བོད་ཀྱི་གསར་སྐྱེས་གཞས་པ་ཡེ་ཤེས་མེ་འབར་ལ་བཅར་འདྲི་བྱས་པ།

དེ་ཡང་གངས་ཅན་བོད་ཀྱི་གླུ་གཞས་སྒྱུ་རྩལ་ནི་བོད་མི་རིགས་ཀྱི་ལོ་རྒྱུས་དང་། རིག་གནས། འཚོ་བའི་གོམས་གཤིས་བཅས་གཅིག་ཏུ་བསྡུས་པའི་སྒྱུ་རྩལ་གྱི་རྣམ་པ་ཞིག་རེད། བོད་ཀྱི་གླུ་གཞས་ལ་ས་ཁུལ་དང་རིག་གནས་མི་འདྲ་བའི་དབང་གིས་ཁྱད་ཆོས་དང་རྣམ་པ་ཡང་མི་འདྲ་བ་མང་པོ་ཡོད་དེ། དཔེར་ན། དབུས་གཙང་གི་ནང་མ་སྟོད་གཞས་དང་། ཁམས་པའི་གླུ་གཞས། ཨ་མདོའི་ལ་གཞས་སོགས་མང་པོ་ཡོད། དེ་དག་གི་ནང་དོན་ཕུན་སུམ་ཚོགས་པ་དང་། རང་བྱུང་ཁམས་ཀྱི་མཛེས་སྡུག །ལོ་རྒྱུས་ཀྱི་བྱུང་བ། དགའ་སྐྱོ་ཆགས་སྡང་གི་ཚོར་བ། དེ་བཞིན་ཆོས་ལུགས་ཀྱི་དད་མོས་སོགས་མཚོན་པར་བྱེད་པས། དེ་ནི་བོད་མི་རིགས་ཀྱི་སེམས་ཁམས་དང་འཚོ་བ་མཚོན་པའི་སྒྱུ་རྩལ་ཞིག་རེད། དེང་གི་ཆར་གསར་སྐྱེས་གཞས་པ་མང་པོས་བོད་ཀྱི་སྲོལ་རྒྱུན་གླུ་གཞས་སྒྱུ་རྩལ་དེ་དེང་རབས་ཀྱི་རོལ་ཆ་དང་ཟུང་འབྲེལ་བྱས་ཏེ་གསར་གཏོད་མང་པོ་བྱེད་བཞིན་ཡོད་ལ། དེ་ནི་བོད་ཀྱི་རིག་གནས་རྒྱུན་འཛིན་དང་དར་སྤེལ་གཏོང་བའི་ཐབས་ལམ་གལ་ཆེན་ཞིག་ཏུ་གྱུར་ཡོད། ཐེངས་འདིའི་ལེ་ཚན་དུ་བོད་ཀྱི་གསར་སྐྱེས་གཞས་པ་ཡེ་ཤེས་མེ་འབར་ལགས་ལ་བཅར་འདྲི་བྱས་ཏེ། ཁོང་གི་མི་ཚེའི་སྒྱུ་རྩལ་ལམ་བུ་དང་བོད་ཀྱི་གླུ་གཞས་སྒྱུ་རྩལ་གྱི་མ་འོངས་པའི་ཁ་ཕྱོགས་སོགས་ཀྱི་ཐད་ནས་ཁ་བརྡ་ལྷུག་པོར་བྱས་ཡོད། ཡེ་ཤེས་མེ་འབར་ནི་ཕ་ཡུལ་སི་ཁྲོན་དཀར་མཛེས་ནས་ཡིན་པ་དང་། ཁོ་རང་ལོ་ན་ཆུང་དུས་ནས་གླུ་གཞས་སྒྱུ་རྩལ་ལ་དགའ་ཞེན་དྲག་པོ་ཡོད་ཕྱིར། ཕ་ཡུལ་གྱི་རྩྭ་ཐང་ནས་ལམ་ལ་ཆས་ཏེ་གྲོང་ཁྱེར་ཆེན་པོར་གླུ་གཞས་སྒྱུ་རྩལ་སློབ་སྦྱོང་གི་ལས་ལ་འབད་པ་ལྷུར་བླངས་པ་དང་། ཁོའི་གཞན་དྲིང་མི་འཇོག་པའི་ལང་ཚོའི་གཟི་དཔལ་དང་ཐུན་མོང་མ་ཡིན་པའི་སྐད་ངག་གི་མཐུན་རྐྱེན་ཡོངས་སུ་འཛོམས་པའི་ཁར། སྔ་རྗེས་སུ་གླུ་པ་གྲགས་ཅན་ཡ་དུང་སོགས་ཀྱི་མདུན་དུ་བཅར་ནས་གླུ་གཞས་སྒྱུ་རྩལ་ལ་སྦྱངས་པ་མི་དམན་པ་བྱས་ཤིང་། 2014ལོར་ཧྲན་ཞི་བརྙན་འཕྲིན་གྱི《རྨ་ཆུའི་གླུ་སྐད་སྙན་མོ》ཞེས་པའི་འགྲན་སྡུར་ལས་རྒྱལ་ཡོངས་ཀྱི་ཨང་དང་པོ་དང་།

