འཇིག་རྟེན་འདི་རུ་སྒང་གཤོང་མང་གཅིག་འདུག །སྐྱིད་སྡུག་རིང་ཐུང་སྦོམ་ཕྲ་གྲངས་མེད་རེད། །འདྲ་འདྲ་ཅིག་ཀྱང་མེད་པ་མཐོང་གསལ་རེད། །འདི་ལ་ཆོག་ཤེས་རང་གི་བྱས་པ་དགའ། །ཐོད་པའི་རི་མོ་སུབ་ཀྱང་ཟུབ་རྒྱུ་མེད། །དེ་ལས་རི་མོའི་འགྲོ་ལུགས་བསྟུན་པ་དགའ། །ལྕགས་རོང་བོང་བུ་སྡུག་ཀྱང་རང་སྡུག་རེད། །བསྒལ་བའི་རྒྱབ་ཁུར་མ་འཁྱེར་དཀའ་མེད་རེད། །སེམས་གོས་ཆོད་ན་ནོར་ལ་མང་ཉུང་མེད། །ཆོག་ཤེས་མེད་པས་རྒྱལ་པོ་སྦྲང་པོ་དང་། །སེམས་གོས་ཆོད་ན་སྤྲང་པོ་དེ་ལས་ལྷག །རྒྱལ་པོ་རྒྱལ་གཞིས་ཟོས་ནས་ལྟོག་ལྷང་ལྷང་། །སྤྲང་ཕྲུག་ཐང་རྐྱལ་ཁེངས་ནས་སྦོ་སྒྱེད་སྒྱེད། །བཀོད་པའི་ལས་ལ་ཆོག་ཤེས་མ་བྱས་ན། །རང་སྡུག་རང་གི་ཉོ་བ་དོན་མེད་རེད། །ཆོག་ཤེས་ལྡན་ན་ཕྱུག་དང་མ་ཕྱུག་མེད། །ལས་ལ་བཀོད་ན་དགྲ་ནོར་རང་གི་ནོར། །མ་བཀོད་ཕ་ནོར་བུ་ལ་བདག་པ་དཀའ།།ལྗང་པ་རྡོ་ཡི་སྟེང་དུ་སྐྱེས་དོག་མེད། །སྦག་སྦག་སིག་སིག་བྱས་པས་ཅི་ལ་ཕན། །སེམས་པ་ཤོར་ན་ཕ་བཟང་བུ་ལ་ཤོར། །ཆོག་ཤེས་བྱས་ནས་ལུས་སེམས་འདོད་ལ་འཇོག །ལག་ལེན་ངན་པའི་རིགས་ལ་སྤང་ཆ་བགྱིས། །ཕ་བདེ་བུ་སྐྱིད་ཡོང་བའི་བསམ་བློ་ཐོངས། །འདི་ཕྱི་གཉིས་ཀྱི་གཏམ་དོན་ལག་བའི་མཐིལ།།ཁ་ཆེ་ཕ་ལུའི་སྙིང་གཏམ་ཁ་ནས་ལུས། །སྙིང་གི་བུ་ཚོ་སྙིང་ནས་རྣ་བ་སྐྱོན། །གོ་བ་ཡོད་ན་གོ་རྒྱུ་བྲིས་ཡོད་དོ། །མང་པོ་མེད་ཀྱང་བྲོ་བ་བཅུད་དང་ལྡན། །
དབྱར་ཁ་ལྕགས་དང་དགུན་ཁ་རྫ་ལ་ལྟོས། །དབྱར་དགུན་མེད་པར་དམར་པོའི་ལྕེ་ལ་ལྟོས། །སྙིང་གཏམ་སྙིང་གི་གྲོགས་ལ་ཤོད་ཚོད་བགྱིས། །སྔ་གྲོགས་དགོང་དགྲར་སོང་བ་མང་པོ་ཡོང་། །གསེར་དངུལ་མི་ལ་བཅོལ་དགོས་བྱུང་ཀྱང་བཅོལ། །བཅོལ་པོ་གཏོང་ཀྱང་བཙལ་ནས་རྙེད་པ་རེད། །སྙིང་གཏམ་མི་ལ་བཅོལ་བཅོལ་མང་དྲགས་ན། །ལག་མགོ་ཁ་ལ་བཅུག་ནས་སྡོད་དགོས་ཡོང་། །གཏམ་གྱི་བདུད་བོ་སྙིང་གི་དོང་དུ་ཚུད། །ཁ་ལ་ལྕགས་དང་ལྕེ་ལ་སྒོ་ལྕགས་རྒྱོབ། །བདུད་བོ་གདོང་ནས་ཤོར་ན་མི་ཕོ་བསོད། །འ་རྫི