སེར་ཤུལ་རྫོང་སེར་ཤུལ་གྲོང་རྡལ་ཁྲིབ་གོང་གྲོང་སྡེ་ནི་རྫ་སྟོད་སྡེ་ཁུལ་ལས་དོན་ཨུ་ལྷན་བཅའ་སྡོད་བྱ་ཡུལ་སེར་ཤུལ་གྲོང་རྡལ་གྱི་བྱང་ཤར་ཕྱོགས་སུ་ཡོད་པ་དང་གྲོང་སྡེ་རིམ་པའི་ཐུན་མོང་ཞིག་ཡིན། གྲོང་སྡེ་ཡོངས་ལ་ད་ཡོད་སྡེ་མི་དུད་ཚང་235དང་མི་859ཡོད། དེའི་ནང་བོད་རིགས་མི་གྲངས་791དང་རྒྱ་རིགས་མི་གྲངས་43། ཧུའེ་རིགས་མི་གྲངས་12། དབྱིས་རིགས་མི་གྲངས་8། སོག་རིགས་མི་གྲངས་5བཅས་ཡོད། དེ་ནི་བོད་རིགས་གཙོ་བོ་ཡིན་ཞིང་རྒྱ་དང་ཧུའེ། དབྱིས། སོག་སོགས་མི་རིགས་མང་པོ་ཡུན་རིང་འདུས་སྡོད་བྱེད་པའི་སེར་ཤུལ་རྫོང་གི་དཔེ་མཚོན་གྲོང་སྡེ་ཞིག་ཡིན་པ་རེད། ཉེ་བའི་ལོ་ཤས་རིང་གྲོང་སྡེ་ཡོངས་ཀྱི་མང་ཚོགས་ཀྱིས་གྲོང་སྡེ་ཏང་ཀྲི་པུའུ་ཡི་སྣེ་ཁྲིད་འོག“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ”གཙོ་གནད་དུ་འཛིན་པ་མཐའ་འཁྱོངས་ནས། “སེ་འབྲུ”ལས་དོན་སྒྲུབ་སྟངས་ལ་སྐུལ་འདེད་ཧུར་ཐག་བཏང་སྟེ། “མི་རིགས་མཐུན་སྒྲིལ་ཡར་ཐོན་ཁྱིམ་ཚང་དུ་སྤེལ་བ་དང་ལྟ་སྐྱོང་རོགས་རམ”བྱེད་སྒོ་གཏིང་ཟབ་སྤེལ་ཏེ། བཀྲ་ཤིས་པའི་སེར་ཤུལ་གྱི་ས་གཞི་ཆེན་པོར་དུས་སྐབས་གསར་པའི་མི་རིགས་མཐུན་སྒྲིལ་ལས་དོན་གྱི་རི་མོ་ལེགས་པར་བྲིས།
རོགས་རམ་བརྩི་བཀུར་ཡོད་པས་བརྩེ་བ་ཟབ་ཏུ་ཕྱིན། ལྷག་བསམ་ཟོལ་མེད་ཡིན་པས་དུང་བ་ངོ་མ་ཆགས།
“ཕན་ཚུན་རོགས་རམ་དང་བརྩི་བཀུར་བྱེད་ཅིང་མཛའ་མཐུན་ཡིན་པ་ནི”ང་ཚོ་ཀྲུང་ཧྭ་མི་རིགས་མཐུན་སྒྲིལ་རོགས་རམ་གྱི་གཞི་རྩའི་འཚོ་བའི་རྩ་དོན་ཡིན། གྲོང་སྡེ་བཅའ་སྡོད་ཏང་ཀྲི་པུའུ་ཧྲུའུ་ཅི་དང་པོ་བློ་མཐུན་ཡན་ལུང་གིས་ཏང་ཀྲི་པུའུ་ཡི་ཚོགས་འདུར“ཀྲུང་ཧྭ་མི་རིགས་ནི་ཁྱིམ་ཚང་ཆེན་པོ་ཞིག་ཡིན་པས་ང་ཚོས་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་འཆམ་པར