ཁྲེན་ཝང་ཧུའེ། མཐོ་སྒང་གི་རྒྱ་སེ་མེ་ཏོག་ཐོན་ལས་ཀྱི་སྣེ་ཁྲིད་པ།

ཁྲེན་ཝང་ཧུའེ། མོ། བོད་རིགས། ཀྲུང་གོའི་གུང་ཁྲན་ཏང་ཡོན། 1974ལོའི་ཟླ་4པར་སྐྱེས། ཕ་ཡུལ་སི་ཁྲོན་ཞིང་ཆེན་བཙན་ལྷ་རྫོང་ནས་ཡིན་པ་དང་། སི་ཁྲོན་ཞིང་ཆེན་རྔ་བ་ཁུལ་བཙན་ལྷ་རྫོང་གྱ་གྱུ་ལ་ཆིན་ཏའོ་ཞང་རི་སྐྱེས་ཐོན་ཁུངས་གསར་འབྱེད་ཚད་ཡོད་འགན་འཁྲི་ཀུང་སིའི་སྤྱི་གཉེར་པ་ཡིན། མོས་བོད་ཡུལ་ནས་གཞིས་ཚུགས་ཏེ། རྒྱ་སེ་མེ་ཏོག་གི་ཐོན་ལས་སྦྲེལ་ཐག་དང་ཐོན་ལས་འཕེལ་རྒྱས་ཀྱི་བརྒྱུད་རིམ་ཧྲིལ་པོའི་ནང་མི་རིགས་མཐུན་སྒྲིལ་མཉམ་འདྲེས་ཐུབ་པ་བྱས་ནས། དྲི་ཞིམ་འཐིལ་བའི་རྒྱ་སེ་མེ་ཏོག་གིས་ཁྱིམ་ཚང་ཁྲི་སྟོང་མང་པོ་ཐུན་མོང་ཐོག་ཕྱུག་འགྱུར་ཡོང་བ་མངོན་འགྱུར་བྱས་པས། གྲོང་གསེབ་དར་རྒྱས་དང་མི་རིགས་མཉམ་འདྲེས་ཀྱི་རྣམ་པ་གསོན་ཉམས་ཅན་བཏོད་མཁན་གྱི་ལག་ལེན་མཁན་ཡིན། 2020ལོར་རྒྱལ་ཡོངས་ཀྱི་གསུམ་བརྒྱད་དར་དམར་པོ་དང་རྒྱལ་ཡོངས་ཀྱི་དབུལ་སྒྲོལ་འགག་སྒྲོལ་གྱི་སྔོན་ཐོན་མི་སྒེར། རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན་སོགས་ཀྱི་གཟི་བརྗིད་མཚན་སྙན་ཐོབ་པ་རེད།

ཐོག་མའི་བསམ་འདུན་མ་བརྗེད་པར་རྒྱ་སེ་མེ་ཏོག་གིས་མི་རིགས་ས་ཁུལ་གྱི་མཐུན་སྒྲིལ་ཡར་ཐོན་གྱི་ཕྱུག་འགྱུར་ལམ་བུར་འོད་སྣང་བསྩལ།

བཙན་ལྷ་རྫོང་གི་ས་བབ་མཐོ་ལ། སྐྱེ་ཁམས་ཁོར་ཡུག་ལེགས་བསྒྱུར་བྱས་རྗེས། རི་སྐྱེས་སྲོག་ཆགས་ཇེ་མང་ནས་ཇེ་མང་དུ་ཕྱིན་ལ། ཕག་རྒོད་དང་སྤྲེའུ་སོགས་རི་སྐྱེས་སྲོག་ཆགས་ཀྱིས་རྒྱུན་པར་ཞིང་ལས་སྐྱེ་དངོས་ལ་གཏོར་བརླག་བྱས་ནས་མང་ཚོགས་ལ་གྱོང་གུན་ཚབས་ཆེན་བཟོས།

