སློབ་ཆུང་བོད་སྐད་ཡིག་བསླབ་ཚན་ཚད་གཞི་ལས་འཕྲོས་ཏེ《ས་སྐྱ་ལེགས་བཤད》ཀྱི་ཀུན་སྤྱོད་སློབ་གསོའི་སྐོར་གླེང་བ།

སློབ་ཆུང་བོད་སྐད་ཡིག་གི་བསླབ་ཚན་ཚད་གཞི་ལས་བསྟན་དོན། སྐད་ཡིག་སློབ་སྦྱོང་གི་བརྒྱུད་རིམ་ཁྲོད་དུ་རྒྱལ་གཅེས་རིང་ལུགས་ཀྱི་བསམ་པ་དང་། སྤྱི་ཚོགས་རིང་ལུགས་ཀྱི་ཀུན་སྤྱོད་གཤིས་རྒྱུད་སྐྱེད་སྲིང་བྱས་ཏེ། རིམ་བཞིན་ཡང་དག་པའི་མི་ཚེའི་རྣམ་འགྱུར་དང་རིན་ཐང་གི་ལྟ་བ་ཆགས་སུ་འཇུག་དགོས་ཞེས་ཀུན་སྤྱོད་སློབ་གསོའི་གལ་ཆེན་རང་བཞིན་གསལ་པོར་བསྟན་ཡོད་པ་དང་། ཀུན་སྤྱོད་སློབ་གསོར་ཤུགས་གནོན་རྒྱག་རྒྱུ་ནི་སྤྱི་ཚོགས་རིང་ལུགས་ཀྱི་སློབ་སྒྲུབ་བྱ་བའི་རྩ་བའི་འོས་འགན་ཡིན་ཏེ། ཀུན་སྤྱོད་ལ་མཐོང་ཆེན་བྱས་ཏེ་མི་གཞི་ཡག་པོ་སྐྱོང་བ་མངོན་འགྱུར་ཡོང་བའི་ལག་ལེན་གསེར་གྱི་ཐིགས་པ་ལྟ་བུ་དེ་ཡིན་པར་མ་ཟད། སློབ་ཆུང་སློབ་མའི་ཀུན་སྤྱོད་སློབ་གསོའི་ལག་ལེན་ནི་བསམ་བློ་ཆབ་སྲིད། ཚན་རིག་སྒྱུ་རྩལ། མི་རིགས་ཀྱི་རིག་གནས། སེམས་ཁམས་རིག་པ། སློབ་གསོ་རིག་པ་སོགས་དཔྱོད་ཤེས་ལྡན་པའི་བློ་སྦྱོང་དང་ཤེས་རིག་ལ་བརྟེན་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་རྒྱུན་འཛིན་དང་སྤྱི་ཚོགས་རིང་ལུགས་འཛུགས་སྐྲུན་ལ་མཁོ་བའི་ཕྱོགས་བསྡུས་རང་བཞིན་གྱི་ཤེས་ལྡན་མི་སྣ་གསོ་སྐྱོང་བྱ་རྒྱུ་དེ་ཡིན།

དེ་ཡང་བོད་ཀྱི་རིག་གནས་ཀྱི་ཐད་ནས། ས་སྐྱ་ལེགས་བཤད་ནི་རང་ཉིད་ཀྱི་བྱ་སྤྱོད་སྟངས་འཛིན་ཐད་ཀྱི་བསམ་པའི་རྒྱགས་ཕྱེའམ་བསླབ་བྱའི་གདམ་ངག་གལ་ཆེན་ཞིག་ཡིན་པས། ལྗོངས་དང་ཞིང་ཆེན་ལྔའི་རིམ་པ་མི་འདྲ་བའི་བསླབ་གཞིའི་ནང་འདེམས་བཀོད་བྱས་ནས་ངེས་སྦྱོང་ངེས་སློབ་ཀྱི་བསླབ་ཚན་རྣམ་གྲངས་སུ་བཞག་ཡོད་པས། འདིར་སློབ་ཆུང་བོད་ཀྱི་སྐད་ཡིག་བསླབ་ཚན་ཁྲོད་བྱུང་བའི་ཀུན་སྤྱོད་སློབ་གསོ་དང་འབྲེལ་བའི་ས་སྐྱ་ལེགས་བཤད་ཀྱིས། བྱིས་པའི་སྤྱོད་བཟང་གཤིས་ཡག་དང་། རོགས་རེས་མཐུན་སྒྲིལ། འཆམ་མཐུན་ཞི་གནས་སོགས་སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་གྲུབ་པར་བག་ལ་ཞ་བའི་ནུས་པའི་སྐོར་ནས་ཅུང་ཙམ་གླེང་བ་ལ།

གཅིག ས་སྐྱ་ལེགས་བཤད་ཀྱི་ཀུན་སྤྱོད་སློབ་གསོའི་ནུས་པ།

དེ་ཡང་རྒྱལ་ཁབ་དང་མི་རིགས་གང་ཞིག་དཔལ་ཡོན་གཉིས་ལྡན་དང་འཆམ་མཐུན་ཞི་བདེ་ཅན་དུ་མངོན་འགྱུར་བྱེད་དགོས་ན། ཀུན་སྤྱོད་གཙང་ཞིང་ཤེས་རིག་ལྡན་པའི་མི་སྣ་སྐྱེད་སྲིང་བྱ་རྒྱུ་ནི་གནད་འགག་གཙོ་བོ་ཡིན། དེ་ཡང་ཤེས་བྱ་བསླབས་རྗེས་རང་ཤུགས་ཀྱིས་ཀུན་སྤྱོད་ཚད་ལྡན་དུ་འགྲོ་བའི་ངེས་པ་མེད་ཅེས་གསུངས་བ་ལྟར་དངོས་པོའི་དཔལ་ཡོན་འཕེལ་རྒྱས་སུ་སོང་ནའང་བསམ་པའི་དཔལ་ཡོན་ནམ་ཀུན་སྤྱོད་ཚད་ལྡན་དུ་འགྲོ་བའི་ངེས་པ་མེད་དེ། ང་ཚོས་ཀུན་སྤྱོད་སློབ་གསོར་ཤུགས་རྒྱག་རྒྱུ་ནི་དེང་གི་སློབ་གསོའི་ལས་འགན་གཙོ་བོ་དེ་ཡིན་ལ། སློབ་གསོ་བཅོས་སྒྱུར་གྱི་འགྲོས་དང་བསྟུན་ནས་སྐད་ཡིག་དགེ་རྒན་མང་ཆེ་བས་སློབ་མའི་སློབ་གནས་འཕར་རྒྱུ་དང་རྒྱུགས་འབྲས་དེ་ཁོ་ན་གཙིགས་སུ་འཛིན་པ་ལས། སྐད་ཡིག་སློབ་ཁྲིད་སྐབས་ཀུན་སྤྱོད་སློབ་གསོའི་ནང་དོན་ཕུན་སུམ་ཚོགས་པའི་ས་སྐྱ་ལེགས་བཤད་ཀྱི་ཀུན་སྤྱོད་སློབ་གསོའི་ཐོན་ཁུངས་སྔོག་འདོན་བྱས་པའི་ཐད་དུ་མི་འདང་ས་ཤིན་ཏུ་མང་སྟེ། སློབ་མར་ཀུན་སྤྱོད་སློབ་གསོ་སྤེལ་རྒྱུ་ནི་སློབ་ཁྲིད་ཀྱི་ཞར་ཞོར་གྱི་སློབ་ཁྲིད་རྣམ་པ་ཙམ་དང་། དཔེ་དེབ་ཁྲོད་ཀྱི་ཀུན་སྤྱོད་སློབ་གསོ་འབའ་ཞིག་གི་ཚུལ་དུ་བཞག་ན། སྐད་ཡིག་རང་ངོས་ཀྱི་མ་གཞིའི་ནུས་པ་དང་ནང་སྒོས་སུ་ས་སྐྱ་ལེགས་བཤད་ཀྱི་མ་གཞིའི་ཀུན་སྤྱོད་སློབ་གསོའི་ནུས་པ་ཉམས་པའི་ཉེན་ཁ་ཆེ་ཞིང་། ཚང་མས་མཁྱེན་གསལ་ལྟར་སློབ་གྲྭའི་སློབ་གསོ་དང་།

