བྱིའུ་དེ་བདེ་མོ་ཡིན་ནམ།

འུག་པ།

猫头鹰

           གཤོག་ཟུང་གིས་མཁའ་དབྱིངས་འཇལ་བའི་བྱ་རྒོད་ནི་བྲག་རིའི་སྲུབས་ནས་ས་གཞིའི་ཐོག་གི་ལྟོ་འགྲངས་འཚོལ་བར་དགའ། སྡེར་མོ་ཡིས་ས་འདམ་བྲད་དེ་འབའ་འབུ་གཟན་དུ་འཚོལ་བའི་ཁྱིམ་བྱ་ནི་བྱ་གདང་ཐོག་བབས་ཏེ་སྐྱ་རེངས་བསུ་བར་གོམས། གནམ་སའི་མཚམས་སུ་རྒུམ་འབྲུ་འཐུ་བའི་བྱིའུ་ནི་ཤིང་ཕུང་གི་ཡལ་ག་དང་ཁང་པའི་རྩིག་སྲུབས་སུ་ཁྱིམ་གཞིས་དྲོན་མོ་བཅའ་བར་མོས།

        ཕ་ཡུལ་དུ་ཡོད་དུས་ཁྱིམ་བྱ་དེ་ཕོས་སྐྱ་མདའ་བསུ་བའི་གསུང་སྐད་ལ་དགའ་ཡང་དགའ་ལ་ཁྲོ་ཡང་ཁྲོ་མྱངས། གཞན་ཡུལ་འགྲིམ་དུས་རི་མཐོན་པོའི་འགོ་ནས་ཐུར་ལྟ་བྱེད་པའི་བྱ་རྒོད་ལ་སྡང་ཡང་སྡང་ལ་འཇིགས་ཀྱང་འཇིགས་མྱངས། དུས་ད་ལྟར་མི་ཡུལ་དང་རང་ཡུལ་བར་འགྲོ་འོང་བྱེད་དུས་བྱིའུ་ཆུང་ཞིག་གིས་སྔ་མོར་ལམ་ལ་འགྲོ་གྲོགས་དང་མཚན་མོར་ཁྱིམ་དུ་ལོག་རོགས་བྱེད།

        རྒྱ་རྫོང་ནགས་ལྟ་བུའི་ཁང་བརྩེགས་མཐོན་པོ་ནས་གནས་སྐབས་ཀྱི་གནས་མལ་རྙེད་པ་ནས་བཟུང་ཁང་མིག་གྲུ་བཞི་མ་ཆུང་ངུ་འདི་ནི་མཚན་གྱི་རྨི་ལམ་འཁོར་ས་དང་ཉིན་གྱི་དུག་གསུམ་གྱི་ངལ་དུབ་འབེབས་སར་གྱུར་ཡང་། ཁང་པའི་ནང་ནས་རྩེད་མོའི་རྒོད་ཁ་མེད་ལ་ཕྱི་ནས་འབོད་བརྡ་གཏོང་མཁན་མེད་པས་ཅུང་ཁེར་རྐྱང་དུ་ལུས་ཀྱང་། ཁང་པའི་སྒེའུ་ཁུང་འགྲམ་གྱི་ལྕང་སྡོང་དང་དེའི་ཡལ་གར་གནས་བཅས་པའི་བྱིའུ་དང་བྱིའུ་སྐད་ནི་ལྷིང་འཇགས་ནང་མིག་གི་ལོངས་སྤྱོད་དང་རྣ་བའི་བདུད་རྩིར་གྱུར།

ལྕང་སྡོང་དེ་ནི་སྒེའུ་ཁུང་གི་ཁ་གཏད་དུ་རྩ་བ་ས་རྡོའི་བར་ལ་ཟུག རྩེ་མོ་མཁའ་དབྱིངས་ཀྱི་བར་སྣང་དུ་གཏད་དེ་གཞུང་རྟ་ཐུང་ཡང་སྦོམ་ལ་ཡལ་ག་ཕན་ཚུན་བསྣོལ་ནས་སྐྱེས་པས། དཔྱིད་འགོའི་འཇམ་མཉེན་གྱི་ལོ་མ་ནི་བྱིས་པའི་འཛུམ་ཀོང་དང་མཚུངས་ལ་དབྱར་གཞུང་གི་གྲིབ་བསིལ་སྣུམ་པོས་ཉི་མའི་ཚ་གདུང་འགོག་ཅིང་། སྟོན་དུས་ཀྱི་ལོ་མ་སེར་པོ་རླུང་ཁའི་དར་ལྕོག་སྣ་ལྔ་དང་འདྲ་ཞིང་། དགུན་གྱི་ཡལ་གར་ཁ་བའི་མེ་ཏོག་གིས་དཔྱིད་ཀྱི་རྨི་ལམ་སྦྲུམ།