2015ལོར་ཧོ་པེ་བརྙན་འཕྲིན་གྱི《ཀྲུང་ཧྭའི་དམངས་གླུ་སྙན་མོ》ཞེས་པའི་འགྲན་སྡུར་ལས་རྒྱལ་ཡོངས་ཀྱི་ཨང་དང་པོ་ཐོབ་པ་སོགས་རྒྱལ་ནང་གི་གར་སྟེགས་ཆེན་པོ་མང་པོ་འགྲིམས་ནས་གྲུབ་འབྲས་གཡུར་དུ་ཟ་བ་བླངས་ཡོད་ལ། ཁོང་གི་གླུ་གཞས་སྒྱུ་རྩལ་གྱི་བརྩམས་ཆོས་ལ་ཆེད་སྒྲིག《འབྲོག་པ》དང་། དེ་མིན《རྨི་ལམ་གྱི་བུ་མོ 》《གནས་སྐོར།》《གངས་སྒྲོལ་མ》སོགས་བརྩམས་ཆོས་མང་པོར་རྒྱ་ཆེའི་མང་ཚོགས་ཀྱི་དགའ་བསུ་བླ་མེད་ཐོབ་ཀྱི་ཡོད།

གསར་འགོད་པ། གསར་སྐྱེས་གཞས་པ་ཡེ་ཤེས་མེ་འབར་ལགས། ཐོག་མར་རང་གི་འཚར་ལོངས་ཀྱི་བརྒྱུད་རིམ་མདོར་བསྡུས་ཤིག་གསུང་རོགས།

ཡེ་ཤེས་མེ་འབར། རྒྱལ་ཕྱི་ནང་གི་རིགས་མཐུན་སྤུན་ཟླ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ། ངའི་མིང་ལ་ཡེ་ཤེས་མེ་འབར་ཟེར། ང་རང་ནི་ཁོད་ཡངས་ཤིང་མཛེས་སྡུག་རྣམ་པར་བཀྲ་བའི་འབྲོག་ཁུལ་ཞིག་སྟེ་དཀར་མཛེས་ཁུལ་བྲག་འགོ་རྫོང་གཙང་སྟོད་རྩྭ་ཐང་ནས་འཚར་ལོངས་བྱུང་བ་ཡིན། བྱིས་པའི་དུས་སུ་རང་ས་གནས་དེ་གའི་སློབ་ཆུང་འགྲིམས་པ་དང་། དེ་ནས་མུ་མཐུད་དུ་བྲག་འགོ་རྫོང་སློབ་འབྲིང་དང་ཁྲུང་ཆིང་གླུ་དབྱངས་སྒྱུ་རྩལ་སློབ་ཆེན་བཅས་བཏོན་ནས་སློབ་མཐར་ཕྱིན་པ་ཡིན།

གསར་འགོད་པ། དེ་ནས་ཁྱེད་ཉིད་གླུ་གཞས་སྒྱུ་རྩལ་གྱི་ལམ་ཁར་ཇི་ལྟར་ཞུགས་ཚུལ་དང་། སྒྱུ་རྩལ་གྱི་ལམ་ཁ་ནས་འཕྲད་མྱོང་བའི་བརྗེད་དཀའ་བའི་དོན་དག་དང་མྱོང་བ་མདོར་བསྡུས་ཤིག་གསུང་རོགས།

