ཨ་ཕྱུག་ཡུལ་གྱི་སྐྱེ་ཁམས་འཁོར་ཡུག་དང་ལྕི་རྒྱལ་སྟག་རེ་སོགས་ཀྱི་གནས་རིའི་ངོ་སྤྲོད་མདོ་བསྡུས།

རྫ་ཆུ་སྔོན་མོ་ཨ་ཕྱུག་སྐྱིད་སོས་ཡག་གི་ཁ་མདོ་ནས་བཞུར་བ།

གླིང་གི་འདུ་ར་སྟག་ཐང་ཁྲ་མོ།

གེ་སར་གྱི་སྐུ་ལྷ་ཟོ་དོར་ལྕི་རྒྱལ་སྟག་རེ།

བདུད་རྒྱལ་འཐབ་དཔོན།

ཨ་ཕྱུག་ཡུལ་གྱི་གཉན་ཆེན་སྐུ་ལྷ་གེ་མཛོ།

སོས་ལག་སེ་ཡུ་ལྷ་བཙན།

ཨ་ཕྱུག་ཡུལ་གྱི་གཞི་བདག་མུ་ཐུར།

གོ་མཛོད་གཡུ་རྩེ་གཉན་པོ།

ཨ་ཕྱུག་ཡུལ་གྱི་གཞི་བདག་གུར་དཀར།

གེ་སར་གྱི་གཏམ་རྒྱུད་མང་བའི་ཨ་ཕྱུག།

དང་པོ། ཨ་ཕྱུག་ཡུལ་དང་འབྲེལ་བའི་རི་ཆུའི་ཁྱད་ཆོས་སྐོར་གླེང་བ།

ཡུལ་འདི་ནི་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་ཨ་ཕྱུག་གྲོང་བརྡ་གྱི་མངའ་ཁོངས་སུ་ཆགས། དཀར་མཛེས་ཁུལ་གྱི་ལྟེ་གནས་དར་མདོ་ནས་སྤྱི་ལེ་༥༤༠ལྷག་གི་མཚམས་དང་། སྡེ་དགེ་རྫོང་མཁར་ནས་སྤྱི་ལེ་༢༠༧གྱི་མཚམས་སུ་ཡོད། ཨ་ཕྱུག་གྲོང་རྡལ་ཡོངས་ཀྱི་ཁོངས་གཏོགས་སུ་ལམ་ལུང་གྲོང་སྡེ་དང་། རབ་ཉེ་གྲོང་སྡེ། མོ་ལེགས་གྲོང་སྡེ། བཙན་ལུང་གྲོང་སྡེ། སྨན་ཆེན་གྲོང་སྡེ། མོ་ཐང་གྲོང་སྡེ། ལུང་འབྲིང་གྲོང་སྡེ་བཅས་ཡོད་ལ། མཐའ་སྐོར་དུ་སྡེ་དགེ་རྫོང་གི་སྟག་དགོན་གྲོང་རྡལ་དང་། ནགས་མདོ་ཤང་། ཡ་དེང་ཤང་། སེར་ཤུལ་རྫོང་གི་ཝ་ཤུལ་ཞང་དང་འབྲེལ་མཚམས་སུ་ཆགས་ཡོད། ཞང་སྲིད་གཞུང་དེ་བཙན་ལུང་གྲོང་སྡེར་ཆགས། རྫོང་མཁར་དང་བར་ཐག་སྤྱི་ལེ་༢༠༧དང་མཚོ་འཕགས་ཧ་ལམ་སྨི་༤༠༠༠ཡོད། མངའ་ཁོངས་ཀྱི་རྒྱ་ཁྱོན་ལ་སྤྱི་ལེ་གྲུ་བཞི་མ་༣༥༦༣ཡོད་ཅིང་། དེ་ནི་འབྲོག་ལས་རྐྱང་པའི་གྲོང་རྡལ་གྱི་གྲས་སུ་གཏོགས་ཡོད། ༢༠༠༢ལོར་ཨ་ཕྱུག་ཞང་གི་སྐྱིད་སོས་ཡག་གི་ཁ་མདོ་དེ་རྒྱལ་ཡོངས་གླིང་སྒྲུང་ཞིབ་འཇུག་པ་ཚོས་བོད་མི་རིགས་ཀྱི་དཔའ་བོ་གླིང་གེ་སར་འཁྲུངས་ཡུལ་ཡིན་པ་གཏན་འཁེལ་བྱས། གཞན་མངའ་ཁོངས་སུ་གླིང་གེ་སར་གྱི་རིག་གནས་རྗེས་ཤུལ་དང་འདྲེས་པའི་སྔོ་ལྗང་གི་རི་བོ་དང་། དྭངས་ཤིང་གཙང་བའི་ཆུ་བོ་སོགས་ཡུལ་སྐོར་གྱི་མཛེས་ལྗོངས་མང་པོ་ཡོད། དཔེར་ན།

ཀི་ཀི་ལུང་། ཇོ་རུས་བདུད་རྒན་སྒམ་པ་ར་ཛ་དེད་ནས་འགྲོ་དུས། བདུད་རྒན་གྱིས་ད་ཕལ་ཆེར་ཇོ་རུས་རྗེས་མ་ཆོད་བསམས་ནས་ཀི་ཀི་ཞེས་འུར་ཞིག་རྒྱག་པས་མིང་དེ་ལྟར་ཐོགས་པའོ། །

རྒྱུ་འགྱེད། ངག་རྒྱུན་དུ་གླིང་གེ་སར་རྒྱལ་པོས་གནས་འདི་ནས་དམག་མི་རྣམས་ལ་རྒྱུ་འགྱེད་བྱས་མྱངས་བས་མིང་དེ་ལྟར་ཐོགས།

སོས་ཁོག་ཆུ། འཁྲུངས་གླིང་དུ་གླིང་གེ་སར་རྒྱལ་པོ་འཁྲུངས་ཡུལ་སྐྱིད་སོས་ཡག་གི་ཁ་མདོ་ཞེས་པའི་སོས་ཁོག་ནས་འབབ་ཅིང་མིང་དེ་ལྟར་ཐོགས།

སྐྱིད་ཁོག་ཆུ། འཁྲུངས་གླིང་དུ་གླིང་གེ་སར་རྒྱལ་པོ་འཁྲུངས་ཡུལ་སྐྱིད་སོས་ཡག་གི་ཁ་མདོ་ཞེས་པའི་སྐྱིད་ཁོག་གམ་ལྕི་ཁོག་ནས་འབབ་ཅིང་མིང་དེ་ལྟར་ཐོགས།

རབ་ཉེ། བདུད་རྒན་སྒོམ་པ་ར་ཙ་ཇོ་རུས་དེད་དུས། བདུད་རྒན་གྱིས་ཕྱི་བལྟས་ཤིག་བྱེད་དུས་ཇོ་རུ་རབ་ཏུ་ཉེ་སར་སླེབས་ཚར་བས་མིང་དེ་ལྟར་ཐོགས། ངག་རྒྱུན་དུ་གླིང་གེ་སར་རྒྱལ་པོ་ཆུང་དུས་གནས་འདི་ནས་ལུག་འཚོ་མྱངས་བར་གྲགས།

སོས་ཁོག་ལུང་པ། རྒྱལ་གཞི་ལུང་པ་ཡང་ཟེར། འཁྲུངས་གླིང་མེ་ཏོག་ར་བའི་ནང་འཁོད་པའི་གླིང་གེ་སར་རྒྱལ་པོའི་འཁྲུངས་ཡུལ་ཏེ་སྐྱིད་སོས་ཡག་གི་ཁ་མདོ་ཞེས་པའི་སོས་ཁོག་ལ་གོ།

བྱི་ཙུག་གོང་མ། ངག་རྒྱུན་དུ་གནས་འདི་རུ་བྱི་བ་མང་བ་དང་གེ་སར་གྱིས་འདུལ་བ་གྲགས་པས་མིང་དེ་ལྟར་ཐོགས།

མོ་ལེགས། གླིང་གེ་སར་རྒྱལ་པོས་བཙན་པོ་དེད་ནས་འགྲོ་སྐབས་ལུང་པ་འདིའི་ནང་མོ་ཞིག་བཏབ་ནས་མོ་ལེགས་པོ་བབས་པས་མིང་དེ་ལྟར་ཐོགས།

བྱ་སྒྲོ། ངག་རྒྱུན་དུ་གླིང་གེ་སར་རྒྱལ་པོས་ལུང་པ་འདི་ནས་རྒོད་གཅིག་འཛིན་པས་གཤོག་སྒྲོ་གང་སར་གཡུག་བཞིན་ཡོད་པས་མིང་དེ་ལྟར་ཐོགས།

སྐྱིད་ཁོག །འཁྲུངས་གླིང་མེ་ཏོག་ར་བའི་ནང་འཁོད་པའི་གླིང་གེ་སར་རྒྱལ་པོའི་འཁྲུངས་ཡུལ་ཏེ་སྐྱིད་སོས་ཡག་གི་ཁ་མདོ་ཞེས་པའི་སྐྱིད་ཁོག་ལ་གོ།

