དབྱང་ཝེ་ཆང་། མི་རིགས་མཐུན་སྒྲིལ་གྱི་དབྱངས་རབ་ཏུ་དཀྲོལ།

དབྱང་ཝེ་ཆང་། ཕོ། ཆའང་རིགས། 1976ལོའི་ཟླ་9པར་སྐྱེས། སི་ཁྲོན་ཞིང་ཆེན་མའོ་རྫོང་གི་མི་ཡིན། མའོ་རྫོང་ཝེ་ཆང་ཆའང་རིགས་དངུལ་རྒྱན་རྟེན་མཛོད་ཁང་གི་འགོ་འཛིན། ཞིང་ཆེན་རིམ་པའི་མངོན་མིན་རིག་གནས་ཤུལ་བཞག་གིི་ཚབ་མཚོན་རང་བཞིན་གྱི་རྒྱུན་འཛིན་པ། སི་ཁྲོན་ཞིང་ཆེན་གྱི་བཟོ་བཀོད་མཛེས་རྩལ་པ་ཆེན་མོ་བཅས་ཡིན། སྒྱུ་རྩལ་གྱི་ལམ་ཁར་ཞུགས་ནས་ལོ་ངོ་སུམ་ཅུའི་རིང་ལ། ཁོང་གིས་ཐོག་མཐའ་བར་གསུམ་དུ་མི་རིགས་ཀྱི་ཆ་ལུགས་ལ་རྩ་བ་བཙུགས་ནས་སྲོལ་རྒྱུན་གྱི་ལག་རྩལ་རྒྱུན་འཛིན་བརྟན་སྲུང་བྱས། རྡུང་བའི་དངུལ་གྱི་རྒྱན་ཆའི་བཟོ་དབྱིབས་ངོ་མཚར་ཞིང་བཟོ་རྩལ་ཞིབ་ཚགས་ལྡན་པས། རྒྱན་ཆ་རེ་རེ་ཡིས་ཆའང་རིགས་ཀྱི་ལོ་ངོ་སྟོང་ཕྲག་ཁ་ཤས་ཀྱི་ལོ་རྒྱུས་དྲན་ཤེས་ཐེག་ཡོད་ལ། ཆའང་རིགས་ཀྱི་དངུལ་རྒྱན་བཟོ་རྩལ་ལ་སྤྱི་ཚོགས་ལས་རིགས་ཁག་གི་ཁས་ལེན་དང་དགའ་བསུ་ཐོབ། ཁོང་ལ་ཆའང་རིགས་ཀྱི་དངུལ་རྒྱན་རྡུང་བཟོའི་ལག་རྩལ་རྒྱུན་འཛིན་པ་དང་རྒྱལ་ཡོངས་ཀྱི་ཕུལ་བྱུང་སྒེར་གཉེར་བཟོ་ཚོང་ཁང་སོགས་ཀྱི་གཟི་བརྗིད་མཚན་སྙན་རབ་དང་རིམ་པ་ཐོབ་མྱོང་བས་ནང་སེམས་ཀྱི་ཞིབ་ཚགས་ཀྱིས་མི་རིགས་མཐུན་སྒྲིལ་གྱི་ངོ་མཚར་ལེའུ་བརྩམས།