དཀའ་ངལ་དེ་ལ་གདོང་གཏད་ནས་ཁྲེན་ཝང་ཧུའེ་ཡིས་ཐག་གཅོད་ཀྱི་ཐབས་ལམ་ཞིག་ཧུར་ཐག་སྒོས་འཚོལ། མོས་རྒྱ་སེའི་མེ་ཏོག་གི་ཡལ་གའི་སྟེང་གི་འཚེར་མས་རི་སྐྱེས་སྲོག་ཆགས་ཀྱི་གཏོར་བརླག་འགོག་ཐུབ་པ་རིམ་གྱིས་རྟོགས། དེས་མ་ཟད་བཙན་ལྷ་རྫོང་གི་གནམ་གཤིས་ཀྱང་རྒྱ་སེ་མེ་ཏོག་འདེབས་པར་ཧ་ཅང་འཚམ། དེ་བས། མོ་རང་ལན་ཀྲོའུ་དང་། ཧྲན་ཏུང་། ཅང་སུའུ། ཡུན་ནན་སོགས་སུ་རྒྱ་སེ་མེ་ཏོག་འདེབས་འཛུགས་ལག་རྩལ་ལ་རྟོག་ཞིབ་བྱེད་པར་ཐེངས་མང་པོར་ཕྱིན་པར་མ་ཟད། རྒྱ་སེ་མེ་ཏོག་གི་རིགས་སྣ་8མའོ་ཧྲེའུ་གྲོང་ཚོ་ནས་འདེབས་འཛུགས་ཚོད་ལྟ་བྱས་པ་རེད། ཆེད་མཁས་པས་གསལ་འབྱེད་ལྟར་ན། བཙན་ལྷ་རྫོང་གི་རྒྱ་སེ་མེ་ཏོག་གི་ཁམ་བུ་ཆེ་ཞིང་། འདབ་མ་མང་བ། བཅུད་སྣུམ་ཐོན་ཚད་མང་བ། རྒྱུ་སྤུས་བཟང་བ་སོགས་ཀྱི་ཁྱད་ཆོས་ལྡན། གསལ་འབྱེད་དེས་ཁྲེན་ཝང་ཧུའེ་ལ་ཡིད་ཆེས་དང་རེ་བ་ཁེངས་སུ་བཅུག །རྒྱ་སེ་མེ་ཏོག་བཏབ་ན་གཅིག་ནས་རི་སྐྱེས་སྲོག་ཆགས་ཀྱིས་ཞིང་ལས་སྐྱེ་དངོས་ལ་གཏོར་བརླག་བཟོ་བའི་གནད་དོན་ཐག་གཅོད་ཐུབ་ལ། གཉིས་ནས་མང་ཚོགས་ལ་ཕྱུག་འགྱུར་གྱི་ལམ་བུ་གསར་པ་ཞིག་ཀྱང་གཏོད་ཐུབ་པའོ། །

