[གནད་བཏུས] ཐོས་པ་བྱེད་ཚུལ་བསྒྱུར་དགོས་པ་ནི་བསླབ་ཚན་གསར་བ་ལེགས་བཅོས་ཀྱི་གནད་ས་གཙོ་བོ་ཞིག་ཡིན་པས་སྐད་ཡིག་བསླབ་ཚན་གྱིས་ངེས་པར་དུ་སློབ་མའི་ལུས་སེམས་འཕེལ་རྒྱས་ཀྱི་ཆོས་ཉིད་དང་སྐད་ཡིག་སློབ་སྦྱོང་གི་ཁྱད་ཆོས་གཞིར་བཟུང་ནས། སློབ་མ་རེ་རེའི་ཁྱད་པར་དང་སློབ་སྦྱོང་གི་དགོས་མཁོ་མི་འདྲ་བར་དམིགས་དགོས་པ་དང་། ཁོ་ཚོའི་མཚར་སྣང་དང་སློབ་གཉེར་གྱི་འདུན་པ་གཙིགས་སུ་འཛིན་དགོས་ལ། སློབ་མའི་རང་རྟོགས་ཀྱི་འདུ་ཤེས་དང་བརྩོན་སེམས་ཡོངས་སུ་བསླངས་ཏེ་རང་གཙོ་དང་མཉས་ལས། འཚོལ་ཞིབ་རང་བཞིན་གྱི་ཐོས་པ་བྱེད་ཚུལ་ལ་བརྩོན་དགོས་ཚུལ་གྱི་དགོངས་པ་བཏོན་ཡོད་པ་ཡིན།
[གནད་ཚིག] ཐོས་པ་བྱེད་ཚུལ་བསྒྱུར་དགོས་དོན། དེང་རབས་ཀྱི་ཐོས་པ་བྱེད་ཚུལ་གྱི་མངོན་རྟགས། དགེ་སློབ་བར་གྱི་འབྲེལ་བ་འཛིན་སྟངས་གསར་བ། སློབ་ཁང་གི་འཆད་ཉན་རྣམ་པ་ལེགས་བཅོས།
དང་པོ། བསླབ་ཚན་གསར་བ་ལེགས་བཅོས་ལས་ཐོས་པ་ཇི་ལྟར་བྱེད་ཚུལ་བཤད་པ།
ཐོས་པ་ཇི་ལྟར་བྱེད་ཚུལ་སྟོན་པ་ནི་ཐེངས་འདིའི་བསླབ་ཚན་བཅོས་སྒྱུར་གྱི་ཁྱད་རྟགས་གཙོ་བོ་ཞིག་ཡིན། སྔོན་གྱི་སྣ་གཅིག་ཅན་དང་གཞན་བརྟེན་ཅན་གྱི་ཐོས་པ་བྱེད་ཚུལ་བསྒྱུར་ཏེ་སློབ་མའི་རང་གཙོ་རང་སྟོབས་ལ་བརྟེན་ཏེ་སྣ་མང་ཅན་གྱི་ཐོས་པ་བྱེད་ཚུལ་བསྟན་པ་ནི་ཐེངས་འདིའི་འཆད་ཉན་བཅོས་སྒྱུར་གྱི་དོན་གྱི་སྙིང་བོ་ཡིན། ཐོས་པ་བྱེད་ཚུལ་དང་ཐོས་པ་བྱེད་ཐབས་གཉིས་ལས་སྔ་མའི་དོན་གྱི་འཇུག་སྒོ་ཆེ་ལ། དེའི་ནང་དུ་ཐོས་པ་བྱེད་ཐབས་ལས་གཞན་ཐོས་པའི་གེགས་ངེས་པ་དང་དེའི་གཉེན་པོ་བསྟེན་པ་སོགས་བསམ་སྦྱོར་གཉིས་ཀྱིས་བསྡུས་པའི་ཆོས་རྣམས་འདུས་སོ། ། ཐོས་པ་བྱེད་ཐབས་ནི་གང་ལ་གང་འཚམ་གྱིས་སྤྱོད་པའི་ཐབས་ངེས་མེད་ཅན་ཡིན་ལ་ཐོས་པ་བྱེད་ཚུལ་གྱི་དོན་བྱེ་བྲག་པར་འཇུག་པ་ཡིན་ནོ། །
ཐོས་པ་བྱེད་ཚུལ་བསྒྱུར་དགོས་པ་ནི་དོན་གྱིས་སློབ་མའི་སློབ་སྦྱོང་སྐབས་རང་གཙོ་དང་རང་རྟོགས་དང་རང་འགུལ་དང་རང་བརྟེན་བཅས་ཀྱི་རང་བཞིན་མེད་པ་རྣམས་ཡོད་པ་དང་ཡོད་པ་རྣམས་གོང་སྤེལ་དུ་གཏོང་བའི་དམིགས་བྱ་འདི་བཟུང་བ་ཡིན། མདོར་ན་རང་སྟོབས་ཀྱིས་སློབ་སྦྱོང་ལ་འཇུག་པར་འབད་པ་སྐྱེད་པ་རེད།
