དགེ་རྒན་ཚེ་འབུམ་གྱི་བགྲང་བྱ་སོ་དྲུག་རིང་གི་སློབ་གསོའི་ལས་དོན་བཀོད་པ།

བོད་ཡིག་བྲིས་གཟུགས་ཀྱི་སློབ་ཁྲིད་གནང་བཞིན་པ། 

 ཡུལ་མདོ་སྨད་ཀྱི་རོང་ཆེན་བཞིའི་ལེ་ལག་ཏུ་རྒྱས་བཏབ་པའི་ཐེ་རོང་གི་སྤང་ལ་འཁྲུངས་པའི་མེ་ཏོག་སྣ་བརྒྱའི་དྲི་བཟང་ཐུ་ལུ་ལུ། རྫ་ཆུ་བསིལ་མའི་བཞུར་སྒྲ་སི་ལི་ལི། བྱ་དང་བྱེའུའི་སྐད་སྙན་ཀྱུ་རུ་རུ། རི་དྭགས་ཚོགས་ཀྱིས་བང་རྩལ་ཤ་ར་ར་འགྲན་པའི་གནས་མཆོག་ཉམས་དགའ་བ་འདིའི་ས་ལ་བྱིན་ཆགས་ཤིང་། ཡུལ་ལ་བཅུད་འཛོམས་པ། སྐྱེ་བོ་ཕལ་མོ་ཆེ་རང་བཞིན་གྱིས་རྣམ་རིག་བཀྲ་ཞིང་ལས་བརྩོན་ཆེ་བ། མཐོ་ལ་བཀུར་ཤེས་ཤིང་དམའ་ལ་སྐྱོང་ཤེས་པ། མཉམ་ལ་འགྲོགས་ཤེས་པ་སོགས་བརྟན་གཡོའི་ཡོན་ཏན་ཡི་གེའི་གཟུགས་སུ་བཀོད་ན་བརྗོད་ཀྱིས་མི་ལང་ངོ་། །

སློབ་ཁྲིད་ལ་གསན་བཞིན་པ། 

དགེ་རྒན་ཚེ་འབུམ་ནི་ཐེ་རོང་ཤོག་བཞིའི་ཡ་གྱལ་ཚོང་རུ་ཤོག་ཀའི་སོ་ནམ་གྱི་འཁོས་ཀ་འཛིན་པའི་མི་ཚང་ཕལ་པ་ཞིག་ནས་ལང་ཚོའི་གཉོམ་ལག་རྒྱས་ཤིང་། ཆུང་བྱིས་པའི་གནས་སྐབས་ནས་སློབ་གྲྭ་ཆེ་འབྲིང་ཆུང་གསུམ་གྱི་དགའ་ཚལ་འགྲིམས་ནས་ལུགས་གཉིས་གཙུག་ལག་གི་ཟེའུ་འབྲུའི་བཅུད་ལ་རོལ་བའི་སྐལ་པ་བྱུང་། མི་ལྡོག་བརྟན་པའི་བརྩོན་འགྲུས་གོ་བགོས་ན། །གང་བརྩམས་ལས་ཀྱི་མཐའ་རྣམས་ཡིད་བཞིན་འགྲུབ། །ཅེས་གསུངས་པ་ལྟར། བགྲང་བྱ་སོ་དྲུག་གི་ལོ་ཟླའི་ཁྲོད་ནས་སློབ་གསོའི་ལས་དོན་ལ་ཤ་ཐང་རུས་ཐང་གིས་འབད་པའི་འབྲས་རྟགས་སུ། ཁོང་ལ་སི་ཁྲོན་ཞིང་ཆེན་གྱི་ཕུལ་བྱུང་དགེ་རྒན་དང་། སི་ཁྲོན་ཞིང་ཆེན་གྱི་ཁྱད་འཕགས་དགེ་རྒན། རྔ་བ་ཁུལ་གྱི་ཕུལ་བྱུང་སློབ་གསོའི་ལས་ཀ་བ་སོགས་ཀྱི་བདག་རྐྱེན་མང་པོ་ཐོབ།

