བོད་ཀྱི་རོལ་མོ་ལས་གར་ཐིག་དབྱངས་གསུམ།

གཅིག །སྒྱུ་རྩལ་གྱི་མཛེས་པ་ནི་རོལ་མོ་ཡིན།

དེ་ཡང་ཆོས་རྗེ་ས་པཎ་གྱི《རོལ་མོའི་བསྟན་བཅོས》ལས། རོལ་མོའི་སྦྱོར་བ་གཞན་ལ་ཕན་པ་ཡིས། །དྲི་མེད་གཞུང་འདི་བདག་གིས་བཤད་པར་བྱ། །དད་ལྡན་རྣམས་ཀྱིས་མཆོད་པ་དང་། །བཀྲེན་པ་རྣམས་ཀྱིས་འཚོ་བ་དང་། །ཆགས་ཅན་རྣམས་ཀྱི་ཡིད་གཡོ་བ། །དེ་ཀུན་རོལ་མོ་མཁས་ལས་འབྱུང་། །བློན་ངན་གཟུགས་ཀྱིས་ཕོངས་བའང་རུང་། །རིགས་ངན་ནོར་དང་བྲལ་ཡང་སླ། །རོལ་མོའི་ཆ་ལ་མཁས་གྱུར་ན། །ཚོགས་ཀྱི་ནང་ན་རྒྱན་ལྟར་མཛེས། །

ཞེས་གསུངས་ཡོད་པ་ནང་བཞིན། འབུད་རྡུང་དཀྲོལ་གསུམ་དང་འབྲེལ་བའི་རོལ་མོ་ནི་མདོ་སྔགས་ཀྱི་ཆོ་ག་ཕྱག་ལེན་དང་། ཡི་དམ་གྱི་ལྷ་དང་ཆོས་སྐྱོང་སྲུང་མ་སོགས་ལ་ཕྱི་ནང་གསང་གསུམ་གྱི་མཆོད་པ་འབུལ་བའི་ཁྲོད་རོལ་མོ་ནི་མཆོད་པའི་རྫས་སུ་གྱུར་ཡོད་ཕྱིར། མཆོད་དབྱངས་འབུལ་བའི་ཆོ་གའི་ཁྲོད་གླུ་གཞས་ཀྱིས་ཐོན་པའི་ནུས་པ་དང་ཡོན་ཏན། གྱེར་དབྱངས་ཀྱི་རིགས་དང་རྣམ་པ། ལུས་ངག་ཡིད་གསུམ་གྱི་སྒོ་ནས་མཆོད་དབྱངས་ཉམས་སུ་ལེན་ཚུལ་བཅས་ཕྱོགས་དང་ཟུར་སོ་སོ་ནས་གླུ་གཞས་ཀྱི་ཡོན་ཏན་དང་དབྱངས་རྟའི་ཁྱད་ཆོས། གར་དང་བྲོ་ཡི་མཆོད་ལུགས་ཀྱི་རྣམ་གྲངས་ཕུན་སུམ་ཚོགས་ཤིང་། གླུ་གཞས་ཀྱི་ནུས་པ་དང་དབྱངས་རྟའི་རིགས། བསྟོད་པའི་དོན་ཅན་གྱི་གླུ་གཞས་ཀྱི་འབྱུང་ཁུངས། ཆོས་ལུགས་ཆོ་གའི་ཁྲོད་གླུ་གཞས་ཀྱིས་ཐོན་པའི་ནུས་པ། ཆོས་ལུགས་རོལ་དབྱངས་དང་དམངས་ཁྲོད་གླུ་གཞས་ཀྱི་དབྱངས་རྟའི་བར་གྱི་འབྲེལ་བ་དང་གལ་ཆེན་རང་བཞིན་ཤེས་དགོས།

