སེ་འབྲུའི་མེ་ཏོག་མུ་ལི་ཁྱོན་ལ་བཞད། ཕུགས་འདུན་སྙེག་བཞིན་བགྲོད་ལམ་གསར་པར་བསྐྱོད།

མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་དང་རྒྱལ་ཁབ་དར་རྒྱས་གོང་འཕེལ་ཡོང་བའི་རྨང་རྡོ་ལྟ་བུ་ཡིན། དུས་ཡུན་རིང་པོའི་ནང་། སི་ཁྲོན་ཞིང་ཆེན་ལིའང་ཧྲན་ཁུལ་མུ་ལི་རྫོང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་འཛིན་པ་མཐའ་འཁྱོངས་ཀྱིས་ཐུན་མོང་ཐོག་མཐུན་སྒྲིལ་འབད་འཐབ་དང་། ཐུན་མོང་ཐོག་དར་རྒྱས་གོང་འཕེལ་གཏོང་བའི་མི་རིགས་ལས་དོན་གྱི་བརྗོད་དོན་གཙོ་བོར་དམ་པོར་དམིགས་ནས། ཏང་གི་མི་རིགས་ལས་དོན་གྱི་བྱེད་ཕྱོགས་སྲིད་ཇུས་དེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གསོན་ཉམས་དོད་པའི་ལག་ལེན་དུ་བསྒྱུར་བ་དང་། ཏང་འཛུགས་སྐྱོང་གིས་སྣེ་ཁྲིད་དེ་རྨང་གཞི་བརྟན་དུ་གཏོང་བ་དང་། བསམ་བློའི་བླ་སྲོག་བསྐྲུན་ནས་ངོས་འཛིན་གཅིག་མཐུན་ཡོང་བ། དཔེ་སྟོན་གསར་གཏོད་དཔེ་མཚོན་གྱི་ཚད་ཤིང་འཛུགས་པ། དམངས་འཚོ་ལེགས་བཅོས་ཀྱིས་མཉམ་ཕྱུག་ལ་སྐུལ་འདེད་གཏོང་བ། རིག་གནས་རྒྱུན་འཛིན་གྱིས་བློ་སེམས་གཅིག་མཐུན་གཏོང་བ། ཁྲིམས་ལྟར་བཅོས་སྐྱོང་གིས་བརྟན་བརླིང་སྲུང་སྐྱོང་བཅས་བྱས་ཏེ། མུ་ལིའི་ཁྱད་ཆོས་ལྡན་པའི་མི་རིགས་མཐུན་སྒྲིལ་ཡར་ཐོན་གྱི་ལམ་བུ་ཞིག་བཏོད་པ་རེད།

