ཧོ་ཧྥང་། བགྲང་བྱ་སོ་བཞིའི་རིང་གི་སློབ་གསོའི་ལམ་བུ།

ཧོ་ཧྥང་། མོ། ཆབ་སྲིད་ཀྱི་ངོ་བོ་མང་ཚོགས་ཡིན། 1966ལོའི་ཟླ་12པར་སྐྱེས་པ་དང་། སི་ཁྲོན་ཞིང་ཆེན་ཆུ་ཆེན་རྫོང་གི་མི་ཡིན། སི་ཁྲོན་ཞིང་ཆེན་ཝུན་ཁྲོན་སློབ་འབྲིང་གི་མཐོ་རིམ་དགེ་རྒན་ཡིན། 1991ལོར་སི་ཁྲོན་དགེ་འོས་སློབ་གླིང་ནས་མཐར་ཕྱིན་ནས་བློ་བརྟན་འགྱུར་མེད་ཀྱིས་རྔ་བའི་སློབ་གསོའི་བྱ་གཞག་ལ་ཞུགས། མོས་བགྲང་བྱ་34རིང་ལ་མི་རིགས་མང་པོ་འདུ་བའི་སློབ་ཁང་གྲུ་བཞིར་སློབ་གསོའི་ལས་ལ་གཞོལ། གསར་གཏོད་བྱས་པའི“ལོ་རྒྱུས+མི་རིགས་མཐུན་སྒྲིལ”གྱི་སློབ་གསོའི་དཔེ་རྣམ་གྱིས་མི་རིགས་སློབ་གསོར་ལེའུ་གསར་པ་བཀོད། བགྲང་བྱ་31གི་རིང་ལ་འཛིན་བདག་དགེ་རྒན་གྱི་ལས་གནས་བརྟན་སྲུང་བྱས། སློབ་གྲྭ་རང་ཁྱིམ་ལ་བརྩིས་ནས་སློབ་བུ་རྣམས་བདེ་བླག་ངང་འཚར་ལོངས་ཡོང་བར་འགན་སྲུང་བྱས། མཚོ་འཕགས་སྨི་3000ཡོད་པའི་གྲོང་སྡེར་ཕྱིན་ནས་སློབ་བུའི་ཁྱིམ་ཚང་ལ་འཚམས་འདྲིའི་ལས་སྒོ་སྟོང་ལྷག་སྤེལ། མོར“རྔ་བ་ཁུལ་གྱི་ཕུལ་བྱུང་དགེ་རྒན”དང་“རྔ་བ་ཁུལ་གྱི་དཔེ་བཟང་འཛིན་བདག་དགེ་རྒན”སོགས་ཀྱི་གཟི་བརྗིད་མཚན་སྙན་ཐོབ་མྱོང་།

སློབ་ཁྲིད་ཀྱི་གྲུ་གཟིངས་ཆེན་མོར་ལོ་རྒྱུས་ལ་ངེས་ཤེས་གསལ་པོ་བསྐྱེད།

སི་ཁྲོན་ནུབ་བྱང་གི་ཝུན་ཁྲོན་རྫོང་དུ་གངས་རི་དང་རྨིན་ཅང་གཙང་པོའི་འདྲེས་མཚམས་སུ་མིང་ལ་ཧོ་ཧྥང་ཞེས་པའི་ལོ་རྒྱུས་དགེ་རྒན་ཞིག་ཡོད་ལ། ཁོང་ནི་མཐོ་སྒང་དུ་བཞད་པའི་སྐལ་བཟང་མེ་ཏོག་བཞིན་བགྲང་བྱ་སུམ་ཅུ་སོ་བཞིའི་ལང་ཚོ་མི་རིགས་མང་པོའི་སློབ་གསོའི་ས་ཞིང་དུ་བཏབ། ཁྲིད་སྟེགས་སུ་མི་རིགས་མཐུན་སྒྲིལ་གྱི་ལས་ལ་གཞོལ་ནས། མཚོ་འཕགས་སྨི་སུམ་སྟོང་གི་སློབ་གསོའི་ཞིང་ས་རུ་མཚར་སྡུག་རྣམ་པར་བཀྲ་བའི་མི་རིགས་མཐུན་སྒྲིལ་གྱི་མཛེས་རིས་བཀོད།

