སའི་གོ་ལའི་ནང་ཁུལ་གྱི་དྲོད་ཚད་མཐོན་པོ་ནི་གང་ནས་བྱུང་པ་ཡིན།

        དགུན་གྱི་དུས་སུ། ང་ཚོ་ཁང་བའི་ཁྱམས་རའམ་སྦྲ་ནག་གི་ཕྱི་རོལ་ནས་ཉི་མར་ལྡེ་སྐབས། ལུས་ཡོངས་སུ་སྐྱིད་པའི་བྲོ་བ་ཐུན་མོང་མ་ཡིན་པ་ཞིག་བསྟེར་ངེས། ཚ་ཚད་འདི་ནི་ཉི་མའི་ཁྱབ་འགྱེད་ལས་འཕྲོས་པ་ཡིན་ལ། སའི་གོ་ལར་ཆ་མཚོན་ནས་བཤད་ན། ཉི་མའི་ཁྱབ་འགྱེད་ཀྱིས་སའི་གོ་ལའི་ཕྱི་དངོས་སུ་ཚ་ལྷོག་ལྷོག་བྱེད་པའི་ནུས་པ་མཁོ་འདོན་བྱེད་པ་ལས་ནང་ཁུལ་ལ་བར་ཆད་གཏན་ནས་བཟོ་མི་ཐུབ།
        སའི་གོ་ལའི་ནང་ཁུལ་གྱི་དྲོད་ཚད་མཐོན་པོའི་ཚ་ཚད་འདི་གང་ནས་བྱུང་པ་ཡིན་པའི་གནད་དོན་འདི་ར་སྤྲོད་བྱ་དགོས་ན། ངེས་པར་ཏུ་སའི་གོ་ལ་ཆགས་ནས་ད་བར་གྱི་ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་ནས་གནད་དོན་འདི་འཚོལ་དགོས།
        ཚན་རིག་པས་ཤེས་གསལ་ལྟར་ན། སའི་གོ་ལ་ཆགས་པའི་སྔ་དུས་སུ། གོ་ལ་ཆུང་ངུ་མང་པོ་ཕན་ཚུན་གདུང་ཐུག་དང་རྡབ་རྡེག་བྱས་པ་ལས་གདོད་མའི་སའི་གོ་ལ་གྲུབ་པའི་གོ་རིམ་ཁྲོད་ནས་ཚ་ཚད་མི་ཉུང་པ་ཐོན་པ་དང་། དེའི་རྐྱེན་གྱིས་སྔ་དུས་ཀྱི་སའི་གོ་ལའི་ཕྱི་དངོས་ནས་ནང་ཁུལ་གྱི་དྲོད་ཚད་ཧ་ཅང་མཐོ་བ་དང་། གོ་ལ་ཡོངས་སུ་ཡོད་ཚད་ཞུ་ལ་ཉེ་བའི་རྣམ་པ་ཞིག་མངོན།
        དེ་ནས་སའི་གོ་ལའི་དྲོད་ཚད་རིམ་གྱིས་མར་བབས་ནས་གྲང་མོར་གྱུར་རྗེས་ས་དུམ་དང་ས་རིམ་བར་མ། ས་སྙིང་སོགས་བང་རིམ་གྱི་ཆགས་ཚུལ་གྲུབ། གྲང་མོར་གྱུར་ནས་ད་བར་ཏུ་ལོ་དུང་ཕྱུར་46ལོན་མོད། འོན་ཀྱང་ད་རུང་ཚ་ཚད་མང་པོ་གོ་ལའི་ནང་ཁུལ་དུ་གསོག་ཉར་བྱས་འདུག
        སྔ་དུས་ཀྱི་སའི་གོ་ལའི་ཚ་ཚད་ཀྱི་འབྱུང་ཁུངས་རང་སོར་བཞག་ཡོད་པ་ཕུད་སའི་གོ་ལའི་ནང་ཁུལ་དུ་ད་དུང་འབོར་ཆེ་བའི་འཕྲོ་འགྱེད་རང་བཞིན་གྱི་གནས་མཐུན་རྒྱུ་གསོག་འཇོག་བྱས་ཡོད། འཕྲོ་འགྱེད་རང་བཞིན་གྱི་གནས་མཐུན་རྒྱུ་འདི་རྣམས་ཀྱི་ངོ་བོར་མུ་མཐུད་དུ་འགྱུར་བ་བྱུང་པ་དང་འགྱུར་བ་བྱུང་བའི་གོ་རིམ་ཁྲོད་དུ་ཚ་ཚད་ཆེན་པོ་ཐོན་ཡོང་ལ་ཚ་ཚད་འདིས་ཧ་ལམ་སྐམ་ས་ཆེན་པོའི་ས་ཁུལ་གྱི་ས་ངོས་ཚ་རྒྱུན་གྱི་ཕྱེད་ཀ་ཙམ་ཟིན་ཡོད།
        དེ་མིན། སའི་གོ་ལའི་ནང་ཁུལ་གྱི་གཟུགས་ཅན་འགུལ་སྐྱོད་དང་གཟུགས་ཅན་ཕན་ཚུན་བར་གྱི་འགྱུར་ལྡོག་སོགས་ཀྱིས་ཀྱང་ཚ་ཚད་མི་ཉུང་པ་ཕྱིར་གཏོང་བྱེད་སྲིད། །