ཀོ་དོ་མཁན་པོས་བོད་སྐད་འཕྲིན་སྦྱོར་གྱི་ལས་དོན་ལ་འབད་པའི་གཏམ་རྒྱུད་གླེང་བ།
ཀོ་དོ་མཁན་པོ་ནི་རྔ་བ་བོད་རིགས་ཆའང་རིགས་རང་སྐྱོང་ཁུལ་ཟུང་ཆུ་རྫོང་གི་ཡིན། ད་ལྟ་རྔ་བ་ཁུལ་གསར་འགྱུར་སྨྱན་སྦྱོར་ལྟེ་གནས་ཀྱི་ཏང་ཙུའུ་ཁོངས་མི་དང་ཀྲུའུ་རེན་གཞོན་པ། སྤྱིའི་བཟོ་སྐྲུན་པ། ཞུས་ཆེན་ལོ་ཙཱ་པ་བཅས་ཡིན་ལ། རྒྱལ་ཡོངས་བོད་སྐད་ཡིག་བརྡ་ཆད་ཚད་ལྡན་ཅན་གྱི་ལས་དོན་ཨུ་ཡོན་ལྷན་ཁང་གི་སྐབས་དང་པོ་དང་སྐབས་གཉིས་པ། གསུམ་པའི་ཆེད་མཁས་པ། སི་ཁྲོན་ཞིང་ཆེན་མི་ཤུགས་ཐོན་ཁུངས་སྤྱི་ཚོགས་འགན་སྲུང་ཐིང་གི་ཡིག་སྒྱུར་མ་ལག་གི་མཐོ་རིམ་གོ་མིང་གི་ཞིབ་དཔྱོད་ཨུ་ཡོན་ལྷན་ཁང་གི་ཆེད་མཁས་པ་སོགས་ཀྱི་ལས་འགན་ཁུར་བཞིན་ཡོད།
གསར་འགོད་པ། རྒན་ལགས་ནས་ཅིའི་ཕྱིར་གསར་འགྱུར་གྱི་ལས་དོན་འདི་བདམས་གསེས་བྱས་པ་དང་ལམ་ཁ་འདིར་ཅི་ལྟར་ཞུགས་པ་ཡིན།
ཀོ་དོ་མཁན་པོ། ང་ལ་མཚོན་ན་མི་ལོ་སུམ་ཅུ་ལྷག་གི་རིང་བོད་རྒྱ་སྐད་གཉིས་ཀྱི་གསར་འགྱུར་ལས་དོན་བསྒྲུབས་ནས་ཡོང་བ་ཡིན། བོད་འབྲེལ་ས་ཁུལ་གྱི་གསར་འགྱུར་རིག་པ་དང་གསར་འགྱུར་དྲིལ་བསྒྲགས་ཀྱི་འཕེལ་རྒྱས་ཁྲོད་དངོས་སུ་ཟབ་ཞུགས་བྱེད་མཁན་ཞིག་དང་ལག་ལེན་བྱེད་མཁན་ཞིག །དེར་སྐུལ་འདེད་གཏོང་མཁན་ཞིག་ཡིན་ཞེས་བཤད་ཀྱང་མི་ཆོག་པ་མེད། ང་རང་གི་མི་ཚེ་བོད་སྐད་ཡིག་གི་གསར་འགྱུར་ལ་འབད་པའི་གཏམ་རྒྱུད་དེ་ཇི་ལྟར་འགོ་བརྩམས་པའི་ཚུལ་ཅུང་ཙམ་བཤད་ན། ང་སྐྱེས་ས་ནི་མདོ་སྨད་ས་ཡི་ཐིག་ལེ་ཤར་ཕྱོགས་དུང་རི་དཀར་པོའི་འདབས་རོལ་དུ་ཆགས་པའི་ཨ་སྟོང་ཡུལ་ཟེར་ས་དེ་རེད། བྱམས་ལྡན་ཕ་མའི་བཀའ་དྲིན་ལས་རིག་གནས་སྦྱོང་བའི་སྐལ་པ་ལྡན་པས། ཕ་མའི་རེ་བ་དང་རང་གི་ཕུགས་འདུན་ཁུར་ནས་ས་གནས་དེ་གའི་སློབ་ཆུང་དུ་བསྐྱོད། སློབ་ཆུང་མཐར་ཕྱིན་རྗེས་ཕ་ཡུལ་དང་ཁ་ཐག་ཅུང་རིང་བའི་ཟུང་ཆུ་རྫོང་བོད་ཡིག་སློབ་འབྲིང་དུ་དམའ་འབྲིང་བཏོན། དམའ་བྲིང་མཐར་ཕྱིན་རྗེས་ངས་མུ་མཐུད་དུ་རིག་གནས་སྦྱོང་བའི་འདུན་པ་དེ་གཏན་ནས་འདོར་མ་མྱོང་བར། ཕུགས་བསམ་གྱི་གོམ་ཁ་རྒྱང་རིང་མདོ་སྟོད་རྟའུ་ཡི་ཕྱོགས་སུ་སྤོས་པ་ཡིན། སྐབས་དེ་འདྲ་ཞིག་ལ་མཚོན་ན་འགྲིམ་འགྲུལ་སྟབས་མི་བདེ་ཁར་འཚོ་བའི་ཆུ་ཚད་མཐོན་པོ་མེད་པས། རིག་གནས་སྦྱོང་རྒྱུ་དེ་ད་ལྟ་དང་ཁྱོན་ནས་མི་འདྲ་བར་ཤིན་ཏུ་དཀའ་ཁག་ཡོད་མོད། ངས་དཀའ་ངལ་དེ་དག་ཁྱད་དུ་བསལ་ནས་རྒྱང་ཐག་རིང་བའི་ཡུལ་གྲུ་དེར་སི་ཁྲོན་ཞིང་ཆེན་བོད་ཡིག་སློབ་གྲྭ་ཞེས་རིག་པའི་སློབ་བུ་བགྲང་ལས་འདས་པ་སྐྱོང་བའི་དགའ་ཚལ་ཡོད་པར། དེར་འཁོད་སློབ་དཔོན་དག་ནི་ཡང་བོད་རིག་པའི་གནས་ཀུན་ལ་བྱང་ཆུད་པ་ཤ་སྟག་དུ་འདུག་པ་ལགས་ན། སྒོ་གསུམ་གྱི་གུས་པ་ཆེན་པོས་གནས་དེར་སྒྲ་དང་ཚད་མ། ནང་དོན་རིག་པ། ཆབ་སྲིད། རྒྱ་ཡིག་དང་རྩིས་རིག་སོགས་སློབ་གླིང་གཞུང་གི་བཀོད་སྒྲིག་ལྟར་དང་དེ་མིན་རང་ཉིད་ཀྱི་འཆར་གཞི་ནང་བཞིན་རིག་པའི་གནས་དེ་དག་ལ་བརྩོན་པ་ཆེན་པོས་བསྟེན་ནས་སློབ་གཉེར་བྱས་པ་ཡིན། དུས་ཚོད་ནི་མི་སྡོད་རྟག་དུ་འགྲོ་བས་ངའི་ཡུལ་དེའི་སློབ་གཉེར་གྱི་རིམ་པ་ཡང་རྫོགས་སོང་། ཡིན་ན་ཡང་རང་གི་སྦྱངས་འབྲས་ལ་ཡིད་གཏན་ནས་ཚིམ་མ་མྱོང་། དུས་ཚོད་མང་ཆེ་བར་གུང་གསེང་སྐབས་ཀྱང་ཁྱིམ་ལ་མ་ལོག་པར་ཕྱི་རོལ་ནས་དགེ་རྒན་བཙལ་ནས་མུ་མཐུད་དུ་སློབ་གྲྭ་ནས་སྦྱངས་མ་ཐུབ་པ་དང་སྦྱངས་ཀྱང་དག་མ་ཐོན་པ་ལ་བསྐྱར་དུ་སློབ་སྦྱོང་བྱས་པ་ཡིན། ཕྱིས་སུ་སི་ཁྲོན་ཞིང་ཆེན་བོད་ཡིག་སློབ་གྲྭ་ནས་མཐར་ཕྱིན་རྗེས་ངས་རང་ཉིད་རིག་གནས་དྲིལ་བསྒྲགས་པ་ཞིག་བྱེད་པའི་ཕུགས་བསམ་མངོན་འགྱུར་