མཚོ་སྔོན་རྒྱང་སྒྲོག་བརྙན་འཕྲིན་ཁང་ཨ་མདོ་བོད་སྐད་འཕྲིན་སྦྱོར་ལྟེ་གནས་ནི་མཚོ་སྔོན་དང་ཀན་སུའུ། སི་ཁྲོན་སོགས་བོད་འབྲེལ་ས་ཁུལ་གྱི་རྒྱ་ཆེ་བའི་མང་ཚོགས་ཀྱིས་དོ་སྣང་ཆེས་ཆེར་བྱེད་བཞིན་པའི་གཙོ་རྒྱུག་འཕྲིན་སྦྱོར་ལས་ཁུངས་ཤིག་ཡིན་ལ། ལས་ཁུངས་འདིའི་གསར་འགོད་པ་དག་གིས་བཅར་འདྲི་དང་ལོ་ཙཱ། རྩོམ་འབྲི། བརྙན་ལམ་དུ་འབུད་པ། བརྒྱུད་ལམ་ཁག་ཏུ་གསར་འཕྲིན་སྤེལ་བ་བཅས་གཅིག་ལྕོགས་ངང་གཉེར་རྒྱུ་ལག་བསྟར་བྱེད་བཞིན་ཡོད་པས། ཡུལ་དངོས་ནས་ཐད་ཀར་ལོ་ཙཱ་བྱེད་ཐུབ་རྒྱུ་ནི་གནས་འདིའི་གསར་འགོད་པ་ཚོའི་འགྲན་རྩོད་ནུས་ཤུགས་གཙོ་ཤོས་དེ་ཡིན།
དང་པོ། གླེང་གཞི།
ཨ་མདོ་བོད་སྐད་འཕྲིན་སྦྱོར་ལྟེ་གནས་སུ་རྒྱ་བོད་སྐད་གཉིས་ལ་ནང་བྱན་ཆུད་པའི་འཇོན་མི་ཅུང་དཀོན་པ་དང་། ལས་སྒོ་ཁག་ལ་དུས་ཚོད་ཀྱི་ཚད་བཀག་ཤིན་ཏུ་ཆེ་བས། “མི་གཅིག་གིས་གོ་མང་པོ་ཆོད་རྒྱུ་དང་།
བཅར་འདྲི་དང་ལོ་ཙཱ་གཅིག་ལྕོགས་སུ་སྒྲུབ་པའི”ཁྱད་ལྡན་གྱི་བྱ་བ་སྒྲུབ་སྟངས་ཤིག་ཆགས་ཡོད།
འདིར་ཨ་མདོ་བོད་སྐད་འཕྲིན་སྦྱོར་ལྟེ་གནས་ཀྱི་ཉིན་རེའི་བྱ་བ་དང་བརྗོད་དོན་སྙན་ཞུ་གལ་ཆེན་གྱི་གོ་རིམ་དངོས་གཉིས་ཟུང་འབྲེལ་བྱས་ཏེ། “བཅར་འདྲི་དང་ལོ་ཙཱ་གཞི་གཅིག་ཅན”གྱི་རྣམ་པར་གནས་པའི་ཡུལ་དངོས་ལོ་ཙཱའི་ནང་གནས་ཀྱི་ཆོས་ཉིད་དང་བྱང་ཚད་ཀྱི་བླང་བྱ་ལྟར་དུ། བོད་སྐད་གསར་འགྱུར་སྒྲོག་གཏོང་གི་ཕན་ནུས་རང་བཞིན་ལ་བཀོལ་ཆོག་པའི་བྱེད་ཐབས་སྐོར་ཞིག་བྲིས་ཡོད།
གཉིས་པ། “བཅར་འདྲི་དང་ལོ་ཙཱ་གཞི་གཅིག་ཅན”གྱི་ཡུལ་དངོས་ལོ་ཙཱའི་ཁྱད་ཆོས་གཙོ་བོ།
