རྒྱ་བོད་ལོ་ཙཱའི་ལག་ལེན་ཁྲོད་དུ་ བསྡུས་བསྒྱུར་བཀོལ་ཐབས།

རྒྱ་བོད་ལོ་ཙཱའི་ལག་ལེན་ཁྲོད་དུ་བསྡུས་བསྒྱུར་གྱི་ཐབས་ལེགས་པོར་བཀོལ་ཐུབ་ན་འགྱུར་ཡིག་གི་བརྗོད་པ་ཐབ་ཆུང་མེ་ཚའི་ཚུལ་དུ་བྱུང་ནས་ཡིག་ཚོགས་སྟུག་པོའི་ངལ་བ་སྤངས་ཐུབ་ཅིང་འགྱུར་ཡིག་གི་སྤུས་ཀ་བཟང་པོར་གྱུར་པར་ཕན་ཐོགས་ཆེ་བས་འདིར་དཔེར་མཚོན་ཁ་ཤས་དང་སྦྲེལ་ནས་ཅུང་ཁ་གསལ་བསྟན་ཡོད།

གཅིག །གླེང་སློང་བ།

ཕྱི་ནང་སྣོད་བཅུད་རང་གཞན་གནས་བབ་དང་། །དུས་བབས་སོགས་ལ་ངོས་འཛིན་གསལ་པོ་དང་། །རང་དང་གཞན་གྱི་རིག་གནས་རྒྱུས་ལོན་དང་། །སྤེལ་རེས་མཉམ་འདྲེས་ཡོང་ཕྱིར་ལོ་ཙཱ་མཁོ། །ཞེས་པ་ལས་ང་ཚོས་ལོ་ཙཱ་ནི་དུས་རབས་དང་རྒྱལ་ཁབ། མི་རིགས། སྤྱི་ཚོགས་གང་ཞིག་ཏུ་ཡང་མཁོ་བའི་གནས་ལུགས་བསྟན་ཡོད། གཞན་ཡང་། ཕ་སྐད་རིག་གནས་རྨང་ཚུགས་གཞུང་གཞན་གྱི། །ཁོག་པ་ལོན་ཞིང་སྤྲོ་བས་ཞུགས་པ་དང་། །

འབྲེལ་ཡོད་སྐད་ཡིག་ཤེས་ཤིང་དམིགས་ཡུལ་གསལ། །ཡུལ་དངོས་ཕྱིན་ནས་ཉམས་ཞིབ་བྱེད་པའོ། །ཞེས་པ་ལས་ལོ་ཙཱ་བ་ཚད་དང་ལྡན་པ་ལ་མཚན་ཉིད་དྲུག་ཚང་དགོས་པ་བསྟན་ཡོད། གནའ་དེང་གི་འཇིག་རྟེན་མིག་འབྱེད་ཚོའི་བཀའ་དྲིན་ལ་བརྟེན་ནས་རྒྱ་བོད་ལོ་ཙཱའི་བྱ་གཞག་ལ་འཕེལ་རྒྱས་ཆེན་པོ་བྱུང་དང་འབྱུང་བཞིན་ཡོད། ཡིན་ནའང་ཞིབ་ཕྲ་ས་ལ་ཕམ་ཉེས་ཆེ་ཞེས་པའི་དཔེ་ལྟར། ལོ་ཙཱའི་ལག་ལེན་དངོས་ཀྱི་ཁྲོད་དུ་ད་དུང་དོ་སྣང་བྱ་དགོས་ས་འགའ་ཤས་ཡོད་ཀྱང་། འདིར་བསྡུས་བསྒྱུར་གྱི་ཐབས་བཀོལ་སྟངས་ཐད་ནས་ཅུང་རྒྱས་པར་སྤྲོས་ཁུལ་བགྱིས་ཡོད།