བྱེད་ཆེད། རྔ་བ་བོད་རིགས་ཆའང་རིགས་རང་སྐྱོང་ཁུལ་ཚགས་པར་ཁང་དུ་ལས་བྱེད་པར་རྒྱུགས་སྤྲད་པ་ཡིན། མི་ཞིག་གི་བདེ་སྐྱིད་ཆེས་ཆེ་ཤོས་དེ་ནི་རང་གི་ཕུགས་འདུན་མངོན་འགྱུར་བྱུང་བ་དེ་རེད། སྐབས་དེར་རྔ་བ་བོད་རིགས་ཆའང་རིགས་རང་སྐྱོང་ཁུལ་ཚགས་པར་ཁང་དུ་རྒྱུགས་འཕྲོད་པ་དེས་ངའི་ཕྱིས་ཀྱི་མི་ཚེ་ལ་ཡང་འགྱུར་བ་ཐེབས་ཡོད། སྐབས་དེ་དུས་མཚོན་ན་ང་ནི་གཞོན་སེམས་ཀྱི་སྣང་བ་རྒོད་པའི་བོད་སྐད་ཀྱི་གསར་འགོད་ལས་སྒྲུབ་པ་ཞིག་རེད། དུས་དེ་ནས་བཟུང་ད་ལ་ཐུག་གི་བར་ལས་དོན་དེར་འཇུས་ནས་མི་ལོ་སུམ་ཅུ་ལྷག་ཕྱིན་སོང་། མི་ལོ་སུམ་ཅུ་དེ་ཡང་གྲུབ་འབྲས་ཀྱིས་བསྟམས་པ་ཞིག་བྱུང་སོང་སྙམ་ཡོད།
གསར་འགོད་པ། མི་ལོ་སུམ་ཅུ་ལྷག་ཟེར་ན་ཐུང་ཐུང་ཞིག་མ་རེད། རྒན་ལགས་ནས་མི་ལོ་སུམ་ཅུའི་རིང་གསར་འགྱུར་བརྒྱུད་བསྒྲགས་ཀྱི་སྐོར་ལ་འཚོལ་ཞིབ་དང་ལག་ལེན་ཇི་ལྟར་བྱས་པ་ཡིན།
ཀོ་དོ་མཁན་པོ། མི་ལོ་སུམ་ཅུ་ལྷག་གི་གསར་འགོད་དྲིལ་བསྒྲགས་ཀྱི་ལས་དོན་ཁྲོད། ང་ནི་གསར་འགོད་པ་བྱེད་མྱོང་ལ་རྩོམ་སྒྲིག་པ་ཡང་བྱེད་མྱོང་། དེ་བཞིན་ལོ་ཙཱ་པ་བྱེད་མྱོང་ལ་རྩོམ་པ་པོའང་བྱེད་མྱོང་བར་མ་ཟད། བརྙན་ལེན་པ་བྱེད་མྱོང་ལ་སྒྲིག་སྦྱོར་པ་ཡང་བྱེད་མྱོང་། ངས་རང་གི་ཐེགས་པར་དཀའ་བའི་ཚེ་སྲོག་གི་དོན་སྙིང་དེ་བརྩོན་ལེན་བྱེད་པར་མི་ཚེའི་ལམ་བུ་འདི་འདྲ་ཞིག་བདམས་པ་ཡིན། དེ་ནི་བོད་སྐད་ཀྱི་གསར་འགྱུར་རིག་པ་དང་གསར་འགྱུར་ལོ་ཙཱ་རིག་པའི་ལག་ལེན་དང་འཚོལ་ཞིབ་ཀྱི་ལམ་བུ་དེ་ཡིན། སྔ་ཕྱིར་རྔ་བའི་ཚགས་པར་གྱི་གསར་འགོད་པ་དང་རྩོམ་སྒྲིག་པ། གསར་འགྱུར་ལོ་ཙཱ་པ་བཅས་ཀྱི་ལས་ཀ་སྒྲུབ་མྱོང་བ་དང་། མི་རིགས་ས་ཁུལ་གྱི་དོན་དངོས་ལ་གཞི་བཙུགས་ནས་ཏང་གི་སྐད་སྒྲ་དང་ཕ་ཡུལ་མཐོ་སྒང་