གཅིག་ནས་ཐལ་ཆེ་བའི་སྐབས་འཕྲལ་རང་བཞིན་ལྡན་ཏེ། གསར་འགོད་པས་ཡུལ་དངོས་ནས་ཉན་ཞོར་བསྒྱུར་ཞོར་དང་ལྟ་ཞོར་འབྲི་ཞོར་བྱེད་དགོས་ཤིང་། གློ་བུར་བའི་དོན་རྐྱེན་སོགས་ཀྱི་གནས་ཚུལ་སྤེལ་དུས་སུ་ལོ་ཙཱ་བྱེད་ཡུན་སྐར་ཆ་འགའ་ཤས་ལས་མེད། གཉིས་ནས་ཐོབ་ཐང་ཉིས་བརྩེགས་ཀྱི་རང་བཞིན་ལྡན་ཏེ། གསར་འགོད་པ་ནི་བཅར་འདྲི་མཁན་བང་ལབ་གླེང་གི་ཁྲིད་སྟོན་པ། དོན་དངོས་སྔོག་འདོན་བྱེད་མཁན། ལོ་ཙཱ་བྱེད་མཁན་བཅས་ཡིན་པས་ག་དུས་ཡིན་ཡང་འཁྲུལ་བ་མེད་པའི་ཆ་འཕྲིན་བརྒྱུད་སྤྲོད་བྱེད་ཤེས་དགོས། གསུམ་ནས་ལྟ་མཁན་དང་ཉན་མཁན་ལ་ཁ་གཏད་པའི་གླེང་ཕྱོགས་ཀྱི་རང་བཞིན་ལྡན་ཏེ། གསར་འགོད་པ་ཞིག་ལ་མཚོན་ནའང་གཞན་སྐད་རང་སྐད་དུ་ཇི་བཞིན་བསྒྱུར་དགོས་ཁར། རྒྱ་ཆེའི་རོང་འབྲོག་མང་ཚོགས་གསར་འགྱུར་གྱི་གོ་བ་ལོན་དུ་འཇུག་རྒྱུ་ནི་ཁག་ཐེག་དང་པོར་བརྩི་དགོས།
གསུམ་པ། “བཅར་འདྲི་དང་ལོ་ཙཱ་གཞི་གཅིག་ཅན”གྱི་ཡུལ་དངོས་ལོ་ཙཱའི་དཀའ་ངལ་གཙོ་བོ།
གཅིག་ནས་གནད་འཁེལ་རང་བཞིན་དང་ནུས་ལྡན་དུས་ཡུན་བར་གྱི་འགལ་བ་ཡོད་དེ། དེ་ནི་བོད་སྐད་གསར་འགོད་པས་གསར་འགྱུར་གྱི་རིགས་ལོ་ཙཱ་བྱེད་སྐབས་འཕྲད་པའི་འགལ་བ་མངོན་གསལ་དོད་ཤོས་དེ་ཡིན། བཅར་འདྲིའི་སྐབས་ལ་ལར་ཕ་རོལ་པོའི་སྐད་ཆ་མྱུར་དུ་ལོ་ཙཱ་བྱེད་ཐུབ་དགོས་ཏེ། མཚམས་གཅད་མི་རུང་བར་མ་ཟད་སྐད་ཆ་མཐའ་དག་བློར་ཤོང་མ་ཐུབ་ཚེ་ནོར་འཁྲུལ་ཡང་ཤོར་ཉེན་འདུག་ལ། སྐད་ཆ་རིང་པོའི་རིགས་ལོ་ཙཱ་བྱེད་དུས་སུ་ཚིག་དམ་དུམ་ལུས་རྒྱུ་དང་། ཐོག་མའི་ནང་དོན་ཇེ་མོག་ཏུ་འགྱུར་རྒྱུའི་ཉེན་ཁའང་ཡོད་པ་རེད།
གཉིས་ནས་ཐོབ་ཐང་ཉིས་བརྩེགས་ཀྱིས་བསྐྱེད་པའི་ཆ་འཕྲིན་གྱི་ཟད་སྐྱོན་ཡོད་དེ། དུས་གཅིག་ལ“ཉན་པ་དང་འབྲི་བ། ལོ་ཙཱ་བྱེད་པ། འདྲི་བ”བཅས་འགན་འཁྲི་བཞི་ཕྲག་ཏུ་ལེན་དགོས་སྟབས་རྣམ་རིག་ཤིན་ཏུ་འཆོལ་སླ། བཅར་འདྲི་བྱེད་ཡུལ་གྱི་སྐད་ཆའི་འགྲོས་མགྱོགས་དྲགས་པ་དང་ཡང་ན་དོན་གསལ་པོར་བཤད་མི་ཐུབ་པའི་སྐབས་སུ། རྟག་པར་ཆ་འཕྲིན་གཙོ་བོའི་རིགས་མ་གཏོགས་སེམས་ལ་འཛིན་དཀའ་བས་ན། གསར་འགྱུར་གྱི་གླེང་སློང་སྟངས་ཚུན་ཆད་པོ་གླུ་བརྒྱ་གདངས་གཅིག་གི་དཔེ་རུ་འགྲོ་ཉེན་ཡོད།