གཉིས། བསྡུས་བསྒྱུར་གྱི་མཚན་ཉིད་སྔོན་འགྲོའི་ཆ་རྐྱེན་གླེང་བ།

བསྡུས་བསྒྱུར་ནི་ལོ་ཙཱའི་སྒྱུར་ཐབས་ཆེན་པོ་བཞི་ཕུད་པའི་སྒྱུར་ཐབས་གལ་ཆེན་ཞིག་ཡིན་ལ། དེའི་མཚན་ཉིད་གོ་བདེ་མོ་ཞིག་བཤད་ན། འགྱུར་ཡིག་ཟོར་ཡང་བའི་ཆེད་དུ་མིང་ཚིག་བརྗོད་པའི་ཁྲོད་དུ་ཡོད་པའི་དགོས་མེད་ཀྱི་ཕྲད་རྣམ་དབྱེ་དང་བྱ་ཚིག །ཟློས་ཚིག །གྲངས་ཚིག །

རྒྱན་ཚིག་སོགས་མར་ལས་སྤུ་འདོན་པ་ལྟར་གཙང་མར་བཟོས་ཏེ་འགྱུར་ཡིག་ཐབ་ཆུང་མེ་ཚའི་ཚུལ་དུ་ཡོང་བར་གོ་ཆོག་པ་རེད། དེ་ཡང་བསྡུས་བསྒྱུར་ཤེས་པའི་སྔོན་འགྲོའི་ཆ་རྐྱེན་ནི་ཚིག་སྡུད་རིགས་དྲུག་སོགས་ཁོང་དུ་ཆུད་ཐུབ་མིན་ལ་རག་ལས་པ་སྟེ། དེ་ཡང་རྟ་ཡང་ཡིན་ལ་དམར་པོ་ཡང་ཡིན་པ་ལ་རྟ་དམར་པོ་ཞེས་ཁྱད་གཞི་དང་ཁྱད་ཆོས་གཉིས་ཀ་གཞི་གཅིག་གི་སྟེང་དུ་འཛིན་རུང་བའམ་བསྡུ་རུང་བ་ལྟ་བུ་ལས་འཛིན་གྱི་བསྡུ་བ་དང་། ཕུང་པོ་ཡིན་ལ་ལྔ་ཡང་ཡིན་པ་ལ་ཕུང་པོ་ལྔ་སྟེ་བགྲང་བྱ་དང་གྲངས་གཉིས་བརྗོད་བྱ་འབྲེལ་བར་བསྡུ་བ་ལྟ་བུ་བ་གཉིས་པའི་བསྡུ་བ། བཀྲ་ཤིས་རྡོ་རྗེ་ལ་བཀྲ་རྡོར་ཞེས་མིང་ཚིག་གཉིས་ཀྱི་བར་གྱི་རྣམ་དབྱེ་དང་པོ་བསྡུས་པ་ལྟ་བུ་དེའི་སྐྱེས་བུའི་བསྡུ་བ། དེ་བཞིན་རྣམ་དབྱེ་གཞན་དྲུག་ལ་ཡང་རིགས་འགྲེ་ན་ཆོག །ཕ་རྒན་མ་རྒན་དགེ་རྒན་ལ་གུས་པས་འདུད་ལྟ་བུ་རྣམ་དབྱེ་སོགས་རིགས་མཐུན་དུ་མ་འཇུག་པ་བསྡུས་ནས་མཐར་རྣམ་དབྱེ་གཅིག་སྦྱར་བ་ཟླས་དབྱེ་བའི་བསྡུ་བ། ཀུན་ལ་ཕན་པ་ལ་ཀུན་ཕན་ཏེ་ཚིག་སྔ་མར་མི་ཟད་པའི་སྡེ་ཚན་དུ་བཞག་པ་གང་རུང་ཅན་གྱི་བསྡུ་བ་ལ་མི་ཟད་པའམ་གྲངས་མེད་པའི་བསྡུ་བ་བཅས་རེད། དེ་བཞིན་སུམ་ཅུ་པའི་ནང་གི་འབྱེད་སྡུད་དང་ནས་སྒྲ་སོགས་ཀྱི་ཚིག་སྡུད་ལ་ཡང་བྱང་ཆུབ་དགོས་སོ། །

