རྗེ་མཉམ་མེད་ཤེས་རབ་རྒྱལ་མཚན་གྱི་མཛད་རྣམ་མདོར་བསྡུས།

   བོན་གྱི་རྒྱལ་བ་གཉིས་པ་རྗེ་མཉམ་མེད་ཆེན་པོ་ཞེས་སྙན་པའི་གྲགས་པ་ཕྱོགས་བཅུར་ཁྱབ་པ་དེ་ཉིད་ཀྱི་མཁས་བཙུན་བཟང་གསུམ། འཆད་རྩོད་རྩོམ་གསུམ། ཐོས་བསམ་སྒོམ་གསུམ། མཁྱེན་བརྩེ་ནུས་གསུམ་སོགས་ཀྱི་སྒོ་ནས་བསྟན་འགྲོར་ཕན་བདེ་སྤེལ་ཚུལ་གྱི་རྣམ་པར་ཐར་བ་ནི། བདག་ལྟ་བུས་བརྗོད་པའི་ནུས་པ་མ་མཆིས་ཀྱང་། རང་ཉིད་ཀྱི་མཐོང་ཐོས་ཡུལ་དུ་གྱུར་པའི་བླ་ན་མེད་པའི་མཛད་རྣམ་གྱི་ཡི་གེ་ཁུངས་དག་རང་བློར་གང་ངེས་རྣམས་ལྷག་བསམ་ཟོལ་མེད་ཀྱིས་ཅུང་ཙམ་བརྗོད་པར་བྱས་ན་འདི་ལྟ་སྟེ།
   དམ་པ་དེ་ཉིད་ཀྱི་འཁྲུངས་ཡུལ་ནི། ཤར་རྒྱལ་མོ་རོང་གི་རྒྱལ་མོ་རྔུལ་ཆུའི་འགྲམ་གྱི་གནས་མཆོག་རྒྱལ་མོ་དམུ་རྡོའི་རི་བོ་གཡུང་དྲུང་ལྷ་སྟེང་དགོན་དང་ཉེ་བའི་གནས་ལག གཉན་རྗེ་གབ་ཏོག་ཤ་བ་རིའི་ཞོལ་གྱི་ཆུ་ཆེན་རབ་བརྟན་གྱི་ཞིང་ཁམས་སྟུག་ཀྱོའམ་སྟེགས་ལྕོག་གམ་སྟེགས་མཆོག་ལུང་པའི་མུ་ནེ་གསེར་གཞུང་ཐང་སྟེ་རྒྱ་སྐད་དུ（独觉沟华西坝）ཞེས་བྱ་བར་ཡབ་རྒྱུ་ཡི་བོན་བཞི་ལ་མཁས་པ་དབྲ་རིགས་ཀླུ་རྒྱལ་ཞེས་བྱ་བ་དང་། ཡུམ་མཁའ་འགྲོའི་མཚན་རྟགས་དང་ལྡན་པའི་རིན་ཆེན་སྨན་གཉིས་ཀྱི་སྲས་སུ། དབང་ལྡན་ཞེས་པ་མེ་ཕོ་སྤྲེལ་གྱི་ལོ(སྤྱི་ལོ༡༣༥༦)དཔྱིད་ར་སྟག་ཟླའི་ཡར་ཚེས་ལྔའི་ཉི་ཤར་གྱི་དུས་སུ་ངོ་མཚར་གྱི་ལྟས་དུ་མ་དང་བཅས་ཏེ་སྐུ་བལྟམས་སོ། །
   གནས་མཆོག་གབ་ཏོག་ཤ་བ་རི་ཞེས་བྱ་བའི་ཡུལ་མཆོག་དེ་ནི། 