ནང་བསྟན་ཆོས་ལུགས་ཀྱི་མི་ཚེའི་རིན་ཐང་ལྟ་བ།

   དེང་གི་མི་རབས་གསར་པའི་མདུན་ལམ་གྱི་ཆ་ནས་བཤད་ན། འབྱུང་འགྱུར་བསུ་བ་ནི་མི་གཅིག་གཉིས་ཤིག་གི་དོན་མ་ཡིན་པར་འགྲོ་བ་མིའི་རིགས་སམ་དེ་ལས་རྒྱ་ཆེན་པོར་བྱས་ན་སེམས་ཅན་ཐམས་ཅད་ཀྱི་རེ་སྨོན་བྱེད་ས་ཉག་གཅིག་ཡིན་ལ། དེ་དང་འཚམ་པའི་འབྱུང་འགྱུར་བརྩོན་ལེན་བྱེད་པར་མ་འབད་ན་བྱ་བ་གང་ཡང་འགྲུབ་མི་ཐུབ། འབྱུང་འགྱུར་གྱི་རྩོད་ལེན་ནི་ཤེས་རབ་དང་ཚན་རིག་ལག་ཤེས་ཀྱི་རྩོད་ལེན་ཡིན་ཞིང་། མཐར་གཏུགས་ན་ཤེས་རབ་ཅན་ནམ་ཡོན་ཏན་ཅན་བར་གྱི་རྩོད་ལེན་ཡིན་པར་གྲུབ། དེས་ན་སྤྱི་སྒེར་གང་ཐད་ནས་ཤེས་རབ་ལྡན་པའི་ཡོན་ཏན་ཅན་གྱི་མི་སྣ་གསོ་སྐྱོང་དགོས་པ་ནི་དུས་སུ་བབས་པའི་འོས་འགན་ཧ་ཅང་གལ་ཆེ་བ་ཡིན་ནོ།

   དེང་སང་སྤྱི་ཚོགས་ནང་ན་མི་མི་ཉུང་བ་ཞིག་གིས་དུད་ནག་འཐེན་པ་དང་། ཆང་འཐུང་བ། རྐུ་འཕྲོག་བྱེད་པ། མི་གསོད་པ་སོགས་ཀྱི་གནས་ཚུལ་ང་ཚོས་མཐོང་ཚེ་སེམས་མི་ཕམ་རང་འཕམ་བྱུང། དེ་དག་སེལ་ཐབས་ཅི་ཞིག་ཡོད། གལ་སྲིད་དུས་རབས་འདིའི་གཞོན་ནུ་རྣམས་ལ་མི་ཚེའི་ལྟ་བ་ཡང་དག་པ་ཞིག་མེད་ཚེ་འབད་བརྩོན་གྱི་ཁ་ཕྱོགས་ཡང་དག་པ་ཞིག་ཀྱང་ཡོང་མི་སྲིད། དེ་ལྟར་བྱས་ཚེ་འབྱུང་འགྱུར་ལ་ཡིད་ཐང་ཆད་ནས་མི་ཚེ་གང་བོ་ཆུད་ཟོས་སུ་གཏོང་བ་རང་ཤུགས་ཀྱིས་འགྱུར། དེ་དག་གི་རྩ་བ་ནི་ཐོག་མར་མི་རང་གིས་རང་ངོ་ཡང་དག་པ་ཞིག་མ་ཟིན་པ་དེའི་སྐྱོན་རེད། སངས་རྒྱས་ཆོས་ལུགས་ཀྱི་དགོངས་པ་ལྟར་ན། ཐོག་མར་ལུས་ངག་ཡིད་གསུམ་རྣལ་དུ་གནས་བཅུག་སྟེ་སེམས་ལྷོད་པར་བསྡད་ནས་རང་གིས་རང་ལ་དཔྱད་པ་ཞིག་བཏང་ན། རང་དེ་གང་འདྲ་ཞིག་ཡིན་པ་ངོ་ཟིན་ནས་ད་གཟོད་རང་རྒྱུད་ལེགས་པོ་ཞིག་ཏུ་སྦྱོང་དགོས། ཁ་ནང་དུ་ཕྱོགས་ཏེ་རང་གིས་རང་ལ་དཔྱད་པ་ཞིག་བཏང་ན་ད་གཟོད་རང་རྒྱུད་དུ་གནས་པའི་འདོད་ཆགས་ཞེ་སྡང་གཏི་མུག་ང་རྒྱལ་དང་དེ་དག་གི་རྩ་བ་མ་རིག་པ་སོགས་ཤེས་པར་འགྱུར། དེ་དག་ཕྱིན་ཅི་མ་ལོག་པར་ཤེས་ནས་སྦྱོང་ཐུབ་ཚེ་རྨོངས་པའི་དབང་དུ་སོང་བའི་རང་ཆེ་རློམ་དང་འབྱུང་འགྱུར་ལ་ཡིད་ཐང་ཆད་པའི་བསམ་པ་དེ་འབྱུང་མི་སྲིད། དེས་ན་ཐོག་མར་རང་རྒྱུད་ཀྱི་མི་དགེ་བ་ཐམས་ཅད་དོར་ནས་རང་གི་བསམ་སྤྱོད་ཀྱི་གོ་རྟོགས་ཇེ་མཐོར་གཏོང་རྒྱུ་ཤིན་ཏུ་གལ་ཆེ། བསམ་སྤྱོད་ཀྱི་གོ་རྟོགས་ལེགས་པོ་ཞིག་ཆགས་ན་དགེ་བ་ལ་བརྩོན་པའི་སྙིང་སྟོབས་འགྱུར་མེད་པ་དང་ལེགས་ཉེས་འབྱེད་པའི་ཤེས་རབ་མཆོག་ཏུ་གྱུར་པའང་རིམ་བཞིན་འབྱུང་ལ། དེ་འདྲ་བྱུང་ཚེ་མ་འོངས་པར་དཀའ་ངལ་ཅི་ལ་ཐུག་ན་མི་སྐྲག་པ་དང་། འབྱུང་འགྱུར་གྱི་བདེ་སྐྱིད་ལ་འབད་བརྩོན་བྱེད་པའི་སྤོབས་པ་ཆེར་བསྐྱེད་ཀྱིས་རླབས་ཆེན་གྱི་གཞན་དོན་སྒྲུབ་པ་དང་མི་གཤིས་མཆོག་ཏུ་གྱུར་པར་བསྒྱུར་ཐུབ་བོ། སངས་རྒྱས་ཆོས་ལུགས་ཀྱི་དགོངས་དོན་དུ་གཞན་གྱི་དོན་ལ་སེམས་བསྐྱེད་པ་ནི་ནམ་མཁའ་བཞིན་དུ་མཐའ་མེད་པ་དང་རྒྱ་མཚོ་བཞིན་དུ་གཏིང་ཟབ་པ་ཞིག་ཡིན་དགོས་པས་མི་རིགས་འདྲ་མིན་ཐམས་ཅད་ཀྱི་སེམས་མགུ་ཞིང་ཡིད་འཕྲོག་པའི་འདོད་པ་བསྐོང་ཐུབ་པར་འགྱུར། སངས་རྒྱས་ཆོས་ལུགས་ཀྱི་འཇིག་རྟེན་ལྟ་ཚུལ་ནི་རྡུལ་ཕྲན་ཕྱོགས་ཀྱི་ཆ་མེད་ནས་འཛམ་གླིང་དང་འཇིག་རྟེན། དེ་ནས་སྟོང་གསུམ་གྱི་སྟོང་ཆེན་མོ་དང་འཇིག་རྟེན་གྱི་ཁམས་ཆེན་མོའི་བར་དུ་ཁྱབ་པའི་ལྟ་བ་རྒྱ་ཆེ་བ་རེད།

དགོན་པའི་ལྡེབས་རིས། ཝང་ཏཱ་ཅིན་གྱིས་པར་བླངས།