དགེ་རྒན་ཧོ་ཧྥང་གིས་ལོ་རྒྱུས་ནི་མི་རིགས་ཤིག་གི་ཁྲག་རྒྱུན་ལ་འདྲེས་པའི་དྲན་འཆར་དང་སློབ་གསོའི་བླ་སྲོག་ཡིན་པར་ངེས་ཤེས་ཟབ་མོ་བསྐྱེད། མོས“ལོ་རྒྱུས+མི་རིགས་མཐུན་སྒྲིལ”གྱི་སློབ་ཁྲིད་དཔེ་རྣམ་གསར་གཏོད་བྱས་ནས་ལོ་ངོ་སྟོང་གི་ལོ་རྒྱུས་དེ་བྱིས་པ་རྣམས་ཀྱི་བློ་ལ་ངེས་པར་བྱས། “ཝུན་ཤིང་ཀོང་ཇོ་བོད་དུ་ཕེབས་པའི”ལོ་རྒྱུས་བརྗོད་སྐབས། ཁོ་མོས་ཟློས་གར་འཁྲབ་གཞུང་སྒྲིག བོད་རིགས་སློབ་མར་ཐུ་བྷོད་ཀྱི་ཕོ་ཉ་དང་རྒྱ་རིགས་སློབ་མར་ཐང་རྒྱལ་རབས་ཀྱི་དཔོན་རིགས་འཁྲབ་སྟོན་བྱེད་དུ་བཅུག་ནས། མི་རིགས་མི་འདྲ་བའི་ན་ཆུང་གཞོན་ནུ་རྣམས་ཟློས་གར་འཁྲབ་སྟོན་བརྒྱུད་ཕན་ཚུན་ལ་རྒྱུས་མངའ་ཡོད་པ་བྱས། “ཁྱིམ་གཞི་གཅིག”གི་རྣམ་པ་དེ་ཤོག་ངོས་ཀྱི་སྨྱུག་རིས་ཙམ་མ་ཡིན་པར་ཁྲག་རྒྱུད་དུ་འདྲེས་པའི་འབོད་སྐུལ་ལ་ཕབ།

