གྱོད་དཔེར་འབྲེལ་ཏེ་དམངས་ཁྲིམས་དང་ཉེས་ཁྲིམས། སྲིད་འཛིན་ཁྲིམས་བཅས་ཀྱི་ཁྱད་པར་གླེང་བ།

དང་པོ། གྱོད་དཔེའི་གཞི་རྩའི་གནས་ཚུལ།

རླངས་འཁོར་Aཡི་ཁ་ལོ་བས་ལས་འཛོལ་བྱུང་ནས་ལམ་འགྲམ་གྱི་རླངས་འཁོར་Bདང་ལམ་འགྲོ་བ་C། རླངས་འཁོར་Dདང་Eསོ་སོར་བརྡུངས་ནས། རླངས་འཁོར་Dདེ་སླར་ཡང་ལམ་འགྲམ་གྱི་གློག་སྒུལ་རྐང་འཁོར་དང་གདོང་ཐུག་བྱུང་། དེ་ལྟར་གོང་གི་རླངས་འཁོར་དང་གློག་སྒུལ་རྐང་འཁོར་དག་ལ་ཚད་གཞི་མི་འདྲ་བའི་ཆག་སྐྱོན་བཟོས་པ་དང་ལམ་འགྲོ་བ་Cལ་རྨས་སྐྱོན་ཕོག་པའི་གཞུང་ལམ་འགྲིམ་འགྲུལ་གྱི་དོན་རྐྱེན་བཟོས།

འགྲིམ་འགྲུལ་ཉེན་རྟོག་པས་ཡུལ་དངོས་ནས་རྩད་ཞིབ་བྱས་རྗེས་འབྲེལ་ཡོད་བྱེད་པོ་སོ་སོའི་དོན་རྐྱེན་འགན་འཁྲི་ལ་ངོས་འཛིན་བྱས་ཏེ། རླངས་འཁོར་Aཡི་ཁ་ལོ་བར་རླངས་འཁོར་སྐོར་ཆོག་པའི་དཔང་ཡིག་ཐོབ་མེད་པའི་དབང་གིས་དོན་རྐྱེན་གྱི་འགན་གཙོ་བོ་འཁུར་དགོས། རླངས་འཁོར་Bདང་D། རླངས་འཁོར་Eབཅས་ཀྱི་ཁ་ལོ་བ་སོ་སོས་སྒྲིག་ལམ་ལྟར་རླངས་འཁོར་འཇོག་གནས་ནས་རླངས་འཁོར་བཞག་མེད་པས་དོན་རྐྱེན་གྱི་འགན་འཁྲི་ཕལ་པ་འཁུར་དགོས། ལམ་འགྲོ་བ་Cདང་གློག་སྒུལ་རྐང་འཁོར་གྱི་ཀུང་སི་གཉིས་ལ་ལས་འཛོལ་གྱི་བྱ་སྤྱོད་མེད་པས་འགན་འཁྲི་མེད། འགྲིམ་འགྲུལ་ཉེན་རྟོག་པས་ཁ་ལོ་བ་སོ་སོར་སྲིད་འཛིན་ཆད་གཅོད་ཀྱི་ཐག་གཅོད་ཡི་གེ་བྱིན། དེའི་ནང་རླངས་འཁོར་Aཡི་ཁ་ལོ་བར་དངུལ་ཆད་སྒོར་2000བཅད་པ་དང་འབྲེལ་བཀག་ཉར་ཉིན་15བྱ་རྒྱུའི་སྲིད་འཛིན་ཆད་པ་བཅད། རླངས་འཁོར་Bདང་D། རླངས་འཁོར་Eགསུམ་གྱི་ཁ་ལོ་བ་སོ་སོར་དངུལ་ཆད་སྒོར་200རེའི་སྲིད་འཛིན་ཆད་པ་བཅད། རླངས་འཁོར་Dཡི་ཁ་ལོ་བས་རང་ཉིད་ལ་སྒྲིག་འགལ་གྱིས་རླངས་འཁོར་བཞག་པའི་བྱ་སྤྱོད་མེད་པ་འདོད་དེ་སྲིད་འཛིན་བསྐྱར་གྲོས་ཀྱི་རེ་ཞུ་བྱས། རྗེས་ནས་ལམ་འགྲོ་བ་Cརྨས་ཚད་དེ་རྨས་སྐྱོན་ཚབས་ཆེན་ཡིན་པ་ངོས་འཛིན་བྱས་པས། རླངས་འཁོར་Aཡི་ཁ་ལོ་བར་འགྲིམ་འགྲུལ་ཆག་སྒོ་བསླངས་པའི་ཉེས་གསོག་གི་དོགས་གཞི་ཡོད་པས་དེ་ཉིད་ཉེས་དོན་བཀག་ཉར་བྱས།