《གནས་རི་རིན་ཆེན་སྤུངས་པ་གཉན་རྗེ་གབ་ཏོག་གི་དཀར་ཆག》ལས། དམུ་རྡོ་གཡུང་དྲུང་སྤུངས་རྩེའི་བྱང་ནུབ་ཀྱི། ། གནས་ཆེན་གཉན་རྗེ་གབ་ཏོག་ཅེས་བྱ་བར། ། རིན་ཆེན་སྤུངས་པའི་རི་བོ་ཞེས་ཀྱང་བྱ། ། ཤ་བ་རི་མཆོག་རྒྱལ་མོ་ཞེས་ཀྱང་བྱ། ། གནས་ཆེན་ཤེལ་དཀར་གཡུང་རོང་ཞེས་ཀྱང་བྱ། ། འདི་འདྲའི་གནས་རི་ཨེ་མ་ངོ་མཚར་ཆེ། ། ཚིག་ཀ་འདི་ཡི་དོན་དེ་མ་ཤེས་ན། ། གཉན་རྗེ་གབ་ཏོག་ཅེས་པའི་རྒྱུ་མཚན་ནི། ། གཉན་ནི་གནས་པ་རྒྱལ་པོ་རྩུབ་པས་གཉན། ། རྗེ་ནི་གནས་ཆེན་རྣམས་ཀྱི་གཙོ་བོ་རྗེ། ། གབ་ནི་གཞན་གྱི་མ་མཐོང་སྦས་པའི་གབ། །
ཏོག་ནི་ཁྱད་འཕགས་གནས་རི་ཀུན་གྱི་ཏོག།། དེ་ཕྱིར་གཉན་རྗེ་གབ་ཏོག་ཅེས་བྱའོ། ། གནས་ཀྱི་ཕུ་མདའ་ཉིན་སྲིབ་གར་བལྟས་ཀྱང་། ། གང་དང་མི་འདྲ་ཡ་མཚན་རྨད་དུ་བྱུང་། ། རིན་ཆེན་གཏེར་མཆོག་སྤུངས་པའི་ཚུལ་དུ་ཡོད། ། དེ་ཕྱིར་རིན་ཆེན་སྤུངས་པའི་གནས་ཞེས་བྱ། །ཤ་བ་རི་ཞེས་བཏགས་པའི་རྒྱུ་མཚན་ནི། ། སྔོན་ཚེ་ཀླུ་བཙན་ཤ་བར་སྤྲུལ་ནས་བྲོས། །རིག་མཆོག་བཻ་རོ་དྲན་པ་ལ་སོགས་ཏེ། །གྲུབ་ཐོབ་རིག་འཛིན་མཁའ་འགྲོ་མང་པོ་ཡིས། ། ཞབས་བཅགས་སྨོན་ལམ་རྒྱ་ཆེན་བཏབ་ནས་བཞག ། དེ་ཕྱིར་ཤ་བ་རི་ཞེས་བྱ་བའོ། ། ཤེལ་དཀར་གཡུང་རོང་བྱ་བའི་རྒྱུ་མཚན་ནི། ། ཤེལ་གྱི་རྡོ་རིང་དཀར་པོ་མངོན་པ་ནི། ། རི་བྲག་གཞན་དང་མི་འདྲ་ཁྱད་པར་འཕགས། ། ཤེལ་དཀར་མདངས་བཞིན་གསལ་ཕྱིར་ཤེལ་དཀར་བྱ། ། གཡུང་ནི་གཡུང་དྲུང་བོན་གྱི་རྒྱུད་སྡེ་ཡི། ། གཏེར་ཁ་ཟབ་མོ་ཡོད་པས་གཡུང་ཞེས་བྱ། ། ཤེལ་གྱི་རྡོ་རིང་དཀར་པོའི་རྩེ་མོ་རུ། ། བཻ་རོ་ཏིང་འཛིན་བཞུགས་པའི་སྐུ་རྗེས་དང་། ། བླ་ཆེན་དྲན་པ་ཚེ་དབང་པད་འབྱུང་གསུམ། ། འབྲུག་ཁྱུང་སེང་གེར་སྤྲུལ་བའི་ཞབས་རྗེས་ཡོད། ། ཅེས་གསུངས་སོ། །