རང་ཅག་གི་བོད་འབྲེལ་ས་ཁུལ་དུ་རོལ་མོའི་བསྟན་བཅོས་མཚན་ཉིད་པ་ཤིན་ཏུ་མང་པོ་ཡོད་དེ། དཔེར་ན་ཆོས་རྗེ་ས་པཎ་ཀུན་དགའ་རྒྱལ་མཚན་གྱི་མཛད་པའི《རོལ་མོའི་བསྟན་བཅོས》སྡེ་སྲིད་སངས་རྒྱས་རྒྱ་མཚོའི་རོལ་མོའི་ཐད་ཀྱི་བསྟན་བཅོས་ཕྱག་བྲིས་མ་སྟེ《མིག་ཡིད་རྣ་བའི་དགའ་སྟོན》རྒན་བསང་བདག་གིས་བརྩམས་པའི《རོལ་མོའི་འཇུག་སྒོ་སྒྲ་དབྱངས་བློ་འདུན་ཀུན་གྲོལ》བཀྲ་ཤིས་རྡོ་རྗེ་དང་བློ་བཟང་ཉི་མ་གཉིས་ཀྱིས་བརྩམས་པའི《སྒྲ་སྙན་བློ་གསལ་འཇུག་སྒོ》ཞོལ་ཁང་བསོད་ནམས་དར་རྒྱས་ཀྱིས་བརྩམས་པའི《སྟོད་གཞས་དང་ནང་མའི་གཞས་ཀྱི་བྱུང་ཚུལ་མདོ་ཙམ་བརྗོད་པ》དགེ་འདུན་འཕེལ་རྒྱས་ཀྱིས་བརྩམས་པའི《བོད་ཀྱི་རོལ་དབྱངས་ལོ་རྒྱུས་བསྡུས་གསལ་དཔྱིད་ཀྱི་ཕོ་ཉ》དགྲ་ལྷ་ཟླ་བ་བཟང་པོས་བརྩམས་པའི《བོད་ཀྱི་རོལ་ཆའི་ལོ་རྒྱུས་བསྡུས་གསལ་མུ་ཏིག་ཕྲེང་མཛེས》ནག་འདུའི་ཇོ་དཀར་གྱིས་བརྩམས་པའི《བོད་ཀྱི་སྲོལ་རྒྱུན་རོལ་ཆ་སྒྲ་སྙན་ལ་དཔྱད་པ》བཅས་རོལ་མོའི་ཕྱོགས་ཀྱི་བསྟན་བཅོས་དང་དཔྱད་རྩོམ་མང་པོ་བྱུང་བཞིན་ཡོད་ལ། དེ་དག་གིས་དཔེར་མཚོན་པའི་རོལ་མོའི་སྒྱུ་རྩལ་གྱི་རིན་ཐང་བསྔོག་འདོན་བྱ་བཞིན་པའི་རྨ་གཡང་མེ་བཟའི་རོལ་ཚོགས་ནི་སྨིན་ཐང་སྐུ་གསུམ་མཁའ་འགྲོའི་གླིང་གི་དགེ་སློང་མ་དག་གིས་རྒྱུན་བཟུང་ཞིང་། དེ་དག་གིས་ས་གནས་འདི་གའི་རོལ་མོའི་རིག་གནས་སྔར་ཡོད་པ་རྒྱུན་འཛིན་གྱི་རྨང་གཞིའི་ཐོག །དབྱངས་ཀྱི་ངེས་པ་བདུན་ཚང་པའི་རོལ་མོའི་དབྱངས་ཉམས་མཚན་ཉིད་པ་མང་པོ་བྱུང་དང་འབྱུང་མུས་སོ། །