གཉིས་པ། བཅའ་ཁྲིམས་འབྲེལ་བ་བཤད་པ།

ཀ །དམངས་དོན་གྱི་བཅའ་ཁྲིམས་འབྲེལ་བ།

གྱོད་དཔེ་དང་སྦྱར་ནས་བཤད་ན། རླངས་འཁོར་Aཡི་ཁ་ལོ་བས་དཔང་ཡིག་མེད་པར་རླངས་འཁོར་བསྐོར་ཏེ་ལམ་འགྲོ་བ་Cཡི་མི་ལུས་བདེ་ཐང་ལ་གནོད་འཚེ་བཏང་བ་དང་། རླངས་འཁོར་Bའདུས་བའི་འབྲེལ་ཡོད་རླངས་འཁོར་གཞན་དང་གློག་སྒུལ་རྐང་འཁོར་གྱི་བདག་པོ་དག་གི་རྒྱུ་ནོར་ལ་གནོད་འཚེ་བཏང་ཡོད། འདིའི་ཁྲོད་ཀྱི་བྱེད་པོ་སྟེ་རླངས་འཁོར་Aཡི་ཁ་ལོ་བ་དང་ལམ་འགྲོ་བ་C། དེ་མིན་འབྲེལ་ཡོད་རླངས་འཁོར་གཞན་དག་གི་བདག་པོ་ཚང་མ་རང་བྱུང་གི་མི་དང་། ཡང་ན་ཁྲིམས་མི་དང་ཁེ་ལས་ཡིན་པས། དེ་དག་བར་གྱི་བཅའ་ཁྲིམས་ཀྱི་གོ་གནས་འདྲ་མཉམ་ཡིན་ལ་དེ་དག་བར་གྱི་དབང་གནོད་དང་སྐྱིན་ཚབ་འཇལ་བའི་འབྲེལ་བ་དག་དམངས་དོན་གྱི་བཅའ་ཁྲིམས་འབྲེལ་བའི་ཁོངས་སུ་གཏོགས། ཞིབ་ཕྲའི་ཐོག་ནས་བཤད་ན་རླངས་འཁོར་Aཡི་ཁ་ལོ་བས་བྱེད་པོ་གཞན་དག་གི་མི་ལུས་དབང་ཆ་དང་རྒྱུ་ནོར་དབང་ཆར་གནོད་འཚེ་བཏང་བས་དམངས་ཁྲིམས་ཁྲོད་ཀྱི་དབང་གནོད་འགན་འཁྲི་འཁུར་དགོས།