གི་གཏམ་རྒྱུད་ཡི་གེའི་ཕྲེང་བར་བརྒྱུས་ནས། སྡེབ་ལེགས་བརྗོད་བདེ་ཡི་གསར་འགྱུར་རྩོམ་ཡིག་མང་པོ་ཀློག་པ་པོའི་མཐོང་ལམ་དུ་བསྟར། གསར་འགྱུར་རིག་པ་ནི་དོན་དངོས་སུ་ཅི་ཞིག་ཡིན་ནམ། ལོ་ན་གཞོན་པའི་དུས་སུ་ངས་འདིའི་ཕྱོགས་ལ་བསམ་བློ་གཏོང་བཞིན་དེང་རབས་ཀྱི་གསར་འགྱུར་རིག་པར་སློབ་སྦྱོང་བྱས་པ་དང་། སྔར་རང་རེའི་བོད་སྐད་ཡིག་གི་ལམ་ནས་གསར་འགྱུར་སྤེལ་མྱོང་ངམ། རང་རེའི་བོད་རིག་པའི་ཁྱབ་ཁོངས་སུ་གསར་འགྱུར་རིག་པ་དར་མྱོང་ངམ། ངའི་འཚོལ་ཞིབ་དང་བསམ་གཞིག་གི་ཆུ་རྒྱུན་རིང་མོ་དེ་ནམ་ཡང་ཆད་མ་མྱོང་། ཡིན་ཡང་ཀུན་གྱི་མིག་ལ་རི་རབ་བཞིན་ཐོགས་ཡོང་རྒྱུའི་གྲུབ་འབྲས་ཞིག་སྟོན་རྒྱུ་མེད་མོད། སྔ་ཕྱིར་རྔ་བའི་བོད་རིག་པ་དང་བོད་ལྗོངས་མི་དམངས་ཉིན་རེའི་ཚགས་པར་སོགས་སུ། བོད་སྐད་གསར་འགྱུར་རིག་པའི་སྐོར་གྱི་དཔྱད་རྩོམ་མང་པོ་བཀོད་པར། རྒྱ་ཆེའི་ཀློག་པ་པོ་རྣམས་ཀྱིས་དགའ་བསུ་དང་རང་གི་ལས་ཀའི་ལག་ལེན་ཁྲོད་དངོས་སྤྱོད་བྱེད་ཐུབ་པའི་ཕན་འབྲས་ཐོན། བོད་སྐད་གསར་འགྱུར་དྲིལ་བསྒྲགས་དང་རིག་གནས་ཁྱབ་སྤེལ་ལ་དམིགས་ནས་2012ལོ་ནས་བཟུང་འཕྲིན་སྦྱོར་གསར་པའི་འཕྲིན་སྟེགས་རྒྱ་བསྐྱེད་འཛུགས་སྐྲུན་བྱེད་པར་འབད་པ་བྱས་མཐར། རྔ་བའི་གསར་འགྱུར་དྲ་བ་དང་སྐད་འཕྲིན་སྤྱི་སྟེགས་རྔ་སྒྲ། རྔ་བའི་བོད་སྐད་ཁ་པར་གསར་འགྱུར་སོགས་འཕྲིན་སྟེགས་མང་པོ་གསར་འཛུགས་དང་། སྐད་གཉིས་སྨྲ་བའི་སློབ་ཆེན་པ་མང་པོ་ལས་ཁུངས་སུ་བསྡུ་ལེན་བྱས་པས། སྔར་གྱི་སྲོལ་རྒྱུན་འཕྲིན་སྦྱོར་དེ་དུས་རབས་གསར་པའི་འཕེལ་ཕྱོགས་སུ་བསྐྱོད། ཏང་གི་སྐད་སྒྲ་དང་མི་རིགས་རིག་གནས་ཁྱབ་སྤེལ་གྱི་བྱ་གཞག་ལ་གནམ་ས་བླ་འོག་བརྗེས་པ་ལྟ་བུའི་འགྱུར་ལྡོག་གསར་པ་བྱུང་། སྤྱིར་བཏང་གི་ལས་གནས་སུ་སྤྱིར་བཏང་མིན་པའི་ལས་དོན་འདི་ལྟར་བསྒྲུབས་པས། གསར་འགྱུར་ལས་སྒྲུབ་པ་ཞིག་གི་ཆོད་སེམས་དང་མཐོང་རྒྱ་དེ་ལས་དོན་གྱི་གྲུབ་འབྲས་ཀྱིས་བདེན་དཔང་བྱེད་ཅི་ཐུབ་བྱས་ཡོད།
