ཀྲའོ་ཝོ་ཉིང་། མི་རིགས་ཁག་ཐུན་མོང་འབྱོར་ཕྱུག་རྒྱས་པའི་བྱ་གཞག་དངོས་གཉེར་མཁན།

ཀྲའོ་ཝོ་ཉིང་། བུད་མེད། དབྱིས་རིགས། ཀྲུང་གུང་ཏང་ཡོན། སི་ཁྲོན་ཉིང་ནན་གྱི་མི་ཡིན། ད་ལྟ་ལིའང་ཧྲན་ཁུལ་སྨན་བཅོས་འགན་སྲུང་ཅུས་གཞུང་ལས་ཁང་གི་རིམ་པ་གསུམ་པའི་ཀྲུའུ་རེན་ཁའོ་ཡོན་དང་། ལིའང་ཧྲན་ཁུལ་ཞི་ཏེ་རྫོང་ལི་ཙི་ཡུལ་ཚོ་ལུའོ་ལིས་གྲོང་ཚོའི་བཅའ་སྡོད་ཧྲུའུ་ཅི་དང་པོ་ཡིན། བློ་མཐུན་ཁོང་གྲོང་ཚོར་བཅའ་སྡོད་བྱས་པའི་རིང་ལ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་བྱས་ཏེ་ཏང་འཛུགས་སྐྱོང་གིས་སྣེ་ཁྲིད་དང་།ཐོན་ལས་འཕེལ་རྒྱས། དམངས་འཚོ་འགན་སྲུང་སོགས་ཀྱི་ཐད་ལ་གཞོལ་ནས་མི་རིགས་མཐུན་སྒྲིལ་གྱི་མེ་ཏོག་གཞི་རིམ་ནས་བཀྲག་མདངས་འཚེར་དུ་བཅུག

ཏང་འཛུགས་སྐྱོང་གིས་སྣེ་ཁྲིད་བྱས་ནས་མི་རིགས་མཐུན་སྒྲིལ་གྱི་རྩ་འཛུགས་ཀྱི་རྨང་གཞི་བརྟན་པོ་བཏིང་།

རྩ་འཛུགས་སྟོབས་ན་མི་རིགས་ཕན་ཚུན་བརྩེ། ཞེས་པ་ནི་ཀྲའོ་ཝོ་ཉིང་གྲོང་ཚོར་བཅའ་སྡོད་བྱས་པ་ནས་བཟུང་རྒྱུན་དུ་ཁ་ལ་ཐོགས་པའི་སྐད་ཆ་ཡིན། ལིའོ་ལིས་གྲོང་ཚོར་ན་དབྱིས་རིགས་དང་རྒྱ་རིགས་སོགས་མི་རིགས་མང་པོ་འདུས་སྡོད་བྱས་ཡོད། སྔོན་ཆད་གཞི་རིམ་ཏང་རྩ་འཛུགས་ཀྱི་གཅིག་སྒྲིལ་ནུས་པ་ཞན་ལ། ཏང་ཡོན་གྱི་ནུས་པ་འདོན་སྤེལ་བྱས་པ་མངོན་གསལ་དོད་པོ་མིན་པས། མི་རིགས་ཁག་གི་མང་ཚོགས་བར་དུ་རྩོད་གཞི་དང་འགལ་ཟླ་མང་པོ་ཡོད་པའང་ལྡོག་ཐབས་མེད་པ་ཞིག་རེད། མོས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་དགོས་ན། ཐོག་མར་གཞི་རིམ་ཏང་རྩ་འཛུགས་དེ་མང་ཚོགས་མཐུན་སྒྲིལ་ཡོང་བའི་སྲོག་ཤིང་རུ་བརྟེན་དགོས་པ་གསལ་པོ་བྱས།