ཨ་ཕྱུག་གི་རི་མཐོའི་སྤང་ངོས་དང་རི་མཐོའི་རི་ཁུལ་ལྡེབས་ངོས་སུ་ཆགས་ཤིང་ས་རྒྱུ་ནི་ས་མཐོའི་སྤང་ས་དང་། ན་འདམ། བྲག་ངོས། གཡའ་རི། གངས་རི། རྩྭ་ཐང་བཅས་སྐྱེ་ཁམས་ཁོར་ཡུག་་ཕུན་སུམ་ཚོགས་པ་དང་གླིང་གེ་སར་གྱི་རིག་གནས་དང་འབྲེལ་བའི་གཏེར་ཆུ་ཞེས་པའི་ཆུ་མདོག་མི་འདྲ་བའི་ཆུ་ཕྲན་མང་པོ་ཡོད་པ། དཔེར་ན། ཨ་ཕྱུག་རང་གི་ཡུལ་མི་དཔལ་བཟང་ཞེས་པས་ཨ་ཕྱུག་གི་གཏེར་ཆུ་ཞེས་པའི་ཐོན་ཁུངས་གསར་དུ་བཏོད་ནས་བཏུང་ཆུར་མཁོ་འདོན་བྱས་ཏེ་ཨ་ཕྱུག་ལ་སོགས་པའི་མགྲོན་པོར་བསུ་བར་བྱེད་པའི་སྣེ་ལེན་ཁང་དང་། འགྲུལ་པ་འདུག་སའི་མགྲོན་ཁང་། ཚོང་ཁང་སོགས་སུ་བཞག་ནས་མཁོ་སྤྲོད་བྱེད་བཞིན་པ་ལ་ཡུལ་སྐོར་བ་སོགས་ཀྱི་དགའ་བསུ་ཐོབ་བཞིན་པ་རེད། དེ་བཞིན་དུ་ལུགས་དང་མཐུན་ཞིང་ཁྲིམས་ལྟར་ཐོན་ཁུངས་སྲུང་སྐྱོང་གི་ཁྲོད་དུ་གསར་བཏོད་དང་། གསར་བཏོད་ཀྱི་ཁྲོད་དུ་སྲུང་སྐྱོང་གཉིས་ཡ་མ་བྲལ་བ་འོས་ཞིང་མཚམས་པའི་གསར་བཏོད་བྱ་དགོས།

དེ་ལྟར་ཨ་ཕྱུག་རྩྭ་ཐང་དང་ཡང་ན་ལྕི་སོས་ཡག་གི་ཁ་མདོ་དང་། ཚབ་ཚ་ཆོས་འཁོར་རྣམ་རྒྱལ་གླིང་གི་གཡས་གཡོན་དུ་སོས་ཁོག་ལུང་པ། དེ་ལ་རྒྱལ་གཞི་ལུང་པ་ཡང་ཟེར། འཁྲུངས་གླིང་མེ་ཏོག་ར་བའི་ནང་འཁོད་པའི་སོས་ཁོག་ལུང་པ། ཞེས་ཟེར་དོན་ནི། ཡུལ་འདི་ནི་འཛམ་གླིང་གེ་སར་རྒྱལ་པོ་འཁྲུངས་སའི་གནས་ཁྱད་པར་ཅན་ཡིན་པ་དང་། གནའ་དུས་སུ་ས་འདི་ནས་ཕྱུག་པོ་ཀླུ་ལ་འགྲན་འདྲའི་ཁྱིམ་ཚང་མང་པོ་བྱུང་བ་དང་། ཨ་ཕྱུག་གི་ཡུལ་དང་ས་དེའི་ཕོ་མོ་ཐམས་ཅད་མཛེས་སྡུག་ལྡན་པས་སྒྲུབ་སྤྲུལ་བརྒྱད་པ་ཀརྨ་སེངྒེ་མཆོག་གི་འབེལ་གཏམ་ལས། ཕྱི་ལྟར་ན་གླིང་གེ་སར་འཁྲུངས་བའི་ཡུལ། སྐྱིད་སོས་ཡག་གི་ཁ་མདོ། མདུན་རི་རི་བཞི་རྟ་ནག །གཡས་རི་གཡུ་འབྲུག་གནམ་མཆོང་། རྒྱབ་རི་གླང་ཆེན་བགྱིང་ཡག །གཡོན་རི་སྒོམ་ཆེན་ཉམས་འདུག །ནང་བལྟས་ན་གྲུབ་པའི་དཔའ་བོ་དང་ཧེ་རུ་ཀས་བྱིན་གྱིས་བརླབས་ཤིང་། སྐྱེས་ཆེན་དུ་མས་ཞབས་ཀྱིས་བཅག་པ། ཁྱད་པར་ཀརྨ་བཀའ་བརྒྱུད་ཀྱི་གྲུབ་པའི་སྐྱེས་བུ་ན་རིམ་དང་། དཔལ་ལྡན་ཤངས་པའི་བཀའ་བབས་ཀྱི་བརྒྱུད་འཛིན་གསེར་གྱི་ཕྲེང་བ་ཟམ་མ་ཆད་པ་བྱོན་པའི་དཔའ་ས་སྤྱོད་དགའ་བ་བརྒྱ་ལྡན་ཚབ་ཚ་ཆོས་འཁོར་རྣམ་རྒྱལ་གླིང་ཞེས་གསུངས་པ་བཞིན་དང་། གཞན་ཡང་བརྟུལ་ཞུགས་གྲུབ་པ་པདྨ་རྒྱལ་པོས་ཁྱད་བསྔགས་མེ་ཏོག་འཐོར་བའི་གནས་སྒྲོ་བཏགས་སྙན་ངག་རབ་རྟོག་གིས་བརྗོད་པ་ཙམ་མིན་པར་ས་དཔྱད་ཀྱི་དགེ་མཚན་མ་ལུས་པ་ཚང་བ་སེང་ཆེན་སྐྱེས་བུའི་རྟོགས་བརྗོད་འཁྲུངས་གླིང་མེ་ཏོག་ར་བ་རུ། གནམ་འཁོར་ལོ་རྩིབས་བརྒྱད། ས་པདྨ་འདབ་བརྒྱད། བར་བཀྲ་ཤིས་ར་བ་སོགས་ཞིབ་མོར་གཟིགས་ན་ཤེས་སོ། །ཞེས་གསུངས་པ་བཞིན། ས་མིང་དེ་ནི་རྗེས་གྲུབ་མིང་ཞིག་སྟེ་དཔེ་ཡི་སྒོ་ནས་སམ་ངོ་མཚར་བའམ་ཡ་མཚན་ཆེན་པོའི་སྒོ་ནས་བཏགས་པར་འདོད། གཞན་ཡང་འཁྲུངས་གླིང་མེ་ཏོག་ར་བ། རྨ་ས་བཟུང་དར་དཀར་མདུད་པ། ཞེས་པ་ལས། འགོག་བཟས་ལྷ་ཕྲུག་ཐོས་པ་དགའ་བར་གླུ་བླངས་པ་ལས་སའི་ཆགས་ཚུལ་བཤད་པ་ལས། ས་འདི་སྐྱིད་སོས་ཡག་གི་མདོ། །ཆུ་གཉིས་ཆབ་མ་བརྡབ་འདྲ་ཡོད། །བྲག་གཉིས་མདའ་སྒྲོ་གཤིབ་འདྲ་ཡོད། །སྤང་གཉིས་བལ་ལྟན་བཏིང་འདྲ་ཡོད། །བྲག་སྦལ་བ་འདྲ་བའི་རྩ་བ་རེད། །ཀླུ་གཙུག་ནའི་གཏེར་སྒོ་ཕྱི་མ་རེད། །ལྷ་པདྨའི་ལུང་བསྟན་ཐོབ་ས་རེད། །ཅེས་གླུ་བླངས་པ་དང་དེ་དག་ལས་ཡུལ་འདིའི་ས་མིང་ཇི་ལྟར་ཐོགས་ཚུལ་ཤེས་ཐུབ།

