《སི་ཁྲོན་ཞིང་ཆེན་གྱི〈ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲོང་གསེབ་ས་ཞིང་འགན་ལེན་བཅའ་ཁྲིམས〉ལག་བསྟར་བྱ་ཐབས》དེ་སི་ཁྲོན་ཞིང་ཆེན་སྐབས་བཅུ་བཞི་པའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་གཉིས་པའི་ཐོག་2025ལོའི་ཟླ་11པའི་ཚེས་26ཉིན་བཟོ་བཅོས་བརྒྱབ་ནས་གྲོས་འཆམ་བྱུང་ཞིང་། ད་ལྟ་ཁྱབ་བསྒྲགས་བྱས་པ་ཡིན་ལ། 2026ལོའི་ཟླ་1པོའི་ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན།
སི་ཁྲོན་ཞིང་ཆེན་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་།
2025ལོའི་ཟླ་11པའི་ཚེས་27ཉིན། （2007ལོའི་ཟླ་11པའི་ཚེས་29ཉིན་སི་ཁྲོན་ཞིང་ཆེན་སྐབས་བཅུ་པའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་སོ་གཅིག་པའི་ཐོག་གྲོས་འཆམ་བྱུང་བ་དང་། 2025ལོའི་ཟླ་11པའི་ཚེས་26ཉིན་སི་ཁྲོན་ཞིང་ཆེན་སྐབས་བཅུ་བཞི་པའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་གཉིས་པའི་ཐོག་བཟོ་བཅོས་བརྒྱབ）
དཀར་ཆག
ལེའུ་དང་པོ། སྤྱིའི་རྩ་དོན།
ལེའུ་གཉིས་པ། ཁྱིམ་ཚང་གིས་འགན་ལེན་བྱེད་པ།
ལེའུ་གསུམ་པ། བྱེད་སྟངས་གཞན་དག་གི་འགན་ལེན།
ལེའུ་བཞི་པ། ས་ཞིང་གཉེར་སྐྱོང་དབང་ཆ་རྒྱུག་སྤྲོད།
ལེའུ་ལྔ་པ། རྩོད་གླེང་ཐག་གཅོད་དང་བཅའ་ཁྲིམས་ཀྱི་འགན་འཁྲི།
ལེའུ་དྲུག་པ། ཞོར་གཏོགས་དོན་ཚན།
ལེའུ་དང་པོ། སྤྱིའི་རྩ་དོན།
དོན་ཚན་དང་པོ། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲོང་གསེབ་ས་ཞིང་འགན་ལེན་བཅའ་ཁྲིམས》དང་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲོང་གསེབ་ཐུན་མོང་དཔལ་འབྱོར་རྩ་འཛུགས་བཅའ་ཁྲིམས》སོགས་བཅའ་ཁྲིམས་དང་སྲིད་འཛིན་ཁྲིམས་སྲོལ་ལ་གཞིར་བཟུང་བ་དང་། སི་ཁྲོན་ཞིང་ཆེན་གྱི་དོན་དངོས་དང་ཟུང་འབྲེལ་བྱས་ཏེ། ལག་བསྟར་བྱ་ཐབས་འདི་གཏན་འབེབས་བྱས་པ་ཡིན།
དོན་ཚན་གཉིས་པ། སི་ཁྲོན་ཞིང་ཆེན་གྱི་སྲིད་འཛིན་ས་ཁོངས་ནང་གི་གྲོང་གསེབ་ས་ཞིང་འགན་ལེན་གཉེར་སྐྱོང་དང་འབྲེལ་ཡོད་དོ་དམ་བྱེད་སྒོ་སྤེལ་བར་ལག་བསྟར་བྱ་ཐབས་འདི་སྤྱད་འཐུས།
ལག་བསྟར་བྱ་ཐབས་འདིའི་ནང་བརྗོད་པའི་གྲོང་གསེབ་ཀྱི་ས་ཞིང་ཞེས་པ་ནི། ཞིང་པའི་ཐུན་མོང་ལ་དབང་བ་དང་རྒྱལ་ཁབ་ལ་དབང་ཞིང་ཁྲིམས་ལྟར་ཞིང་པས་ཐུན་མོང་གིས་བེད་སྤྱོད་བྱེད་པའི་རྨོ་ཞིང་དང་། ནགས་ས། རྩྭ་ས། དེ་བཞིན་ཁྲིམས་ལྟར་ཞིང་ལས་ལ་སྤྱོད་པའི་ས་ཞིང་གཞན་དག་བཅས་ལ་ཟེར།