དངུལ་བཟོའི་རྒྱུན་འཛིན་ཁྲོད་ནས་ཐུན་མོང་ཚོགས་པའི་རྨང་གཞི་བརྟན་པོ་བཙུགས།

ཐེངས་དང་པོར་ཨ་ཕའི་ལག་ནས་དངུལ་རྡུང་བྱེད་ཀྱི་ཐོ་བ་ཆུང་ཆུང་ལེན་དུས་དབྱང་ཝེ་ཆང་ལོ་ན་13ཡིན། ཁོའི་སོར་རྩེར་འཁྱུད་ཡོང་བ་ནི་འཁྱག་སོབ་སོབ་ཀྱི་སྣང་བ་ཙམ་མ་ཡིན་པར། ཆའང་རིགས་ཀྱི་རྒྱུན་རིང་པའི་རིག་གནས་ཀྱི་བརྒྱུད་རིམ་དེ་ཡིན་པ་རེད། དངུལ་མགར་ཁྱིམ་རྒྱུད་ཀྱི་མི་རབས་བཞི་པའི་རྒྱུན་འཛིན་མཁན་ཞིག་ཡིན་པའི་ཆ་ནས་མགར་ཁང་ནས་མཆེད་ཡོང་བའི་དངུལ་རྡུང་བའི་སྒྲ་ནི་ཁོ་རང་འཚར་ལོངས་བྱུང་བའི་རྒྱབ་ལྗོངས་ཀྱི་དབྱངས་རྟ་སྙན་མོ་ཡིན་ལ། དངུལ་རྒྱན་སྟེང་གི་རི་མོ་རེ་རེ་ནི་ང་ཚོ་ཆའང་རིགས་ཀྲུང་ཧྭ་མི་རིགས་ཀྱི་ཁྱིམ་ཚང་ཆེན་མོའི་ནང་འདུས་པའི་རྟགས་ཐམ་ཡིན། ཞེས་ཨ་ཕས་གནང་བའི་བཀའ་བཅོལ་དེ་ནམ་ཡང་ཁོའི་རྣ་ལམ་དུ་གྲགས། དངུལ་བཙོ་སྦྱང་དང་རྒྱུ་ཆ་བསྲེ་བ། རི་མོ་བརྐོ་བ་སོགས་ལས་རིམ་བཅུ་ཕྲག་ཁ་ཤས་དང་བརྒྱ་ཕྲག་ཁ་ཤས་གསལ་པོར་རྟོགས་ཆེད། ཁོས་དུས་རྒྱུན་དུ་ནམ་ལངས་རག་བར་དུ་མགར་ཐབ་འགྲམ་ནས་དངུལ་རྡུང་བར་འབད། དངུལ་གྱི་རྒྱུ་ཆར་ཐོ་བས་རྡུང་ཐེངས་རེ་རེ་དང་གྲི་ཆུང་གིས་བརྡར་ཐེངས་རེ་རེ་ཡིས། དེ་ནི་ལག་རྩལ་ཁོ་ན་མ་ཡིན་པར་མེས་པོའི་ཤུལ་བཞག་རྒྱུན་འཛིན་དང་མི་རིགས་ཀྱི་རྩ་བ་རྒྱུན་འཛིན་བྱས་པ་ཡིན་པ་རེད། ཅེས་པའི་རིན་ཐང་ཅན་གྱི་སྐད་ཆ་ལྗིད་ཏིག་ཏིག་དེའི་སྙིང་དོན་ལག་ཏུ་བསྟར་བཞིན་ཡོད་པ་མཚོན། མགར་ཐབ་ལས་མཆེད་པའི་མེ་ལྕེ་དང་དངུལ་རྒྱན་ལས་འཕྲོས་པའི་འོད་མདངས་ནི་རྒྱུན་འཛིན་ཡིན་ལ། སེམས་འདུན་གཅིག་གིས་མ་འོངས་པར་ཕྱོགས་པའི་སྟོབས་ཤུགས་དེ་བས་ཀྱང་ཡིན་ནོ། །

དབྱང་ཝེ་ཆང་གིས་བསམ་ན། ཆའང་རིགས་ཀྱི་དངུལ་རྒྱན་ནང་དུ་ཀྲུང་ཧྭ་མི་རིགས་ཐུན་མོང་གི་གསང་གྲངས་སྦས་ཡོད་ལ། ལུག་གི་རིས་དབྱིབས་ཀྱི་རྒྱན་རིས་ཀྱིས་མཚོན་པའི་བཀྲ་ཤིས་བདེ་ལེགས་ཀྱི་ཕུགས་འདུན་དང་། མཁར་རྫོང་གི་རི་མོ་ཡིས་བློ་བརྟན་འགྱུར་མེད་ཀྱི་གཤིས་རྒྱུད་བརྐོས་ཡོད། ཡིན་ཡང་མཚོན་རྟགས་འདི་དག་སྔ་མོ་ནས་མི་རིགས་གཞན་པའི་རིག་གནས་དང་ཤ་ཁྲག་ལྟར་འདྲེས་ཡོད། དེ་བཞིན་དངུལ་བཙོ་སྦྱང་བྱས་པ་དང་མཚུངས་པར། དངུལ་ཆུ་ཞུན་མར་བཞུ་རྗེས་ཕན་ཚུན་འདྲེས་ནས་དབྱེ་བ་འབྱེད་དཀའ། དེ་བས་མི་རིགས་ཁག་གི་རིག་གནས་ཀྱང་མ་གཞི་ནས་ཕན་ཚུན་འདྲེས་པའི་རྣམ་པ་ཡིན། ཞེས་དུས་རྒྱུན་སློབ་བུ་རྣམས་ལ་དེ་ལྟར་བསླབ་བྱ་གནང་།

2009ལོར། ཁོང་གིས་ཟླ་བ་གསུམ་གྱི་དུས་ཚོད་བེད་སྤྱད་དེ་དངུལ་གྱིས་བཟོས་པའི་ཆའང་རིགས་ཀྱི་གླིང་བུ་དེ་ཀྲུང་གོའི་རོལ་དབྱངས་རྟེན་མཛོད་ཁང་གིས་ཉར་ཚགས་བྱས་པ་དང་ཨང་རྟགས་001བཀོད། གྲུབ་འབྲས་དེ་ནི་ཁོང་གིས་རིག་གནས་གཅིག་མཐུན་འདུས་གྲུབ་ཀྱི་འདུ་ཤེས་ལག་དུ་བསྟར་བའི་མཛད་རྗེས་རྡོ་རིང་ཐོག་མར་གྱུར། 2024ལོའི་དགུན་ཁར། ལོ་ངོ་བརྒྱད་ཅུར་ལོན་པའི་རྒྱ་རིགས་ཀྱི་བགྲེས་པོ་ཞིག་གིས་རྙིང་ཧྲུལ་དུ་གྱུར་པའི་ལག་ཕྱིས་ཀྱིས་ཆའང་རིགས་ཀྱི་དངུལ་རྒྱན་རྙིང་པ་ཁ་ཤས་བཏུམས་ནས་ཁངས་ལ་མ་འཛེམ་པར་རྟེན་མཛོད་ཁང་དུ་ཐོན་ཡོང་། ཁོང་གིས་ལག་པར་དམ་པོར་བསྡམས་པའི་དངུལ་རྒྱན་རྩ་ཆེན་དེ་དག་ནི་ཁོང་གི་ཨ་ཕའི་མཛད་རྗེས་ཡིན་ལ། མ་གཞི་ཁོང་གི་ཨ་ཕ་ནི་སྔོན་ཆད་ཆའང་རིགས་འཚོ་སྡོད་ཁུལ་འཛུགས་སྐྲུན་བྱེད་པར་འོང་བའི་རོགས་སྐྱོར་ལས་བྱེད་པ་ཞིག་ཡིན་པ་དང་།

དངུལ་རྒྱན་དེ་དག་ནི་སྐབས་དེར་ཆའང་རིགས་མང་ཚོགས་ཀྱིས་ཁོང་གི་ཨ་ཕར་སྤྲད་པའི་མཛའ་བརྩེ་ཡི་དཔང་རྟགས་ཡིན་ཟེར། ལོ་ཟླ་ཡིས་བརྡར་ཟད་དང་གས་ཆག་ཤོར་ཟིན་པའི་དངུལ་རྒྱན་དེ་དག་ལ་ཞིབ་ཏུ་བལྟས་ནས། དལ་མོར་ཉམས་གསོ་བྱས་ལ། གཉིད་དུ་གཡུར་ཟིན་པའི་དངུལ་རྒྱན་རྙིང་པ་འདི་དག་ལ་ཡང་བསྐྱར་འོད་མདངས་འཕྲོ་བར་བྱས།

ཉམས་གསོ་བྱས་ཟིན་པའི་དངུལ་རྒྱན་ལག་ཏུ་དམ་པོར་བཟུང་ནས་མཛུབ་རྩེ་ཡིས་དལ་མོར་བྱིལ་བྱིལ་བྱས། རྒན་པ་དེའི་མིག་ཀོང་སྔ་མོ་ནས་མཆི་མས་བཀང་ཡོད་ལ། ཁོས་མགྲིན་པ་བསྔངས་ནས་དབྱང་ཝེ་ཆང་ལ། གནའ་བོའི་མི་རིགས་སྒྱུ་རྩལ་ལ་ཁྱེད་རང་ལྟ་བུའི་གཞོན་ནུ་ཚོས་མི་རབས་ནས་མི་རབས་བར་རྒྱུན་འཛིན་བྱས་ནས། དངུལ་ལྟར་ནམ་ཡང་འོད་འཕྲོ་བར་འཇུག་དགོས། ཞེས་བཤད། ད་ཆ་ལོ་50བརྒལ་བའི་དབྱང་ཝེ་ཆང་སྔར་བཞིན་ཁོ་རང་གི་མགར་ཁང་དུ་འགྲོ་བཞིན་ཡོད།