ཏང་འཛུགས་སྐྱོང་གི་སྣེ་ཁྲིད་མཐའ་འཁྱོངས་བྱེད་པ།

མུ་ལི་རྫོང་གིས་ཐོག་མཐའ་བར་གསུམ་དུ་ཏང་གིས་འགོ་ཁྲིད་གནང་བ་དེ་མི་རིགས་མཐུན་སྒྲིལ་ཡར་ཐོན་བྱ་གཞག་གི་བརྒྱུད་རིམ་ཧྲིལ་པོར་ཁྱབ་པ་བྱས་ནས། རྫོང་ཨུའི་ཧྲུའུ་ཅི་དང་རྫོང་དཔོན་གྱི་ཙུའུ་ཀྲང་གི་འགན་བཞེས་པའི་གསར་གཏོད་ལས་དོན་འགོ་ཁྲིད་ཚོགས་ཆུང་བཙུགས་པ་དང་། གཤམ་འོག་ཏུ་ཆེད་དོན་གཞུང་ལས་ཁང་བཙུགས་ནས་རྫོང་མི་རིགས་ཆོས་ལུགས་ཅུས་སུ་གཅིག་གྱུར་འཆར་འགོད་དང་མཐུན་སྦྱོར་བྱས་ཏེ་ཏང་ཨུའི་འགོ་ཁྲིད་པ་དང་། སྲིད་གཞུང་གིས་འགན་ཁུར་བ། སྡེ་ཁག་བར་མཐུན་སྦྱོར་བྱེད་པ། སྤྱི་ཚོགས་མཉམ་ཞུགས་ཀྱི་ལས་ཀའི་བཀོད་པ་ཆགས་ཡོད། 《མུ་ལི་རྫོང་གིས་མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་ཁྱོན་ཡོངས་གཏིང་ཟབ་དང་རྒྱུན་སྲིང་ངང་སྤེལ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བའི་ལས་ཀའི་ཇུས་གཞི》སོགས་ཡིག་ཆ་རབ་དང་རིམ་པ་བཟོས་ནས་བཏོན་ཏེ། ཟླ་རེའི་ལས་དོན་གསལ་ཐོར་བརྟེན་ནས་འགན་འཁྲིའི་སྦྲེལ་ཐག་ནན་དུ་བཏང་བ་དང་། འཛུགས་སྐྱོང་ལས་དོན་དེ་རྫོང་ཨུ་དང་རྫོང་མི་དམངས་སྲིད་གཞུང་གི་ལོ་འཁོར་གྱི་དམིགས་ཚད་དཔྱད་ཞིབ་ནང་བཅུག་པ་དང་འབྲེལ། རྒྱུན་རྣམ་ཅན་གྱི་ལྟ་ཞིབ་དཔྱད་ཞིབ་ལམ་སྲོལ་བཙུགས་ནས། བཀོད་སྒྲིག་ཁག་རྩ་བ་ཚུགས་ཐུབ་པའི་འགན་ལེན་བྱས་པ་རེད། རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་སྡེ་ཚན་ཞིག་ཡིན་པའི་མུ་ལི་རྫོང་ཨུས་ད་དུང་ཐོག་མཐའ་བར་གསུམ་དུ་འགོ་ཁྲིད་ཨང་དང་པོའི་འདུ་འགོད་ལ་བརྟེན་ནས་གསར་གཏོད་ལ་དམ་འཛིན་བྱས་ཏེ་རིམ་པ་ཁག་གི་ཏང་རྩ་འཛུགས་དེ་མི་རིགས་མཐུན་སྒྲིལ་གྱི་སྲ་ཞིང་བརྟན་པའི་མཁར་རྫོང་ཞིག་ཏུ་འགྱུར་རྒྱུར་སྐུལ་འདེད་བཏང་ནས། བྱ་གཞག་འཕེལ་རྒྱས་ཆེད་གཞོམ་གཞིག་བྲལ་བའི་ཆབ་སྲིད་ཀྱི་འགན་ལེན་བརྟན་པོ་ཞིག་བསྐྲུན་ཡོད།