གཉིས་པ། ཨ་ཕྱུག་ཡུལ་དང་འབྲེལ་བའི་གནས་རི་དང་གཞི་བདག་སྐོར་གླེང་བ།

གླིང་གི་ཟོ་དོར་ལྕི་རྒྱལ་སྟག་རེ།

དེ་ཡང་གླིང་སྒྲུང་ལས་བྱུང་བའི་ཟོ་དོར་ཆེན་མོ་ལྕི་རྒྱལ་སྟག་རེ་ཞེས་བྱ་བ་ནི། གླིང་རྗེ་གེ་སར་རྒྱལ་པོ་འཁྲུངས་སའི་གནས་ཁྱད་པར་ཅན། གེ་སར་ལྷ་ཁང་ཡོད་ས་ནས་གཡོན་གྱི་ལྕི་ཁོག་ལུང་པའི་ནང་དུ་ཡོད་ཅིང་། དེ་ནས་བརྩིས་ན་སྤྱི་ལེ་༡༠ཙམ་གྱི་མཚམས་སུ་གནས་ཤིང་། བྲག་རི་དང་ནགས་ཚལ་སྟུག་པོ་ལྷུན་རྫོགས་ཀྱི་རྩེ་མོ་དགུང་ལ་ཟུག་པ་ཞིག་ཡོད། དེའི་མདུན་དུ་ཐང་ཆེན་པོ་ཞིག་ཡོད་པ་དེ་ནི་སྒྲུང་ཡིག་དང་ཨ་ཕྱུག་ཡུལ་མི་རྣམས་ཀྱི་ངག་རྒྱུན་ལ་གླིང་གི་འདུ་ར་སྟག་ཐང་ཁྲ་མོ་རུ་ངོས་འཛིན་བྱེད་བཞིན་ཡོད། དེ་ཡང་ས་དེ་ལ་གནས་པའི་གཞི་བདག་གི་མཚན་ལའང་ལྕི་རྒྱལ་སྟག་རེ་ཞེས་འབོད་ཅིང་། རྟེན་དགེ་བསྙེན་དུ་འཛིན་པའི་གཞི་བདག་ཅིག་ཡིན། ཨ་ཕྱུག་ཡུལ་མི་རྣམས་ཀྱིས་ལོ་རེ་བཞིན་སྟག་ཟླ་བའི་ཚེས་བཅོ་ལྔ་ཉིན་བསང་མཆོད་དང་རླུང་རྟ་མཆོད་པའི་སྲོལ་མ་ཉམས་པར་ད་རུང་གནས་ཡོད། དེ་ཡང་ལྕི་རྒྱལ་སྟག་རེ་ནི་སྐུ་མདོག་དཀར་གསལ་དུང་འོད་ལམས་སེ་ལམ། །དབུ་ལ་ཉི་མའི་པྲོག་ཞུ་ཟངས་སེ་ཟང་། །སྐུ་ལ་དར་ཟབ་སྟག་བེར་ལྷུབས་སེ་ལྷུབ། །སྐེད་ལ་སྟག་རལ་གཟིག་ཤུབས་ཁྱུགས་སེ་ཁྱུག །ཆིབས་སུ་དཀར་པོ་གཡུ་རྔོག་ཞུམས་སེ་ཞུམ། །རོལ་དུ་རྐྱང་ཆེན་ཁ་དཀར་ཁྲོ་ལོ་ལོ། །ཕྱག་གཡས་དར་མདུང་དཀར་པོ་ལྷབས་སེ་ལྷབ། །ཡུལ་ལྷ་གཞི་བདག་དམག་བསྐུལ་འུ་རུ་རུ། །ཕྱག་གཡོན་ཇུ་ཐིག་བཀྲ་གསལ་ཤ་ར་ར། །འཁོར་དུ་རྟ་པ་བརྗིད་ལྡན་སྒ་ར་ར། །ཞེས་བསང་ཡིག་ནང་ལྟར་ངོ་སྤྲོད་མདོར་བསྡུས་ཞུས་ན་དེ་ལྟར་ཡིན་པ་དང་། མ་ཟད་ལྕི་རྒྱལ་སྟག་རེའི་ཆ་ལུགས་རྣམ་པ་གཅིག་ཏུ་མ་ངེས་པའི་གཞི་བདག་ཅིག་ཡིན་པ་རེད། དེ་ལ་སྔ་དྲོའི་ཆ་ལུགས་ན་བུན་ཐུ་ལུ་ལུ་བྱེད་པ། ཉིན་ཕྱེད་ཆ་ལུགས་ཁུ་འཕང་ཐ་ར་ར་བྱེད་པ། ཕྱི་དྲོའི་རོལ་མོའི་འབྲུག་སྒྲ་འུ་རུ་རུ་བྱེད་པ། དེ་ནས་གཡོས་པའི་ཆ་ལུགས་དང་སྡིག་པའི་ཆ་ལུགས། ཁྲོས་པའི་ཆ་ལུགས་ཐོག་མདའ་ཤ་ར་ར་བྱེད་ཅེས་བསང་ཡིག་ནང་ལྟར་དང་། གཞན་ཡང་བཙུན་མོ་སྲས་དང་བློན་འབངས་འཁོར་ཚོགས་ཡུལ་ལྷ་གཞི་བདག་གི་ཚོགས་དཔག་ཏུ་མེད་པའི་གཞི་བདག་བཙན་པོ་ཞིག་ཡིན།

ཞེས་ལྕི་རྒྱལ་སྟག་རེའི་བསང་མཆོད་༧རྗེ་ཆོས་དབྱིངས་རྡོ་རྗེས་ཤེལ་ཐང་དུ་སྦྱར་བའི་བསངས་མཆོད་ནང་ལྟར་ངོ་སྤྲོད་གནང་པ་དང་། གོང་གི་ལྕི་རྒྱལ་སྟག་རེའི་ལྡེབས་བྲིས་ཡོད་པ་དེ་ནི་ཚབ་ཚ་དགོན་པའི་གཙུག་ལག་ཁང་རྙིང་པའི་སྒོ་ཤོད་ནང་དུ་བྲིས་པ་དེ་ཡིན་ནོ། །

བདུད་རྒྱལ་འཐབ་དཔོན།

དེ་ཡང་བདུད་རྒྱལ་འཐབ་དཔོན་ནི་ཕུན་ཚོགས་དགེ་བཅུ་ཚང་བའི་ལྗོངས་ཟླ་ཀླུང་ཕྱུག་མོའི་རྒྱུད་ཀྱི་ས་ཆ་སྟེ། དཔའ་བོ་གླིང་དཀར་སྐྱོང་བའི་ཡུལ་ལྕི་སོས་གཉིས་ཀྱི་ཁ་མདོར་གེ་སར་ལྷ་ཁང་ནས་གཡས་ཀྱི་སོས་ཁོག་ལུང་པའི་སྟོད་དུ་གནས་པ་དང་། སྤྱི་ལེ་དབང་དུ་བྱས་ན་༡༡ཙམ་གྱི་མཚམས་སུ་བྲག་རི་དང་ནགས་ཚལ་རྔམ་བརྗིད་དང་ལྡན་པ་མཐའ་ན་ལྷ་ར་བསྟོད་ཡོད་སའི་རི་བོ་བརྗིད་པོ་ཞིག་ཡོད། དེའི་གཡོན་ཟུར་དུ་རྡོ་ཕ་བོང་དབྱིབས་གོར་གོར་ཅན་ཆེན་པོ་ཞིག་ཡོད་པ་དེ་ནི་མང་ཚོགས་ཀྱི་ངག་རྒྱུན་དུ་བདུད་རྒྱལ་འཐབ་དཔོན་གི་གསོལ་བཞེས་ཡིན་ཞེས་བཤད་སྲོལ་ཡོད།

ལོ་རེ་བཞིན་འཛམ་གླིང་སྤྱི་བསང་གི་ཉིན་མོར་ཡོས་ཟླའི་ཚེས་བཅོ་ལྔ་ཉིན་འཐབ་དཔོན་ཡིད་བཞིན་ནོར་བུ་ལ་ཨ་ཕྱུག་གྲྭ་ཚང་དང་ཡུལ་མི་རྣམས་ཀྱིས་བསང་མཆོད་རྒྱ་ཆེར་འབུལ་སྲོལ་ཡོད་པ་དང་། དེ་ལ་དུས་རྒྱུན་ཡོས་ཟླའི་བསང་ཞེས་འབོད་སྲོལ་ཡང་ཡོད། དེ་ཡང་བསང་ཡིག་ལས། མཐུ་སྟོབས་དྲག་པོ་སྲུང་བྱེད་ལྷ། །ལྕི་རྒྱལ་དགེ་བསྙེན་སྟག་རེ་ཡི། །བཀའ་སྡོད་དགྲ་འཇོམས་དམག་གི་གཙོ། །འཐབ་དཔོན་ཞེས་སུ་ཡོངས་གྲགས་པའི། །བདུད་རྗེ་ནག་པོ་དམུ་ཡི་ཚ། །གདུག་ཅིང་གཏུམ་པའི་མི་གཟུགས་ཅན། །མདོག་ནག་དྲག་པོ་ཁྲོས་པའི་སྐུ། །འཇའ་ཚོན་སྣ་ལྔའི་མུ་མཁྱུད་ཅན། ། མཐའ་མཛེས་རེ་བའི་བེར་ཆེན་གསོལ། །གཡས་ན་མདུང་དར་ནག་པོ་ཕྱར། །གཡོན་ན་བདུད་ཀྱི་ཞགས་པ་བཟུང་། ། རླུང་རྟ་མགྱོགས་པའི་རྔ་མོང་ནི། །ལྕགས་ཀྱི་རྨིག་གཞི་ཅན་ལ་ཆིབས། །བསེ་བྱ་འུག་པ་ཀླད་ན་ལྡིང་། །ཤ་ཁྱི་དྲི་སྣོམ་རོལ་དུ་ཁྲིད། །སྤྲུལ་པ་གསའ་དང་སྤྱང་ཀི་འགྱེད། །གཡོན་དུ་ལས་ཀྱི་ཤན་པ་ནི། །མི་ནག་རྟ་ནག་བེར་གྱོན་པས། །འཁོར་གསུམ་བསྐོར་ཞིང་རྟ་ནག་ཞོན། །རལ་གྲི་ཕྱར་ཞིང་ཁྲོ་གཏུམ་ཅན། ། ལས་བྱེད་བཀའ་ཉན་འཁོར་དང་བཅས། །ཐོགས་པ་མེད་པར་གནས་འདིར་གཤེགས། །ཞེས་འཐབ་དཔོན་གྱི་བསང་འདི་ཡང་ཞེ་ཆེན་རབ་འབྱམས་སྤྲུལ་པའི་སྐུ་འགྱུར་མེད་ཀུན་བཟང་རྣམ་རྒྱལ་གྱིས་མཛད་པའི་བསང་ཡིག་ནང་ལྟར་ངོ་སྤྲོས་ཞུས་པའོ། །

ཨ་ཕྱུག་ཡུལ་གྱི་གཉན་ཆེན་སྐུ་ལྷ་གེ་མཛོ།

གཉན་ཆེན་སྐུ་ལྷ་གེ་མཛོ་(ཨ་ཕྱུག་བསང་ཡིག་ནང་དུ་གེ་འཛོ་ཞེས་བྲིས་འདུག)ནི་གེ་སར་རྒྱལ་པོའི་འཕྲུལ་སྲས་ཡིན་ཞིང་ཨ་ཕྱུག་ཡུལ་གྱི་སྲིད་པ་ཆགས་པའི་སྐྱེས་ལྷ་ཆེན་པོ་ཞིག་ཡིན་པའང་བཤད་མ་དགོས་པ་རེད། ཨ་ཕྱུག་གེ་སར་ལྷ་ཁང་ནས་སྤྱི་ལེ་༩ཙམ་ཞིག་སོང་རྗེས་བཙན་ལུང་ཟེར་བའི་ལུང་པ་དེའི་མདའ་རུ་སླེབས་ཤིང་། དེ་ནས་ཡར་སྤྱི་ལེ་གཅིག་ཙམ་སོང་ན་ད་གཟོད་གཡས་ཀྱི་ལམ་ཟུར་དུ་རི་བོ་ཆུང་ཆུང་ནོར་བུ་སྤུངས་པ་འདྲ་བ་ཞིག་ཡོད་པ་དེ་ནི་ཨ་ཕྱུག་ཡུལ་གྱི་གཉན་གེ་མཛོར་འབོད་པ་དེ་ཡིན། ཨ་ཕྱུག་ཡུལ་དགོན་གཉིས་ཀྱིས་ལོ་རེ་བཞིན་གེ་མཛོའི་མདུན་དུ་ལྷ་ར་བསྟོད་ནས་གསོལ་མཆོད་འབུལ་སྲོལ་ཡོད།

སྤྱིར་གཉན་གེ་མཛོ་ཞེས་པའི་སྐྱེས་ལྷ་འདི་ས་ཆ་མང་པོ་ལ་ཡོད་ཀྱང་། སྐབས་འདིར་ངོ་སྤྲོད་བྱ་ཡུལ་ནི་འཁྲུངས་གླིང་མེ་ཏོག་ར་བའི་ནང་ལྟར་ཨ་ཕྱུག་ཡུལ་གྱི་ཟོ་དོར་ཆེན་པོ་གེ་མཛོ་འབོད་པ་འདི་ཡིན། དེ་ལ་འཁྲུངས་གླིང་མེ་ཏོག་ར་བ་ལས། འགོག་མོ་ཡབ་སེང་བློན་དང་ལྷན་དུ་གཟིམས་པའི་རྨི་ལམ་དུ། མི་སེར་གསེར་གྱི་གོ་ཁྲབ་ཅན་མཛེས་ཤིང་ཡིད་དུ་འོང་བ་ཞིག་བྱུང་ཞིང་བརྩེ་གདུང་འབྲལ་མི་ཕོད་པ་ལྟ་བུའི་དགའ་བདེ་བཅས་རང་དང་ལྷན་དུ་ཉལ་བར་རྨིས། དེའི་སྐབས་མི་གསེར་གྱི་གོ་ཁྲབ་ཅན་དེ་ནི་གཉནགེ་མཛོ་ཡིན་པ་དང་། དེ་རྗེས་བྲག་སྦལ་བ་འདྲ་བའི་རྩ་བར་འགོག་མོ་ལ་ཇོ་རུ་སྐུ་བལྟམས་ཤིང་ཕ་ཡབ་གཉན་ཆེན་གེ་མཛོ་ཡིན་པའི་རྨི་ལམ་དེ་ལྟར་རྨིས་སོ།

དེ་ནས་ཡང་ཇོ་རུ་སྤྲུལ་པའི་ངང་ནས་ས་བཙན་སྦྲུལ་མགོའི་མདའ་རུ་བཞུགས་དུས། བློན་ཆེན་འདན་མ་སྤྱང་ཁྲ་ཇོ་རུ་འབོད་དུ་སོང་དུས་ཇོ་རུས་བློན་འདན་མ་ལ་བླངས་པའི་གླུའི་ནང་དུ་ནང་དུའང་“རུས་ཡབ་གཉན་རྗེ་གེ་མཛོ་རེད། །གཙུག་ན་རིན་ཆེན་ཚ་བོ་ཡིན། །འབུམ་པ་ཞལ་ལུའི་ནུ་བོ་ཡིན།”ཞེས་པ་སོགས་འཁྲུངས་གླིང་དུ་གེ་མཛོ་ཐེངས་མང་བྱུང་འདུག

ཇོ་རུ་མ་བུ་རྨ་སྨད་དུ་ཕུད་སྐབས་འགོག་མོས་ལྕི་རྒྱལ་སྟག་རེ་དང་། ཟོ་དོར་གེ་མཛོ་གཉན་པོས་ངེད་མ་བུ་སྲུང་མ་མཛོད་ཅེས་མཉམ་དུ་བོས་པར་བརྟག་ན་གེ་མཛོ་ཡོད་སའི་གནས་འདི་ཨ་ཕྱུག་ཡིན་སྙམས། སྐབས་དེ་ཇོ་རུ་ལོ་ན་ཆུང་བ་དང་ས་ཆ་གཞན་དུ་ཐོག་མར་ཕེབས་རྒྱུའི་མགོ་ཚུགས་པ་ཡིན་པས། རང་ཡུལ་ལུང་པ་ནས་ས་ཆ་གཞན་ན་ཡོད་པའི་ཟོ་དོར་ཞིག་ལ་སྐྱབས་བཅོལ་དང་རེ་འབོད་ཞུ་བའི་སྲོལ་ནི་ཇོ་རུ་མ་ཟད་ཕལ་བའི་མི་ཞིག་གིས་ཀྱང་འབོད་མི་སྲིད་སྙམ།

སོས་ལག་སེ་ཡུ་ལྷ་བཙན།

དེ་ཡང་སོས་ལག་སེ་ཡུ་ནི་ཡུལ་འདིའི་དཀར་ཕྱོགས་སྐྱོང་བའི་གཞི་བདག་གཅིག་ཡིན་པ་དང་། དེ་ནི་ཚབ་ཚ་དགོན་པའི་གཡས་ཕྱོགས་ཀྱི་སོས་ལག་ལུང་པའི་ཕུ་རུ་ཡོད་ཅིང་། དེ་ལ་འཁྲུངས་གླིང་ལས། དང་པོ་སེ་ཡུ་རི་ལ་སོང་། །རྒོ་འདྲེ་བསེ་རག་སྤུན་གསུམ་བསད། །མགོ་མི་མཛའ་རྒོ་ཕོའི་ཅོག་ཞུ་དེ་རྒོ་མགོ་དང་བཅས་པ་བྱས་ཏེ་རུ་སེ་མནབས། ཞེས་བྱུང་བའི་ཇོ་རུས་རྒོ་འདྲེ་བསེ་རག་སྤུན་གསུམ་བསད་སའི་ས་ཆ་ཡིན་པ་དང་། གཞན་ཡང་སེ་ཡུའི་བསང་མཆོད་དགེ་ལེགས་དཔལ་སྟེར་ལས། མཚན་བརྗོད་ན་ཀླུ་བཙན་སེ་ཡུ་ཞེས། །ཞལ་བསྟན་ན་སྤྲུལ་སྒྱུར་མ་ངེས་མཛད། །སྐུ་དར་དཀར་བེར་དང་དུང་ཁྲབ་གསོལ། །ཕྱག་རེས་འགའ་རྒྱལ་མཚན་བ་དན་འཛིན། །ཆོས་སྒྲུབ་བརྒྱུད་དབུ་འཕང་དགུང་དུ་བསྟོད། ། དུས་རེས་འགའ་ནོར་གཞོང་སྦྲུལ་ཞགས་འཛིན། །འོག་ཀླུ་གཡང་དངོས་གྲུབ་མི་ལ་སྩོལ། །དྲག་གཏུམ་ཆས་མདའ་ར་མདུང་ར་བ། །