སློབ་མའི་ཐོས་པ་བྱེད་ཚུལ་ལ་རིགས་གཉིས་སུ་སྣང་སྟེ། ཐོས་པ་དང་བསམ་པ་གཉིས་སོ། ། ཐོས་དོན་གྱིས་ཐོས་པའི་ཡུལ་གྱི་ཆོས་གང་ཉིད་རྣམ་གཞག་གཏན་འབེབས་ཀྱི་ཚུལ་དུ་རང་རྒྱུད་དུ་ཐད་ཀར་ལེན་པས་སློབ་མ་ནི་ཉན་ཐོས་པ་ཡིན་ནོ། ། བསམ་དོན་གྱིས་ཐོས་པ་བྱ་བའི་ཡུལ་གྱི་ཆོས་གང་ཉིད་གནད་དོན་རྟོག་གཞིག་གི་ཚུལ་དུ་བསམ་བྱུང་གི་བློ་ཡིས་རང་རྒྱུད་ལ་རིམ་གྱིས་ལེན་པས་ན་སློབ་མ་ནི་ཤེས་བྱའི་གནས་འཚོལ་མཁན་ཡིན་ནོ། ། ཐོས་པ་བྱེད་ཚུལ་རིགས་འདི་གཉིས་ཀ་གཅིག་ལ་གཅིག་བརྟེན་གྱི་ཚུལ་དུ་གནས་པས་ང་ཚོ་བོད་ཀྱི་སྔོན་བྱོན་མཁས་པ་རྣམས་འཇུག་པའི་ལམ་ཐོས་བསམ་སྒོམ་གསུམ་གྱི་སློབ་གཉེར་བྱེད་ཚུལ་གྱི་རིམ་པ་དང་དོན་གཅིག་ཏུ་བབས་ཡོད་པ་རེད།
འོན་ཀྱང་སྲོལ་རྒྱུན་དུ་ཐོས་པ་འཚོལ་བ་གཙོར་སྙེག་པ་ལས་ཐོས་དོན་བསམ་བྱུང་གི་བློ་ཡིས་འཇུག་པར་བཏང་སྙོམས་སུ་བསྐྱུར་ཡོད་པ་རེད། དེ་བས་སློབ་མས་དཔེ་ཆའི་ནང་དོན་བློར་འཛིན་སྐྱོར་སྦྱང་ཡུན་དུ་འབད་པས་སློབ་མའི་སློབ་སྦྱོང་དེ་གཞན་བརྟེན་དང་ཡིད་འཛིན་གྱི་རྣམ་པར་གནས་པས་སློབ་མའི་བསམ་གཞིག་གི་ནུས་པ་དང་བློ་རིག་གི་རྩལ་སྦྱོང་བའི་ཕྱོགས་སུ་ནུས་པ་ཆེར་ཐོན་མེད་དོ། ། རྒྱུ་མཚན་འདིའི་དབང་གིས་བསླབ་ཚན་གསར་བའི་འདོད་ཚུལ་ནི་སློབ་མའི་སློབ་གཉེར་དེ་གནད་དོན་འདོན་པ། གནད་དོན་ལ་དཔྱད་པ། གནད་དོན་ཐག་གཅོད་ཀྱི་རིམ་པ་ཞིག་ཡིན་དགོས་པས། བསམ་བྱུང་གི་རིག་པ་དང་ཞིབ་འཇུག་གི་རིག་པ་དང་འཚོལ་རྟོག་གི་རིག་པས་སློབ་གཉེར་ལ་འཇུག་དགོས་པར་ནན་གྱིས་གླེང་གིན་ཡོད།
འདི་ལྟ་བུའི་དེང་རབས་ཐོས་པ་བྱེད་ཚུལ་ལ་རྟགས་གང་དག་ཡོད་དམ་ཞེ་ན། དེང་རབས་ཐོས་པ་བྱེད་ཚུལ་ནི་ངོ་བོའི་སྟེང་ནས་བཤད་ན་སློབ་མའི་གཙོ་ཡུལ་རང་བཞིན་འདོན་རྒྱུ་དེ་དང་རང་ཤུགས་ཀྱིས་སློབ་ལ་འཇུག་པར་སྣེ་ཁྲིད་དང་སྐྱོར་འདེགས་བྱ་རྒྱུ་དེ་ཡིན། དེའི་རྟགས་དང