བསམ་བློའི་བླ་སྲོག་གཏིང་ཟབ་ཏུ་གཏོང་བ།

མུ་ལི་རྫོང་གིས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་སྣེ་ཁྲིད་དུ་བྱས་ཏེ། འཕྲིན་སྦྱོར་མཉམ་འདྲེས་ཀྱི་དྲིལ་བསྒྲགས་མ་ལག་བསྐྲུན་ནས། ཏང་གི་མི་རིགས་ཀྱི་རིགས་པའི་གཞུང་ལུགས་དང་། སྲིད་ཇུས་སྒྲིག་ཁྲིམས་དང་སྔོན་ཐོན་དཔེ་མཚོན་བྱ་གཞག་དྲིལ་བསྒྲགས་བྱས། དཔེར་ན་རྫོང་གྲོང་གི་མི་མང་འདུ་འཛོམས་བྱ་ཡུལ་དུ་བརྗོད་དོན་གཙོ་བོའི་དྲིལ་བསྒྲགས་སྦྱར་ཡིག་དང་སྤྱི་ཕན་བརྡ་ཁྱབ་བཟོས་པ་དང་འབྲེལ་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་ཟླ་བ་དང་བཅའ་ཁྲིམས་བདུན་སྤེལ་སོགས་ཀྱི་བྱེད་སྒོ་དང་ཟུང་འབྲེལ་བྱས་ནས། མི་རིགས་སྲིད་ཇུས་དང་ཁྲིམས་སྲོལ་མི་ཚང་མའིི་སེམས་ལ་ཟུག་པར་བྱས་ཡོད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སློབ་གསོ་དེ་རྒྱལ་དམངས་སློབ་གསོའི་མ་ལག་ནང་བཅུག་ནས་སློབ་གྲྭ་ཆུང་འབྲིང་གི་སློབ་དེབ་ཏུ་འཇུག་པ་དང་། སློབ་ཁང་དུ་སྤེལ་བ། སེམས་ལ་ཟུག་པ་བཅས་ཀྱི་འདུ་འགོད་ལ་སྐུལ་འདེད་ཏན་ཏིག་བཏང་སྟེ། མི་རིགས་ཁག་གི་གཞོན་ནུ་ལོ་ཆུང་ལ་མི་རིགས་མཐུན་སྒྲིལ་གྱི་སྒྲོག་གུ་ཐོག་མ་ཡག་པོ་རྒྱག་རྒྱུའི་ཁྲིད་སྟོན་བྱས་ཡོད། སྐྱ་མིའི་སྦྲག་ལམ་གྱི་སྙིང་སྟོབས་གསོན་ཉམས་ལྡན་པའི་སློབ་གཞིར་བྱས་ཏེ། རྒྱལ་ཡོངས་ཀྱི་ངལ་རྩོལ་དཔེ་བཟང་བ་ཝང་ཧྲུན་ཡིའུ་ཡིས་ལོ་བཅུ་ཕྲག་ཁ་ཤས་ཉིན་གཅིག་ལྟར་གངས་ལྗོངས་ས་མཐོར་བསྐྱོད་པ་དང་། ཏང་གི་གནས་ཚུལ་དང་དམངས་ཀྱི་འདོད་བློ་བརྒྱུད་སྤྲོད་བྱས་པའི་མི་སེམས་འགུལ་བའི་བྱས་རྗེས་སློབ་སྦྱོང་བྱ་རྒྱུ་སྒྲིག་འཛུགས་བྱས་ནས། མི་གཅིག་དང་རྟ་གཅིག །ལམ་གཅིག་བཅས་ཀྱི་མི་རིགས་མཐུན་སྒྲིལ་གྱི་གཏམ་བཟང་གིས་མི་རིགས་ཁག་གི་མང་ཚོགས་ཀྱི་སེམས་རྒྱུད་བརླན་པར་བྱས་ཏེ། མི་ཚང་མས་མཐུན་སྒྲིལ་ལ་སྣང་ཆེན་བྱེད་པ་དང་། དོན་དག་ཐམས་ཅད་མཐུན་སྒྲིལ་ལ་བརྟེན་ནས་སྒྲུབ་པ། གང་ས་ནས་མཐུན་སྒྲིལ་སྲུང་སྐྱོང་བྱེད་པའི་རྣམ་པ་ཆགས་ཡོད།