ངག་ཀི་བསྭོ་དྲག་པོའི་སྒྲ་སྐད་འདོན། །ཆིབས་གྲོ་བོ་གཡུ་རྔོག་རླུང་ལྟར་འཚུབ། །སྤྲིན་དམར་ནག་ཐོག་སེར་རོལ་དུ་ཁྲིད། ། ཅེས་བསང་ཡིག་འདིའང་ཚབ་སྤྲུལ་པས་གང་ཤར་དུ་ཏྲེ་ཧོར་ཤོད་དུ་སྤེལ་ལོ། །

ཨ་ཕྱུག་ཡུལ་གྱི་གཞི་བདག་མུ་ཐུར།

ཨ་ཕྱུག་གི་གཞི་བདག་མུ་ཐུར་ཡང་ལྕི་ཡི་ལུང་པའི་ནང་དུ་ཡོད་པ་དང་། གེ་སར་ལྷ་ཁང་ནས་བརྩིས་ན་སྤྱི་ལེ་༢༠ཙམ་གྱི་མཚམས་སུ་ཡོད། ཟོ་དོར་ལྕི་རྒྱལ་སྟག་རེའི་ཡན་ཆད་དང་། མོ་ལེགས་ལུང་པའི་མདུན་སྲིབ་ཏུ་གནས་ཡོད། རི་དེའི་རྣམ་པ་ནི་བྲག་རི་གཟར་ལ་ཟུར་དུ་འབྲུ་ཤུགས་མང་པོ་སྐྱེས་ཡོད་པའི་ས་བཙན་ལ་དོག་ས་ཞིག་ཡིན། དམིགས་བསལ་གཞི་བདག་འདི་ལ་དུས་ཚོད་གཏན་ཁེལ་ངང་མཆོད་སྲོལ་མེད་ཀྱང་། ལྕི་རྒྱལ་སྟག་རེའི་བསང་མཆོད་ཉིན་ཞོར་ནས་མཉམ་དུ་བསྟོད་པ་དང་རླུང་རྟ་མཆོད་པའི་སྲོལ་ཡོད་པ་ཡིན། དེའང་གཞི་བདག་འགོད་པའི་ལྡེབས་བྲིས་ལ་བལྟས་ན་ཞལ་རས་དཀར་པོ་ཅན་དང་ལུས་ལ་ཁྲབ་རྨོག་འཁོར་གསུམ་ཐོགས་པ། ཕྱག་གཡས་པས་མདུང་དར་དགུང་ལ་ཕྱར་བ། གཡོན་པས་རྟ་ཁ་བཙན་གྱིས་འཛིན་པ་ཆིབས་རྟ་གྲོ་བོ་གཡུ་རྔོག་རྒོད་ཅིང་མྱུར་མགྱོགས་ཅན་ལ་ཞོན་ནས་ཡོད་དོ། །

ཨ་ཕྱུག་ས་ཆའི་གཞི་བདག་གུར་དཀར།

དེ་ཡང་ཨ་ཕྱུག་ཡུལ་སྡེ་གྲྭ་ཚང་ཐུན་མོང་གིས་གསོལ་མཆོད་བྱེད་སའི་གཞི་བདག་གུར་དཀར་ཞེས་པ་འདིའང་ལྕི་སོས་གཉིས་ལས་སོས་ཁོག་ལུང་པའི་ནང་དུ་ཡོད། བདུད་རྒྱལ་འཐབ་དཔོན་ལ་མ་སླེབས་པའི་སྔོན་དུ་ཕྱི་ཡི་རི་བོ་རྩི་ཤིང་སྨན་སྣ། སུར་དཀར་དང་སུར་ནག །པད་མ་དང་ཉ་རུད་སོགས་སྐྱེས་པའི་ཡུལ་ལྷ་དེ་ནི་གུར་དཀར་བྱ་བའི་གཞི་བདག་དེ་ཡིན། ལྡེབས་རིས་ཀྱི་རྣམ་པ་ནི་གོང་དུ་ཡོད་པ་བཞིན། ཞལ་རས་དཀར་ལ་བརྗིད་ཉམས་ལྡན་པ། སྨིན་མ་གཟིངས་ལ་སྨ་ར་འཁྱུག་པ། དབུ་སྐྲ་རྒྱབ་ཏུ་དཔྱངས་ལ་དབུ་ལ་ཕྱིང་ཞྭ་གསོལ། ཕྱག་གཡས་པས་རྒྱལ་མཚན་ཕྱར་བ་དང་གཡོན་པས་འདོ་བ་ཅང་ཤེས་ལྡེམ་པ་ཆིབས་ནས་ཡོད་པ་ཡིན་ནོ། །

ཡ་དིང་སོ་གཙང་གཡུ་རྩེའམ་གོ་མཛོད་གཡུ་རྩེ་གཉན་པོ་ངོ་སྤྲོད་ཉུང་བསྡུས།

སོ་གཙང་གཡུ་རྩེ་ཞེས་པ་འདི་ཨ་ཕྱུག་གྲོང་བརྡའི་ཁོངས་སུ་གཏོགས་པའི་གཞི་བདག་མིན་ནའང་། ཚབ་ཚ་དགོན་པའི་མདུན་རི་ཡིན་པས་བསངས་ཡིག་ནང་དུ་འཇོག་པའི་སྲོལ་ཡོད། དེ་ལ་བསང་ཡིག་ལས། སྲིད་ན་ཆེ་བ་ལྷ་ཡི་རྒྱལ། །རྨ་ཆེན་སྤོམ་རའི་ལས་བྱེད་པོ། །དྲག་རྩལ་ལས་ཀྱི་ཤན་པ་ནི། །མདོག་ནག་ཁྲོ་གཏུམ་འཇིགས་པའི་གཟུགས། །དར་ནག་གོས་དང་གོ་ཁྲབ་གྱོན། །གསོད་བྱེད་མདུང་དང་རལ་གྲི་འཛིན། །མྱུར་མགྱོགས་རྟ་ནག་རྔམ་པ་རྒྱུག །ཡབ་ཡུམ་འཁོར་བཅས་ཁྱེད་རྣམས་བྱོན། །ཞེས་གསུངས་པ་བཞིན་འཛམ་བུ་གླིང་གི་ཟོ་དོར་ཆེན་མོ་ཨ་མྱེ་རྨ་ཆེན་སྤོམ་རའི་ལས་བྱེད་ཤན་པ་ཡིན་པ་དང་། སྐུ་མདོག་ནག་ལ་ཁྲོ་བོ་གཏུམ་དྲག་འཇིགས་པའི་གཟུགས་དང་ལྡན་པ་ཞིག་ཡིན། སྐུ་ལ་དར་གོས་ནག་པོ་གསོལ་བ་དང་རྒྱབ་ལ་གོ་ཁྲབ་གྱོན་པ། གསོད་བྱེད་མཚོན་ཆ་ལ་མདུང་དར་དང་རལ་གྲི་འཛིན་པ། ཆིབས་པ་ལ་མྱུར་མགྱོགས་རྟ་ནག་རྔམ་རྒྱུག་ལ་ཞོན་ནས་ཡོད་པ། མ་ཟད་ཡབ་ཡུམ་འཁོར་དང་བཅས་པ་ཡོད་པའི་གཞི་བདག་བཙན་པོ་ཞིག་ཡིན་ནོ། །