        ཆར་པ་ཟིམ་ཟིམ་འབབ་པའི་དུས་སམ། ཁ་བ་ལྷབ་ལྷུབ་འཕུར་བའི་སྐབས་སུ་ལྕང་སྡོང་དེར་འཁོར་བའི་བྱིའུ་བགྲང་ལས་འདས་ཀྱང་། ལ་ལ་ཡིས་སྐབས་བབས་ཀྱི་འབབ་སྟེགས་ཙམ་དང་འགའ་ཤས་ཀྱིས་དུས་ཐུང་གི་སྐྱོ་བ་སངས་སྤྱད་ཙམ་བྱས་རྗེས་གར་སོང་ཆ་མེད་དུ་གྱུར་པ་ལས། དབྱར་དགུན་སྟོན་དཔྱིད་མེད་པར་དེ་ལ་འཁོར་ཞིང་དེ་ལ་གནས་པ་ནི་བྱིའུ་ཆུང་ཏིག་རིལ་རིལ་ཞེས་པ་དེ་རེད། ཁོང་ལ་སོ་སོ་སྐྱེ་བོ་རྣམས་ཀྱི་རེ་འདོད་ལྟར་འཇོལ་མོའི་མགྲིན་རྔ་མེད། ཁང་བྱིའུ་འཕུར་རྩལ་མི་འཛོམས། བྱིའུ་ཁྲ་ཡི་སྤུ་སྡུག་བྲལ། ལུས་བོང་ཆུང་ལ་སྤུ་མདོག་ནི་སྐྱལ་རིལ་དང་གཤོག་ཟུང་ལ་ནག་ཐིག་རེ་གཉིས་ཀྱང་བབས་ཡོད་པས་འདབ་ཆགས་ཀྱི་རིགས་ལས་གཉོམ་ཆུང་འཁོས་དམན་ཞིག་ཏུ་སྣང་ཡང་། དྲིལ་བུ་དཀྲོལ་བ་ལྟ་བུའི་སྐད་སྙན་པོ་ཞིག་ཡོད་པས་བྱིའུ་ཏིག་རིལ་རིལ་ཞེས་མིང་སྙན་པོ་ཞིག་ཐོགས།

