རྨ་ཆུ་ཁུག་མགོ་ནས་། “ཨ་མ་ལགས”དང་འགྲོགས་ནས་རྨ་ཆུར་སྐོར་ཞིབ་དུ་སྐྱོད་པ།

རྨ་ཆུའི་ཁུག་མགོ་དང་པོའི་མཚན་སྙན་བསྣམས་པའི་མཛོད་དགེ་རྫོང་ཐང་སྐོར་གྲོང་རྡལ་ན། “ཨ་མ་ལགས”73གྱིས་གྲུབ་པའི“ཨ་མ་ལགས་རྨ་ཆུ་མཛངས་མའི་དང་བླངས་པ་ཆུ་བོ་སྐོར་སྲུང་རུ་ཁག”ཟེར་བ་ཞིག་ཡོད།

སྤྱི་ཟླ་6པའི་ཚེས་9ཉིན། གསར་འགོད་པ་དང་ཁོ་ཚོ“རྨ་ཆུ་ཁུག་མགོ་དང་པོའི་དཀྱོགས་ཁུག”ནས་འཛོམས་ཏེ། ཨ་མ་ལགས་བཅུ་ཕྲག་འགའ་དང་ལྷན་དུ་རྨ་ཆུར་སྐོར་ཞིབ་བྱེད་པར་ཆས།

མི་གྲངས་བདུན་ནས་བདུན་ཅུ་དོན་གསུམ་ལ་སླེབས་ཤིང་། “ཨ་མ་ལགས”ཀྱི་རུ་དཔུང་སྟོབས་ཆེན་དུ་འགྲོ་བཞིན་འདུག

ཉིན་དེར་ཉི་འོད་དྲོ་ཞིང་འཇམ། རྨ་ཆུས་ཡུལ་དེ་ག་ནས་འཁྱོག་ཐིག་རབ་ཏུ་མཛེས་པ་ཞིག་བྲིས་ནས་རྒྱང་རིང་ལ་བཞུད། གསར་འགོད་པ་སྟོད་འགག་གློ་ཁ་གྱོན་པའི་ཨ་མ་ལགས་ཚོ་དང་མཉམ་དུ། ལག་གཅིག་ལ་འགྱིག་ཁུག་དང་ལག་པ་ཡ་གཅིག་ལ་སྐམ་པ་བཟུང་ནས་རྨ་ཆུའི་འགྲམ་ངོགས་ཀྱི་རྡོ་སྲུབས་ནང་གི་འགྱིག་དེམ་དང་ཝུ་སོབ་སྒམ། འགྱིག་ཁུག་རེ་རེ་ནས་བཏུས་ཏེ་ཁུག་མའི་ནང་དུ་འཇུག་པ་དང་། རྩྭ་གསེང་གི་འདམ་འོག་ཏུ་མནན་པའི་དྲ་བ་ཧྲལ་ཧྲུལ་ད་དུང་ཤེད་ཀྱིས་འཐེན་ནས་ཕྱིར་ཕྱུང་པ་རེད།

དགུང་ལོ་83ལ་ལོན་པའི་བསྟན་མོ་ལགས་ནི་རུ་དཔུང་ནང་གི་ལོ་ན་ཆེ་ཤོས་དེ་ཡིན། སྐོར་ཞིབ་ཀྱི་བཤུལ་ལམ་ཁྲོད་དུ། ཨ་མ་ལགས་ཀྱིས་རུ་དར་བསྒྲེངས་ནས་མདུན་ས་ནས་སྐྱོད་པ་དང་། མོའི་གོམ་འགྲོས་མྱུར་མོ་མིན་ཡང་གོམ་སྟབས་ཧ་ཅང་བརྟན། མོས་རྨ་ཆུར་མཛུབ་མོ་བཙུགས་ཏེ། རྨ་ཆུ་ནི་ང་ཚོའི་མ་ཡུམ་ཆུ་བོ་ཡིན། ང་ཚོས་ངེས་པར་རྨ་ཆུར་སྲུང་སྐྱོབ་ལེགས་པོར་བྱ་དགོས། ཞེས་གསུངས་བྱུང་། འདི་ཡང་རྨ་ཆུ་སྐོར་ཞིབ་རུ་དཔུང་གི་ཐོག་མའི་སེམས་འདུན་ཡིན།