ཡེ་ཤེས་མེ་འབར། སྤྱིར་ང་རང་ཆུང་ཆུང་ཡིན་པའི་དུས་ནས་གླུ་དབྱངས་ལེན་རྒྱུ་ལ་ཤིན་ཏུ་དགའ་མཁན་ཞིག་ཡིན། དེ་ཡང་གཙོ་བོ་ང་རང་གི་བཀའ་དྲིན་ཅན་གྱི་ཨ་ཕས་བཞག་པའི་བག་ཆགས་སམ་ཤུགས་རྐྱེན་ཐེབས་པ་ཞིག་ཏན་ཏན་ཡིན་ངེས། རྒྱུ་མཚན་ནི་ངའི་ཨ་ཕ་ཁོ་རང་ཉིད་འབྲོག་གླུ་ལེན་རྒྱུ་དང་གླུ་དབྱངས་ལེན་པར་ཧ་ཅང་དགའ་མཁན་ཞིག་ཡིན། ཆེས་གསལ་ཆ་ཡོད་པ་ཞིག་ལ་ཐེངས་ཤིག་ལ་ཨ་ཕ་ལགས་ཀྱིས་ཕྱི་རོལ་ནས་སྒྲ་སྡུད་འཕྲུལ་ཆས་ཤིག་ཉོས་ནས་ཁྱིམ་དུ་སླེབས་སོང་། ཉིན་དེ་ནས་བཟུང་སྟེ་ང་རང་ལྷག་ཏུ་དགའ་སྤྲོ་ཆེན་པོ་ཞིག་སྐྱེས་ཤིང་། རང་ཉིད་ཀྱི་དགའ་ཕྱོགས་དང་ཕུགས་འདུན་ལའང་འོད་སྣང་གསར་པ་ཞིག་བསྐྲུན་སོང་། རྒྱུན་པར་སློབ་གྲྭ་ནས་ཕྱིར་ཁྱིམ་དུ་ལོག་སྐབས་སྒྲ་སྡུད་འཕྲུལ་ཆས་ལ་ཉན་པ་དང་། སློབ་ཆུང་གི་དྲུག་གཅིག་བྱིས་པའི་དུས་ཆེན་དང་ཕ་ཡུལ་གྱི་སྤྱི་ཟླ་བདུན་པའི་བསང་མཆོད་དུས་སྐབས་བཅས་ལ་ནམ་རྒྱུན་གླུ་དབྱངས་ལེན་གྱི་ཡོད། རིམ་བཞིན་སློབ་འབྲིང་དུ་སླེབས་སྐབས་རྫོང་རིམ་པའི་གླུ་དབྱངས་འགྲན་སྡུར་སོགས་སུ་ནམ་རྒྱུན་ཞུགས་ཤིང་། དེ་ནས་རིམ་བཞིན་རྫོང་རིམ་པའི་ཚབ་བྱས་ནས་དཀར་མཛེས་ཁུལ་དུ་འགྲན་སྡུར་ལ་ཕྱིན་པ་བཅས་གླུ་དབྱངས་སྒྱུ་རྩལ་གྱི་ལམ་ཁ་འདི་བདམས་པ་ཡིན་ཟེར་ཆོག །སྤྱིར་བཏང་དུ་བྱ་བ་ལས་ཀ་གང་ཞིག་བྱས་ན་དེ་ལ་དཀའ་ཁག་མེད་པ་ཞིག་དཀོན་མོ་རེད། འཇིག་རྟེན་གཏམ་དཔེ་ལ། དཀའ་བའི་ལས་ཤིག་མ་བསྒྲུབ་ན། ཞིམ་པོའི་ཟས་ཤིག་མི་རག་ཅེས་པ་ལྟར། ལྷག་ཏུ་ང་རང་ལ་མཚོན་ན་དཀའ་ཁག་ཧ་ཅང་མང་པོ་ཞིག་ལ་འཕྲད་མྱངས། རྒྱུ་མཚན་ནི་ང་རང་གིས་གླུ་དབྱངས་ཀྱི་ལམ་ཁ་འདི་བདམས་པའི་དུས་ཚོད་སྔ་དྲག་པའམ། ཡང་ན་སྤྱི་ཚོགས་སུ་ཞུགས་ནས་གླུ་དབྱངས་ཀྱི་ལམ་ཁ་འགྲིམ་པའི་དུས་ཚོད་མགྱོགས་ཆེ་བ། ཡང་ན་སྐབས་དེར་ལོ་ན་ཆུང་དྲག་པ། ནང་ལོགས་སོགས་སུ་འགྲོ་སྐབས་སྐད་རིགས་མི་གཅིག་པ། མ་ཟད་སྐབས་དེར་བོད་གླུ་ལ་ཉན་མཁན་ཡང་དཀོན་པ། ང་རང་ལ་སྤྱི་ཚོགས་ཉམས་མྱོང་མེད་པ། ཁོར་ཡུག་ཏུ་གཉེན་ཉེ་དང་གྲོགས་པོ་མེད་པ་སོགས་དཀའ་ཁག་རབ་དང་རིམ་པ་ཞིག་བརྒྱུད་ནས་ཡོང་བ་ཡིན། སྐབས་རེར་གླུ་དབྱངས་ལེན་ས་རྩ་བ་ནས་མི་རྙེད་པར་ཞིང་ཁྱིམ་གླིང་ག་སོགས་སུ་སོང་ནས་ཞབས་ཞུའི་ལས་ཀ་བསྒྲུབས་ནས་ཀྱང་ལོ་ཕྱེད་ཡས་མས་ལ་འདུག་མྱངས། དེ་ལས་དུས་ཆེན་སོགས་སུ་གླུ་དབྱངས་ལེན་པའི་གོ་སྐབས་ཉུང་ཙམ་རེ་ལོན་ཞིང་དེ་ལས་མི་སྣ་ཡང་རེ་འགའ་རེ་ངོ་ཤེས་ཤིང་། དཔེར་ན་ཁྲུང་ཆིང་འཕྲིན་སྦྱོར་ཁང་གི་ལས་མི་ཧོང་ཅའོ་ཡ་ལྟ་བུ། ཁོང་གི་བཀའ་དྲིན་གྱིས་ང་ལ་གླུ་ཁང་ཆུང་ཆུང་ཞིག་ངོ་སྤྲོད་བྱས། ཟླ་བ་རེར་ཟླ་ཕོགས་སྒོར་ཆིག་སྟོང་ཉིས་བརྒྱ་ལོན་མོད། དྲང་མོ་བཤད་ན་སྒོར་ཆིག་སྟོང་ཉིས་བརྒྱ་ཡི་ནང་ནས་ཁང་གླ་དང་ཟས་རིན་སོགས་ཕུད་རྗེས། ཤུལ་ན་ཕལ་ཆེར་སྒོར་བཅུ་ཁ་ཙམ་ལས་ཀྱང་མ་ལྷག་རུང་། གཙོ་བོ་རང་གི་ཕུགས་འདུན་དེ་ཅུང་ཟད་ཇེ་བརྟན་དང་རེ་བ་ཉུང་ཉུང་ཙམ་རེ་ཐོབ་སོང་བས་ཤིན་ཏུ་སྤྲོ་སྣང་སྐྱེས་མྱངས།