སློབ་མའི་བློ་ཁ་དང་འཚམ་པ་སྔོན་དུ་བཏང་ནས། ཀྲུང་གོའི་གནའ་རབས་ལོ་རྒྱུས་དང་། སུམ་རྟགས་ཀྱི་རྣམ་བཤད་ཆུ་བོ་གཅིག་འདྲེས། མཚན་ཉིད་རིག་པའི་རྒྱུན་ཤེས་སོགས་ཀྱི་བསླབ་གཞི་པོད་བཅུ་ཕྲག་ལྷག་གི་ཡིག་སྒྱུར་དང་རྩོམ་སྒྲིག །ཞུ་དག་སོགས་ཀྱི་བགྱི་བ་ཆེན་པོ་དོན་དུ་གཉེར་བས་ན། མི་རིགས་སློབ་གསོའི་ལས་དོན་གོང་དུ་སྤེལ་བར་ཆར་པ་ཆུ་གྲོགས་དང་ཕྱར་བ་གྲུ་འདེགས་ཀྱི་རྗེས་སུ་མཐུན་པར་གྱུར། ད་ལྟ་ཁོང་གིས་སི་ཁྲོན་ཞིང་ཆེན་རྔ་བ་ཁུལ་མི་རིགས་མཐོ་རིམ་སློབ་འབྲིང་དུ་སློབ་གཙོ་གཞོན་པ་དང་སྐད་ཡིག་དགེ་རྒན་གྱི་འགན་བཞེས་བཞིན་པའོ། །

ངང་རྒྱུད་ཆུ་བོའི་རྒྱུན་བཞིན་རིང་བ་ནི་སློབ་མ་སྐྱོང་བའི་རུ་མ་ཡིན།

1990ལོ་སྟེ། ཕྱི་སྣོད་ཀྱི་འཇིག་རྟེན་ལ་སྐྱེས་སྟོབས་ཀྱི་དཔལ་འབར་ཞིང་། ཨུཏྤལ་སྔོན་པོའི་རང་མདངས་གོས་སུ་བཀླུབས་པའི་དབྱར་གཞུང་ཞིག་ལ། ལང་ཚོའི་ཁོ་ལག་རྫོགས་ཤིང་ཤེས་རིག་གི་འདབ་ལག་རྒྱས་པ། མིང་ལ་ཚེ་འབུམ་དུ་འབོད་པའི་མི་བུ་དེ་ནི། སི་ཁྲོན་ཞིང་ཆེན་བོད་ཡིག་སློབ་གྲྭ་ནས་སློབ་མཐར་ཕྱིན་རྗེས། ཤར་རྒྱལ་མོ་ཚ་བ་རོང་གི་མཐའ་བཞིའི་རྒྱལ་ཁམས་བསྐོར་བའི་སོ་མང་ཆུ་བོའི་འགྲམ་ངོགས་ཀྱི་ཅོག་ཙེ་རྒྱལ་ཁང་གི་འདབས་རོལ་ཏུ་ཆགས་པའི་འབར་ཁམས་མི་རིགས་དགེ་འོས་སློབ་གྲྭར། ཉིན་བྱེད་འཆར་ཀའི་འོད་སྣང་དང་འགྲོགས་ནས་དགེ་རྒན་གྱི་བགྱི་བ་དོན་དུ་གཉེར་བའི་དབུ་ཁྱུད་རི་མོ་འདི་ནས་བརྩམས་སོ། །

1991ལོར། ཁོང་གིས་ལྷུང་ལྷུང་བཞུར་བའི་སོ་མང་ཆུ་བོའི་རྒྱུན་དང་འགྲོགས་ནས་ཐོས་བསམ་གྱི་ལས་ལ་ནངས་སྔ་ལངས་དང་དགུང་འཕྱི་ཉལ་བྱས་པས། བོད་ལྗོངས་སློབ་གྲྭ་ཆེན་མོར་འགྲོ་བའི་གོ་སྐབས་བྱུང་། སློབ་ཆེན་གྱི་སྐྱེད་མོས་ཚལ་དུ་བོད་ཀྱི་རྩོམ་རིག་གཙོར་གྱུར་པའི་རྒྱལ་ཁབ་ཕྱི་ནང་གི་རྩོམ་རིག་གི་འདབ་བརྒྱ་ལྷུག་པོར་གྲོལ་བའི་ཟེའུ་འབྲུའི་བཅུད་ལ་ངོམས་པ་མེད་པར་ལོངས་སུ་སྤྱད། གཟའ་མཇུག་དང་དབྱར་དགུན་གྱི་གུང་གསེང་སྐབས་སུ་ལྷ་སའི་ཉེ་འཁོར་དུ་ཆགས་པའི་སེར་འབྲས་དགེ་གསུམ་གྱི་བཅུ་ཕྲག་རིག་པའི་གནས་ལ་མངའ་བརྙེས་པའི་དགེ་བཤེས་ཀྱི་ཞབས་ལ་གཏུགས་ནས་བོད་ཀྱི་གནའ་རབས་རྩོམ་རིག་སོགས་ཐུན་མོང་གི་རིག་གནས་ལ་སློབ་གཉེར་བྱས།