གསུམ་ནས་རིག་གནས་གོམས་སྲོལ་དང་འབྲེལ་བའི་ཐ་སྙད་ཀྱི་རིགས་ཡུལ་དངོས་སུ་ལོ་ཙཱ་བྱ་རྒྱུའི་དཀའ་ངལ་ཡོད་དེ། མི་རིགས་སོ་སོའི་ཡུལ་སྲོལ་གོམས་གཤིས་དང་ཆོས་ལུགས་དད་མོས། ཐོན་སྐྱེད་འཚོ་བའི་སྐོར་གང་དུའང་སྐད་རིགས་གཞན་དུ་བསྒྱུར་དཀའ་བའི་ཐ་སྙད་ཀྱི་རིགས་ཏུ་མང་ཁར། གསར་བྱུང་གི་བརྡ་ཆད་དག་ཀྱང་གསར་འགོད་པ་ཚོས་དེ་མུར་ཁུངས་དང་ལྡན་པའི་སྒོ་ནས་ལོ་ཙཱ་བྱེད་ཤེས་དགོས།
བཞི་ནས་ཕལ་སྐད་དང་ཡིག་སྐད་བརྗེ་བསྒྱུར་ཐད་ཀྱི་དཀའ་ངལ་ཡོད་དེ། མང་ཤོས་ཀྱིས་རང་རང་གི་ཡུལ་ཕྱོགས་ཀྱི་ཕལ་སྐད་བཤད་པའི་ཁར། སྐད་ཆ་ཧྲིལ་པོ་མི་བཤད་པ་དང་གསལ་པོར་མི་བཤད་པ་སོགས་བརྡ་སྤྲོད་སྟངས་ཅི་རིགས་འབྱུང་ངེས་པས། གསར་འགོད་པ་དག་གིས་དེ་མཐའ་དག་ཚད་ལྡན་ཡང་དག་གི་ཡིག་སྐད་དུ་ཕབ་པ་དང་། ལོ་ཙཱ་བྱེད་པའི་ཐབས་ལམ་བརྒྱུད་བསྟན་དོན་ལེགས་པོར་མཚོན་དགོས།
བཞི་པ། བཅར་འདྲི་དང་ལོ་ཙཱ་གཞི་གཅིག་ཅན་གྱི་ཡུལ་དངོས་ལོ་ཙཱར་མཁོ་བའི་བྱང་ཚད་གལ་ཆེན་བཞི།
གཅིག་ནས་བོད་སྐད་གསར་འགོད་པ་མཐའ་དག་ལ་ཆབ་སྲིད་ཀྱི་ཚོར་བ་སྐྱེན་པོ་དགོས་ཏེ། མི་རིགས་སྲིད་ཇུས་དང་ཆོས་ལུགས་སྲིད་ཇུས་ཁོང་དུ་ཆུད་པར་བྱས་ནས། རྒྱལ་ཁབ་ཀྱི་བདག་དབང་དང་མི་རིགས་ཁག་གི་འབྲེལ་བའི་སྐོར་སོགས་ལོ་ཙཱ་བྱེད་དུས་སུའང་འབྲེལ་ཡོད་སྡེ་ཁག་གི་ཞིབ་བརྗོད་དང་གཅིག་གྱུར་ཡོང་བ་ནན་སྲུང་བྱེད་དགོས།