གསར་འགོད་པ། རྒན་ལགས་ཀྱིས་མི་ཚེ་གཅིག་ལ་ལས་རྐང་གཅིག་ནས་ལས་རིགས་གཅིག་རྒྱུན་སྐྱོང་འབད་བརྩོན་བྱེད་པའི་སྒུལ་ཤུགས་དེ་གང་ནས་བྱུང་བ་རེད།
ཀོ་དོ་མཁན་པོ། ཕ་ཡུལ་གངས་ལྗོངས་ནས་སྐྱེས་ཤིང་ལང་ཚོ་གངས་ལྗོངས་ལ་ཕུལ་བའི་ང་ལ་མཚོན་ན། རྒྱལ་ཕྱི་ནང་གི་རིག་གནས་ཆ་འཕྲིན་མང་པོ་རང་གི་བོད་སྐད་ཀྱི་ལམ་ནས་རྒྱ་ཆེའི་མང་ཚོགས་ལ་ཁྱབ་སྤེལ་བྱ་རྒྱུ་དང་རང་མི་རིགས་ཀྱི་སྲོལ་རྒྱུན་རིག་གནས་གཙོས་རིག་གནས་སྣ་མང་རྒྱལ་ཕྱི་ནང་དུ་དྲིལ་བསྒྲགས་བྱས་ནས། རང་གི་སྐད་དང་ཡི་གེ་མི་རིགས་རིག་གནས་འཛིན་སྐྱོང་སྤེལ་གསུམ་བྱ་རྒྱུ་དེ་ངའི་ལས་དོན་ཡོད་ཚད་ཀྱི་སྒུལ་ཤུགས་གཙོ་ཆེ་བ་རེད། ལོ་མང་པོའི་རིང་། འབད་པ་ལྷོད་མེད་བྱས་ནས་གསར་འགྱུར་གྱི་འཐབ་ས་དང་པོར་བསྐྱོད་ཅིང་། ཕྱུགས་ར་དང་རྣང་ཞིང་།
གཞིས་ཁུལ་དང་གྲོང་སྡེ་སོགས་བརྒལ་ནས་གཞི་རིམ་གྱི་རྒྱ་ཆེའི་མང་ཚོགས་ཀྱི་གམ་དུ་བཅར་ཞིང་། མི་སེར་གྱི་དོན་དངོས་གནས་ཚུལ་བརྙན་དང་ཡི་གེར་བཀོད་ཅིང་ཏང་གི་སྲིད་ཇུས་དགོངས་དོན་གཞི་རིམ་ལ་བསྒྲགས། མི་དམངས་ཀྱི་སེམས་སུ་ཏང་གི་གསར་འགོད་པའི་སྣང་བརྙན་ཡག་པོ་བཞེངས་སྐྲུན་བྱས་ཡོད་པས་རང་དང་འདྲིས་ཆ་ཡོད་པའི་མི་མང་པོ་ཞིག་གིས་བསྟོད་པའི་མཐེ་བོ་ཡང་ཡང་བསྒྲེངས་མྱོང་། རྔ་བའི་ས་གཞི་ཆེན་པོ་འདིར་ང་ནི་ཏང་དང་མི་དམངས་བར་གྱི་ཟམ་པ་དེ་ཡིན་ཕྱིར། དུས་ཚོད་སྐར་ཆ་གཅིག་དང་ལས་ཀ་མཐེ་བོང་ཙམ་ལ་ཡང་སྣང་ཆུང་དང་འགན་མི་འཁུར་བའི་རྣམ་འགྱུར་འཛིན་མྱོང་མེད་དེ། དུས་རྟག་དུ་གསར་འགྱུར