1994ལོར། བོད་ལྗོངས་སློབ་གྲྭ་ཆེན་མོ་ནས་མཐར་ཕྱིན་རྗེས། ཕྱིར་འབར་ཁམས་མི་རིགས་དགེ་འོས་སློབ་གྲྭར་ཡོང་ནས་མུ་མཐུད་དུ་བོད་ཡིག་དགེ་རྒན་གྱི་བྱ་བ་གཉེར་བ་དང་། ལོ་དེའི་སྟོན་ཟླ་དགུ་པར། སློབ་སྦྱོང་དང་སྤྱོད་ལམ་སོགས་ཕྱོགས་གང་ཐད་ནས་ཧ་ཅང་ཞན་པའི་འཛིན་གྲྭའི་གཙོ་བདག་གི་འགན་མི་ཁུར་ཀ་མེད་བྱུང་། ཁོང་གིས་ཟླ་བ་གཅིག་ལྷག་ཏུ་སློབ་མ་ཚོ་དང་ལྷན་དུ་འགྲོ་འཆག་ཉལ་འདུག་བྱས་ཏེ། སློབ་མ་སོ་སོའི་འཚར་ལོངས་བྱུང་སའི་ཁོར་ཡུག་དང་གཤིས་ཀ་སོགས་ལ་རྒྱུས་ལོན་ཞིབ་མོར་བྱས་རྗེས། སློབ་མ་བྱིངས་ཀྱི་བློ་ཁ་དང་འཚམ་པའི་སྒྲིག་ལམ་གསར་པ་ཞིག་བཞག །དགེ་རྒན་ཚེ་འབུམ་ན་རེ། སློབ་མ་སྐྱོང་བར་སྣ་ཚོགས་སྐྱོགས་བརྒྱ་ཡོད་ནའང། འོན་ཀྱང་། ཆེས་གལ་འགངས་ཆེ་བ་ནི་ངང་རྒྱུད་ཆུ་བོའི་རྒྱུན་བཞིན་རིང་དགོས་པར་འདོད། ཅེས་བཤད། ལོ་གཅིག་གི་རྗེས་སུ་འཛིན་གྲྭའི་སློབ་སྦྱོང་དང་སྤྱོད་ལམ་སོགས་ལ་འགྱུར་བ་ཆེན་པོ་བྱུང་བ་དང་། དགེ་གྲོགས་དང་ཁྱིམ་བདག་གིས་བསྟོད་པའི་མཐེ་བོང་མངོན་པར་བསྒྲེངས་སོ། །

