ས་པཎ་གྱི་མཁས་འཇུག་དང་འབྲེལ་ནས་དེང་རབས་སློབ་གསོའི་རིན་ཐང་གླེང་བ།

  སྤྱིར་སློབ་གསོ་ནི་མི་རིགས་ཤིག་གི་ལོ་རྒྱུས་བརྒྱུད་རིམ་ཁྲོད་དུ་ལག་ལེན་བྱས་པ་བརྒྱུད་བླང་དོར་ཀྱི་གནས་ལ་མ་ནོར་བར་འཇུག་བྱེད་ཀྱི་ལག་ཆ་གལ་ཆེན་ཞིག་ཏུ་སྣང་། མི་རིགས་གང་དང་གང་ཡིན་རུང་རང་གི་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་བྱེད་པར་སློབ་གསོ་ལ་རག་ལས་ལ། ཡང་མི་རིགས་སོ་སོའི་རང་གི་ཐུན་མིན་གྱི་སློབ་གསོའི་དགོངས་པ་དེ་ཡང་སོ་སོའི་རིག་གནས་གལ་ཆེན་ཞིག་ཅི་ལ་མིན། དེ་བས་དེང་རབས་སློབ་གསོ་དེ་ཡང་སྲོལ་རྒྱུན་རིག་གནས་དང་དམ་དུ་མ་སྦྲེལ་བ་ཞིག་མེད་པས། འདིར་ས་པཎ་གྱི《མཁས་འཇུག》ལས་སློབ་གསོའི་བརྗོད་བྱ་དང་འབྲེལ་བ་དག་ལ་དོ་སྣང་བླ་ལྷག་བྱས་ཏེ། སློབ་གསོའི་ཁྱད་ཆོས་ལྡན་པའི་ལེགས་བཤད་དག་གི་ཁྱིམ་ཚང་སློབ་གསོ་དང་སློབ་གྲྭའི་སློབ་གསོ། སྤྱི་ཚོགས་སློབ་གསོའི་རིན་ཐང་སོགས་གང་ལ་གང་འཚམ་གྱི་ཤུགས་རྐྱེན་ཐེབས་པ་དེ་དག་དེང་རབས་སློབ་གསོའི་རིན་ཐང་དང་འབྲེལ་ནས་དོན་ཚན་བཞི་ཡི་སྒོ་ནས་བརྗོད་པ་ལགས།