   ཡང་དམ་པ་ཁྱུང་གི་གདུང་རབས་རིག་སྣང་འོད་ཀྱི་རྒྱལ་པོའི་སྲས་བཞི་ཡོད་པའི་ཐ་ལྟག(ཐ་མའི་གོང་མ)ཁྱུང་འཕགས་ཁྲ་བོ་དང་ལྷ་སྲས་གཡུང་དྲུང་རྣམ་གཉིས་བྱོན་ཏེ་སྲས་ཀྱིས་ལྷ་མོ་མདངས་ལྡན་མ་ཁབ་ཏུ་བཞེས། དེ་ལས་དབུ་འབོར་གཡུང་དྲུང་བུ་བཞི་སོགས་གྲོལ་ཏེ་བོན་སྲིད་དང་རྒྱལ་སྲིད་ཀུན་དར་བར་མཛད་པའི་ཚེ། གང་ཉིད་ཀྱི་བཞུགས་ཡུལ་གཙོ་བོ་སྟུག་ཀྱོ་མུ་ནེ་གསེར་གཞུང་ཐང་ཡིན་པ་ནི། 《ཁྱུང་པོའི་རྒྱལ་རྒྱུད་ཤེལ་དཀར་མེ་ལོང》ལས། ཁྱུང་འཕགས་ཁྲ་བོའི་སྲས་ལྷ་སྲས་གཡུང་དྲུང་ཉིད་ཀྱིས་དམུ་རྡོ་ལྷ་གཉན་ལ་གཡས་སྐོར་ལན་གསུམ་མཛད་དེ། རྒྱལ་མོ་རུང་གི་ས་སྙིང་སྟུག་ཀྱོ་ཞེས་པ་བོད་སྐད་དུ་ལུང་མདའ་ཟེར་བ་དེ་རུ་བབས་སོ། ། ཞེས་དང་།ཡང་དེ་ཉིད་ལས། ལྷ་སྲས་གཡུང་དྲུང་ཉིད་ལ་མི་ཉག་རྒྱལ་པོ་ལ་སོགས་པ་རྒྱལ་རོང་གི་མི་རྣམས་ཀྱིས་འདི་སྐད་ཅེས་ཞུས་སོ། ། མི་མཆོག་དམ་པ་ལྷ་སྲས་གཡུང་དྲུང་ལགས། ། བདག་ཅག་རྒྱལ་མོ་རོང་གི་མི་རྣམས་ཀྱིས། །ཉིད་ཀྱིས་གང་གསུང་ངེས་པར་བསྒྲུབ་ལགས་པས། ། མི་རྗེ་དབང་པོ་ཉིད་ཀྱིས་མཛད་དུ་གསོལ། ། ཞེས་སོགས་ཞུས་ཞེས་དང་། དབུ་འབོར་ལྷ་སྲས་གཡུང་དྲུང་རིན་པོ་ཆེའི་ཐུགས་ཀྱིས་དགོངས་པ་བཏང་ནས། གཉན་རྗེ་གབ་ཏོག་གི་ཤར་ཕྱོགས། གནས་མཆོག་ཇོ་འོ་རྗེའི་བྱང་ཕྱོགས། ས་གཞི་མཎྜལ་བཏེགས་པ་ལྟ་བུ། མུ་ནེ་གསེར་གཞུང་ཞེས་བྱ་བར་གཤེགས་ཏེ། འཁོར་རྣམས་ལ་རང་ཡུལ་གྱི་ལོ་སར་ལྟ་བུ་དགའ་སྟོན་ཞིག་འཚོགས་དགོས་གསུངས། ཞེས་གསུངས་སོ། ། གཞན་ཡང་ལྷ་སྲས་གཡུང་དྲུང་ཉིད་སྟུག་ཀྱོ་རུ་བཞུགས་པའི་ཚེ། ལུང་པ་དེའི་ཕུགས་ཀྱི་ཆུ་མིག་དཀར་མོའི་འགྲམ་ནས་ལྷ་མོ་མདངས་ལྡན་མ་ཁབ་ཏུ་བཞེས་པའི་ཚུལ་དང་། སྲས་ཀུན་སློང་བུ་ཙ་དང་ཁྲོ་ཙ་དབང་ཙ་དགེ་ཤིས་ཙ་བཞི་འཁྲུངས་པ་དང་། སྟུག་ཀྱོ་གདོང་སྲེ(གདོང་རིང)འགོ་སྟེ་སྟེགས་མཆོག་ལུང་པའི་གཡས་ཕྱོགས་ཀྱི་བདེ་ཐང(大平)ཞིག་ཡོད་པ་དེར་སྲས་བཞི་སོ་སོར་སྡེ་བགོས་མཛད་པའི་ཚུལ་སོགས་ཀྱང་ཤེལ་མེ་དེ་ཉིད་ལས་ཞིབ་ཅིང་ཕྲ་བ་གསལ་བོར་གསུངས་འདུག་པ་འདིར་ཡི་གེ་མང་བར་འཇིགས་ནས་མ་བྲིས་ལགས། གཟིགས་འདོད་ན་ཆུ་ཆེན་ལོ་རྒྱུས་དཔྱད་ཡིག་སྨད་ཆར《ཤེལ་དཀར་མེ་ལོང》ཆ་ཚང་བཀོད་ཡོད་པས་དེར་གཟིགས་འཚལ།
   དེ་ནས་དམ་པ་དེ་ཉིད་བྱིས་པའི་དུས་སུ་མ་ཡུམ་གྱིས་བཙའ་རྫི་ཅུང་ཟད་མ་ཐེ་བའི་རྐྱེན་གྱིས་སྤྱན་ཡ་གཅིག་ལ་ཤིང་ཐུར་ཞིག་ཟུག་པ། ཕྱི་ནས་སློབ་དཔོན་སྤྱན་གཅིག་པ་ཆེན་པོ་ཞེས་གྲགས། གང་ཉིད་ཆུང་དུས་ནས་སྔོན་གྱི་ལས་འཕྲོ་སད་དེ་སྐྱེས་ཐོབ་ཤེས་རབ་ཀྱི་འཕྲུལ་དང་ལྡན་པས། ཡབ་ཀྱི་དྲུང་ནས་ཡི་གེ་འབྲི་ཀློག་དང་། རིམ་གྱིས་སྨན་རྩིས་དང་སྨན་དཔྱད། གཏོ་རིགས་ལ་སོགས་རྒྱུའི་བོན་བཞི་ལ་གསན་བཞེས་མཛད་པ་ཙམ་གྱིས་མཁས་པར་གྱུར་ཏེ། མཚན་ཡང་གཡུང་དྲུང་རྒྱལ་དུ་བཏགས་སོ། །
   དགུང་ལོ་ཅུང་ཟད་རྒྱས་ཏེ་ལོ་ན་བཅུ་ལྷག་གི་སྟེང་ནས་འཇིག་རྟེན་འཁོར་བ་ལ་སྐྱོ་བ་སྐྱེས་ནས་མི་རྟག་ངེས་འབྱུང་དྲག་པོ་ཐུགས་རྒྱུད་ལ་ཤར་ཏེ། ཕྱྭ་བླ་མ་གཡུང་དྲུང་རྒྱལ་མཚན་གྱི་མདུན་དུ། དགེ་བསྙེན་གཏན་ཁྲིམས་སྣ་ལྔ། གཙང་གཙུག་གི་ཁྲིམས་ཉི་ཤུ་རྩ་ལྔ་བཅས་ཀྱི་སྡོམ་པ་བཞེས་ནས་ཚུལ་མཚན་ཤེས་རབ་རྒྱལ་མཚན་དུ་གསོལ། དེ་ནས་དབུས་གཙང་ཆོས་ཀྱི་ཞིང་ཁམས་སུ་ཕེབས་ཏེ་གྲྭ་ས་དབེན་ས་ཁར་མཛད། མཁས་གྲུབ་དུ་མའི་ཞབས་སུ་བཏུད་ནས་ཕྱི་ནང་གསང་བའི་དབང་ལུང་མན་ངག་དུ་མ་ནོད་ཅིང་། ཁྱད་པར་དུ་མཁས་གྲུབ་རིན་ཆེན་བློ་གྲོས་ཀྱི་ཕྱག་ཕྱིར་ལོ་དུ་མ་ཞིག་གཤེགས་ཏེ། ཕྱི་ནང་གསང་གསུམ་གྱི་བོན་གྱི་དབང་ལུང་ཁྲིད་རྣམས་བུམ་པ་གང་བྱོའི་ཚུལ་དུ་གསན། དེ་དག་གསན་པ་ཙམ་མ་ཡིན་པར་གནས་ཆེན་རྣམས་སུ་ཉམས་ལེན་སྒོམ་སྒྲུབ་མཐར་ཕྱིན་པར་མཛད་དོ། །