དཔེ་སྟོན་སྤུས་རྟགས་གྲགས་ཅན་བཏོད་པ།

མུ་ལི་རྫོང་གིས་མི་རིགས་མཐུན་སྒྲིལ་ཡར་ཐོན་གཏོད་པའི་མདུན་སྐྱོད་བཅུའི་ལས་དོན་ལ་སྐུལ་འདེད་གཏིང་ཟབ་བཏང་ནས་རྒྱུན་འཁྱོངས་ཐུབ་པ་དང་། ཤུགས་རྐྱེན་ཆེ་བ། མིག་དཔེར་འོས་པའི་དཔེ་སྟོན་བསྐྲུན་ཡོད། མིག་སྔའི་བར་རྫོང་དེ་ཡོངས་ཀྱིས་རིམ་རྩིས་བྱས་ན་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ་1དང་ཞིང་ཆེན་རིམ་པའི་དཔེ་སྟོན་ཚན་པ་2དང་ཁུལ་རིམ་པ་24། རྫོང་རིམ་པ་51གསོ་སྐྱོང་བྱས་ཡོད། 2025ལོར་རྫོང་ཡོངས་ཀྱི་མཉམ་སྡེབ་3དང་མི་སྒེར་6ལ་ཁུལ་རིམ་པའི་གཟེངས་བསྟོད་ཐོབ་པ་དང་། དཔེ་སྟོན་སྣེ་ཁྲིད་ཀྱི་ཕན་ནུས་རྒྱུན་མཐུད་ངང་མངོན་པར་བྱས་ཡོད།

དེ་དང་ཆབས་ཅིག །གྲོང་གསེབ་དར་རྒྱས་གཏོང་བའི་འཐབ་ཇུས་ལ་གཞི་ཚུགས་པ་དང་། རིན་འབྱུང་སོག་རིགས་ཡུལ་ཤོག་རིན་འབྱུང་གྲོང་ཚོའི་ལི་ཅ་ཅེ་ཕུའུ་ཡིས་མ་རྒྱུད་རུས་རྒྱུད་རིག་གནས་དང་ས་མཐོའི་མཛེས་ལྗོངས་ལ་བརྟེན་ནས། རིག་གནས་ཡུལ་སྐོར་མཉམ་འདྲེས་ཀྱི་དཔེ་སྟོན་ས་ཚིགས་བཏོད་དེ། མི་རིགས་ཁག་གི་མང་ཚོགས་ཐུན་མོང་ཐོག་གནས་ཚང་གཉེར་སྐྱོང་དང་དམངས་སྲོལ་འཁྲབ་སྟོན་ནང་ཞུགས་ནས་མཐུན་སྒྲིལ་གྱི་མེ་ཏོག་ལ་ཕྱུག་འགྱུར་གྱི་འབྲས་བུ་གཡུར་དུ་ཟ་བ་སྨིན་ཡོད།

དམངས་འཚོའི་ཕན་བདེ་བསྐྲུན་པ།

མུ་ལི་རྫོང་གིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ། མི་རིགས་མཐུན་སྒྲིལ་ཡར་ཐོན་གཏོད་རྒྱུ་དེ་གྲོང་གསེབ་དར་རྒྱས་གཏང་རྒྱུ་དང་གཅིག་གྱུར་གྱིས་ཇུས་འགོད་དང་། བཀོད་སྒྲིག །སྐུལ་འདེད་བཅས་བཏང་བར་མ་ཟད། མི་རིགས་ས་ཁུལ་གྱི་སྤྱི་པའི་ཞབས་ཞུའི་དངུལ་གཏོང་ཚད་ཇེ་མང་བཏང་ནས། སློབ་གསོ་དང་སྨན་བཅོས་སོགས་ཐོན་ཁུངས་དོ་སྙོམས་སྡེབ་སྒྲིག་བྱས། དཔེར་ན་འབྲི་གཡག་གསོ་སྤེལ་དང་། གཡེར་མ་འདེབས་འཛུགས། སྦྲང་མ་གསོ་སྤེལ་སོགས་ཁྱད་ཆོས་ལྡན་པའི་ཐོན་ལས་འཕེལ་རྒྱས་ཤུགས་ཆེན་གཏོང་བ་དང་། མཉམ་ལས་ཁང་དང་མི་རིགས་ཁག་གི་ཞིང་དུད་ཟུང་འབྲེལ་གྱི་དཔེ་དབྱིབས་ལ་བརྟེན་ནས། མི་རིགས་ཁག་གི་མང་ཚོགས་རྣམས་ཚོགས་པར་བརྟེན་ནས་འཕེལ་རྒྱས་དང་ཁེ་བཟང་མཉམ་སྤྱོད་ཐུབ་པར་བྱས་ཡོད།