དངུལ་གྱི་རྒྱན་ཆས་རིག་གནས་མཉམ་དུ་འདྲེས་པའི་སྦྲེལ་ཟམ་བརྟན་པོ་བཙུགས།

སྲོལ་རྒྱུན་གྱི་ལག་རྩལ་རིག་གནས་རྟེན་མཛོད་ཁང་ཁོ་ནར་ཉར་ཚགས་བྱས་ནས་བསྐྱུར་མི་རུང་། ལོ་40སྐབས་ཀྱིས་དབྱང་ཝེ་ཆང་གི་མིག་དབང་མི་རིགས་རིག་གནས་ཀྱི་གནའ་རྫས་འགྲེམ་སྟོན་སྤེལ་རེས་ཚོགས་འདུའི་སྟེང་གི་རིགས་སོ་སོའི་ཁྱད་དུ་འཕགས་པའི་སྒྱུ་རྩལ་བརྩམས་ཆོས་དག་གིས་འཕྲོག་སོང་། དབྱིས་རིགས་ཀྱི་ཚོན་རྩི་བྱུགས་པའི་རྫ་ཆས་སྟེང་གི་ཚོན་རིས་འབྲི་རྩལ་ཁོང་གི་མིག་མདུན་དུ་མངོན་མ་ཐག །ཁོང་གིས་གློ་བུར་དུ་རྙིང་ཧྲུལ་དུ་གྱུར་པའི་ཟིན་བྲིས་དེའི་ཁྲོད་ཀྱི་གསང་བ་རྟོགས་སོང་། མེའོ་རིགས་ཀྱི་ཕྱེ་ལེབ་རི་མོ་དང་ཆའང་རིགས་ཀྱི་མེ་ལྕེབ་རི་མོ་གང་ཡིན་རུང་། ནམ་ཡང་ཉམས་པ་མེད་པའི་སྙིང་སྟོབས་ལ་བསྟོད་བསྔགས་བྱས་པ་མཚོན་ལ། བོད་ཀྱི་བཀྲ་ཤིས་རྟགས་བརྒྱད་དང་ཆའང་རིགས་ཀྱི་བཀྲ་ཤིས་མདུད་པ་གང་ཡིན་ཡང་ཚེ་བསོད་དབང་ཐང་རྒྱས་པའི་མཚོན་དོན་ཡིན། སྐད་ཅིག་ཙམ་ལ་མི་རིགས་སོ་སོའི་བཟོ་པའི་ལག་རྩལ་མགར་ཐབ་གཅིག་ཏུ་ཞུན་བརྡར་བྱེད་པའི་མེ་སྟག་ཕྲ་མོ་ཞིག་ཁོའི་ནང་སེམས་སུ་མཆེད། ཁོ་རང་ས་ཆ་དང་ཡུལ་ལུང་མང་པོར་སོང་ནས་མི་རིགས་སོ་སོའི་སྒྱུ་རྩལ་པ་ཆེན་མོ་དགེ་རྒན་དུ་བསྟེན་ནས་བཟོ་རྩལ་གྱི་སྙིང་བཅུད་བློ་འདྲི་བྱས། རྙིང་ཧྲུལ་དུ་གྱུར་པའི་ཟིན་བྲིས་སྟེང་དུ་མི་རིགས་མི་འདྲ་བའི་བཟོ་རྩལ་གྱི་མན་ངག་རེ་རེ་གསལ་པོར་བཀོད་ཡོད་ལ། གསར་གཏོད་རང་བཞིན་ལྡན་པའི་སྒོ་ནས་མི་རིགས་སོ་སོའི་ཕུལ་བྱུང་གི་བཟོ་རྩལ་ཁྲོད་དུ་ཆའང་རིགས་ཀྱི་དངུལ་རྒྱན་གྱི་