་བྱ་དགོས”ཞེས་བཤད་པ་རེད། གྲོང་སྡེ་ཡོངས་ཀྱི་སྡེ་མི་859ཁྱིམ་ཚང་གཅིག་ལྟར་འཆམ་པོ་ཡོང་ཆེད། གྲོང་སྡེ་ཏང་ཀྲི་པུའུ་ཡིས“སྤྲོ་གསེང་རོལ་བ”དང“རྒྱལ་སྟོན་དུས་ཆེན”“སྤྱི་ལོའི་ལོ་སར”“དཔྱིད་གསར་དུས་ཆེན”སོགས་དུས་ཆེན་གལ་ཆེན་བེད་སྤྱོད་གང་ལེགས་བྱས་ཏེ། མང་ཚོགས་ཀྱི་དགའ་མགུ་བྱེད་པའི་གླུ་ལེན་གར་འཆམ་གྱི་རྣམ་པ་སྤྱད་ནས་གྲོང་སྡེ་ཡོངས་སུ“གཉེན་ཉེ་ངོས་འཛིན་དང་ཕན་ཚུན་རོགས་རམ། ཕན་ཚུན་བརྩི་བཀུར་བྱས་ནས་མི་རིགས་ཀྱི་ངོས་འཛིན་གཅིག་མཐུན་དང་མཛའ་མཐུན་མཉམ་འདྲེས”ཀྱི་བྱེད་སྒོ་སྤེལ་བ་དང་། ཚང་མ་མཉམ་དུ་འདུས་ནས“སེ་འབྲུ”ནང་བཞིན་མི་རིགས་ཀྱི་བརྩེ་དུང་དང་ངོས་འཛིན་གཅིག་མཐུན་གྱི་ཚོར་བ་ཟབ་ཏུ་བཏང་། ལས་འཁྱུར་ངལ་གསོ་ཟིན་པའི་བློ་མཐུན་བསོད་ནམས་དཔལ་ལྡན་གྱིས“སྔོན་ཆད་ང་ཚོའི་གྲོང་སྡེའི་མི་རིགས་ཁག་གི་མང་ཚོགས་དབར་འགྲོ་འོང་ཧ་ཅང་ཉུང་། ད་ལྟ་གཉེན་ཉེ་ངོས་འཛིན་གྱི་མཛའ་མཐུན་བྱེད་སྒོ་སྤེལ་བ་བརྒྱུད་སོག་རིགས་ཐེང་ཀེར་ཁྱིམ་ཚང་ངེད་གཉིས་གྲོགས་པོ་བཟང་པོར་གྱུར་ཡོད་པས་ང་ཚོས་འཚོ་བའི་ཐད་ཕན་ཚུན་རོགས་རམ་བྱེད་ཐུབ”ཅེས་བཤད་པ་རེད། ང་ཚོའི་གྲོང་སྡེ་ཏང་ཀྲི་པུའུ་ཡི་སྐུལ་འདེད་འོག།།གྲོང་སྡེ་ཡོངས་ཀྱི་མི་རིགས་ཁག་གི་མང་ཚོགས་ཀྱིས་བློ་གཅིག་སེམས་གཅིག་དང་ནུས་ཤུགས་གཅིག་སྒྲིལ་གྱིས་འབད་བརྩོན་བྱས་ཏེ་མཉམ་དུ་མི་རིགས་མཐུན་སྒྲིལ་ཡར་ཐོན་ཡོང་རྒྱུ་རྒྱུན་འཁྱོངས་ནས། གྲོང་སྡེ་ཡོངས་ཀྱིས་མི་རིགས་མཐུན་སྒྲིལ་དཔེ་སྟོན་གྲོང་སྡེ་འཛུགས་པའི་ལོ་རྒྱུས་རླབས་ཆེན་ཀྱི་ལམ་བུར་ཞུགས་ཡོད།
རོགས་རམ་རྒྱུན་འཁྱོངས་ནས་ཐུན་མོང་ཕྱུག་འགྱུར་ཡོང་བ་དང་། “ཕན་ཚུན་རོགས་རམ”ལ་བརྟེན་ནས“ཕན་ཚུན་ཕྱུག་འགྱུར”ཡོང་བར་བསྐུལ།
སེར་ཤུལ་གྲོང་རྡལ་ཁྲིབ་གོང་གྲོང་སྡེས“འབྱོར་འབྲིང་ལམ་དུ་མི་རིགས་གཅིག་ཀྱང་རྗེས་ལུས་མི་ཐེབས་པ་དང་། གྲོང་སྡེ་གཅིག་དང་ཁྱིམ་ཚང་གཅིག།།མི་གཅིག་ཀྱང་རྗེས་ལུས་མི་ཐེབས”པའི་དམ་བཅའ་ནམ་ཡང་མ་བརྗེད་པར། ཁྲིབ་གོང་གྲོང་སྡེའི་ཁེ་ལས་དང་ཁེར་རྐྱང་བཟོ་ཚོང་དུད་ཚང་སྒྲིག་འཛུགས་བྱས་ཏེ“རོགས་རམ་མཉམ་ལས་བྱས་ནས་ཐུན་མོང་ཕྱུག་འགྱུར་དང་། མཐུན་སྒྲིལ་འབད་འཐབ་བྱས་ནས་འབྱོར་འབྲིང་ལམ་བུར་མཉམ་དུ་བསྐྱོད”ཅེས་པའི་བྱེད་སྒོ་ཐེངས་12སྤེལ་བ་དང་། མང་ཚོགས་ཁེ་ལས་དང་ཁེར་རྐྱང་བཟོ་ཚོང་དུད་ཚང་ལ་རོགས་རམ་ལས་བཟོ་བ་583སྐུལ་སློང་བྱས་ཏེ། མི་རེའི་ཆ་སྙོམས་ལས་བཟོ་ཡོང་འབབ་སྒོར་ཁྲི་3མངོན་འགྱུར་བྱུང་བ་དང་མང་ཚོགས་ཀྱི་ཡོང་འབབ་སྒོར་ཁྲི་500ལྷག་ཙམ་འཕར་ཡོད། “ཏང་ཀྲི་པུའུ་དང་ཁེ་ལས། འབྲོག་པ་བཅས་ཟུང་འབྲེལ”ཀྱི་ཐོན་ལས་འཕེལ་རྒྱས་ལམ་སྲོལ་བཙུགས་པ་དང་། དཀར་མཛེས་ཁུལ་གྱི་བོད་ཀྱི་ནོར་ནག་སྐྱེས་ཁམས་འབྲོག་ལས་ཚད་ཡོད་སྤྱི་གཉེར་ཁང་ནང་འདྲེན་བྱས་ནས་སེར་ཤུལ་རྫོང་ཞིང་འབྲོག་སྤྱི་གཉེར་ཁང་དང་མཉམ་ལས་བྱས་ཏེ། “རང་བདག་དོ་དམ་དང་ཐུན་མོང་དཔལ་འབྱོར་སྟོབས་ཆེར་གཏོང་བ། མང་ཚོགས་ལ་ཁེ་སྤོགས་བགོ་བ། ཐུན་མོང་ཕྱུག་འགྱུར”གྱི་རྣམ་པ་འཚོལ་ཞིབ་བྱས། བོད་ལུག་17ནང་འདྲེན་བྱས་ནས་བོད་ལུག་རྒྱུད་འདེམས་བསྐྱར་གསོ་དང་། ནོར་ནག་རྒྱུད་བཟང་གསོ་སྐྱོང་། གཟན་རྩྭ་འདེབས་འཛུགས་སོགས་ཀྱི་ལས་དོན་སྤེལ། “ནོར་ནག”རྒྱུད་སྤེལ་རྟེན་གཞི་1དང་འོ་མ་ལས་སྣོན་བཟོ་གྲྭ་1བསྐྲུན་ནས་མང་ཚོགས་ཀྱིས་ལོ་ལྟར་ནོར་ནག་100ལྷག་ཙམ་ལྷས་ཕུད་གཏོང་བ་དང་། ལས་ཞུགས་ལས་གནས56ངང་མང་དུ་བཏང་སྟེ། མང་ཚོགས་ཀྱི་ཡོང་འབབ་སྒོར་ཁྲི་80ལྷག་ཙམ་འཕར་བ་དང་ཐུན་མོང་དཔལ་འབྱོར་ཡོང་འབབ་སྒོར་ཁྲི་123འཕར། གྲོང་སྡེའི་བཅའ་སྡོད་ལས་བྱེད་པ་བློ་མཐུན་ཀྲུའུ་ཆི་ཞའོ་ཡིས“གནས་འདིར་ང་ཚོའི་མི་རིགས་ཕན་ཚུན་རོགས་རམ་དང་མཐུན་སྒྲིལ་བྱས་ནས་ཁྱིམ་ཚང་གཅིག་ལྟར་འཆམ། ང་དང་ཁྱོད་ཀྱི་དབྱེ་བ་མེད་པར་མཉམ་དུ་འབྱོར་འབྲིང་ལམ་དུ་བསྐྱོད་བཞིན་ཡོད”ཅེས་ངོ་སྤྲོད་གནང་བ་རེད།
སེར་ཤུལ་གྲོང་རྡལ་ཁྲིབ་གོང་གྲོང་སྡེ་འདིར་ལྗང་མདོག་གི་རྩྭ་ཐང་གིས་ཐུན་མིན་གྱི་སྐྱེས་ཁམས་མ་ལག་གྲུབ་ཡོད། ཁྲིབ་གོང་གྲོང་སྡེའི་ཏང་ཀྲི་པུའུ་ཡིས“མཛེས་སྡུག་གི་ཡུལ་སྡེ”འཛུགས་སྐྲུན་བྱེད་པའི་དམིགས་ཚད་ལ་དམིགས་ནས“མི་རིགས་སྐྱེས་ཁམས་ཀྱི་འགན་འཁུར་ཆེ་རུ་གཏོང་བ་དང་། ཆེས་མཛེས་པའི་ཁྱིམ་གཞིས་མཉམ་དུ་བསྐྲུན”ཞེས་པའི་བྱེད་སྒོ་སྤེལ་བ་རེད། བོད་དང་རྒྱ། ཧུའེ། དབྱིས། སོག་སོགས་མི་རིགས་མཉམ་འདྲེས་ཀྱི་དང་བླངས་ཞབས་ཞུའི་རུ་ཁག་བཙུགས། ཁྱོན་བསྡོམས་མི་32ཀྱིས་གྲོང་སྡེའི་ཁོངས་ཡོངས་སུ་གད་སྙིགས་མེད་པའི་བྱེད་སྒོ་སྤེལ་ནས་ཆུ་ལམ་གཙང་བཤེར་ཐེངས་214དང་། རྩྭ་ཐང་གཙང་བཤེར་ཐེངས་156། གད་སྙིགས་ཏུན་15གཙང་འདྲེན་བྱས་ཏེ་ཆེས་མཛེས་སྡུག་དང་འཆམ་མཐུན་གྱི་ཁྱིམ་གཞིས་མཉམ་དུ་བསྐྲུན། “རི་གཙང་ཆུ་དྭངས་ནི་གསེར་རི་དངུལ་རི་ཡིན་ལ། གངས་དང་ཁ་བ་ཡང་གསེར་རི་དང་དངུལ་རི་ཡིན”ཞེས་པའི་ལྗང་མདོག་འཕེལ་རྒྱས་འདུ་ཤེས་ལག་ལེན་བསྟར་ནས་སེར་ཤུལ་རྫོང་ཞིང་འབྲོག་སྤྱི་གཉེར་ཁང་དང་ལྷོ་ནུབ་མི་རིགས་སློབ་ཆེན་གཉིས་མཉམ་འབྲེལ་སྒོས“སྐྱེ་ཁམས་ཉམས་གསོ་དང་མིས་བཟོས་རྩྭ་འདེབས་མཉམ་འབྲེལ”གྱི་རྟེན་གཞི་འཛུགས་སྐྲུན་བྱས་པ་དང་། མང་ཚོགས་ཀྱི་སྣེ་ཁྲིད་ནས་ཕན་ཚུན་རོགས་རམ་བྱེད་པའི་ཆེས་མཛེས་པའི་ཁྲིབ་གོང་ཁྱིམ་གཞིས་འཛུགས་སྐྲུན་བྱེད་སྒོ་ཐེངས་22སྤེལ་བ་དང་། སྐྱེ་ཁམས་ཉམས་གསོ་དང་རྩྭ་ར་གསབ་འདེབས། རྩྭ་ཐང་བྱི་གསོད་སོགས་ཀྱི་བྱེད་སྒོ་རབ་དང་རིམ་པ་ཐེངས་22སྤེལ། ཚན་རྩལ་རྩྭ་མུའུ་ཁྲི་13ལྷག་ཙམ་བཏབ་པ་དང་། སྐྱེ་ཁམས་དཔེ་སྟོན་གྲོང་སྡེ་འཛུགས་སྐྲུན་མགྱོགས་སུ་བཏང་ནས། “མེ་ཏོག་གི་རྒྱ་མཚོ་དང་སྲོག་ཆགས་ཀྱི་ཞིང་ཁམས”ཀྱི་ཆེས་མཛེས་པའི་སྐྱེ་ཁམས་ཁྱིམ་གཞིས་ང་ཚོ་དང་བར་ཐག་ཉེ་རུ་ཕྱིན་པ་དང་། གྲོང་སྡེ་ཡོངས་ཀྱིས་མཐུན་སྒྲིལ་དང་རོགས་རམ་འོག་ཆེས་མཛེས་པའི་སྐྱེས་ཁམས་ཁྱིམ་གཞིས་མཉམ་དུ་བསྐྲུན་པའི་ལེའུ་གསར་པ་བཏོད། མང་ཚོགས་བཀྲ་ཤིས་ཚེ་རིང་གིས“ང་ཚོས་མཉམ་དུ་ལྟ་སྐྱོང་དང་མཐུན་སྒྲིལ། རོགས་རམ་སྒོས་འཛུགས་སྐྲུན་ཧུར་ཐག་བྱས་ན་མཛེས་སྡུག་ལྡན་པའི་ཁྲིབ་གོང་གསར་པ་ཞིག་བསྐྲུན་ཐུབ་ངེས་རེད”ཅེས་སྤོབས་པ་ཆེན་པོས་བཤད།
ཁ་གཏད་རོགས་སྐྱོར་དང་ལག་རྩལ་ལ་བརྟེན་ནས་ཕུགས་འདུན་མངོན་དུ་འགྱུར། དངོས་སྒྲུབ་ལ་བརྟེན་ནས་གཡུར་ཟའི་འབྲས་བུ་ཐོབ།
སེར་ཤུལ་གྲོང་རྡལ་ལ“ཁམས་པའི་གྱོན་ཆས་ཀྱི་འབྱུང་ཡུལ”ཞེས་པའི་མཚན་སྙན་ཡོད། བོད་ཆས་ཐོན་ལས་ཀྱི་ཆ་རྐྱེན་ཞན་པ་དང་སྟབས་བདེ་ཡིན་པ། རིག་གནས་ཕྱུག་པ་བཅས་ཀྱི་ཁྱད་ཆོས་ལྡན་ལ་ཁྲིབ་གོང་གྲོང་སྡེ་ཡང་ས་གནས་གཙོ་བོར་ཆགས་ཡོད་སྟབས་གྲོང་སྡེ་ཡོངས་སུ་ཁྱོན་འབྲོག་པ་32ཀྱིས་ཆེད་དུ་བོད་ཆས་ཐོན་སྐྱེད་ཀྱི་ལས་ཀ་གཉེར་བཞིན་ཡོད། ཁ་གཏད་རོགས་སྐྱོར་མཁན་སི་ཁྲོན་ཞིང་ཆེན་རྒྱང་བསྒྲགས་བརྙན་འཕྲིན་ལས་ཁུངས་ཀྱི་གྲོང་སྡེ་བཅའ་སྡོད་ཧྲུའུ་ཅི་དང་པོ་བློ་མཐུན་ཡན་ལུང་གིས་ང་ཚོར“མི་རིགས་རིག་གནས་ལག་རྩལ་ནི་ང་ཚོ་བོད་རིགས་ཀྱི་ཐུན་མོང་མ་ཡིན་པའི་གསར་གཏོད་ཅིག་ཡིན་ལ། མི་རིགས་ཁག་ཐུན་མོང་གི་བསམ་པའི་རྒྱུ་ནོར་ཞིག་ཀྱང་ཡིན། ཀྲུང་ཧྭ་མི་རིགས་ནི་གཅིག་མཐུན་ཚོགས་པ་ཞིག་ཡིན། མཐོ་སྒང་གི་ལག་རྩལ་འདི་མི་མང་པོས་ཁོངས་སུ་ཆུད་དུ་འཇུག་དགོས”ཞེས་བཤད། ཁྲིབ་གོང་གྲོང་སྡེའི་བཟོ་པ་རྣམས་ཀྱིས་རྔུལ་ཁྲག་ལས་ཐོན་པའི་སེར་ཤུལ་བོད་ཆས་ཁྱེར་ནས་ཁམས་པའི་བརྙན་འཕྲིན་ཁང་གི་བོད་ཀྱི་ལོ་སར་དགོང་ཚོགས་ཀྱི་གར་སྟེགས་ཐོག་ཁྱེར་བ་དང་ཁྲིབ་གོང་གྲོང་སྡེའི་ཐུན་མིན་གྱི་མི་རིགས་རིག་གནས་ལག་རྩལ་དེ་ཁྲེང་ཏུའུ་སོགས་ཁྲོམ་རར་སྤེལ་རེས་བྱས་པ་རེད། ཚེམ་བཟོ་དུད་ཁྱིམ་10ཙམ“མི་རིགས་མཐུན་སྒྲིལ་ཕྱུག་འགྱུར་དཔེ་སྟོན་དུད་ཚང”དུ་བདམས་པ་དང་། གློག་སྒུལ་ཚེམ་བཟོ་འཕྲུལ་འཁོར་དང་། སྒྲིལ་གནོད་ཆས། མཐའ་སྒྲོག་འཕྲུལ་འཁོར་སོགས་སྒྲིག་ཆས་གསར་རྐྱང་ཉོ་སྒྲུབ་བྱས། མགོན་མེད་ཟས་སྦྱིན་ལག་ཤེས་བཟོ་རྩལ་རིག་གནས་ཚད་ཡོད་འགན་འཁྲི་སྤྱི་གཉེར་ཁང་བཙུགས་ཏེ། “རྩེར་སོན་ཟོང་རྟགས་དང་ཞིང་རོགས་སྤུས་རྟགས་མཉམ་འབྲེལ”གྱི་ལམ་གཉིས་ཐབས་ཇུས་བསྐྲུན་ཏེ། དྲྭ་ཐོག་ནས་འདར་དབྱངས་དང་མགྱོགས་འཕྲིན་ཐད་གཏོང་བརྒྱུད་ནས་ཚོང་ཟོག་ཕྱིར་འཚོང་དང་།
དྲྭ་འོག་ནས་ཚོང་ཁང་དང་རིག་གནས་ཡུལ་སྐོར་ཁྲོམ་རར་འབྲེལ་མཐུད་བྱས། བལ་དང་ཁུ་ལུ་འདེམས་གསེས་བྱས་ནས་འཁེལ་འཐག་དང་ཚོན་རྒྱག་པ། འཚེམ་བཟོ་སོགས་སྲོལ་རྒྱུན་གྱི་བཟོ་རྩལ་རྒྱུན་བསྐྱངས་ནས་སྤུས་ཚད་འགན་ལེན་བྱས། ས་གནས་ཁག་གི་ཉོ་སྒྲུབ་བྱེད་མཁན་རྒྱུན་མི་ཆད་པར་མ་ཟད། ས་ཆ་གཞན་གྱི་པར་འདེབས་ཚོན་རྒྱག་ལག་རྩལ་བོད་ཆས་བཟོ་རྩལ་ནང་འདྲེས་བྱས་ནས་མི་རིགས་ཁག་གི་རིག་གནས་ལག་རྩལ་མཉམ་འདྲེས་སྤེལ་རེས་མངོན་དུ་འགྱུར་བར་བྱས། སྡེ་མི་ཡེ་ཤེས་ལྷ་མོས“ང་ཚོར་མི་རིགས་རིག་གནས་ལག་རྩལ་སྤེལ་རེས་བྱེད་དུ་བཅུག་པ་དེས་ང་ཚོའི་གྲོང་སྡེའི་མང་ཚོགས་ཀྱི་འབབ་འཕར་ཕྱུག་འགྱུར་ལ་སྐུལ་ཁྲིད་བྱས་པར་མ་ཟད། མི་རིགས་ཀྱི་རིག་གནས་ལག་རྩལ་སྤེལ་རེས་ལ་སྐུལ་འདེད་བཏང་བ་རེད”ཅེས་ངོ་སྤྲོད་བྱས།
མི་རིགས་ཁག་གི་བར་མཐུན་སྒྲིལ་དང་ལྟ་སྐྱོང། རོགས་རམ་ཡོད་པས། མི་རིགས་མཐུན་སྒྲིལ་གྱི་མེ་ཏོག་གངས་ལྗོངས་སེར་ཤུལ་རྩྭ་ཐང་དུ་སྔར་ལས་མཛེས་སྡུག་ལྡན་པར་ཡིད་ཆེས་བརྟན་པོ་ཡོད།