   སངས་རྒྱས་ཆོས་ལུགས་ཀྱི་མི་ཚེའི་ལྟ་ཚུལ་ནི་མི་ལུས་ཐོབ་པ་ཤིན་ཏུ་དཀོན་པར་བསྟན་ནས་མི་ཚེ་དོན་མེད་ཆུད་ཟོས་སུ་མི་གཏོང་བར་དེ་དོན་ཡོད་དུ་བྱ་དགོས་པའི་ཀུན་སློང་དེས་སེམས་ཅན་ལ་ཕན་འདོགས་པར་བསྐུལ་བའི་མི་ཐམས་ཅད་ཀྱིས་སྤྱི་ཚོགས་ལ་ཞབས་ཕྱི་བསྒྲུབ་པ་དང་གཞན་དོན་ལྷུར་ལེན་པའི་སྙིང་སྟོབས་ཆེན་པོ་བསྐྱེད། སངས་རྒྱས་ཆོས་ལུགས་ཀྱི་ཕུགས་བསམ་གྱི་ཆ་ནས་བཤད་ན། སེམས་ཅན་ཐམས་ཅད་གནས་སྐབས་ཀྱི་བདེ་བ་དང་གཏན་གྱི་གོ་འཕང་ཐོབ་པར་བྱེད་པ་དེ་རེད། ཐ་ན་འབུ་སྲིན་ཚུན་ཆད་རང་དབང་དུ་འཚོ་བ་དང་གནས་པ། སེམས་ཅན་ཐམས་ཅད་འདྲ་མཉམ་ཡིན་པའི་ཐོབ་ཐང་ཡོད་པར་འགྱུར་ནས་སེམས་ཅན་ཐམས་ཅད་གནས་སྐབས་བདེ་སྐྱིད་སོགས་བསྐྲུན་པའི་ཐབས་ལམ་མཆོག་ཏུ་གྱུར་པའོ།། མདོར་ན་སངས་རྒྱས་ཆོས་ལུགས་ཀྱིས་འགྲོ་བ་སེམས་ཅན་ཐམས་ཅད་ཀྱི་བདེ་སྐྱིད་རང་ལ་རག་ལས་པ་ཞིག་ཡིན་པ་དང་འབྱུང་འགྱུར་མི་ཚེའི་མདུན་ལམ་ཡང་གཙོ་བོ་མི་རང་ལ་རག་ལས་པའི་གནས་ལུགས་བསྟན། སངས་རྒྱས་ཆོས་ལུགས་ཀྱི་དགོངས་པ་ལས་སངས་རྒྱས་དང་སེམས་ཅན་གྱི་ཁྱད་པར་ནི། ཚོགས་བསགས་སྒྲིབ་སྦྱོང་གི་ཚད་དུ་སླེབས་ན་དུས་ཀྱི་སྔ་ཕྱི་ཙམ་མ་གཏོགས་སེམས་ཅན་ཐམས་ཅད་སངས་རྒྱས་པར་འགྱུར། སེམས་ཅན་ཐམས་ཅད་སངས་རྒྱས་པར་འགྱུར་བའི་རྒྱུ་ནི་སེམས་ཅན་ལ་དགེ་བ་སྒྲུབ་པ་དང་རང་གི་སྒྲིབ་པ་སྦྱོང་མིན་ལ་ཐུག་ཡོད། དེས་ན་འབྱུང་འགྱུར་གྱི་ཆ་ནས་བཤད་ན་སེམས་ཅན་ནི་སངས་རྒྱས་ཡིན་ལ། འདས་པའི་ཆ་ནས་བལྟས་ན་སངས་རྒྱས་ནི་སེམས་ཅན་ཡིན་པར་བཞེད།