   དགུང་ལོ་སོ་གཅིག་གི་སྐབས(སྤྱི་ལོ༡༣༨༦)ནས་འདུ་གནས་ཆེན་པོ་གཙང་གཡས་རི་དབེན་ས་ཁར་སྒྲིག་ཞུགས་མཛད། དབུས་ཀྱི་ནཱ་ལེན་དྲར་ཕ་ཡུལ་གཅིག་པའི་ས་སྐྱ་པའི་མཁས་ཆེན་རོང་སྟོན་ཆེན་པོ་ཤེས་བྱ་ཀུན་གཟིགས་ཀྱི་སྤྱན་སྔར་ཕར་ཚད་འདུལ་མངོན་དབུ་སྡོམ་ལ་སོགས་གཞུང་ཆེན་དྲུག་ལ་མཁས་པར་སྦྱངས་ནས་ཐོས་བསམ་སྒོམ་པའི་སྒྲོ་འདོགས་གཅོད་དེ། དཔལ་ལྡན་གསང་ཕུ་ནེའུ་ཐོག་གི་བཤད་གྲྭ་ཆེན་མོར། གྲྭ་སྐོར་མཚན་ཉིད་རབ་འབྱམས་པའི་མཚན་བཏགས་བཞེས། བྷེ་དྲང་སྲོང་རིན་རྒྱལ་གྱི་དྲུང་དུ་ཐེག་ཆེན་སེམས་བསྐྱེད་ཞུས་ཤིང་ལ་སྟོད་དུ་བྲུའི་མཁན་པོ་ཚུལ་ཁྲིམས་ཡེ་ཤེས་ཀྱིས་གཙོར་མཛད་པའི་དྲང་སྲོང་རྨ་མེད་བཅུ་ཕྲག་གཅིག་གི་དབུས་སུ། བསྙེན་རྫོགས་ཀྱི་སྡོམ་པ་བཞེས་ཏེ། དག་པ་དྲང་སྲོང་གི་ཁྲིམས་ཉིས་བརྒྱ་ལྔ་བཅུ་མིག་འབྲས་བཞིན་དུ་སྲུང་བར་མཛད་དེ། 《རྣམ་རྒྱལ་ཁང་བཟང》ལས། བོད་ཀྱི་ཡུལ་དུ་ཐུགས་རྗེས་མངའ་བདག་མཛད། །རིག་པའི་གནས་ལྔ་གཟིགས་པའི་སྤྱན་གཅིག་པ། ། ལྔ་བརྒྱའི་ལས་ཉེས་ཐ་རམ་སེལ་བར་མཛད། ། འཛམ་གླིང་རྒྱན་དྲུག་ཞལ་ཚབ་སྨན་རི་བ། ། ཞེས་སོ། །
   གཞན་ཡང་། དམ་པ་དེ་ཉིད་ཀྱིས་གདུལ་བྱའི་བློ་ཡི་པད་མོ་ཁ་འབྱེད་དེ་སྨིན་གྲོལ་གྱི་ལམ་ལ་འགོད་པའི་ཆེད་དུ། རྒྱ་ཆེ་བའི་ཕྱི་ནང་གསང་བའི་བོན་ལ་འཆད་ཉན་གྱི་དབུ་བཙུགས་ཏེ། སྡེབ་ལེགས་ཚིག་གི་ཕྲེང་བས། ལུང་རིགས་རྒྱ་ཆེན་པོ་བསྡུས་པར་བྱེད་པ་དང་། འཁྲུགས་པ་གོ་རིམ་དུ་བསྡེབས་པ། ཟབ་མོ་