འདན་ཡུལ་གྱི་རང་བཞིན་དྲང་པོར་བརྗོད་པའི་གཏམ་དུང་ཟླའི་འཛུམ་ཟེར།

གངས་རི་དཀར་པོའི་བརྗིད་ཉམས།

རབ་དཀར་གངས་ཀྱིས་མུ་ཁྱུད་བསྐོར་བའི་བསིལ་ལྡན་ཁ་བའི་ཞིང་ཁམས་ན།།

མཛེས་སྡུག་འབུམ་གྱིས་རབ་ཏུ་བསྟིམས་པའི་མདོ་ཁམས་འཛིན་མའི་ཕང་བ་རུ།།
སྣོད་བཅུད་ངོ་མཚར་ཀུན་ནས་འབར་པའི་འདན་གླིང་འབྲུ་ཡི་བང་མཛོད་ཅེས།།
སྙན་གྲགས་སྤྲིན་གྱི་རོལ་མོའི་དབྱངས་རྟ་འཛམ་གླིང་ས་ཡི་རྩེ་མོར་འཕུར།།

གནས་ཆེན་པདྨ་ལྷ་རིའི་ཁྲོད་དུ་རྣལ་འབྱོར་དགྱེས་པའི་མགུལ་མ་སྙན།།

འབྲུ་ཀླུང་ཕྱུག་མོའི་རླབས་ཀྱི་ངོགས་སུ་གཤོག་དྲུག་ཉ་མོས་འཁྱུག་རྩལ་མཛེས།།
དཀར་དམར་མེ་ཏོག་ཁྲ་ཚོམ་གསེང་དུ་ཕྱེ་ལེབ་སྒེག་མོས་བྲོ་གར་བསྒྱུར།།
མཛེས་སྡུག་ལྗང་ལོའི་ནགས་ཀྱི་ཚལ་དུ་རི་སྐྱེས་མ་བུ་བག་ཡངས་རྒྱུ།།

ཡུལ་འདིར་འཆི་མེད་པདྨ་ཀྭ་རས་ཆོས་ནོར་གཏེར་གྱི་བང་མཛོད་བསྐྲུན།།

ས་འདིར་ཁྲི་རལ་མི་ཡི་དབང་པོས་ཁྱད་གྲྭ་རིག་པའི་སློབ་གླིང་བཙུགས།།།
ལྗོངས་འདིར་སེང་ཆེན་མི་ཡི་ཉི་མས་སྔོན་མོ་ནས་ཀྱི་གཏེར་སྒོ་ཕྱེས།།
གནས་འདིར་ཨ་ཅེ་རྒྱ་བཟས་བཞེངས་པའི་ངོ་མཚར་སྒྲོལ་མའི་ལྷ་ཁང་མཛེས།།

འཕགས་བོད་མཁས་གྲུབ་བྱེ་བའི་གཙུག་རྒྱན་སྨྲི་ཏི་ཛྙ་ན་གནས་འདིར་ཕེབས།།

ཕོ་རྩལ་སྣ་དགུ་རྒྱན་གྱིས་རབ་མཛེས་འཕྲུལ་གྱི་འདན་མ་ཡུལ་འདིར་བལྟམས།།
ཤེད་ཆེན་རི་བོ་དཔུང་པས་འཕེན་པའི་རྩལ་ཆེན་སྒ་སྡེ་ལྗོངས་འདིར་འཁྲུངས།།
མཁས་བཙུན་རང་མདངས་འོད་དུ་འཁྱུག་པའི་ཁུ་རྔོག་འབྲོམ་གསུམ་ས་འདིར་འཛོམས།།

སེ་བཙུན་གཞོན་ནུ་བྱང་ཆུབ་སོགས་ཀྱིས་ཕྱི་དར་བསྟན་པའི་མེ་རོ་བསླངས།།

སྐྱོབ་པ་འཇིག་རྟེན་གསུམ་གྱི་མགོན་པོས་འབྲི་གུང་བསྟན་པའི་དབུ་འཁྱུད་བྲིས།།
དཀོན་མཆོག་རིག་པའི་སེང་གེ་སོགས་ཀྱིས་འཇིགས་བྲལ་རིག་པའི་རོལ་རྩེད་ངོམ།
སྤྲུལ་པའི་བྱང་སེམས་འགྲོ་མགོན་འཕགས་པས་བསྟན་པའི་གཞིས་ཁྱིམ་མང་དུ་བཏབ།།

ཡུལ་འདིའི་དཔལ་དུ་སྲིད་པ་བཞེས་པའི་རླབས་ཆེན་དམ་པའི་སྐྱེས་བུའི་ཚོགས།།

རྣམ་བཞིའི་ལས་ཀྱིས་རྒྱལ་བསྟན་འཛིན་ལ་འགྲན་པའི་ཟླ་བོ་རབ་དབེན་པས།།
ཡང་དར་བསྟན་པའི་འོད་ཀྱི་སྣང་བ་ཕྱོགས་ཀྱི་བུ་མོའི་ལན་བུ་དང་།།
མཉམ་དུ་དཔྱངས་པའི་མ་སྨད་མཛད་པ་ཉིན་མོར་བྱེད་པོའི་ཟོལ་གྱིས་འབར།།

ཞི་དུལ་སྤྱོད་བཟང་མཛེས་སྡུག་མེ་ཏོག་ན་ཆུང་བུ་མོའི་རྒྱན་དུ་དཔྱངས་།།

བློ་དང་ཐབས་རྩལ་འཕྲུལ་གྱི་འཁོར་གསུམ་སྟག་ཤར་གཞོན་ནུའི་ཆས་སུ་རྫོགས།།
ཆེ་བཀུར་ཆུང་སྐྱོང་བརྩེ་བའི་འོ་སྤྲི་ཡུལ་མི་ཀུན་གྱི་སྲོལ་དུ་ཆགས།།
མེས་པོའི་མཛད་བཟང་བདུད་རྩི་མངར་མོ་རྒན་གཞོན་ཡོངས་ཀྱིས་བཅུད་དུ་བརྟེན།།

དཀར་ནག་ཕྱུགས་ཀྱི་འཕེལ་ཁ་བརྟས་པའི་ཕུ་ན་འབྲོག་སྡེའི་སྦྲ་ནག་མཛེས།།

འབྲུ་སྲན་སྣ་ལྔའི་མགོ་ལྕོག་དུད་པའི་མདའ་ན་ཞིང་གི་རེ་ཁཱ་ལེགས།།
ཞི་བསིལ་ཆོས་ཀྱི་འོ་མཚོ་འཁྱིལ་བའི་བར་ན་ཆོས་ཀྱི་དགོན་སྡེ་འཁྲིགས།།
སྣ་ཚོགས་དགེ་མཚན་མ་ལུས་རྫོགས་པའི་འདན་མའི་ཡུལ་ལྗོངས་ཨེ་མ་རྨད།།