བོད་ཀྱི་སྲོལ་རྒྱུན་རོལ་ཆའི་སྐོར་ལ་འབུད་བྱའི་རོལ་ཆ་དང་། བརྡུང་བྱའི་རོལ་ཆ། དཀྲོལ་བྱའི་རོལ་ཆ་གསུམ་དུ་དབྱེ་ཆོག་ལ། དེ་ལས་དང་པོ་འབུད་བྱའི་རོལ་ཆ་ནི། དབུགས་ཀྱི་ནུས་པ་ལ་བརྟེན་ནས་དབྱངས་འབྱིན་པའི་རོལ་ཆའི་སྐོར་ཏེ་དཔེར་ན། དུང་། རྒྱ་གླིང་། གླིང་བུ། འཕྲེད་གླིང་སོགས་མང་ངོ་། །རོལ་ཆ་དེ་དག་འབུད་པའི་སྲོལ་ནི། བརྡ་གཏོང་བ་དང་འགུགས་འབོད་ལ་སོགས་པ་ཆོས་ལུགས་ཀྱི་ཆོ་ག་རྣམས་སུ་སྤྱན་འདྲེན་དང་བྱིན་འབེབས། ལིངྒ་དགུག་གཞུག །བསྒྲལ་ལས་སོགས་སུ་འབུད་དོ། དེ་ལས་དུང་ནི་བོད་དུ་བགྲང་བྱ་སྟོང་ཕྲག་འགའི་ལོ་རྒྱུས་ཡོད་པར་བཤད་ལ། རིགས་ལྔར་དབྱེ་སྟེ། དུང་དཀར་གཡས་འཁྱིལ་དང་།

གཟི་དུང་། དུང་འཁྱིལ། དུང་རྭ་ཅན། དུང་དམར་བཅས་སོ། །རྒྱ་གླིང་ནི་བཙན་པོ་གོང་མ་རྣམས་ཀྱི་རིང་ལ་བོད་དུ་དར་བར་བཤད། དབྱངས་རྟ་ལ་ཆོས་རྒྱུད་དང་གྲུབ་མཐའ་སོ་སོའི་མཐོང་བ་བརྒྱུད་པའི་ཕྱག་བཞེས་སྣ་ཚོགས་ཡོད་དོ། །གླིང་བུ་ལ་འཕྲེད་གླིང་དང་གཞུང་གླིང་རིགས་གཉིས་སུ་ཡོད་ལ་གླུ་བྲོ་སོགས་ཀྱི་རམ་དཀྲོལ་རོལ་ཆ་དང་རྐྱང་འབུད་བྱས་ཆོག །

བརྡུང་བྱའི་རོལ་ཆ་ལ། རྡོ་ཤིང་སོགས་ཕན་ཚུན་རྡབ་རྡེག་ལས་བྱུང་བ་ཞིག་ཡིན། དེ་ལ་ཏིང་ཤགས་དང་། གན་ཌི། རྔ། སྦུག་ཆལ། ཡང་ཆིན་སོགས་ཡོད་དོ། །དཀྲོལ་བའི་རོལ་མོ་ནི། སིལ་སྙན་དང་། ཌ་མ་རུ། དྲིལ་བུ། གཤང་། པི་ཝང་སོགས་ཡོད་དོ། །དེ་ཡང་དག་སྣང་སྒྱུ་འཕྲུལ་རོལ་བ་ལས། བླ་མ་ཡབ་ཡུམ་འབོད་པའི་ལྟག་སྤྲོད་དང་ཿ ལྷ་རྣམས་སྔོན་བསུ་རྐང་གླིང་དུང་དཀར་དམརཿ དཔའ་བོ་མཁའ་འགྲོ་འགུགས་བྱེད་གླིང་བུ་འབུདཿ ཁམས་གསུམ་ཆོས་སྒྲས་ཁྱབ་བྱེད་རྔ་འདི་རྡུང་ཿ བྱ་བ་ལྷུན་གྲུབ་སྦུབ་ཆལ་ཏིང་ཏིང་ཤགསཿ བདེ་སྟོང་ཟུང་འཇུག་གླུ་མའི་འགྱུར་ཁུགས་བཅསཿ སྒྲ་གྲག་དབྱངས་སྙན་ལྷ་ཚོགས་དགྱེས་པའི་སྤྲིནཿ ཞེས་གསུང་པ་ལྟར་རོ། །

གཉིས། གར་ཐིག་དབྱངས་གསུམ་ནི་རོལ་མོའི་ཡང་སྙིང་ཡིན།

གར་ནི་མཆོད་ཕྲེང་གི་གར་དང༌། ས་ཆོག་གི་གར། གར་འཆམ་བཅས་ཡིན་ཞིང༌། ཐིག་ནི་དཀྱིལ་འཁོར་བྲིས་ཐིག་དང༌། དབྱངས་ནི་ཡི་དམ་ཆོས་སྲུང་གི་ཆོ་གའི་གདངས་དང་དབྱངས་ལྟ་བུ་ཡིན། གར་ནི་འབག་དང༌། ཆོས་གོས་གྱོན་ནས་འཁྲབ་པའི་འཆམ་དང༌། ཐིག་ནི་དཀྱིལ་འཁོར་བྲི་ཐིག དབྱངས་ནི་འདོན་པའི་གདངས་དབྱངས་བཅས་སུ་གོ་དགོས། གར་ཐིག་དབྱངས་གསུམ་ནི་རོལ་མོའི་ཡང་སྙིང་དུ་གྱུར་ཡོད་ལ། འབུད་རྡུང་དཀྲོལ་གསུམ་གྱི་དབྱངས་ཚིག་ལ་མཛེས་པ་ཕུན་སུམ་ཚོགས་པ་མངའ་དགོས། མགུར་རྟའི་རྗོད་བྱེད་ཀྱི་ཚིག་ལ་མངོན་བརྗོད་བརྡ་རྙིང་གིས་མ་བཅིངས་བར་གོ་སླ་ཞིང་རྟོགས་ཐུབ་པ་དང་། བརྗོད་བདེ་ཞིང་ཉམས་དང་འགྱུར་བ་ལས་མི་སྣའི་སྣང་བརྙན་གསོན་ཉམས་ལྡན་པ་ཞིག་ཏུ་འགྱུར་དགོས། རྡོ་གྲུབ་ཆེན་གྱིས་མཛད་པའི《རྫ་དཔལ་སྤྲུལ་ཚང་གི་རྣམ་ཐར》ལས། མཁས་པས་བརྟགས་ན་དོན་བཟང་བ། བླུན་པོས་ཉན་ཡང་གོ་སླ་བ། གནད་འདུས་ལ་འཛིན་བདེ་བ། རན་ལ་འབྲེལ་ཆགས་པ། སྙན་ལ་རོ་ཉམས་དང་ལྡན་པ། འཇམ་རྩུབ་ཇི་ལྟར་བཤད་ཀྱང་གདམས་ངག་གི་རོ་གཅིག་ཏུ་མཐུན་པར་འབྱུང་བས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོག་ཡོད་ཅེས་གསུངས་ཡོད་པ་ནི། བོད་ཀྱི་གར་ཐིག་དབྱངས་གསུམ་ནི་རོལ་མོའི་ཚིག་གཤིས་ཁྱད་པར་བ་ཞིག་ཏུ་གྱུར་ཡོད། རོལ་མོའི་བརྗོད་བྱ་དོན་དང་རྗོད་བྱེད་ཚིག་གཉིས་ཀ་འཇིག་རྟེན་ལ་ཐུན་མོང་དུ་གྲགས་པའི་དོན་ཆེས་ཆེར་གསལ་ཞིང་། ཤིན་ཏུ་གོ་སླ་བའི་རབ་དྭངས་ཀྱི་ཡོན་ཏན་ལྡན་ཞེས་བརྗོད་ཆོག་སྟེ། ཚིག་ཡོད་ཚད་སངས་རྒྱས་དང་སེམས་དཔའ་དག་གི་སྐུ་གསུམ་ཐུགས་གསུམ་གྱི་ཡོན་ཏན་ལ་བསྟོད་པ་དང་།