རྣམ་པར་འབྱེད་པ་ལ་སོགས་པའི་སྒོ་ནས་རྒྱལ་བའི་བསྟན་པ་གསལ་བར་མཛད་པས། ཐམས་ཅད་མཁྱེན་པའི་སློབ་དཔོན་སྤྱན་གཅིག་པ་ཆེན་པོ་ཞེས་པའི་སྙན་དབྱངས་གངས་ལྗོངས་ཡོངས་སུ་ཁྱབ་པར་མཛད་དེ། གང་ཉིད་ཀྱི་གསུང་འབུམ། འགྲེལ་བའི་སྡེ་ལ་ཚན་གྲངས༢༣དང་། ཁྲིད་རིམ་གྱི་སྡེ་ལ་ཚན་གྲངས༢༤དང་། མཆོད་བསྟོད་ཀྱི་སྡེ་ལ་ཚན་གྲངས༡༨དང་། རིག་གནས་ཀྱི་སྡེ་ལ་ཚན་གྲངས༢བཅས་ཁྱོན་བསྡོམས་ཆོས་ཚན༦༧མཆིས་པར། ཕྱོགས་གཅིག་ཏུ་བསྒྲིགས་པའི་གསུང་འབུམ་གླེགས་བམ་བཅུ་ལས་བརྒལ་བ་བཞུགས་སོ། །
   གང་ཉིད་ཀྱི་རྗེས་འཇུག་སློབ་མ་བསྟན་འགྲོའི་དོན་ཆེན་བསྒྲུབ་ནུས་པ། རྒྱལ་ཚབ་དམ་པ་རྒྱལ་རོང་བ་རིན་ཆེན་རྒྱལ་མཚན་དང་མངའ་རིས་བསོད་ནམས་རྒྱལ་མཚན་གཉིས། མཁས་པའི་བྱ་བ་གསུམ་ལ་ཐོགས་པ་མེད་པའི་བློ་གྲོས་ཅན་བྲུ་ཤའི་གདུང་འཛིན་ཆེན་པོ་ཀུན་དགའ་དབང་ལྡན་དང་ཤེས་རབ་སེང་གེ་གཉིས། ཡུལ་ངེས་མེད་དུ་བཤད་སྒྲུབ་སྤེལ་མཛད་མི་ཉག་བསོད་ནམས་རྒྱལ་མཚན་དང་རྒྱལ་རོང་དར་མདོ་བ་ཚུལ་ཁྲིམས་དབང་ལྡན་སོགས་མཁས་ཆེན་ཉི་ཤུ་དང་བསྟན་པ་ལ་ཤིན་ཏུ་ཕན་པའི་སློབ་མ་བརྒྱ་ཕྲག་ཙམ་དང་། དེ་བཞིན་རྗེ་ཉིད་ཀྱི་དྲུང་དུ་སྡོམ་པ་མནོས་ནས་དབང་ལུང་ཞུས་པའི་སློབ་མ་སྟོང་ཕྲག་ལས་བརྒལ་བ་བྱུང་། དེ་དག་ལས་འཕྲོས་ནས་གཤེན་བསྟན་དར་རྒྱས་སུ་གཏོང་བའི་བཤད་གྲྭ་དང་དགོན་སྡེ་སྟོད་སྨད་ཀུན་ཏུ་མང་དུ་ཡོད་ཅིང་། དེའི་འཕྲིན་ལས་ལས་ལྔ་བརྒྱའི་དུས་འདིར་བོན་གྱི་བསྟན་པ་དར་རྒྱས་སུ་མཛད་པའི་བཀའ་དྲིན་གཞལ་དུ་མེད་པའོ། ། དེ་ཡང《རྒྱལ་བ་གཉིས་པ་ཤེས་རབ་རྒྱལ་མཚན་གྱི་རྣམ་ཐར་ངོ་མཚར་པད་མོའི་ཕྲེང་བ》ལས། བསྟན་པའི་དར་ཆེན་མཉམ་མེད་ཆེན་པོས་ཕྱར། ། སྙན་པའི་དུང་ཆེན་སློབ་མ་རྣམས་ཀྱིས་འབུད། ། སྙིགས་མའི་དུས་འདིར་བོན་བསྟན་དར་མཛད་པ། ། དཔག་མེད་བཀའ་དྲིན་བསྟན་དང་འགྲོ་ལ་ཆེ། ། ཞེས་སོ། །