གསུམ། བསྡུས་བསྒྱུར་གྱི་ཁྱད་ཆོས་འགའ་གླེང་བ།

དང་པོ། ནང་དོན་གཙོ་བོར་འཛིན་པ། རྩོམ་ཡིག་གམ་གཏམ་བཤད་ཀྱི་བརྗོད་བྱ་གཙོ་བོ་དང་། དོན་སྙིང་། གནད་འགག་བཅས་ཁ་གསལ་ངང་འཛིན་དགོས།

གཉིས་པ། ཞིབ་ཕྲ་བསྡུ་བ། དོན་གནད་གཙོ་བོ་མ་ཡིན་པའི་ཞིབ་ཕྲའི་འགྲེལ་བཤད་དང་། དཔེ་མཚོན། རྒྱས་བཤད་སོགས་བསྡུ་དགོས།

གསུམ་པ། རང་གི་སྐད་ཆ་སྤྱོད་པ། མ་རྩོམ་གྱི་ཚིག་ཟིན་ཐད་ཀར་བེད་མི་སྤྱོད་པར། རང་གི་སྐད་ཆ་སྤྱད་ནས་ནང་དོན་གཙོ་བོ་བསྐྱར་དུ་འགྲེལ་བཤད་བྱེད་དགོས།

བཞི་པ། གོ་རིམ་གསལ་བ། བསྡུས་བསྒྱུར་བྱས་པའི་ནང་དོན་ལ་གོ་རིམ་དང་རྒྱུན་མཐུད་རང་བཞིན་ལྡན་དགོས།

ལྔ་པ། ཡང་དག་རང་བཞིན། བསྡུས་བསྒྱུར་བྱས་པའི་ནང་དོན་དེ་མ་རྩོམ་གྱི་དོན་སྙིང་དང་མི་འགལ་བར་ཡང་དག་པ་ཡིན་དགོས།

བསྡུས་བསྒྱུར་གྱི་ཐབས་ལམ་སྤྱོད་སྐབས་སུ་གོང་གི་གནད་དོན་ཁག་ལ་དོ་སྣང་བྱ་རྒྱུ་གལ་འགངས་ཆེའོ། །