        ཞོགས་པར་མཁའ་མཐའ་ནས་སྐྱ་རེངས་སྐྱ་མདའ་དང་སྔོ་རེངས་སྔོ་མདའ་བཏང་སྟེ་སྐྱེ་དངོས་ཡོད་ཚད་མུན་པའི་འཆིང་བ་ལས་གྲོལ་གྲབས་བྱེད་མ་ཐག བྱིའུ་ཚོས་ཕྱོགས་བཞི་ནས་ཀྱུར་ཀྱུར་ཞེས་མགྲིན་པའི་རྒྱུད་མངས་གཅིག་འཇགས་གཅིག་ལངས་ཀྱིས་རྡུང་བ་ནི་དབེན་འཇགས་དཀྲོགས་པའི་མཉམ་དཀྲོལ་རོལ་མོ་ཞིག་དང་མཚུངས། དེའི་ནང་ལས་བྱིའུ་ཏིག་རིལ་རིལ་གྱི་གསུང་སྙན་ནི་ཕྲ་ཞིང་རིང་ལ་འགྱུར་ཁུག་མང་བས་ཀུན་ལས་འབུར་དུ་ཐོན་ཏེ་རྣ་བའི་དཀྱིལ་དུ་ལྷུང་ཞིང་ཡིད་ཀྱི་གསེང་དུ་སིམ་དུས། ཧར་གྱིས་མལ་ལས་ལངས་ཏེ་མགོ་བོ་སྒེའུ་ཁུང་ནས་བསྲིངས་ན། མུན་ནག་གིས་ཞག་གཅིག་རིང་ལ་ཡང་ནས་བསྐྱར་དུ་བཀྲུས་པའི་སྐྱེ་དངོས་ཐོག་གི་ཟིལ་ཐིགས་ཁྲོམ་ཁྲོམ་དང་། མཚན་གང་ལ་སྟོད་སྨད་བར་གསུམ་མྱུལ་བའི་རླུང་བུ་ཡིས་ལུས་སེམས་དྭངས་ཤིང་སངས་བར་བྱས། སྐབས་འགར་གཉིད་ལས་སད་ཀྱང་སྒྱིད་ལུག་གིས་གཉིད་ལོ་བྱས་ཏེ་ཐུན་གསུམ་གྱི་རྨི་ལམ་ལ་རིམ་པ་བསྒྲིགས་ཏེ་རྨིས་ལྟས་ལ་བརྟག་དཔྱད་བྱེད་དུས། བྱིའུ་དེས་སྒེའུ་ཁུང་གི་ཤེལ་སྒོའི་ངོས་སུ་མཆུ་ཏོག་གིས་གཙགས་ཤིང་གཤོག་སྒྲོ་རྡེག་པས་གཉིད་རྫུས་བྱེད་མ་ཕོད་པར་བདེན་མིན་ཅི་རིགས་ཀྱི་རྨི་ལམ་ཡོད་ཚད་སྔས་འོག་ཏུ་སྦས་ཏེ་བྱིའུ་སྐད་དང་འགྲོགས་ཏེ་ལས་ལ་བུད།

གངས་རིའི་འོག་གི་ཕ་གཞིས།

雪山脚下的家园

        ཉིན་མོར་ལས་ལ་ཞུགས་རིང་གོང་གིས་ཡར་ལ་འཐེན་མིན་དང་། འོག་གིས་རྒྱབ་ཏུ་སྐྱོར་མིན། བར་གྱིས་མཐུན་ལམ་བསྒྲིགས་མིན་ཅི་རིགས་ཀྱི་སེམས་ཚེགས་ལྗིད་མོ་རྣམས་མཚན་མོར་ཁྱིམ་གྱི་སྒོ་ཁར་ཕབ་སྟེ་སྒེའུ་ཁུང་གི་འགྲམ་གྱི་ཉལ་སར་གན་ཀྱལ་དུ་ལོག་དུས། མིག་གི་མདའ་མོ་དབང་མེད་དུ་ལྕང་སྡོང་གི་ཕྱོགས་སུ་འཕངས་ཤིང་རྣ་བའི་དབང་པོས་བྱིའུ་དེའི་གྲེ་འགྱུར་སྙན་མོ་ཐོས་སུ་རེ། རྒྱུ་མཚན་ནི་ཉིན་མོའི་ལབ་བརྡོལ་ལ་ཉམས་འཇོག་བྱེད་མཁན་མེད་ཀྱང་། མཚན་མོར་རང་ཉིད་ཀྱི་ཚེ་སྲོག་རྣམ་ཤེས་གསུམ་རྗེན་པར་བཏོན་ཏེ་རང་སེམས་དང་བགྲོ་གླེང་བྱེད་ཆོག་པས་མཚན་མོར་གླུ་དབྱངས་ལེན་མཁན་ལ་དད་པ་ཧ་ཅང་ཆེ། སྐབས་དེ་དུས་བྱིའུ་དེས་ཀྱང་ཉིན་ཧྲིལ་པོར་མཐོ་སའི་ཁྲ་ལ་དོགས་ཟོན་དང་། དམའ་སའི་སྦར་མོ་ཅན་ལ་བྲོས་བྱོལ་བྱེད་བཞིན་ཡར་འཕུར་མར་འཕུར་གྱིས་ལུས་སེམས་ལ་ངལ་ཐང་ཆེ་ན་ཡང་། ཡོད་ཚད་ལྕང་སྡོང་ཁྱིམ་གཞིས་དྲོན་མོར་བསྐུངས་ཏེ་ལྷོད་ཀྱིས་སྡོད་ཡོད་མོད། ངས་མུན་པའི་སེང་རས་བར་ནས་ལྕང་སྡོང་ལ་ཅེར་དུས་སྐབས་འགར་ཁོང་གིས་མུན་པའི་ཡོལ་བ་ལུས་ལ་གྱོན་ཏེ་སྒྲོ་དཀྲུགས་ལན་གསུམ་གྱིས་ཡལ་འདབ་སིག་སིག་ཏུ་གཡོ་ཞིང་། ལན་རེར་ཏིག་རིལ་རིལ་ཞེས་སེམས་འགྱུ་སྙན་མོས་མཚན་ལམ་གཤགས་ཏེ་མཚན་བགྲོད་པ་ལ་སྡོང་གྲོགས་བྱེད་པས། ང་རང་ལ་ཉལ་ས་ཐབས་ཆག་འདིའི་ནང་ཡང་ཧ་ཅང་སྐྱིད་སྣང་ཤར་ཏེ་རང་རང་གི་གནས་མལ་དུ་མཚན་མོའི་འོད་མདངས་ཀྱི་རྣམ་ཐར་ཀློག་བཞིིན་སང་ཉིན་གྱི་ཉི་གཞོན་རྨིས།