ཁྱིམ་ཚང་སློབ་གསོ། སྤྱི་ཚོགས་སློབ་གསོ་བཅས་ཀྱི་ནང་ནས་སློབ་གྲྭའི་སློབ་གསོ་ནི་ཀུན་སྤྱོད་སློབ་གསོ་སྤེལ་བའི་གཡུལ་ས་གཙོ་བོ་ཡིན་ལ། སློབ་གྲྭའི་སློབ་གསོའི་ཁྲོད་ཀྱི་སློབ་ཐུན་སློབ་ཁྲིད་ནི་ཀུན་སྤྱོད་སློབ་གསོ་དེ་དམིགས་ཡུལ་ཡོད་པ་དང་གོ་རིམ་ལྡན་པའི་སྒོ་ནས་སྤེལ་བའི་གར་སྟེགས་གལ་ཆེན་ཞིག་ཡིན། དེས་ན་སློབ་མ་ནི་སློབ་གྲྭའི་ཀུན་སྤྱོད་སློབ་གསོ་སྤེལ་ཡུལ་དང་སློབ་གྲྭ་འཕེལ་རྒྱས་ཀྱི་སྲོག་ཤིང་ཡིན་པའི་ཆ་ནས། ཁོ་ཚོ་ནི་རྒྱལ་ཁབ་ཀྱི་མ་འོངས་བ་དང་མི་རིགས་ཀྱི་རེ་བ་ཡིན་པས། ཆུང་བྱིས་པའི་དུས་ནས་ཁོ་ཚོའི་ཤེས་ཚོར་གྱི་ཁྱད་ཆོས་ལ་གཞིགས་ནས་ཀུན་སྤྱོད་སློབ་གསོར་ཤུགས་སྣོན་བརྒྱབ་དགོས་པར་འདོད།