སློབ་དཔྱོད་ནི་སློབ་གསོའི་ལས་དོན་ཡར་རྒྱས་སུ་འགྲོ་བའི་གཞི་མ་ཡིན།

ལོ་གསུམ་ལྷག་གི་སློབ་ཁྲིད་ཀྱི་ཐབས་ཤེས་དང་སློབ་དཔྱོད་ཀྱི་གྲུབ་འབྲས་སོགས་ཕྱོགས་གང་ཐད་ནས་གཞན་ལས་ཁྱད་པར་དུ་འཕགས་གཤིས། 1997ལོར། རྔ་བ་ཁུལ་ཚན་རིག་སློབ་དཔྱོད་ཁང་གི་གཞུང་ལུགས་ཚན་ཁག་གི་ཀྲུའུ་རེན་གྱི་འགན་བཞེས་པ་དང་། ཁུལ་ཡོངས་ཀྱི་སློབ་གྲྭ་ཆུང་འབྲིང་གི་དགེ་རྒན་ཁ་ཤས་སློབ་གྲྭ་ཆེན་མོར་འགྲིམས་པའི་སྐལ་པ་མ་བྱུང་བ་དང་། ཆེད་ལས་དགེ་རྒན་མིན་པའི་རྐྱེན་སྣ་ཚོགས་ཀྱི་དབང་གིས། སློབ་གསོར་བཟུང་བའི་འདུ་ཤེས་དང་སློབ་ཁྲིད་ཀྱི་ཐབས་ཤེས་སོགས་དུས་རབས་ཀྱི་འགྲོས་དང་མི་མཐུན་པའི་ཆ་དུ་མ་ཡོད་གཤིས། དགེ་རྒན་ཚེ་འབུམ་གྱིས་གཙོར་བྱས་ནས་ལས་རིགས་སོ་སོའི་ཆེད་མཁས་པ་མང་པོ་གདན་དྲངས་ཏེ། སློབ་གྲྭ་ཆུང་འབྲིང་གི་དགེ་རྒན་རྣམས་ལ་སློབ་དཔྱོད་སྐོར་གྱི་འཆད་ཁྲིད་དང་མཛུབ་སྟོན་རབ་དང་རིམ་པ་གནང་བའི་མཐུ་འོག་ནས། དགེ་རྒན་གྱི་ཡོན་ཚད་དང་སློབ་ཁྲིད་ཀྱི་ཐབས་ཤེས་སོགས་དུས་རབས་ཀྱི་འགྲོས་དང་མཐུན་པར་རིགས་པའི་རྒྱགས་ཕྱེ་དང་ལམ་སྟོན་གྱི་སྒྲོན་མེ་ལྟ་བུའི་མཐུན་རྐྱེན་བསྐྲུན། དགེ་རྒན་ཚེ་འབུམ་ན་རེ། རིགས་པ་ནངས་པར་འཆི་ཡང་བསླབ། །ཅེས་གསུངས་པ་བཞིན། གཙོ་བོ་ཐོས་བསམ་དང་ལག་ལེན་ཡ་མ་བྲལ་བར་བྱས་ན། ད་བཟོད་དགེ་རྒན་གྱི་ཡོན་ཚད་དང་སློབ་མའི་སྦྱངས་འབྲས་ཡར་རྒྱས་སུ་འགྲོ་ཐུབ་ལ། མི་རིགས་ཀྱི་སློབ་གསོའང་དེ་བསྟུན་གྱིས་ཡར་རྒྱས་སུ་འགྲོ་བ་ཆོས་ཉིད་ཡིན། ཞེས་བཤད། དེ་ལྟར། སློབ་ཁྲིད་ཀྱི་ཉམས་མྱོང་དང་སློབ་གསོོའི་གཞུང་ལུགས། སྲིད་ཇུས་སོགས་ཏིལ་ལ་ཏིལ་མར་གྱི་ཚུལ་དུ་སོང་གཤིས། ཁུལ་ཡོངས་ཀྱི་སློབ་གྲྭ་ཆུང་འབྲིང་གི་དགེ་རྒན་རྣམས་ལ། རྒྱལ་ཁབ་དང་། ཞིང་ཆེན། ཁུལ་རིམ་པ་བཅས་ཀྱི་སློབ་དཔྱོད་དང་འབྲེལ་བའི་བདག་རྐྱེན་མང་པོ་ཐོབ། ཁོང་གིས་སྔ་ཕྱིར། ཀྲུང་གོའི་སྤྱི་ཚོགས་ཚན་རིག་གླིང་གི་ཞིབ་འཇུག་སློབ་མའི་སློབ་གླིང་དང་སི་ཁྲོན་དགེ་འོས་སློབ་ཆེན་གྱི་ཞིབ་འཇུག་སློབ་མའི་བསླབ་ཚན་སོགས་ལ་སློབ་གཉེར་བྱས་ཏེ། ཀློག་པ་ཐོས་བསམ་གྱི་ལས་ལ་མི་ལྡོག་བརྟན་པའི་གོ་ཆ་བགོས།

2003ལོར། རྔ་བ་ཁུལ་ཚན་རིག་སློབ་དཔྱོད་ཁང་གི་བོད་ཡིག་སློབ་དཔྱོད་ཁང་དུ་བྱ་བ་གཉེར་བ་དང་། སྐབས་དེར། ཁུལ་ཡོངས་ཀྱི་བོད་ཡིག་སློབ་གྲྭའི་སློབ་ཁྲིད་ཀྱི་ཐབས་ལམ་སོགས་ཅུང་རྗེས་ལུས་ཡིན་པའི་སྟབས་ཀྱིས། མི་རིགས་སློབ་གསོ་ཡར་རྒྱས་སུ་འགྲོ་བའི་གེགས་སུ་གྱུར། དགེ་རྒན་ཚེ་འབུམ་གྱིས་སློབ་གསོ་ནི་རྒྱལ་ཁབ་དང་མི་རིགས་འཕེལ་རྒྱས་སུ་འགྲོ་བའི་གཞི་མ་ཡིན་པ་སེམས་མཐིལ་དུ་བཅངས་ནས། དཀའ་སྡུག་ཡོད་ཚད་ཅི་མི་སྙམ་པར་ཁྱད་དུ་བསད་ནས་རོང་འབྲོག་གི་སློབ་གྲྭ་མང་པོ་རྡོག་པས་མནན་ཏེ། ཉིན་མོའི་ཟས་བཅགས་ནས་དགེ་རྒན་གྱི་སློབ་ཁྲིད་ལ་སེམས་རྣལ་དུ་ཕབ་ནས་མཉན་པ་དང་། མཚན་མོའི་གཉིད་བཅགས་ནས་དགེ་རྒན་རྣམས་ལ་སློབ་ཁྲིད་ཀྱི་ཞན་ཆ་མ་ལུས་ལུང་རིགས་གཉིས་ཀྱི་ལམ་ནས་མཛུབ་མོ་རི་སྟོན་བྱས་པའོ། །