   སྐབས་ཤིག་ཏུ་གང་ཉིད་ཀྱིས་དེ་སྔོན་དབུས་གཙང་དུ་ཕེབས་ཁར། རྗེས་སུ་ངེས་པར་དུ་ཡབ་ཡུམ་གཉིས་ལ་ཐུག་འཕྲད་མཛད་པར་ཕེབས་རྒྱུ་ཡིན་པའི་ཆད་ཚིག་བོར་བ་བཞིན། སློབ་མ་རིན་ཆེན་རྒྱལ་མཚན་སོགས་ཕྱག་ཕྱིར་ཁྲིད་དེ་རང་ཉིད་ཀྱི་འཁྲུངས་ཡུལ་རྒྱལ་རོང་ཆུ་ཆེན་རབ་བརྟན་སྟེག་ཀྱོ་ལུང་པའི་མུ་ནེ་གསེར་གཞུང་དུ་ཡབ་ཡུམ་མཇལ་འཕྲད་ཆེད་དུ་ཕེབས། ཡབ་ཡུམ་སོགས་ཞལ་ཕྲད་ནས་ཟླ་ཤས་སུ་བཞུགས་རྗེས་དྲིན་ཆེན་ཡབ་ཡུམ་ལ། ང་ཁྱེད་གཉིས་ལ་མཇལ་འཕྲད་བྱེད་པར་ཡོང་བའི་ཁས་ལེན་ཡོད་པ་བཞིན་འདིར་འོང་བ་ཡིན། ད་ནི་སླར་དབུས་གཙང་གི་གྲྭ་སར་མ་སོང་ན་རྩ་བའི་བླ་མའི་བཀའ་དང་འགལ་བ་ཡོད་པས། དངུལ་འདི་དག་དང་རང་ལ་ཡོད་པའི་རྒྱུ་ནོར་གྱིས་མུ་ནེ་གསེར་གཞུང་ཐང་གི་གོང་འདིར་ལྷ་ཁང་གཅིག་བཞེངས་དང་། ཚེ་འདི་དང་ཕྱི་མར་གང་ལ་ཡང་ལེགས་སོ་གསུངས་ནས་ཡབ་ཡུམ་ལ་མེ་ཏོག་གཏོར་ཏེ་སྨོན་ལམ་བཏབ་ནས་སླར་དབུས་གཙང་དུ་ཕེབས་ཏེ། དར་རྩེ་མདོ་རུ་སླེབས་སྐབས་མདོ་སྟོད་ཀྱི་གྲྭ་ས་ནས་འོང་བའི་གྲྭ་སློབ་འགའ་རེའི་སྐད་ལ། གཡས་རུ་དབེན་ས་ཁར་ས་གཡོས་ཆེན་པོ་བྱུང་བས་འཇིག་སོང་ཟེར་བའི་གཏམ་ཐོས་ཕྲལ། ཐུགས་ཡིད་ཅུང་ཙམ་ཆད་དེ། དར་མདོ་ལྷ་མོ་རྩེ་རུ་ཏིང་ངེ་འཛིན་སྒོམ་སྒྲུབ་མཛད་ནས་བཞུགས། མཐར་གཙང་སྟོད་དུ་བོན་བསྟན་གྱི་གྲྭ་ས་བསྐྱར་གསོ་བྱེད་ཆེད་ཡར་ལ་བྱོན་པར་ཐུགས་ཐག་བཅད། དེ་ནས་དཔོན་སློབ་གཉིས་སོགས་ཡར་ལ་བྱོན་པའི་ལམ་དུ། ཤར་ཙོང་ཁ་པ་བློ་བཟང་གྲགས་པའི་དཔལ་དང་མཇལ་འཕྲད་བྱུང