གསར་འགོད་པ། རང་གི་མི་ཚེའི་ནང་གི་བཀའ་དྲིན་ཆེ་ཤོས་ཀྱི་མི་དག་གི་སྐོར་ནས་ཁ་བརྡ་ཞིག་གནང་རོགས།

ཡེ་ཤེས་མེ་འབར། ལགས་སོ། །ང་རང་གི་མི་ཚེའི་ཁྲོད་ཆེས་ཐོག་མར་བཀའ་དྲིན་ཞུ་དགོས་པའི་མི་དེ་ནི་ཕ་མ་གཉིས་ཡིན་ངེས། ལྷག་པར་ངའི་ཨ་ཕ་ལ་མཚོན་ན་ང་རང་གི་མི་ཚེའི་ཁྲོད་ཀྱི་གླུ་དབྱངས་སྒྱུ་རྩལ་གྱི་དགེ་རྒན་ཐོག་མ་ཡིན་ཞེས་བརྗོད་ཆོག །དེ་ནས་ང་རང་ལ་བཀའ་དྲིན་ཤིན་ཏུ་ཆེ་བའི་དགེ་རྒན་དམ་པ་བོད་ཀྱི་གླུ་པ་ཡ་དུང་ལགས་ཡིན། ཁོང་ནི་ངའི་གླུ་དབྱངས་སྒྱུ་རྩལ་གྱི་ལམ་ཁ་འདིའི་མ་རིག་མུན་པ་ལ་འོད་ཆེམ་ཆེམ་གྱི་སྒྲོན་མེ་བསྩལ་མཁན་དེ་ཡིན། མ་ཟད་ད་དུང་ངས་བཀའ་དྲིན་སྙིང་ནས་ཞུ་དགོས་པ་ཞིག་ནི་དགེ་རྒན་ཧོང་ཅའོ་ཡ་དང་ཡུང་ཆི་ཧྭ་སོགས་ཡིན། ཁོང་ཅག་ནི་ངའི་གླུ་དབྱངས་སྒྱུ་རྩལ་གྱི་ལམ་ཁ་འདིའི་དགེ་རྒན་ཡང་ཡིན་ལ་ངའི་འཚོ་བ་སོགས་ཕྱོགས་གང་ཐད་ནས་བཀའ་དྲིན་ཞུ་འོས་པའི་སྐྱེས་བུ་རླབས་ཆེན་དག་ཡིན།