གྲོང་ཚོར་འབྱོར་རྗེས། མོ་དེ་མ་ཐག་ཏང་ཡོན་བྱེད་སྒོ་ཁང་གི་ནང་དུ་འཛུལ། ཐལ་དྲེག་ཆགས་ཡོད་པའི་ཚོགས་འདུ་གསུམ་དང་སློབ་ཚན་གཅིག་གི་ལམ་ལུགས་བྱང་བུ་དང་འབྲི་མཚམས་བཞག་ཡོད་པའི་ཚོགས་འདུའི་ཟིན་ཐོ་མཐོང་མ་ཐག །ལམ་ལུགས་གྱང་ངོས་སུ་བཀལ་བ་ཙམ་གྱིས་མི་ཆོག་པར་དངོས་སུ་ལག་ལེན་དུ་བསྟར་དགོས་པ་བཤད། གྲོང་ཚོའི་"ཨུ་ལྷན་གཉིས"ཀྱི་ཚན་ཁག་སྣེ་ཁྲིད་དེ་ཏང་འཛུགས་སྐྱོང་གི་རྩིས་ཐོ་ཡང་བསྐྱར་བསྡུ་སྒྲིག་བྱས་ནས། ཚོགས་འདུའི་ཟིན་ཐོ་ཚད་ལྡན་ཅན་དུ་གཏོང་བ་དང་ཏང་ཡོན་གྱི་འགན་འཁྲི་གསལ་པོ་བྱེད་པ་སོགས། ཏང་འཛུགས་སྐྱོང་གི་ཆེས་གཞི་རྩའི་ལས་དོན་ལ་དམ་འཛིན་བྱས། ཏང་ཡོན་སྒྲིག་འཛུགས་བྱས་ནས་གཟའ་འཁོར་རེར་གཅིག་སྡུད་སློབ་སྦྱོང་བྱེད་པ་མཐའ་འཁྱོངས་ཀྱིས་ཏང་གི་མི་རིགས་སྲིད་ཇུས་དང་གྲོང་གསེབ་དར་རྒྱས་གཏོང་བའི་འཐབ་ཇུས་སོགས་ཀྱི་ནང་དོན་ཁ་གསལ་བའི་སྒོ་ནས་རྒྱས་བཤད་བྱས། ཏང་ཡོན་ཚོས་ཀྱང་སློབ་སྦྱོང་ཁྲོད་ནས་རང་འགན་གསལ་པོ་རྟོགས་ལ་ལག་ལེན་ཁྲོད་ནས་མིག་དཔེ་བཞག །ཏང་གི་སློབ་ཁྲིད་གསོན་ཉམས་ཅན་དུ་གཏོང་ཆེད། ཡིག་ཆ་ཀློག་པ་དང་གཙོ་གནད་འབྱེད་པ་སོགས་སྲོལ་རྒྱུན་གྱི་སློབ་ཁྲིད་བྱེད་སྟངས་ལ་འགྱུར་བ་གཏོང་ཆེད། མོས་ཏང་ཡོན་རྒན་པའི་འཆད་ཁྲིད་སྟེགས་བུ་ཁྱད་ཆོས་ཅན་ཞིག་བཙུགས་ཏེ། གྲོང་ཚོའི་ནང་གི་སྤྱོད་ཡོན་གཉིས་ལྡན་གྱི་ཏང་ཡོན་རྒན་པ་རྣམས་ཆེད་དུ་གདན་དྲངས་ནས། ན་གཞོན་ཏང་ཡོན་རྣམས་ལ་ལོ་ཟླའི་གསེབ་ན་སྦས་ཡོད་པའི་མི་རིགས་མཐུན་སྒྲིལ་གྱི་གཏམ་རྒྱུད་དང་འབད་འཐབ་ཀྱི་ལོ་རྒྱུས་རེ་རེ་ངག་ནས་བརྗོད། བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་སྣ་ཚོགས་ལས་ལག་ཟུང་དྲོན་མོས་བྱིས་པར་བརྩེ་བ་སྐྱེལ་ཅེས་པ་ད་ལྟ་གྲོང་ཚོའི་སྤུས་རྟགས་གཙོ་བོར་གྱུར་ཡོད་ལ། ཏང་ཡོན་ལས་བྱེད་པ་རེས་གྲོང་ཚོའི་ནང་གི་གཞིས་སྲུང་བྱིས་པ་རེ་ལ་ཆ་སྒྲིག་རོགས་སྐྱོར་བྱས་ཏེ། གཞིས་སྲུང་བྱིས་པ་ཚོའི་འཚོ་བ་དང་སློབ་སྦྱོང་། སེམས་ཁམས་ལ་ཐུགས་ཁུར་དང་དོ་སྣང་བླ་ལྷག་བྱས། ཀྲའོ་ཝའོ་ཉིང་གིས་དུས་རྒྱུན་དུ་གྲོང་ཚོའི་ནང་གི་མང་ཚོགས་དཀའ་ཁག་ཅན་རྣམས་སེམས་ལ་བཅངས་ཡོད་ལ། ན་ནིང་གི་ལོ་གསར་སྔོན་དུ་མོས་འཚམས་འདྲིའི་མ་དངུལ་སྒོར་ཁྲི་3ལྷག་དང་སྲིང་བལ་ཉལ་ཆས་20འཁྱེར་ནས། གྲོང་ཚོའི་ལས་བྱེད་པ་དང་མཉམ་དུ་གྲོང་ཚོའི་ནང་གི་གྲོང་མིའི་ཁྱིམ་དུ་སོང་། ཅི་ཁའེ་རིན་ཧྭ་ཡི་ཁྱིམ་ནས་བགྲེས་སོང་ལོ་ལོན་རྒན་པས་སྟོང་ལྷང་ལྷང་གི་མེ་ཐབ་ལ་བལྟས་ནས་ཞོར་ལས་བྱེད་བཞིན་པ་དང་བུ་ད་རུང་ཕྱིར་ཡུལ་ལ་ལོག་ཐབས་མ་བྱུང་བ་དང་ལོ་གསར་གྱི་མཁོ་ཆས་ཉོ་མི་ཐུབ་པ་ལ་སེམས་ཁྲལ་བྱས་ནས་བསྡད་ཡོད་པ་མཐོང་མ་ཐག །ཀྲའོ་ཝོ་ཉིང་གིས་སྲིང་བལ་གྱིས་བཟོས་པའི་ཉལ་ཐུལ་ཁོང་གི་ཉལ་གདན་སྟེང་དུ་བཏིང་ལ། ཡང་བསྐྱར་ཁུག་དམར་ཤིག་ཁོང་གི་ལག་ཏུ་སྤྲད་ཞོར་དུ་བཤད་རྒྱུར། ཧྲུའུ་ཅི་རྒན་པ། འདི་ནི་ཏང་དང་སྲིད་གཞུང་གི་ཐུགས་ཁུར་དྲོན་མོ་ཡིན། ཁྱོད་ཀྱིས་ཚོར་ཐུབ་སོང་ངམ། ཞེས་དྲིས་པ་ན། ཁོང་གིས་སེར་གས་བཏུམས་པའི་ལག་པ་རྩུབ་མོ་ཡིས་ཀྲའོ་ཝོ་ཉིང་ལ་དམ་པོར་འཇུས་ཏེ། མིག་མཐའ་མཆི་མས་བཀང་ནས། ངོ་མ་སེམས་གཏིང་ནས་དྲོད་ལམ་མེར་གྱུར་སོང་། གུང་ཁྲན་ཏང་གི་ཐུགས་ཁུར་ནི་མེ་ཐབ་འདི་དང་འདྲ་བར་ལུས་སེམས་གཉིས་ཀ་ཚ་ལམ་ལམ་དུ་གྱུར་སོང་ཞེས་བཤད། དཀའ་ཁག་ཅན་གྱི་ཁྱིམ་ཚང་32ལ་འཚམས་འདྲི་བྱས་ཚར་ནས། ཕྱིར་གྲོང་ཚོའི་ཨུ་ལྷན་ཁང་དུ་ཐོན་དུས། ཀྲའོ་ཝོ་ཉིང་གི་རྐང་ཤག་ཚང་མར་དར་ཆགས་ཡོད་མོད། ཡིན་ཡང་མོའི་གདོང་ལ་འཛུམ་གྱིས་ཁེངས་ཞོར་གྲང་ངར་ཆེ་ཡང་ཡུལ་མི་ཚོའི་འཛུམ་མདངས་མཐོང་བ་ལས་ཆོག་ཅེས་བཤད།

