བཙན་རྫོང་རྣོན་པོ།

ལོ་རྒན་ཁུར་གྱིས་ལྗིད་པར་འགྱིང་བའི་བཙན་རྫོང་སྟེ།།

ལས་ཆུའི་རླབས་སྒྲ་རྣ་བར་གོམས་པའི་མཁར་རྙིང་སྟེ།།
དལ་གྱིས་གཉིད་ཅིང་ལྷོད་ཀྱིས་ནུར་བའི་རི་གྲོང་གང་།།
གདོད་མར་འདོགས་པའི་འཛེར་བུ་ཡིན་ནམ་སུ་ལ་གསལ།།
རྡོ་བྲག་ཕུང་པོ་ཁྲབ་ཏུ་གྱོན་པའི་མེས་པོ་སྟེ།།
འཐབ་རྩོད་མེ་ལྕེ་བྲང་ལ་སྒྲོན་པའི་གནའ་མྱི་སྟེ།།
སོ་ཁང་གན་ནས་མེ་མདས་བསྒུགས་པ་ག་ཙམ་ཞིག།
བྲག་གི་ལོ་རྒྱུས་རླུང་གིས་བསེད་པ་ཅི་ཙམ་ཞིག །
རྐང་ལམ་དོག་པོར་གོམ་པས་གཅོད་པའི་ཅོ་ཐོ་ཅན།།
ལོ་ཟླའི་གཉེར་མ་གདོང་ལ་བརྩེགས་པའི་མྱོང་བ་ཅན།།
གཞིག་དང་གྲོས་ཀྱིས་རྨང་ནས་བསླངས་པའི་ཀ་ཆེན་གང་།།
ཁུར་དང་ཁེན་གྱི་གཏམ་རྒྱུད་གང་བྲིས་སུ་ཡིས་རྟོགས།།
མི་ཉག་ཨ་བཟའི་སོར་གདུབ་སྒྲུག་པར་ག་ཚོད་ཀྱིས།།
མེ་ཏོག་ལོ་མ་འཛུམ་གྱིས་གཤིབ་པ་དེ་ཚོད་ཀྱིས།།
བུ་ཕོའི་སྒལ་བའི་ཁེན་ས་བརྟན་པོར་བརྩེ་བས་འགྲེང་།།
བཙན་པོའི་རྒྱུད་ལ་རྒྱབ་རི་རྣོན་པོར་ཀེར་གྱིས་ལངས།།
གནམ་བདག་སེའུ་རྒྱལ་བླ་སྲོག་འཁོར་མིན་ཅི་ཆ་ཡང་།།
ལྡོང་རུས་དཀར་པོའི་བྱེ་མར་སྤུངས་པ་རྟོགས་ཁག་ཀྱང་།།
མི་རྒན་གང་གི་ཁྲག་རྔུལ་རྦ་རླབས་འཕྱོ་བའི་ཀློང་།།
རྡོ་རྒན་ཐམ་གས་ས་ལ་མནན་པ་སུ་ཡི་ཆེད།།
རླུང་གི་རལ་གྲི་ཁད་ཀྱིས་གཅོག་པ་དཔའ་བའི་རྟགས།།
འཇིགས་པའི་ཞགས་ཐག་ཧེབ་ཀྱིས་བསྡུ་བ་མཛངས་པའི་ཚུལ།།
དེར་སྐྱེས་སྡེ་ལ་མཁར་གྱིས་བཀན་པ་སྒམ་པའི་ཚུགས།།
སྔར་ནས་བཞེངས་པ་ས་རྒྱུས་རིང་མོའི་བདེན་པའི་ཕུགས།།
ལུང་བ་ཀྱོག་པོར་གནམ་དུ་རེག་པའི་རི་རྩེ་ན།།
མེལ་ཚེ་པ་ཡིས་མིག་གིས་ཅེར་བའི་རྒྱང་ཕྱོགས་ན།།
གནམ་ས་འཐབ་པའི་ལོ་རྒྱུས་ལྟ་གོན་འཁྲིགས་མྱོང་བ།།
ལས་ཆུ་སྔོན་མོས་དྲན་བཞིན་ཡོད་དམ་སུ་ལ་གསལ།།
གཤོང་ལ་ལྷུང་བའི་གཡུལ་ས་ཞིག་ནས་རྡོ་མདུང་སྟེ། །
རོང་དུ་ཆགས་པའི་འགག་མདོ་དེ་ནས་ལོ་རྒྱུས་ཤིག །

ཚེ་སྲོག་རྣམ་ཤེས་ག་ཙམ་འཁོར་བའི་བཙན་རྫོང་ག

སུ་དང་ཅི་ལ་དཔང་པོ་སྡོད་པའི་གྲ་སྒྲིག་ཡིན།།