ལྟ་སྒོམ་སྤྱོད་གསུམ་ལ་བསྟོད་པ། ཕྱིན་དྲུག་བསྡུ་བཞི་ལ་བསྟོད་པ། ཐོས་བསམ་སྒོམ་གསུམ་ལ་བསྟོད་པ། འཆད་རྩོད་རྩོམ་གསུམ་ལ་བསྟོད་པ། དབང་ལུང་མན་ངག་ལ་བསྟོད་པ། ཞི་རྒྱས་དབང་དྲག་གི་ཕྲིན་ལས་ལ་བསྟོད་པ། དམ་པ་ཞིག་གི་རྟོགས་བརྗོད་དང་རྣམ་ཐར་ལ་བསྟོད་པ། དཔའ་བོ་ཞིག་གི་དགྲ་འདུལ་གཉེན་སྐྱོང་གི་ངོ་མཚར་བའི་བསམ་བློ་དང་མཛད་རྗེས་ལ་བསྟོད་པ་བཅས་དགེ་མཚན་ཕུན་སུམ་ཚོགས་པའི་བརྗོད་བྱ་ལ་དྲངས་ནས་བསྟོད་པའི་རང་བཞིན་དྲང་པོར་བརྗོད་ཅིང་གོ་སླ་བའི་ཁྱད་ཆོས་ལྡན། དཔེར་ན། གླིང་སྒྲུང་གི་ངོ་མཚར་བའི་ངག་རྟ་ལ་དྲངས་པའི་རོལ་མོ་སྟེ་རྔ་བུམ། སྒྲ་སྙན། དུང་དཀར། ཏམ་བུ་ར་སོགས་བོད་ཀྱི་རོལ་ཆའི་རྣམ་གྲངས་མཐའ་ཡས་པ་མང་པོ་ཡོད།

གསུམ། རོལ་མོ་ནི་མཆོད་པའི་བདག་ཉིད་ཅན།

རོལ་མོ་ནི་མཆོད་པའི་རང་བཞིན་དུ་ངོས་འཛིན་པར་བན་བོན་གཉིས་ཀྱི་ཡིག་ཆ་མང་པོ་ཁ་མཐུན། ནང་པའི་ཟས་ཕུད་སྨོན་ལམ་དང་ཇ་ཕུད་སྨོན་ལམ། གདུག་སྤོས་སྨོན་ལམ་སོགས་སུ་ཞལ་ཟས་རོལ་མོ་ལ་སོགས་པའི་དངོས་བཤམས་ཡིད་སྤྲུལ་མཆོད་པ་འབུལ། ཞེས་མཆོད་པ་འབུལ་བཞིན་ཡོད་ལ། དབུས་ཀྱི་དམངས་གཞས་མང་པོའི་བརྗོད་བྱ་དོན་དང་རྗོད་བྱེད་ཚིག་གཉིས་གར་རོལ་མོ་ནི་མཆོད་པའི་བདག་ཉིད་ཅན་དུ་ངོས་འཛིན་བཞིན་ཡོད་དེ། གངས་མཚོ་གཉིས་ཀྱི་གནས་ལ་བསྟོད་པ་དང་། གཞན་ཡང་སྐྱེས་བུ་དམ་པ་དག་གི་མཛད་འཕྲིན་རོལ་མོ་ལ་དྲངས་ནས་མཆོད་པ་འབུལ་སྲོལ་མཆིས་ཤིང་། དཔེར་ན། མདོ་སྨད་བླ་བྲང་བཀྲ་ཤིས་འཁྱིལ་གྱི་མདོ་དར་ལྟ་བུ་ཡིན། ཀུན་མཁྱེན་བླ་མ་ཡབ་སྲས་དབུས་ལྗོངས་སུ་སློབ་གཉེར་ལ་བསྐྱོད་པའི་སྐབས་སུ་རོལ་མོའི་མཆོད་པ་ལ་བརྟེན་ནས་ཕེབས་བསུའི་འཕྲིན་ལས་རྒྱ་ཆེན་པོ་ཡོད། དཔེ་དེ་དང་རྗེས་མཐུན་པར་མགོ་ལོག་གཅིག་སྒྲིལ་གྱི་རྨ་གཡང་མེ་བཟའི་མཆོད་པའི་རོལ་ཚོགས་འདི་ལ་ཡང་ཁོང་ཚོའི་དགོན་པའི་ཐུན་མིན་གྱི་ཁྱད་ཆོས་ལྡན་པས་ཆོ་ག་དང་ཕྱག་ལེན་ཕུན་སུམ་ཚོགས་པ་ཞིག་ཡོད་ཅིང་། རོལ་མོའི་རིག་གནས་འདི་ནི་རིག་གཞུང་རྒྱ་ཆེ་ཞིང་གཏིང་ཟབ་པ་ཞིག་རེད་ཅེས་ཚིག་ཐག་ཆོད་པོས་སྨྲ་ནུས་ཤིང་། མི་རྣམས་ཀྱི་ནང་སེམས་ཀྱི་དགའ་སྐྱོ་ཆགས་སྡང་རོལ་མོ་ལ་དྲངས་པ་ཤིན་ཏུ་མང་།