གཞི་རྒྱུ་བསྲེས། ལྷག་པར་དུ་ཆེད་དུ་ཇུས་འགོད་བྱས་པའི་མི་རིགས་མཐུན་སྒྲིལ་ཆེན་མོ་ཡི་དངུལ་དེམ་སྟེང་གི་ཚགས་རིས་ཀྱིས་མཐུན་སྒྲིལ་བཟོད་སྒོམ་མངོན་ཡོད་ལ། མི་རིགས་སོ་སོ་སེ་འབྲུ་ནང་བཞིན་དམ་པོར་འཁྱུད་ཡོད་པ་མཚོན། ཁོང་གིས་སྣེ་ཁྲིད་དེ་གསར་གཏོད་ཇུས་འགོད་བྱས་པའི་ཆའང་རིགས་ཀྱི་སྐེ་དར་དམར་པོ་ཆེས་དྲིན་ཆེ་བའི་མི་བུ་ལ་འབུལ་ཞེས་པའི་རིག་གནས་གསར་གཏོད་རབ་དང་རིམ་པ་ཡིས། ཆའང་རིགས་ཀྱི་དར་འཐག་རི་མོ་དང་རྒྱ་རིགས་ཀྱི་ཤོག་དྲས་འདྲ་གཟུགས་ཀྱི་ལག་རྩལ་སྡེབ་སྒྲིག་བྱས་ནས། མི་རིགས་ཕན་ཚུན་ལ་ཕུལ་བའི་ལེགས་སྐྱེས་ཆེས་གཙོ་བོར་གྱུར་ཡོད། ཐེངས་ཤིག་ལ། ཁོས་བོད་ཀྱི་བག་མ་ཞིག་གི་མགོ་སྤྲས་བཟོ་སྐབས། མགོ་སྤྲས་སྟེང་དུ་བཀྲ་ཤིས་རྟགས་བརྒྱད་ཀྱི་རི་མོ་བརྐོས། བག་མས་ངོ་གདོང་འཛུམ་གྱིས་ཁེངས་ནས། འདི་ནི་ང་ཚོའི་མི་རིགས་གཉིས་ཀྱི་རྟེན་འབྲེལ་ལས་བྱུང་བའི་མགོ་སྤྲས་མཆོག་ཏུ་གྱུར་པ་ཞིག་ཡིན་ཟེར། ལོ་ངོ་གང་མང་ཞིག་ལ། དབྱང་ཝེ་ཆང་གི་སོར་རྩེ་ལས་ཐོན་པའི་བརྩམས་ཆོས་རེ་རེ་ཡིས་མི་རིགས་རིག་གནས་མཉམ་འདྲེས་ཀྱི་སྦྲེལ་ཟམ་བཙུགས་ལ། ཁོང་གི་བརྩམས་ཆོས་ཀྱང་རྒྱན་ཆ་རྐྱང་པ་ནས་མི་རིགས་མཐུན་སྒྲིལ་གྱི་གཞི་རྒྱུ་འདྲེས་པའི་སྒྱུ་རྩལ་བརྩམས་ཆོས་སུ་གྱུར་པར་མ་ཟད། སོར་རྩེ་རུ་འཁྱུད་བཞིན་པའི་དམངས་ཁྲོད་ཀྱི་ལག་རྩལ་དག་གིས་མི་རིགས་མཐུན་སྒྲིལ་གྱི་མི་སེམས་འགུལ་བའི་གཏམ་རྒྱུད་རེ་རེ་ལྷུག་པོར་བརྗོད།

རྟེན་མཛོད་ཁང་ལོ་རྒྱུས་ཀྱི་སྐར་ཁུང་དུ་བྱས་ནས་ཀྲུང་ཧྭ་མི་རིགས་ཀྱི་འབྲེལ་འདྲིས་སྒོ་མོ་ཕྱེ་བ།

