོར་བྱས་ཏེ། ས་གནས་དེ་གའི་སྐམས་ཤ་དང་ལུག་ཤ་ཕྱིར་ཚོང་བྱེད་རོགས་བྱས། རྒྱང་རིང་གི་འབྲོག་ཁུལ་དུ་ཆུ་དང་གློག་བརྒྱུད་གཏོང་བྱས་ཏེ་འཚོ་བའི་དཀའ་ངལ་ཐག་གཅོད་བྱས། སྡེ་མི་མེ་ཏོག་ཨ་མས་ཡུལ་མི་རྣམས་དགའ་པོ་བྱུང་འདུག །ང་ཚོས་ཆུ་ལེན་དཀའ་བའི་གནད་དོན་གཞི་ནས་ཐག་གཅོད་བྱས་ཞེས་བསྔགས་བརྗོད་བྱས། བརྩེ་ཞེན་དེས་འབྲོག་པ་མང་ཚོགས་ལ་དྲོད་ཁོལ་སྦྱིན། ཁོ་ཚོས་གདེང་འཇོག་ལེགས་པོ་གནང་།

འཛམ་ཐང་རྫོང་སྤྱི་བདེ་ཅུས་ཀྱིས“སྦྲ་གུར་ཉེན་རྟོག་ལས་དོན”གྱི་རྣམ་པ་གསར་པ་བཏོད་པ་སྟེ། “སྐོར་སྐྱོད+གཏན་འཇགས”བརྒྱུད་སྐོར་སྐྱོད་འགོག་སྲུང་དང་འགལ་བ་འདུམ་པ། དམངས་ཕན་ཞབས་ཞུ། སྐྱེ་ཁམས་སྲུང་སྐྱོང་སོགས་ཀྱི་ལས་སྒོ་སྤེལ། རྡོ་སྟོད་མངགས་གཏོང་ཁང་གིས་འཕྲུལ་རྟ་དང་རྟར་ཞོན་ནས་སྐོར་ཞིབ་བྱས། “སྐོར་གཡེང་+འབྲོག་པའི་སོ་ལྟ་ས་ཚིགས”ཀྱི་འགོག་སྲུང་དྲ་བ་བཙུགས། མི་རིགས་དང་འབྲེལ་བ་ཡོད་པའི་འགལ་བ་དང་རྩོད་གཞི་ལ་འཕྲད་སྐབས། མི་དམངས་ཉེན་རྟོག་པས་མི་རིགས་ཁག་གི་རིག་གནས་དང་གོམས་སྲོལ་ལྟར། དྲང་གཞག་གི་བྱེད་ཐབས་སྤྱད་ནས་འདུམ་འགྲིག་བྱས་ཏེ། མི་རིགས་ཁག་གི་མང་ཚོགས་འཆམ་མཐུན་བརྟན་ལྷིང་གི་ཁོར་ཡུག་ཁྲོད་ཐོན་སྐྱེད་དང་འཚོ་བ་སྐྱེལ་དུ་བཅུག

སི་ཁྲོན་ནུབ་བྱང་མཐོ་སྒང་དུ་རྔ་བ་ཁུལ་སྤྱི་བདེ་ཅུས་ཀྱིས་ཐོག་མཐའ་བར་གསུམ་དུ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོར་བཟུང་སྟེ། མི་རིགས་མཐུན་སྒྲིལ་ཡར་རྒྱས་དེ་ཉེན་རྟོག་ལས་དོན་དུ་བརྩིས་ནས། ཡུལ་སྐོར་ཉེན་རྟོག་གིས་འབྲེལ་འདྲིས་ཟབ་སྤེལ་དང་། སྐྱེ་ཁམས་ཉེན་རྟོག་གིས་སྔོ་ལྗང་རི་ཀླུང་སྲུང་། སྦྲ་གུར་ཉེན་རྟོག་གིས་དམངས་འདུན་བསྐངས། དེ་ནི་བདེ་འཇགས་སྲུང་སྐྱོབ་བྱེད་པའི་ཕུབ་ཡིན་ལ། མི་རིགས་ཁག་གི་བརྩེ་ཞེན་གཅིག་ཏུ་བསྡུས་པའི་འབྲེལ་ཐག་ཀྱང་ཡིན། མཐུན་སྒྲིལ་ཡར་རྒྱས་ཀྱི་ས་བོན་ཁྲོན་ཀན་མཚོ་མཉམ་འབྲེལ་ཁུལ་ནས་མྱུ་གུ་འབུས། ལྷག་བསམ་རྣམ་དག་དང་འགན་འཁྲི་གཙང་འཁུར་གནང་བའི་མཐོ་སྒང་ཉེན་རྟོག་རུ་ཁག་གིས་གོམ་སྟབས་བརྟན་པོས་ཐུན་མོང་གི་ཁྱིམ་གཞིས་སྲུང་། ཐོག་མའི་བསམ་འདུན་བརྟན་པོས་མི་རིགས་ཁག་གི་མང་ཚོགས་ཕན་ཚུན་རོགས་རམ་དང་སེ་འབྲུ་བཞིན་དམ་དུ་སྦྲེལ་བའི་ལེའུ་གསར་པ་བྲིས། 

（བཀྲ་ཤིས་ལྷ་མོས་བསྒྱུར། 翻译/扎西拉毛）