        གཟའ་ཉི་མའི་ཉིན་ཞིག་ལ་ང་རང་སྔ་ལྟར་ཁོང་གི་སྐད་སྙན་གྱིས་མལ་ལས་བསླངས་ཏེ་དཔེ་སྒྲོམ་གྱི་ཟུར་དུ་བསྡད་དེ་རྒྱ་ཇ་ཞིམ་པོ་འཐུང་ཞོར་བོད་དབྱངས་སྙན་མོ་ཞིག་ལ་ཉན་ཏེ་དཔེ་ཆར་ལྟ་ཀློག་བྱེད་སྐབས། བྱིའུ་ཏིག་རིལ་རིལ་ཁོང་ཡང་འཕུར་མ་ལྡིང་གིས་སྒེའུ་ཁུང་གི་ཁ་རུ་བབས་ཏེ་ངའི་ངོ་ལ་ལྟ་ཙམ་དང་དཔེ་ཆ་ལ་ལྟ་ཙམ་བྱས་རྗེས་ཁ་ཕར་འཁོར་ནས་རྔ་མ་གཡུག་ཙམ་གཡུག་ཙམ་བྱེད་པ་ནི་ཧ་ཅང་སྙིང་ཉེ་བ་དང་བྱམས་དུང་བ་ཞིག་ཏུ་སྣང་བས། ངས་གར་སྟེགས་ཐོག་གི་འཁྲབ་རྩལ་ལ་བྱང་བའི་འཁྲབ་སྟོན་པ་ཞིག་གི་སྒྱུ་རྩལ་ལ་ཉམས་སུ་མྱོང་བ་ལྟར་ཧོན་ཐོར་བའི་སྐབས། ཁོང་གིས་ཏིག་རིལ་རིལ་ཞེས་སྙན་འཇེབས་ཀྱི་གསུང་སྐད་ལན་གསུམ་ཕྱུང་རྗེས་ཕྱི་རོལ་དུ་འཕུར་སོང་ལ་བསམ་ཚོད་དུ་རྫ་ཆུ་བསིལ་མ་དང་འབྲུ་དྲུག་སྙེ་མ་འབེལ་བའི་ཕྱོགས་སུ་འགྲོ་ངེས་ཏེ། ཁོང་གི་སེམས་པ་དང་གཤོག་སྒྲོ། གྲེ་འགྱུར་ནི་ནམ་མཁའི་སྤྲིན་པ་དང་ཞིང་ཁའི་བསིལ་རླུང་ལ་དབང་བས་སོ། ཁོང་འཕུར་རྗེས་ཉི་གཞོན་གྱི་ཟེར་མདའ་དྲོད་ལམ་ལམ་ཞིག་སྒེའུ་ཁུང་ནས་འཕྲོས་ཏེ་དཔེ་སྒྲོམ་དང་དཔེ་ཆའི་ཐོག་ཕོག་པས་ངས་ལྟ་ཀློག་བྱེད་བཞིན་པའི་དཔེ་ཆའི་ནང་གི་ཡིག་འབྲུ་རེ་རེ་ནི་བྱིའུ་ཞིག་གི་སྣང་བརྙན་དུ་ཤར་ལ། ཡིག་ཕྲེང་རེ་རེ་ལས་ངེད་གཉིས་བར་གྱི་གཏམ་གླེང་གི་ཚོར་བ་སྐྱེས་པས་དུས་དེ་ནས་བཟུང་དབྱར་དགུན་སྟོན་དཔྱིད་གང་ཡིན་ཡང་ངས་ཁང་པའི་སྒེའུ་ཁུང་དེ་བརྒྱབ་མ་མྱོང་།