མའོ་རྫོང་ཝེ་ཆང་ཆའང་རིགས་དངུལ་རྒྱན་རྟེན་མཛོད་ཁང་གི་སྒོ་བྱང་སྟེ་མི་རིགས་སོ་སོའི་སྤུན་ཟླའི་ཁྱིམ་ཚང་ཞེས་པ་ནི་དབྱང་ཝེ་ཆང་གིས་ལོ་ངོ་སུམ་ཅུའི་དུས་ཚོད་སྤྱད་ནས་མི་རིགས་མཐུན་སྒྲིལ་ལ་སྤྲད་པའི་རྒྱུགས་ཤོག་ཆ་ཚང་ཞིག་ཡིན་པ་རེད། མ་དངུལ་སྒོར་ཁྲི་1200བཏང་ནས་བསྐྲུན་པའི་བསྡུ་ཉར་དང་ཞིབ་འཇུག །འགྲེམས་སྟོན། སློབ་གསོ། སྤེལ་རེས་སོགས་ཀྱི་ནུས་པ་གཞི་གཅིག་ཏུ་འདྲེས་པའི་དམངས་གཉེར་རྟེན་མཛོད་ཁང་གི་ནང་དུ་ཁོའི་བློ་གྲོས་དང་སེམས་ཤུགས་འདྲེས། རྔ་བ་ཁུལ་གྱི་སི་ཁྲོན་ཞིང་ཆེན་རིག་གནས་ཐིང་གིས་ཆོག་མཆན་ཐོབ་པའི་དམངས་གཉེར་རྟེན་མཛོད་ཁང་གཅིག་པུ་ཡིན་པའི་ཆ་ནས། གཞི་རྒྱ་སྨི་གྲུ་བཞི་མ་ཆིག་སྟོང་ཅན་གྱི་འགྲེམ་སྟོན་ཁང་གི་ནང་དུ། ལོ་ངོ་ཉིས་སྟོང་གི་ལོ་རྒྱུས་ལྡན་པའི་འགྲེམ་རྫས་ཀྱིས་ཆའང་རིགས་ཀྱི་རུ་སྤོར་བ་དང་དུས་ཆེན། གཉེན་སྲོལ་སོགས་ཀྱི་རིག་གནས་ཕྱོགས་མི་གཅིག་པ་དང་ཟུར་མི་འདྲ་བའི་ངོས་ནས་འགྲེམ་སྟོན་བྱས།

མི་རིགས་མཉམ་འདྲེས་ཀྱི་འགྲེམས་ཁུལ་དུ་རྒྱ་རིགས་ཀྱི་བསོད་ནམས་ཞེས་པའི་ཡི་གེ་དེ་ཆའང་རིགས་ཀྱི་ལུག་རིས་ཅན་གྱི་དངུལ་གྱི་སྒོ་ཟྭའི་སྟེང་བྲིས་ཡོད་པ་ཡིས། ང་ཚོའི་འོད་སྟོང་འབར་བའི་རིག་གནས་ནི་མི་རིགས་ཁག་གིས་ཐུན་མོང་སྒོས་གསར་གཏོད་བྱས་པ་ཡིན་པ་ལ་འགྲེལ་བཤད་གསལ་པོ་བརྒྱབ་ཡོད་པ་རེད། རྟེན་མཛོད་ཁང་སྒོ་ཕྱེས་པའི་ཚུན་ཆད་ལ། དབྱང་ཝེ་ཆང་གིས་འགྲེམ་རྫས་རང་གིས་དངོས་སུ་ངོ་སྤྲོད་བྱས་ནས། འགྲེམ་རྫས་འདི་དག་བརྒྱུད་ནས་མི་རིགས་མཐུན་སྒྲིལ་གྱི་གཏམ་རྒྱུད་གླེང་ལ། ལོ་རེར་རྒྱལ་ཁབ་ཕྱི་ནང་གི་ཡུལ་སྐོར་པ་ཁྲི་8ལྷག་ཙམ་བསུ་མ་བྱེད་པའི་མི་ཚོགས་ཁྲོད་ན། ཁོང་གི་བྲེལ་འཚུབ་ཀྱི་གཟུགས་བརྙན་མཐོང་ཐུབ་ལ། ཉམས་ལེན་ཁུལ་ན་རིགས་སོ་སོའི་མང་ཚོགས་རྣམས་ཀྱིས་དངུལ་རྒྱན་བཟོ་བའི་དགོད་སྒྲས་ཁེངས་ཡོད་པས་མི་རིགས་མཐུན་སྒྲིལ་གྱི་གསོན་ཉམས་ལྡན་པའི་རྣམ་པར་མཆན་འགྲེལ་བྱས་ཡོད།

