བོད་ཀྱི་རྒྱན་གོས་དར་ཚུལ།

  

● འདབ་པའི་རྒྱན་གོས།

གོས་ནི་འགྲོ་བ་མིའི་རིགས་སྤྱི་ལ་དར་སྔ་ཞིང་མེད་དུ་མི་རུང་བའི་མཁོ་ཆས་ཤིག་ཡིན་ལ། ཕྱི་གོས་རྒྱན་གྱི་སྟེང་ནས་མི་རིགས་དེའི་ནང་གི་ཀུན་སྤྱོད་མཚོན་པར་མ་ཟད། ད་དུང་མི་རིགས་དེའི་ཤེས་རིག་ལྡན་པའི་ལོ་རྒྱུས་ཀྱང་མཚོན་ཡོད། བོད་མི་ནི་འཛམ་གླིང་གི་མི་རིགས་མང་པོའི་ཁྲོད་དུ་གོས་དར་སྔ་བའི་མི་རིགས་ཤིག་ཡིན་ལ། ལོ་ཏོག་ཟོས་པས་དེ་ཀུན་མི་ཉིད་གྱུར། །མ་རྨོས་འབྲུ་ཟ་གོས་སུ་ཤིང་ལོ་གྱོན། །ནགས་ན་རི་དྭགས་ལྟ་བུར་གནས་པ་ཡིན། །ཀློ་དང་མོན་ལྟར་སྤྱོད་པས་བོད་ཡུལ་གང་། །ཞེས་པ་ལ་བརྟགས་ཚེ། ཤིན་ཏུ་སྔ་བའི་དུས་ནས་བོད་ལ་གོས་དར་བ་མཚོན་པར་མ་ཟད་གོས་ཀྱི་ཐོག་མའང་ཤིང་ལོ་ཡིན་པ་གསལ་པོར་བསྟན། དེ་ཡང་གོས་ཀྱི་འབྱུང་ཁུངས་ཐད་ལ་མཁས་པ་ལ་ལས། གོས་ནི་ལུས་ཀྱི་གྲང་བ་སྐྱོབ་པའི་ཆེད་དུ་ཡིན་པས་འཛམ་གླིང་བྱང་ཕྱོགས་སུ་དར་སྔ་བར་བཤད་པ་དང། ལ་ལས་མིའི་རིགས་ཀྱི་ངོ་སྲུང་ཤེས་པ་ནས་དར་བར་བཤད། བོད་ཀྱི་མངོན་བརྗོད་རིག་པ་ལས་གོས་ལ་གྲང་སྐྱོབ་དང་གཅེར་སྐྱོབ་ཟེར་བ་དེས་གཞུང་ལུགས་འདི་གཉིས་ལ་སྡོམ་ཚིག་གསལ་པོ་ཞིག་བཞག་པ་མཚོན། དུས་ཡུན་རིང་པོའི་ལོ་རྒྱུས་ཀྱི་ཆུ་རྒྱུན་ཁྲོད་དུ་བོད་མི་རྣམས་ཀྱིས་གོས་འཚོལ་སྟངས་ལ་འགྱུར་ལྡོག་ཆེན་པོ་བྱུང་བ་དང་། 《ལོ་རྒྱུས་ཆེན་མོ་》སོགས་ལས་བྱུང་བ་ལྟར། དང་པོ་གནོད་སྦྱིན་ནག་པོས་དབང་བྱས་ཏེ། ། ཡུལ་གྱི་མིང་ཡང་བཟང་ཡུལ་རྒྱན་མེད་ཟེར། །མཚོན་ཆ་མདའ་གཞུ་དེ་ཡི་དུས་སུ་བྱུང་། །ཟེར་བ་བཞིན། རྡོ་ཆས་ཀྱི་མཚོན་ཆ་དང་ཤིང་གི་མདའ་གཞུ་བྱུང་བ་ནས་རི་དྭགས་བརྔོན་ཏེ་གོས་སུ་བདག་ཏུ་མ་བཟུང་བའི་རི་དྭགས་སྣ་ཚོགས་ཀྱི་པགས་རིགས་གྱོན་པ་དང་། དེ་ནས་སྤྱི་ཚོགས་འཕེལ་རྒྱས་བྱུང་བ་ལ་བརྟེན་ནས་འབྲོང་ཕོ་མོ་གཡག་དང་འབྲི་རུ་བཏུལ། ཤྭ་བ་ཕོ་མོ་བ་གླང་དུ་བཏུལ། རྒོ་བ་ཕོ་མོ་ལུག་ཏུ་བཏུལ། གླ་བ་ཕོ་མོ་རར་བཏུལ། རྐྱང་ཕོ་མོ་རྟར་བཏུལ། སྤྱང་ཀི་ཕོ་མོ་ནི་ཁྱིར་བཏུལ། དེ་དག་གི་པགས་རིགས་མཉེད་སྦྱངས་བྱས་ཏེ་གོས་སུ་གྱོན་པས་བོད་མིའི་གོས་ཀྱི་རྒྱུ་ཆ་དེ་གཙོ་བོ་སྒོ་ཕྱུགས་ཀྱི་སྟེང་ནས་ཐོན་པ་རེད། དེ་ཡང་གོས་ནི་འགྲོ་བ་མིའི་རིགས་ལ་མེད་དུ་མི་རུང་བའི་མཁོ་ཆས་ཤིག་ཡིན་ལ། གོས་དར་ཚུལ་ཡང་གོས་རང་ཉིད་ཀྱིས་འགྲོ་བ་མིའི་རིགས་ལ་ཐོན་པའི་ནུས་པ་དང་འབྲེལ་བ་དམ་པོ་ཡོད། དེའི་ཕྱིར་གོས་ཐོག་མར་མིའི་རིགས་ཀྱི་ཡན་ལག་གང་ཞིག་ལ་དར་བར་བཤད་ཚུལ་མང་པོར་འདུག་སྟེ། ལ་ལས་གོས་ཀྱི་ནུས་པ་ནི་གསང་ཁེབས་ཡིན་པ་དང་། འགྲོ་བ་མིའི་རིགས་ཀྱི་ངོ་སྲུང་ཤེས་པ་ནས་ཐོག་མར་གསང་ཁེབས་བྱུང་བ་དང་དེ་ནས་རིམ་བཞིན་སྤྱི་ཚོགས་འཕེལ་རྒྱས་བྱུང་བ་ལ་བརྟེན་ནས་ལུས་ཀྱི་གོས་ཆ་ཚང་བྱུང་བར་འདོད། ཡང་ལ་ལས་གོས་ཀྱི་ཐོག་མ་ནི་སྐ་རགས་ཡིན་པ་དང་། ཐོག་མར་མིའི་རིགས་ཀྱིས་སྐ་རགས་སྟེང་འཚོ་བའི་ཉེར་སྤྱད་འདོགས་སྲོལ་དར་ཞིང་དེ་ནས་རིམ་བཞིན་ལུས་ཀྱི་གོས་ཆ་ཚང་བྱུང་བར་འདོད། གང་ལྟར་གོས་ཀྱི་ཐོག་མའི་ནུས་པ་ནི་བོད་རང་ལ་མཚོན་ན་གྲང་སྐྱོབ་ཡིན་པ་དང་། མིའི་རིགས་ཤེས་རིག་ལྡན་པའི་ལོ་རྒྱུས་སུ་སླེབས་པ་ནས་གོས་ཀྱི་ནུས་པའང་རིམ་བཞིན་སྣ་མང་ཅན་དུ་གྱུར་པ་དང་། གོས་ནི་མི་ལུས་ལ་གྲང་སྐྱོབ་ཀྱི་ནུས་པ་ཐོན་པར་མ་ཟད། ཚ་སྐྱོབ་དང་གཅེར་སྐྱོབ། རྒྱན་ཆ་སོགས་ཀྱི་ནུས་པ་ཡང་ཐོན་ཞིང་། ས་བབས་ཀྱི་རྐྱེན་གྱིས་བོད་མིའི་གོས་ལ་རིགས་མི་འདྲ་བ་མང་པོ་ཞིག་བྱུང་བ་རེད། །

● སྤྲོ་དགས་གཏམས་པའི་དུས་སྟོན། 

● སྡེ་དགེའི་བུད་མེད་ཀྱི་ཆ་ལུགས། 

● རོང་བྲག་ཡུལ་གྱི་བུད་མེད་ནར་སོན་པའི་མཛད་སྒོ། 

● རྒྱལ་རོང་བུད་མེད་ཀྱི་རྒྱན་གོས།