ཁྱབ་གདལ་གྱི་བརྒྱུད་རིམ་ཁྲོད། ཁྲེན་ཝང་ཧུའེ་ཡིས་ཐོག་མཐའ་བར་གསུམ་དུ་མི་རིགས་མཐུན་སྒྲིལ་ཡར་ཐོན་ཆེས་གཙོ་བོར་བཞག །མའོ་ཧྲུའེ་གྲོང་ཚོ་ནི་མི་རིགས་མང་པོ་འདུས་སྡོད་བྱེད་པའི་གྲོང་ཚོ་ཞིག་ཡིན་པ་དང་མི་རིགས་ཁག་གི་མང་ཚོགས་མི་རབས་ནས་མི་རབས་བར་གནས་འདི་ནས་འཚོ་སྡོད་བྱས། མོས་རིགས་སོ་སོའི་མང་ཚོགས་ཀྱིས་དཔུང་བའི་ལག་རྡང་གཅིག་ཏུ་སྦྲེལ་ན་ད་གཟོད་རྩ་བ་ནས་དབུལ་སྒྲོལ་ཕྱུག་འགྱུར་མངོན་འགྱུར་ཐུབ་པ་གསལ་པོ་ཤེས་ཡོད། ཐོན་ལས་ཁྱབ་གདལ་གཏོང་བའི་བརྒྱུད་རིམ་ཁྲོད། མོས་བྱ་བའི་ལྷུ་ཚིགས་སོ་སོའི་ནང་དུ་མི་རིགས་མཐུན་སྒྲིལ་ཡར་ཐོན་འདྲེས་པར་བཅུག་ནས། རིགས་སོ་སོའི་མང་ཚོགས་ལ་རྒྱ་སེ་མེ་ཏོག་འདེབས་འཛུགས་ཁྲོད་ནས་ཕན་ཚུན་ལ་རོགས་རམ་བྱ་རྒྱུའི་ཁྲིད་སྟོན་བྱས་ཏེ། ཐོན་ལས་འཕེལ་རྒྱས་སུ་འགྲོ་བ་དེ་མི་རིགས་དབར་གྱི་མཛའ་བརྩེ་ཟབ་མོར་གཏོང་བའི་སྒྲོག་ཐག་ཏུ་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ལག་ལེན་གྱི་ནང་དོན་ལ་འགྲེལ་བཤད་གསལ་པོ་བྱས། མོས་རིགས་སོ་སོའི་མང་ཚོགས་རྣམས་གསོ་སྦྱོང་དུ་ཞུགས་པར་རྩ་འཛུགས་བྱས་ནས། རྒྱ་སེ་མེ་ཏོག་འདེབས་འཛུགས་ཀྱི་བཟང་ཆ་དང་ཕན་ནུས་ཁ་གསལ་གོ་བདེའི་ངང་བཤད་ནས་མི་རིགས་ཁག་སོ་སོའི་བར་གྱི་འགལ་ཟླ་སེལ་བར་ནུས་པ་ཆེན་མོ་ཐོན་པར་མ་ཟད། ཚང་མས་གོང་བུ་གཅིག་ཏུ་འགྲིལ་བ་དང་བློ་ཁ་གཅིག་ཏུ་གཏོད་པའི་སྟོབས་ཤུགས་ཆེ་རུ་བཏང་། རྣམ་པ་འདི་འདྲ་སྤྱད་པ་ཡིས་རྒྱ་སེ་མེ་ཏོག་འདེབས་འཛུགས་ཐད་ལ་གྲུབ་འབྲས་མི་དམན་པ་བླངས་པ་མ་ཟད། རིགས་སོ་སོའི་མང་ཚོགས་བར་གྱི་འབྲེལ་བ་འོ་ཆུ་ལྟར་འདྲེས་ལ་མི་རིགས་མཐུན་སྒྲིལ་བརྟན་ཞིང་ཟབ་པར་གྱུར། མོས་རང་གི་བྱ་སྤྱོད་དངོས་ཀྱི་ཐོག་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་འདུ་ཤེས་ལག་ལེན་དུ་བསྟར་ནས། རིགས་སོ་སོའི་མང་ཚོགས་རྣམས་ལ་ཐུན་མོང་འབད་འཐབ་ཀྱི་བཤུལ་ལམ་ཁྲོད་ནས་མི་རིགས་མཐུན་སྒྲིལ་གྱི་སྟོབས་ཤུགས་ཚོར་དུ་བཅུག

མཐོ་སྒང་ལ་བཅངས་པའི་བརྩེ་བ་ཟབ་མོས་རྒྱ་སེ་མེ་ཏོག་ལ་མི་རིགས་ས་ཁུལ་ནས་མཐུན་སྒྲིལ་ཡར་ཐོན་གྱི་འདབ་མ་ལྷུག་པོར་གྲོལ།

ཁྲེན་ཧང་ཧའེ་ཡིས་གྲོང་མི་ཚོ་ས་གནས་གཞན་དུ་རྒྱ་སེ་མེ་ཏོག་འདེབས་གསོ་སློབ་སྦྱོང་དུ་ཁྲིད་པ། 

