སྒྲོལ་མ་ཉེར་གཅིག་གི་སྨོན་ཤིས།

སངས་རྒྱས་སྒྲོལ་མ།

ཚོགས་གཉིས་མཐར་ཕྱིན་ཐུགས་བསྐྱེད་མཁའ་ལ་རེག།

དཀའ་ཐུབ་སྙིང་སྟོབས་ཡ་ལད་ས་གསུམ་རྒྱལ།།

རྫོགས་པའི་སངས་རྒྱས་གསེར་གྱི་ཉི་མ་མཆོག།

ཕྱི་བཞིན་དམ་འཇུག་སྒྲོལ་མ་བཀྲ་ཤིས་ཤོག།

དཀོན་མཆོག་སྒྲོལ་མ།

འདི་ཕྱིའི་ལོག་མལ་ངེས་ལེགས་གྲོང་ཁྱེར་ཆེ།།

ཕྱོགས་བྲལ་ལག་རྩེར་གཏོད་པའི་བསླུ་མེད་སྐྱབས།།

མཆོག་གསུམ་ནོར་མཆོག་དད་གུས་སྙིང་ཁམས་སུ།།

རྟག་བརྟན་མཆོད་པའི་སྒྲོལ་མ་བཀྲ་ཤིས་ཤོག།

ཆོས་དབྱིངས་སྒྲོལ་མ།

འདི་སྣང་རྨི་ལམ་སྒྱུ་མའི་གར་ལ་རྟོག།

ཟག་མེད་བདེ་སྟོང་ཆོས་དབྱིངས་ཀློང་ན་མྱོས།།

མཁྱེན་བརྩེ་འོད་རླབས་མཁའ་མཉམ་འགྲོ་དྲུག་ལ།།

ཅི་དགར་རྐྱོང་བའི་སྒྲོལ་མ་བཀྲ་ཤིས་ཤོག།

བྱང་ཆུབ་སྒྲོལ་མ།

ངེས་འབྱུང་རྩ་བ་བརྟན་པའི་དད་བརྩོན་མེ།།

བྱང་ཆུབ་ལམ་བཟང་འཚོལ་བའི་ནགས་ལ་སྦར།།

ཐོས་བསམ་ཆུ་གཏེར་ཡངས་པའི་འཇིངས་དབུས་ན།།

ངར་གྱིས་རྐྱལ་བའི་སྒྲོལ་མ་བཀྲ་ཤིས་ཤོག།

རྡོ་རྗེ་སྒྲོལ་མ།

ཡ་རབས་དགེ་བའི་ལས་ལ་དཀར་བའི་སེམས།།

མི་འགྱུར་རྡོ་རྗེ་བྲག་ལ་བརྐོས་པའི་རིས།།

ལག་ལེན་ཐབས་ཀྱིས་འཇལ་བའི་མཛེས་སྡུག་དཔྱིད།།

ཚེ་གཅིག་རྒྱན་བསྣམས་སྒྲོལ་མ་བཀྲ་ཤིས་ཤོག།

རིག་འཛིན་སྒྲོལ་མ།

རིག་འཛིན་རྩལ་ནུས་འབར་བའི་ཕྱག་ཟུང་གིས།།

རྨོངས་པའི་ཐང་སྟོང་འཁྱམས་པའི་གདུལ་བྱ་སྟོང་།།

པང་དུ་གཅེས་པར་བཟུང་བའི་འཕྲིན་ལས་གདུགས།།

གྱེན་དུ་འདེགས་མཁས་སྒྲོལ་མ་བཀྲ་ཤིས་ཤོག།

བསོད་ནམས་སྒྲོལ་མ།

བསོད་ནམས་བྱེ་བ་བསྲུབས་པའི་དལ་རྟེན་ནོར།།

རྣམ་དཀར་རྒྱལ་མཚན་རྩེ་མོའི་དཔལ་དུ་མཆོད།།

ཡུན་ཐུང་མི་ཚེ་གསེར་མདོག་ལམ་བཟང་དུ།།

