གེ་སར་རྒྱལ་པོའི་རུས་རྒྱུད་དང་འཁྲུངས་ཡུལ་ལོ་ཚིགས་བཅས་ལ་དཔྱད་པ།

བོད་གངས་ཅན་གྱི་དཔའ་བོའི་ལོ་རྒྱུས་བྱུང་བ་བརྗོད་པའི་སྙན་རྩོམ་རིང་མོའི་མི་སྣ་གཙོ་བོ་སྟེ་གླིང་གེ་སར་རྒྱལ་པོ་མཆོག་ནི་ལྷ་སྒྲུང་ནང་གི་སྟོང་པའི་གང་ཟག་ཅིག་ཡིན་ནམ། ལོ་རྒྱུས་སྟེང་གི་དངོས་ཡོད་མི་སྣ་ཞིག་ཡིན་པ་འདི་ནི་རྒྱལ་ཁབ་ཕྱི་ནང་གི་ཆེད་མཁས་མི་སྣ་ཀུན་གྱིས་དུས་ཡུན་རིང་པོར་རྩོད་གླེང་རྫོགས་རྒྱུ་མེད་པའི་གནད་འགག་ཅིག་ཡིན་ལ། ཐེངས་རེ་རེའི་རིག་གཞུང་ཞིབ་འཇུག་གྲོས་ཚོགས་སྟེང་དུ་ཆེད་མཁས་མི་སྣ་ཀུན་གྱིས་ཐུགས་ཁུར་གནང་བཞིན་པའི་གལ་འགངས་ཆེ་བའི་གནད་དོན་ཞིག་ཀྱང་ཡིན། ངེད་ཅག་ཉམས་ཞིབ་པ་རྣམས་ཀྱིས་ཐོག་མར་ཐག་ཆོད་དགོས་པའི་རྩ་དོན་ཞིག་ཀྱང་རེད། འདིའི་ཕྱོགས་སུ་ལྟ་བ་རྣམ་དག་ཅིག་མེད་ན་ཞིབ་འཇུག་ལ་ཁ་ཕྱོགས་མེད་པ་དང་མཚུངས་སོ། ། དེ་སྔ་རྒྱལ་ཁབ་ཕྱི་ནང་གི་མཁས་པ་རྣམ་པར་བཞེད་པ་མི་མཐུན་པ་རྒོད་བྲོ་བ་གང་མང་བྱུང་མྱངས། དཔེར་ན། ཆེད་ལས་མཁས་པ་ཁག་ཅིག་གི་བསམ་པར། གེ་སར་ཞེས་པའི་སྒྲ་དང་རོ་མའི་རྒྱལ་ཆེན་ཁད་ས（凯撒）ཡི་སྒྲ་གཉིས་འབྲེལ་བ་ཉེ་བར་བརྟེན། གེ་སར་མཆོག་ནི་རྒྱལ་ཆེན་ཁད་ས་ཞེས་པར་གཞིར་བཟུང་ནས་སྒྱུ་རྩལ་གྱི་གཟུགས་བརྙན་བཞེངས་སྐྲུན་བྱས་པའི་ལྟ་ཚུལ་བཏོན། ལྟ་ཚུལ་འདི་ཆེས་སྔ་བ་ནི་ཧྥ་རན་སིའི་ཆེད་ལས་མཁས་པ་ཧྲི་ཐེ་ཨེན་གྱིས་བཏོན། ཁག་ཅིག་གིས་གེ་སར་ལྷ་ཁང་ལ་ཀོན་ཡུན་ཁྲང་ལྷ་ཁང་ཞེས་འབོད་པ་དང་ཀོན་ཡུན་ཁྲང་（关云长）གི་སྐུ་བརྙན་ཡང་བཞེངས་ཡོད་སྟབས། གེ་སར་མཆོག་ནི་ཀོན་ཡུན་ཁྲང་དང་གཅིག་མཚུངས་ཡིན་པར་འདོད་པའི་ལྟ་ཚུལ་འདི་ནི་སྐུ་ཞབས་རེན་ནའེ་ཆང་སོགས་ཀྱིས་བཏོན། ཡང་བོད་པའི་མཁས་པ་ལ་ལས་གླིང་གེ་སར་རྒྱལ་པོ་དེ་བོད་རྒྱལ་ཁྲི་སྲོང་ལྡེ་བཙན་ཡིན་པར་འདོད་ལ། ལྟ་ཚུལ་འདི་རྒྱུན་འཛིན་བགྱིད་པའི་ཆེད་ལས་མཁས་པའི་བསམ་པར། གེ་སར་མཆོག་གི་གཏམ་རྒྱུད་གཙོ་བོ་དེ་བོད་རྒྱལ་ཁྲི་སྲོང་ལྡེ་བཙན་གྱི་མཛད་རྗེས་གཙོ་བོ་དང་ཁྱད་པར་ཆེན་པོ་མ་མཆིས་པས། ལོ་རྒྱུས་སྙན་རྩོམ་རིང་མོའི་ནང་དུ་བརྗོད་པའི་གེ་སར་མཆོག་དང་བོད་རྒྱལ་ཁྲི་སྲོང་ལྡེ་བཙན་གཉིས་ནི་མི་གཅིག་དོན་གཅིག་ཡིན་པར་གསུངས། ཡང་ཁ་ཅིག་གིས་གེ་སར་མཆོག་ནི་སུང་རྒྱལ་རབས་སྐབས་ཀྱི་བོད་ཀྱི་རྒྱལ་རབས་རྗེས་མ་ཙོང་ཁའི་རྒྱལ་པོའམ་ཇོ་སྲས་ཡིན་པར་འདོད། ད་དུང་བོད་ཀྱི་མཁས་པ་ལ་ལས་གླིང་གེ་སར་མཆོག་ནི་སི་ཁྲོན་ཞིང་ཆེན་གྱི་སྡེ་དགེའི་གླིང་ཚང་རྒྱལ་པོའི་མེས་པོ་ཡིན་པར་འདོད་ལ། ལྟ་ཚུལ་འདི་ནི་བོད་ཡོངས་ལ་དར་ཁྱབ་ཤིན་ཏུ་ཆེ། གང་ལྟར་ཀྱང་། གླིང་གེ་སར་མཆོག་ནི་ལྷའམ། ཡང་ན་མི་ཡིན་པའི་གནད་དོན་འདི་ལ་མི་རྣམས་ཀྱི་སྤྱི་མཐུན་གྱི་སྡོམ་ཚིག་ཅིག་དུས་ད་ལྟའི་བར་དུ་ཡོང་ཐུབ་མེད། གལ་སྲིད་གླིང་གེ་སར་རྒྱལ་པོ་ལོ་རྒྱུས་ཀྱི་མི་སྣ་དངོས་ཤིག་མིན་ན་རུས་རྒྱུད་དང་འཁྲུངས་ཡུལ་ལོ་ཚིགས་བཅས་པར་ཞིབ་འཇུག་གི་དོན་སྙིང་མེད་པ་སུས་མི་མཁྱེན་ནམ། སྤྱིར་ན་ད་ལྟ་གནད་དོན་འདིའི་ཐད་ཕལ་ཆེར་གཅིག་མཐུན་ཡོང་ཡོད་ནའང་ཆེད་མཁས་པ་འགའ་ཞིག་གིས་ད་དུང་རྒྱུན་ཆད་མེད་པར་རྙོག་དྲ་བཟོས་དང་བཟོ་བཞིན་གདའ། དེས་མི་རབས་རྗེས་མ་རྣམས་ལ་བག་ཆགས་ངན་པ་འཇོག་བཞིན་འདུག