ཨ་ཕྱུག་ཡུལ་གྱི་ཆུ་གཉིས་ཆབ་མ་བརྡབ་འདྲ།

དེ་ཡང་འཁྲུངས་གླིང་མེ་ཏོག་ར་བ་ལས། ཆུ་གཉིས་ཆབ་མ་བརྡབ་འདྲ། །བྲག་གཉིས་མདའ་སྒྲོ་གཤིབ་འདྲ། །སྤང་གཉིས་བལ་སྟན་བཏིང་འདྲ། །ཞེས་བྱུང་བ་ལས་ཆུ་གཉིས་ལས་གཅིག་ནི་སོས་ཆུ་ཡིན་པ་དང་། སོས་ཆུ་ནི་སོས་སྟོད་ཀྱི་མཚོ་ལུང་། བྱ་སྒྲོ་གནམ་གཟེངས་སོགས་ཀྱི་ལུང་པའི་ཆུ་ཕྲན་དང་ཆུ་ཕྲན་འདུས་ཏེ། སོས་ཁོག་གི་ཟོ་དོར་ཆེན་པོ་བདུད་རྒྱལ་འཐབ་དཔོན་དང་། གུར་དཀར། མཉན་ཆེན་གེ་འཛོ། མ་ཟད་སོས་ཁོག་གི་གཞི་བདག་ཆུང་གྲས་མཐའ་མ་དང་རྒྱ་གཞི་བཙན་ལུང་སོགས་ཀྱི་མདུན་ནས་ཆུ་རྒྱུན་མ་ཆད་པར་གེ་སར་ལྷ་ཁང་གི་གཡས་ཟུར་ནས་བབས་ཏེ་ཆུ་མཐར་རྫ་ཆུ་ལ་འདྲེས་པའི་འབབ་ཆུ་ཞིག་ཡིན། དེ་ལྟར་ལྕི་ཆུའང་ཆུ་མགོ་གང་ཡོད་འཁྲུངས་གླིང་ལས། ཨ་ཕྱུག་ཡུལ་ནས་ཇོ་རུ་མ་བུ་རྨ་སྨད་གཡུ་ལུང་སུམ་མདོར་ཕུད་སའི་ལུང་པ། ཨ་འཛོམ་འགོག་མོ་མ་བུ་གཉིས། །ཡོངས་འཛོམས་ཉི་མ་ཤར་ཡག་ནས། །གཡང་འཛོམས་པའི་སྨོན་ལམ་འདེབས་བཞིན་སོང་། །ཞེས་པ་ལྟར་ལྕི་ཆུའི་ཆུ་མགོ་དེའང་གཡས་ལག་དང་གཡོན་ལག་གཉིས་ཡོད་ཅིང་། གཙོ་བོ་ལྕི་ཡང་འཛོམ་ཉི་མ་ཤར་ཡག་ལ་ཐུགས་ཡོད་པ་དང་། དེ་ནས་རིམ་བཞིན་ལྕི་ཕུ་བྲག་ནག་ལུང་པའི་མདུན་དང་། སྒོམ་པ་ར་ཛའི་སྒྲུབ་ཕུག ཟླ་ལུང་ཕྱུག་མོ། མོ་ལེགས། ཨ་ཕྱུག་གི་གཞི་བདག་མོ་ཐུར། ཇོ་རུས་སྒྱུ་འཕྲུལ་གྱིས་གནམ་ལ་འཐེན་པར་གྲགས་པའི་མཐོ་པོ་ལྕི་འཇེད། ཇོ་རུས་ལྕི་ཡི་སྲིན་བུ་ངོ་དམར་བརྟུལ་སའི་གནས་སྲིན་ཆུང་ལུང་པའི་མདའ། ཨ་མྱེ་སྒོམ་པ་ར་ཛ་ཀི་ཀི་ཟེར་ནས་བྲོས་སའི་ཀི་ཀི་ལུང་པ། ཇོ་རུས་ཨ་མྱེ་དེད་ནས་བྲོས་སྐབས་ཨ་མྱེ་སྣ་ཁྲག་བཞུར་སའི་གནས་གདོང་དམར་སྣ། དེ་ནས་ཨ་མྱེས་རྗེས་ནས་ཇོ་རུ་ཡོང་བར་བལྟས་ཏེ་དོམ་ར་བྱེད་སའི་ས་ཆ་དོམ་ར་མ། ཟོ་དོར་ཆེན་པོ་ལྕི་རྒྱལ་སྟག་རེ། འདུ་ར་སྟག་ཐང་ཁྲ་མོ། ལྕི་ཡི་སྨན་ཆེན་ལུང་པ། གཞི་བདག་མདུང་རྩེ། རྒྱ་བཟའ་ཚང་གི་བེའུ་འཚོ་སའི་ས་ཆ་བེའུ་ལུང་ཐད་ཀར། ལྕི་ཡི་དར་ཐང་ཆེན་མོ། རྒྱ་བཟའ་ཚང་གི་སྦྲ་མལ། བྱེའུ་ཆུང་མྱིད་པའི་འཕྲང་ལམ། ས་བཟང་མོ་སྨོན་ལམ་ལ་ཁ། ལམ་བཟང་པོ་བྱང་ཆུབ་འཕྲེད་ལམ་སོགས་ཀྱི་གླིང་ཡུལ་དང་འབྲེལ་བའི་ས་ཆ་ཚང་མར་བརྒྱུད་དེ་མཐར་ལྕི་ཡི་དར་ཐང་ཆེན་མོའི་གཡོན་ཟུར་ནས་ཆུ་སྣེ་རྫ་ཆུ་ལ་འདྲེས་ཡོད། དེ་ནས་ཆུ་འདི་གཉིས་ཀྱང་སྲིད་པ་ཆགས་ནས་དེ་རིང་གི་བར་དུ་བཞུར་བའི་ཆུ་ཡིན་པར་མ་ཟད། ཆུ་འདི་གཉིས་ཀྱང་འགོག་མོ་མ་བུ། གླིང་དཀར་ལྷ་སྡེ། ཨ་ཕྱུག་ཚོ་པ་དགུ་ཡི་འཐུང་ཆུ་བྱས་ཏེ་དེ་རིང་གི་བར་དུ་ཡོང་བ་དང་། ཆུ་འདི་གཉིས་ཀྱང་ཁྱད་དུ་འཕགས་པའི་ཆུ་བོ་དེ། མངར་བ། བསིལ་བ། ལྟོ་བར་མི་གནོད་པ། འཇམ་པ། དྭངས་པ། ཡང་བ། དྲི་མ་མེད་པ་མགྲིན་པར་མི་གནོད་པ་བཅས་ཆུ་བོ་ཡན་ལག་བརྒྱད་དང་ལྡན་པ། དེ་ལ་འཁྱིལ་ལུགས་མི་འདྲ་པ་ཏྲའི་རི་མོ་ལྟར་བྱས་ཏེ་འཁྱིལ་ནས་ཡོང་བའི་ལྕི་ཆུ་དང་སོས་ཆུ་གཉིས་ཡིན་ནོ། །

གསུམ་པ། ཨ་ཕྱུག་ཡུལ་གྱི་ལྕི་རྒྱལ་སྟག་རེའི་ལྷ་ར་བསྟོད་སྲོལ་སྐོར་གླེང་བ།

ལྕི་གོང་དུ་བཀོད་པའི་གཞི་བདག་གམ་རི་ཆུ་སོ་སོ་ལ་ཐུན་མིན་གྱི་ཁྱད་ཆོས་ལྟར་བསྟོད་ཚིག་རེ་ཡོད་ཀྱང་། བསང་མཆོད་ཀྱི་ཆོ་ག་ཕྱག་ལེན་གྱི་གོ་རིམ་ཕལ་ཆེར་འདྲ་བས་གཅིག་ཤེས་ལེབ་མཐོང་ལྟ་བུའི་མཚོན་བྱེད་ཙམ་དུ་ལྕི་རྒྱལ་སྟག་རེའི་ལྷ་ར་གཞི་བདག་འདིའི་གསོལ་མཆོད་བྱ་ཚུལ་ཞིག་འགོད་པ་ལ།

ལྕི་རྒྱལ་སྟག་རེའི་ལྷ་ར་གཞི་བདག་འདི་ནི་དགེ་བསྙེན་ཞིག་ཡིན་པ་དང་གནས་ཡུལ་སྲས་གཉེན་ལྷུན་པོའི་ཙན་དན་ནགས་ཚལ་གྱི་དབུས་སུ་རང་བཞིན་ལྷུན་རྫོགས་ཉམས་དགའ་བའི་ཕོ་བྲང་གི་ནང་དུ། རིན་ཆེན་ནོར་བུ་སྤུངས་པའི་ཁྲི་སྟེང་དུ་བཞུགས་ཤིང་མཚན་ལ་བསྟན་སྲུང་གི་རྣལ་འབྱོར་སྐྱོང་བའི་ཡུལ་ལྷ་སྟག་རེ་ཞེས་བརྗོད་པ་དང་། སྐུ་མདོག་དཀར་གསལ་དུང་འོད་ལམ་སེ། ལམ་དབུ་ལ་ཉི་མའི་པྲོག་ཞུར་ཟོངས་སེ་ཟོངས་ཡོད་པ། ཉི་ཟླ་ནོར་བུའི་ཅོད་པཎ་པུ་རུ་རུ་བྱ་རུ་ཁྱུང་རུ་ལྡེམས་དར་འཁྱུགས་སེ་འཁྱུག་ཏུ་བཞུགས་པ་དང་། ཐོག་སེར་གློག་གི་འོད་མདངས་ལྷབས་སེ་ལྷབ་ཏུ་སྐུ་ལ་དར་ཟབ་སྟག་བེར་ལྷུབས་སེ་ལྷུབ་ཏུ་གནས་པ། སྐེད་ལ་སྟག་རལ་གཟིག་ཤུབས་འཁྱུགས་སེ་འཁྱུག་བྱེད་ཅིང་ཆིབས་རྟ་ལ་དཀར་པོ་གཡུ་རྔོག་ཞུམས་སེ་ཞུམ་རོལ་དུ་རྐྱང་ཆེན་ཁ་དཀར་ཁྲོ་ལོ་ལོ། ཕྱག་གཡས་སུ་མདུང་དར་དཀར་པོ་ལྷབས་སེ་ལྷབ་པ། ཡུལ་ལྷ་གཞི་བདག་དག་ལ་དམག་སྐུལ་འུ་རུ་རུ་གནས་པ་དང་ཕྱག་གཡོན་དུ་ཇུ་ཐིག་བཀྲ་གསལ་ཤ་ར་ར། འཁོར་དུ་རྟ་པ་རྫི་ལྡན་སྒ་ར་ར་དང་ཡུལ་ལྷ་སྨན་བཙུན་རྩེ་འཇོ་བྲེངས་སེ་བྲེང་བྱེད་པ། དགའ་བའི་ཆ་ལུགས་འཇའ་འོད་ལམས་སེ་ལམ་དང་ཞལ་ལ་བཞད་པའི་ཆ་ལུགས་ལྡན་པ། གཞི་བདག་འདིའི་ངོ་བོ་གཏན་གནས་མ་ཡིན་ཞིང་། སྔ་དྲོའི་དུས་སུ་ཆ་ལུགས་ན་བུན་ཐུ་ལུ་ལུ་བྱེད་པ། ཉིན་བྱེད་ལ་ཆ་ལུགས་འཁོར་འབངས་ཐ་ར་ར་གནས་པ། ཕྱི་འཕྲད་སྐབས་སུ་རོལ་མོའི་འབྲུག་སྒྲ་འུ་རུ་རུ་གྲག་པ། གཡོས་པའི་ཆ་ལུགས་ས་གཡོས་ཤིགས་སེ་ཤིག་བྱེད་པ་དང་། སྡིག་པའི་ཆ་ལུགས་སེར་བ་ཐ་ར་ར་བྱེད་པ་དང་ཁྲོས་པའི་ཆ་ལུགས་ལ་ཐོག་མདའ་ཤ་ར་ར་འཕེན་པ། བཙུན་མོ་སྲས་དང་བཅས་པའི་གཞི་བདག་ཅིག་ཡིན། གཙོ་བོ་བསང་ཡིག་ལས་ཤེས་དགོས་སོ། །

