བྱང་ལུགས།
རབ་བྱུང་བདུན་པའི་ཤིང་ཕག་ལོ་སྟེ་སྤྱི་ལོ་1395ལོར་སྟོད་ངམ་རིང་དུ་འཁྲུངས་པའི་ཆོས་རྒྱལ་རྣམ་རྒྱལ་གྲགས་བཟང་ཞེས་པ་དེས། བོ་དོང་པཎ་ཆེན་ཕྱོགས་ལས་རྣམ་རྒྱལ་དང་། པཎ་ཆེན་ནགས་ཀྱི་རིན་ཆེན་སོགས་ལ་བསྟེན་ནས་མདོ་སྔགས་ཤེས་བྱའི་གནས་སྤྱི་དང་། ཁྱད་པར་དུ་གསོ་བ་རིག་པའི་གཞུང་ལ་སྦྱངས་པ་དཔྱིས་ཕྱིན་པར་མཛད་པ་མ་ཟད། 《ཡན་ལག་བརྒྱད་པའི་སྙིང་བསྡུས་ཡིད་བཞིན་ནོར་བུ།》སོགས་མཛད་དེ་འཆད་རྩོད་རྩོམ་གསུམ་གྱི་སྒོ་ནས་གསོ་རིག་གཞུང་ལུགས་ཀྱི་སྒོ་འཕར་ཡངས་པོར་ཕྱེ་བ་ནས་བཟུང་བྱང་ལུགས་ཞེས་པའི་སྲོལ་ཆེན་པོ་དེ་བྱུང་། ཉིད་ལ་བུ་སློབ་མང་དུ་བྱུང་བ་དང་ཁྱད་པར་གསོ་དཔྱད་དངོས་སློབ་མཆོག་གྱུར་དང་བླ་སྨན་གཉིས་ཀར་གྲགས་པ་མི་ཡི་ཉི་མ་མཐོང་བ་དོན་ལྡན་བྱ་བ་རབ་བྱུང་བདུན་པར་བྱུང་བ་དང་། དུས་རབས་བཅོ་ལྔ་པར་བྱུང་བའི་ལྷ་བཙུན་བཀྲ་ཤིས་དཔལ་བཟང་། སྤྱི་ལོ་1453ལོར་འཁྲུངས་པ་ལྷུན་སྡིངས་ལེགས་གྲུབ་དཔལ་བ། དེའི་སྲས་ཤེས་རབ་དཔལ་ལྡན། དེའི་སྲས་ལྷུན་སྡིངས་དགེ་མ། དེའི་སྲས་བསྟན་པ་དར་རྒྱས། དེའི་སྲས་བསོད་ནམས་ཆོས་འཕེལ། དེའི་སྲས་ལྷུན་སྡིངས་བདུད་རྩི་འགྱུར་མེད། དེའི་སྲས་ལྷུན་སྡིངས་རྣམ་རྒྱལ་རྡོ་རྗེ་ནས་གོང་ས་ལྔ་པ་ཆེན་པོའི་བར་དུ་བརྒྱུད་པ་དང་། དེ་ནས་རིམ་བཞིན་དེང་གི་བར་དུ་བཀའ་གཏེར་གཉིས་ཀའི་བརྒྱུད་པ་ཟམ་མ་ཆད་པར་བྱོན་ནས་གསོ་རིག་སྤྱི་དང་ཁྱད་པར་བྱང་པའི་རིང་ལུགས་དར་ཞིང་རྒྱས་པར་མཛད་དོ། །
ཟུར་ལུགས་སམ་སྨད་ལུགས།
བོད་རབ་བྱུང་བདུན་པའི་ས་ལུགས་ཏེ་སྤྱི་ལོ་1439ལོར་འཁྲུངས་པའི་རྗེ་མཉམ་ཉིད་རྡོ་རྗེ་ཞུ་བ་དེས་ཡབ་ཕུན་ཚོགས་བཟང་པོ་དང་། ཁྲུས་ཁང་ལོ་ཙཱ་བ་ཤ་ར་རབ་འབྱམས་པ། སྨན་སྟོན་དབང་ཕྱུག་བཟང་པོ་སོགས་ལས་ཐུན་མོང་དང་ཐུན་མིན་གྱི་རིག་གནས་སྤྱི་དང་། ཁྱད་པར་དུ་བོད་ལུགས་གསོ་རིག་ལ་སྦྱངས་པ་མཐར་ཕྱིན་པ་མཛད་ནས་མཁྱེན་དཔྱོད་ཀྱི་རྩལ་རྫོགས་ནས་དཔལ་ལྡན་རྒྱུད་བཞིའི་དགོངས་དོན་ཅི་བཞིན་པ་བསྲེག་བཅད་བརྡར་བའི་གསེར་བཞིན་ཚིག་དོན་གྱི་ཆ་ལ་དག་བཅོས་མཛད་པ་དང་། 