མི་ཉག་བུ་མོ།

ཨ་ལོང་དངུལ་གྱིས་ཆེ་བ། །
བ་སོ་དཀར་ལ་སྦོམ་པས། །
བྱུར་དམར་རྒྱན་དུ་བཏགས་པ། །
ཚེར་ཏོག་དེ་དང་མཚུངས་སོང་། །
 
ཨ་གདན་གདོང་ལ་འོངས་པ། །
ངོ་དཀར་སྲུང་བའི་ཉི་གདུགས། །
མིག་དང་སྨིན་མའི་མཛེས་པར། །
མདངས་ཀྱི་ཁ་དོག་བསྩལ་ཡོད། །
 
གསེར་གྱི་རྣ་ཆ་གཟར་བ། །
མགྲིན་ལ་རྒྱན་དུ་འཕྱང་བས། །
དམར་སེར་ཚོན་གྱི་སྡོང་པོ། །
འགུལ་ཙམ་གཡོ་ཙམ་གནང་འདུག།
 
སོ་ལ་གསེར་ཤུབས་བསྐོན་པ། །
འགྲམ་ཟུང་ཚོན་རྩིས་སྨག་པ། །
ཤེལ་སྒོར་ལྟ་བཞིན་འགྲོ་བ། །
གཉུག་སྤྱོད་གཙང་མ་མངོན་ནོ། །
 
སྟོད་ལྭ་དམར་ཞད་ཆེ་ཞིང་། །
སྐྲ་མཐུད་དེ་ཡང་དམར་བས། །
དམར་དམར་མཛེས་པའི་སྒེག་ཉམས། །
ལང་ཚོའི་ངོགས་ནས་གྲོལ་ལོ། །
 
ཆབ་མ་དངུལ་གྱིས་དཀར་བ། །
ཆེ་བ་རྐེད་པའི་སྐྱོར་ཡ། །
ཀྲོང་ངེར་མཛེས་ཉམས་མིན་ན། །
དགྱེ་དང་གུག་པར་དཀའ་ཡོད། །
 
གློ་ཟུང་ཁ་ལེབ་འདྲ་བ། །
གཡས་གཡོན་ཚར་གྱིས་དཔྱང་བཞིན། །
ཁྲོག་སྒྲ་སེང་སྒྲ་བཅས་པས། །
མིག་གི་ལྟད་མོར་བརྒྱན་ཡོད། །
 
ཧྲིལ་གྱིས་དམར་ཤུགས་ཆེ་ཞིང་། །
ལྷམ་གྱི་ཕྱིར་རྟིང་མཐོ་བ། །
བཅོས་མིན་འཛུམ་ཉམས་ཕྱུང་སྟེ། །
མགྲོན་ལ་དགའ་བས་བསུས་ཡོད། །
 
ངོ་ལ་དཀར་རྩི་ཉུང་ཞིང་། །
སྨིན་མཆུ་ཚོན་བྲིས་མིན་པས། །
མི་མོ་ལྷད་མེད་ཅིག་གི།
རང་བཞིན་ཉེ་བར་བཅར་ཡོད། །
 
ཉི་ཟེར་ལྷགས་རླུང་བཟེད་པས། །
སྐྱི་པགས་འཇམ་ཤ་བོར་ཡང་། །
དགའ་དུང་མཛའ་བརྩེ་འཇམ་པོ། །
བྲང་གི་རུམ་དུ་བཅུག་ཡོད། །
 
ལྷད་མེད་སྒེག་འཕྱོར་དེ་ཡིས། །
གཞུང་བཟང་ཕྱིར་ལ་མངོན་བཞིན། །
རྒྱང་རིང་མགྲོན་པོ་སུ་ལ། །
བསུ་མའི་སེམས་སྐྱེས་བཏེགས་ཡོད། །