ལྷ་ར་བསྟོད་པའི་ཉིན་མོར་བསང་འདོན་རྒྱུ་ནི་གཙོ་བོར་བྱེད། སྟག་ཟླའི་བསང་ནི་བོད་ཟླ་བཞི་པའི་ཚེས་བཅོ་ལྔའི་ཉིན་ཕུལ་སྲོལ་ཡོད། སྟག་ཟླ་བའི་ཚེས་བཅོ་ལྔ་ཉིན་ཁེལ་ཡོད་པས་མིང་ཡང་སྟག་ཟླའི་བསང་ཞེས་ཐོགས། བསང་འདི་ནི་ལྕི་རྒྱལ་སྟག་རེ་གཙོ་བོར་བྱས་ནས་ཕུད་པའི་བསང་ཞིག་ཡིན། དེའི་ཉིན་གཞི་བདག་གཞན་པ་ལའང་རླུང་རྟ་མཆོད་པ་དང་གསོལ་མཆོད་བྱས་ཀྱང་ཆོག །ལྷ་ར་འདི་ཐོག་དང་པོ་སྟོད་པའི་དུས་ཚོད་དང་སྟོད་མཁན་ངེས་གཏན་ཞིག་མ་ཤེས་ཀྱང་། འདི་ནི་ཆེས་སྔ་མོ་ནས་ཡོད་པའི་གཞི་བདག་ཅིག་ཡིན། དེ་ཡང་འཁྲུངས་གླིང་མེ་ཏོག་ར་བ་ལས། ཇོ་རུ་མ་བུ་གླིང་ཡུལ་ནས་རྨ་ཁོག་ཏུ་སྤྱུགས་དུས་སུ་ལྕི་ཉིན་སྲིབ་ལུང་པ་བཅུ་གསུམ་གྱི་ཆུ་འདབ་ཐམས་ཅད་དང་། ཟོ་དོར་ལྕི་རྒྱལ་སྟག་རེ་ཞལ་བཅས་ཡར་ཇོ་རུ་མ་བུ་འགྲོ་ཕྱོགས་ལ་བསྐོར་སོང་ཞེས་བཤད་ཡོད་པ་ལྟར་ཡིན། དེ་ལས་ཤེས་ཐུབ་པ་ནི་ལྕི་རྒྱལ་སྟག་རེ་ནི་སྐབས་དེ་དུས་ནས་བསྟོད་པའི་ཟོ་དོར་ཆེན་པོ་ཞིག་ཡིན་པ་ཤེས་ཐུབ། བདུད་འཇོམས་རིན་པོ་ཆེའི་རྙིང་མའི་ཆོས་འབྱུང་དུ། གཞི་བདག་འདིའི་མདུན་དུ་ཐང་ཆེན་པོ་ཞིག་ཡོད། དེ་ནི་གླིང་སྒྲུང་ལས་གསལ་བའི་གླིང་གི་འདུ་ར་སྟག་ཐང་ཁྲ་མོ་ཞེས་གྲགས་པ་དེ་ཡིན། སྤྱི་དཔོན་གྱི་གླུ་ལས། ས་སྐྱིད་སོས་ཡག་གི་ཁ་མདོ་ན། །འདུ་ར་སྟག་ཐང་ཁྲ་མོ་རེད། །ཅེས་བརྗོད་པས་རྟོགས་ནུས། ལྕི་རྒྱལ་སྟག་རེའི་མདུན་ཐང་དང་། ཐང་དེའི་སྟེང་ནས་ལྕི་རྒྱལ་སྟག་རེ་ལ་བསང་ཕུལ་སྲོལ་ཡོད། ཐོག་མར་ལྷ་ར་བསྟོད་དུས་རྡོ་དཀར་གྱིས་དབྱིབས་གོར་གོར་བརྩིགས་རྗེས་དེའི་དཀྱིལ་དུ་བུམ་གཏེར་འཇོག་པའམ་ཡང་ན་ལྷ་རའི་ཉེ་འཁོར་གྱི་ས་གཙང་སའི་གནས་སུ་འཇོག་དགོས། བུམ་གཏེར་ལ་རིགས་མང་པོ་ཡོད། རྣམ་སྲས་བུམ་གཏེར། ས་སྙིང་བུམ་གཏེར། གཞི་བདག་གཏན་འཁོར་སོགས་ཡོད། བུམ་གཏེར་ནང་དུ་ཚང་དགོས་པའི་རྫས་ནི། གཏེར་བུམ་སྒྲུབ་ཐབས་ལ་གཏེར་མཛོད་ལས་དངོས། སྦྱོར་གཞི། རྗེས་གསུམ་ཡོད། དང་བོ་བུམ་པ་ཡུལ་གྱི་བྲེ་གང་ཤོང་བ་ལས་མི་ཆུང་བའི་ནང་། དབུས་སུ་སྲོག་ཤིང་བརྟན་པར་བཙུགས་ལ་གཟུངས་ཀྱི་ཤོག་དྲིལ་དཀྲི་ཞིང་ན་བཟའ་གསོལ། སྒྲུབ་ཆེན་བྱས་པའི་སྒྲུབ་གཏོར། མ་ཎི་རིལ་བུ། བྱ་རྒྱུད་ལུགས་ཀྱི་བུ་རྫས་ཉེར་ལྔ། སྙིང་ཞོ་ཤ་མཁལ་མ་ཞོ་ཤ་སོགས་ཞོ་ཤའི་རིགས་དང་། དུག་རིགས་མ་འདྲེས་པའི་སྨན་སྣ། གནས་རྟེན་བྱིན་ཅན་དང་ས་དཔལ་ཅན་གྱི་ས་སྣ་ཆུ་སྣ། ལྕགས་དང་ར་ནག་མུ་ཟིལ་སོགས་མ་འདྲེས་པའི་རིན་པོ་ཆེའི་རིགས། འབྲུ་ནག་མ་གཏོགས་པའི་འབྲུ་སྣ། ཤིང་ཏོག །ཤ་ཆང་མ་གཏོགས་པའི་དཀར་མངར་དང་ཁུར་བ་སོགས་ཟས་སྣ་གཙང་མ། ཤུག་པ་ལ་སོགས་བཟང་ཤིང་གི་ཕྱེ་མ་དང་བཅས་པས་ཕྱུར་བུར་བཀང་། གཙང་མ། ཁ་འཇིམ་པས་བཅད་ཅིང་རས་དཀར་པོ་ལ་རིགས་ལྔའི་ཕྱག་མཚན་བྲིས་པས་གཡོགས། མགྲིན་པ་དམ་པར་བཅིངས། གཟུངས་གཞུག་ཤོག་དྲིལ་ལ་བྲི་རྒྱུ། གཞུང་གི་བཟླས་སྔགས་རྣམས་དང་། ནཱ་ག་ཕུཊ་ལ་མ་ཐ་སྙན་ལ་ཐ། མི་འཛད་ཡུན་གྱི་གཏེར་མཛོད་ཅིག །ཅེས་དང་། དབྱངས་གསལ་རྟེན་སྙིང་། འབད་དང་རྩོལ་བས་མ་གོས་པ། ཞེས་སོགས་བཀྲ་ཤིས་དང་སུ་པྲཏིཥྛས་མཐའ་བརྒྱན་པའོ། །