ད་ལོར་ལོ་54ལ་སོན་པའི་སི་ཧུང་དབྱིན་ནི་རུ་དཔུང་གི་ལག་བསྟར་རུ་དཔོན་ཡིན་ལ། སྦྱོར་བ་འདི་དང་སྐུལ་བྱེད་མཁན་ཐོག་མའི་གྲས་ཀྱང་ཡིན། 2021ལོར། རྨ་ཆུའི་ཆུ་ལག་ཐང་སྐོར་གྲོང་རྡལ་གྱི་ཆུ་རྒྱུད་དུ་གད་སྙིགས་རི་ལྟར་སྤུངས་བའི་གནས་ཚུལ་མཐོང་བས་ན། ཆུང་དུས་ནས་རྨ་ཆུའི་འགྲམ་རྒྱུད་ནས་ནར་སོན་པའི་སི་ཧུང་དབྱིན་གྱི་སེམས་སུ་བཟོད་ཐབས་བྲལ་བའི་ན་ཟུག་གིས་ཁེངས། ཁོ་མོས་གྲོགས་མོ་འགའ་དང་གྲོས་བཏབ་རྗེས། 2022ལོའི་ཟླ་5པའི་ནང་རུ་དཔུང་འདི་བཙུགས་པ་རེད། རུ་དཔུང་འདིའི་མིང་གི“ཨ་མ་ལགས”ཞེས་པ་ནི་མ་ཡུམ་ཆུ་བོ་རྨ་ཆུའི་མཚོན་དོན་ཡིན་ལ། ཨ་མ་ལགས་སྐོར་ཞིག་གིས“ཨ་མ་ལགས”གཞན་ཞིག་སྲུབ་སྐྱོབ་བྱེད་པའི་ཁོ་ཚོ་རང་ཉིད་ཀྱང་མཚོན་པ་ཡིན། དང་ཐོག་རུ་དཔུང་ལ་མི་8མ་གཏོགས་མེད་ཅིང་།

མ་དངུལ་དང་ཡོ་བྱད་སོགས་ཀྱང་མེད་པས། ཁོ་ཚོའི་རང་ཁྱིམ་གྱི་ཡོ་ཆས་འཁྱེར་ཡོང་ནས་ཁོམ་པ་ཡོད་དུས་ཆུ་འགྲམ་དང་རྩྭ་ཐང་དུ་གད་སྙིགས་འཐུ་རུ་འགྲོ་བ་ཡིན།

ཐོག་མའི་དུས་སུ་ཁོ་ཚོའི་བགྱི་བ་འདི་མི་མང་པོ་ཞིག་གིས་དང་ལེན་མ་བྱས་རུང་།

ཁོ་ཚོས་གསལ་བཤད་ཀྱི་ངལ་བ་མ་བྱས་པར་བསམ་པ་ཕར་ཚུགས་ཀྱི་སྒོ་ནས་གད་སྙིགས་འཐུ་བའི་ལས་ལ་འབད། ཉིན་ཐོག་ཟླ་དང་ཟླ་ཐོག་ལོ་བཞག་པས་ན་རྨ་ཆུའི་འགྲམ་རྒྱུད་ཀྱང་ཉིན་རེ་ནས་ཉིན་རེར་གཙང་མར་གྱུར་པ་རེད། རུ་མི་ལྷ་མོ་སྒྲོལ་མར་མཚོན་ན་དང་ཐོག་རུ་དཔུང་དུ་ཞུགས་པར་སེམས་ཐག་གཅོད་མ་ནུས་པར་ཐེ་ཚོམ་གྱི་དྲ་རུ་ཚུད་མྱོང་ལ། 2024ལོའི་ཉིན་ཞིག་ལ་མོས་སྨྲ་བརྗོད་ཅི་ཡང་མེད་པའི་སྒོས་འགྱིག་ཁུག་ཞིག་ལག་ཏུ་བླངས་ཏེ་རུ་དཔུང་དུ་ཞུགས་པ་རེད། དུས་ད་ལྟ་མོས་ཁྱིམ་མིར་སྐུལ་མ་བྱས་ནས་ལྷན་དུ་གད་སྙིགས་འཐུ་བའི་ལས་ལ་གཞོལ་ཡོད། དེང་སྐབས་རུ་དཔུང་ལ་མི་73ཡོད་པ་དང་། དེ་ལས་ལོ་ན་ཆེ་ཤོས་ནི་ལོ་83ཡིན་ལ། ཆུང་ཤོས་ནི་ལོ་20ལྷག་ཡིན། དེ་ལས་འབྲོག་མི་ཡོད་ལ། ཚོང་པ་ཡོད། ལས་འཁྱུར་ངལ་གསོ་བྱས་པའི་ལས་བཟོ་པ་ཡང་ཡོད་མོད། འོན་ཀྱང་ད་ལྟ་ཁོ་ཚོར“ཨ་མ་ལགས”ཟེར་བའི་ཐུན་མོང་གི་མིང་ཞིག་ཐོགས་ཡོད།

རང་ཉིད་ཀྱིས་གད་སྙིགས་འཐུ་བ་ལས་གཞན། ད་དུང་ཡུལ་སྐོར་པ་ཚོ་དང་ལྷན་དུ་འཐུ་བཞིན་ཡོད།

རྨ་ཆུའི་འགྲམ་རྒྱུད་དུ་ལམ་མེད་པས། རྐང་འོག་ཏུ་རྡོ་ཧྲུག་གིས་ཁེངས་པས་གསར་འགོད་པ་གོམ་འགྲོས་ཁྱར་ཁྱོར་དུ་འགྲོ་དགོས་བྱུང་། ཡིན་ན་ཡང་། “ཨ་མ་ལགས”ཚོའི་གོམ་པ་ཧ་ཅང་བརྟན། ལོ་ན་62ཡིན་པའི་གཡུ་སྒྲོན་གྱིས་འཛུམ་དམུལ་ཏེ། སོང་བ་མང་ན་གོམས་ལོབས་སུ་གྱུར་ནས་རིམ་གྱིས་བརྟན་པོར་ཡོང་སྲིད། ཅེས་བཤད་བྱུང་། དེ་ནས་ལག་འཁྱེར་ཁ་པར་ནས་མོས་བརྒྱབ་པའི་རྨ་ཆུ་སྐོར་ཞིབ་ཀྱི་བརྙན་བསྟན་པ་དང་། བརྙན་རིས་རེ་རེའི་བཀོད་པ་ཧ་ཅང་སྤྱིར་བཏང་བ་ཞིག་ཡིན་མོད་བརྙན་ཚང་མར་སྤྲོ་བ་རྣལ་མ་ཞིག་གིས་ཁེངས་ཡོད། ཁོ་མོས་དང་ཐོག་བརྙན་རྒྱག་སྐབས་མིང་གྲགས་རྒྱས་པར་སེམས་གཏིང་ནས་རེ་མེད་མོད། འོན་ཀྱང་ད་ལྟ་མོའི་བརྩམས་ཆོས་ལྟ་བར་སྤྲོ་བས་ཆེས་ཆེར་བརྟས་པའི་ཞེན་མི་1100ཡོད།

“ཨ་མ་ལགས”ཚོས་རྩྭ་ཐང་ནས་གད་སྙིགས་འཐུ་བཞིན་པ། ཁྲེན་ཞན་ཧྥེང་གིས་པར་བླངས།

“ཨ་མ་ལགས”ཚོས་རྟག་ཏུ་རང་ཐོག་ནས་ཡོ་བྱད་ཉོ་བ་དང་གུང་ཟས་རང་གིས་འཛིན་པ་ཡིན། དགུན་ཁར་གནམ་གཤིས་དྲོ་གྲང་ཀླད་གོར་མན་གྱི་ཏུའུ་ཉི་ཤུ་སུམ་ཅུ་ལ་ལྷུང་ནས་རྨ་ཆུར་འཁྱགས་པས་གཡོགས་ཚེ། ཁྱིམ་གྱི་ལས་ཀར་བྲལ་བ་དེ་འདྲ་མི་ཆེ་བའི་གླགས་ལ་བསྟུན་ཏེ། ཁོ་ཚོ་སྒོ་ཕྱིར་བུད་ནས་གད་སྙིགས་འཐུ་བའི་གྲངས་ཀ་སྔར་བས་ཇེ་མང་ཡིན། ཐང་སྐོར་གྲོང་རྡལ་གྱི་སྐ་ཆུ་སྡེ་ཁུལ་གྱི་ཏང་ཀྲི་པུའི་ཧྲུའུ་ཅི་གཟུངས་མོ་འཚོས་དེ་ལྟར་བཤད་བྱུང་། ཁོ་མོ་ནི་2023ལོར་རུ་དཔུང་དུ་ཞུགས་པ་དང་ད་ལྟ་རུ་དཔུང་གི་འགོ་གཙོའི་འགན་བཞེས་ཡོད། ཁོ་ཚོས་གད་སྙིགས་འཐུ་བའི་ཞོར་དུ་ལྗོངས་ཁུལ་དུ“ཡུལ་སྐོར་པས་གད་སྙིགས་ཁུག་མ་གང་བཏུས་ན་ལེགས་སྐྱེས་ཆུང་ཆུང་རེ་ཡོད”ཅེས་པའི་བྱ་འགུལ་དྲིལ་སྒྲོག་བྱེད་དུའང་འགྲོ་བཞིན་ཡོད། དེའི་འབྲས་རྟགས་སུ། ཡུལ་སྐོར་པ་རྨ་ཆུ་སྐོར་ཞིབ་ཀྱི་རུ་དཔུང་དུ་ཞུགས་མཁན་ཡང་མང་དུ་འགྲོ་བཞིན་ཡོད་ལ། དེའི་ཁྲོད་ནས་ལ་ལས་མཉམ་པར་རྒྱག་པ་དང་ལ་ལས་སྐོམ་ཆུ་སྐྱེལ་བའི་ལས་ལ་བྲལ་བ་ཡིན། གད་སྙིགས་གང་བྱུང་དུ་འཕངས་ན་ཁ་ལ་སློབ་གསོ་གཏོང་བ་དང་། འགྲམ་རྒྱུད་ཉིལ་བ་དང་ཆུ་ལམ་འགག་པ་སོགས་ཀྱི་གནས་ཚུལ་བྱུང་ཚེ་པར་བརྒྱབ་ནས་ཐག་གཅོད་བྱེད་པར་མཐུན་སྦྱོར་བྱེད་པ་ཡིན། མཛོད་དགེ་རྗོང་ཆུ་དོན་ཅུས་ཀྱི་ཅུས་ཀྲང་གཞོན་པ་ཕེང་ཞའོ་ཡིང་གིས་གཟི་བརྗིད་ལྡན་པའི་ངང“རུ་དཔུང་འདི་ནི་ང་ཚོའི་སྐྱེ་ཁམས་སྲུང་སྐྱོབ་ཁྲོད་ཀྱི་ཡིད་རྟོན་རུང་བའི་གཞི་རིམ་གྱི་སྟོབས་ཤུགས་བཀན་མོ་ཞིག་ཡིན”ཞེས་བཤད།

མེ་གསོད་རུ་དཔུང་ཡང་དེའི་གྲལ་དུ་ཞུགས་ཤིང་། མི་སྔར་ལས་མང་པོས་གོམ་སྟབས་ཀྱིས་རྨ་ཆུའི་རིང་ཚད་འཇལ་བཞིན་ཡོད།

རྨ་ཆུ་སྲུང་སྐྱོབ་རུ་དཔུང་གིས་སྐོར་ཞིབ་བྱེད་བཞིན་པ།

མཛོད་དགེ་རྫོང་དུ་རྨ་ཆུ་སྲུང་སྐྱོབ་བྱེད་པར་གཞན་ད་དུང་2021ལོར་བཙུགས་པའི་སི་ཁྲོན་ཞིང་ཆེན་རྨ་ཆུ་སྲུང་སྐྱོབ་རུ་དཔུང་ཐོག་མ་དེ་ཡོད་ལ། ཆེད་ལས་ཀྱི་མེ་གསོད་མི་སྣ་50ཡིས་རྫོང་ཡོངས་ཀྱི་རྨ་ཆུ་འགྲམ་རྒྱུད་གལ་ཆེན་ལ་སྐོར་ཞིབ་བྱེད་པའི་འགན་དང་ལེན་བྱས་ཡོད། འགོ་འཛིན་བསྟན་མོ་ཡིས་སྐད་ཆ་དྲང་མོས“ང་ཚོ་རྨ་ཆུའི་འགྲམ་རྒྱུད་ནས་ནར་སོན་ཞིང་། ད་ལྟ་ཕྱིར་རྨ་ཆུར་སྲུང་སྐྱོབ་བྱེད་པའི་སྐལ་པ་ལྡན་པ་ནི་ང་ཚོའི་གཟི་བརྗིད་ཡིན”ཞེས་སྨྲས་བྱུང་། ཁོ་ཚོས་གོམ་པས་རྨ་ཆུའི་ཚད་བཅལ་ཞིང་། རས་གུར་འཁྱེར་ནས་སྐོར་ཞིབ་ལ་བསྐྱོད་པ་དང་། ལམ་ཐག་ཧྲིལ་པོར་ཧ་ལམ་གཟའ་འཁོར་གཉིས་ལ་འགྲོ་དགོས་འདུག

2022ལོར། “ཨ་མ་ལགས”རྨ་ཆུ་སྐོར་ཞིབ་རུ་དཔུང་དང་རྨ་ཆུ་སྲུང་སྐྱོབ་རུ་དཔུང་གཉིས་མཉམ་འབྲེལ་སྒོས་རྨ་ཆུ་དང་སྐ་ཆུའི་འགྲམ་རྒྱུད་དུ་མཐོ་སྒང་གི་ལྕང་སྡོང་སོགས་ས་ཆུ་སྲུང་འཛིན་གྱི་ལྗང་མྱུག་རྐང་14600ལྷག་བཙུགས་ཤིང་། དེར“མཛངས་མིའི་ནགས”ཞེས་མིང་ཐོབ་ཡོད།