དཔེར་ན། བོད་རང་གི་ས་སྐྱེས་རྡོ་སྐྱེས་ཀྱི་རིག་གནས་ཏེ། གླིང་སྒྲུང་གི་ནང་དུ་སིལ་སྙན་གླིང་བུ་དྲུག་འགྱུར་བྱེད་པའི་དུས་སུ་གླིང་དམག་རྣམས་ཀྱིས་བཟའ་བཏུང་བྱས་པ་དང་། རྔ་ཆུང་སྐོར་རྡུང་བྱེད་པའི་དུས་སུ་དམག་ཕྱིར་འཐེན་བྱ་རྒྱུ་དང་། རྔ་ཆེན་དྲག་རྡུང་བྱེད་པའི་སྐབས་སུ་དགྲ་དམག་ལ་ཕར་རྒོལ་བྱས་པ་དང་། དེ་དག་ལ་རམ་འདེགས་ཀྱི་ཚུལ་དུ་སིལ་སྙན། མཁར་རྔ། རྔ་ཆེན། རྔ་ཆུང་། དུང་། རྒྱ་གླིང་། རྭ་དུང་སོགས་རོལ་ཆའི་རྣམ་གྲངས་མཐའ་ཡས་ཤིང་ཕུན་སུམ་ཚོགས་པ་ཞིག་ཡོད་པ་ནི་གླིང་སྒྲུང་ཁག་ལས། སི་ལུ་སྐོར་རྡུང་བྱས་དུས་སུ། །དམག་སྒར་ཁ་བ་འབབ་འབབ་དགོས། །རྐང་གླིང་རྒྱང་འབུད་བྱས་དུས་ན། །ཞོག་ཟས་གསོལ་ནས་སྦྲ་གུར་བསྡུ། །མཁར་རྔ་དགུ་རྡུང་བྱས་དུས་སུ། །

སྒར་ཆེན་ཆུ་བོ་བཞུར་བཞུར་དགོས། །རྒྱ་གླིང་དྲུག་འབུད་བྱས་དུས་སུ། །ཟ་བཏུང་གཉིས་ལ་མགྱོགས་ཟ་བྱེད། །རྭ་དུང་བཞི་འབུད་བྱས་དུས་སུ། །དམག་གི་གོ་མཚོན་ཁྲིགས་སེ་དགོས། །རྔ་ཆེན་དྲག་རྡུང་བྱས་དུས་སུ། །དགྲ་ལ་རྦབ་རྡོ་འདྲིལ་འདྲིལ་དགོས། །རྔ་ཆུང་ཐད་རྡུང་བྱས་དུས་སུ། །དམག་མི་ཕྱིར་འཐེན་ཤེས་པར་བྱོས། །

ཞེས་རོལ་མོ་དང་འབྲེལ་བའི་དམག་ཐབས་ཤིན་ཏུ་མང་པོ་ཡོད།

དཔེ་དེ་བཞིན་དུ་བོན་གྱི་ཆོ་ག་མང་པོ་ཞིག་ཏུ་ཡང་། རོལ་མོ་ནི་མཆོད་པའི་རང་བཞིན་ཅན་གྱི་བརྗོད་བྱར་གྱུར་ཡོད་པ་ཤིན་ཏུ་མང་།