ཁོང་གིས་མཐོང་ཐོས་དྲན་རེག་གི་ཁྲོད་ནས་བསགས་པའི་ཉམས་མྱོང་གཅིག་ཏུ་བསྡུས་ནས། ལོ་བསྟུན་མར། ཁུལ་ཡོངས་ཀྱི་བོད་ཡིག་དགེ་རྒན་གྱི་སློབ་གསོའི་གཞུང་ལུགས་དང་བསླབ་གཞི། འཇོན་ནུས་བཅས་དང་འབྲེལ་བའི་ཟབ་སྦྱོང་རབ་དང་རིམ་པར་བསྡུས་པར་མ་ཟད། སློབ་ཁྲིད་ཀྱི་འགྲན་སྡུར་དང་རྩོམ་ཡིག་འགྲན་སྡུར་གྱི་བྱེད་སྒོ་ཡང་མང་པོ་སྤེལ་བས། དུས་ཀྱི་བགྲོད་པ་དང་མཐུན་པའི་སློབ་གསོའི་མཁའ་དབྱིངས་ནས་སློབ་ཁྲིད་ཀྱི་སྦྲང་ཆར་བསིལ་མ་སློབ་མའི་རྒྱུད་ཀྱི་གཤིན་སར་འབྱོར་བས། ཤེས་རིག་གི་མྱུ་གུ་སྔོན་མོས་རྔ་གཡང་ཕྱུག་མོའི་ས་གཞིའི་ཁྱོན་ཀུན་སྣུམ་པོར་བསྒྱུར།

མི་རིགས་རང་གི་རིག་གནས་ཀྱི་རྒྱན་ཆ་ལ་མི་རིགས་གཞན་གྱི་རིག་གནས་ཀྱི་ཕྲ་བཏབ་ན། ད་གཟོད། མི་རིགས་རང་གི་སློབ་གསོ་འཕེལ་རྒྱས་སུ་འགྲོ་བ་བསྙོན་དུ་མེད། ཁོང་གིས་བྲེལ་ཟིང་གི་བྱ་བའི་ཁྲོད་ནས། སི་ཁྲོན་ཞིང་ཆེན་མི་རིགས་འབྲིང་རིམ་དགེ་འོས་སློབ་གྲྭའི་བསླབ་གཞི་སྟེ། 《སྙན་ངག་ལ་འཇུག་ཚུལ་ཚིག་རྒྱན་རིག་པའི་སྒོ་འབྱེད》དང་། 《མཚན་ཉིད་རིག་པའི་རྒྱུན་ཤེས》 《སུམ་རྟགས་ཀྱི་རྣམ་བཤད་ཆུ་བོ་གཅིག་འདྲེས》 《མངོན་བརྗོད》 《མི་རིགས་ང་དྲུག་མེ་ཏོག་ང་དྲུག་འདྲ》 《ཀྲུང་གོའི་གནའ་རབས་ལོ་རྒྱུས》སོགས་དཔེ་ཆ་པོད་དགུ་ལྷག་གི་ཡིག་སྒྱུར་དང་ཞུ་དག་གི་འགན་བཞེས་ཤིང་། བསླབ་གཞི་འདི་དག་ལ་གོང་རིམ་ལས་ཁུངས་ཀྱིས་མཐུན་རྐྱེན་སྦྱར་བ་དང་།