 གླིང་གེ་སར་འཁྲུངས་སའི་བྲག་སྦལ་བ་འདྲ་བ།

དེས་ན་ཁོ་བོས་གཤམ་དུ་གླིང་གེ་སར་མཆོག་ལོ་རྒྱུས་ཀྱི་མི་སྣ་དངོས་ཡིན་པའི་ཆ་ནས་གླིང་གེ་སར་གྱི་རུས་རྒྱུད་དང་འཁྲུངས་ཡུལ་ལོ་ཚིགས་བཅས་ལ་ལྟ་ཚུལ་ཅུང་ཙམ་བརྗོད་ན་འདི་ལྟ་སྟེ། དེ་ཡང་བོད་གངས་ཅན་གྱི་སྔོན་བྱོན་མཁས་དབང་དམ་པ་སྟེ། ཇོ་ནང་ཏཱ་ར་ན་ཐ་དང་། རག་ར་ངག་དབང་བསྟན་པའི་རྒྱལ་མཚན། རྒྱལ་དབང་ལྔ་པ་བློ་བཟང་རྒྱ་མཚོ། ཕུར་ལྕོག་ངག་དབང་བྱམས་པ། སུམ་པ་ཡེ་ཤེས་དཔལ་འབྱོར། དབལ་མང་པཎྜི་ཏ། བཙན་པོ་བསྟན་འཛིན་འཕྲིན་ལས། ཐུའུ་བཀྭན་བློ་བཟང་ཆོས་ཀྱི་ཉི་མ། པཎ་ཆེན་བློ་བཟང་དཔལ་ལྡན་ཡེ་ཤེས། བྲག་དགོན་པ་དཀོན་མཆོག་བསྟན་པ་རབ་རྒྱས་སོགས་ཀྱིས་བགྲང་བྱ་བཞི་བརྒྱ་ལྷག་གི་སྔོན་ནས་འགོ་བཟུང་སྟེ་གླིང་རྗེ་གེ་སར་རྒྱལ་པོའི་རུས་རྒྱུད་དང་འཁྲུངས་ཡུལ་གྱི་སྐོར། གླིང་གེ་སར་བྱུང་བའི་དུས་དང་ཤུལ་རྟེན་གྱི་སྐོར། སེར་པོ་ཧོར་དང་ནག་པོ་བདུད་སོགས་ཀྱི་སྐོར། གླིང་གེ་སར་གྱིས་གྲུབ་ཐོབ་བྱང་ཆུབ་འདྲེ་བཀོལ་སྤྱན་དྲངས་པའི་སྐོར། གླིང་སྒྲུང་གི་བརྗོད་བྱའི་ནང་དོན་གང་ལ་བྱས་པའི་སྐོར་བཅས་ལ་དཔྱད་པ་གནད་ལ་ཕོག་ཅིང་ཡིད་ལ་འབབ་པ་གང་ལེགས་གསུངས་ཡོད། འདི་དག་ངེད་ཅག་གིས་རྒྱབ་རྟེན་གྱི་རི་རབ་ལྟ་བུ་ཡིན་པ་གོར་མ་ཆག །གོང་གསལ་གྱི་མཁས་པའི་གསུང་སྒྲོས་དེ་དག་ལས་སྐབས་སུ་བབ་པའི་གསུང་སྒྲོས་སྐོར་ཞིག་དྲངས་ནས་བརྗོད་ན་འདི་ལྟ་སྟེ། གླིང་གི་རིགས་རུས་གདུང་རྒྱུད་ཀྱི་སྐོར་ལ་གྱི་ལིང་བཀྲ་ཤིས་རྒྱ་མཚོ་དང་ཐུགས་མཆོག་རྡོ་རྗེ་ལགས་ཀྱི《 བོད་མིའུ་གདོང་དྲུག་གི་རུས་མཛོད་མེ་ཏོག་སྐྱེད་ཚལ》ལས། ང་དང་ང་ངོ་མ་ཤེས་ན། རུས་ཆེན་སྨུག་པོ་ལྡོང་གི་རྒྱུད། དབང་ཐང་གོང་མ་གནམ་ནས་ཐོབ། ང་དཔོན་ཆུང་ཇོ་རུ་ཟེར་བ་ཡིན། ཞེས་ཟེར་བ་ལས་གཞན། སྤྱིར་ལྡོང་འདིའི་མིང་ལ་ཨ་སྤོ་ལྡོང་