2010ལོའི་ཟླ་6པའི་ཚེས་24ཉིན། ཁམས་པའི་བོད་སྐད་བརྙན་འཕྲིན་མདོ་འཛིན་པ་བྱམས་པ་རྡོ་རྗེའི་གངས་ཆུ་ས་ལ་འཐིམས། མེ་ཏོག་སྤང་ལ་བཞད་ཅེས་པའི་སྙན་ལྷང་ལྷང་གི་གསུང་སྐད་དང་འགྲོགས་ནས་གཏོང་འགོ་ཚུགས་ཤིང་། དུས་དེ་ནས་བཟུང་བོད་ཁུལ་གྱི་མང་ཚོགས་དང་ལྷག་པར་དུ་ཁམས་ཕྱོགས་ཀྱི་བརྙན་འཕྲིན་གཟིགས་མོ་བ་རྣམས་ལ་བྱམས་པ་རྡོ་རྗེ་ཞེས་པའི་ཕུལ་བྱུང་མདོ་འཛིན་པ་ཞིག་གི་བག་ཆགས་ཐོག་མར་བཞག དགེ་རྒན་ཁོང་ཉིད་ལ་ལས་ཀ་འདི་ཅི་ལྟར་བདམས་པའི་སྐོར་ནས་སྐད་ཆ་འདྲི་དུས། ཁོང་གིས་སྤྱིར་བཏང་གི་དགེ་རྒན་ཞིག་ནས་རྐྱེན་གློ་བུར་བ་ཞིག་གིས་མདོ་འཛིན་པ་ཞིག་ཏུ་གྱུར་སོང་། སྔ་མའི་ལས་ཀ་ལ་འཁྲེང་སེམས་ནི་ཆེ་ཡང་། རྗེས་མའི་ལས་ཀ་ལ་ཨ་གསར་ཡང་ཡོད། གང་ལྟར་ཕ་སྐད་མ་ཡིག་གི་ལམ་ནས་རང་གི་མི་རིགས་ལ་སྲི་ཞུ་ཙམ་བསྒྲུབ་རྒྱུའི་མཐུན་རྐྱེན་བྱུང་བ་ནི་སྔོན་བསགས་ཀྱི་བསོད་ནམས་རེད་གསུངས་བྱུང་།
བྱམས་པ་རྡོ་རྗེ་ནི་ཁམས་དཀར་མཛེས་རོང་པ་ཚ་གོང་ལམ་སྡེ་པའི་ཞིང་ཁྱིམ་དཀྱུས་མ་ཞིག་ནས་འཚར་ལོངས་བྱུང་ཞིང་། ཡིག་ངོ་མི་ཆོད་པའི་ཕ་མ་གཉིས་ཀྱིས་བུ་འདིས་ཡི་གེ་ཞིག་ཤེས་ན་ཅི་མ་རུང་སྙམ་ནས་སློབ་གྲྭ་ལ་བསྐྱལ། ཁོང་ནི་གྲོང་ཚོ་དེའི་སློབ་གྲྭ་ཆེན་མོར་འགྲིམས་ནས་རྒྱལ་ཁབ་ཀྱི་ལས་བྱེད་པར་གྱུར་བ་ཐོག་མ་ཡིན་ལ། དམའ་འབྲིང་གི་དུས་སུ་ཁོང་ཉིད་ཀྱིས་སློབ་གྲྭའི་གཏམ་བཤད་འགྲན་བསྡུར་ཞིག་གི་ཐོག་ནས་བྱ་དགའ་བླངས་ཤིང་དུས་དེ་ནས་བཟུང་གཏམ་བཤད་ལ་སྦྱོང་བ་བྱེད་པའི་དྲན་ཤེས་ཐོག་མ་ཆགས་ཤིང་སྤྲོ་བ་ཆེན་པོ་འཕེལ། དེ་བཞིན་དུ་དར་མདོ་དགེ་འོས་སློབ་གྲྭ་ནས་རྒྱང་བསྒྲགས་པ་དང་གསར་འགོད་པ། སློབ་རའི་དུས་དེབ་ཀྱི་སྤྱི་ཁྱབ་རྩོམ་སྒྲིག་པ་སོགས་ཀྱི་ལས་ཀར་འབད་པས་མདོ་འཛིན་གྱི་ཐད་ལ་བག་ཆགས་དང་། རྨང་གཞི་བཏིངས། སློབ་མཐར་ཕྱིན་རྗེས་ཕ་ཡུལ་དཀར་མཛེས་རྫོང་ནས་དགེ་རྒན་གྱི་བྱ་བ་གཉེར་འགོ་བརྩམས་ཤིང་སྐལ་ལྡན་བུང་བའི་ཚོགས་ལ་ཤེས་རིག་སྦྲང་རྩི་སྦྱིན་པའི་བྱ་གཞག་ལ་རྩེ་གཅིག་ཏུ་གཞོལ། དེ་དུས་ཁོང་ཉིད་ཀྱིས་ཐེངས་མང་པོར་བུ་དང་བུ་མོ་སློབ་གྲྭར་མངགས་དགོས་པ་དང་། ཤེས་ཡོན་གྱིས་ལས་དབང་ཁ་ལོ་བསྒྱུར་བ་སོགས་ཀྱི་བརྗོད་དོན་གཙོ་བོ་ཡིན་པའི་གར་ཆུང་དང་། ཁ་ཤགས་བྲིས་ནས་མང་ཚོགས་ཁྲོད་དུ་འཁྲབ་སྟོན་བྱས་པས་དཀར་མཛེས་མི་དམངས་ལ་བག་ཆགས་ཟབ་མོ་བཞག དགེ་རྒན་བྱས་པའི་མི་ལོ་དེ་དག་ནི་ཁོང་ཉིད་ཀྱིས་ཆེས་རིན་ཐང་ལྡན་པའི་མི་ཚེའི་གྲུབ་ཆ་ཤིག་ཏུ་རྩི་བཞིན་ཡོད་ལ། ལྷག་པར་དུ་དེ་དུས་ལྷུར་ལེན་བྱས་པའི་རིག་གནས་ཡོན་ཏན་དེ་དག་རང་ཉིད་མདོ་འཛིན་ལམ་བུའི་ཁྲོད་དུ་ནམ་ཡང་ཟད་དུ་མེད་པའི་རྒྱགས་ཕྱེ་རུ་རློམ་ཡོད་གསུངས།
2013ལོའི་ཁམས་པ་བརྙན་འཕྲིན་ཁང་གི་དཔྱིད་གསར་དགོང་ཚོགས་ལ་མདོ་འཛིན་བྱེད་བཞིན་པ།
བྱམས་པའི་ཁ་བརྡའི་སྐོར་ནས་སྐད་ཆ་འདྲི་དུས། ཁོང་གིས་ཁམས་པའི་བརྙན་འཕྲིན་ཁང་བཙུགས་ནས་ཡུན་རིང་མ་འགོར་བའི་ཉིན་ཞིག་ལ་མགོ་ཁྲིད་ཀྱིས། མདོ་འཛིན་པ་རང་ཉིད་ཀྱི་མིང་ཐོག་ནས་རང་གི་ཁྱད་ཆོས་དང་། དགའ་ཕྱོགས་ལྟར་བོད་མི་སྤྱི་ལ་ཁ་ཕྱོགས་ཏེ་ལེ་ཚན་རེ་གཉེར་ན་ཡག་པོ་ཡོད་རབས་བཤད་འདུག རྒན་ཁོང་ཉིད་ཀྱིས་ཟླ་བ་ཁ་ཤས་ལ་གྲ་སྒྲིག་བྱས་ནས་བོད་ཀྱི་རིག་གནས་སྐོར་གྱི་ཁ་བརྡ་ལེ་ཚན་ཏེ། 《བྱམས་པའི་ཁ་བརྡ།》ཞེས་པ་2011ལོའི་ཟླ་3པའི་ཚེས་11གི་དགོང་མོ་ནས་གཏོང་འགོ་ཚུགས་ཏེ་ད་ལྟའི་བར་དུ་ལེ་ཚན་སུམ་བརྒྱ་ཉེར་གཅིག་བཏང་ཟིན་འདུག ལེ་ཚན་འདི་ཐོག་མའི་འཆར་གཞི་ཡིན་ན་བརྙན་འཕྲིན་འཁྲབ་གཏོང་ཁང་ནས་ཕབ་ལེན་བྱས་ཏེ་གཏོང་བར་བསམ་ཡོད། ཡིན་ཡང་ལེ་ཚན་འགའ་ཤས་བསྒྲུབས་པ་ནས་དམངས་ཁྲོད་ནི་རིག་གནས་ཀྱི་བང་མཛོད་གཅིག་ཡིན་པ་དང་། ཕ་ཡུལ་གངས་ལྗོངས་ལ་ཅི་ཙམ་བཅར་ན་དེ་ཙམ་གྱིས་མར་དང