        ཕྱི་རོལ་གྱི་སྐྱེས་བུ་རབ་འབྲིང་ཐ་གསུམ་དང་འབྲེལ་འདྲིས་བྱེད་པའམ་རང་འབབ་ཀྱི་ལས་ལ་སྡུག་བསྲན་ཆེ་བས་ལུས་ངལ་ཞིང་སེམས་དཀའ་སྟེ་སྐྱོ་སུན་ཆེ་བའི་དུས་སུ། ཉིན་མཚན་མེད་པར་མགོ་བོ་ཉལ་གོས་ཀྱིས་བཏུམས་ཏེ་ཉལ་བས་ཕྱི་རོལ་གྱི་ཉི་ཤར་རླུང་ལྡང་སོགས་ཀྱི་འགྱུར་ལྡོག་ཅི་ཡང་མི་ཤེས་པ་ནི་འཁོར་བའི་སྡུག་བསྔལ་སེམས་ཀྱི་ཕ་མཐར་བསྐྲད་པར་བརླམས་ཀྱང་། དོན་དུ་འཇིག་རྟེན་པ་ཡིས་འཇིག་རྟེན་བློས་བཏང་བའི་འདུ་ཤེས་བཙན་པོས་འཇིག་རྟེན་གྱི་བྱ་བར་ཞུགས་དགོས་པ་ལས་བྲོས་ནས་ཐར་ས་ཞིག་དང་གབ་ནས་མི་རྙེད་ས་ཞིག་གང་ན་ཡོད་ཨང་། སེམས་པ་སྨུག་པས་བཏུམས་ཏེ་ཁ་ཕྱོགས་ཀྱང་བོར་བའི་དུས་སུ། བྱིའུ་དེས་མིའི་སེམས་ཁམས་ཤེས་པ་ལྟར་ཉིན་གྱི་ཐུན་གསུམ་ལ་སྒེའུ་ཁུང་གི་ཁར་བབས་ཏེ། རྐྱོང་སྐུམ་གྱི་མཉེན་ཤ་ལྡན་པའི་གཤོག་པ་ཟུང་གིས་སྔ་མོའི་དྲི་བཞོན་བསིལ་མ་དང་ཉིན་གཞུང་གི་ཉི་ཟེར་དྲོན་མོ། ཕྱི་དྲོའི་མཚམས་སྤྲིན་དམར་པོ་དང་བཅས་ཁང་པའི་གྲུ་ཟུར་སོ་སོ་ན་གདན་དུ་དྲངས་པས། སེམས་ལྡན་སུ་ཡིན་རུང་རང་ཕྱོགས་ཀྱི་སྒོ་གླེགས་གཏན་མེད་ན་མུན་ནག་གནས་པའི་གོ་སྐབས་ནམ་ཡང་མེད་པའི་གདེང་ཚོད་དང་སྤོབས་པ་རྙེད།