དཔེར་ན། མི་འགྱུར་དབྱངས་ཆེན་བོན་གྱི་དབྱིབས་དཀྱིལ་ཏེ། །ཕྱོགས་བཅུའི་རབ་འབྱམས་ཞིང་ཁམས་དཔག་མེད་ནས། །རོལ་མོའི་ཚོགས་རྣམས་ཇི་སྙེད་ཡོད་པ་དང་། །དེ་སྙེད་བདག་གིས་གུས་པར་བཤམས་པ་ཡི། །རྔ་གཤང་གླིང་བུ་གར་དང་རོལ་མོ་འདི། །དངོས་སུ་བཤམས་དང་ཡིད་ཀྱིས་རབ་སྤྲུལ་ནས། །བདེར་གཤེགས་གཙོ་འཁོར་བཞི་དང་བཅས་ལ་འབུལ། །ཞེས་རོལ་མོ་ནི་མཆོད་པའི་བདག་ཉིད་ཅན་དུ་གྱུར་ཡོད་པ་རྟོགས་དགོས་ཤིང་། རོལ་མོ་འདི་ལ་ངོ་མཚར་བའི་ལོ་རྒྱུས་ཀྱི་རིན་ཐང་ཆེན་པོ་ཡོད་དོ། །

བཞི། མཇུག་གི་གཏམ།

བོད་ཀྱི་རོལ་མོའི་རིག་གནས་ནི་བོད་མི་དམངས་ཀྱི་སེམས་ཁམས་དང་། ལོ་རྒྱུས། སྤྲོ་སྣང་བཅས་ཀྱི་གདེང་ཆ་ཆེན་པོ་ཞིག་ཡིན། རོལ་མོའི་སྟོབས་ཤུགས་འདི་དག་ལ་བརྟེན་ནས་བོད་ཀྱི་རིག་གནས་ཀྱི་མ་ལག་མང་པོ་ཞིག་འཛིན་སྐྱོང་སྤེལ་གསུམ་བྱས་བཞིན་ཡོད། དེང་གི་དུས་སྐབས་འདིར་ང་ཚོས་བོད་ཀྱི་རོལ་མོའི་རིག་གནས་ལ་གནད་དོན་གཉིས་ཀྱིས་གདོང་ལེན་བྱེད་དགོས་ཡོད། གནད་དོན་དང་པོ་ནི་རོལ་མོའི་རིག་གནས་རྙིང་པ་རྣམས་སྲུང་སྐྱོབ་བྱེད་པ་དང་། གནད་དོན་གཉིས་པ་ནི་དེང་རབས་ཀྱི་རོལ་མོའི་སྒྱུ་རྩལ་གྱི་ངོ་བོ་དང་མཐུན་པའི་ལམ་ཁར་འཕེལ་རྒྱས་གཏོང་དགོས། མ་འོངས་པར་ང་ཚོས་འོས་འཚམས་ཀྱི་བྱ་ཐབས་བརྒྱུད་ནས་རོལ་མོའི་རིག་གནས་འདི་དག་ཉར་ཚགས་དང་དར་སྤེལ་བཅས་བྱེད་དགོས་ཤིང་། དེ་དང་ཆབས་ཅིག་རོལ་མོ་བ་གསར་པ་དང་རོལ་ཆ་གསར་པ་བཟོ་བ་བཅས་ལ་ཤུགས་སྣོན་བྱེད་དགོས། བོད་ཀྱི་རོལ་མོའི་རིག་གནས་ནི་མི་རིགས་གཞན་གྱི་རོལ་མོའི་རིག་གནས་སྤེལ་རེས་བྱེད་པའི་གནས་ཚུལ་མང་པོ་ཡོད་མོད། དེ་དག་གི་གོ་རིམ་ཁྲོད་དུ་འཛམ་གླིང་གི་ཕུལ་དུ་བྱུང་བའི་རོལ་མོ་མང་པོ་ཞིག་ནང་འདྲེན་བྱེད་དགོས་པར་མ་ཟད། འཛམ་གླིང་རོལ་མོའི་སྒྱུ་རྩལ་ལ་བོད་ཀྱི་རོལ་མོ་ཞུགས་ཐུབ་དགོས་སོ། ། 

（རྩོམ་པ་པོ། བོད་ལྗོངས་སློབ་ཆེན་རྩོམ་རིག་སློབ་གླིང་གི་2025ལོའི་ཀྲུང་གོའི་གྲངས་ཉུང་མི་རིགས་ཀྱི་སྐད་ཡིག་དང་རྩོམ་རིག་ཆེད་ལས་ཀྱི་འབུམ་རམས་པ།）