ཁ། ཉེས་དོན་གྱི་བཅའ་ཁྲིམས་འབྲེལ་བ།

གྱོད་དཔེ་འདིར་མཚོན་ན་རླངས་འཁོར་Aཡི་ཁ་ལོ་བས་དཔང་ཡིག་མེད་པར་རླངས་འཁོར་བསྐོར་བས། ལམ་འགྲོ་བ་Cལ་རྨས་སྐྱོན་ཚབས་ཆེན་བཟོས་ནས་འགྲིམ་འགྲུལ་ཆག་སྒོ་བསླངས་པའི་བྱ་སྤྱོད་དེ་དང་འབྲེལ་བའི་ཉེས་གསོག་གི་གྲུབ་ཆ་དང་ཉེས་ཆད་ཀྱི་ནང་དོན་སོགས་ཉེས་ཁྲིམས་ནང་དུ་གཏན་འབེབས་བྱས་ཡོད། ཞིབ་མོར་བཤད་ན། མི་དམངས་ཞིབ་དཔྱོད་ཁང་གིས་རྒྱལ་ཁབ་ཀྱི་ཚབ་བྱས་ནས་མི་དམངས་ཁྲིམས་ཁང་ལ་གཞུང་གཏུག་བྱས་ཆོག །མི་དམངས་ཁྲིམས་ཁང་གིས་ཀྱང་རྒྱལ་ཁབ་ཀྱི་ཚབ་བྱས་ནས་དེར་ཁྲིམས་ལྟར་ཁྲིམས་ཐག་བཅད་ཆོག འདིའི་གོ་རིམ་ཁྲོད་ཀྱི་བྱེད་པོ་ཕྱོགས་གཉིས་ཏེ་དོགས་ཡོད་ཉེས་ཅན་དང་མི་དམངས་ཞིབ་དཔྱོད་ཁང་ཡང་ན་མི་དམངས་ཁྲིམས་ཁང་ལ་མཚོན་ན། སྔོན་མ་ནི་སྤྱིར་བཏང་གི་རང་བྱུང་མི་དཀྱུས་མ་ཞིག་ཡིན་པ་དང་ཕྱི་མ་གཉིས་ནི་རྒྱབ་ཁབ་ཀྱི་ལས་ཁུངས་ཡིན་ལ། གཉིས་ཀ་ཐོག་མ་ནས་དོ་མཉམ་མིན་པའམ་ཁྱབ་ཁོངས་མི་གཅིག་པའི་གོ་གནས་ཤིག་ཏུ་གནས་ཡོད་པས། སྒེར་གྱི་ཁེ་དབང་དང་གཞུང་གི་དབང་ཤུགས་གཉིས་ཀྱི་གདོང་ཐུག་གི་རྣམ་པ་ཞིག་ཆགས་ཡོད། འདི་ལྟ་བུའི་གཞུང་གི་དབང་ཤུགས་ཀྱིས་སྒེར་གྱི་ཁེ་དབང་ལ་ཞུ་གཏུག་བྱེད་པ་ནི་ཉེས་དོན་གཏུག་བཤེར་བཅའ་ཁྲིམས་ཀྱི་ངོ་བོ་ཡིན།

ག །སྲིད་འཛིན་གྱི་བཅའ་ཁྲིམས་འབྲེལ་བ།

གྱོད་དཔེ་འདིའི་ནང་འགྲིམ་འགྲུལ་ཉེན་རྟོག་པས་ཁ་ལོ་བ་ཚང་མར་ཚད་མི་འདྲ་བའི་འགྲིམ་འགྲུལ་སྒྲིག་འགལ་གྱི་བྱ་སྤྱོད་ཡོད་པའི་ངོས་འཛིན་བྱས་ཏེ། རླངས་འཁོར་བཞིའི་ཁ་ལོ་བ་སོ་སོར་སྲིད་འཛིན་ཆད་པ་བཅད་པ་རེད། དེ་ནི་སྲིད་འཛིན་གྱི་བཅའ་ཁྲིམས་འབྲེལ་བའི་ཁོངས་སུ་གཏོགས་ལ། ཆད་པ་ཕོག་མཁན་དེ་འགྲིམ་འགྲུལ་དོ་དམ་སྡེ་ཁག་གིས་བཅད་པའི་ཆད་པ་ལ་མ་འཐད་ཚེ་སྲིད་འཛིན་བསྐྱར་གྲོས་དང་སྲིད་འཛིན་གཏུག་བཤེར་བྱས་ཆོག །འདི་དག་གི་གོ་རིམ་ཁྲོད་དུ་སྲིད་འཛིན་བྱེད་པོ་དང་སྲིད་འཛིན་ཕོག་ཡུལ་གཉིས་ཀྱི་བར་དུ་ཆགས་པའི་འབྲེལ་བ་དག་ཀྱང་གཞུང་གི་དབང་ཤུགས་དང་སྒེར་གྱི་ཁེ་དབང་བར་གྱི་གདོང་ཐུག་ཡིན་པས། བྱེད་པོ་གཉིས་ཀྱི་བཅའ་ཁྲིམས་གོ་གནས་དོ་མཉམ་མིན་པའི་གནས་སུ་གནས་ཡོད།