་རྩམ་པའི་དྲི་ཞིམ་འཐུལ་བར་དགོངས་ནས། གཞི་རིམ་མང་ཚོགས་དང་ཉེ་བར་བཅར་ནས་ལེ་ཚན་ཕབ་སྐྲུན་བྱེད་པར་ཆས། སྔ་གཞུག་ཏུ་བོད་ལྗོངས་ཀྱི་ལྷ་ས་དང་། ལྷོ་ཁ། ཆབ་མདོ། མཚོ་སྔོན་ཡུལ་ཤུལ་ཁུལ་གྱི་རྫོང་ཁག་སོ་སོ། སི་ཁྲོན་གྱི་དཀར་མཛེས་དང་རྔ་བའི་རྫོང་ཁག་སོ་སོ། ཀན་སུའུ་ཡི་ཀན་ལྷོ། ཡུན་ནན་བདེ་ཆེན་ས་ཁུལ། དམིགས་བསལ་དུ་མི་ཉག་དང་རྒྱལ་རོང་། བོད་དམག ཀོང་པོའི་ས་ཆ་སོགས་ས་བབས་དང་མི་ཆོས་རིག་གནས་ཁྱད་པར་ཅན་ཡོད་སའི་ས་ཆར་འགྲིམས་ཏེ་འབྲེལ་ཡོད་དམངས་ཁྲོད་རིག་གནས་རྒྱུན་འཛིན་པ་དང་མཉམ་དུ་རི་ཆུ་རིག་གནས། གླུ་གར་རིག་གནས། ལག་ཤེས་རིག་གནས། ཡུལ་སྲོལ་གོམས་གཤིས་སོགས་ཚད་བཀག་དང་ཕྱོགས་ལྷུང་ཅི་ཡང་མེད་པར་ཁ་བརྡ་བྱས་འདུག་ལ། ད་ལྟའི་བར་དུ་སྐུ་མགྲོན་བཞི་བརྒྱ་ལྷག་དང་ཉེ་བར་བཅར་འདུག དགེ་རྒན་ཁོང་ཉིད་ཀྱིས་གསུངས་པ་ལྟར་ན། ནམ་ཡང་བཅར་འདྲིའི་ཁྲོད་དུ་རང་ཉིད་ནི་ཅི་ཡང་མི་ཤེས་པའི་སློབ་མ་ཞིག་དང་འདྲ་བར་གདན་ཞུའི་སྐུ་མགྲོན་རེ་རེ་དགེ་རྒན་གྱི་ཚུལ་དུ་བསྟེན་ནས་ཁ་བརྡ་བྱས་པ་ཡིན་ལ། ཁ་བརྡ་རེ་རེ་ནི་གསེར་སྲང་སྟོང་དང་། དངུལ་སྲང་སྟོང་གིས་མི་ཁུག་པའི་གདམས་ངག་རེ་རེ་རེད། འདི་དག་གིས་ངའི་འཚོ་བར་ཁ་དོག་གསར་པ་ཞིག་བསྩལ། ངས་ནམ་ཡང་སྐུ་མགྲོན་དང་གཟིགས་མོ་བ་དག་ལ་བཀའ་དྲིན་ཞུ་བཞིན་ཡོད། ལྷག་པར་ལོ་ངོ་འདི་དག་གི་ཁྲོད་ནས་བོད་ཡུལ་མདོ་དབུས་ཁམས་གསུམ་གྱི་ལུང་པ་གང་སར་འགྲིམས་ནས་ཁ་བརྡ་བྱེད་དུས་ང་དང་སྐུ་མགྲོན་སོ་སོའི་བར་དུ་གོ་བརྡ་ཡག་པོ་འཕྲོད་པ་དང་། ཁྱད་པར་དུ་རོང་འབྲོག་དབྱེ་བ་མེད་པར་ཁྱེད་ཀྱི་སྐད་ཆ་དེ་ང་ཚོས་གོ་བཞིན་འདུག་ལབ་དུས། ང་རང་སྤྲོ་སྣང་ཆེན་པོ་འདུག་ཅིང་། དངོས་གནས་བྱ་དགའ་ཆེན་པོ་ཞིག་སྤྲད་པ་དང་འདྲ་པོ་འདུག ངོ་ཚ་བ་ཞིག་ནི་བོད་པ་ཞིག་བོད་ཁུལ་དུ་འགྲོ་དུས། རྫ་དུག་ཕོག་ནས་མགོ་ན་བ་དེ་རེད། འོན་ཀྱང་། དག་གཙང་གི་ཕ་ཡུལ་ནས་ཕ་མེས་ཀྱི་གཅེས་ནོར་བཟང་པོ་དག་མཐོང་ཐོས་རེ་རེ་ལ་མགོ་གཟེར་ཡང་རྐང་པ་བཀག་ཐུབ་བཞིན་མི་འདུག་གསུངས།