དང་ལྷ་ལྡོང་སོགས་ཟེར། འདི་ནི་ཕུ་བོ་ལྡོང་དང་ཡུམ་མཆོག་འབྲི་སྣ་མ་ཞེས་བྱ་བ་ལས་བྱུང་བའི་རིགས་ཡིན་ལ། འདི་ལ་དཀར་པོ་ལྡོང་དང་། ནག་པོ་ལྡོང་། ཁྲ་བོ་ལྡོང་དང་། སྨུག་པོ་ལྡོང་གི་རིགས་དང་བཞི་ཡོད་ལ། རིགས་འདི་རྣམས་ལས་འཁྲུངས་པའི་སྤྲུལ་པའི་སྐྱེས་བུ་དཔའ་རྩལ་དགུ་ལྡན་ཞེས་གསུངས་ཡོད། མཁས་དབང་དམུ་དགེ་བསམ་གཏན་མཆོག་གིས། གླིང་གི་མི་རྒྱུད་ནི། བོད་མིའུ་ལྡོང་དྲུག་གི་ནང་ཚན་ལས། སྨུག་པོ་ལྡོང་གི་རིགས་རྒྱུད་རེད། ལྡོང་ར་ཁྲ་རྒན་པོ་ལ་བུ་གསུམ་བྱུང་བ་རྣམས་ཀྱིས་རྨ་ཆུའི་སྟོད་སྨད་བར་གསུམ་དུ་གཞིས་བཟུང་ནས་བསྡད་པ་ལ་མི་རྒྱུད་མང་དུ་འཕེལ་ཏེ་སྡེ་ཆེན་པོར་ཆགས། དེ་ནས་བཟུང་བུ་སྐྱེས་པ་སྟག་ཤར་དཔའ་བོ་ཤ་སྟག་བྱུང་། ལྡོང་ཆོས་འཕེན་ནག་པོ་ལ་མ་མི་གཅིག་པའི་བུ་གསུམ་བྱུང་བ་ལས། གླིང་ཆེ་རྒྱུད། འབྲིང་རྒྱུད། ཆུང་རྒྱུད་གསུམ་བྱུང་ནས་མི་རྒྱུད་རབ་ཏུ་འཕེལ་ཏེ། སྡེ་ཤོག་ཆེ་ཞིང་བཙན་ཕྱུག་འཛོམས་པས་སྙན་གྲགས་ཤིན་ཏུ་ཆེ་བ་བྱུང་། ཞེས་གླིང་གི་གདུང་རྒྱུད་བྱུང་འཕེལ་གསལ་པོར་གསུངས་འདུག་སྟེ། མཁས་མཆོག་དམུ་དགེ་བསམ་གཏན་ལགས་ཀྱིས་ད་དུང་འདི་ལྟར་གསུངས་འདུག །གླིང་གེ་སར་འདི་ནི་མདོ་ཁམས་སུ་སྐུ་འཁྲུངས་ཏེ། དཔའ་རྩལ་རབ་ཏུ་རྒྱས་ནས་ཕྱོགས་བཞིའི་དགྲ་འདུལ་མཁན་གྱི་བོད་ཀྱི་དཔའ་བོ་ཞིག་ཡིན་པས་སྙན་པའི་གྲགས་པ་ཡོངས་སུ་ཁྱབ། དེ་ནི་མི་ངོ་མ་ཡིན་མིན་གྱི་དོགས་པ་སྔོན་གྱི་མཁས་མཆོག་སུ་ལའང་སྐྱེས་མ་མྱོང་། འོན་ཀྱང་བར་སྐབས་ཤིག་ནས་བཟུང་། དངོས་དོན་ལ་ཞིབ་འཇུག་མེད་པའི་གཏམ་སྣ་ཚོགས་ཤིག་སྨྲ་བ་རྣ་བའི་ལམ་དུ་སོན་ཞེས་གསུངས་པ་དག་ལས། གླིང་རྗེ་གེ་སར་རྒྱལ་པོ་ནི། ལོ་རྒྱུས་ཀྱི་མི་སྣ་དངོས་ཤིག་ཡིན་པ། གནའ་དེང་གི་མཁས་པ་ཐམས་ཅད་ཀྱི་གསུང་སྒྲོས་གཅིག་མཐུན་བྱུང་ཡོད་པར་སུས་ཀྱང་བསྙོན་དུ་མེད།

