ཉི་མའི་ཚོ་པ། བྱང་སྡེ་རྫ་ཆུ་ཁ།

       
རྫ་ཆུ་ཁའི་སྦྲ་གུར་དུས་ཆེན། ཧྥུན་ཀོན་ཧྥུ་ཡིས་པར་བླངས།

        བྱང་སྡེ་ཉི་མ་རྫ་ཆུ་ཁ་(太阳部落扎溪卡) ནི་མཚོ་བོད་མཐོ་སྒང་གི་ཤར་ཕྱོགས་དཀར་མཛེས་བོད་རིགས་རང་སྐྱོང་ཁུལ་གྱི་མཐའ་མཚམས་བོད་རང་སྐྱོང་ལྗོངས་དང་། མཚོ་སྔོན་ཞིང་ཆེན་ཡུལ་ཤུལ་ཁུལ་དང་ས་མཚམས་འབྲེལ་བའི་སེར་ཤུལ་རྫོང་(石渠)གི་མངའ་ཁོངས་ཀྱི་མཚོ་ངོས་ལས་མཐོ་ཚད་ཆ་སྙོམས་4200ཡན་ལ་བརྒལ་བའི་དལ་འབབ་རྫ་ཆུ་རིང་མོའི་འགོ་ཁུངས་ཀྱི་འགྲམ་རྒྱུད་དུ་གཞིས་ཆགས་པའི་འབྲོག་སྡེ་ཆེན་པོ་ཞིག་སྟེ་བྱང་སྡེ་ཉི་མ་རྫ་ཆུ་ཁ། འབྲོག་སྡེ་ཉི་ཤུ་རྩ་ལྔའི་མངའ་བདག་སྡེ་དགེ་རྒྱལ་པོའི་མངའ་འབངས་སྟེ་བྱང་གི་འབྲོག་སྡེ་བཅོ་བརྒྱད་དུ་གྲགས་པའི་སེར་ཤུལ་སྡེ་པ། ཁྲོམ་རྫ་གོང་མ། ཨ་རིག་རྫ། ཝ་ཤུལ། འབར་ཆུང་། འཇུ་པ། ཁྲོ་གོང་དང་ཁྲོ་འགབ། ཐར་ཤུལ། དགེ་རྩེ། འབུམ་རྙིང་། འབུམ་གསར། པཱ་ཐུར། ཆེ་ཝོ། ཕྱག་ཚ་དང་། བྱང་པ་ཁག་གསུམ་བཅས་ལོ་རྒྱུས་ཀྱི་བརྗིད་ཉམས་དང་དཔའ་མཛངས་ཀྱི་མངའ་ཐང་ཁྲོད་ན་ཀྲོང་ངེར་འགྲེང་ཡོད་ལ། ཡུལ་གྲུ་འདི་ན་མཛེས་པའི་སྤང་ཐང་ཁོད་ཡངས་ཤིང་རྒྱ་ཆེ་བས་ས་མཐོའི་མེ་ཏོག་ཨུཏྤལ་དམར་པོ་དང་ཨུཏྤལ་སེར་པོ། ཨུཏྤལ་དཀར་པོ། མེ་ཏོག་ལུག་མིག མེ་ཏོག་ཨུག་ཆོས། སྤང་རྒྱན་དཀར་པོ་དང་ནག་པོ། སྲད་མ་དཀར་སེར། ཕ་ཝང་སྒོ་ཏི། སུམ་ཅུ་ཏིག་ཏ། བྱ་རྒོད་སུག་པ། ཁུར་མོང་། ལུག་རི་སྨུག་པོ་དང་སེར་པོ། རྩ་འཁྲིས་བ་མོ་ཁ། ཚེར་སྔོན། མེ་ཏོག་སེར་ཆེན། སྲོ་ལོ་དམར་པོ། དབྱར་རྩྭ་དགུན་འབུ། རྫ་ཡུང་། གླང་དུག མྱི་རྒན་བྲང་ཀོ་སོགས་སྨན་རྫས་ཀྱིས་ཕྱུར་བུར་གཏམས་པའི་རང་བྱུང་གི་བང་མཛོད་ཅིག་ཡིན་ལ། ཡུལ་འདིའི་ས་གཞི་ཆེན་མོར་ཐང་མར་བརྡལ་བའི་རྟ་ནོར་ལུག་གསུམ་ནམ་མཁའི་སྐར་ཚོགས་ས་ལ་འཕོས་པའམ་མེ་ཏོག་གི་རྒྱ་མཚོ་ཀློང་དུ་བརྡོལ་བ་ལྟ་བུ་ཞིག་ཡིན། ཁྱད་པར་དུ་ས་མཐོའི་གྲུ་གཟིངས་དང་ནོར་གནག་གི་ཕ་ས་ཞེས་པའི་མཚན་གྱི་སྙན་པ་ཕྱོགས་ཀྱི་མཐའ་གྲུ་ཀུན་ཏུ་ཁྱབ་ཡོད།