ཆིན་ཏའོ་ཞང་རྒྱ་སེ་མེ་ཏོག་འདེབས་འཛུགས་ཆེད་ལས་མཉམ་ལས་ཁང་བཙུགས་ནས། ཞིང་པའི་ཁྱིམ་ཚང་རྣམས་རང་མོས་ངང་མཉམ་ལས་ཁང་ནང་ཞུགས་རྗེས་མཉམ་ལས་ཁང་དང་གན་རྒྱ་བཞག་ནས། མཉམ་ལས་ཁང་གིས་མྱུ་གུའི་རྒྱུ་སྤུས་གཅིག་གྱུར་དང་འདེབས་འཛུགས་ཀྱི་ཚད་གཞི་གཅིག་གྱུར། ལག་རྩལ་གྱི་ཞབས་ཞུ་གཅིག་གྱུར། ཀུང་སི་ཡིས་ཐད་ཀར་མཉམ་ལས་ཁང་དང་ཉོ་ཚོང་བྱས་པ་ཡིས་ཕྱིར་འཚོང་བར་གྱི་བརྒྱུད་རིམ་མང་ཆེ་བ་ཞིག་མེད་པར་བཟོས་ནས། ཉོ་སྒྲུབ་ཀྱི་རིན་གོང་ཕྱིའི་ཁྲོམ་ར་དང་བསྡུར་ན་མཐོ་བས། ཞིང་པའི་ཁྱིམ་ཚང་གི་སེམས་ཁྲལ་ཐག་བཅད་པར་མ་ཟད། རིགས་སོ་སོའི་མང་ཚོགས་མཉམ་ལས་ཁྲོད་ཞུགས་པར་སྐུལ་སྤེལ་གྱི་ནུས་པ་ཐོན། ཉོ་ཚོང་གི་རྣམ་པ་དེ་ཡིས་གྲོང་གསེབ་ཀྱི་དཔལ་འབྱོར་ལ་གསོན་ཤུགས་བསྩལ་ལ་རིགས་སོ་སོའི་མང་ཚོགས་རྣམས་ལ་འབད་འཐབ་ཡར་རྒྱས་ཀྱི་སྟེགས་བུ་བསྐྲུན་ཡོད་པས། ཐོན་ལས་འཕེལ་རྒྱས་ཁྲོད་ནས་མི་རིགས་མཐུན་སྒྲིལ་གྱི་མེ་ཏོག་འཛིན་མའི་ཁྱོན་ནས་རྣམ་པར་བཀྲ་བར་བྱས། མིག་སྔར། རྒྱ་སེ་མེ་ཏོག་གི་ཐོན་ལས་རྫོང་ཡོངས་ཀྱི་ཡུལ་ཚོའམ་གྲོང་རྡལ་13དང་གྲོང་ཚོ་46ལ་ཁེབས་པ་དང་། དུད་ཚང་3700ལྷག་གི་མང་ཚོགས་དེའི་ཁྲོད་ཞུགས་ཡོད། དེར་ཁྱིམ་ཚང་དབུལ་པོ་1200དང་དབང་པོ་སྐྱོན་ཅན་གྱི་ཁྱིམ་ཚང་470ལྷག་ཚུད་ཡོད་པ་རེད། 2024ལོའི་བར་རིམ་རྩིས་བྱས་པ་ལྟར་ན། མེ་ཏོག་འདེབས་པའི་གླ་རིན་དངུལ་སྒོར་དུང་ཕྱུར་1.2བྱིན་ལ། ལོ་ངོ་བཅོ་ལྔའི་རིང་ལ་རྒྱ་སེ་མེ་ཏོག་གི་ཐོན་ལས་འཕེལ་རྒྱས་བྱུང་བ་བརྒྱུད། རིམ་བཞིན་ཐོན་ལས་འཐབ་ཇུས་ཀྱི་བརྒྱུད་རིམ་ཞིབ་ཚགས་དང་ཁ་གསལ་བཟོས་ནས། ཐོན་ལས་དང་། སློབ་སྦྱོང་།

ཞིབ་འཇུག །ཡུལ་སྐོར། སྤྲོ་གསེང་། ཉོ་སྒྲུབ་བཅས་གཞི་གཅིག་ཅན་སྤེལ་ནས་ཐོན་ལས་གསུམ་པོ་མཉམ་འདྲེས་ངང་འཕེལ་རྒྱས་བྱུང་།

རང་གི་འགན་འཁྲིའི་རྒྱུན་སྲུང་ནས་རྒྱ་སེ་མེ་ཏོག་གི་ཐོན་ལས་ཀྱིས་མི་རིགས་ས་ཁུལ་གྱི་མཐུན་སྒྲིལ་ཡར་ཐོན་ལ་སྒུལ་ཤུགས་གསར་པ་བསྩལ།