གླིང་རྗེའི་འཁྲུངས་ཡུལ་གྱི་རྒྱབ་རི་རྒོད་པོ་ལྷ་རྩེ།

གཡོན་རི་རྫ་གདོང་ངུར་པ།

གཡས་རི་བྲག་སྔོན་གཡུ་རྩེ།

མདུན་རི་རི་བཞི་རྟ་ནག

རྒྱ་བཟས་ཇོ་རུ་བྲག་ལ་བརྡབ་པའི་རྗེས།

གླིང་གེ་སར་གྱི་རྟའི་རྨིག་པའི་རྗེས།

 ཇོ་རུས་གནམ་གྱི་བྱ་ནག་སྤུན་གསུམ་བཏུལ་དུས་ཀྱི་སྐུ་རྗེས།

གླིང་གེ་སར་རྒྱལ་པོའི་འཁྲུངས་ཡུལ་གྱི་གླིང་གི་དཔལ་ཐུལ་ཚོའི་རྡོ་བརྐོས་རྙིང་པ།

 ལྷ་རྟ་རྐྱང་སྐྱིད་བཏགས་སའི་རྡོའི་རྟོད་ཕུར།

《 འཁྲུངས་གླིང་》དུ་འཁོད་པའི་ས་བཟང་པོ་སྨོན་ལམ་ལ་ཁ།

ད་དུང་སུམ་པ་ཡེ་ཤེས་དཔལ་འབྱོར་ལགས་ཀྱིས་གེ་སར་འཁྲུངས་ཡུལ་ཐད་དུ། གླིང་གེ་སར་དེ་སྐྱེས་ཡུལ་ནི། བར་ཁམས་སྟོད་དུ་མ་ནས་ཡར་ལ་རྨ་ཆུ་རྫ་ཆུ་འབྲི་ཆུ་གསུམ་ཡོད་པའི་ནང་ནས། བར་པ་རྫ་ཆུ་ལ་སྐྱིའི་གཞུང་དང་ཚུ་ལུང་པའི་ཆུ་གཉིས་དང་གསུམ་འདུས་ཀྱི་མདོ་ཡིན་ཞིང་། དེ་ནི་སྡེ་དགེའི་ཕོ་བྲང་གི་གཡོན་ངོས་ཀྱི་སྡེ་དགེའི་སའི་ཆར་གཏོགས་ལ། དེ་སྐྱེས་ས་དངོས་ནི་ཕུ་ན་མཚོ་ཆུང་མེ་ལོང་འདྲ་བ་དང་མདོ་ན་ཆུ་གཉིས་འདུས་པ་དང་བྲག་རི་ཆུང་ངུ་ཟུར་བཞི་པ་ཡོད་པའི་བར་དུ་སྤང་ཐང་གདན་བཏིང་ཡོད་དེ། དེ་ན་ལྗོན་པ་ཆིག་སྐྱེས་དང་དེའི་ཕ་མའི་རེ་སྦྲ་ཕུབས་ཤུལ་གྱི་བྲག་ལེབ་ཡོད་ཅིང་གནས་དེ་ལ་སྐྱིད་ཉི་མ་ཀུན་འཁྱིལ་ཟེར་སྐད། ཅེས་གླིང་གེ་སར་ཉིད་འཁྲུངས་ས་གང་དང་ཁྱད་ཆོས་ཅི་མཆིས་ཐམས་ཅད་གསལ་ལེར་བརྗོད་ཡོད་པར་མ་