གཉིས། ས་སྐྱ་ལེགས་བཤད་ཀྱི་ཀུན་སྤྱོད་སློབ་གསོའི་ཁྱད་ཆོས།

སློབ་ཆུང་བོད་སྐད་ཡིག་གི་བསླབ་གཞིའི་ཁྲོད་དུ། ཡ་རབས་སྤྱོད་བཟང་ལ་སྐུལ་བའི་ས་སྐྱ་ལེགས་བཤད་ཀྱི་ནང་དོན་མང་པོ་བཀོལ་ཡོད་པ་སྟེ། དེ་དག་ནི་སློབ་ཆུང་སློབ་མའི་ཤེས་ཚོར་གྱི་ཁྱད་ཆོས་དང་བསྟུན་ཏེ་སྒྲིག་སྦྱོར་བྱས་ཡོད་པས། དགེ་རྒན་གྱིས་སློབ་ཁྲིད་བྱེད་པའི་སྐབས་སུ། ས་སྐྱ་ལེགས་བཤད་ཀྱི་རྗོད་བྱེད་ཚིག་དང་འབྲེལ་བའི་བརྡ་སྤྲོད་ཀྱི་ཤེས་བྱ་དང་རྩོམ་རིག་གི་ཤེས་བྱ་ཁྲིད་པ་ལས་གཞན། ད་དུང་བརྗོད་བྱའི་བསྟན་དོན་དེ་དངོས་ཡོད་འཚོ་བའི་ཁྲོད་ཀྱི་ཀུན་སྤྱོད་དང་འབྲེལ་བའི་དཔེ་གཞི་མང་པོའི་ལམ་ནས་དབྱེ་ཞིབ་བྱས་ནས་ཁ་ཞེ་གཉིས་མེད་ཀྱིས་དམིགས་ཡུལ་ཡོད་ལ་གོ་རིམ་ལྡན་པའི་སྒོ་ནས་སློབ་ཁྲིད་བྱེད་དགོས་པར་མ་ཟད། དགེ་རྒན་གྱིས་རང་དཔེ་གཞན་སྟོན་བྱས་ནས་སློབ་མ་ཚོ་ཡ་རབས་སྤྱོད་བཟང་གི་མི་ཞིག་བྱེད་རྒྱུར་ཤུགས་རྐྱེན་ཐེབས་སུ་འཇུག་དགོས་ཏེ། དཔེར་ན། བསླབ་གཞིའི་ཁྲོད་ཀྱི་ས་སྐྱ་ལེགས་བཤད་ལས། མཁས་པ་སློབ་པའི་དུས་ན་སྡུག།བདེ་བར་སྡོད་ལ་མཁས་མི་སྲིད། །བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད་ཅེས་རང་ཅག་གིས་སློབ་གཉེར་བྱེད་པའི་བརྒྱུད་རིམ་ཁྲོད་རྣམ་གཡེང་དང་སྐྱིད་འདོད་ཀྱི་སྤྱོད་ཚུལ་སྤང་དགོས་ཚུལ་བསྟན་ཏེ། ཡོན་ཏན་ཕུན་སུམ་ཚོགས་པའི་སྐྱེས་བུའི་མཚན་བཏགས་རྒྱུ་དང་རིག་པའི་གཞུང་ལུགས་ཁོང་དུ་ཆུད་རྒྱུ་ལས་སླ་པོ་ཞིག་མིན་པས། རྟག་ཏུ་གཉིད་ཆགས་ཟས་བརྗེད་ཀྱིས་འབད་བརྩོན་ལྷོད་མེད་དང་དཀའ་སྤྱད་སྡུག་རུས་བྱ་དགོས་ཚུལ་གྱི་ཀུན་སྤྱོད་སློབ་གསོའི་གནས་ལུགས་སྟོན་དགོས། གཞན་ཤེས་རབ་ཀྱི་དགེ་མཚན་བརྗོད་ནས་ཤེས་རབ་ལྡན་པའི་མི་གཞན་གྱི་བསླུ་བྲིད་ལ་མི་རྨོངས་པར་མ་ཟད། འཇིག་རྟེན་ལུགས་གཉིས་ཀྱི་བྱ་བའི་བླང་དོར་ལའང་ཕྱིན་ཅི་མ་ལོག་པར་འཇུག་པའི་ཀུན་སྤྱོད་ཀྱི་ཁྱད་ཆོས་དང་ཡོན་ཏན་བརྗོད་ཡོད་པ་ལྟར། ཤེས་རབ་ནི་མཐར་ཐུག་བདེ་བ་འབྱུང་བྱེད་ཀྱི་རྩ་བར་མཐོང་བས། མི་རྣམས་འཕྲལ་གྱི་བདེ་བ་ཆུང་ངུར་ཆགས་ནས་འདུག་མི་རུང་བར་འབད་བརྩོན་ལྷོད་མེད་ཀྱིས་ཤེས་བྱའི་གནས་སུ་འཇུག་དགོས་པའི་ཀུན་སྤྱོད་སློབ་གསོའི་གནས་ལུགས་གཙོར་བསྟན་བྱས་ཡོད་པ་དངོས་ཐོག་ལག་ལེན་གྱི་སྟེང་ནས་མཐོང་ཐོས་ཅི་ཐུབ་བྱ་དགོས་ཤིང་། ང་ཚོས་ཆོས་རྗེ་ས་པཎ་ཁོང་ཉིད་ཀྱི་དགོངས་དོན་དེ་དེང་རབས་སྤྱི་ཚོགས་འདི་དང་སྦྱར་ནས་ཤེས་རབ་དང་ཀུན་སྤྱོད་ཟུང་འབྲེལ་གྱི་སྒོ་ནས་སློབ་མ་ཚོར་གང་ཞིག་ནི་བཟང་པོ་དང་མཛེས་པ་ཡིན་པ་དང་། གང་ཞིག་ནི་རྫུན་མ་དང་ངན་པ་སྐྱུག་བྲོ་བ་ཡིན་པ། གང་ཞིག་བྱེད་འོས་པ་དང་། གང་ཞིག་བྱེད་མི་འོས་པ་སོགས་བདེན་རྫུན་དང་དཀར་ནག་ཡག་བཙོག་སོགས་ཀྱི་ཤན་འབྱེད་ནུས་པ་དེ་བསྐྱེད་སྲིང་བྱ་དགོས།

གསུམ། ས་སྐྱ་ལེགས་བཤད་དང་འབྲེལ་བའི་ཀུན་སྤྱོད་སློབ་གསོ་སྤེལ་བའི་རིན་ཐང་།

བོད་ཀྱི་ལེགས་བཤད་བསྟན་བཅོས་ཀྱི་ཐོག་མར་བགྲངས་པའི་རབ་བྱེད་དགུའི་བདག་ཉིད་ཅན《ས་སྐྱ་ལེགས་བཤད》ཀྱི་བསྟན་བཅོས་འདི་ལ་སློབ་གསོའི་རིན་ཐང་ངེས་ཅན་ཞིག་ལྡན་པ་སྟེ། ཡ་རབས་སྤྱོད་བཟང་ལ་སྐུལ་བའི་བསམ་བློའི་ནང་དོན་དང་རྒྱལ་པོའི་རྒྱལ་སྲིད་སྐྱོང་ལུགས། མི་ཆོས་གཙང་མར་སྒྲུབ་སྟངས། ཐོས་པ་དོན་དུ་གཉེར་ལུགས། མཁས་པའི་རང་བཞིན་དང་གླེན་པའི་ངན་སྤྱོད་ལ་བརྟག་པ་སོགས་བརྗོད་བྱ་ཕུན་སུམ་ཚོགས་པ་ལྡན་ཚུལ་གོང་དུ་རགས་ཙམ་གླེང་བ་ལྟར། དེར་བརྟེན། དེང་དུས་སྤྱི་ཚོགས་ཀྱི་དངོས་ཡོད་གནས་ཚུལ་དང་འབྲེལ་ནས་ཀུན་སྤྱོད་སློབ་གསོ་སྤེལ་བར་ཞིབ་འཇུག་གི་དགོས་པ་ཆེར་མཆིས། མི་རྣམས་ཀྱི་བསམ་གཤིས་ཡ་རབས་སྤྱོད་པར་སྐུལ་བར་གཞལ་དུ་མེད་པའི་རིན་ཐང་བླ་ལྷག་ལྡན། འདིར་སློབ་ཆུང་བོད་སྐད་ཡིག་གི་བསླབ་ཚན་ཚད་གཞི་དང་འབྲེལ་ཏེ《ས་སྐྱ་ལེགས་བཤད》ཀྱི་ཀུན་སྤྱོད་སློབ་གསོའི་སྐོར་གླེང་བའི་གོ་རིམ་ཁྲོད། ས་སྐྱ་ལེགས་བཤད་ཀྱི་ཁྲོད་དུ་མི་ཆོས་ཀུན་སྤྱོད་ལས་གཞན་ད་དུང་མི་ཆོས་མཚན་ཉིད་རིག་པའི་ལྟ་དགོངས་དང་མིའི་རིགས་རིག་པའི་གནས་ལུགས་གཟུར་སྟོན་གྱི་བསམ་བློའི་དྲི་བསུང་ཞིག་ལེགས་བཤད་ཧྲིལ་པོར་ཁྱབ་ཡོད་པ་རྟོགས་ཐུབ་པར་མ་ཟད། མི་རྣམས་དངོས་པོའི་དཔལ་ཡོན་གྱི་འཕེལ་རྒྱས་དང་འཕྲལ་གྱི་བདེ་བ་ཆུང་བར་ཆགས་ནས་འཇིག་རྟེན་རྒུད་པར་བྱེད་པའི་མ་རིག་པ་དང་ལོག་སྤྱོད་བསམ་གཤིས་ཀྱི་རྒྱུ་བ་རབ་ཏུ་རྒོད་པའི་དུས་རབས་འདིར། མི་རྣམས་ཀྱི་འཚོ་བའི་ཆུ་ཚད་མཐོར་འདེགས་དང་འཕེལ་རྒྱས་ཕྱིན་ཡོད་ཀྱང་། བསམ་བློའི་འདུ་ཤེས་དང་གཤིས་སྤྱོད་ངན་ཞེན་དུ་ཆགས་བཞིན་ཡོད་པས། ལེགས་བཤད་ལས་འཕྲོས་པའི་འདུ་ཤེས་དང་གཤིས་སྤྱོད་ལེགས་བཅོས་ཀྱིས་ཡ་རབས་སྤྱོད་པར་གཞན་སྐུལ་བྱེད་རྒྱུ་ནི་དུས་རབས་དང་སྤྱི་ཚོགས་འདི་སྔར་ལས་འཕེལ་རྒྱས་འགྲོ་བའི་ཐབས་ལམ་གལ་ཆེན་དུ་མཐོང་བར་མ་ཟད། ས་སྐྱ་ལེགས་བཤད་ལས་སྣང་ཚུལ་དེ་དང་དེ་ལྟ་བུ་ལེགས་བཅོས་གཏོང་ལུགས་ཀྱི་ཐབས་ཤེས་དང་གདམ་ངག་ཀྱང་མང་པོ་བསྟན་ཡོད་པས། ལེགས་བཤད་འདི་ཉིད་དངོས་པོའི་དཔལ་ཡོན་གྱི་གནས་ཚུལ་དང་འབྲེལ་ནས་མིའི་རིགས་ཀྱི་བསམ་བློའི་དཔལ་ཡོན་འཕེལ་རྒྱས་གཏོང་བའི་ཐད་དུ་ཞིབ་འཇུག་གི་དགོས་པ་དང་རིན་ཐང་ཆེན་པོ་ལྡན་ནོ། །