ཐོན་ལས་ལ་སྐུལ་འདེད་བཏང་ནས་མི་རིགས་མཐུན་སྒྲིལ་གྱི་དཔལ་འབྱོར་རྨང་གཞི་བརྟན་པོ་བཏིང་།

དཔལ་འབྱོར་འཕེལ་རྒྱས་ནི་མི་རིགས་མཐུན་སྒྲིལ་གྱི་རྨང་རྡོ་ལྟ་བུ་ཡིན་ལ། ལིའོ་ལིས་གྲོང་ཚོའི་ཐུན་མོང་དཔལ་འབྱོར་ཞན་པ་དང་གཞོན་ནུའི་དཔུང་སྡེ་ཞོར་ལས་སུ་ཤོར་བའི་གནད་དོན་དང་དཀའ་ཁག་ལ་གདོང་གཏད་ནས། ཐོན་ལས་དར་རྒྱས་གཏོང་བ་སྟེ་འཕེལ་རྒྱས་ལ་བཀག་འགོག་བྱེད་པའི་འགག་སྒོ་གཏོར་བ་དང་མི་རིགས་ཀྱི་སྟོབས་ཤུགས་གཅིག་ཏུ་སྒྲིལ་བའི་ཐོད་བརྒལ་བྱེད་ས་བྱས། རིགས་སོ་སོའི་མང་ཚོགས་མཉམ་ཕྱུག་མཉམ་སྐྱིད་ཡོང་བའི་དམིགས་ཚད་གཞི་རྩར་བཟུང་ནས། ཐོན་ལས་སྐུལ་ཁྲིད་དང་མཐུན་སྒྲིལ་འབབ་འཕར་གྱི་བཞུད་ལམ་ཡངས་མོའི་སྟེང་གོམ་པ་རེ་རེ་བྱས་ནས་བརྒལ།

ཡུལ་མི་ཚོའི་ཡོང་འབབ་ཇེ་མང་དུ་སོང་ན་ད་གཟོད་མི་རིགས་མཐུན་སྒྲིལ་ཡོང་བར་གདེང་ཚོད་ཡོད། ཞེས་ཀྲའོ་ཝོ་ཉིང་གྲོང་ཚོ་འདིར་སླེབས་མ་ཐག་གྲོང་ཚོའི་ཐུན་མོང་དཔལ་འབྱོར་ཧ་ལམ་ཀླད་ཀོར་ཡིན་ལ། ན་གཞོན་ཕལ་ཆེ་བ་ཞོར་ལས་སུ་སོང་ཟིན། གྲོང་ཚོའི་ནང་དུ་སྡོད་མཁན་མང་ཆེ་བ་ལོ་ལོན་དང་བྱིས་པ་རྐྱང་རྐྱང་ཡིན་པས། མོས་ཁྱིམ་ཚང་རེ་རེ་བྱས་ནས་གནས་ཚུལ་ལ་བརྟག་ཞིབ་དང་རྒྱུས་ལོན་བྱས་རྗེས། གྲོང་ཚོའི་ནང་གི་དབྱིས་རིགས་ཀྱི་ཁྱིམ་ཚང་ཁ་ཤས་ཕག་གསོ་བར་ཧ་ཅང་མཁས་ལ། ཡིན་ནའང་ལག་རྩལ་དང་ཚོང་ལམ་མེད་པའི་དཀའ་ཁག་ལ་འཕྲད་པ་ཤེས་ནས། མོས་དཔུང་སྒྲིལ་འཕེལ་རྒྱས་གཏོང་བའི་བསམ་ཚུལ་ཞིག་ཡིད་ལ་ཤར། མོས་གྲོང་ཚོའི་ཀྲི་པུའུ་ཧྲུའུ་ཅི་ལ་ཕག་པ་ཚབ་གསོ་མཉམ་ལས་ཁང་ཞིག་བཙུགས་ཏེ་ཕག་ཕྲུག་དང་ལག་རྩལ་མཁོ་འདོན་བྱེད་སའི་ཁེ་ལས་བཙལ་ཏེ། ང་ཚོས་ཕག་གསོ་བ་དང་ཁེ་ལས་ཀྱིས་ཕག་ཕྱིར་བསྡུས་ན་ཉེན་ཁ་ཆུང་བ་མ་ཟད་ཡོང་སྒོའང་བརྟན་པོ་ཡིན་ཞེས་བཤད་དེ་རྩིས་གསལ་པོ་བརྒྱབ། དེ་ནས་གྲོང་ཚོའི་ལས་བྱེད་པ་འཁྲིད་ནས་ཁྱིམ་མཚེས་ཀྱི་སྔོན་ཐོན་གྲོང་ཚོ་རུ་རྟོག་ཞིབ་བྱེད་པར་ཐེངས་གང་མང་སོང་། ལེགས་འགྲུབ་བྱུང་ཟིན་པའི་དཔེ་གཞི་དག་བརྙན་དུ་ཕབ་ནས་གྲོང་མི་ཚོར་བསྟན་པ་མ་ཟད། ཕྱུགས་ནད་སྨན་བཅོས་ས་ཚིགས་ཀྱི་ལག་རྩལ་བ་གདན་དྲངས་ནས། གྲོང་ཚོའི་ནང་ནས་གསོ་སྦྱོང་འཛིན་གྲྭ་བསྒྲུབས། མཐར་གྲོང་ཚོའི་ཁྱིམ་ཚང་30ལྷག་མཉམ་ལས་ཁང་ནང་དུ་ཞུགས། རིམ་པ་དང་པོའི་ཕག་ཕྱིར་འཚོང་བྱེད་སྐབས་མཉམ་ལས་ཁང་གི་ཁེ་སྤོགས་རྐྱང་རྐྱང་སྒོར་ཁྲི་8ལྷག་ཟིན་ལ། གྲོང་མི་ཚོས་མི་གྲངས་ལ་གཞིགས་ནས་ཁེ་སྤོགས་བགོ་བཤའ་བརྒྱབ་ལ། ཁེ་བཟང་ཐོབ་རྗེས། མོས་སླར་ཡང་གྲོང་ཚོའི་ཨུ་ལྷན་གཉིས་ཀྱི་ཚན་ཁག་ཁྲིད་དེ་རྫོང་གྲོང་དུ་ཞིང་ལས་ཡུལ་སྐོར་ཀུང་སི་བཙལ་ནས་ངོ་འཕྲད་གྲོས་མོལ་བྱས་མཐར་གྲོང་ཚོའི་ཐུན་མོང་དཔལ་འབྱོར་གྱི་མ་དངུལ་སྒོར་ཁྲི་50མཉམ་ལས་རྣམ་གྲངས་ཁྲོད་གཏོང་རྒྱུའི་ཐག་བཅད་པ་རེད། དངུལ་ལ་བརྟེན་ནས་དངུལ་ལེན་པ་ནི་བསྙོན་མེད་ཀྱི་གནས་ལུགས་ཤིག་ཡིན་པ་རེད། མོས་གྲོང་མི་ཚོར་རྩིས་འདང་གསལ་པོ་ཤིག་བརྒྱབ། ལོ་རེར་ཁེ་སྤོགས་མ་མཐའ་ཡང་སྒོར་ཁྲི་2.8བགོ་ཐུབ་པ་བྱས་ན། ཕྱིས་སུ་ཡུལ་སྐོར་བ་མང་དུ་ཕྱིན་ན་ང་ཚོས་དམངས་ཁྱིམ་མགྲོན་ཁང་དུ་སྒྱུར་ནས་ས་གནས་ཀྱི་ཁྱད་ལྡན་ཟས་རིགས་བཙོང་ན་ཡོང་སྒོ་དེ་ལས་མང་དུ་འགྲོ་ངེས་ཡིན་ཞེས་བཤད། ད