ཟད། གནས་ཡུལ་ཁྱད་པར་ཅན་དེ་དག་ད་ལྟ་ཡང་དངོས་སུ་མཐོང་རྒྱུ་ཡོད་པ་ཁོ་བོས་ཀྱང་དངོས་སུ་མཇལ་མྱངས། དེ་ཡང་འཁྲུངས་ཡུལ་ནི་ཁམས་ཀྱི་སྐྱིད་སོས་ཡག་གི་ཁ་མདོ་ཡིན་ཟེར་དོན་ཡང་། ས་སྐྱིད་སོས་ཡག་གི་ཁ་མདོ་ན་སྔོན་ཆད་གེ་སར་གྱི་ལྷ་ཁང་ཞིག་བཞེངས་ཡོད། ལྷ་ཁང་ནང་ན་གླིང་གེ་སར་གྱི་ཁྲབ་རྨོག་དང་མདའ་གཞུ། སྒ་མཐུར་སྲབ་གསུམ། ཞྭ་ལྷམ་ན་བཟའ་སོགས་དངོས་པོ་མང་པོ་ཡོད་པར་མ་ཟད། ད་དུང་གླིང་གེ་སར་དང་རྒྱ་ཚ་ཞལ་དཀར་གཙོ་བྱས་པའི་གླིང་གི་དཔའ་རྟུལ་སུམ་ཅུའི་འབག་སྐུ་དང་རྫོང་ཆེན་བཅོ་བརྒྱད་དང་རྫོང་ཆུང་སོགས་ཀྱི་ལོགས་རིས་ཀྱང་བྲིས་ཡོད། ས་སྐྱིད་སོས་ཡག་གི་ཁ་མདོའི་གེ་སར་ལྷ་ཁང་གི་དཀར་ཆག་ན་ལྷ་ཁང་འདི་གནའ་སྔ་མོར་གླིང་གེ་སར་སྐུ་འཁྲུངས་སའི་ས་མིག་ཏུ་བཞེངས་པ་ཡིན་ནོ་ཞེས་བྲིས་ཡོད་པར་གྲགས། ད་དུང་སྒྲུང་རྙིང་ལག་བྲིས་མ《འཁྲུངས་གླིང་མེ་ཏོག་ར་བ》ལས། ས་སྐྱིད་སོས་ཡག་གི་ཁ་མདོ་རེད། །ཆུ་གཉིས་འབབ་སྒྲ་ལྷུང་ལྷུང་གྲགས། །བྲག་གཉིས་མདའ་སྒྲོ་གཤིབ་འདྲ་ཡོད། །སྤང་གཉིས་བལ་སྟན་བཏིང་འདྲ་ཡིན། །བྲག་སྦལ་བ་འདྲ་བའི་རྩ་བ་རེད། ཅེས་གསལ་པོར་བྲིས་ཏེ་གླིང་གེ་སར་མཆོག་གི་འཁྲུངས་ཡུལ་གསལ་པོར་བསྟན་པ་རེད། ད་ལྟ་སྤྲུལ་སྐུ་དཔལ་རྒྱལ་ལགས་ཀྱི་བརྩོན་འགྲུས་ལ་བརྟེན་ནས་གེ་སར་ལྷ་ཁང་དང་རྟེན་དང་བརྟེན་པ་བཅས་པ་གསར་བཞེངས་གནང་བར་ཀུན་གྱི་མིག་གི་མཐོང་ལམ་དུ་བཤམས་འདུག