ལས་གྲོགས་ཀྱིས་རྒྱབ་སྐྱོར་བྱས་པ། དགེ་སློབ་ཡོངས་ཀྱིས་བསྟོད་པའི་མཐེ་བོང་མངོན་པར་བསྒྲེངས་པར་མ་ཟད། ལྗོངས་ཞིང་ལྔའི་མཐོ་འབྲིང་དང་དགེ་འོས་སློབ་གྲྭའི་བསླབ་གཞིའང་གདམས། དགེ་རྒན་ཚེ་འབུམ་ན་རེ། བདག་གིས་ངལ་གསོའི་དུས་ཚོད་ཆུད་ཟོས་སུ་མ་བཏང་བར་སློབ་མའི་བློ་ཁ་དང་འཚམ་པའི་དཔེ་ཆ་འདི་དག་གི་ཡིག་སྒྱུར་དང་རྩོམ་སྒྲིག་གི་ལས་དོན་ལ་དགའ་དད་སྤྲོ་གསུམ་གྱིས་འཇུག་པ་ཡིན། ཞེས་བཤད། ཇི་འདྲ་བ་ཡི་སོན་བཏབ་པ། །དེ་འདྲ་བ་ཡི་འབྲས་བུ་འབྱུང་། །ཞེས་གསུངས་པ་ལྟར། བགྱི་བ་འདི་དག་གིས་སློབ་མའི་བསླབ་གཞིའི་ནང་དོན་ཕུན་སུམ་ཇེ་ཚོགས་སུ་བཏང་བ་དང་། སློབ་གསོའི་ལས་དོན་གོང་དུ་སྤེལ་བར་ཆར་པ་ཆུ་གྲོགས་དང་ཉི་མ་མེ་གྲོགས་བཞིན་ཕན་པའི་མཐུན་འགྱུར་གྱི་རྒྱུ་རུ་གྱུར་པ་ལྟ་ཅི་སྨོས།

དགེ་རྒན་ཚེ་འབུམ་གྱིས་གང་བརྩམས་ལས་ལ་གུས་རྟག་བརྩོན་པ་ཆུ་བོའི་རྒྱུན་བཞིན་བསྲིངས་པས། 2005ལོར། རྔ་བ་ཁུལ་ཕུལ་བྱུང་དགེ་རྒན་དུ་བདམས་པ་དང་། སྤྱི་ལོ་2007ལོར། སི་ཁྲོན་ཞིང་ཆེན་ཕུལ་བྱུང་དགེ་རྒན་དུ་བདམས་པ། 2010ལོར། སི་ཁྲོན་ཞིང་ཆེན་ཁྱད་འཕགས་དགེ་རྒན་དུ་བདམས་པ། 2012ལོར། རྔ་བ་ཁུལ་གྱི་ཤེས་ལྡན་མི་སྣ་རྩེ་གྲར་བདམས་པ་སོགས་སྔ་ཕྱིར་བདག་རྐྱེན་མང་པོ་ཐོབ།

གཞན་ཕན་གྱི་ལྷག་བསམ་ནི་དཀའ་སྤྱད་ལས་བྱུང་བ་ཡིན།

2013ལོར། དགེ་རྒན་ཚེ་འབུམ་གྱིས་རྔ་བ་ཁུལ་མི་རིགས་མཐོ་རིམ་སློབ་འབྲིང་དུ་སློབ་གཙོ་གཞོན་པ་དང་། མཐོ་འབྲིང་གི་བོད་ཡིག་དགེ་རྒན། ཡིག་གཟུགས་དགེ་རྒན་བཅས་ཀྱི་འགན་གཅིག་ལྕོགས་སུ་བཞེས། སློབ་གཙོ་གཞོན་པའི་འགན་བཞེེས་པའི་ལོ་ཟླའི་ཁྲོད་ནས་གོང་གི་སློབ་གཙོ་དང་འོག་གི་དགེ་སློབ་ཡོངས་ལ་ཡིད་སེམས་གཅིག་འདྲེས་བྱས་ཏེ། སློབ་གསོའི་ལས་དོན་ལ་ཉིན་ལས་ཉིན་ཐུང་ཞིང་མཚན་ལས་མཚན་ཐུང་བར་འབད་འབུངས་ལྷོད་མེད་བྱས་པས། སློབ་ཆེན་གྱི་དངོས་གཞིར་རྒྱུགས་འཕྲོད་པའི་སློབ་མ་ལོ་རེ་བཞིན་ཇེ་མང་དུ་ཕྱིན་པ་དང་། ལོ་བསྟུན་མར་ཁུལ་ཡོངས་ཀྱི་རིག་ཚན་དང་རྩིས་ཚན་གྱི་རྒྱུགས་འབྲས་ཨང་དང་པོ་བླངས་པར་མ་ཟད། དབྱིན་ཡིག་གི་སྐར་མ་137བླངས་པ་བཅས་ཀྱིས་མཚོན་པའི་བསླབ་ཚན་རྐྱང་བའི་ཆེས་མཐོའི་སྐར་གྲངས་ཐོད་བརྒལ་བྱས། དགེ་རྒན་ཚེ་འབུམ་ན་རེ། དགེ་རྒན་རྣམས་ཀྱིས་ཁ་འཁོབ་འཁོབ་དང་མིད་པ་སྐམ་སྐམ་གྱིས་ཤེས་བྱ་མ་ལུས་སློབ་མའི་རྒྱུད་ལ་བུམ་པ་གང་བྱོའི་ཚུལ་དུ་གནང་བའི་ལྷག་བསམ་གྱི་སྟོབས་དང་། སློབ་མ་རྣམས་ཀྱིས་བསླབ་པར་བྱ་བའི་གནས་ལ་ཕྱོགས་རིས་མེད་པར་ཀུན་ལ་ཞིབ་ཏུ་སྦྱངས་པའི་དཀའ་སྤྱད་ཀྱི་རྒྱུ་སྣ་ཚོགས་ལ་བརྟེན་ནས། གཡུར་དུ་ཟ་བའི་གྲུབ་འབྲས་བླངས། ཞེས་བཤད། དགེ་སློབ་ཡོངས་ཀྱི་རྩོལ་བ་མ་ཞན་འབད་བརྩོན་ལྷོད་མེད་བྱས་པའི་རྐྱེན་གྱིས། རྒྱལ་ཁབ་ཕྱི་ནང་གི་སློབ་གྲྭ་ཆེན་མོའི་སྒོ་ཐེམ་འགྲིམས་པའི་སྐལ་པ་ལྡན། འདི་ནི་མཁས་པ་སློབ་པའི་དུས་ན་སྡུག་ཅེས་གསུངས་པའི་ཞལ་གདམས་དྲོན་མོར་གོ་བ་གཏིང་ཟབ་རྙེད་པའི་དན་རྟགས་བསྙོན་དུ་མེད་པ་ཞིག་གོ །