གཉིས་ནས་སྐད་རིགས་གཉིས་དང་རིག་གནས་གཉིས་ཀྱི་མ་མཐའི་བྱང་ཚད་ཡོད་དགོས་ཏེ། མ་མཐའ་ཡང་རྒྱ་ཡིག་དང་བོད་ཡིག་གཉིས་ཀྱི་བྱང་ཚད་དགོས་ཁར། ཡུལ་སྲོལ་གོམས་གཤིས་དང་ཕལ་སྐད་འདྲ་མིན་གྱི་སྐོར་ལའང་རྒྱུས་མངའ་ཡོད་དགོས་ལ། རིག་གནས་ཀྱི་བར་ཁྱད་དང་བརྡ་སྤྲོད་སྟངས་ཀྱི་ཧེ་བག་ལའང་ཆ་རྒྱུས་ཡོད་དགོས།
གསུམ་ནས་གསར་འགྱུར་དང་འབྲེལ་བའི་ཆེད་ལས་ཀྱི་བྱང་ཚད་ལྡན་དགོས་ཏེ། བོད་སྐད་འཕྲིན་སྦྱོར་གྱི་ལས་ཀ་གཉེར་བའི་གསར་འགོད་པ་དག་ལ་གསར་འགྱུར་གྱི་ཚོར་བ་སྐྱེན་པོ་དགོས་ཁར། ཆ་འཕྲིན་གལ་ཆེན་ངོས་འཛིན་དང་ལོ་ཙཱ་བྱེད་པའི་བརྒྱུད་རིམ་ཁྲོད་དུ་གཙོ་གནད་འཚོལ་མཁས་པའི་རྣམ་དཔྱོད་ཀྱང་དགོས།
བཞི་ནས་ཡུལ་དངོས་ཀྱི་བབ་དང་བསྟུན་ཤེས་རྒྱུའི་འཕྲལ་བསྟུན་གྱི་ནུས་པ་དང་ཆ་འཕྲིན་ལེགས་འདེམས་ཀྱི་ནུས་པ། ཆགས་སྡང་ལ་ཁ་ལོ་བསྒྱུར་ཐུབ་པའི་ནུས་པ། ནོར་འཁྲུལ་ཡོ་བསྲང་གི་ནུས་པ་སོགས་འཛོམས་དགོས།
ལྔ་བ། བཅར་འདྲི་དང་ལོ་ཙཱ་གཞི་གཅིག་ཅན་གྱི་ཡུལ་དངོས་ལོ་ཙཱའི་བྱང་ཚད་ཇེ་མཐོར་གཏོང་ཐབས།
གཅིག་ནས་སྐད་གཉིས་རིག་གནས་དང་འབྲེལ་བའི་གསབ་སྦྱོང་བསྒྲུབ་རྒྱུ་དང་། དུས་ལྟར་སྲིད་ཇུས་ལ་སློབ་སྦྱོང་དང་སྐད་གཉིས་ཀྱི་ཆེད་མཁས་དག་གདན་དྲངས་ཏེ་ལོ་ཙཱའི་ཉམས་མྱོང་བརྗེ་རེས་བྱེད་དགོས།
གཉིས་ནས་འབྲེལ་ཡོད་བརྡ་ཆད་ལ་རྒྱུས་ལོན་བྱེད་པ་དང་ཟིན་བྲིས་འབྲི་བ། བཅར་འདྲིའི་སྒྲ་བརྙན་མཐའ་དག་གཏན་འབེབས་དང་འཕྲོད་མིན་ལ་ལྟ་རྒྱུར་དང་དོད་བྱས་ཏེ། རྒྱུན་པར་བཀོལ་སྤྱོ་བྱས་ཆོག་པའི་ཚད་ལྡན་གྱི་རྒྱུ་ཆ་བསྒྲིག་དགོས།
གསུམ་ནས་བོད་སྐད་སྨྱན་སྦྱོར་ལས་ཁུངས་ཀྱིས་ལོ་ཙཱའི་འགན་ནུས་དོན་འཁྱོལ་སྒོས། མཉམ་དུ་བོད་སྐད་གསར་འགྱུར་ལོ་ཙཱའི་བརྡ་མཛོད་དང་དུས་སྐབས་རེ་རེའི་ཆབ་སྲིད་བརྡ་ཆད་ཀྱི་འགུལ་རྣམ་གྲངས་མཛོད་བཟོས་ཏེ་རྟག་པར་སློབ་གཉེར་བྱེད་དགོས། །
（རྩོམ་པ་པོ། ཨ་མདོ་བརྙན་འཕྲིན་ཁང་།）