གོམ་ཁ་སྐྱེན་པའི་སྒྲོལ་མ་བཀྲ་ཤིས་ཤོག།

སྐལ་བཟང་སྒྲོལ་མ།

གཞན་དབང་གཏུམ་པོའི་གདོང་ལ་འགྲམ་ལྕག་གཞུས།།

ཕུགས་བསམ་སྒྲོན་མེ་ལྔ་རིག་གཞུང་ལ་སྦར།།

སྐལ་བཟང་འོད་སྣང་འཚོལ་བའི་བློ་སྤོབས་མཚོ།།

མཁའ་ལ་ལུད་པའི་སྒྲོལ་མ་བཀྲ་ཤིས་ཤོག།

རྣམ་རྒྱལ་སྒྲོལ་མ།

སྲོལ་རྒྱུན་ལྕགས་སྒྲོག་སྦོམ་པོའི་བསྡམས་བཀྱིགས་ལ།།

དམར་འཛིང་རལ་གྲི་གདེངས་པའི་དཔའ་རྩལ་གྱིས།།

རྣམ་རྒྱལ་རང་དབང་ཐོབ་པའི་འཇིགས་མེད་གླུ།།

སྙན་རྒུར་ལྡིར་བའི་སྒྲོལ་མ་བཀྲ་ཤིས་ཤོག།

དབང་ཕྱུག་སྒྲོལ་མ།

ཐབས་ཤེས་ཉི་ཟླ་འབར་བའི་མཐུ་དཔུང་གིས།།

ཆབ་སྲིད་མངའ་ཐང་དར་བའི་ཁྲི་འཕང་ལ།།

དབང་ཕྱུག་སྟོབས་ཀྱིས་སྙེམས་པས་འགྲོ་ཕན་དོན།།

འབའ་ཞིག་གཞོལ་བའི་སྒྲོལ་མ་བཀྲ་ཤིས་ཤོག།

ཚེ་རིང་སྒྲོལ་མ།

གཞན་ཕན་ལྷག་བསམ་ཡངས་པའི་མཁའ་ལམ་ན།།

སྙིང་རྗེ་འོད་སྟོང་འབར་བའི་གཟི་བྱིན་གྱིས།།

ཚེ་རིང་བདུད་རྩི་སྲོག་གི་དགའ་སྟོན་ལ།།

རིས་མེད་སྤྲོ་བའི་སྒྲོལ་མ་བཀྲ་ཤིས་ཤོག།

བདེ་སྐྱིད་སྒྲོལ་མ།

ཁེ་གྲགས་རྙེད་བཀུར་འཇོམས་པའི་དཔའ་ངར་གྱིས།།

ཕ་རོལ་བདེ་སྐྱིད་ཐབས་ལ་འབུངས་པའི་རྒྱུན།།

རྨ་ཀླུང་མཛའ་བོར་སྡེབ་པའི་བརྟུལ་ཞུགས་ཅན།།

མ་ལྟར་བརྩེ་བའི་སྒྲོལ་མ་བཀྲ་ཤིས་ཤོག།

ཚུལ་ཁྲིམས་སྒྲོལ་མ།

ངང་ཚུལ་མི་གཡོ་རབ་བརྟན་ལྕགས་ཀྱི་རི།།

བླང་དོར་དཀར་ནག་མི་འཆོལ་ཁྲིམས་ཀྱིས་མཛེས།།

འཇིག་རྟེན་ཡ་རབས་ལུགས་ལ་མཁས་ཉམས་མཐུ།།

ཅི་ཡང་རྒྱས་པའི་སྒྲོལ་མ་བཀྲ་ཤིས་ཤོག།

དོན་གྲུབ་སྒྲོལ་མ།

ཁ་ཞེ་གཙང་མའི་ཆུ་ཤེལ་མེ་ལོང་དུ།།

ངན་གཡོ་རྫུན་རིས་མི་ཤེས་བསམ་སྤྱོད་དགེ།

རྒྱུན་འཇམ་ཟོ་བཟང་དོན་གྲུབ་སྐལ་བ་སྦོམ།།

