ཁེན་ནི་ཡས་འཛམ་གླིང་སྟེང་གི་ཆེས་མཐའ་མའི་བསེ་རུ་དཀར་པོ་ཕོ་ལ་དུས་ཚོད་24ཡི་རིང་སྲུང་སྐྱོབ་བྱེད་བཞིན་ཡོད། འདི་འདྲའི་བྱེད་སྟངས་སྤྱད་པ་ནི་རིགས་རྒྱུད་ཆད་ལ་ཉེ་བའི་སྲོག་ཆགས་འདིའི་རིགས་འཇིག་ཉེན་ལས་སྐྱོབ་པའི་ཆེད་ཡིན། བསེ་རུའི་རྭ་ཡི་རིན་གོང་བསྟུད་མར་ཡར་འཕར་བའི་རྐྱེན་གྱིས། ཆེས་མཐའ་མའི་བསེ་རུ་ཕོ་འདིའང་དུས་དང་རྣམ་པ་ཀུན་ཏུ་རྐུ་གསོད་བྱེད་པའི་ཉེན་ཁར་འཕྲད་ཡོད། ད་ལྟ་བསེ་རུ་འདིའི་རྭ་ཅོ་བྲེགས་ཡོད་ནའང་འབྲེལ་ཡོད་ལས་བྱེད་མི་སྣས་སྔར་བཞིན་ཁོང་གི་བདེ་འཇགས་ལ་སེམས་ཁུར་བྱེད་བཞིན་ཡོད།
བསེ་རུ་དཀར་པོ་འདི་ད་ལྟ་ལོ་23ལ་སོན་ཡོད་ཅིང་ཁོ་ཕལ་ཆེར་ལོ་50འཚོ་ཐུབ། བསེ་རུ་ཕོ་འདི་ནི་2009ལོར་བསེ་རུ་དཀར་པོ་མོ་གཉིས་དང་ལྷན་དུ་ཆེ་ཁུའི་རི་དྭགས་གླིང་ག་འདིར་བསྐྱལ་བ་རེད།མི་ཚོས་སྔོན་ཆད་བསེ་རུ་འདི་དག་གིས་རིགས་རྒྱུད་སྐྱེ་འཕེལ་བྱེད་པའི་རེ་བ་བཅངས། ཡིན་ཡང་བསེ་རུ་ཕོ་གཅིག་ན་ནིང་ལོར་ཤི་ཤོར་བ་དང་མིག་སྔར་འཛམ་གླིང་སྟེང་བསེ་རུ་དཀར་པོ་5མ་གཏོགས་མེད། དེའི་ཁྲོད་གཅིག་ནི་ཕོ་ཡིན། བསེ་རུ་5ལས་ཁེན་ནི་ཡ་རུ་འཚོ་བའི་བསེ་རུ་3གྱི་འཚོ་གནས་ལ་ཉེན་ཁ་ལྷག་ཏུ་ཆེ།
བསེ་རུར་ཕྱི་རོལ་དུ་མིའི་རིགས་ལས་གཞན་དགྲ་བོ་གང་ཡང་མེད། མི་ཚོས་སྔོན་ཆད་བསེ་རུ་དཀར་པོ་ཕོ་མོ་འདི་ཚོས་རིགས་རྒྱུད་སྐྱེ་འཕེལ་བྱེད་པ་དང་། མ་འོངས་པའི་ལོ་10ཡི་རིང་གྲངས་ཀ་30ལྷག་འཕེལ་བར་བྱེད་པའི་རེ་བ་བཅངས། ཡིན་ཡང་ཚོད་ལྟ་དེ་ཧ་ལམ་ཕམ་པར་བཏང་། རྒྱུ་མཚན་བསེ་རུ་ཕོ་འདི་ལོ་ན་བགྲེས་པོར་ཆགས་ཡོད།
ད་ལྟ་བསེ་རུའི་རྭ་ཡི་རིན་གོང་ནི་སྤྱི་རྒྱ་རེར་དབྱིན་སྒོར་ 40000ནས་ཁྲི་4500བར་ཡིན། སྲུང་སྐྱོབ་བྱེད་པའི་འགྲོ་སོང་ཡང་ཤིན་ཏུ་ཆེ། མི་40ལས་གྲུབ་པའི་སྲུང་སྐྱོབ་རུ་ཁག་གིས་ལོ་ཕྱེད་རིང་འགྲོ་སོང་དབྱིན་སྒོར་57000བཏང་། འགྲོ་སོང་འདི་དག་ནི་སྤྱིར་བཏང་ཁེན་ནི་ཡའི་ཡུལ་སྐོར་ཡོང་འབབ་ནས་སྤྲད་པ་རེད། ཡིན་ཡང་ཉེ་ཆར་ཨེ་བྷོ་ར་ནད་དུག་གི་ཤུགས་རྐྱེན་གྱིས་ཁེན་ནི་ཡའི་ཡུལ་སྐོར་ཡོང་འབབ་མངོན་གསལ་གྱིས་མར་འགྲིབ་བྱུང་བཞིན་ཡོད། །