2001ལོའི་སྔོན་དུ་རྒྱལ་ཡོངས་སུ་གྲངས་ཉུང་མི་རིགས་ཀྱི་བུ་མོའི་ཚན་སྡེབ་གཅིག་ཀྱང་མེད། གོ་སྐབས་འདི་དང་བསྟུན་ཏེ། གཟི་རྩའི་འཆར་སྣང་མཁུར་ཚོས་དམར་པོ་སྒྱུ་རྩལ་ཚོགས་པས་བོད་མི་རིགས་ཀྱི་ཁྱད་ཆོས་གཙོ་བོར་ལྡན་པའི་བུ་མོའི་ཚན་སྡེབ་ཅིག་འཛུགས་རྒྱུ་ཇུས་འགོད་བྱས། གླུ་པ་གཡུང་དྲུང་རྒྱལ་གྱིས་བླངས་པའི་གླུ་དབྱངས་《མཐོ་སྒང་བུ་མོའི་མཁུར་ཚོས》ཞེས་པ་ལས་འཕྲོས་ཏེ་ཚན་སྡེབ་འདིའི་མིང་ལ་མཐོ་སྒང་མཁུར་ཚོས་དམར་པོའི་ཚན་སྡེབ་ཅེས་མིང་དུ་བཏགས། བོད་ཁམས་ས་ཕྱོགས་ཀུན་ནས་མིང་ཐོ་བཀོད་པའི་བུ་མོ་སྟོང་ཕྲག་ལྷག་ལས་ཆ་རྐྱེན་འཛོམས་ཤིང་ཕྱོགས་ཐམས་ཅད་ནས་འབུར་དུ་ཐོན་པའི་བུ་མོ་གསུམ་བདམས་ཏེ། ལས་ཁུངས་ཀྱིས་མ་དངུལ་བཏང་ནས་ཆེད་མཁས་མི་སྣ་གདན་ཞུ་བྱས་ཏེ་ལོ་ངོ་གཅིག་ལྷག་རིང་ལ་སྦྱོང་བརྡར་བྱས།
2004ལོར་མཐོ་སྒང་གི་མཁུར་ཚོས་དམར་པོའི་ཚན་སྡེབ་ཀྱི་ཐོག་མའི་ཆེད་བསྒྲིགས་གླུ་གཞས་《ལང་ཚོའི་རྫི་གླུ།》ཞེས་པ་འགྲེམ་སྤེལ་བྱས། དེ་རྗེས་ཐེངས་མང་པོར་ཀྲུང་དབྱང་བརྙན་འཕྲིན་ཁང་གི་གཅིག་སེམས་གཅིག་སྦྲེལ་སྒྱུ་རྩལ་ཚོགས་པ་དང་ཁ་བྱང་གཅིག་པའི་གླུ་དབྱངས་ཀྱི་ལེ་ཚན་དང་འགྲོགས་ཏེ་ཤང་ཀང་དང་ཨོའོ་མིན་སོགས་རྒྱལ་ཡོངས་ཀྱི་ས་ཆ་སོ་སོར་འཁྲབ་སྟོན་དུ་སོང་བ་མ་ཟད། ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་དང་ཨོ་མིན་ཡ་གླིང་ཤར་མའི་ལུས་རྩལ་འགྲན་ཚོགས་ཀྱི་མཇུག་སྒྲིལ་མཛད་སྒོ། བོད་རང་སྐྱོང་ལྗོངས་བཙུགས་ནས་ལོ་འཁོར་བཞི་བཅུ་ལོན་པའི་རིག་རྩལ་དགོང་ཚོགས། ཏ་ལེན་རྒྱལ་སྤྱིའི་རྒྱན་གོས་དུས་ཆེན། ཁྲེན་ཏུའུ་ཏུའུ་ཅང་ཡན་རྒྱལ་སྤྱིའི་ཡུལ་སྐོར་དུས་ཆེན་སོགས་རྒྱལ་ནང་གི་འཁྲབ་སྟོན་བྱ་འགུལ་ཆེ་གྲས་མང་པོར་ཞུགས། སྔ་གཞུག་ཏུ་གསར་འགྱུར་སྡེ་ཚན་བཅུ་ཕྲག་གིས་གནས་ཚུལ་སྒྲོག་གཏོང་བྱས་པས་རྒྱལ་ཡོངས་སུ་སྐད་གྲགས་ཆེས་ཆེ་བའི་མཐོ་སྒང་གི་བུ་མོའི་ཚན་སྡེབ་ཏུ་གྱུར། །