སྤྲུལ་པའི་ལྷ་བཟོ་ཐང་བླ་ཚེ་དབང་།

       

         ཐང་བླ་ཚེ་དབང་མཆོག་ནི་（1902—1989）ཁམས་སྡེ་དགེར་སྐུ་འཁྲུངས། ཁོང་སྐུ་ན་གཞོན་དུས་ནས་བོད་ཀྱི་རིག་གནས་སྤྱི་དང་ཁྱད་པར་བཟོའི་ཕྱོགས་ལ་བློ་གྲོས་ཤིན་ཏུ་ཡངས་པས། སྐབས་དེའི་ཡིག་བྲིས་མཁས་པ་ནོར་བུ་དོན་འགྲུབ་མདུན་ནས་གཟབ་གཤར་འཁྱུག་གསུམ་ལན་ཝར་དང་བཅས་པའི་ཡིག་བྲིས་དང་། ལྷ་བཟོ་མཁས་པ་ཝ་ཤུལ་བློ་གྲོས་དང་ཀར་འབྲུག་སོགས་ལས་སྔ་ཕྱི་རི་མོ་སྐུ་གཟུགས་ཀྱི་ཐིག་རྩ་བཟོ་རྒྱུན་མན་ངག་དང་བཅས་སོ་སོ་མ་འདྲེས་པར་སྦྱངས་ནས་ཡིག་བྲིས་དང་རི་མོ་མཁས་པ་ཀུན་གྱིས་བསྔགས། སི་ཏུ་ཆོས་ཀྱི་རྒྱལ་མཚན་གྱིས་བཀའ་བསྐུལ་ལྟར། ཀ༔ཐོག་དགོན་དུ་བཀའ་འདུས་ཆོས་ཀྱི་རྒྱ་མཚོའི་དཀྱིལ་ཐང་ཆེན་མོ་དང་དཔལ་སྤུངས་སི་ཏུའི་དགོངས་བཞེད་ལྟར་བཀའ་བརྒྱུད་གསེར་ཕྲེང་ཕུར་ཐང་གསུམ་སོགས་ཐང་ག་དང་ལྡེབས་རིས་མང་པོའི་དབུ་མཛད་ཀྱི་འགན་བཞེས། དབུ་ལྡེབ་དབུ་ལྷ་དང་བཅས་པའི་སྡེ་བྲིས་ཀྱི་འདོན་ཆོག་སྤུས་ལེགས་མང་པོ་བྲིས། མཁན་མཁྱེན་རབ་སོགས་ལས་དབུ་མ་གཙོ་བོར་གྱུར་པའི་ཐུན་མོང་རིག་གནས་མཐའ་དག་ལ་སྦྱོང་བརྩོན་དང་ཀར་ལུགས་སྒྲུབ་པ་ཁག་གི་ཆོ་ག་ཕྱག་ལེན་དང་གདངས་རྟ་དབྱངས་ཀུན་ལ་བྱང་པར་བྱས་ཐོག་ཁམས་དཔལ་སྤུངས་དགོན་གྱི་དབུ་མཛད་ཀྱི་འགན་བཞེས། སྐབས་དེར་སྙན་ངག་གི་དཔེ་བརྗོད་མང་པོ་བརྩམས་པས་སྙན་པའི་ཚད་དུ་གྱུར། ཀརྨ་སྐུ་ཕྲེང་བཅུ་དྲུག་པའི་དྲུང་ཡིག་གི་འགན་ལོ་མང་བཞེས། མཁས་ཆེན་ངག་གི་དབང་པོ་དང་། རྒྱལ་དབང་ཀརྨ་པ་རང་བྱུང་རིག་པའི་རྡོ་རྗེ་སོགས་རིས་མེད་ཀྱི་བླ་མ་བཅུ་ཕྲག་བརྒལ་བར་བསྟེན་མྱངས།

        ཏང་གི་ཡང་དག་པའི་མི་རིགས་ཆོས་ལུགས་ཀྱི་སྲིད་ཇུས་ལག་ཏུ་བསྟར་རྗེས། ཁོང་དགུང་ལོ་བརྒྱད་ཅུར་ཟིན་ཡང་ལྷག་བསམ་ཐུགས་བཞེས་ཆེན་པོས་ཁམས་དཔལ་སྤུངས་དགོན་གྱི་བསྟན་པ་བསྐྱར་དུ་གསོ་བའི་གཙོ་འགན་བཞེས། ཐང་ག་དང་ལྡེབས་རིས། པར་རྩ་རི་མོ། སྐུ་གཟུགས་ཐིག་རྩ། ཙག་ལིའི་སོགས་རི་མོ་ཁུངས་ཐུབ་དཔེར་འོས་མང་པོ་བྲིས། སི་ཁྲོན་ཞིང་ཆེན་བོད་ཡིག་སློབ་གྲྭའི་སློབ་མ་གཙོ་བོར་གྱུར་པའི་མདོ་དབུས་ཁམས་གསུམ་གྱི་བཟོ་དང་གསོ་བ། ནང་དོན་རིག་པ་བཅས་ལ་མཆོག་ཏུ་མཁས་པའི་སློབ་མ་མང་བོ་བསྐྱངས་ཏེ། ད་ལྟར་ཁོང་གི་ཞལ་སློབ་དང་ཡང་སློབ་བཅས་སྟོང་དུ་ཉེ་བར་འཕེལ་ཏེ་གངས་ཅན་བོད་ཀྱི་རིག་གནས་མི་ཉམས་གོང་འཕེལ་གྱི་འགན་ཁུར་བཞིན་པ་འདི་དག་ལགས་སོ། །