དགེ་རྒན་ཧོ་ཡིས་ཞིང་ཆེན་རིམ་པའི་ཞིབ་འཇུག་རྣམ་གྲངས《དམའ་རིམ་སློབ་འབྲིང་གི་ལོ་རྒྱུས་བསླབ་ཚན་ཁྲིད་རྩལ་ཞིབ་འཇུག》ལ་གཙོ་སྐྱོང་བྱས་པ་དང་། དེ་ལ་ཆེད་དུ“ཀྲུང་ཧྭ་མི་རིགས་སྣ་མང་གཞི་གཅིག”ཅེས་ཆེད་དོན་དཔྱད་ཞིབ་ལས་སྒོ་སྤེལ། མིང་ཆིང་རྒྱལ་རབས་ཀྱི་མི་རིགས་སྲིད་ཇུས་ལ་ཞིབ་འཇུག་བྱེད་སྐབས། མོས་སློབ་མ་རྣམས་རང་སོའི་ཁྱིམ་རྒྱུད་ཀྱི་མི་རིགས་མི་འདྲ་བའི་རིགས་རྒྱུད་འཚོལ་བསྡུ་བྱས་ཏེ་སློབ་ཁྲིད་ཐོག་ཁྱིམ་རྒྱུད་ལོ་རྒྱུས་བཤད་དུ་བཅུག །ཁྱིམ་རྒྱུད་ཀྱི་ལོ་རྒྱུས་ནས་རྒྱལ་ཁབ་ཀྱི་ལོ་རྒྱུས། “ཐུན་མོང་ལྔའི”འདུ་ཤེས་དཔྱིད་ཆར་བཞིན་སློབ་མ་རྣམས་ཀྱི་སེམས་ལ་གཉར། མོས་ནམ་རྒྱུན་སློབ་མ་རྣམས་ལ“ང་ཚོས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་ཟབ་ཏུ་བཏང་ནས། མི་རིགས་ཁག་གི་འགྲོ་འོང་ལ་ཤུགས་སྣོན་བརྒྱབ་སྟེ་མི་རིགས་ཁག་གི་མཐུན་སྒྲིལ་འབད་འཐབ་དང་ཐུན་མོང་དར་རྒྱས་གོང་འཕེལ་ཡོང་བར་སྐུལ་འདེད་གཏོང་དགོས”ཞེས་ཡང་ཡང་བཤད། 2009ལོ་ནས་2025ལོའི་བར་མོས་སྣེ་ཁྲིད་པའི་འཛིན་གྲྭ་སྐབས་དྲུག་ལ་རྔ་བ་ཁུལ་གྱི་འབྲིང་རྒྱུགས་ལོ་རྒྱུས་བསླབ་ཚན་ཨང་དང་པོ་ཐོབ་པ་དང་། ཁུལ་གྱི་མདུན་གྲལ་གྱི་ཨང་རིམ་བཅུ་ལ་ཚུད་པའི་སློབ་མ་བཅུ་ཕྲག་ཁ་ཤས་གསོ་སྐྱོང་བྱས། 2016ལོའི་ཁུལ་གྱི་འབྲིང་རྒྱུགས་ཁྲོད་ཨང་དང་པོ་ལེན་མཁན་ཐའོ་ཆིའུ་ཅུས་ཀྱིས་རྩོམ་ཡིག་ཏུ་འདི་འདྲ་ཞིག་བཀོད་ཡོད། “དགེ་རྒན་ཧོ་ཡིས《མི་རིགས་མཐུན་སྒྲིལ་ཆེན་མོ》ཞེས་པའི་སློབ་ཚན་ཁྲིད་སྐབས། ངས་གཞི་ནས་མི་རིགས་ཁག་མང་པོས་མཐུན་པའི་དཔུང་སྟོབས་གཅིག་ཏུ་སྒྲིལ་ནས་རླབས་ཆེན་ཀྲུང་གོ་བསྐྲུན་པར་ངེས་ཤེས་གསལ་པོ་བྱུང་”ཞེས་བྲིས།

བྱམས་བརྩེ་ཡི་འབྲེལ་ཟམ་བརྒྱུད་ཚེ་སྲོག་གཙིགས་སུ་བཟུང་སྟེ་མཉམ་འདྲེས་འཕེལ་རྒྱས་ཀྱི་འདུ་ཤེས་ལེགས་པོ་བསྐྱེད།

རྒན་དམ་པའི་བྱམས་བརྩེ་ལ་མཐའ་མེད་པར། གངས་རིའི་ལྗོངས་འདིར་བརྩེ་བའི་དྲོད་ཁོལ་སྦྱིན། དགེ་རྒན་ཧོ་ཧྥང་གི་ལས་སྟེགས་ནི་སྔོན་ཆད་དྭ་ཕྲུག་ཚའོ་ཅིན་ཡུང་གི“མཁོ་སྤྲོད་ས་ཚིགས”ཡིན། ཆུང་དུས་ནས་ཕ་མ་གཉིས་ཀ་རྐྱེན་ལས་འདས་པའི་བོད་རིགས་གཞོན་ནུ་ཚའོ་ཅིན་ཡུང་མའོ་རྫོང་དྭ་ཕྲུག་ཁང་དུ་འཚར་ལོངས་བྱུང་། 2009ལོར་ཆམ་རིམས་ཀ་པ་བྱུང་བ་དང་། རིམས་ནད་ཕོག་པའི་ཚའོ་ཅིན་ཡུང་སློབ་གྲྭའི་ཉལ་ཁང་དུ་ལོགས་བཀར་བྱས། དགེ་རྒན་ཧོ་ཡིས་བྲེལ་འཚུབ་ངང་སྨན་རྫས་དང་ཤིང་ཏོག །