བྲག་དགོན་པ་མཆོག་གིས། དེ་ཡང་སྔོན་རྨ་འགྲམ་སྟོད་ཀྱི་ས་ཐམས་ཅད་ལ་གླིང་རྗེ་གེ་སར་རྒྱལ་པོས་དབང་བསྒྱུར། དེ་ཉིད་ཀྱི་འཁྲུངས་ལོ་ལྕགས་བྱི་དང་ཆུ་སྦྲུལ་ལ་འདོད་མཁན་གཉིས་སྣང་བ་གང་ཡིན་ཡང་རབ་བྱུང་དང་པོ་ཚུགས་ཁ་མའི་དྲུག་ཅུ་སྐོར་དེར་གཏོགས་ལ། རླངས་བྱང་ཆུབ་འདྲེ་བཀོལ་དང་། སྨྲི་ཏི་ཛྙ་ན་ཀིརྟི་སྤྱན་དྲངས་ཏེ་ཆོས་ཞུས་པ་དང་། གཙུག་ལག་ཁང་བཞེངས་པར་བཤད་པས་ཀྱང་ཤེས་ནུས། འཁྲུངས་ས་ཡང་ཚབ་ཚ་དགོན་གྱི་ཉེ་འདབས་རྫ་སྲིབ་ངོས་རྫ་ཆུའི་རྒྱུད་མཚོ་གོར་ཁ་ཡིན་ཟེར་བ་དང་། རྒྱུ་དར་གྱི་དར་ས་ནག་ལུང་ཡིན་ཡང་ཟེར། ཞེས་གླིང་གེ་སར་མཆོག་དུས་ནམ་ཞིག་ལ་ས་གང་དུ་འཁྲུངས་པའི་སྐོར་ནས་དོན་ལ་གནས་པའི་དཔྱད་གཏམ་བརྗོད་འདུག །མཁས་དབང་ཚེ་ཏན་ཞབས་དྲུང་མཆོག་གིས། རབ་བྱུང་གཉིས་པ། མེ་ཡོས། སྤྱི་ལོ་1087རླངས་བྱང་ཆུབ་འདྲེ་བཀོལ་གྱི་ལུང་བསྟན་ལྟར་ན། ལོ་འདིར་གླིང་རྗེ་གེ་སར་འདས་ཞེས་གསུངས་ཡོད།

ལར་གླིང་རྗེ་གེ་སར་རྒྱལ་པོ་ཉིད་མདོ་ཁམས་ཀྱི་ཕྱོགས་འདིར་དབང་སྒྱུར་བའི་རྒྱལ་པོ་ཡིན་པར་མཁས་པ་རྣམས་ལ་བཤད་ཚུལ་མི་འདྲ་བ་ཅུང་ཙམ་ཡང་མེད་མོད། འོན་ཏེ་འདིའི་འཁྲུངས་ལོ་ཆུ་སྦྲུལ་དང་། ལྕགས་བྱི། ས་སྟག་སོགས་སུ་བཞེད་མཁན་འདུག །གང་ཡིན་ཡང་དུས་རབས་བཅུ་གཅིག་པའི་སྐབས་ཀྱི་མི་ཞིག་ཡིན་པར་མི་མཐུན་པ་མེད་དོ། །