ན་གཞོན་དགེ་རྒན་ནི་རྒྱལ་ཁབ་དང་མི་རིགས་ཤིག་གི་སློབ་གསོ་འཕེལ་རྒྱས་སུ་འགྲོ་བའི་གདུང་འདེགས་ཀྱི་ཀ་བ་ལྟ་བུ་ཡིན། དགེ་རྒན་ཚེ་འབུམ་གྱིས་སློབ་གཙོ་གཞོན་པའི་སློབ་གསོའི་ལས་བགོས་ཀྱི་འགན་བཞེས་རྗེས། སློབ་གསོ་བ་ཆེན་མོ་དཔལ་ལྡན་ཉི་མ་དང་། བོད་ཀྱི་བརྡ་སྤྲོད་རིག་པའི་ཁྱུ་མཆོག་ཏུ་བསྔགས་པའི་རྒན་ལྕགས་ཐར་རྒྱལ་སོགས་ཕྱོགས་དང་ཕྱོགས་མཚམས་ཀྱི་མཁས་དབང་མང་པོ་གདན་དྲངས་ནས་དགེ་སློབ་ཡོངས་ལ་འཆད་ཁྲིད་གནང་བ་དང། ན་གཞོན་དགེ་རྒན་མང་པོ་ཞིང་ཆེན་གཞན་པའི་སློབ་གྲྭ་ཚད་ལྡན་དག་ཏུ་མངགས་ནས་མ་ཤེས་པ་ཤེས་པ་དང་། ཤེས་པ་གོང་འཕེལ་དུ་འགྲོ་བར་དངོས་ཤུགས་བརྒྱུད་གསུམ་ནས་རྒྱུ་ཚེགས་ཕངས་མེད་དུ་བཏང་། དགེ་རྒན་དགའ་བ་བཀྲ་ཤིས་ན་རེ། སློབ་གསོའི་སྡེ་ཁག་གི་ཐུགས་ཁུར་དང་། སློབ་གྲྭའི་རྒྱབ་སྐྱོར་སོགས་ལ་བརྟེན་ནས་མཁས་དབང་མང་པོའི་མདུན་སར་གཏུགས་པ་དང། ཞིང་ཆེན་གཞན་པའི་སློབ་གྲྭ་ཚད་དག་ཏུ་སློབ་གཉེར་དུ་འགྲོ་བའི་སྐལ་པ་ལྡན། ཞེས་བཤད།