        བྱིའུ་དེ་དང་འགྲོགས་ཀྱིན་དྲན་དྲན་པའི་མཐའ་མར་ངས་དེ་ནི་ཆུང་བྱིས་པའི་དུས་སུ་མདའ་རྩེ་མདེའུ་རྩེས་ལྔ་ལམ་དུ་བརྫངས་པའི་ཚེ་འདས་དག་གི་རྣམ་ཤེས་མིན་ནམ་སྙམ། བྱིའུ་དེ་ལ་བལྟས་ཤིང་བསམས་བསམས་པའི་རྗེས་སུ་ང་ལ་དེ་ནི་ཕ་མེས་ཡབ་མེས་རྣམས་ཀྱི་སྐྱེ་རྒྱུན་ཞིག་ཡིན་སྣང་ཤར། གལ་སྲིད་སྔ་མ་ཡིན་ན་ཁོང་གིས་བདུད་ཀྱི་མཚོན་ཆ་ལ་འཇམ་མཉེན་མེ་ཏོག་ལན་དུ་སྦྱིན་ཏེ་དགྲ་བོ་ཐབས་ཀྱིས་གྲོགས་སུ་བསྒྱུར་བའི་བློ་སྤོབས་ལ་ཡིད་སྨོན་ཤོར་བཞིན་ཁོང་གི་དྲུང་དུ་སྔར་བྱས་ལས་ལ་ལུས་ངག་ཡིད་གསུམ་གྱིས་འགྱོད་གཤགས་བྱེད་ཆོག གལ་སྲིད་ཕྱི་མ་ཡིན་ན། འབྲུ་ནག་གིས་གང་བའི་དཔེ་ཆ་ཀློག་ཤེས་བའི་ངེས་པ་མེད་ཀྱང་། སེམས་ཁོང་གི་དཀྱིལ་དབུས་སུ་བཀོད་པའི་དྲན་གདུང་དང་འགྱོད་ནོངས། དྲན་ཚོར་དང་ཆོད་སེམས་ཀྱི་རི་མོ་སེམས་ཀྱིས་ཀློག་ཅིང་ཡིད་དུ་འཇགས་ཡོད་ཚོད་དུ་འདུག་པས་བྱིའུ་ཏིག་རིལ་རིལ་ཁོང་ནི་འདི་ཕྱིའི་བར་གྱི་ཕོ་ཉ་འཁྲུལ་མེད་ཅིག་ཏུ་སྒོམ་ཡོད་ལགས།

        རྐང་འཐུང་གི་ལྗོན་ཤིང་ལ་སེར་ཐིག་ཕོག་ཅིང་བར་སྣང་ལའང་སེར་མདངས་འཁྱིལ་བའི་སྟོན་དུས་ཤིག་ལ། ང་ཕ་ཡུལ་དུ་སོང་ནས་ཨ་མ་ལ་ངའི་སྒེའུ་ཁུང་ལ་འཁོར་བའི་བྱིའུ་ཏིག་རིལ་རིལ་དང་ང་རང་གི་དྲན་ཚུལ་རྣམས་སྦ་གསང་མེད་པར་ཞུས། ཨ་མས་དང་ཐོག་ཅི་ཡང་མི་སྨྲ་བར་བསམ་བློ་ཅུང་བཏང་རྗེས། སྤྱིར་ཁྱེད་ཀྱི་ཨ་ཕ་དང་གཅེན་པོ་གཉིས་ཀྱིས་ང་ཚོ་ཁྱིམ་ཚང་གང་གི་འགྲོ་འཆག་ཉལ་འདུག་གི་དོན་དུ་སེན་འགོ་ཁྲག་དང་སེན་རྟིང་རྣག་གིས་དཀའ་སྤྱད་སྡུག་རུས་རྒྱག་པ་ལས་མ་ཎི་ཚིག་གསུམ་ཡང་འདོན་ཁོམ་མེད་པར་ཚེ་ཕྱི་མའི་ལམ་དུ་བྱོན་ཟིན་མོད། ངས་ད་ལྟའི་བར་དུ་མ་ཎི་དུང་ཕྱུར་མང་པོ་བཏོན་ཡོད་པས་མ་ཚད། དེའི་ནང་ལས་ཁོང་རྣམ་པ་ཚོ་ལ་བགོ་སྐལ་ཡང་བྱིན་ཟིན་པས་ཁྱེད་ཀྱིས་དྲན་པ་ལྟར་ཁོང་ཚོ་ད་དུང་དུད་འགྲོའི་རིགས་སུ་སྐྱེ་བ་ལེན་མི་སྲིད་པར་བདེ་ལྡན་གྱི་ཞིང་དུ་གནས་ཐག་ཆོད་རེད་མོད། འཇིག་རྟེན་ནི་གཅིག་ལ་གཅིག་རྟེན་གྱི་ཚུལ་དུ་གནས་པས་བྱ་དངོས་བར་དང་སེམས་ཅན་བར་མི་ཡི་བློས་གཞལ་དཀའ་བའི་འབྲེལ་བ་ཡོད་སྲིད་པས་ཁྱེད་ཀྱིས་བྱིའུ་དེའི་འཕུར་ལྡིང་དང་འཚོ་བའི་གོམས་གཤིས་ལ་ཕོག་ཐུག་གཏོང་མི་རུང་། གལ་སྲིད་དེ་ནི་ཁྱེད་ཀྱིས་ཆུང་དུས་བསད་མྱོང་བའི་བྱིའུ་རྣམས་ཀྱི་རྣམ་ཤེས་ཡིན་པར་འཇིགས་ན་འགྱོད་གཤགས་ཀྱི་ཆེད་དུ་རྒྱུན་དུ་སྒེའུ་ཁུང་གི་འགྲམ་ལ་འབྲུ་སྡེར་མ་གང་དང་། ཆུ་གཙང་ཕོར་པ་གང་རེ་འཇོག་བཞིན་དུ་མ་ཎི་ཚར་གསུམ་རེ་ཐོན་དང་དུས་ཀྱི་འགྲོས་ནང་སེམས་པ་ལ་ཡོ་བསྲང་དང་བླ་སྲོག་ལ་དག་ཐེར་ཡོང་ངེས་ཞེས་གསུངས།