འོ་མ་བཅས་བསྐྱལ། ཚའོ་ཅིན་ཡུང་ཕ་ཡུལ་བཙན་ལྷ་རྫོང་དུ་ལོ་ན་རྒས་པའི་སྤོ་མོ་ལ་བལྟ་རུ་འགྲོ་ཐེངས་རེར། དགེ་རྒན་ཧོ་ཡིས་སྔ་ནས་སྤ་སེ་ཉོས་ནས་ཁོ་རང་སྐྱེལ་མ་བྱེད་སྲིད། གཞོན་ནུ་ཁོ་རང་མཐར་ཕྱིན་པའི་ཉིན་མོར། དྭ་ཕྲུག་ཁང་གི་འགོ་འཛིན་གྱིས་ཚའོ་ཅིན་ཡུང་ཁྲིད་ནས་སློབ་གྲྭར་ཡོང་སྟེ། དགེ་རྒན་དམ་པར་དྲི་མེད་ཁ་བཏགས་དཀར་པོ་འཐེན། “དགེ་རྒན་ཧོ་ལགས། ཁྱོད་ཀྱིས་ཅིན་ཡུང་ལ་སྤྲད་པ་ནི་ཟ་མ་དང་སྤ་སེ་ཙམ་གྱི་ག་ལ་ཚད”ཅེས་བཤད། དགེ་རྒན་ཧའོ་ཡིས་ཚའོ་ཅིན་ཡུང་ལ“ཁྱོད་ནི་གངས་རིའི་བུ་ཕྲུག་ཡིན་པས། སུ་ཞིག་རང་ལ་བརྩེ་བ་ཡིད་ལ་འཛིན་དགོས། ང་ནི་ནམ་ཡང་བུ་ཕྲུག་ཁྱོད་ཀྱི་ཨ་མ་ཡིན་ངེས“ཞེས་བཤད། ཚའོ་ཅིན་ཡུང་གིས་དགེ་རྒན་དམ་པར་གུས་ཕྱག་འཚལ་ནས་ཨ་མ་ཞེས་བོས། དགེ་རྒན་ཧ་ཡིས་མིག་ཆུ་འདོན་བཞིན་གཞོན་ནུ་ཚའོ་ཅིན་ཡང་ལ་འཐམ། ད་སྐབས་སློབ་མཐར་ཕྱིན་ནས་ཕྱིར་ལོག་པའི་ཚའོ་ཅིན་ཡུང་གིས་སྐུ་བླ་རི་བོར་ལས་གཏོད་བྱས་ནས་དམངས་སྲོལ་མགྲོན་ཁང་གཉེར་བཞིན་ཡོད། ཕྱོགས་ཀྱི་སྐུ་མགྲོན་གངས་རིའི་འདབས་ལ་བསུས། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་དེ་གར་རྣམ་པར་མཛེས།