བཞི། ལོ་ཙཱའི་ལག་ལེན་ཁྲོད་དུ་བསྡུས་བསྒྱུར་གྱི་ཐབས་ཇི་ལྟར་བཀོལ་སྟངས།

ལོ་ཙཱའི་ལག་ལེན་ཡུན་རིང་བྱས་པའི་མྱོང་བ་དང་སྦྲགས་ནས་དཔེར་མཚོན་བཀོད་ན། མ་ཡིག་ལ། 全面建设社会主义现代化国家，一个民族都不能少。ཞེས་པ་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་ཁྱོན་ཡོངས་ནས་འཛུགས་སྐྱོང་བྱེད་པར་མི་རིགས་གཅིག་ཀྱང་ཆད་ལུས་བྱ་རྒྱུ་མེད་ཅེས་ཡོངས་གྲགས་སུ་དེ་འདྲ་བསྒྱུར་སྲིད་པ་རེད། དེའི་ཁྲོད་དུ། ཚིག་རྙོག་དང་བྱ་ཚིག་དུ་མ་བརྩེགས་པའི་འགྱུར་སྐྱོན་མངོན་གསལ་དོད་པོ་ཡོད་པ་སྟེ། འཛུགས་སྐྱོང་བྱེད་ཅེས་པ་དང་ཆད་ལུས་བྱ་རྒྱུ་མེད་ཅེས་པའི་ཚིག་དེ་གཉིས་འོལ་ཚོད་ཀྱིས་ལྟ་བ་ཡིན་ན་སྐྱོན་ཆེར་མེད་པ་འདྲ་བ་ཞིག་སྣང་ཡང་། ཞིབ་ཏུ་དཔྱོད་པའི་ཚེ། འཛུགས་དང་སྐྱོང་། བྱེད་གསུམ་ནི་བྱ་ཚིག་སུམ་བརྩེགས་ཡིན་པ་དང་། ཆད་དང་ལུས་དང་བྱ་གསུམ་ཡང་བྱ་ཚིག་སུམ་བརྩེགས་ཡིན། འཛུགས་སྐྱོང་བྱེད་ཅེས་པའི་དོན་འཛུགས་པའམ་སྐྱོང་བས་དོན་ཇི་བཞིན་དུ་མཚོན་ཐུབ་པ་དང་། དེ་བཞིན་དུ་ཆད་ལུས་བྱ་རྒྱུ་མེད་ཅེས་པའི་དོན་ཡང་ཆད་རྒྱུ་མེད་པ་དང་ཡང་ན་ལུས་རྒྱུ་མེད་ཅེས་པས་ཇི་བཞིན་དུ་མཚོན་ཐུབ་ན། བྱ་ཚིག་མང་པོ་བརྩེག་དགོས་པའི་དགོས་པ་མེད་ཅིང་ཚིག་ཟློས་སྐྱོན་དུ་སོང་འདུག་པ་ཤེས་ཐུབ། དེར་མ་ཟད། བརྗོད་པ་འདིའི་ནང་དུ་འབྲེལ་སྒྲའི་ཕྲད་ཀྱི་ཡང་བསྡུས་ཆོག་ལ། ཅན་ཞེས་པས་དུ་འགྱུར་བའི་དོན་མཚོན་ཡོད་པ་དེ་ཡང་བསྡུས་ཆོག་པ་རེད། ཚིག་བསྡུ་དགོས་སར་བསྡུ་མ་ཤེས་ན་ཚིག་ཁྱིམ་མང་དུ་འགྲོ་བ་དང་ནང་དོན་རྙོག་འཛིང་ཅན་དུ་འགྱུར་ལ། བྱ་ཚིག་ཉིས་བརྩེགས་དང་ཐ་ན་གསུམ་བརྩེགས་སུ་སྤུངས་ནས་སྔ་ཕྱི་འབྲེལ་མ་ཆགས་པ་དང་ཟློས་སྐྱོན་སོགས་ཀྱི་སྐྱོན་འབྱུང་བ་ཡིན། དེ་འདྲའི་རིགས་མང་ན་འགྱུར་སྤུས་དག་པོ་མི་འབྱུང་བ་ཐག་ཆོད་རེད། དེས་ན་གོང་གི་དཔེར་མཚོན་དེ། ལོ་ཙཱའི་ཉམས་མྱོང་ཡོད་པའི་ལོ་ཙཱ་བ་ཞིག་གིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་པར་མི་རིགས་གཅིག་ཀྱང་ལུས་མི་རུང་ཞེས་བསྒྱུར་ནས་འགྱུར་ཡིག་གཙང་མ་ཡོང་ཐུབ། དེ་བཞིན། ཤུགས་སྣོན་རྒྱག་པ་ལ་ཤུགས་སྣོན་ནམ་ཤུགས་རྒྱག །མདུན་སྐྱོད་བྱས་ལ་མདུན་དུ་བསྐྱོད། ལག་བསྟར་བྱས་ལ་ལག་ལེན་བསྟར། འབབ་འཕར་བྱུང་ལ་ཡོང་འབབ་འཕར། དོན་འཁྱོལ་བྱས་ལ་དོན་ལ་འཁྱོལ། ལས་ཞུགས་ཐུབ་པ་ལ་ལས་ཀ་རག་པ། ལོངས་སྤྱོད་བྱས་ལ་ལོངས་སུ་སྤྱད། ཐག་གཅོད་བྱས་ལ་ཐག་བཅད། མངག་གཏོང་བྱས་ལ་མངགས། བསྒྱུར་ཞུས་བྱས་ལ་བསྒྱུར་ནས་ཞུས། འཛིན་བཟུང་བྱས་ལ་འཛིན་པའམ་བཟུང་བ། འགྲེམ་སྤེལ་བྱས་ལ་བཀྲམ་པ། རྒྱུན་འཁྱོངས་བྱས་ལ་རྒྱུན་འཁྱོངས། གཏན་འབེབས་བྱས་ལ་གཏན་ལ་ཕབ། མཁོ་འདོན་བྱས་ལ་འདོན་པ་དང་བཏོན་པ། སྤྲད་པ། ཏོག་དབྱིབས་ནད་དུག་གསར་པའི་གློ་ཚད་ལ་ཏོག་གསར་གློ་ཚད། བསྐྱར་དུ་བསྐྲུན་རྒྱུའི་ལས་གཞི་ལ་བསྐྱར་སྐྲུན་ལས་གཞི། དོན་ཐོག་འཁྱོལ་བའི་བྱ་ཐབས་ལ་དོན་འཁྱོལ་བྱ་ཐབས། ལས་ཞུགས་ཐུབ་པའི་སྲིད་ཇུས་ལ་ལས་ཞུགས་ཀྱི་སྲིད་ཇུས། ཚོགས་འདུའི་ཐོག་ལ་ཚོགས་འདུར། གནོད་སྐྱོན་ཐེབས་རྗེས་ཁང་པ་བསྐྱར་དུ་འཛུགས་སྐྲུན་ལ་གནོད་རྗེས་བསྐྱར་བསྐྲུན། སྒོ་ཁར་རྩིས་རྒྱག་པའི་ཉོ་ཚོང་ཚོང་ཁང་ལ་སྒོ་རྩིས་ཚོང་ཁང་། འཆར་ལྡན་བུ་བཙའ་ཨུ་ཡོན་ལྷན་ཁང་ལ་འཆར་བཙའ་ཨུ་ལྷན། རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ལ་རིག་རྩལ་ལྷན་ཚོགས་སོགས་རིགས་འགྲེས་ནས་ཤེས་པར་བྱའོ། །