་པོ་ནི། སློབ་མའི་མ་སྐུལ་དང་ལེན་རང་བཞིན་འདོན་པ་དེ། སློབ་གཉེར་སྐབས་སུ་གཞན་བརྟེན་དང་རང་བརྟེན་གྱི་རྣམ་པ་གཉིས་སུ་སྣང་བས་སློབ་མའི་སེམས་སུ་ངེད་ཀྱིས་བསླབ་དགོས་ཞེས་དང་ཁྱོད་ཀྱིས་སློབས་ཤིག་ཅེས་པའི་ཀུན་སློང་གི་ཁྱད་མི་འདྲ་བ་གཉིས་པོ་འདི་འབྱུང་གིན་ཡོད་པས་ཀུན་སློང་སྔ་མ་ནི་ཡོན་ཏན་སྐོམ་པ་ཆུ་འདོད་ལྟ་བུའི་སློབ་གཉེར་གྱི་འདུན་པ་ཡོད་པས་སློབ་ལ་མོས་གུས་སྐྱེས་ལ་ཀུན་སློང་ཕྱི་མ་ནི་ཕྱིའི་རྒྱུ་རྐྱེན་དང་བཙན་ཤུགས་ལ་བརྟེན་ཏེ་སློབ་གཉེར་ལ་འཇུག་པ་ཡིན་པས་སློབ་ལ་སུན་སྣང་འབྱུང་བ་ཡིན་ནོ། ། དེ་བས་སློབ་མར་སློབ་སྦྱོང་གི་འགན་སེམས་དང་མོས་པ་ཡོད་རྒྱུ་ཆེས་གལ་ཆེའོ། ། དེའི་རྟགས་གཉིས་པ་ནི། སློབ་མའི་ཚུགས་ཐུབ་རང་བཞིན་འདོན་པ་སྟེ། སྲོལ་རྒྱུན་གྱི་ཐོས་པ་བྱེད་ཚུལ་ནི་གཞན་བརྟེན་རང་བཞིན་ཆེ་བས་དེང་རབས་སུ་རང་བརྟེན་ནུས་པ་གལ་ཆེ་ཚུལ་བཤད་པ་རེད། སློབ་མའི་དང་ལེན་ནུས་པ་ལྡན་པའི་སྟེང་ནས་རང་བརྟེན་ནི་ངས་སློབ་ནུས་པའམ་སློབ་ཐུབ་ཞེས་པའི་དོན་ཡིན་ལ་སློབ་མ་རེ་རེར་སློབ་སྦྱོང་བྱེད་པའི་ནུས་པ་ཆེན་པོ་ཡོད་པ་དང་ཁོ་ཚོར་རང་སྟོབས་ཀྱིས་ལས་གང་རུང་ལ་འཇུག་པའི་འདོད་བློའང་ཆེན་པོ་ཡོད། ང་ཚོས་སློབ་མའི་ནུས་པ་འདི་ལ་མཐོང་ཆུང་དང་བཏང་སྙོམས་སུ་མི་འཇོག་པར་འཆད་ཉན་ཁྲོད་རིམ་བཞིན་གཞན་བརྟེན་ནས་རང་བརྟེན་ལ་བསྙེག་དགོས་པས་དེ་ཡང་མཐར་སློབ་མའི་རང་བརྟེན་གྱི་སློབ་སྦྱོང་ནུས་པ་ཆགས་པར་དགེ་རྒན་གྱི་སྣེ་ཁྲིད་འདོན་རྒྱུ་དེ་ཡིན་ནོ། ། དེའི་རྟགས་གསུམ་པ་ནི། སློབ་མ་རེ་རེའི་ཁྱད་ཆོས་འདོན་པ་སྟེ། སློབ་མ་རེ་རེའི་སེམས་ཁམས་དང་མྱོང་ཚོར། རིག་སྟོབས་སོགས་མི་འདྲ་བས་ཁོ་ཚོས་སློབ་གཉེར་བྱེད་ཚུལ་ཡང་མི་འདྲ། དེ་བས་ང་ཚོས་སློབ་མ་རེ་རེའི་ཁྱད་ཆོས་དང་རང་གཤིས། འཚོ་བའི་མྱོང་ཤེས་སོགས་ལ་བརྩི་འཇོག་གིས་ཁོ་ཚོའི་རང་གཤིས་དང་ཁྱད་ཆོས་འདོན་སྤེལ་ལ་གོ་སྐབས་སྟེར་དགོས་པ་དང་། གཞན་སློབ་མའི་བར་གྱི་བློ་ཆེ་ཆུང་གི་ཁྱད་པར་ལ་དམིགས་ནས་བབ་བསྟུན་གྱིས་འཆད་ཉན་ལ་འཇུག་པར་གཟབ་དགོས་པ་ལས་བྱ་བརྒྱ་རྡོ་གཅིག་གི་དཔེར་མ་སོང་བ་ཤིན་ཏུ་གལ་ཆེའོ། ། དེའི་རྟགས་བཞི་བ་ནི། སློབ་མའི་མྱོང་རོལ་རང་བཞིན་འདོན་པ་སྟེ། ལུས་སེམས་གཉིས་ཀའི་མྱོང་བའི་ཤེས་པ་དེ་ཡིན་ལ། ཤེས་བྱ་སློབ་པ་ནི་ཐ་སྙད་སྦྱོང་བ་ཙམ་དང་རྗེས་དཔག་རིག་པས་དཔྱད་པ་ཙམ་ལས་འདས་ཏེ་ཡིད་ཀྱི་བརྩེ་བ་དང་དབང་བོའི་མྱོང་བ་དང་མི་གཤིས་ཀུན་སྤྱོད་སོགས་དང་འབྲེལ་དགོས་པ་རེད། ལུས་ཀྱི་མྱོང་བ་ནི་ཁ་མིག་ལག་སྣ་སོགས་ལུས་ཀྱི་ཡན་ལག་དག་གི་མངོན་སུམ་གྱི་མྱོང་བ་ཞིག་ལ་བྱ། སེམས་ཀྱི་མྱོང་བ་ནི་སློབ་མའི་ལོ་ཚོད་ཀྱི་འཚོ་བ་དང་སེམས་ཁམས་སོགས་དང་བསྟུན་ཏེ་ཁོ་ཚོའི་ཤེས་རྒྱ་དང་ལྟ་ཚུལ། མོས་ཕྱོགས་སོགས་ལ་བརྩི་འཇོག་གནང་བ་དང་ཁོ་ཚོའི་ཐད་ཀར་གྱི་མྱོང་བ་བསྒྱུར་བཅོས་དང་སྣེ་ཁྲིད་མཛད་དགོས་པ་དེའོ། ། དེའི་རྟགས་ལྔ་བ་ནི། གནད་དོན་འདོན་པ་སྟེ། འདི་ནི་སློབ་མའི་བློ་སྒོ་འབྱེད་བྱེད་ཀྱི་ལྡེ་མིག་ལྟ་བུར་འཛིན་དགོས། གནད་དོན་འཚོལ་བ་དང་དབྱེ་ཞིབ་དང་ཐག་གཅོད་ཀྱི་རིམ་པ་ནི་སློབ་སྦྱོང་གི་ཐབས་ལེགས་ཤོས་ཏེ། བསམ་གཞིག་གི་ནུས་པ་སྐྱེད་བྱེད་དང་བདེན་དོན་འཚོལ་རྟོག་དང་གསར་གཏོད་ཀྱི་ཚན་རིག་གི་སྙིང་སྟོབས་ཤིག་ཡིན་པས། ཞིབ་འཇུག་རང་བཞིན་གྱི་སློབ་སྦྱོང་དང་མཉམ་ལས་རང་བཞིན་གྱི་སློབ་སྦྱོང་། གནད་དོན་འཚོལ་ཞིབ་རང་བཞིན་གྱི་སློབ་སྦྱོང་གི་འདུན་པ་སློང་བའི་རྩ་བ་ལྟ་བུ་ཡིན་ནོ། །
གོང་གི་རྟགས་ལྔ་བོ་ནི་ཡ་བྲལ་བ་མ་ཡིན་པར་ཕན་ཚུན་འབྲེལ་ཆེ་ལ་གཅིག་ཁོངས་གཅིག་ཏུ་འདུ་བས་ཕན་ཚུན་འབྲེལ་ལྡན་གྱི་ཕུང་བོ་ཞིག་ཏུ་གནས་སོ། ། ང་ཚོས་དེང་རབས་ཀྱི་ཐོས་པ་བྱེད་ཚུལ་གྱི་བསམ་བློ་དང་རིགས་པ་དེ་སྤྱི་ངོས་ནས་ལྟ་བ་ལས་བྱེ་བྲག་རེ་རེ་ནས་འབྲེལ་མེད་ཡན་གར་གྱི་ཚུལ་དུ་ལྟ་མི་རུང་ངོ་། །
གཉིས་པ། བསླབ་ཚན་གསར་བ་དང་འཆད་ཉན་ལེགས་བཅོས་ལས་དགེ་སློབ་ཀྱི་འབྲེལ་བ་འཛིན་སྟངས་བཤད་པ།
གསུམ་པ། སློབ་ཁང་གི་འཆད་ཉན་བྱ་ཚུལ་གྱི་རྣམ་པ་ལེགས་པར་བསྒྱུར་དགོས་ཚུལ་བཤད་པ།