2021ལོའི་གྲང་ངར་ཆེ་བའི་དགུན་ཁར་བསོད་ཚེ་ནམས་ཀྱི་ཁྱིམ་ལ་རྐྱེན་ངན་བྱུང་བས་སློབ་གྲྭ་འགྲིམ་མི་ཐུབ་པའི་དཀའ་ངལ་ལ་འཕྲད། དགེ་རྒན་ཧོ་ཡིས་ཁྱིམ་ཚང་ཨུ་ལྷན་གྱི་རྒྱབ་སྐྱོར་འོག་མོ་སྒེར་གྱིས་འགོ་ཁྲིད་ནས་ཞལ་འདེབས་གནང་། མོ་དང་ཁྱིམ་བདག་འཐུས་མི་རྣམས་ཁ་བ་བུ་ཡུག་འཚུབ་པར་མ་འཛེམ་པར་རོགས་དངུལ་སློབ་མའི་ཁྱིམ་ལ་སྐྱེལ་ནས་འགྲོ་སྐབས། བསོད་ཚེ་ནམས་ཀྱི་ཨ་ཕས་རོགས་དངུལ་ལེན་སྐབས་སེམས་འགུལ་ཐེབས་བཞིན“དགེ་རྒན་ཧོ་ནི་གཉེན་ཉེ་ལས་ཉེ་བོ་འདུག །ང་ཚོ་མི་རིགས་ཚང་མ་ཁྱིམ་ཚང་གཅིག་ཡིན”ཞེས་བཤད། བསོད་ཚེ་ནམས་ཀྱི་རྩོམ་ཡིག་དུ་འདི་འདྲ་ཞིག་བཀོད་འདུག “ཨ་མ་ཧོ་ཡིས་སྤྲོ་སེམས་ལྡན་པའི་སྐད་གདངས་མཐོན་པོས《ངའི་ཀྲུང་ཧྭ་ལ་དགའ》ལེན་སྐབས་འཛིན་གྲྭ་ཡོངས་སྐུལ་ཁྲིད་བྱས་ནས་ཨ་མ་ཧོ་དང་མཉམ་དུ་སྐད་གདངས་མཐོན་པོས་གླུ་ལེན་སྲིད། སྐབས་དེར་དངོས་གནས་མི་རིགས་ལྔ་དྲུག་ནི་ཁྱིམ་ཚང་གཅིག་གི་ཡིན་པར་ངེས་ཤེས་གསལ་པོ་སྐྱེས།” ད་ལྟ་བསོད་ཚེ་ནམས་ཀྱིས་ཀྲེ་ཅང་དགེ་འོས་སློབ་ཆེན་དུ་སློབ་གཉེར་བྱེད་བཞིན་ཡོད། བྱམས་བརྩེ་ལ་མཐའ་མེད། དགེ་རྒན་ཧོ་ཡིས་བརྩེ་བ་ཟབ་མོས་མི་རིགས་མཐུན་སྒྲིལ་ཡར་ཐོན་གྱི་མེ་ཏོག་བཏབ་པ་ལྟ་ན་སྡུག