རྔ་བ་ཁུལ་ཆའང་རིགས་དངུལ་རྒྱན་རྡུང་བཟོ་ལག་རྩལ་ཐོན་སྐྱེད་རང་བཞིན་གྱི་དཔེ་སྟོན་རྟེན་གཞི་ཡིན་པའི་ཆ་ནས། དབྱང་ཝེ་ཆང་གིས་ཚོགས་པ་སྣེ་ཁྲིད་དེ་སྡེ་ཁུལ་དང་གྲོང་གསེབ་ཏུ་བསྐྱོད་དེ། རང་འགུལ་གྱིས་རིགས་སོ་སོའི་སློབ་མ་200ལྷག་ལ་རིན་མི་དགོས་པར་ཟབ་སྦྱོང་བྱས། དགེ་རྒན་དབྱང་ལགས་ཀྱིས་ཚག་རྒྱག་སྟངས་ཁོ་ན་འཁྲིད་པ་ཞིག་མ་ཡིན་པར། མི་རིགས་ཁག་འཆམ་མཐུན་མཉམ་གནས་བྱེད་སྟངས་ཀྱི་གནས་ལུགས་བརྗོད་ཡོད་ཅེས་སློབ་བུ་ཚོའི་ངག་ནས་བརྡོལ་བའི་སྐད་ཆ་རེ་རེ་ཡིས། ཁོང་གི་དངུལ་རྒྱན་བཟོ་བའི་ལག་རྩལ་གྱི་ལྡེ་མིག་གིས་ཀྲུང་ཧྭ་མི་རིགས་འགྲོ་འོང་རྒྱ་ཁྱབ་དང་ཕྱོགས་ཡོངས་བཞུགས་མོལ། མཉམ་འདྲེས་གཏིང་ཟབ་བྱེད་པའི་སྒོ་མོ་ཕྱེ་ཡོད།

དངུལ་མགར་ཁྱིམ་རྒྱུད་ཅིག་ནས་འཚར་ལོངས་བྱུང་བའི་གཞོན་ནུ་ཞིག་ནས་མི་རིགས་མཐུན་སྒྲིལ་གྱི་ཕོ་ཉར་གྱུར་པའི་ལོ་ངོ་སུམ་ཅུའི་རིང་། དབྱང་ཝེ་ཆང་གིས་དངུལ་ཆས་རྡུང་སྤྱད་ཀྱི་ལྕགས་ཀྱི་ཐོ་བ་ཆུང་ཆུང་དང་རི་མོ་བརྐོ་སྤྱད་ཀྱི་གྲི་ཆུང་བརྒྱ་ལྷག་གིས་རྒྱན་ཆ་ཡིད་དུ་འོང་བ་མང་པོ་བཟོས་པར་མ་ཟད། རིགས་སོ་སོའི་མི་རིགས་ཁག་གི་དབུགས་ལམ་གཅིག་གིས་སྐྱིད་སྡུག་མཉམ་མྱོང་། སེམས་པ་གཅིག་ལ་གཅིག་འདྲེས་ཀྱིས་འཆམ་མཐུན་རོལ་དབྱངས་དཀྲོལ་ཡོད་པ་རེད། ཁོང་གི་དངུལ་མགར་ཁང་དུ་མགར་ཐབ་ནང་གི་མེ་ལ་གཟིམ་པ་མེད་པ་ནི་ཀྲུང་ཧྭ་མི་རིགས་གཅིག་མཐུན་ཚོགས་པའི་མེ་ལྕེ་དང་འདྲ་བར། རིགས་སོ་སོའི་མི་རིགས་ཀྱི་སྲུང་སྐྱོབ་འོག་དྲག་ཏུ་འབར་ལ། ཁོང་གི་གཏམ་རྒྱུད་ཀྱིས་མི་དེ་ལས་མང་པོ་ཞིག་མི་རིགས་རིག་གནས་རྒྱུན་འཛིན་དང་མི་རིགས་མཐུན་སྒྲིལ་གྱི་རླབས་ཆེན་བྱ་གཞག་ཁྲོད་ཞུགས་པར་སྐུལ་མ་ཐེབས་སོ། །