2025ལོར་མུ་ལི་ཡིས་ད་དུང་ཁམ་བུའི་མེ་ཏོག་དུས་ཆེན་དང་། བེ་ཤ་དུས་ཆེན། ལྔ་པའི་ཚེས་ལྔའི་སྨན་ཟས་གསོལ་སྟོན། རི་སྐོར་མཚོ་སྐོར་དུས་ཆེན། ལོ་ལེགས་དུས་སྟོན་སོགས་དུས་སྟོན་དང་རྟེན་འབྲེལ་ཞུ་བའི་བྱེད་སྒོ་སྤེལ་བ་བརྒྱུད། ཡུལ་སྐོར་གཉེར་སྐྱོང་ཡོང་འབབ་སྒོར་ཁྲི་960ཙམ་ཟིན་པར་སྐུལ་ཁྲིད་བྱས་པར་མ་ཟད། ཁེ་ལས་7ལ་གྲུབ་འབྲས་ཐོབ་པའི་ངང་གན་རྒྱ་བཞག་པ་དང་། མ་དངུལ་སྒོར་དུང་ཕྱུར་15.3ཐོབ་སྟེ། མི་རིགས་ཁག་གི་མང་ཚོགས་ལ་ཐོན་ལས་འཕེལ་རྒྱས་ཁྲོད་འབབ་འཕར་གྱི་ཐབས་ལམ་རྒྱ་སྐྱེད་དུ་བཏང་བ་དང་།

མི་རིགས་མཐུན་སྒྲིལ་ལས་བྱུང་བའི་ཐུན་མོང་ཐོག་མཐུན་སྒྲིལ་འབད་འཐབ་བྱེད་པའི་དངོས་པོའི་རྨང་གཞི་བརྟན་དུ་བཏང་། དཔེར་ན་སྤོ་བོ་ཡུལ་ཚོའི་མང་ཚོགས་ཉི་མས་བེ་ཤ་དུས་ཆེན་ལ་བརྟེན་ནས་གནས་ཚང་གཉེར་ཏེ་དེ་སྔ་རི་གསེབ་ཏུ་ལུས་པའི་རི་སྐྱེས་ཤ་མོང་དེ་ཉིད་ཕྱུག་འགྱུར་གྱི་ལྡེ་མིག་ལྟ་བུར་བསྒྱུར་ཡོད། གདོང་ལམ་ཡུལ་ཤོག་གིས་དགོན་པའི་མེ་ཏོག་རིག་གནས་ཡུལ་སྐོར་དུས་ཆེན་ལ་བརྟེན་ནས་གནས་ཚང་33ལ་དུས་མཉམ་དུ་ཡོང་འབབ་འཕར་སྣོན་བྱུང་ཡོད།

རིག་གནས་ཀྱི་རྩ་བ་སྲུང་བ།

མུ་ལི་རྫོང་གིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་འཕེལ་རྒྱས་གཏོང་བའི་འདུ་འགོད་ལག་བསྟར་གཏིང་ཟབ་བྱས་ཏེ། རྒྱལ་ཁབ་རིམ་པའི་སྲོལ་རྒྱུན་གྲོང་ཚོ་9དང་ཞིང་ཆེན་རིམ་པའི་སྲོལ་རྒྱུན་གྲོང་ཚོ་3གྱི་སྤྱི་ཡོངས་རང་བཞིན་སྲུང་སྐྱོང་ལ་ཤུགས་སྣོན་རྒྱག་པ་དང་། ས་གནས་དེ་གའི་ཁྱད་ལྡན་རིག་གནས་ཐོན་ཁུངས་སྔོག་འདོན་གཏིང་ཟབ་བྱས་ནས། བོད་ཀྱི་ལ་གླུ་སོགས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་1དང་ཞིང་ཆེན་རིམ་པའི་རྣམ་གྲངས་6གི་སྲུང་སྐྱོང་དང་རྒྱུན་འཛིན་ལས་དོན་ཏན་ཏིག་སྤེལ་ཡོད།

