ནམ་ཡང་བརྗེད་དུ་མེད་པའི་མེ་ཏོག་ཕོར་བ། །
ལོ་ཟླའི་ཡོལ་བས་བརྩེགས་ཀྱང་རི་མོ་ཇེ་གསལ། །མྱོས་བྱེད་རྒུན་ཆང་མངར་མོའི་ཞིམ་ཁ་ཇེ་དྲན། །
རྨི་ལམ་མེ་ཏོག་ལྷ་མོའི་ལྗོངས་སྐོར་ཇེ་མང་། །
ཐུག་འདོད་རྨུ་ཐག་རིང་མོ་རྒྱང་ལ་བརྐྱངས་ཀྱང་། །
དྲན་འཛིན་སེམས་པའི་དཔལ་ལ་འཇའ་ཚོན་མ་ཤར། །
ཨོ་ལུས་རྩེད་རྡོ་བསྒྲིགས་ཙམ་ལར་ནས་མིན་མོད། །
བསོད་ནམས་དངོས་གྲུབ་ཞིམ་ཁ་ཐོབ་རྒྱུ་མ་བྱུང་། །
མི་ཚེ་ཕར་ཕར་སོང་ཡང་དྲན་པ་ཇེ་གསལ། །
འཆི་བདག་ཚུར་ཚུར་ཐོན་ཡང་རི་མོ་ཇེ་མངོན། །
གློ་དང་ཀླད་པའི་གསེབ་ཀྱི་རྣམ་ཤེས་བུང་བ། །
འདི་ཀོ་ཁྱོད་ཀྱི་རེད་དམ་ང་ལ་དབང་རེད། །
མེ་ཏོག་གར་བཞད་ས་ལ་བུང་བ་མ་ཐོན། །
བུང་བ་གར་བཞུད་ས་དེར་མེ་ཏོག་མ་སྐྱེས། །
དུང་ཕྲེང་གསེར་གྱི་སྒྲོག་རྒྱན་སྙིང་ལ་གཤགས་པ། །
དུས་དང་འགྲིལ་བ་སུ་ཡིས་འབྱེད་པ་མ་བྱུང་། །
བྲང་ལ་འུབས་ཤིང་འཁྱུད་པའི་དུས་དེ་དྲན་ན། །
ལྷ་མོའི་ཁྲུས་རྫིང་རོལ་བའི་ལུ་གུའི་སྣང་བ། །
སེམས་པའི་གཡས་ན་ལྡིང་ཞིང་གཡོན་ན་རྩེ་བ། །
བརྗེད་མེད་རྡོ་རྗེ་རྩེ་དགུས་ཕབ་པའི་ལོ་མ། །