དང་པོ། སློབ་གསོ་ཐོག་མར་བྱུང་བ་དང་དེའི་འཇུག་རིམ།

 མིའི་རིགས་ཀྱི་སློབ་གསོ་ཐོག་མ་དེའང་མི་རིགས་རང་གི་ཕ་སྐད་ལ་བརྟེན་ནས་སློབ་གསོ་སྤེལ་བ་ཡིན་ལ། སྤྲ་མིས་དུས་ཡུན་རིང་པོའི་ནང་དུ་ངལ་རྩོལ་ལ་བརྟེན་ནས་རིམ་འགྱུར་བྱུང་མཐར་སྲོག་ཆགས་ཀྱི་གྲས་ནས་ཁ་བྲལ་ཏེ་མིའི་རིགས་སུ་གྱུར། དེའི་རྩ་བའི་མཚོན་རྟགས་ནི་སྐད་ཆ་བྱུང་བ་དེ་ཡིན། སྐད་ཆ་བྱུང་བ་དང་དུས་མཚུངས་སུ་སློབ་གསོའི་བརྒྱུད་རིམ་གྱི་མགོ་བརྩམས་པ་རེད། ཐོག་མའི་སློབ་གསོ་ནི་གདོད་མའི་མི་ཚོགས་ཁྲོད་རྒན་རབས་ཀྱིས་རི་དྭགས་རྔོན་པའི་ཤེས་བྱ་དང་། རྡོ་ཡི་ལག་ཆ་བཟོ་སྟངས། སྟབས་བདེ་བའི་འཚོ་བའི་རྒྱུན་ཤེས་སོགས་ཉམས་མྱོང་དང་ལག་ལེན་ཕྱི་རབས་པ་ལ་རྒྱུད་སྤྲོད་སྤེལ་གསུམ་བྱས་པ་དེ་རེད། དེ་ལྟ་བུའི་སློབ་གསོ་སྤེལ་བྱེད་ནི་གདོད་མའི་མིའི་སྐད་ཆ་ཡིན། རྒྱུ་མཚན་ནི། གདོད་མའི་སྐད་ཆ་ནི་གདོད་མའི་མི་ཚོགས་ཀྱིས་ནང་ཁུལ་དུ་ཕན་ཚུན་ལ་འབྲེལ་ལམ་འཛུགས་པ་དང་ཕན་ཚུན་འབྲེལ་གཏུག་བྱེད་པའི་ཟམ་པ་ལྟ་བུ་ཡིན་པ་དང་། སྐད་ཆ་ལ་བརྟེན་ནས་ཕན་ཚུན་གྱི་བསམ་བློ་བརྗེ་རེས་དང་ལག་ལེན་མཉམ་འབྲེལ་བྱེད་པར་ནུས་པ་ཐོན་བཞིན་ཡོད། སྤྱིར་བཏང་སྐད་དང་ཡི་གེ འཚོ་བའི་གོམས་གཤིས་སོགས་ནི་མི་རིགས་སོ་སོར་ཐུན་མིན་དུ་སྣང་ཡང་། འཇིག་རྟེན་གནས་ལུགས་ཐད་ཀྱི་རིན་ཐང་ལྟ་ཚུལ་དང་སྤང་བླང་འཇུག་ལྡོག་བྱེད་ཚུལ་ནི་མི་རིགས་དང་རིག་གནས་བྱེ་བྲག་པར་མ་ལྟོས་པར་ཐུན་མོང་སྤྱི་འགྲོས་སུ་སོང་བ་ཤས་ཆེ་བར་མཐོང་། རིག་གནས་ཞེས་པ་དང་སློབ་གསོ་ཞེས་པའི་དམིགས་ཡུལ་ཡང་བྱེ་བྲག་གི་སྐྱེ་བོ་རེ་རེའི་མི་ཚེ་དེ་ཤེས་རབ་ཀྱིས་ཟིན་པ་དང་། བཟང་སྤྱོད་ཀྱིས་ཕྱུག་པ། རྩིས་ཐང་ལྡན་པའི་ངང་འཚོ་བ་འབའ་ཞིག་ལས་མ་འདས།