2025ལོར། ལིའང་ཧྲན་ཁུལ་གྱི་སྐབས་དང་པོའི་ལུའུ་ཀུའུ་མཚེའུ་རི་སྐོར་མཚོ་སྐོར་དུས་ཆེན་མུ་ལི་ཡན་ལག་ཚོགས་རར་མི་རིགས་ཁག་གི་མང་ཚོགས་ཁྲི་ལ་ཉེ་བ་སེམས་ཀྱི་ཉི་ཟླ་མཚེའུ་འགྲམ་དུ་འཛོམས་ནས། མངོན་མིན་རིག་གནས་ཤུལ་བཞག་འགྲེམས་སྟོན་དང་། རྒྱན་གོས་ཤོམ་འགྲོ། མེ་ཕུང་དགོང་ཚོགས་སོགས་ཀྱི་བྱེད་སྒོ་གཅིག་རྗེས་གཉིས་མཐུད་དུ་སྤེལ་བ་དང་། གནའ་བོའི་རི་སྐོར་མཚོ་སྐོར་མཛད་སྒོ་དང་དེང་རབས་རིག་གནས་ཡུལ་སྐོར་ཉམས་ལེན་ཕན་ཚུན་ཟུང་དུ་འབྲེལ་བས། མི་རིགས་ཁག་གི་མང་ཚོགས་བར་གྱི་བརྩེ་དུང་དེ་གླུ་ལེན་དགོད་སྒྲའི་ཁྲོད་གཏིང་ཟབ་ཏུ་ཕྱིན་ཡོད། ལོ་བརྒྱའི་གནའ་གྲོང་མགོ་ཡག་གྲོང་ཚོའི་ལོ་ལེགས་དུས་སྟོན་ཐོག་ཡུལ་སྐོར་པ་སྟོན་པའི་ཤོག་བུ་བཟོ་བའི་ལག་རྩལ་ཉམས་ལེན་ནང་ཧུར་ཐག་ཞུགས་པ་དེས། མངོན་མིན་རིག་གནས་ཤུལ་བཞག་དེ་མི་རིགས་བར་འགྲོ་འོང་དང་སྤེལ་རེས་ལ་སྐུལ་འདེད་གཏོང་བའི་ཟམ་པ་ལྟ་བུར་གྱུར།

ད་ཆའི་མུ་ལི་རྫོང་དུ་རིག་གནས་ཕན་ཚུན་སློབ་སྦྱོང་བྱ་རྒྱུ་དེ་རྫོང་ཡོངས་ཀྱི་མི་རིགས་ཁག་གི་མང་ཚོགས་ཀྱི་མི་རིགས་མཐུན་སྒྲིལ་ཡར་བརྩོན་བྱེད་ཤུགས་ཆེ་རུ་གཏོང་བའི་སྒུལ་ཤུགས་གསར་པ་ཞིག་ཏུ་གྱུར་ཡོད།