འཚམས་འདྲིའི་སྐུད་པར་རི་སྡེ་ཁྲི་སྟོང་གི་བསམ་པ་གཅིག་ཏུ་སྦྲེལ།

བགྲང་བྱ་སོ་བཞིའི་རིང་ལ་དགེ་རྒན་ཧོ་ཧྥང་སློབ་མའི་ཁྱིམ་ལ་འཚམས་འདྲིར་ཕྱིན་པའི་རྐང་རྗེས་རྔ་ཁུལ་གྱི་རི་མཐོ་ས་དང་ལུང་གཞུང་ཁག་ཏུ་ཁྱབ་ཡོད། མཚོ་འཕགས་སྨི་2980ཡོད་པའི་ལི་རྫོང་ཅ་ཧྲན་གྲོང་སྡེར་དགེ་རྒན་ཧོ་སློབ་མ་ཐའོ་ཧྭ་ལེའི་ཁྱིམ་དུ་ཐེངས་མང་པོར་ཕྱིན་མྱོང་། གཞོན་ནུ་དེའི་ཨ་ཕ་དང་ཨ་མ། སྤོ་བོ་ཚང་མས་སྐད་ཆ་བཤད་མི་ཐུབ་པས། སྤོ་མོ་གཅིག་པུས་སྔོ་ཚལ་བཙོང་ནས་འཚོ་བ་སྐྱེལ་བཞིན་ཡོད། ཁྱིམ་ཚང་གི་ཁུར་པོ་ཇེ་ཡང་དུ་གཏོང་ཆེད་གཞོན་ནུ་དེར་ཐེངས་མང་པོར་སློབ་མཚམས་འཇོག་འདོད་སྐྱེས། དགེ་རྒན་ཧོ་ཡིས་ཁོ་ལ་སློབ་སྦྱོང་དང་འཚོ་བའི་མཁོ་ཆས་བྱིན་པར་མ་ཟད། སློབ་གྲྭ་དང་སློབ་གསོ་ཅུས་ལ་ཡང་དང་བསྐྱར་དུ་བསྐྱོད་ནས་ཁོ་ལ་འཚོ་བའི་གསབ་དངུལ་བརྩོན་ལེན་བྱས། ད་ལོའི་མཐོ་རྒྱུགས་ཀྱི་རྒྱུགས་འབྲས་བསྒྲགས་པ་ན། ཐའོ་ཧྭ་ལེ་ཡིས་སྐར་མ་579བླངས་ཡོད་པ་དང་། འཕྲལ་མར་དགེ་རྒན་ཧོ་ལ་ཁ་པར་བཏང་ནས་འཕྲིན་བཟང་བསྒྲགས་ནས“ཨ་མ་ཧོ་ལགས། ཁྱེད་ལ་ཐུགས་རྗེ་ཆེ་ཞུ། ཁྱེད་མེད་ན་ངའི་དེ་རིང་ཡོད་མི་སྲིད”ཅེས་བཤད།

ཆུ་ཆེན་རྫོང་ཧྲན་ཀེང་ཙི་གྲོང་སྡེའི་ཐེན་ཁྲེང་ཁྲེང་ལོ་གསུམ་གྱི་སྐབས་ལ་ཕ་མ་བཟའ་ཐོར་བརྒྱབ་ནས་ཨ་ཕས་གཉོར་བ་དང་། ཡུན་རིང་པོ་གཅེས་སྐྱོང་ལེགས་པོ་མ་ཐེབས་པས་ཡི་མུག །དགེ་རྒན་ཧོ་ཧྥང་གིས་སློབ་སྦྱོང་དང་བསམ་བློ། འཚོ་བ་བཅས་ཀྱི་ཐད་ནས་ཐུགས་ཁུར་གནང་། དམའ་རིམ་སློབ་འབྲིང་གསུམ་པའི་གཟའ་མཇུག་ཞིག་ལ། ཁོའི་ཨ་ཕས“ཁྱོད་སློབ་གྲྭར་སྐྱེལ་མི་ཐུབ”ཅེས་པའི་ཁོང་ཁྲོའི་ཚིག་གཅིག་གིས་གླ་གཏོང་རླངས་འཁོར་དུ་བསྡད་ནས་སློབ་བྱོལ་བྱས། དགེ་རྒན་ཧོ་ཧྥང་གིས་གནས་ཚུལ་དེ་ཤེས་རྗེས་འཕྲལ་མར་ཁྱིམ་བདག་དང་འབྲེལ་གཏུག་བྱས་ནས་འཚོལ་དུ་ཕྱིན། མཚན་མོ་དམར་དམར་ཟམ་པའི་ལྡིང་ཁང་ནས་ལྟོགས་སྐོམ་དང་གྲང་ངར་གྱིས་མནར་བའི་ཐེན་ཁྲེང་ཁྲེང་རྙེད། ཁོས་དགེ་རྒན་ཧོ་ཧྥང་ལ་པུས་མོ་བཙུགས་ནས“ཨ་མ་ཧོ་ལགས། དགོངས་པ་མ་ཚོམ། ཁྱེད་ལ་སེམས་ཁྲལ་བྱེད་དུ་བཅུག་སོང་”ཞེས་ངུས། འབྲིང་རྒྱུགས་ཀྱི་རྒྱུགས་འབྲས་བསྒྲགས་སྐབས། ཁོས་སྐར་མ་770.5བླངས་ནས་དགེ་རྒན་ཧོ་ཧྥང་ལ་བཀའ་དྲིན་ཞུས།