   དེང་སང་འཛམ་གླིང་དུ་སྤྱི་ཚོགས་ཀྱི་ངོ་བོ་མི་འདྲ་བ་དང་། ལམ་ལུགས་མི་འདྲ་བ། དད་པ་བྱེད་ཡུལ་གྱི་ཆོས་ལུགས་མི་འདྲ་བ། གོམས་སྲོལ་མི་འདྲ་བ་སོགས་ཀྱི་རྒྱལ་ཁབ་དང་མི་རིགས་ཡོད་ནའང་སེམས་ཅན་ཐམས་ཅད་ཀྱི་དོན་བསྒྲུབས་ནས་སྒྲིབ་པ་སྤངས་ཐུབ་ན་མ་འོངས་པར་སངས་རྒྱས་པར་འགྱུར་བའི་ཡོན་ཏན་སེམས་ཅན་ཀུན་གྱི་རྒྱུད་དུ་ཡོད། སངས་རྒྱས་པར་འགྱུར་བའི་ཡོན་ཏན་གྱིས་སེམས་ཅན་ཀུན་ལ་ཁྱབ་པ་ནི་འདྲ་མཉམ་ཡིན་ནོ། དེས་ན་འགྲོ་བ་སེམས་ཅན་ཐམས་ཅད་ཀྱི་རྒྱུད་དེ་སེམས་བཟང་པོ་ཞིག་གིས་ཀུན་ནས་བསླངས་ཏེ་སྙིང་རྗེ་ཆེན་པོས་གཞན་དོན་སྒྲུབ་པ་དང། མཁའ་མཉམ་གྱི་འགྲོ་བ་སེམས་ཅན་ཐམས་ཅད་ཀུན་ལ་ཁྱབ་པར་བྱ་བ་ནི་སེམས་ཅན་ཐམས་ཅད་སྐྱོབ་པའི་དམིགས་པ་ཆེན་པོ་དེ་ནི་སངས་རྒྱས་ཆོས་ལུགས་ཀྱི་ཁྱད་ཆོས་ཤིག་ཡིན། སྤྱིར་བཏང་འགྲོ་བ་མིའི་རིགས་ཀྱི་མི་ཚེ་གང་གི་བདེ་སྐྱིད་ཀྱི་དོན་དུ་བརྩོན་འགྲུས་བྱེད་པ་ལ་རང་དོན་དང་གཞན་དོན་གཉིས་མ་གཏོགས་མེད་ལ། སངས་རྒྱས་ཆོས་ལུགས་ཀྱིས་གཞན་དོན་གཙོ་བོར་བསྟན་ནས་རང་དོན་ཤུགས་ཀྱིས་གྲུབ་པའི་ལྟ་བ་མཆོག་ཏུ་གྱུར་པ་ནི་སངས་རྒྱས་ཆོས་ལུགས་ཀྱི་ཁྱད་ཆོས་སོ། བདེ་བ་གཞན་ལ་སྦྱིན་པ་དང་མི་བདེ་རང་གིས་དང་དུ་ལྷུར་ལེན་པའི་མཛད་པ་ནི་སངས་རྒྱས་ཆོས་ལུགས་ཀྱི་མི་ཚེའི་ལྟ་བའོ། དེ་ལྟར་ན་འགྲོ་བ་སེམས་ཅན་ཐམས་ཅད་ཀྱི་འབད་བརྩོན་གྱི་ཁ་ཕྱོགས་ནི་དང་པོ་མི་དགེ་སྡིག་སྦྱོང་དང་དེ་ནས་གནས་སྐབས་ཀྱི་བདེ་བ་སྒྲུབ་པ་དང་། ཡང་ན་མཐར་མ་ནམ་མཁའ་དང་མཉམ་པའི་སེམས་ཅན་ཐམས་ཅད་གནས་སྐབས་ཀྱི་ཐར་པ་དང་གཏན་གྱི་བདེ་བ་སྒྲུབ་པ་དམིགས་ཡུལ་གཅིག་ཏུ་ངེས་སོ།