གཉིས་པ། ཁྱིམ་ཚང་སློབ་གསོའི་རིན་ཐང་།

ཁྱིམ་བདག་གིས་བུ་ཕྲུག་གི་སྨྲ་བརྗོད་དང་སྤྱོད་ལམ། ཤེས་བྱ་བཅས་ཀྱི་བྱང་ཚད་མཐོ་རུ་གཏོང་རྒྱུ་གཙོ་གནད་དུ་བཟུང་སྟེ་མིག་དཔེ་སྟོན་པ་དང་སྐུལ་སློང་བྱེད་རྒྱུ་གོམས་གཤིས་ཅན་དུ་འགྱུར་དགོས། འདིའི་ཐད་ནས《མཁས་འཇུག》ལས། རྨུགས་པ་རྣམས་ནི་ངོ་མཚར་གྱིས། །གཏམ་བཤད་ནས་ནི་ཉན་དུ་གཞུག་ཅེས་གསུངས་པ་ལྟར་སྔོན་བྱོན་མཁས་པ་རྣམས་ཀྱིས་ལེགས་བཤད་དག་ལ་ཉན་ནས་རྒན་བཀུར་གཞོན་བྱམས་དང་། མི་དང་མིའི་བར་གྱི་འབྲེལ་བའི་ལེགས་ཉེས། ཀུན་སྤྱོད་དང་མི་གཞི་གསོ་སྐྱོང་། ཕུགས་བསམ་མངོན་འགྱུར་སོགས་མ་འོངས་པའི་བྱིས་པ་མཇོན་ཐང་ཅན་ཞིག་ཏུ་འགྱུར་བའི་སྔོན་འགྲོའི་ཆ་རྐྱེན་དང་ཐོག་མའི་རྨང་གཞི་འཇོག་དགོས། ཡང་ས་པཎ་གྱི《མཁས་འཇུག》ལས། བྱམས་པས་ཁྱབ་པའི་ཚིག་སྨྲ་བ། །བསྒྲུབ་སླ་གཞན་དགའ་སྡུད་པའི་མཆོག་ཅེས་པ་དང་། སྙིང་ལ་ཁོན་དུ་དམ་བཟུང་ནས། །ཁ་ལ་ཚིག་བཟང་སྨྲའོ་ཞེས།། དྲང་སྲོང་གདུག་པའི་གདམས་ངག་སྟེ། །དམ་པའི་ཚུལ་དང་འགལ་བ་ཡིན། །ཞེས་པ་དང་། རྨ་གཞན་མཁས་ན་འཚོ་སྲིད་ཀྱི། །ཉེས་པའི་ཚིག་རྨ་འདྲུབ་པ་མེད། །ཟེར་བ་ལྟར་དེ་ཡང་ཕ་མ་ནི་ཕྲུ་གུའི་དགེ་རྒན་དང་པོ་དེ་ཡིན་པས་ཆུང་བྱིས་པའི་དུས་ནས་ཕ་མའི་བྱིས་པ་ལ་འཇམ་བཤད་བློ་འགུག་གི་དཔེར་སྟོན་བྱེད་པ་གལ་ཆེ་བ་ལས་ཕ་མའི་བཞག་པའི་གོམ་གཤིས་བཟང་ངན་དེས་སློབ་མའི་མ་འོངས་པར་ཤུགས་རྐྱེན་ཟབ་མོ་ཐེབས་སྲིད། བྱིས་པ་ཞིག་ལ་ཆ་མཚོན་ནས་བཤད་ན་ཕ་མས་བཞག་པའི་སློབ་གསོའི་ཤུགས་རྐྱེན་ནི་མི་ཚེའི་ནང་གི་ཆེས་ཐོག་མའི་སློབ་གསོའི་རྨང་གཞི་ཡིན་པར་མ་ཟད། འབྱུང་འགྱུར་གྱི་མི་ཚེའི་ཁྲོད་མི་ཚེའི་ལྟ་བ་དང་རིན་ཐང་ལྟ་བ། འཇིག་རྟེན་ལྟ་བ་བཅས་ཀྱི་སྲོག་ཤིང་ཡང་ཡིན། ཁྱིམ་ཚང་སློབ་གསོ་ནི་ཕ་མའི་སློབ་གསོ་ཡིན་ལ་ཕ་མའི་སློབ་གསོ་ནི་ཁྱིམ་ཚང་སློབ་གསོའི་གཞི་རྟེན་ཡང་ཡིན། དེར་བརྟེན། ཁྱིམ་བདག་ཚོས་འཚོ་བ་དངོས་ནང་གོང་གསལ་གྱི་སློབ་གསོའི་བྱེད་ཐབས་ཁག་ལ་བསམ་གཞིག་དང་བྱ་ཐབས་གསར་པ་མུ་མཐུད་དུ་བཙལ་ན། ད་གཟོད་ཕྲུ་གུ་ལ་འཚར་ལོངས་འབྱུང་སའི་ཁོར་ཡུག་བཟང་པོ་ཞིག་དང་རྨང་གཞི་བཟང་པོ་ཞིག་འདིང་ཐུབ་པ་ཡིན་ནོ། །