དགེ་རྒན་ཧོ་ཧྥང་གི་སློབ་མ་ནི་སྐར་ཚོམས་བཞིན་ལས་རིགས་ཁག་ཏུ་རང་མདངས་མ་ཉམས་པར་ཡོད། ཆུ་ཆེན་གྱི་ཀྲའོ་ཨན་ཞུས་པེ་ཅིན་དུ་སྲོག་སྐྱོབ་སྨན་པར་གྱུར་ཡོད། ཁྲོ་ཆུའི་ཚེ་དཔལ་སློབ་ཁྲིད་སྟེགས་བུར་སློབ་གསོའི་ལས་ལ་གཞོལ་མུས་རེད། ཟུང་ཆུའི་ལི་ཞུའེ་ཡིས་མི་དམངས་ལ་ཞབས་འདེགས་ཞུ་བའི་ལས་གནས་བརྟན་སྲུང་བྱས་ཡོད། ཝུན་ཁྲོན་གྱི་ཆུས་ཝེ་ལུང་ནི་རྒྱལ་སྲུང་གི་སྔོན་ཐོན་མི་སྣ་ཞིག་ཏུ་གྱུར་ཡོད། ཁོ་ཚོས་ཨ་མ་ཧོ་ཡིས“མི་རིགས་མཐུན་སྒྲིལ་ནི་འབོད་ཚིག་མ་ཡིན་པར། རུས་པར་བརྐོས་པའི་ཁྲག་གི་འབྲེལ་ཐག་ཡིན”ཞེས་པའི་བསླབ་བྱ་བློ་ལ་བརྟན་པོར་ངེས་ཡོད།

ཝུན་ཧྲུའེ་གཙང་པོའི་འགྲམ་ནས་གངས་རིའི་རྩེ་སྟེ། བགྲང་བྱ་སུམ་ཅུ་སོ་བཞིའི་ལོ་ཟླ་རྨིན་ཅང་གཙང་པོ་བཞིན་དལ་གྱིས་རྒྱུ། དགེ་རྒན་ཧོ་ཧྥང་གིས་ངེས་ཤེས་བསྐྱེད་པའི་སློབ་ཁྲིད་རེ་རེ་དང་དྲོད་ཁོལ་སྦྱིན་པའི་འཚམས་འདྲི་རེ་རེ། སློབ་མ་སྲུང་སྐྱོབ་བྱེད་པའི་མཚན་མོ་རེ་རེར་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་གཏོད་པའི་རླབས་ཆེན་གྱི་བྱ་གཞག་ལ་གཞོལ་མུས་རེད། མོའི་དབུ་སྐྲ་དཀར་པོ་ཁ་བ་རང་མདངས་མངོན། མོའི་གཟུགས་བརྙན་སློབ་རའི“མི་རིགས་ཁག་སེ་འབྲུ་བཞིན་དམ་དུ་སྦྲེལ”ཞེས་པའི་སེ་འབྲུ་སྡོང་པོར་དང་འདྲེས་སྐབས། ང་ཚོས“གཅིག་མཐུན་ཚོགས་པ”ཞེས་པའི་བསམ་པའི་སྡོང་པོ་ཞིག་མཐོ་སྒང་དུ་རྩ་བ་ཚུགས་ཤིང་མཚར་དུ་དངར་ནས། མི་རིགས་མང་པོ་འདུས་སྡོད་བྱེད་གནས་འདིར་ཕན་བདེ་བསྐྲུན་པ་བདེན་དཔང་བྱེད་ཐུབ།