གསར་འགོད་པ། མ་འོངས་པར་ཁྱེད་རང་ལ་འཆར་གཞི་ག་འདྲ་ཡོད་དམ།

ཡེ་ཤེས་མེ་འབར། མ་འོངས་པར་ཚོད་དཔག་ངེས་ཅན་ཞིག་བྱེད་མི་ཐུབ་མོད། ལྟོས་འཇོག་གིས་འཆར་གཞི་ཞིག་འཐེན་ན་མུ་མཐུད་དུ་གླུ་དབྱངས་སྒྱུ་རྩལ་གྱི་བགྲོད་ལམ་དེ་བསྙེག་རྒྱུ་ཡིན། ལྷག་པར་དུ་ད་དུང་དམངས་ཁྲོད་དུ་བག་ལ་ཉལ་ཡོད་པའི་དམངས་གཞས་སྙན་མོ་གང་མང་ཞིག་ལུས་ཡོད་སྲིད་པས། འདི་དག་སྔོག་འདོན་བྱ་རྒྱུ་དང་། ད་དུང་གླུ་དབྱངས་ལེན་པ་ཁོ་ན་ཙམ་ལ་འབད་པ་མ་ཡིན་པར། གཞས་དབྱངས་རྩོམ་སྒྲིག་དང་བོད་རང་གི་ཐུན་མོང་མ་ཡིན་པའི་གླུ་དབྱངས་སྒྱུ་རྩལ་གྱི་སྟེགས་བུ་ཞིག་ཐོན་པར་འབད་པ་དང་སྟེགས་བུ་འདི་ལ་ཞབས་ཞུ་ཉུང་ངུ་རེ་ཨེ་ཐོན་བསམ་པའི་འཆར་གཞི་དང་རེ་བ་འཆང་ཡོད།

གསར་འགོད་པ། མཇུག་ཏུ་ཁྱེད་རང་ལ་བརྗོད་འདོད་པའི་སྐད་ཆ་དང་བསམ་ཚུལ་ཅི་ཡོད་ལྷུག་པོར་བརྗོད་རོགས་གནང་།

ཡེ་ཤེས་མེ་འབར། བོད་ཡུལ་སྟོད་སྨད་བར་གསུམ་ཀུན་ཏུ་གླུ་གཞས་སྒྱུ་རྩལ་གྱི་བསྟན་པ་ཡུན་རིང་དུ་རྒྱས་པ་དང་། བོད་ཀྱི་གསར་སྐྱེས་གཞས་པ་གཞས་མ་ཚོས་བོད་རང་གི་རོལ་མོའི་བསྟན་བཅོས་སོགས་ལ་སྦྱོང་པ་མི་དམན་པ་བྱས་ཁར། དེང་རབས་ཀྱི་རོལ་ཆ་དང་དབྱངས་རྟ་སོགས་ལ་སློབ་སྦྱོང་གྲ་དག་པ་རེ་བྱས་ནས། བོད་ཀྱི་ན་གཞོན་ཚོའི་ཁམས་དང་མཐུན་པའི་བོད་གཞས་བརྩམས་ཆོས་མང་དུ་འབྱུང་བའི་རེ་བ་དང་སྨོན་ལམ་འདེབས། མཇུག་མཐར་མདོ་དབུས་ཁམས་གསུམ་གྱི་སྤུན་ཟླ་ཡོངས་ལ་བོད་མེ་ཕོ་རྟའི་ལོར་ཁ་ལས་དགེ་ཞིང་བསམ་དོན་མ་ལུས་ཡིད་བཞིན་དུ་འགྲུབ་པའི་བཀྲ་ཤིས་སྨོན་འདུན་ཡང་ཡང་ཞུ། །