གསུམ་པ། སློབ་གྲྭའི་སློབ་གསོའི་རིན་ཐང་།

དེ་ཡང་སློབ་གྲྭའི་ལས་ཀ་ལ་ཞུགས་པའི་དགེ་རྒན་དག་གིས་གང་འདྲ་བྱས་ཏེ་རང་ཉིད་ཀྱི་སློབ་གསོའི་སྤུས་ཚད་གོང་མཐོར་གཏོང་ཐབས་སྐོར་ལག་ལེན་དང་འབྲེལ་ནས་བསམ་གཞིག་བྱས་དང་བྱེད་མུས་ལགས་པས་དེའི་སྐོར་ནས《མཁས་འཇུག》ལས་གཙང་མཁས་གཞན་ལ་ཕན་པར་འདོད། ཅེས་གསུངས་པ་ལྟར་དགེ་རྒན་ཞིག་གི་ངོས་ནས་བཤད་ན་ཚུལ་ཁྲིམས་དག་པས་ལུས་ངག་གཙང་བ། ཤེས་རབ་དག་པས་ལུང་རིགས་ལ་མཁས་པ། ལྷག་བསམ་དག་པས་གཞན་ལ་ཕན་པའི་སེམས་ཡོད་པ་སོགས་མཚན་ཉིད་གསུམ་པོ་འདི་ཚང་དགོས་ཏེ། གསུམ་པོ་དེ་གང་ཞེ་ན། གཙང་ཞེས་པས་དུས་དང་རྣམ་པ་ཀུན་ཏུ་དགེ་བའི་བཤེས་གཉེན་ཚུལ་ཁྲིམས་དག་པ། ཞེ་གཙང་བ། ནམ་རྒྱུན་དུ་དགེ་རྒན་གྱི་སྤྱོད་ལམ་གཙང་མ་ནན་གྱིས་སྲུང་དགོས། ཡང་རྗེ་ཙོང་ཁ་པས། རིགས་ལམ་རྣམ་པར་འབྱེད་པའི་རྣམ་དཔྱོད་དང་དང་། །གཞུང་ལུགས་གདམས་པར་ཤར་བའི་ཉམས་ལེན་དང་། །ཚིག་སྦྱོར་ཚུལ་ལ་མཁས་པའི་ངག་གི་དཔལ། །ས་སྟེང་འདི་ན་རིན་ཆེན་རྣམ་གསུམ་སྣང་། །ཞེས་དང་ཡང་ཐོས་པ་གཏི་མུག་མུན་སེལ་སྒྲོན་མེ་ཡིན། །རྐུན་པོ་ལ་སོགས་མི་འཁྱེར་ནོར་གྱི་མཆོག །ཀུན་ཏུ་རྨོངས་བའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཞེས་པ་ལ་སོགས་རང་སེམས་ནན་གྱིས་གཅུན་ནས་སློབ་སྦྱོང་ལ་འཇུག་ཚུལ་དང་སློབ་སྦྱོང་བྱ་དགོས་པའི་རྒྱུ་མཚན་བསྟན། མཁས་ཞེས་ཤེས་རབ་དག་པས་ལུང་རིགས་ལ་མཁས་དགོས་པར་གོ་བ་དང་། གཞན་ལ་ཕན་པར་འདོད་ཅེས་པས་ལྷག་བསམ་དག་པའི་སློབ་ཁྲིད་ཀྱི་ལས་ལ་འཇུག་དགོས་པ་བསྟན་ཏེ། དགེ་རྒན་གྱིས་སློབ་ཁྲིད་གནང་སྐབས་རང་ཉིད་ཀྱི་བུ་ཕྲུག་ལ་བྱམས་སྐྱོང་དང་བརྩེ་བ་བཅངས་པ་ནང་བཞིན་སློབ་མ་རྣམས་ལ་ཡང་བྱམས་སྙིང་རྗེ་བཅངས་ནས་ལྷག་བསམ་རྣམ་དག་གིས་སློབ་མར་ཤེས་བྱ་སློབ་ཁྲིད་བྱེད་དགོས། གཞན་བློ་ཅན་རྣམས་ལ་ཟབ་རྒྱ་ཆེ། །བློ་ཆུང་གཟུང་བདེ་གོ་སླ་བ། །ཕྱི་ནས་ཚིག་དོན་འབྲེལ་ཆགས་ནས། །དོན་ཕྲ་འགལ་འབྲེལ་དཔྱད་ཅིང་བཤད། །ཅེས་རིག་པ་རྣོ་བ་རྣམས་ལ་དོན་ཟབ་ཅིང་རྒྱ་ཆེ་བ་བཤད། དབང་བོ་ཅུང་ཟད་རྟུལ་བ་རྣམས་ལ་ཚིག་བཟུང་བདེ་ཞིང་གོ་སླ་བ། དོན་ཡང་རྟོགས་སླ་ཞིང་རྣ་བར་གང་སྙན་བཤད་ན་སྦྱང་འདོད་ཀྱི་བློ་སྐྱེ་བ་སོགས་གང་ལ་གང་འཚམ་དང་དེ་ལ་དེ་འཚམ་གྱི་རྩ་དོན་ཡོད་པས་གོང་གི་མཁས་འཇུག་གི་ལེགས་བཤད་འདི་དག་ལ་ངེས་པར་མཐོང་ཆེན་བྱ་རྒྱུ་ནི་ཤིན་ཏུ་གལ་ཆེ་བར་འདོད། དཔེ་ཀློག་ལ་གོམས་དགོས་ཚུལ་ལས་རིག་པ་ནངས་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང་། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་པ་འདྲ། །ཞེས་དཔེ་ཀློག་གི་དགོས་པ་བསྟན་ཡོད་ལ། སྔོན་བྱོན་དགེ་བའི་བཤེས་གཉེན་དག་སྐུ་ཚེ་གང་པོར་དཔེ་ཀློག་དང་བྲལ་མི་འདུག །གཙང་མཁས་གཞན་ལ་ཕན་པར་འདོད། །ཅེས་དང་། རིག་པ་ནངས་པར་འཆི་ཡང་བསླབ། །ཅེས་པའི་དགོངས་པ་དེ་དེ་བཞིན་དུ་བསམས་ཤིང་། དེ་བཞིན་དུ་གདམས་པ། དེ་བཞིན་དུ་སྐུ་ཚེ་མཐར་ཕྱིན་དུ་ལག་ལེན་རྒྱུན་སྐྱོང་བྱས་ཏེ་དཔེ་ཀློག་གི་སྦྱོར་བ་དང་མི་ཚེ་གཞི་གཅིག་ཏུ་འདྲེས་ཡོད་པ་མིག་དཔེ་གསོན་པོས་བསྟན་འདུག