   སངས་རྒྱས་ཤཱཀྱ་ཐུབ་པས་སེམས་ཅན་ཐམས་ཅད་དང་ཁྱད་པར་ང་ཚོ་འགྲོ་བ་མིའི་རིགས་ལ་འཕྲལ་ཕུགས་ཀྱི་ཐབས་ལམ་ཡང་དག་ཅིག་བསྟན་ནའང་གཙོ་བོ་སེམས་ཅན་རང་རང་གིས་ཇི་ལྟར་སྒྲུབ་པ་ལ་རག་ལས་ཕྱིར་ང་ཚོ་ཚང་མས་འབྱུང་འགྱུར་གྱི་བདེ་སྐྱིད་དང་། མཐུན་སྒྲིལ། དར་རྒྱས་སོགས་ཀྱི་ཕྱོགས་ལ་འབད་པ་ལྷོད་མེད་བྱེད་དགོས་པ་ནི་དུས་རབས་ཀྱི་འཕེལ་འགྱུར་དང་མཐུན་པའི་སངས་རྒྱས་ཆོས་ལུགས་ཀྱི་མི་ཚེའི་ལྟ་བ་ཡིན། ཆོས་ལུགས་གང་འདྲ་ཞིག་ཡིན་རུང་ད་ལྟ་དང་འབྱུང་འགྱུར་དུ་འགྲོ་བ་མིའི་རིགས་ཡོངས་ཀྱི་བདེ་སྐྱིད་ལ་ཕན་ཐོགས་ན་དེ་དག་ཕྱོགས་རིས་མེད་པར་ནུས་པ་ཅི་ཡོད་ཀྱིས་བསྒྲུབ་དགོས་པ་ནི་ང་ཚོ་མི་རབས་འདིའི་བདེ་སྐྱིད་དང་སངས་རྒྱས་ཆོས་ལུགས་ལྟར་ན་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཡིན་ནོ། སྤྱི་ཚོགས་དང་མི་དམངས་ལ་ཞབས་ཕྱི་བཟང་པོ་སྒྲུབ་པའི་མི་དེ་རིགས་ནི་གཟུགས་སྟོབས་ཆེ་ཆུང་དང་ཤ་མདོག་དཀར་ནག ཕོ་མོ་སོགས་ཀྱི་ཁྱད་པར་མེད་པར་གང་ཡིན་ནའང་དེ་དག་ལ་སེམས་ཅན་ཐམས་ཅད་ཀྱིས་བསྟོད་བསྔགས་དང་ཡིད་ཆེས་བྱེད་པ་རེད། གལ་སྲིད་དེ་ལྟར་མ་ཡིན་པར་སྤྱི་ཚོགས་དང་མི་དམངས་ལ་གནོད་པ་དང་འཚེ་བར་འགྱུར་བའི་བྱ་བ་ངན་པ་སྒྲུབ་པའི་མི་ཡིན་ན། དེ་རིགས་ལ་སེམས་ཅན་ཐམས་ཅད་ཀྱིས་སྨད་པ་དང་སྡིགས་མོ་བྱེད་ངེས་རེད། རྒྱ་ཆེ་བའི་མི་དམངས་ནི་རླབས་ཆེ་བ་ཡིན་སྟབས་མི་དམངས་ལ་ཕན་འདོགས་པའི་མི་གང་ཡིན་ཡང་སྤྱི་ཚོགས་ཡོངས་ཀྱིས་ཁས་ལེན་ཞིང་བརྩི་བཀུར་བྱེད་པའོ། ། གང་ལྟར་མིའི་རིགས་ལ་ཕན་ཐོགས་ཡོད་ན་ཕྱི་ནང་གི་རིག་གནས་གང་ཡིན་ཡང་དང་དུ་ལེན་ཆོག་པ་དང་། གལ་ཏེ་སེམས་ཅན་དང་མིའི་རིགས་ལ་གནོད་པ་དང་འཚེ་བར་འགྱུར་བ་ཡིན་ན་རིག་གནས་གང་ཞིག་ཡིན་རུང་རྩ་བ་ནས་དོར་ཏེ་སྤང་དགོས་སོ།།