“ཨ་མ་ལགས”རྣམས་ཀྱི་མིང་ཐོབ་མི་གཅིག་སོ་སོ་ཡིན་རུང་ཁོ་ཚོའི་དམིགས་པ་གཅིག་མཐུན་ཡིན་ཏེ། རྨ་ཆུ་མཉམ་སྤྱོད་བྱས་ཏེ། མ་ཡུམ་ཆུ་བོ་སྔར་ལས་མཛེས་སྡུག་ཅན་དུ་གཏང་རྒྱུ་དེ་ཡིན།

གསར་འགོད་པའི་གཏམ།

རྡོ་ཧྲུག་གིས་ཁེངས་པའི་ལམ་ཕྲན་ནས་སྐྱོད་སྐབས། གསར་འགོད་པའི་སྲེ་ལོང་རྡོ་ཡིས་གཙུབས་ནས་དམར་པོར་གྱུར་ལ། མཚམས་རེར་འགྱེད་གྲབས་ཀྱང་བྱས་སོང་། ཡིན་ན་ཡང་། “ཨ་མ་ལགས”ཚོ་དེ་ལྟ་བུའི་ལམ་ནང་ནས་ཕར་ཚུར་བགྲང་གིས་མི་ཟིན་པ་བསྐྱོད་མྱོང་བ་རེད། ཁོ་ཚོས་དུས་ཡུན་རིང་པོར་བརྩོན་པའི་རྒྱུན་མ་ལྷོད་པར་སྤྲོ་སྣང་གིས་ཁེངས་པ་ཞིག་ཅི་ལྟར་བྱུང་བ་ཡིན་ནམ། སི་ཧུང་དབྱིན་ལགས་ཀྱིས་བཤད་རྒྱུར། རྨ་ཆུ་ནི་མ་ཡུམ་ཆུ་བོ་ཡིན། མ་ཡུམ་སྐུ་བསྙུན་ཚེ་བུ་ཕྲུག་ཚོས་ཁ་ཡ་མི་བྱེད་པའི་དཔེ་ག་ལ་ཡོད་སྲིད། མི་ཞིག་གིས་དོན་དག་གཅིག“རང་གི་དོན་དག”ཅིག་ཡིན་པའི་རྣམ་འགྱུར་ཡོད་ཚེ། བརྟན་སྲུང་བྱེད་མི་དགོས་པར་དེ་ཉིད་རང་གཤིས་ཤིག་ཏུ་ཆགས་འགྲོ་བ་རེད། ཁོ་ཚོའི་རང་ཉིད་ཀྱི་བགྱི་བ་འདིར་ཡིད་སྤྲོ་ཞིང་གཟི་བརྗིད་ཅིག་ཏུ་བསྒོམས་ཡོད། སི་ཁྲོན་ལ་མཚོན་ན། “སྟོད་རྒྱུད་འདུ་ཤེས་ཇེ་དྲག་ཏུ་བཏང་སྟེ། དྭངས་གཙང་གི་ཆུ་བོ་ཞིག་ཤར་ལ་འབབ་པར་ཁག་ཐེག་བྱེད་པ”ནི་ནམ་ཡིན་རུང་སྟོང་ཚིག་སྐམ་པོ་ཞིག་མིན་པར། ཕྱོགས་ཡོངས་ནས་ཆུ་དཔོན་ལམ་ལུགས་ལག་ཏུ་བསྟར་པའི་བགྲང་བྱ་བཅུ་ཕྲག་གི་རིང་ལ། ཆུ་དཔོན་མཚོ་དཔོན་ཁྲི་5ཙམ་གྱིས་ཐེངས་གྲངས་ཁྲི་978ལྷག་ལ་ཆུ་བོར་སྐོར་སྲུང་བྱས་ཤིང་། དེ་ནི་སི་ཧུང་དབྱིན་དང་བསྟན་མོ། བསྟན་ཁོ་ལྟ་བུའི་དང་བླངས་པ་བགྲང་གིས་མི་ལང་པ་དག་གིས་ལོ་ཟླ་རེར་གོམ་པས་ཚད་འཇལ་ཞིང་བློ་བརྟན་འགྱུར་མེད་ཀྱིས་སྲུང་སྐྱོབ་བྱས་པའི་འབྲས་རྟགས་སུ་འཁུམས་སོ། །