་ལྟ་མཉམ་ལས་ཁང་དང་ཞིང་པའི་ཡུལ་སྐོར་རྣམ་གྲངས་ཀྱིས་གྲོང་མི་ཚོའི་ཡོང་སྒོ་མིག་མཐོང་ལག་ཟིན་གྱིས་ཡར་འཕར་ལ། ཚང་མའི་ལས་སྒྲུབ་ལས་གཏོད་ཀྱི་ངར་ཤུགས་ཀྱང་ཆེ་རུ་ཕྱིན། གྲོང་ཚོ་ཡོངས་ཀྱི་མི་རིགས་ཁག་གི་མང་ཚོགས་རྣམས་ཀྱིས་མཐུན་སྒྲིལ་གྱི་རྡོག་རྩ་གཅིག་ཏུ་སྒྲིལ་ཏེ་ཐུན་མོང་ཕྱུག་འགྱུར་གྱི་བགྲོད་ལམ་སྟེང་ཧུར་ཐག་གིས་བསྐྱོད་བཞིན་ཡོད་པ་རེད།

དམངས་འཚོའི་ཞབས་འདེགས་བྱས་ནས་བརྩེ་བའི་གཤིན་སར་མི་རིགས་མཐུན་སྒྲིལ་གྱི་ས་བོན་བཏབ།

དམངས་འཚོ་ནི་དམངས་སེམས་དང་སྦྲེལ་ཡོད་ལ། མང་ཚོགས་ཀྱི་འཕྲལ་མཁོ་དང་།དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་ཡག་པོ་བྱས་ཚེ། ད་གཟོད་མི་རིགས་ཕན་ཚུན་བར་གྱི་བརྩེ་དུང་ཟབ་ཏུ་འགྲོ་ཐུབ། ཀྲའོ་ཝོ་ཉིང་གི་ཟིན་བྲིས་སྟེང་དུ། བྱང་བུ་བཟོ་བ་དང་ཆེས་མ་མཐའི་འཚོ་བའི་འགན་སྲུང་ཁྲོད་ཞུགས་པར་རེ་ཞུ་བྱེད་པ། ཐོབ་ཐང་ལག་ཁྱེར་བསྐྱར་སྒྲུབ་བྱེད་པ་སོགས་གྲོང་མི་ཚོའི་རེ་ཞུ་རྣམས་རེ་རེ་བྱས་ནས་གསལ་པོར་བྲིས་ཡོད་ལ། མོས་ནམ་ཡང་གྲོང་མི་ཚོའི་བྱ་བ་ཆེ་མ་ཆུང་གསུམ་གང་ཡིན་རུང་གལ་ཆེན་ནང་གི་འགངས་ཆེན་རུ་བརྩིས་ནས་བསྒྲུབས་པ་ཡིན།

བྱིས་པ་གཅིག་ཀྱང་སློབ་བྱོལ་བྱེད་དུ་འཇུག་མི་རུང་། དེ་ནི་ཀྲའོ་ཝོ་ཉིང་གིས་རང་ཉིད་ལ་བཞག་པའི་སྒྲིག་ལམ་ཡིན། ན་ནིང་སྟོན་ཁར་མོས་གྲོང་ཚོའི་ནང་དུ་ཞུ་བཅར་རུ་འགྲོ་སྐབས། དབྱིས་རིགས་ཀྱི་གྲོང་མི་ཅི་ཁའེ་ཚང་གི་བུ་སློབ་བྱོལ་བྱས་ནས་ཁྱིམ་ན་བསྡད་ཡོད་ལ། ཁྱིམ་ཚང་གི་མི་རྒན་པའི་རྗེས་འབྲངས་ནས་རི་འགོར་ལུག་འཚོ་བར་འགྲོ་བཞིན་པ་ཤེས་ནས། བསྟུད་མར་ཉིན་ལྔའི་རིང་ལ་མོས་ཐབས་བརྒྱ་ཇུས་གཏོང་གིས་བུ་ཕྲུག