སླར་ཡང་གྱོད་དཔེ་དང་འབྲེལ་ན། གྱོད་དཔེ་ཁྲོད་ཀྱི་རླངས་འཁོར་Aདང་B། རླངས་འཁོར་Dདང་རླངས་འཁོར་Eབཅས་ཀྱི་ཁ་ལོ་བ་ཚང་མར་འགྲིམ་འགྲུལ་སྒྲིག་འགལ་གྱི་བྱ་སྤྱོད་ཡོད་པས་སྲིད་འཛིན་འགན་འཁྲི་ངེས་ཅན་ཞིག་འཁུར་དགོས། རླངས་འཁོར་Aལ་དམངས་དོན་ཁྲིམས་འགལ་གྱི་བྱ་སྤྱོད་དང་སྲིད་འཛིན་ཁྲིམས་འགལ་གྱི་བྱ་སྤྱོད། ཉེས་དོན་གྱི་ཁྲིམས་འགལ་བྱ་སྤྱོད་ཚང་མ་ལྡན་པས། དམངས་དོན་གྱི་བཅའ་ཁྲིམས་འབྲེལ་བའི་སྟེང་ནས་ལམ་འགྲོ་བ་Cལ་མི་ལུས་གནོད་སྐྱོན་གྱི་གུན་གསབ་དང་།

རླངས་འཁོར་BDEདང་གློག་སྒུལ་རྐང་འཁོར་བཅས་ཀྱི་བདག་པོར་རྒྱུ་ནོར་གྱོང་གུན་གྱི་གུན་གསབ་འཇལ་བའི་འགན་འཁྲི་ཡོད། ཉེས་དོན་གྱི་བཅའ་ཁྲིམས་འབྲེལ་བའི་སྟེང་ནས་དཔང་ཡིག་མེད་པར་རླངས་འཁོར་བསྐོར་ནས་མི་གཞན་རྨས་སྐྱོན་ཚབས་ཆེན་བཟོས་ཤིང་འགྲིམ་འགྲུལ་བདེ་འཇགས་ལ་གནོད་འཚེ་བཏང་བས་དེ་དང་འབྲེལ་བའི་ཉེས་ཆད་འཁུར་དགོས། སྲིད་འཛིན་གྱི་བཅའ་ཁྲིམས་ཀྱི་འབྲེལ་བའི་སྟེང་ནས་འགྲིམ་འགྲུལ་དོ་དམ་གྱི་སྒྲིག་ལམ་ལ་གཏོར་བརླག་བཏང་བས་སྲིད་འཛིན་དངུལ་ཆད་ཀྱི་འགན་འཁྲི་འཁུར་དགོས།