དོན་ཚན་གསུམ་པ། གྲོང་གསེབ་ཀྱི་ས་ཞིང་འགན་ལེན་བྱེད་པར་གྲོང་གསེབ་ཐུན་མོང་དཔལ་འབྱོར་རྩ་འཛུགས་ནང་ཁུལ་གྱི་ཁྱིམ་ཚང་གིས་འགན་ལེན་བྱེད་པའི་བྱེད་སྟངས་སྤྱོད་དགོས་པ་དང་། ཁྱིམ་ཚང་གིས་འགན་ལེན་བྱེད་པའི་བྱེད་སྟངས་སྤྱོད་མི་འོས་པའི་རི་རྒོད་དང་། གྲོག་རོང་། ས་རྒོད། ཐང་རྒོད་སོགས་གྲོང་གསེབ་ཀྱི་ས་ཞིང་ལ་འོས་འགུགས་དང་། ཧབ་ཚོང་། ཡོངས་བསྒྲགས་གྲོས་མོལ་སོགས་ཀྱི་བྱེད་སྟངས་སྤྱད་ནས་འགན་ལེན་བྱ་ཆོག
དོན་ཚན་བཞི་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་གྲོང་གསེབ་ཀྱི་ས་ཞིང་འགན་ལེན་དོ་དམ་ལས་དོན་ལ་འགོ་ཁྲིད་བྱེད་ཤུགས་ཆེ་རུ་གཏོང་བ་དང་། ཁྲིམས་ལྟར་གྲོང་གསེབ་ཀྱི་ས་ཞིང་འགན་ལེན་འབྲེལ་བ་ཡུན་རིང་བརྟན་པོ་ཡོང་བ་བྱེད་པ། གྲོང་གསེབ་ཀྱི་ས་ཞིང་འགན་ལེན་བྱེད་མཁན་ཕྱོགས་གཉིས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱེད་དགོས།
རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཞིང་ལས་གྲོང་གསེབ་དང་། ནགས་ལས་དང་རྩྭ་ཐང་གཙོ་སྐྱོང་སྡེ་ཁག་གིས་རང་སོ་སོའི་འགན་འཁྲི་ལྟར་གྲོང་གསེབ་ཀྱི་ས་ཞིང་འགན་ལེན་གཉེར་སྐྱོང་དང་འགན་ལེན་གཉེར་སྐྱོང་གན་རྒྱ་དོ་དམ་གྱི་ལས་དོན་ལ་འགན་འཁུར་དགོས། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་གཏན་འཁེལ་བྱས་པའི་ས་ཁང་བདག་ཁོངས་ཐོ་འགོད་ལས་ཁུངས་ཀྱིས་གྲོང་གསེབ་ཀྱི་ས་ཞིང་འགན་ལེན་གཉེར་སྐྱོང་དབང་ཆ་དང་ས་ཞིང་གཉེར་སྐྱོང་དབང་ཆ་ཐོ་འགོད་བྱེད་པའི་ལས་དོན་ལ་འགན་འཁུར་དགོས། སྡེ་ཁག་གཞན་དག་གིས་རང་སོ་སོའི་འགན་འཁྲི་ལྟར་འབྲེལ་ཡོད་ལས་དོན་ལ་འགན་འཁུར་དགོས།
ཡུལ་ཤོག་དང་གྲོང་རྡལ་མི་དམངས་སྲིད་གཞུང་གིས་རང་སྲིད་འཛིན་ས་ཁོངས་ནང་གི་གྲོང་གསེབ་ས་ཞིང་འགན་ལེན་གཉེར་སྐྱོང་དང་འགན་ལེན་གཉེར་སྐྱོང་གན་རྒྱ་དོ་དམ་ལ་འགན་འཁུར་དགོས།
གྲོང་གསེབ་ཀྱི་ས་ཞིང་འགན་ལེན་གཉེར་སྐྱོང་དོ་དམ་དང་། ས་ཞིང་འགན་ལེན་གཉེར་སྐྱོང་དབང་ཆ་ཐོ་འགོད་དང་ལག་ཁྱེར་དོ་དམ། གྲོང་གསེབ་ཀྱི་ས་ཞིང་འགན་ལེན་གཉེར་སྐྱོང་རྩོད་གླེང་འདུམ་སྒྲིག་དང་བར་གཅོད་བཅས་ཀྱི་ལས་དོན་གྲོན་དངུལ་དེ་རིམ་པ་དེ་གའི་སྔོན་རྩིས་ནང་བཅུག་ནས་འགན་ལེན་བྱེད་དགོས།（མུ་འགོད།）