2025ལོའི་བར་དུ། བཙན་ལྷ་རྫོང་ཡོངས་ཀྱི་རྒྱ་སེ་མེ་ཏོག་འདེབས་པའི་རྒྱ་ཁྱོན་མུའུ་15000དང་། མྱུ་གུ་གསོ་བའི་རྟེན་གཞི་མུའུ་26ཟིན། ད་ལྟ་ཁྲེན་ཝང་ཧུའེ་ཡིས་བཙུགས་པའི་ཀུང་སིའི་གཞི་རྒྱ་ལ་རྒྱ་ཁྱོན་སྨི་གྲུ་བཞི་མ་4200ཅན་གྱི་རྒྱ་སེ་མེ་ཏོག་ཐོན་སྐྱེད་བཟོ་གྲྭའི་འཁོར་ཁང་དང་། སྨི་གྲུ་བཞི་མ་8000ཅན་གྱི་ཚན་རྩལ་ཕྱོགས་བསྡུས་གཞུང་ལས་ཐོག་བརྩེགས་ཁང་ཆེན། རྒྱ་སེ་མེ་ཏོག་གི་བཅུད་སྣུམ་ཐོན་སྐྱེད་བྱེད་ས་12། རྒྱ་སེ་མེ་ཏོག་གི་ཇ་ལོ་ལས་སྣོན་ཐོན་སྐྱེད་བྱེད་ས་4། རྒྱ་སེ་མེ་ཏོག་བསྙལ་མ་ཐོན་སྐྱེད་བྱེད་ས་2བཅས་ཡོད་། རང་ལ་དབང་བའི་ཚོང་རྟགས་25དང་ཆེད་ལས་ལག་རྩལ་15རེ་ཞུ་ལེགས་གྲུབ་བྱུང་ལ། ལོ་རེའི་རྒྱ་སེ་མེ་ཏོག་བསྡུ་སྐབས། ས་གནས་ཀྱི་མང་ཚོགས་དང་དབུལ་སྐྱོར་ཁྱིམ་ཚང་། དབང་པོ་སྐྱོན་ཅན་རྣམས་ལ་ལས་གནས་180ལྷག་མཁོ་སྤྲོད་བྱས། ཀུང་སིའི་གཞི་རྒྱ་ཆེ་རུ་ཕྱིན་པ་དང་ཆབས་ཅིག་ཏུ། རྒྱ་སེ་མེ་ཏོག་ཐོན་ལས་ཀྱི་ལྟ་སྐོར་ཡུལ་སྐོར་དང་། ཐོན་རྫས་ཉམས་ལེན། གསར་བརྗེའི་རིག་གནས་རྒྱུན་འཛིན་སོགས་ཀྱི་རྣམ་གྲངས་ཀྱང་ཀུང་སིའི་འཕེལ་རྒྱས་ཀྱི་དམིགས་འབེན་གལ་ཆེན་གྲལ་དུ་ཚུད་ཡོད། ཀུང་སིས་སྔོན་ཐོན་གྱི་ཐོན་སྐྱེད་ལག་རྩལ་དང་སྒྲིག་ཆས་ནང་འདྲེན་བྱས་ཡོད་པར་མ་ཟད། ཚན་རིག་ཞིབ་འཇུག་ཚོགས་པ་དང་དོ་དམ་ཤེས་ལྡན་མི་སྣ་རྩེ་གྲ་བཀོད་སྒྲིག་བྱས་ནས། རྒྱ་སེ་མེ་ཏོག་གི་ཐོན་རྫས་ཀྱིས་ཁྱབ་ཁོངས་གསར་པའི་ནང་ཐོན་པའི་ནུས་པ་དང་འཕེལ་རྒྱས་ཡོང་ཐབས་འཚོལ་ཞིབ་བྱས་ཏེ། ཀུང་སིའི་དོ་དམ་ནུས་པ་དེང་རབས་ཅན་དུ་འགྱུར་བར་ཧུར་ཐག་སྒོས་ཐོན་རྫས་གསར་པ་ཞིབ་འཇུག་དང་གསར་སྤེལ། དེ་མིན་ཐོན་རྫས་ཀྱི་ཟུར་སྣོན་རིན་ཐང་མཐོ་རུ་གཏོང་བ་བཅས་བྱས་ནས། རྒྱལ་ནང་གི་རྒྱ་སེ་མེ་ཏོག་ཐོན་ལས་ཁེ་ལས་རྩེ་གྲ་ཅན་དང་རྒྱལ་སྤྱིའི་རྒྱ་སེ་མེ་ཏོག་ཐོན་ལས་ཀྱི་ཁེ་ལས་མིང་གྲགས་ཅན་གྱི་ཚད་གཞིའི་ཐད་ལ་གོམ་པ་སྤོས། མོས་སྣེ་ཁྲིད་འོག་ཀུང་སི་ལ་སི་ཁྲོན་ཞིང་ཆེན་བཟོ་ལས་ཁྱབ་ཁོངས་ཀྱི་དབུལ་བྲལ་འགག་སྒྲོལ་གྱི་སྔོན་ཐོན་ཚོགས་པ་དང་། དམངས་གཉེར་ཚན་རྩལ་ཁེ་ལས། སི་ཁྲོན་ཞིང་ཆེན་ཆེད་ལས་སྤུས་ལེགས་ཁེ་ལས་འབྲིང་ཆུང་གསར་པ་སོགས་ཀྱི་མཚན་སྙན་ཐོབ། ད་ལྟ་བཙན་ལྷ་རྫོང་གི་རྒྱ་སེ་མེ་ཏོག་ལ་རྒྱལ་ཁབ་ཀྱི་ས་ཁམས་མཚོན་རྟགས་བདེན་དཔང་ཁྲོད་རེ་ཞུ་བྱས་ནས་ལེགས་གྲུབ་བྱུང་།