གསུམ་པ། མཇུག་གི་གཏམ།

དམངས་ཁྲིམས་དང་ཉེས་ཁྲིམས། སྲིད་འཛིན་ཁྲིམས་སོགས་དངོས་གཞིའི་ཁྲིམས་ནི་ཁེ་དབང་དང་འོས་འགན་གྱི་ནང་དོན་དག་གང་འདྲ་ཡིན་པ་སོགས་བྱེ་བྲག་ཏུ་གཏན་འབེབས་བྱས་ཡོད་པ་ཞིག་ཡིན་ལ། དེ་དག་དང་བལྟས་བཅོས་ཀྱི་དམངས་དོན་གཏུག་བཤེར་གྱི་ཁྲིམས་དང་ཉེས་དོན་གཏུག་བཤེར་གྱི་ཁྲིམས། སྲིད་འཛིན་གཏུག་བཤེར་གྱི་ཁྲིམས་སོགས་གོ་རིམ་གྱི་ཁྲིམས་ནི་གོང་གི་དངོས་གཞིའི་ཁྲིམས་ནང་དུ་གཏན་འབེབས་བྱས་པའི་ཁེ་དབང་དང་འོས་འགན། འགན་འཁྲི་སོགས་མངོན་འགྱུར་དང་ལག་བསྟར་ཇི་ལྟར་བྱེད་པའི་སྐོར་བཀོད་ཡོད་པ་ཞིག་ཡིན། གོང་ནས་བཤད་པ་ལྟར། དམངས་ཁྲིམས་དང་ཉེས་ཁྲིམས། སྲིད་འཛིན་ཁྲིམས་བཅས་བར་གྱི་ཁྱད་པར་དེ་གཙོ་བོ་བཅའ་ཁྲིམས་འབྲེལ་བའི་སྟེང་དུ་སྣང་ལ། དེ་བས་དེ་དག་སོ་སོའི་ཁ་གཏད་ཀྱི་གོ་རིམ་གྱི་ཁྲིམས་གསུམ་པོའང་བཅའ་ཁྲིམས་འབྲེལ་བའི་སྟེང་ནས་ཁྱད་པར་མངོན་ཡོད། སྟབས་བདེར་བཤད་ན་དམངས་དོན་གཏུག་བཤེར་ནི“སྒེར་དང་སྒེར”ཏེ་འདྲ་མཉམ་གྱི་བྱེད་པོ་བར་གྱི་འགལ་བ་ཞིག་ཏུ་བརྩིས་ནས། “དམངས་ཀྱིས་དམངས་གཏུག་པ”ར་ངོས་འཛིན་བྱས་ཆོག །ཉེས་དོན་གཏུག་བཤེར་དང་སྲིད་འཛིན་གཏུག་བཤེར་ནི“སྒེར་དང་གཞུང་”སྟེ་འདྲ་མཉམ་མིན་པའི་བྱེད་པོ་བར་གྱི་འགལ་བ་ཞིག་ཏུ་བརྩིས་ནས། དེ་ནང་ནས་ཉེས་དོན་གཏུག་བཤེར་ནི“དཔོན་གྱིས་དམངས་གཏུག་པ”རུ་ངོས་འཛིན་བྱས་ཆོག་ལ། སྲིད་འཛིན་གཏུག་བཤེར་ནི“དམངས་ཀྱིས་དཔོན་གཏུག་པ”རུ་ངོས་འཛིན་བྱས་ཆོག །རྒྱུ་མཚན་ནི་ཉེས་དོན་གཏུག་བཤེར་དེ་སྤྱིར་བཏང་དུ་མི་དམངས་ཞིབ་དཔྱོད་ཁང་གིས་རྒྱལ་ཁབ་ཀྱི་ཚབ་བྱས་ནས་མི་སྒེར་དང་སྤྱི་ཚོགས་ཚོགས་པ། ཁེ་ལས་སོགས་ཀྱི་ཉེས་དོན་ཁྲིམས་འགལ་གྱི་བྱ་སྤྱོད་དེ་མི་དམངས་ཁྲིམས་ཁང་ལ་ཞུ་གཏུག་བྱེད་པ་ཞིག་ཡིན། སྲིད་འཛིན་གཏུག་བཤེར་ནི་མི་སྒེར་དང་ཁེ་ལས་སོགས་སྤྱི་ཚོགས་སྟེང་གི་བྱེད་པོ་དག་རྒྱལ་ཁབ་ཀྱི་སྲིད་འཛིན་ལས་ཁུངས་ཀྱིས་སྤེལ་བའི་སྲིད་འཛིན་བྱ་སྤྱོད་དམ། ཡང་ན་དེས་དབང་བསྐུར་བའི་ལས་ཁུངས་གཞན་གྱིས་སྤེལ་པའི་བྱ་སྤྱོད་ལ་མ་འཐད་པར་མི་དམངས་ཁྲིམས་ཁང་ལ་ཞུ་གཏུག་བྱེད་པ་ཞིག་ཡིན་པས་སོ། །ཡང་འདི་འདྲའི་སྟབས་བདེའི་བརྗོད་ཚུལ་ཞིག་གིས་དེ་དག་གི་ཁྱད་པར་དོན་སྤྱི་ཙམ་གྱིས་བརྗོད་ནས་གོ་བ་ལེན་པ་ལས། བྱེ་བྲག་གི་ཁྲིམས་རིག་ཤེས་བྱ་འབྲེལ་ནས་ཕྲ་ཞིབ་སྒོ་ནས་དཔྱད་ན་དེ་ལྟར་མ་ཁྱབ་སྟེ་དམིགས་བསལ་གྱི་རིགས་ཀྱང་ཡོད་དོ། །