མདོར་ན་བསྡུར་བསྒྱུར་གྱི་ཐབས་ལམ་ནི་ཡིག་སྒྱུར་གྱི་བརྒྱུད་རིམ་ཁྲོད་མ་ཡིག་རིང་དྲག་པ་དང་། ནང་དོན་མང་པོ་ཡོད་པའི་རིགས་བོད་ཡིག་ཏུ་བསྒྱུར་སྐབས། ཆ་ཚང་བསྒྱུར་ཚེ་ཡིག་རྫོབ་ཆེ་བ་དང་། རྙོག་དྲ་ཆེ་བ། གཙོ་གནད་མེད་པར་འགྱུར་བར་མ་ཟད། བསྒྱུར་རྩོམ་ཧ་ཅང་རིང་པོ་ཆགས་སྲིད་པས། དེས་ན་མ་ཡིག་གི་སྙིང་བཅུད་དང་གཙོ་གནད་རྣམས་ཁུ་བསྡུས་ཏེ་ཡིག་སྒྱུར་བྱས་ཚེ། མ་ཡིག་གི་ནང་དོན་བརྒྱུད་སྤེལ་ཐུབ་པར་མ་ཟད། ཡིག་སྒྱུར་བྱས་པའི་བོད་ཡིག་དག་ཀྱང་སྟབས་བདེ་ལ་ཁ་གསལ་བ་ཞིག་ཏུ་འགྱུར་ཐུབ་པས། ལོ་ཙཱའི་སྐབས་སུ་སྤྱོད་མང་བའི་བསྒྱུར་ཐབས་ཤིག་ཏུ་མངོན་ནོ། །