བོད་ཀྱི་བཟོ་སྐྲུན་ནི་ལོ་རྒྱུས་ཀྱི་རྒྱུན་རིང་ཞིང་། ཐུན་མིན་སྒྱུ་རྩལ་གྱི་ཁྱད་ཆོས་འབུར་དུ་ཐོན་ཡོད། བོད་ཁུལ་གྱི་ས་གནས་སོ་སོ་ལ་བཟོ་སྐྲུན་སྒྱུ་རྩལ་གྱི་ཁྱད་ཆོས་མི་འདྲ་བ་མང་པོ་ལྡན། འོ་ན་ཁྱེད་ཀྱིས་རྒྱལ་རོང་ཡུལ་དུ་ལོ་བདུན་བརྒྱའི་སྔོན་ཏེ་ཡོན་རྒྱལ་རབས་དུས་སྐབས་ཀྱི་ལྷ་ཁང་ཞིག་གི་བཟོ་སྐྲུན་གྱི་རྣམ་པ་མཐོང་འདོད་ཡོད་དམ།
ཉེ་སྔོན། རྒྱལ་རོང་ཕྱོགས་ཀྱི་རོང་བྲག་རྫོང་གི་སྤྲོ་སྣང་ཡུལ་ནས་གནའ་བོའི་ལྷ་ཁང་ཞིག་གསར་དུ་རྙེད་ཡོད། ཆེད་མཁས་པས་དེ་ནི་ཡོན་རྒྱལ་རབས་དུས་སྐབས་ཀྱི་ནང་ཆོས་ལྷ་ཁང་ཞིག་ཡིན་པར་ངོས་འཛིན་བྱས། ལྷ་ཁང་འདི་ཉིད་དབྱིབས་གྲུ་བཞི་ཡིན་ལ་ཐོག་རྩེག་གཉིས་ཀྱིས་གྲུབ་འདུག རྩེག་དང་པོ་རྡོ་རྩིག་ཡིན་ལ་དབྱིབས་གྲུ་བཞི་རུ་ཆགས་ཤིང་རིང་ཚད་ལ་སྤྱི་ཁྲེ་7དང་མཐོ་ཚད་ལ་སྤྱི་ཁྲེ་10ཙམ་འདུག འོག་སྦོམ་ལ་སྟེང་ཅུང་ཕྲ་བའི་སྲོལ་རྒྱུན་གནའ་མཁར་གྱི་དབྱིབས་སུ་གྲུབ། དེ་ཡི་སྒོ་ཆེན་ནུབ་ཏུ་བསྟན་འདུག རྩེག་གཉིས་པ་ཆ་ཚང་ཤིང་གི་སྒྲིག་གཞིའི་བཟོ་སྐྲུན་ལས་གྲུབ་ཅིང་ཕྱོགས་བཞིར་ཤིང་གི་ཀ་བ་དྲུག་དང་། མཐའ་འཁོར་བར་ཁྱམས་སུ་གྲུབ་ཅིང་དད་ལྡན་ཚོས་སྐོར་བའང་བྱེད་ཆོག ནང་དུ་མཆོད་ཁང་ཡོད་ལ་ཕྱོགས་བཞིའི་ངོས་སུ་ལྡེབས་རིས་བྲིས་འདུག འོན་ཀྱང་བདག་གཉེར་ཡག་པོ་མ་བྱས་པའི་རྐྱེན་གྱིས་སྔོན་ནས་ཞིག་རལ་དུ་སོང་སྟེ་ཁང་པའི་སྟེང་ཐོག་རྡིབ་པས་ལྡེབས་རིས་སྐུ་བརྙན་ལ་ཉམས་རྒུད་ཆེན་པོ་ཐེབས་ཏེ་གསལ་པོར་མཐོང་དཀའ། ལྷ་ཁང་གི་ཟུར་བཞིའི་ཀ་བ་བཞི་པོ་ནི་འབྲུག་རིས་འབུར་རྐོ་བྱས་པའི་ཤིང་གི་ཀ་བ་ཡིན་ལ་འབྲུག་མགོ་ཕྱི་རུ་བརྐྱངས་ཡོད་པས་ཧ་ཅང་གསོན་ཉམས་ལྡན།
འདུ་ཁང་འདིའི་ཐུན་མིན་གྱི་ཁྱད་ཆོས་གཙོ་བོ་ནི་རྩེག་དང་པོ་དང་གཉིས་པའི་བར་གྱི་ཤིང་གི་ཀ་གཞུའི་གྲུབ་ཚུལ་དེ་རེད། ཀ་གཞུ་དེའི་བཟོ་སྐྲུན་ལ་རྒྱ་ནག་ལུགས་ཀྱི་བཟོ་རྩལ་སྒྱུ་རྩལ་སྡུད་ལེན་བྱས་ཡོད་ཅིང་དེའི་སྟེང་དུ་བོད་རང་གི་གསར་སྐྲུན་གྱི་གྲུབ་ཆ་བསྣན་ཡོད་དེ། གཞུ་ཆུང་འོག་གི་ཀ་རྒྱན་དེ་ཤིང་བརྐོས་སྤྲིན་རིས་མིན་ལ་མིག་ཟུང་བགྲད་ཅིང་གསོན་ཉམས་ལྡན་པའི་སྲོག་ཆགས་ཀྱི་ཤིང་བརྐོས་རི་མོ་རེད། གདུང་ཐུང་གི་འོག་རྒྱན་ནི་རྡོ་རྗེའི་བརྐོས་རིས་ཀྱིས་བརྒྱན་འདུག་ལ་དེའི་འོག་ཏུ་དཔྱིད་འགོའི་མེ་ཏོག་གི་བརྐོས་རིས་སྐོར་རིམ་གཉིས་ཀྱིས་བརྒྱན་འདུག