ཁྲིམས་ལྟར་བཅོས་སྐྱོང་ལ་སྐུལ་འདེད་གཏོང་བ།

མུ་ལི་རྫོང་གིས་ཁྲིམས་སྐྱོང་གི་བསམ་བློ་དང་ཁྲིམས་སྐྱོང་གི་བྱེད་ཐབས་སྤྱད་དེ་མི་རིགས་ཀྱི་ལས་དོན་འཛིན་སྐྱོང་བྱ་རྒྱུ་མཐའ་འཁྱོངས་བྱས་ནས། ཁྲིམས་ལྟར་མི་རིགས་ཀྱི་ལས་དོན་ལ་དོ་དམ་བྱེད་པའི་ནུས་པ་དང་ཆུ་ཚད་རྒྱུན་མཐུད་ངང་མཐོ་རུ་བཏང་ཡོད། མི་རིགས་ཁག་གི་མང་ཚོགས་ལ་ཁྲིམས་སྐྱོང་དྲིལ་བསྒྲགས་སློབ་གསོ་གཏང་རྒྱུར་ཤུགས་སྣོན་བརྒྱབ་ནས། མང་ཚོགས་ལ་རང་རྟོགས་ངང་ཁྲིམས་བཀུར་ཁྲིམས་སྦྱོང་ཁྲིམས་སྲུང་ཁྲིམས་སྤྱོད་བཅས་བྱ་རྒྱུའི་ཁྲིད་སྟོན་བྱས་ཏེ། མང་ཚོགས་ཀྱིས་ཁྲིམས་ལྟར་རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱེད་པར་སྐུལ་འདེད་བཏང་ཡོད། མི་རིགས་ཀྱི་འགལ་ཟླ་དང་རྩོད་གཞི་གྲལ་བཤེར་དང་འདུམ་འགྲིག་བྱེད་པའི་ལམ་སྲོལ་འཐུས་སྒོ་ཚང་དུ་བཏང་བ་དང་འབྲེལ། ཞང་དང་གྲོང་རྡལ། གྲོང་ཚོ་ཁག་ཏུ་མི་རིགས་མཐུན་སྒྲིལ་གྱི་འདུམ་འགྲིག་ཁང་བཙུགས་ནས། མི་རིགས་ཁག་གི་ལས་བྱེད་པ་དང་མང་ཚོགས་ཀྱི་འཐུས་མིས་ཐུན་མོང་ཐོག་འདུམ་འགྲིག་ནང་ཞུགས་བཞིན་ཡོད། སྤྱི་ཚོགས་བདེ་འཇགས་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་གཏོང་བ་དང་ཁྲིམས་འགལ་ཉེས་གསོག་སྣ་ཚོགས་ལ་རྡུང་རྡེག་ཚ་ནན་བཏང་ནས། མི་རིགས་ཁག་གི་མང་ཚོགས་ལ་བདེ་འཇགས་བརྟན་བརླིང་གི་ཁོར་ཡུག་ཁྲོད་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་བྱས་ཏེ། མི་རིགས་མཐུན་སྒྲིལ་ཡར་ཐོན་གཏོད་ཆེད་དུས་བདེ་ཞི་མཐུན་གྱི་སྤྱི་ཚོགས་ཀྱི་ཁོར་ཡུག་བཟང་པོ་ཞིག་བསྐྲུན་བཞིན་ཡོད།

ད་ལྟའི་མུ་ལི་རུ་མི་རིགས་ཁག་སེ་འབྲུའི་འབྲུ་གུ་ལྟར་དམ་པོར་འཐམ་སྟེ་ཐུན་མོང་ཐོག་འབད་འཐབ་བྱེད་པའི་ཁྲོད་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་རྩོམ་བཞིན་ཡོད། སླད་ཕྱིན། མུ་ལི་རྫོང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་མུ་མཐུད་བརྟན་དུ་གཏང་རྒྱུ་གཙོ་རྐང་དུ་བྱས་ཏེ། མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གཏོད་རྒྱུ་རྒྱུན་མཐུད་གཏིང་ཟབ་ཏུ་བཏང་ནས། མཐུན་སྒྲིལ་གྱི་མེ་ཏོག་རྟག་ཏུ་བཞད་པ་དང་དར་རྒྱས་ཡོང་བ་བྱས་ཏེ། མི་རིགས་ས་ཁུལ་གྱི་དེང་རབས་ཅན་འཛུགས་སྐྲུན་ལ་རྫོགས་མཐའ་མེད་པའི་སྒུལ་ཤུགས་བསྣན་རྒྱུ་རེད། །