ཡང་རབ་བྱུང་དང་པོའི་ས་སྟག་ལ་འཁྲུངས་པར་འདོད་མཁན་བྱུང་བ་དང་སྔ་མའི་ལྕགས་བྱི་དེ་གཉིས་ཀྱི་བར་དུ་ལོ་ངོ་38དང་། སྔ་མའི་ཆུ་སྦྲུལ་དང་དེ་གཉིས་བར་དུ་བགྲང་བྱ་45ཙམ་ལས་ཁྱད་པར་ཆེན་པོ་མེད། ངེད་ཅག་གིས་ཡིད་རྟོན་ཆོག་པ་ཞིག་ནི། ཁམས་བདུད་འཇོམས་རིན་པོ་ཆེའི་སྔ་འགྱུར་རྙིང་མའི་ཆོས་འབྱུང་《ལྷ་དབང་གཡུལ་ལས་རྒྱལ་བའི་རྔ་སྒྲ》 ལས། སངས་རྒྱས་མྱ་ངན་ལས་འདས་ཚུལ་བསྟན་ནས་ལོ་1332ལོར་སྲོང་བཙན་སྐུ་འཁྲུངས། སྲོང་བཙན་དགུང་ལོ་གྱ་གཉིས་ལ་བཞུགས་པ་ལྟར་ན་འདས་ལོ་1414ལོར་སྲོང་བཙན་སྐུ་གཤེགས། དེ་ནས་ལོ་325འདས་པའི་བོད་རབ་བྱུང་དང་པོའི་འབྲུ་མང་པོའམ་རྒྱ་གར་བའི་བ་ཧུ་ཀྐནྱ་ཞེས་པའི་ས་ཕོ་སྟག་གི་ལོ་སྟེ། རྒྱ་ནག་གི་སུང་རྒྱལ་རབས་ཀྱི་གོང་མ་པོ་ཡིན་ཁྲི་ལོ་དང་པོ། སྤྱི་ལོ་ལྟར་ན་1038ལོ་ལ་ས་སྐྱིད་སོས་ཡག་གི་ཁ་མདོ་རུ་གླིང་གེ་སར་སྐུ་འཁྲུངས། ལོ་འདི་ལ་མཉམ་མེད་ཇོ་བོ་རྗེ་དགུང་ལོ་56ལ་སོན། བོད་ཙོང་ཁའི་རྒྱལ་པོ་ཁྲི་ནམ་ལྡེའུ་བཙན་དགུང་ལོ་42ལ་ལོན། འབྲོམ་སྟོན་པ་རྒྱལ་བའི་འབྱུང་གནས་ལོ་14ལོན། གཏེར་སྟོན་གྲྭ་པ་མངོན་ཤེས་ཅན་དགུང་ལོ་2ལོན་པ་དང་། སྒྲ་སྒྱུར་མར་པ་དགུང་ལོ་2ལོན་ཡོད་ཅེས་པ་སོགས་ཀྱིས་ཁོང་གེ་སར་རིན་པོ་ཆེའི་འཁྲུངས་ལོ་དང་། དེའི་སྐབས་སུ་དངོས་སུ་ཡོད་པའི་བླ་སྤྲུལ་དང་རྗེ་བློན་རྣམས་ཀྱི་ལོ་ཚིགས་གསལ་པོར་བསྟན་ཡོད་པ་དང་། གཞན་ཡང་རབ་བྱུང་གཉིས་པའི་རྒྱུར་བྱེད་ཅེས་པ་ས་མོ་ཕག་དང་། རྒྱ་གར་བའི་བི་ཀ་རི་ཞེས་པ་སྟེ་སྤྱི་ལོ་ལྟར་ན་1119ལོར་རྨ་རྒྱལ་གངས་ཀྱི་རི་བོའི་ཉེ་འདབས་སུ་སྐུ་གཤེགས། ལོ་འདི་ལ་རྗེ་བཙུན་མི་ལ་དགུང་ལོ་79ལོན། མངའ་བདག་ཉང་རལ་བ་དགུང་ལོ་54ལོན། རྒྱ་ནག་སུང་རྒྱལ་རབས་གོང་མ་ཤོན་ལ་རྒྱལ་པོ་ཁྲི་ལོ་དང་པོ་ཞེས་གསུངས་པ་འདི་དག་ནི་བདག་ནས་ཀྱང་ཚད་མར་སེམས།

སླར་སྨྲས་པ།

གེ་སར་རིགས་རྒྱུད་སྨུག་པོ་ལྡོང་ནས་མཆེད། །

གེ་སར་འཁྲུངས་ཡུལ་ཨ་ཕྱུག་རྩྭ་ཐང་ཡིན། །

གེ་སར་བལྟམས་ལོ་ས་ཕོ་སྟག་ལ་འཁེལ། །

གེ་སར་འདས་ཡུལ་རྨ་ཆེན་གངས་རིའི་འདབས། །

གེ་སར་ཡབ་ཆེན་སེང་བློན་རྒྱལ་པོ་ཡིན། །

གེ་སར་མ་ཡུམ་འགོག་བཟའ་ལྷ་མོ་ཡིན། །

གེ་སར་སྤུན་མཆེད་རྒྱ་ཚ་ཞལ་དཀར་ཡིན། །

གེ་སར་འགན་འཁྲི་དགྲ་འདུལ་གཉེན་སྐྱོང་ཡིན། །

སྤྱི་ལོ་2026ལོའི་ཟླ་5པའི་ཚེས་10ཉིན་རྒན་པོ་གཅོད་པ་དོན་གྲུབ་ཀྱིས་སྦྱར་བ་དགེའོ། །