སྤྱིར་གདན་ས་འདི་གནས་བྱིན་རླབས་ཅན་ལྷ་ཐམས་ཅད་ཤིན་ཏུ་དགའ་ས་ཡིན་པས་ལྷ་དགའ་ཞེས་འབོད་སྲོལ་ཡོད། རྗེས་སུ་ལྷ་སྒང་ཞེས་ཡི་གེ་སྲོལ་ཆགས་ཡོད་ཀྱང་དོན་ལ་ལྷ་དགའ་ཡིན་པ་ཤེས་དགོས། ཡང་འགྲེལ་ལུགས་འགའ་རེ་ན་ལྷ་དགའ་སའི་གནས་ཁྱད་པར་ཅན་མི་ཉག་རབ་སྒང་དུ་གཏོགས་པས་ལྷ་སྒང་ཞེས་བྲིས་ཀྱང་ཟེར། ལྷ་སྒང་དགོན་མཐོང་གྲོལ་བསམ་གྲུབ་གླིང་ཆོས་སྡེ་ཆེན་པོ་ཞེས་པ་ནི་དར་མདོ་མི་ཉག་རབ་སྒང་གི་ཆར་གཏོགས་ཤར་སྟོད་བཞག་བྲ་དཀར་པོའི་མདུན་ཞོལ་དུ། ལྕགས་གླང་སྤྱི་ལོ641ལོར་བོད་རྒྱ་སྲོང་བཙན་སྒམ་པོས་སྒོ་མིག་རྒྱ་ནག་ལ་བསྟན་པའི་ལྷ་ཁང་བརྒྱ་རྩ་བརྒྱད་བཞེངས་པའི་ཐ་མར་མི་ཉག་རབ་སྒང་དུ་ཡོངས་རྫོགས་རབ་དགའི་ལྷ་སྒང་དགོན་འདི་ཉིད་བཞེངས་པར་གྲགས་སོ། །གྲུབ་མཐའ་སྔོན་མ་བཀའ་བརྒྱུད་པ་ཡིན། ཕྱིས་སུ་ས་སྐྱ་ལ་གྱུར་ཡོད། གྲྭ་ས་རྫོང་གསར་སོགས་ལ་འགྲོ་སྲོལ་ཡོད། ཆོ་ག་ཕྱག་ལེན་ནི་ངོར་པ་དཔོན་སློབ་ཀྱིས་ཁྲིད་པར་བཤད། དང་པོ་དགོན་པ་འདེབས་མཁན་ནི་ཕ་བླ་མ་ཚང་ཟེར་བ་དེས་བཏབ་པ་ཡིན་ཟེར། རྟེན་གཙོ་བོ་ནི་བློན་པོ་མགར་དང་རྒྱ་བཟའ་ཀོང་ཇོ་གཉིས་བོད་དུ་བྱོན་སྐབས་ཡུལ་འདིར་བཞུགས་ཏེ་ཇོ་བོ་ཤྰཀྱ་མུ་ནེའི་ཞལ་སྐྱིན་དུ་ཁོང་རྣམ་གཉིས་ཀྱིས་བཞེངས་པར་བཤད་སྲོལ་ཡོད། ཇོ་བོས་འདིའི་ཡན་ལ་མི་འགྲོ་གསུངས་ནས་གསུང་འབྱོན་པས་མཚན་ལ་ཇོ་བོ་མི་འགྲོ་གསུང་འབྱོན་ཟེར། ལྷ་སའི་ཇོ་བོ་དང་ངོས་མཉམ་པར་བཤད་པས་ལྷ་ས་ལ་འགྲོ་རྒྱུའི་ཁས་ལེན་ཡོད་ན་ལྷ་སྒང་ཇོ་བོ་མཇལ་ན་ཁས་ལེན་སོ་ཇོ་ཁང་ནང་དུ་རྟེན་གཙོ་ཇོ་བོ་མཐོང་བ་དོན་ལྡན་ཆེ་བ་གཅིག ཐོག་རྩེག་གཅིག་ཅན་གྱི་སྤྱན་རས་གཟིགས་ཕྱག་སྟོང་སྤྱན་སྟོང་ཁྱད་པར་བ་གཅིག བློན་པོ་མགར་གྱིས་བཟོས་པའི་སྟོན་པའི་སྐུ་གཅིག ལུས་ཚད་མ་གསེར་ཟངས་ལས་གྲུབ་པའི་རྒྱལ་དབང་ཀརྨ་པའི་སྐུ་གཅིག ཐོག་བརྩེགས་གཅིག་ཅན་གྱི་རྒྱལ་བ་བྱམས་པ། གུ་རུ་མཚན་བརྒྱད། དུས་གསུམ་སངས་རྒྱས། ས་པཎ་སྐུ་སོགས་དང་། དགོན་པའི་མཐའ་སྐོར་དུ་རིགས་གསུམ་མགོན་པོའི་གནས་རི་ཡིིས་བརྒྱན་ཡོད།
རྟེན་གནའ་རྫས་རྩ་ཆེན་སྐོར་ལ། གསེར་སྐུ་རྒྱ་ནག་ལི་མ་མེ་ཐར་མ་ཟེར་བ་དང་། རྣམ་རྒྱལ་མ། རྒྱ་གར་ཤར་ལིའི་སྟོན་པའི་སྐུ། བཀའ་གདམས་མཆོད་རྟེན་སོགས་ཡོད།
དུས་མཆོད་འཚོག་རྒྱུའི་སྐོར། ཟླ་བ་དང་པོའི་ཚེས་གཅིག་ནས་ཉིན་བཅོ་ལྔ། ཟླ་བ་གཉིས་པའི་ནང་ལོ་གཏོར་ཉིན་ལྔ། ཟླ་བ་གསུམ་པའི་ནང་འདས་མཆོད་ཉིན་གཅིག བཞི་པའི་ནང་ཀུན་རིག་སྒྲུབ་མཆོད་ཉིན་བཅུ། བསྙེན་གནས་ཉིན་ལྔ། ལྔ་པའི་ནང་ཀྱེེ་རྡོར་སྒྲུབ་མཆོད་ཉིན་བདུན། དྲུག་པའི་ཚེས་གཅིག་ནས་བཅོ་ལྔ་བར་དུ་དབྱར་ཆོས་འཚོགས། འཆམ་རྒྱག་རྒྱུ་དང་བཅས་པ་ཆ་ཚང་བ་ཡོད། དེ་རྗེས་དབྱར་གནས་ཟླ་བ་གཅིག་ཕྱེད་འཚོག་དགོས། བཅུ་གཅིག་པའི་ནང་ས་པཎ་འདས་མཆོད་ཉིན་གཅིག བཅུ་གཉིས་པའི་ནང་དགུན་ཆོས་ཉིན་བཞི། བཤད་གྲྭ་དང་སྒྲུབ་གྲྭ་ཡང་ཡག་པོ་ཡོད། གྲྭ་ས་གཙང་ངོ་རུ་དགོན་ཡིན། གདན་ས་འདིར་སྐྱེས་ཆེན་དམ་པ་ཆོས་རྒྱལ་འཕགས་པ་དང་། རྒྱལ་བ་ཚང་། པཎ་ཆེན། ས་སྐྱ་གོང་མ། བེེ་རོ་ཙྰ་ན། ངག་དབང་ལེགས་པ། གཅུང་རིན་པོ་ཆེ། ཀརྨ་བ། མདོ་མཁྱེན་བརྩེ་སོགས་དམ་པའི་སྐྱེས་བུ་མང་པོ་བྱོན་མྱོང་ཡོད།