་ཕྱིར་སློབ་གྲྭ་སྐྱེལ་དགོས་པའི་ཁ་ཏ་སློབ་གསོ་གང་མང་བྱས། མཐར་སློབ་བྱོལ་བྱས་པའི་སློབ་མ་དེ་ཕྱིར་སློབ་གྲྭར་འགྲོ་ཐུབ་སོང་། ལིའོ་ལིས་གྲོང་ཚོའི་ནགས་རིའི་གཞི་རྒྱ་ཆེ་བས་ནགས་སྲུང་མེ་ཟོན་གྱི་བྱ་བ་ནི་གལ་ཆེན་ནང་གི་འགངས་ཆེན་ཡིན། མོས་མེ་སྐྱོན་འབྱུང་ཉེན་ཆེ་བའི་དུས་ལ་རྒྱ་རིགས་དང་དབྱིས་རིགས་ཀྱི་མང་ཚོགས་རྩ་འཛུགས་བྱས་ནས་སྐོར་ཞིབ་རུ་ཁག་བཙུགས་ཏེ། གཟའ་འཁོར་རེ་རེའི་ནང་དུ་སྐོར་ཞིབ་རུ་ཁག་འཁྲིད་ནས་ཧ་ལམ་རི་15ཡི་རི་རྩེ་ལ་འགོ་བ་དང་རི་ལམ་ཆེ་མ་ཆུང་གསུམ་བརྒྱུད་ནས་སྐོར་ཞིབ་བྱས། ངོ་གདོང་ཉི་མས་འཚིག་ནས་ནག་པོར་གྱུར་པའམ་ཡང་ན་ངལ་དུབ་ཀྱི་རྔུལ་ཆུ་ཇི་ལྟར་བཞུར་ཡང་། རང་ནུས་ཅི་ལྕོགས་ཀྱིས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་ལེན་བྱས། གྲོང་ཚོའི་ནང་གི་མནའ་མའི་བག་རིན་མཐོ་བ་ཡིས་ཁྱིམ་ཚང་མང་པོ་ཞིག་སྡུག་ལ་སྦྱར། ཁྱིམ་ཚང་ལ་ལས་མནའ་མ་ལེན་ཆེད་སྒོར་ཁྲི་བཅུ་ཕྲག་ལྷག་བསྐྱིས་ནས་བུ་ལོན་མཐོན་པོ་མཇལ་བཞིན་པ་ཤེས་ནས། མོས་གྲོང་མིའི་འཐུས་མི་ཚོགས་འདུ་འཚོགས་ཏ《གྲོང་སྲོལ་དམངས་ཆིངས》ལ་འགོ་འཁྲིད་ནས་བཟོ་བཅོས་བརྒྱབ། ཐོག་མར་མང་ཚོགས་ཁ་ཤས་དང་ལྷག་པར་དུ་རྒན་པ་རྣམས་ཀྱིས་དང་ལེན་བྱེད་མ་ཐུབ་ལ། ཁོ་ཚོས་བག་རིན་ལེན་པ་ནི་གནའ་ནས་ད་བར་དུ་དར་པའི་སྲོལ་ཡིན་པས། རང་བསམ་གང་འདོད་ཀྱིས་སྒྱུར་བཅོས་བྱས་ན་མི་ཆོག་ཅེས་བཤད། ཡིན་ནའང་ཁོ་མོས་བག་རིན་མཐོ་དྲག་ན། གཞོན་ནུ་ཚོའི་གནོན་ཤུགས་ཆེ་རུ་འགྲོ་ལ། བདེ་སྐྱིད་ཀྱི་འཚོ་བ་རོལ་རྒྱུ་ཕར་ཞོག་ད་དུང་ཁྱིམ་ཚང་ལ་འགལ་བ་མང་པོ་འབྱུང་སྲིད། ཅེས་ངང་རྒྱུད་རིང་པོའི་སྒོ་ནས་གྲོང་མི་ཚོར་ཁ་བརྡ་ཡང་ཡང་བྱས། མོས་བཤད་ན་ང་ཚོ་ལ་ངེས་པ་དོན་གྱི་བདེ་སྐྱིད་ཅིག་མཁོ་བ་ལས་གཞན་གྱི་ངོ་བསྟོད་དེ་མིན་ཟེར། ཀྲའོ་ཝོ་ཉིང་གི་སྣེ་འཁྲིད་དང་སྐུལ་སློང་འོག །གྲོང་ཚོའི་ནང་གི་ཁྱིམ་ཚང་ལྔ་ཡི་བག་རིན་མཐོན་པོ་ལེན་པར་བཀག་འགོག་དང་། གཉེན་སྟོན་དང་འདས་མཆོད་སོགས་ཀྱི་འགྲོ་གྲོན་ཐད་ནས་ཆ་སྙོམས་60%ཡིས་ཇེ་ཉུང་དུ་བཏང་ནས། བག་རིན་མཐོན་པོ་ལེན་པའི་སྲོལ་ངན་བཀག་འགོག་ནུས་ལྡན་བྱས་པར་མ་ཟད། དམངས་འཚོའི་དྲོད་འཁོལ་ལ་བརྟེན་ནས་མི་རིགས་ཕན་ཚུན་བར་གྱི་འགལ་ཟླ་སེལ་ཏེ། ཡུལ་སྲོལ་ཡ་རབས་ཅན་འདི་དག་མི་རིགས་མཐུན་སྒྲིལ་བར་གྱི་སྒྲོག་ཐག་གསར་པར་གྱུར་ཡོད།

གྲོང་ཚོར་བཅའ་སྡོད་བྱས་པའི་ལོ་ངོ་གཉིས་ཀྱི་རིང་ལ། ཀྲའོ་ཝོ་ཉིང་གྲོང་ཚོར་བཅའ་སྡོད་ཀྱི་ཧྲུའུ་ཅི་དང་པོ་ཡིན་པའི་ཆ་ནས་མོའི་རྐང་རྗེས་ལིའོ་ལིས་གྲོང་ཚོའི་གྲུ་ག་རེ་རེ་ན་ཡོད་ལ། མང་ཚོགས་ཀྱི་སེམས་ཀྱི་ཟབ་ས་ན་མོའི་མིང་ཡོད། ཏང་འཛུགས་སྐྱོང་གིས་ཐོན་ལས་དར་རྒྱས་དང་དམངས་འཚོ་ལེགས་སུ་གཏོང་བ་ནས་གྲོང་སྲོལ་དཔལ་ཡོན་དར་བའི་བར། མོས་བྱ་བ་དངོས་སྒྲུབ་ཀྱི་སྙིང་རུས་ལ་བརྟེན་ནས་གུང་ཁྲན་ཏང་ཡོན་གྱི་འགན་འཁྲི་འཁུར་དུ་བཞེས་ཏེ། ལིའོ་ལིས་གྲོང་ཚོའི་མི་རིགས་ཁག་གི་མང་ཚོགས་རྣམས་རྡོག་རྩ་གཅིག་ཏུ་བསྒྲིལ་ནས་གྲོང་གསེབ་དར་རྒྱས་ཀྱི་ཁོད་ཡངས་པའི་བགྲོད་ལམ་སྟེང་ལག་གདང་མཉམ་སྦྲེལ་དང་དཔུང་པ་མཉམ་གཤིབ་ཀྱི་སྒོ་ནས་མཚར་སྡུག་བཀྲ་བའི་སང་ཉིན་གྱི་ཕྱོགས་སུ་གོམ་སྟབས་རེ་རེ་སྤོ་བཞིན་པའི་སྒང་ཡིན་ལ། མི་རིགས་མཐུན་སྒྲིལ་ཡར་ཐོན་ཡོང་བར་དུས་རབས་ཀྱི་བསྟོད་གླུ་བླངས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ལག་ལེན་པ་ཡིན་ནོ། །