མཐོང་སྨོན་ཡིད་འཕྲོག་སྒྲོལ་མ་བཀྲ་ཤིས་ཤོག།

ནམ་མཁའ་སྒྲོལ་མ།

གངས་དཀར་སེམས་རྒྱ་ནམ་མཁའི་མཐོངས་ལ་བརྐྱངས།།

བཟོད་པའི་རྩལ་རྫོགས་འཛུམ་པའི་འོད་ཀྱིས་བཀྲག།

ཁྱད་གསོད་ངན་རྟོག་མི་ཤེས་ཁྲེལ་ཡོད་མིག།

འཛུམ་གྱིས་ཅེར་པའི་སྒྲོལ་མ་བཀྲ་ཤིས་ཤོག།

བྱམས་པ་སྒྲོལ་མ།

དྲེགས་པའི་ངོ་བསྲུང་རབ་སྤངས་དམན་ལ་བརྩེ།།

ལན་དུ་མི་རེ་རང་བདེ་དྲོན་མོའི་དཔྱིད།།

ཕངས་མེད་སྩོལ་པ་བྱམས་པའི་བདག་ཉིད་ཅན།

གཞན་ཕྱིར་རྟག་བྲེལ་སྒྲོལ་མ་བཀྲ་ཤིས་ཤོག།

རིན་ཆེན་སྒྲོལ་མ།

གཡར་བོའི་ལུས་རྟེན་རིན་ཆེན་ལང་ཚོ་གང་།།

དོན་ལྡན་ལས་ལ་བསྔོ་བའི་རྟག་འགྲུས་མཚོན།།

རྣམ་གཡེང་འདྲེ་རྒོད་གདོང་ལ་གདེངས་པའི་དཔའ།།

ཕྱོགས་ལས་རྣམ་རྒྱལ་སྒྲོལ་མ་བཀྲ་ཤིས་ཤོག།

ལྷ་མོ་སྒྲོལ་མ།

ཟླ་བཞིན་མིག་དཀྱུས་ཡངས་པའི་འཛུམ་ཟེར་ལ།།

བིམ་པའི་མཆུ་སྒྲོས་སྒེག་པའི་ལང་ཚོ་རྫོགས།།

ལེགས་བྱས་འབུམ་ལྡན་ལྷ་མོའི་སྐལ་བཟང་ནོར།།

རྒྱན་དུ་ཡོངས་སྨིན་སྒྲོལ་མ་བཀྲ་ཤིས་ཤོག།

དཔལ་ལྡན་སྒྲོལ་མ།

སྐྱོན་བརྒྱད་དྲི་མས་ཡོངས་བཏང་ཟླ་དཀར་གྲོགས།།

མཛངས་མའི་རང་གཤིས་ལྷུན་གྲུབ་ཀུན་ལ་འཇོན།།

ཕུལ་བྱུང་དཔལ་ལྡན་ས་ཡི་ལྷ་མོ་ཞེས།།

སྙན་པ་འཕུར་བའི་སྒྲོལ་མ་བཀྲ་ཤིས་ཤོག།

ཉི་མ་སྒྲོལ་མ།

ཐོས་ནོར་འབུམ་གྱིས་རང་རྒྱུད་གཏེར་དུ་སྒྲུབ།།

ཁེངས་པའི་ཕྲག་དོག་དམན་པའི་ཐོ་བས་གསིལ།།

མཁས་སྙན་ཉི་མ་འབར་བའི་གནམ་འོག་ན།།

ཞི་དུལ་རྒྱུད་འཇམ་སྒྲོལ་མ་བཀྲ་ཤིས་ཤོག།

བཀྲ་ཤིས་སྒྲོལ་མ།

གཞུང་བཟང་རང་གཤིས་དག་པའི་པད་དཀར་ལྗོན།།

བག་ཡོད་མེ་ཏོག་དགོད་པའི་འཛུམ་གྱིས་སྒེག།

མཛངས་སྤྱོད་བསུང་ཞིམ་ལྡང་བའི་ཞགས་པ་ཡིས།།

ཁོར་ཡུག་དམ་བཅིངས་སྒྲོལ་མ་བཀྲ་ཤིས་ཤོག།