སྡེ་དགེ་སྨན་ཤོད་དུ་བློ་གྲོས་ཕུན་ཚོགས་ཕ་བུ་གཉིས་དང་མཉམ་དུ་ལེ་ཚན་ཕབ་སྐྲུན་བྱེད་བཞིན་པ།
ཡང་དེ་སྔོན་ལེ་ཚན་གྱི་གཟིགས་མོ་བ་བྲག་འགོ་བློ་བཟང་མཁྱེན་བརྩེ་ཞེས་པ་ཞིག་གིས་བྱམས་པའི་ཁ་བརྡ་དང་མདོ་འཛིན་པ་བྱམས་པ་རྡོ་རྗེ་འགྲེལ་བ་ཞེས་པའི་རྩོམ་ཡིག་ཁྲོད་ངས་མདོ་འཛིན་པ་ཁོང་མ་ཤེས་གོང་ནས་བྱམས་པའི་ཁ་བརྡ་ཤེས་ཡོད་ལ། ཁོང་ལ་རྒྱུས་མ་ལོན་གོང་ནས་བྱམས་པའི་ཁ་བརྡར་རྒྱུས་ལོན་ཡོད་ཅེས་བརྗོད་པར་མ་ཟད། ལེ་ཚན་སོ་སོ་ལ་ལྟ་བའི་མྱོང་ཚོར་ཡང་བྲིས་འདུག འདི་དང་འདི་ལྟ་བུའི་གཟིགས་མོ་བ་མང་པོ་ཞིག་གིས་ལེ་ཚན་འདི་དང་མདོ་འཛིན་པ་ཁོང་ཉིད་ལ་དོ་སྣང་དང་གདེང་འཇོག་ཚད་མེད་འཇོག་བཞིན་ཡོད།སྔོན་ཆད་དགེ་རྒན་གྱི་ཕྱག་ལས་གནང་ཞོར་དཀར་མཛེས་ཀྱི་《བྲོ་གཞས་ཕྱོགས་བསྒྲིགས།》ཅེས་པ་དང་། ཏྲེ་ཧོར་ཡུལ་གྱི་གཏམ་དཔེ་ཕྱོགས་བསྒྲིགས་ཞེས་པ་སོགས་དཔེ་ཆ་བསྡུ་སྒྲིག་བྱས་མྱོང་འདུག་ལ། ལས་ཞོར་དུ་རྒྱུན་བཀོལ་མིང་མཛོད་རྩོམ་སྒྲིག་ཚོ་ཆུང་དུ་ཞུགས་ནས་ཕ་སྐད་གཙང་མ་ལབ་པའི་སེམས་འདུན་དྲག་པོ་འདུག ལྷག་པར་དུ། 2017ལོའི་ཁམས་པ་བརྙན་འཕྲིན་ཁང་གི་བོད་ལུགས་ལོ་སར་དགོང་ཚོགས་ཐོག་རྒན་བྱམས་པ་རང་གིས་བརྩམས་པའི་ཁ་ཤགས་མདོ་དབུས་ཁམས་གསུམ་ཞེས་པ་དེ། དབུས་གཙང་གི་ཁ་ཤགས་མཁན་པོ་རྒན་ཐུབ་བསྟན་དང་ཨ་མདོའི་སྒྱུ་རྩལ་བ་རྒན་ཞི་བདེ་ཉི་མ་བཅས་ཀྱིས་འཁྲབ་སྟོན་བྱས་ནས་དགོང་ཚོགས་ཀྱི་མཐོ་རླབས་འཕྱུར་ཞིང་། ཕྱིའི་ཉིན་མོ་ནས་བཟུང་བོད་ཀྱི་པོད་ཕྲན་དང་འཕྲིན་ཕྲན་སོགས་ཀྱི་སྒང་ནས་ཐེངས་འདིའི་མདོ་དབུས་ཁམས་གསུམ་གྱི་ཡུལ་སྐད་གཅིག་ཏུ་བསྡུས་པའི་ཁ་ཤགས་འདིར་གདེང་འཇོག་ཚད་མཐོ་བྱས་པར་མ་ཟད། ཀུན་ལ་མཐུན་སྒྲིལ་གྱི་སྟོབས་ཤིག་བསྩལ། འདི་ནི་རྒན་ཁོང་ཉིད་ཀྱི་ལོ་ངོ་དུ་མའི་ཁྲོད་བཅངས་བའི་སེམས་འདུན་ཞིག་གི་ཟུར་ཙམ་ལེགས་འགྲུབ་བྱུང་བ་ཨེ་ཡིན་སྙམ།