བཞི་པ། རྒྱབ་བརྟེན་ཚན་རིག་གི་ལམ་ནས་གནས་བསྐོར་དང་གཞི་བདག་གསོལ་མཆོད་རིག་གནས་ལ་སྐྱེ་ཁམས་སྲུང་སྐྱོབ་ཀྱི་ལྟ་བ་ཟབ་མོ་ཡོད་པའི་སྐོར་གླེང་བ།

གོང་ཞུས་དེ་ལྟ་བུས་བོད་ཀྱི་གནས་རི་བསྐོར་བ་དང་གཞི་བདག་གསོལ་བའི་རིག་གནས་ཀྱི་ཁྲོད་དུ་སྐྱེ་ཁམས་སྲུང་སྐྱོབ་ཀྱི་ལྟ་བ་ཇི་ལྟར་ཡོད་ཚུལ་མཚོན་ཐུབ་ནའང་། ནུབ་ཕྱོགས་པའི་དངོས་གཙོ་སྨྲ་བའི་ཕྱོགས་ནས་བཤད་ན་མི་སྲིད་སྙམ། གང་ལྟར། ནུབ་ཕྱོགས་པའི་དངོས་གཙོ་སྨྲ་བ་དང་སེམས་གཙོ་སྨྲ་བ་གཉིས་དགག་བྱ་ཇི་ལྟར་མི་མཚུངས་ཡང་། གཉིས་ཀས་གནད་དོན་ཞིག་གི་སྙིང་པོ་རྡོག་རྡོག་ལེན་པ་གཅིག་མཚུངས་ཡིན་པ་འདྲ། ང་ཚོས་ཚན་རིག་གི་ལྟ་བ་དང་མཐུན་པའི་སྒོ་ནས་གནས་བསྐོར་དང་གཞི་བདག་གསོལ་བའི་རིག་གནས་ཀྱི་ཁྲོད་དུ་སྐྱེ་ཁམས་སྲུང་སྐྱོབ་ཀྱི་ལྟ་བ་ཟབ་མོ་ཡོད་པའི་ཡིད་ཆེས་ཀྱི་ངེས་ཤེས་བསྐྱེད་པའི་བདེན་དཔང་བྱ་ཐུབ་པ་སྟེ།

གཅིག །དེ་ལྟར་བོད་ཀྱི་གནས་རི་བསྐོར་བ་དང་གཞི་བདག་གསོལ་བའི་སྲོལ་རྒྱུན་གོམས་གཤིས་ཀྱིས་སྐྱེ་ཁམས་སྲུང་སྐྱོབ་ལ་རང་བཞིན་གྱིས་མཐུན་རྐྱེན་བསྐྲུན་ཐུབ། བོད་བརྒྱུད་ནང་བསྟན་གྱི་རི་ཆུ་དང་སེམས་ཅན་ཐམས་ཅད་འདྲ་མཉམ་ཡིན་པའི་ལྟ་བ་དེས་རི་དྭགས་རྔོན་པ་འགོག་པ་དང་། ཤིང་སྡོང་མི་གཅོད་པ། ཆུ་བོ་གཙང་མ་བཟོ་བ་བཅས་ཀྱི་དམངས་ཁྲོད་བཀག་སྡོམ་ཆགས་ཡོད། གནས་རི་དང་མཚོ་མཚེའུ་རྣམས་ནི་སྲོག་ཆགས་སྣ་ཚོགས་ཀྱི་རང་བྱུང་སྐྱབས་གནས་སུ་གྱུར་ནས་མཐོ་སྒང་གི་ཆུའི་འབྱུང་ཁུངས་སྲུང་འཛིན་བྱེད་བཞིན་ཡོད།

གཉིས། སྲོལ་རྒྱུན་གྱི་སྐྱེ་ཁམས་ལྟ་བ་དང་དེང་རབས་ཀྱི་ཁོར་ཡུག་སྲུང་སྐྱོབ་གཞུང་ལུགས་བར་འབྲེལ་བ་ཡོད་པ་ནི་དད་མོས་ཁྲོད་མི་དང་རང་བྱུང་ཁམས་མཉམ་གནས་ཀྱི་བསམ་བློ་ཡིན་པ་དང་། རི་ཆུ་ནགས་ཞིང་མཚེའུ་རྩྭ་ཐང་བྱེ་ཐང་བཅས་ཚེ་སྲོག་གི་ཐུན་མོང་ཚོགས་པ་ཞེས་པའི་ཚན་རིག་འདུ་ཤེས་དང་ཚད་མཐོའི་གཅིག་མཐུན་ཡིན་པས་མཐོ་སྒང་ས་ཁུལ་དུ་ཁོར་ཡུག་ལྟ་སྐུལ་དོ་དམ་བྱེད་མཁན་མི་སྣ་ཉུང་བའི་སྐྱོན་ཆ་ཁ་གསབ་བྱེད་ཐུབ།

གསུམ། སྒྲིག་མཐུན་ཚད་ལྡན་གྱིས་སྤེལ་བ་ནི་ཁྲིམས་སྲོལ་དང་ཚན་རིག་ཁོར་ཡུག་སྲུང་སྐྱོབ་ཀྱི་གཞི་འཛིན་ས་མི་རིགས་མཐུན་སྒྲིལ་ཡར་ཐོན་སྐུལ་འདེད་བཅའ་ཁྲིམས་དང་། སྐྱེ་ཁམས་ཁོར་ཡུག་ཁྲིམས་ལུགས་གཞིར་བཟུང་ན། དམངས་སྲོལ་འདི་སྲུང་སྐྱོང་བྱེད་པའི་མི་རིགས་སྲོལ་རྒྱུན་རིག་གནས་ཡིན། དོ་དམ་བླང་བྱ་ནི། གད་སྙིགས་གཅིག་གྱུར་གཙང་སེལ་བྱེད་པ་དང་། ཁོར་ཡུག་ལ་གནོད་པ་མེད་པའི་མཆོད་རྫས་བེད་སྤྱོད་པ། རྩྭ་ཐང་དང་རི་སྐྱེས་སྲོག་ཆགས་འཚོ་གནས་ལ་གཏོར་བརླག་མི་བྱེད་པ། གནས་རི་སྐོར་ཞིང་ཆུ་ཀླུང་ནགས་ཚལ་སྲུང་བ་བཅས་སོ། །

བཞི། ཆོས་ལུགས་ཀྲུང་གོ་ཅན་དུ་འགྱུར་བའི་ཁ་ཕྱོགས་དང་མཐུན་པར་བྱས་ནས་ཆོས་ཀྱི་དགོངས་དོན་ནང་སེམས་ཅན་སྲུང་སྐྱོབ་དང་རང་བྱུང་ཁམས་ལ་གཅེས་སྐྱོང་བྱེད་པའི་ནང་དོན་བཟང་པོ་སྔོག་འདོན་བྱེད་པར་བརྒྱུད་དད་ལྡན་མང་ཚོགས་རྣམས་རི་སྐོར་དང་ལྷ་གསོལ་གྱི་བྱེད་སྒོ་དེ་རྒྱུན་གཏན་རང་བཞིན་ལྡན་པའི་སྐྱེ་ཁམས་སྲུང་སྐྱོང་གི་བྱ་སྤྱོད་ཅིག་ཏུ་བསྒྱུར་རྒྱུར་ཁྲིད་སྟོན་བྱ་དགོས།

དེ་ལྟར་གནས་རི་བསྐོར་བ་དང་གཞི་བདག་གསོལ་བའི་རིག་གནས་ཀྱི་ཁྲོད་དུ་སྐྱེ་ཁམས་སྲུང་སྐྱོབ་ཀྱི་ལྟ་བ་ཡོད་པ་འདི་ལྟ་བུ། མ་གཞི་གླིང་གེ་སར་གྱི་སྒྲུང་དུའང་མང་པོ་གསུངས་པ་ལྟར་བོད་བརྒྱུད་ནང་བསྟན་རིག་གནས་ཀྱི་ཁྱབ་ཁོངས་སུ་འདུས་ཡོད་པ་ནི། མི་རྣམས་ལ་གནད་དོན་ཆུང་ཆུང་ཞིག་བཏོན་ནས་བསམ་བློ་གཏོང་དགོས་པར་ཞུ་ཁུལ་ཡིན།ནོངས་པ་དང་ཉེས་པའི་ཚོགས་མཐའ་དག་ལ་བཟོད་གསོལ་ཞུ།སྐྱོན་སངས་དང་དགོངས་འཆར་ཇི་སྩལ་་དགའ་བསུ་ཞུ་བ་ལགས་སོ།།བདེ་སྐྱིད་ཕུན་སུམ་ཚོགས་པའི་བཀྲ་ཤིས་ཤོག།