་སྐབས་ཕན་ཚུན་གླེང་མོལ་ཞིབ་ཚགས་གནང་བ་དང་། ཁྱད་པར་དུ་བན་བོན་གྱི་འདུལ་བའི་བརྒྱུད་པ་འདི། དུས་སྙིགས་མའི་དབང་གིས་འདུལ་བའི་བསྟན་པ་རྟགས་ཙམ་འཛིན་པའི་དུས་ལ་བབ་ཀྱིས་གསོ་དགོས་ཚུལ་གྱི་བགྲོ་གླེང་མ་བགྲོས་རང་མཐུན་བྱུང་བས། རྗེ་ཙོང་ཁ་པས།
བདེ་ཆེན་རྒྱལ་པོ་ཀུན་བཟང་རྒྱལ་བ་འདུས། །
མི་བརྗེས་གཟུངས་ལྡན་ཤེས་རབ་སྨྲ་བའི་སེང་། །
འཛམ་གླིང་བོན་གྱི་གཙུག་རྒྱན་མཉམ་མེད་པ། །
ཤེས་རབ་རྒྱལ་མཚན་མཆོག་ལ་མངོན་པར་བསྟོད། །ཅེས་དང་། རྗེ་མཉམ་མེད་པས།
དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །
དྲི་མེད་མཁྱེན་པའི་དབང་བོ་འཇམ་དཔལ་དབྱངས། །
གངས་ཅན་མཁས་པའི་གཙུག་རྒྱན་ཙོང་ཁ་པ། །
བློ་བཟང་གྲགས་པ་མཆོག་ལ་མངོན་པར་བསྟོད། །
ཅེས་ཕན་ཚུན་བསྟོད་བསྔགས་ཀྱི་ཚིག་བཅད་ཤོ་ལོ་ཀ་རེ་རེ་འབུལ་རེས་མཛད།
དེ་ནས་རྗེ་མཉམ་མེད་ཆེན་པོ་གཙང་དབེན་ས་ཁར་ཕེབས་ཏེ། དགུང་ལོ་ལྔ་བཅུ་ཤིང་མོ་བྱ(སྤྱི་ལོ༡༤༠༥)ལོར་སྨན་རིའི་ཞོལ། གཡར་ཆེན་ཕུག་ཏུ་དགོན་པ་བཏབ་སྟེ། མཚན་ལ་དཔལ་བཀྲ་ཤིས་སྨན་རིའི་དགོན་ཞེས་འདོགས་པར་མཛད། སྟོད་མངའ་རིས་མན་ཆད། སྨད་རྒྱལ་མོ་རོང་ཡན་ཆད་ཀྱི་བུ་སློབ་སྤྲིན་ཕུང་བཞིན་དུ་ངང་གིས་འདུས་སོ། ། དེར་ལོ་སྐོར་བཅུ་གཅིག་གི་བར་དུ་འཆད་རྩོད་རྩོམ་གསུམ་ཁོ་ན་མཛད་ནས། བཤད་སྒྲུབ་གཉིས་ཀ་སྤེལ་མར་མཛད་དེ་བརྟན་པར་བཞུགས་སོ། །
   དེ་ལ་ཇི་སྐད་དུ།
བརྒྱ་པའི་མགོན་པོ་གཉིས་པ་བསྟན་འགྲོའི་མགོན། །
བསྟན་པ་འཛིན་སྐྱོང་སྤེལ་བའི་ཁུར་ཆེན་བཞེས། །
གངས་ལྗོངས་ས་སྟེང་དབྱར་རྔ་ལྡིར་བའི་ཚེ། །
བསྟན་འཛིན་མདོངས་མཐའི་ཚོགས་རྣམས་དགྱེས་དགུས་བྲེལ། ། ཞེས་སོ། །