དཔུང་པ་མཉམ་གཤིབ་སྒོས་མདུན་དུ་བསྐྱོད་དེ་རྒྱ་སེ་མེ་ཏོག་གིས་མི་རིགས་ས་ཁུལ་གྱི་མཐུན་སྒྲིལ་ཡར་ཐོན་གྱི་འབྱུང་འགྱུར་གསར་པ་བཏོད།

ཁྲེན་ཝང་ཧུའེ་ཡིས་ཐོག་མཐའ་བར་གསུམ་དུ་མི་རིགས་མཐུན་སྒྲིལ་ཡར་ཐོན་དེ་བྱ་བའི་ལྷུ་ཚིགས་སོ་སོའི་ཁྲོད་དོན་འཁྱོལ་ཡོང་བ་བྱས་ལ། ལྷག་པར་དུ་མི་རིགས་རིག་གནས་དང་ཐོན་ལས་འཕེལ་རྒྱས་མཉམ་འདྲེས་གཏིང་ཟབ་ཡོང་བར་དོ་སྣང་བླ་ལྷག་བྱས། མོས་ཡུལ་སྐོར་མཉམ་ལས་ཁང་འཛུགས་རྒྱུར་སྐུལ་འདེད་བཏང་ནས་གྱ་གྱུ་ནགས་ཚལ་སློབ་གྲྭའི་རྣམ་གྲངས་གསར་གཏོད་དང་གསར་སྤེལ་བྱས་ཏེ། "ཡུལ་སྐོར+"ཏེ་ཡུལ་སྐོར་གྱི་སྟེང་དུ་ཐོན་ལས་གཞན་སྣོན་པའི་རྣམ་པ་ཡིས་སློབ་མ་དང་ཆེད་ལས་ཚོགས་པ་མང་པོས་ཞིབ་འཇུག་སློབ་སྦྱོང་གི་ལག་ལེན་བྱེད་སྒོ་སྤེལ་བར་བཀུག །གཞན་ཡང་། མོས་ད་དུང་རིག་གནས་སྤེལ་རེས་ཀྱི་བྱེད་སྒོ་བརྒྱུད་ནས་རིགས་སོ་སོའི་མང་ཚོགས་ཕན་ཚུན་རྒྱུས་ལོན་དང་མཐུན་སྒྲིལ་གྱི་འབྲེལ་བ་ཟབ་མོར་བཏང་། མོས་ཏང་འཛུགས་སྐྱོང་མཉམ་སྐྲུན་ལ་སྐུལ་འདེད་ཧུར་ཐག་བཏང་ནས་ཀྲེ་ཅང་བཟོ་ལས་སློབ་ཆེན་སྨན་རྫས་སློབ་གླིང་དང་ཀྲུང་ལུགས་སྨན་རྫས་ཞིབ་འཇུག་ཁང་གི་དགེ་སློབ་མཉམ་འབྲེལ་ཏང་ཀྲི་པུའུ་དང་《ཏང་འཛུགས་སྐྱོང་མཉམ་སྐྲུན་གྱི་མཉམ་ལས་གྲོས་མཐུན་ཡི་གེའི》སྟེང་གན་རྒྱ་བཞག །ས་ཁོངས་བརྒལ་བའི་སློབ་གྲྭ་དང་ས་གནས་ཀྱི་ཏང་འཛུགས་སྐྱོང་མཉམ་ལས་ཀྱི་རྣམ་པ་བརྒྱུད་ནས། མཐོ་སློབ་ཀྱི་རིག་ལྡན་ཐོན་ཁུངས་དང་བཙན་ལྷ་རྫོང་གི་གསར་བརྗེའི་ཐོན་ཁུངས་མཉམ་སྐྲུན་མཉམ་སྤྱོད་ཐུབ་པ་མངོན་འགྱུར་བྱས། ཁྲེན་ཝང་ཧུའེ་ཡིས་རྒྱ་སེ་མེ་ཏོག་ནི་ཕྱུག་འགྱུར་གྱི་མེ་ཏོག་ཁོ་ན་མ་ཡིན་པར་མི་རིགས་མཐུན