ཟུར་གདོང་གི་ཀ་གཞུ་རྡོ་རྗེ་རྒྱ་གྲམ་གྱི་དབྱིབས་དང་ཁྱམས་ནི་རྒྱ་ནག་གི་ཤིང་ཁྲའི་བཟོ་བཀོད་ལྟར་བྱས་འདུག
དགུང་གྲངས་དོན་གཉིས་ལ་སླེབས་པའི་རང་རྒྱལ་གྱི་ནང་ཆོས་གནའ་རྫས་རྟོག་ཞིབ་ཆེད་མཁས་པ་ཝུན་ཡུས་ཁྲེང་གིས་རོང་བྲག་རྫོང་སྤྲོ་སྣང་ཡུལ་གྱི་ལྷ་ཁང་གི་བཟོ་སྐྲུན་ལ་ཞིབ་མོར་གཟིགས་རྗེས་གསུང་རྒྱུར། ལྷ་ཁང་འདིའི་ཕྱོགས་གང་ཐད་ཀྱི་ཁྱད་ཆོས་ལ་བལྟས་ནའང་ཡོན་རྒྱལ་རབས་དུས་སྐབས་ཀྱི་བཟོ་སྐྲུན་ཡིན་པ་དང་། འདི་ལྟ་བུའི་རྡོ་མཁར་དང་ཤིང་གི་སྒྲིག་གཞིའི་བཟོ་སྐྲུན་ཟུང་འབྲེལ་གྱི་འདུ་ཁང་ནི་བོད་ཁུལ་ན་ཧ་ཅང་དཀོན། དེའི་བཟོ་སྐྲུན་གྱིས་རྒྱལ་རོང་རྡོ་མཁར་གྱི་སྲོལ་རྒྱུན་བཟོ་བཀོད་རྒྱུན་འཛིན་བྱས་ལ། ད་དུང་རྒྱ་ནག་ལུགས་ཀྱི་ཤིང་གི་སྒྲིག་གཞིའི་བཟོ་སྐྲུན་ཁྱད་ཆོས་སྡུད་ལེན་བྱས་པས་ཐུན་མིན་གྱི་ཁྱད་ཆོས་ཆེན་པོ་འདུག འདི་ནི་སུང་རྒྱལ་རབས་ཀྱི་ལིས་ཅེ་ཡི་《བཟོ་སྐྲུན་རྣམ་གཞག》གི་འཕེལ་རྒྱས་ཤིག་ཏུ་འདོད། རང་རྒྱལ་གྱི་བཟོ་སྐྲུན་ལོ་རྒྱུས་མཁས་ཆེན། དཔེར་ན་སྐུ་ཞབས་ལིའང་སི་ཁྲེང་དང་ལིའུ་ཏུན་ཀྲེན་གྱིས་《ཀྲུང་གོའི་གནའ་རབས་བཟོ་སྐྲུན་ལོ་རྒྱུས》རྩོམ་འབྲི་གནང་དུས་ཀྱང་འདི་འདྲའི་བཟོ་སྐྲུན་གྱི་དཔེ་དངོས་མ་རྙེད་པས། ཡོན་རྒྱལ་རབས་སྐབས་ཀྱི་བོད་ཁུལ་གྱི་ནང་ཆོས་འདུ་ཁང་བཟོ་སྐྲུན་གྱི་སྐོར་དེབ་འདིའི་ནང་བར་སྟོང་དུ་ལུས་ཡོད། ད་ཐེངས་ཀྱི་གསར་དུ་རྙེད་པའི་གནའ་བོའི་བཟོ་སྐྲུན་འདིས་སྟོང་ཆ་དེ་ཁ་བསྐང་བས་དོན་སྙིང་གལ་ཆེན་ལྡན།
དགེ་རྒན་ཆེན་མོ་ཝུན་ཡུས་ཁྲེང་གིས་ལྷ་ཁང་འདིའི་ད་ལྟའི་ཉེན་ཁའི་གནས་བབ་ལ་གཞིགས་ནས། མྱུར་དུ་གནས་སྐབས་ཀྱི་སྲུང་སྐྱོང་བྱེད་ཐབས་བཀོལ་དགོས་པ་དང་། ད་དུང་འབྲེལ་ཡོད་སྡེ་ཁག་གིས་གནའ་བོའི་བཟོ་སྐྲུན་འདི་ཉིད་རྒྱལ་ཁབ་རིམ་པའི་རིག་དངོས་སྲུང་སྐྱོང་སྡེ་ཚན་གྱི་གྲས་སུ་འཇོག་དགོས་པའི་དགོངས་འཆར་བཏོན། །