བཞི་པ། སྤྱི་ཚོགས་སློབ་གསོའི་རིན་ཐང་།

ཉིན་རེ་བཞིན་འཕེལ་རྒྱས་འགྲོ་བཞིན་པའི་སྤྱི་ཚོགས་འདིར་མཚོན་ན། མིའི་བྱང་ཚད་དང་སྤུས་ཚད་ཐད་ཀྱི་རེ་བ་ཡང་ཉིན་རེ་ལས་མ་འདས་པར་མཐོ་རུ་འགྲོ་བཞིན་ཡོད། བྱང་ཚད་མཐོ་བའི་མི་སྣ་གསོ་སྐྱོང་བྱེད་དགོས་ན་གཙོ་བོ་སློབ་གསོར་རག་ལས་ཡོད། དེ་བས་སྤྱི་ཚོགས་ཀྱི་སློབ་གསོ་ནི་སློབ་གྲྭའི་སློབ་གསོའི་ཚབ་བྱེད་ཐབས་བྲལ་བའི་ཐུན་མོང་མ་ཡིན་པའི་སློབ་གསོ་ཞིག་རེད། སློབ་གསོ་དེས་ན་ཆུང་གཞོན་ནུ་རྣམས་ཀྱི་འཚོ་བ་དང་། སློབ་སྦྱོང་། མདུན་ལམ་བཅས་ལ་ཕན་ནུས་ཁྱད་པར་ཅན་འདོན་བཞིན་ཡོད། ས་པཎ་གྱི《མཁས་འཇུག》ལས། སྐྱེས་མཆོག་རང་གིས་སྐྱོན་ལ་ལྟ། །སྐྱེ་བོ་ངན་པའི་གཞན་སྐྱོན་འཚོལ། །རྨ་བྱས་རང་གི་ལུས་ལ་རྟོག །སྲིན་བྱས་གཞན་ལ་ལྟས་ངན་གཏོང་། ། དམ་པ་སྲོག་ལ་བབས་ན་ཡང་། ། རང་བཞིན་བཟང་པོ་ག་ལ་འདོར། །ས་ལེ་སྦྲམ་ནི་བསྲེགས་བཅད་ཀྱང་། །དེ་ཡི་ཁ་དོག་ཉམས་མི་འགྱུར། །ཞེས་རང་སྐྱོན་ཤེས་པ། སྤྱི་སེམས་ཆེ་བ། བློ་རྒྱ་ཡངས་པ། ལས་འབྲས་བརྩི་བ་སོགས་སྤྱི་ཚོགས་འཕེལ་རྒྱས་ཀྱི་ཁྱོན་ཡོངས་ལ་དམིགས་པ་དང་། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་ལ་ཞབས་འདེགས་ཞུ་དགོས།

མདོར་ན། ཆོས་རྗེ་ས་པཎ་གྱི་མཁས་འཇུག་བོད་གངས་ཅན་གྱི་སྲོལ་རྒྱུན་སློབ་གསོ་གཞུང་ལུགས་གལ་ཆེན་དེ་རེད། དེའི་ནང་དུ་ཁྱིམ་ཚང་སློབ་གསོ། སློབ་གྲའི་སློབ་གསོ། སྤྱི་ཚོགས་སློབ་གསོའི་སྐོར་གྱི་བླང་བྱ་མང་པོ་ཡོད། བོད་ཀྱི་སློབ་གསོ་འཕེལ་རྒྱས་ལ་རྨང་གཞི་བརྟན་པོ་བཞག་ཡོད་པ་མ་ཟད། དེང་རབས་ཀྱི་སློབ་གསོའི་ལག་ལེན་ཁྲོད་དུ་ཕན་པ་ཤིན་ཏུ་ཆེ། ང་ཚོས་མེས་པོས་སྲོལ་རྒྱུན་རིག་དེ་དེང་རབས་སློབ་གསོའི་གསར་གཏོད་ཁྲོད་ཚེ་སྲོག་གསར་པ་སྦྱིན་པ་ཤིན་ཏུ་གལ་ཆེའོ། །