སི་ཁྲོན་ཞིང་ཆེན་འབར་ཁམས་མི་རིགས་དགེ་འོས་སློབ་གྲྭའི་སློབ་དེབ་སྟེ། མཚན་ཉིད་རིག་པ་དང་མི་ཚེ། སྐྱེ་དངོས་རྨང་གཞི། ས་རྒྱུས། ཆབ་སྲིད་དཔལ་འབྱོར་དང་སྤྱི་ཚོགས། རྫས་འགྱུར། དངོས་ལུགས། ལོ་རྒྱུས། གྲངས་རིག་གི་དཔེ་ཆ་སྟོད་སྨད་གཉིས་སོགས་དཔེ་ཆ་པོད་དགུ་ལྷག་གི་ཡིག་སྒྱུར་དང་རྩོམ་སྒྲིག །ཞུ་དག་བཅས་ཀྱི་བགྱི་བ་དོན་དུ་གཉེར། གཞན་དུ་ན། རྔ་བ་ཁུལ་རྩོམ་སྒྱུར་ཅུས་ཀྱིས་བསྒྲིགས་པའི་བྱིས་པའི་སློབ་དེབ་ཀྱི་དཔེ་ཆ་58ཞུ་དག་བྱས་པ་སོགས། དུས་རྣམ་ཀུན་ཏུ་སློབ་གྲྭ་ཆུང་འབྲིང་གི་སློབ་དེབ་མེད་པ་ནས་ཡོད་པ་དང་ཡོད་པ་ནས་ཇེ་རྒྱས་ཇེ་ལེགས་སུ་འགྲོ་བར་རང་གི་ནུས་པས་སྲི་ཞུ་བསྒྲུབས།

དཔྱད་རྩོམ་ནི་རང་གི་ལས་དོན་ཁྲོད་ཀྱི་སྤངས་བླངས་ཀྱི་གོ་ལྡོག་འབྱེད་པའི་ནོར་བུ་ཀེ་ཏ་ཀ་ལྟ་བུ་ཡིན་པ་དང་། རང་གི་ཆེད་ལས་ལ་བཟུང་བའི་རྣམ་འགྱུར་གལ་ཆེན་ཞིག་ཡིན་པར་མ་ཟད། ཐོས་བསམ་གྱི་རྒྱ་མཚོར་བསྐྱོད་པའི་གྲུ་གཟིངས་ལྟ་བུའང་ཡིན། 《རྒྱལ་རོང་ཁ་སྐད་ཀྱི་བརྡ་སྤྲོད་ལ་དཔྱད་པ་ཟུར་ལྟའི་ཡིག་ཆ》ཞེས་པའི་དཔྱད་རྩོམ་ནི། རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་ལས་གཞིའི་རྣམ་གྲངས་སུ་ཚུད་པ་དང་། 《བོད་ཀྱི་སློབ་མའི་སྤྱི་སྐད་ཀྱི་གནས་བབ་དང་དེར་ཞིབ་འཇུག》ཅེས་པར། ཞིང་ཆེན་རིམ་པའི་བདག་རྐྱེན་ཨང་གཉིས་པ་ཐོབ་ཅིང་། དེ་མིན་བོད་ཀྱི་རྩོམ་རིག་གི་ལོ་ཙྭ་ལ་དཔྱད་པ་སོགས་རིག་གཞུང་གི་དཔྱད་རྩོམ་ཁ་ཤས་དུས་དེབ་སོགས་སུ་སྤེལ། 2022ལོར། མཐོ་གཙོ་རིམ་པའི་མིང་བཏགས་བླངས། 2025ལོར། རྔ་བ་ཁུལ་ཨུ་དང་ཁུལ་སྲིད་གཞུང་གིས་རྔ་བ་ཁུལ་གྱི་ཕུལ་བྱུང་གི་སློབ་གསོའི་ལས་ཀ་བའི་བདག་རྐྱེན་བསྩལ།

དགེ་རྒན་ཚེ་འབུམ་གྱིས་གཞོན་སོ་དཀར་ནས་རྒན་མགོ་དཀར་བར་གྱི་བགྲང་བྱ་སོ་དྲུག་གི་ལོ་ཟླའི་འཁོར་སྐྱོད་ཁྲོད་ནས་སྐར་མ་ཞྭ་བྱེད་དང་བ་མོ་ལྷམ་བྱེད་ཀྱི་དཔེ་ལྟར་གཞན་ཕན་གྱི་ལས་ལ་ཆེས་ཆེར་གཞོལ་ནས། ཤ་ཁྲག་གདོས་བཅས་སུ་གྲུབ་པའི་མི་ལུས་རིན་ཆེན་སློབ་གསོའི་རྟེན་དུ་ཕུལ་ཏོ། །