《མན་ངག་བྱེ་བ་རིང་བསྲེལ།》 《འགྲེལ་ཆེན་པོད་ཤེལ་ཕྲ་མོ།》 《དྲི་ཚིག་དངུལ་དཀར་མེ་ལོང་།》 《ལེགས་བཤད་ཉི་མའི་འོད་ཟེར།》 《ཕྱོགས་ཀྱི་སྨན་པ་རྣམས་ལ་སྤྲིངས་ཡིག་རང་གཞན་ལ་ཕན་པའི་བསླབ་བྱ།》སོགས་བསྟན་བཅོས་ལྔ་བརྒྱ་ལྷག་ལྗགས་རྩོམ་མཛད་ཅིང་། ཤར་ཕྱོགས་མངོན་དགའ་ཞེས་བྱ་བར་གཉལ་ལོར་བྱར་གསུམ་ཨེ་ཉང་ཀོང་དང་བཅས་པའི་སྨན་པ་ཀུན་བསྡུས་ནས། སྨན་ངོ་གསལ་བྱེད། བདུད་རྩིའི་རྫིང་བུ། བདུད་རྩིའི་གཏེར། སྨན་གྱི་བྱིངས་ལ་སོགས་པ་རོ་ནུས་ཞུ་རྗེས་ངོ་བོ་ངེས་ཚིག་བྱེད་ལས་ཀྱི་སྒོ་ནས་གཏན་ལ་འབེབས་པའི་བསྟན་བཅོས་རྣམས་འཆད་ཅིང་ངོ་སྤྲོད་བྱས་པ་སོགས་འཆད་རྩོད་རྩོམ་གསུམ་གྱི་སྒོ་ནས་གསོ་རིག་གི་བསྟན་པ་རྒྱ་ཆེར་སྤེལ་ནས་བཟུང་ཟུར་ལུགས་ཞེས་ཡོངས་སུ་གྲགས་པའི་སྲོལ་ཆེན་པོ་དེ་བྱུང་བ་ཡིན་ནོ། ། དེ་ལ་སློབ་མའི་གཙོ་བོ་ཕྱོགས་ཀྱི་སློབ་མ་བཞི་ཞེས་པ་སྟེ། མན་ངག་མཐར་ཕྱིན་མི་འགྱུར་ཚེ་བརྟན། འཕྲིན་ལས་མཐར་ཕྱིན་ཕྲག་དཔོན་བསོད་ནམས་བཀྲ་ཤིས། ལག་ལེན་མཐར་ཕྱིན་ཚེ་འབུམ་རྡོ་རྗེ། བཤད་པ་མཐར་ཕྱིན་ལི་ཆུང་པདྨ་སྐྱབས་བཅས་དང་། གཞན་ཡང་། བྱིན་རླབས་ཞུགས་པའི་སློབ་མ་བརྒྱད། ཤེས་རབ་ཅན་གྱི་སློབ་མ་བཅུ་དྲུག གྲགས་པ་ཐོབ་པའི་སློབ་མ་ཉི་ཤུ། བླ་དྭགས་ཅན་གྱི་སློབ་མ་བཅུ་དྲུག་སོགས་བྱུང་ནས་གསོ་རིག་གི་བསྟན་པ་གསལ་བར་མཛད། ཟུར་ལུགས་ཀྱི་རྒྱུད་འཛིན་གཙོ་བོ་རབ་བྱུང་བདུན་པའི་ས་སྦྲུལ(སྤྱི་ལོ1429)ལོར་འཁྲུངས་པའི་སྐྱེམ་པ་ཚེ་དབང་དང། རབ་བྱུང་བདུན་པའི་ནང་དུ་བྱོན་པའི་བྱར་པོ་པཎ་ཆེན། རབ་བྱུང་དགུ་པའི་ས་སྦྲུལ(ཕྱི་ལོ1409)ལོར་འཁྲུངས་པའི་ཟུར་མཁར