་སྒྲིལ་ཡར་ཐོན་གྱི་མཚོན་རྟགས་གཙོ་བོ་ཡིན་ལ། མོས་རྒྱ་སེ་མེ་ཏོག་སྟེ་རིགས་སོ་སོའི་མང་ཚོགས་ཀྱི་སེམས་པ་དམ་པོར་སྦྲེལ་མཁན་བྱས་ནས། མི་རིགས་མཐུན་སྒྲིལ་གྱི་ས་བོན་དེ་བཙན་ལྷ་རྫོང་གི་ཡུལ་ཁོངས་སུ་བཏབ་ནས། རྩ་བ་ཚུགས་ཤིང་རྩེ་མོ་རྒྱས་ཏེ་མཐར་ཚོན་མདངས་རྣམ་པར་བཀྲ་བའི་མཛེས་སྡུག་གི་མེ་ཏོག་ལྷུག་པོར་བཞད། མོས་དུས་རྒྱུན་དུ་མི་རིགས་ཁག་ནི་རྒྱ་སེ་མེ་ཏོག་གི་འདབ་མ་རེ་རེ་ཡིན་ལ་འདབ་ལོ་སོ་སོའི་དབྱིབས་མི་འདྲ་ནའང་ཁམ་བུ་གཅིག་གི་སྟེང་དུ་བཞད་ཡོད་ཅེས་བཤད། མོས་སྣེ་ཁྲིད་འོག་བཙན་ལྷ་རྫོང་གི་རིགས་སོ་སོའི་མང་ཚོགས་རྣམས་ཀྱིས་མཐུན་པའི་ལག་རྡང་སྦྲེལ་ནས་དཔུང་པ་མཉམ་གཤིབ་ཀྱིས་གྲོང་གསེབ་དར་རྒྱས་དང་མི་རིགས་མཐུན་སྒྲིལ་ཡར་ཐོན་གྱི་རྔམ་བརྗིད་ལེའུ་བརྩམས། གོམ་སྟབས་རྗེས་མར་ཁོང་གིས་རྒྱ་སེ་མེ་ཏོག་གི་ཐོན་ལས་འཕེལ་རྒྱས་ཐད་ལ་བརྩོན་པ་བྱས་ནས། བཙན་ལྷ་རྫོང་གི་ས་གཞི་ཆེན་པོའི་སྟེང་མི་རིགས་མཐུན་སྒྲིལ་ཡར་ཐོན་གྱི་མེ་ཏོག་སྔར་བས་མཛེས་སྡུག་ལྡན་ལ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཐད་ལ་རང་ནུས་ཅི་ཐུབ་ཀྱིས་སྟོབས་ཤུགས་འབུལ་རྒྱུ་རེད། མོས་རྒྱ་སེ་མེ་ཏོག་ཚོན་པིར་དང་མི་རིགས་མཐུན་སྒྲིལ་ཚོན་ཁུ་རུ་བྱས་ནས་བཙན་ལྷ་རྫོང་གི་ས་སྟེང་དུ་རིགས་སོ་སོའི་མང་ཚོགས་ཀྱིས་མཐུན་པའི་ལག་རྡང་སྦྲེལ་ནས་ཐུན་མོང་འབྱོར་ཕྱུག་ལ་སྙེག་བཞིན་པའི་བརྗིད་ཆགས་མཛེས་སྡུག་གི་རི་མོ་བྲིས་ལ། མི་རིགས་ཁག་སེ་འབྲུ་བཞིན་དམ་པོར་འཁྱུད་ན། ད་གཟོད་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་ཐུབ་པ་སོ་སོའི་སྤྱོད་པ་དངོས་ཀྱིས་བདེན་དཔང་བྱས་སོ། །