རྒན་ཐུབ་བསྟན་དང་ཞི་བདེ་ཉི་མ་དང་མཉམ་དུ་མདོ་དབུས་ཁམས་གསུམ་ཞེས་པའི་ཁ་ཤགས་འཁྲབ་སྟོན་བྱེད་བཞིན་པ།
བྱམས་པ་རྡོ་རྗེ་ཁོང་ཉིད་མདོ་འཛིན་གྱི་ལས་ལ་ཞུགས་ནས་ད་ལྟའི་བར་གཞུང་ཕྱོགས་དང་དམངས་ཁྲོད་ནས་དགའ་བསུ་ཆེན་པོ་ཐོབ་ཅིང་། ལྷག་པར་དུ་ལོ་ངོ་འདི་དག་ཁྲོད་མདོ་འཛིན་ལས་རིགས་ཁྲོད་ནས་ཁོང་གིས་ཡང་དང་བསྐྱར་དུ་མདོ་དབུས་ཁམས་གསུམ་གྱི་སྐད་བརྡ་གཅིག་གྱུར་སྐོར་གྱི་འདུན་པ་དྲག་པོ་བཏོན་པ་དཔྱོད་ལྡན་ཀུན་གྱི་མིག་མཐོང་ལག་ཟིན་དུ་གྱུར་ཡོད། ཁོང་གིས་བརྩམས་པའི་《ཁམས་སྐད་ཞིབ་འཇུག》ཅེས་པར་རྒྱལ་ཡོངས་ཀྱི་བྱ་དགའ་ཨང་དང་པོ་ཐོབ་མྱངས་ལ། རྒྱལ་ཡོངས་བོད་སྐད་བརྙན་འཕྲིན་གྱི་ཕུལ་བྱུང་མདོ་འཛིན་པ་དང་། དེ་མིན་སི་ཁྲོན་རྒྱང་བསྒྲགས་བརྙན་འཕྲིན་གྱི་ཕུལ་བྱུང་མདོ་འཛིན་པ་བཅུའི་ནང་དུ་བདམས། ཁོང་གིས་ད་ལྟའི་བར་མདོ་འཛིན་གྱི་ལས་ལ་ཞུགས་ནས་ལོ་ངོ་དུ་མའི་རིང་རང་ཉིད་ལ་ཕྱོགས་གང་ཅིའི་ཐད་ནས་འཕེལ་རྒྱས་ཆེན་པོ་བྱུང་མོད། ཆེད་ལས་ཅན་དང་ཕུལ་བྱུང་གི་མདོ་འཛིན་པ་ཞིག་དང་བསྡུར་ན་བར་ཐག་ཤིན་ཏུ་རིང་། སྤྱིར་ང་རང་ནམ་རྒྱུན་འཚོ་བའི་ཁྲོད་ཁ་མཚར་ཀུ་རེ་ལ་དགའ་བའི་མི་ཞིག་ཡིན་མོད། ལེ་ཚན་དངོས་གཞིའི་སྐབས་སྐུ་མགྲོན་དང་། གཟིགས་མོ་བ་ལ་ད་རུང་སྤྲོ་སྣང་མང་པོ་སྟེར་ཐུབ་བཞིན་མི་འདུག དེ་བས་ངས་མུ་མཐུད་དུ་ཕྱོགས་གང་ཅིའི་ཐད་ནས་ཡར་རྒྱས་གོང་འཕེལ་བཏང་ནས་བོད་ཁུལ་གཟིགས་མོ་བ་ལྷན་རྒྱས་དང་། ལྷག་པར་《བྱམས་པའི་ཁ་བརྡ།》ལེ་ཚན་ལ་ཐུགས་ཁུར་དང་རྒྱབ་སྐྱོར་བྱེད་མཁན་དག་ལ་སྔར་ལས་ལེགས་པའི་ལེ་ཚན་གང་མང་དབུལ་རྒྱུའི་ཕུགས་འདུན་བཅངས་ཡོད་ཅེས་གསུངས། །