        ཉིན་དེའི་དགོང་མོར་ངས་ཨ་ཕ་དང་གཅེན་པོ། བྱིའུ་དེ་རྣམས་དྲན་བཞིན་གཉིད་དུ་ཞུགས། རྨི་ལམ་གྱི་ཞིང་ཁམས་སུ་བྱིའུ་དེ་སྔ་ལྟར་སྒེའུ་ཁུང་གི་འགྲམ་ལ་བབས་ཏེ་སྡེར་མའི་ནང་གི་འབྲུ་ཟ་བཞིན་ཆུ་འཐུང་པས་མ་ཚད། ངའི་དཔེ་ཆའི་ཐོག་སུག་རྗེས་ཁ་བའི་འདབ་མ་འདྲ་བོ་བཞག་རྗེས་སླར་ཡང་ཁོང་རང་ཉིད་ཀྱི་མཁའ་ལམ་དུ་འཕུར་སྐྱོད་བྱེད།

        དུས་དེ་ནས་བཟུང་དབྱར་དུས་ཀྱི་མཚན་མོར་འབྲུག་སྒྲ་ལྡིར་ལྡིར་དུ་གྲགས། ཆར་པ་ཤག་ཤག་ཏུ་འབབ་དུས་ངས་ཁང་པའི་བད་ཁ་ནས་ལྷུང་བའི་ཆར་ཐིགས་ཀྱི་སྒྲ་ལ་ཉན་པར་སྤྲོ་ཞིང་། དགུན་ཁར་ཁ་བའི་འདབ་མ་ལྷབ་ལྷུབ་ཏུ་འཕུར་བའི་སྟངས་ཀ་ལ་ཡིད་སྨོན་ཤོར་ཡང་། ལྕང་སྡོང་ལ་གནས་བཅས་པའི་བྱིའུ་ཏིག་རིལ་རིལ་དྲན་ཐེངས་རེར་ཆར་པ་དང་ཁ་བ་ལ་འཁང་ར་དང་ལེ་བདའ་ཡང་བྱེད་སྲིད་མོད། ཨ་མའི་གདམས་ངག་ལྟར་བྱིའུ་དེའི་འཚོ་བའི་གོམས་གཤིས་ལ་ཕོག་ཐུག་གཏོང་མ་ཕོད་པར་སྔ་མོར་ཁྱིམ་སྒོ་ནས་བུད་ཁར་སྒེའུ་ཁུང་གི་འགྲམ་ལ་འབྲུ་སྡེར་མ་གང་དང་། ཆུ་ཕོར་པ་གང་། དཔེ་ཆ་ཀློག་འཕྲོ་མ་འཇོག་མཚམས་ཆད་མ་མྱོང་བས་ཉིན་མོར་ཕྱི་ལ་འགྲོ་དུས་ལུས་སེམས་བདེ་ཞིང་མཚན་མོར་ནང་ལ་ལོག་དུས་རྨི་ལམ་སྐྱིད། །