་དང་འབྲེལ་བའི་ལས་གང་ཞིག་ཡིན་ཡང་བསྲེགས་བཅད་བརྡར་གསུམ་གྱིས་འཇུག་པར་བྱས་པས། ལས་གྲོགས་རྣམས་ཀྱིས་རྒྱུན་དུ་ངས་ཞུ་དག་བྱས་ན་གནད་དོན་མི་རྙེད་པ་མི་སྲིད་ཅེས་ཀུ་རེ་དང་དོན་གཏམ་འདྲེས་མའི་སྐད་ཆ་བཤད། དེ་ཡང་ལོས་ཡིན། མི་ལོ་སུམ་ཅུ་ལྷག་ལ་ལས་རྐང་གཅིག་བརྟན་སྲུང་བྱ་རྒྱུ་དེ་ལས་སླ་མོ་ཞིག་ག་ལ་ཡིན། དེ་ལས་ཀྱང་ལས་གཅིག་རྐང་གཅིག་ནས་ལས་དོན་མང་པོ་ཧུར་ཐག་གིས་བསྒྲུབ་རྒྱུ་དེ་ཤིན་ཏུ་དཀའ་བས། གཟབ་ནན་གྱི་རྣམ་འགྱུར་དང་འགྱུར་མེད་ཀྱི་བརྩོན་སེམས་མེད་ན་མཐའ་འཁྱོངས་དཀའ། ཉེ་བའི་ལོ་འགའི་རིང་ངས་རྔ་བ་ཁུལ་གསར་འགྱུར་འཕྲིན་སྦྱོར་ལྟེ་གནས་ཀྱི་སྤྱིའི་བཟོ་སྐྲུན་པའི་འགན་ཁུར་བ་ནས་བཟུང་། རྔ་བའི་ཉིན་རེའི་ཚགས་པར་དང་སི་ཁྲོན་མི་རིགས་སློབ་གསོ་ཚགས་པར། རྔ་བའི་གསར་འགྱུར་སོགས་ཀྱི་ནང་དོན་ལ་ཉིན་རེ་བཞིན་ཞུ་དག་བྱ་དགོས་པས། ཡིག་གྲངས་མང་ལ་ནང་དོན་རྒྱ་ཆེ་བ། འཕྲིན་སྟེགས་ཀྱི་རིགས་མང་བ་བཅས་ཀྱི་ལས་འགན་ལྗིད་པོ་འཁུར་དགོས་ཁར། ལས་ཁུངས་སྤྱིའི་གཞུང་སྒྲུབ་དོ་དམ་གྱི་ལས་ཀ་ཡང་སྒྲུབ་དགོས་པས། ལས་ཀར་སྤྲོ་བ་དང་གཟབ་ནན། བརྩོན་སེམས་མེད་ན་ནོར་འཁྲུལ་འབྱུང་བར་གདོན་མི་ཟ་བས་རྟག་པར་སེམས་ལྷོད་པོའི་ངང་ལས་ཀར་འཇུག་ཅིང་། ལས་ཀར་ཞུགས་པ་ཙམ་ཡང་མ་ཡིན་པར་གཟབ་ནན་དང་བརྩོན་སེམས་ཀྱིས་བསྒྲུབས། ཞིབ་ཚགས་པའི་གསར་འགྱུར་གསར་རྩོམ་དང་ལོ་ཙཱར་བརྟེན་ནས་རྒྱ་ཆེའི་ཀློག་པ་པོར་བསམ་པའི་རྒྱགས་ཕྱེ་གྱ་ནོམ་པ་འབུལ་བར་འབད་པ་བྱེད་བཞིན་ཡོད།
གསར་འགོད་པ། གོ་ཐོས་ལྟར་ན་རྒན་ལགས་ནས་གསར་འགྱུར་རིག་པའི་ཞིབ་འཇུག་ཐད་ལ་ཡང་གྲུབ་འབྲས་མང་པོ་བླངས་འདུག་ཟེར། དེའི་སྐོར་ནས་ཁ་བརྡ་ཞིག་བྱེད་རོགས།
ཀོ་དོ་མཁན་པོ། ཞིབ་འཇུག་ཅེས་བཤད་མི་སྤོབས་མོད། གོང་དུ་བརྗོད་པ་ནང་བཞིན་རང་གི་ནུས་ཚོད་ཀྱིས་ད་ལྟའི་བར་བསམ་གཞིགས་མང་པོ་བཏང་བ་ཡིན། མ་ཟད་མི་སྒེར་གྱི་གསར་འགྱུར་རྩོམ་ཡིག་བདམས་བསྒྲིགས《དུས་རབས་ཀྱི་རྐང་སྒྲ》དང་ལོ་ཙཱའི་སྐོར་གྱི་བསྒྱུར་རྩོམ《ལས་དབང་》སོགས་དཔར་སྐྲུན་འགྲེམ་སྤེལ་བྱེད་མྱོང་། དེ་མིན《བོད་ཡིག་ཚགས་པར་འཕེལ་རྒྱས་ཁྲོད་ཀྱི་གནད་དོན་འགའ་དང་ཐབས་ཤེས་སྐོར་གླེང་བ》དང་《གསར་འགྱུར་དང་ཚགས་པར་ཞེས་པའི་ཐ་སྙད་གཉིས་ཀ་གཅིག་ཏུ་སྤྱོད་ཆོག་མིན་སྐོར་ལ་རགས་ཙམ་དཔྱད་པ》《གསར་འགྱུར་གྱི་མགོ་བརྗོད་འབྲི་ཚུལ་སྐོར་ཆེ་ལོང་ཙམ་གླེང་བ》སོགས་ཀྱི་དཔྱད་འབྲས་སྐོར་ཞིག་ཀྱང་བོད་འབྲེལ་ས་ཁུལ་གྱི་དུས་དེབ་དང་ཚགས་པར་སོགས་སུ་བཀོད་མྱོང་། འདི་དག་ཡིན་ན་རང་གི་ལས་འགན་གྱི་ཞོར་ནས་འབད་པའི་གསར་འགྱུར་རིག་པའི་སྐོར་ལ་བསམ་གཞིག་ཅུང་ཙམ་བཏང་བའི་འབྲས་བུ་ཡིན་པས། ཀློག་པ་པོའི་སྤྱན་ལམ་དུ་བསྟར་ཡོད། ཉེ་ལམ་ལ་མཚོན་ནས་བཤད་ན《དེང་རབས་ནུབ་ཕྱོགས་རྒྱལ་ཁབ་ཀྱི་ཆབ་སྲིད་ལམ་ལུགས》ཞེས་པའི་ཆབ་སྲིད་རིག་པའི་སྐོར་གྱི་དཔེ་ཆ་གཅིག་བསྒྱུར་ཚར་ནས་དཔར་སྐྲུན་བྱ་བར་སྒུག་ཡོད། མདོར་ན་མི་ཚེ་ནི་ཐུང་ཐུང་རེད། ཚད་ཡོད་པའི་མི་ཚེར་ཚད་མེད་པའི་ལས་དོན་བསྒྲུབ་རྒྱུ་དེ་ཤིན་ཏུ་ཁག་པོ་རེད། ཡིན་ཡང་བོད་སྐད་གསར་འགྱུར་དྲིལ་བསྒྲགས་ལ་འབད་པའི་མི་ལོ་སུམ་ཅུ་ལྷག་ནི་གཟབ་ནན་དང་འགན་ཁུར། རྒྱུན་འཁྱོངས་དང་སྤོབས་པ་ཆེན་པོས་བསྐྱལ་ཡོང་བ་ཡིན་ལ། བོད་སྐད་གསར་འགྱུར་དྲིལ་བསྒྲགས་ཀྱི་ལས་དོན་འདིས་ཀྱང་ངའི་མི་ལོ་སུམ་ཅུའི་འཚོ་བར་བསུབ་ཐབས་བྲལ་བའི་གཏམ་རྒྱུད་མང་པོ་དང་འཚོ་བའི་ཁ་དོག་གསར་པ་བསྣན་ཡོད་པས། གྲུབ་འབྲས་ཞེས་ཆེན་པོ་ཞིག་སྟོན་རྒྱུ་མེད་ཀྱང་རང་ཉིད་ལ་གནོང་འགྱོད་མེད་པ་ཞིག་བྱས་ཡོད། །