་བྱས་པ་ཅན་གྱི་ཅི་ལ་ཕན། །མི་ཤོད་དགུ་ཤོད་ཤོད་རྒྱུ་མང་དྲགས་ན། །མི་ལ་མ་ཤོད་ཟེར་གི་སྡོད་དགོས་ཡོང་། །ནར་ནར་ལྕེ་ལ་བདག་པོ་མ་རྒྱབས་ན། །རིལ་རིལ་དབུ་ལ་འོ་རྒྱལ་བཟོས་ཡོང་ངོ་། །མ་བཤད་གཏམ་དེ་ག་དུས་བཤད་བཤད་རེད། །བཤད་ནས་འགྱོད་དགོས་བྱུང་ན་ཐ་མའི་ལས། །མ་བཤད་བར་དུ་གཏམ་ལ་རང་དབང་ཐོབ། །བཤད་ནས་གཏམ་གྱི་དབང་དུ་ཤོད་མཁན་ཚོས། །བཟང་པོ་ཡོངས་ལ་ངན་པ་ལབ་ཉེན་ཆེ། །བཟང་པོའི་བསླབ་བྱ་ངན་པའི་དགྲ་ལ་འགྲོ།།དེ་ལས་བཟང་ངན་ཚང་མ་བཟང་པོས་སྐྱོངས། །བཟང་པོ་དགྲ་མགོ་ངན་པས་བཟློག་པས་བསྟུན། །གཏམ་ལ་དྲངས་པའི་མི་དེ་སེམས་ནས་དྲངས།།སེམས་པ་དྲངས་ན་ཆོས་ཀྱི་ལམ་སྣ་ཟིན། །ད་ལྟ་དེ་ལས་ཕུག་ཡུལ་སྐྱིད་ཀྱང་སྐྱིད། །འདི་ཕྱི་གཉིས་ཀྱི་བསམ་དོན་ལྷུན་གྱིས་འགྲུབ།།ཁ་ཆེ་ཕ་ལུའི་འདོད་དང་སྣག་སྙུགས་ཐུགས། །དཀར་པོའི་ཐོག་ཏུ་ནག་པོའི་བྲིས་ཆ་གསལ། །བྲིས་མི་ས་འོག་བྲིས་ཆ་ས་ཡིས་ཐོག །འཛམ་གླིང་མི་བརྙེས་བསམ་བློའི་དྲན་གསོས་མཛོད། །འཛམ་གླིང་མེ་ལོང་ཕར་བལྟ་ཚུར་བལྟ་རེད། །འཁོར་བ་བྲག་རི་བཞིན་དུ་ཁ་ལན་སློག །རང་གིས་གར་བལྟས་མེ་ལོང་ནང་དུ་གསལ།།གར་ལབ་བྲག་རི་བཞིན་དུ་ཁ་ལན་བསློག།བཟང་ན་བཟང་དང་ངན་ན་ངན་གྱི་ལན། །འདི་ནི་ཡོང་རྒྱུ་འཇིག་རྟེན་འཁོར་བའི་ལས། །ཚང་མས་སྨོན་པའི་འདོད་པ་མེད་ཟེར་ན།།གཞན་ལ་མ་ལབ་རང་ལ་དོགས་ཟོན་གྱིས།། ཚང་མས་རང་གི་མདོག་དང་མཐུན་ཡོང་ངོ་། །གང་བྱས་ལག་པའི་མཐིལ་དུ་གསལ་ཡོང་ངོ་། །གཞན་ལ་དགའ་ཚོད་ཁྱོད་རང་དགའ་མེད་ཡིན། །གང་ལྟར་བཟང་ལ་བཟང་དང་ངན་ལ་ངན། །དུག་ཤིང་སྡོང་པོས་ཁམ་བུ་སྟེར་དོག་མེད། །ཁམ་བུ་དགོས་ན་ཁམ་སྡོང་འགྲམ་ལ་སོང་། །རིན་ཆེན་གསེར་གྱི་འདོད་པ་ཡོད་ཟེར་ན། །དོན་མེད་མུན་པའི་གླིང་ལ་མ་སོང་ཞིག །གཞན་ནས་ལག་ལག་ལུག་ལུག་དགོས་ཟེར་ན། །རང་ལ་ལག་ལག་ལུག་ལུག་མང་ཉུང་དགོས། །ཆེ་འདོད་ཅན་ལ་ཆེ་བ་ཡོང་བ་དཀའ།།དེ་ཡི་ཐབས་ལ་ཆེ་འདོད་བཞག་པ་དགའ། །བྱམས་པོ་བྱས་ན་དགྲ་ཡང་གཉེན་ལ་འགྲོ།།རྩུབ་ཚོད་མ་ཟིན་བུ་ཡང་ཞེན་པ་ལོག།ཐོད་པའི་རི་མོ་གྱེན་ལ་ཡོད་པའི་མི། །སོ་དཀར་འཛུམ་ལེགས་མི་སེམས་འཛིན་པར་མཁས།།ལས་བཟང་བྱས་ནས་ཐར་པའི་ལམ་བུ་ལ། །གཏམ་བཟང་འཁྱེར་ནས་སོང་ཅིག་ཕ་ཡི་བུ། །རི་མོ་ཐུར་ལ་ཡོད་པའི་མི་ངན་ལ།།དུག་སྦྲུལ་ཁྱི་སྨྱོན་གཉིས་ཀྱི་རྟག་དཔྱད་ཚང་།།ཉིན་མཚན་མེད་པ་རྨུག་རྒྱུ་ཁོ་ལས་མེད། །ལག་ལེན་ངན་པའི་ཐལ་བ་རློང་ནས་འགྲོ། །བཟང་པོ་འོང་བའི་རྗེས་ལ་གཏམ་བཟང་ཡོད། །བཟང་པོའི་ལོ་ལ་བཟང་པོའི་འབྲས་བུ་སྨིན། །ངན་པའི་འབྲས་བུ་ངན་པའི་སྐེ་ལ་འཁྲིལ། །ངན་པའི་རྗེས་ལ་ལྟས་ངན་གཏམ་ངན་སྡོད། །རྒྱ་སྙུགས་གསེར་པོའི་ཁ་ནས་ཚིག་གསུམ་ལུས། །རྒྱ་ཤོག་དཀར་པོའི་སེམས་ལ་གསལ་ཡོང་ངོ་། །རྒྱ་སྐད་བོད་ཀྱི་སྐད་ལ་འགྱུར་སོང་ངོ་། །ཁ་ཆེ་ཕ་ལུའི་བློ་ཐག་ཆོད་སོང་ངོ་། །
ཞིམ་ཚད་མ་ཟ་འཇམ་ཚད་མ་གྱོན་ཅིག །ཁ་ལུས་གཉིས་ཀྱིས་སྡུག་ལ་སྦྱར་ཡོང་ངོ་། །ཁོག་པ་དབུག་དང་ལྟོ་དང་འདོན་པའི་དུས། །ཟ་མ་གཅིག་པོའི་སྡོད་པ་ཡིན་དོག་མེད། །མིག་དང་གྲོད་པ་གཉིས་ལ་ཁེངས་རྒྱུ་མེད། །ལྟོ་ཚོད་ཟ་ཚོད་རང་གི་བྱས་པ་དགའ། །གྲོད་པ་ཐབ་ལ་ཚོ་འཚོ་མང་དྲགས་ན། །སྡུག་རྩ་ཐུག་དུས་དགྱེས་བུ་གྲང་བ་མཐོང་། །མི་ལ་རེ་བའི་ཇ་ཆང་ལོངས་སྤྱོད་ལས། །རང་གི་རྩ་རྐྱང་ཆུ་རྐྱང་བྲོ་བ་ཞིམ།།ལས་ངན་ཤན་པའི་བྲེག་ཁུར་བཟའ་བ་ལས། །དམར་དད་ལངས་ནས་ཤིག་ཡང་ཟ་བ་དགའ། །ཟ་རྒྱུ་ཉལ་རྒྱུ་བ་དང་བོང་བུའི་ལས། །དེ་འདྲ་བྱས་པ་ཨེ་དགའ་ཕ་ཡིས་བུ། །ཁྱི་དང་བྲོད་པ་ལག་ནས་ཤོར་སོང་ན། །རྟ་རོ་བོང་རོའི་ཐོག་ལ་ཤོར་ཉེན་ཆེ། །དྲོད་པའི་སྒོ་ལ་གདམ་ཚོད་མ་བྱས་ན། །གཏམ་གྱི་ནོར་བུ་རྐུ་ལ་ཤོར་བའི་ཉེན། །གཏམ་གྱི་ཕུ་ཐུང་འཇོལ་འཇོལ་དགོས་འདོད་ན།།དྲོད་པའི་ལག་འགོ་ཐུང་དུ་བཅུག་པ་དགའ། །ཆུ་ནང་ཉ་མོ་སྤག་ལ་དད་པས་ཕུང་། །བྱི་བ་ཇིལ་འཇོལ་སྤད་ཁ་ཟས་པས་ལན། བྱི་བ་སྨུག་ཆུང་ལྟོག་ལ་ཟ་འདོད་ཀྱི། །ས་མདའ་སྐེ་ལ་གཟུགས་པ་ཟ་མའི་སྐྱོན།བྱང་ཐང་ཝ་མོ་རང་ཚོད་མ་ཟིན་ན།མགོ་པགས་རྐང་ལ་ཤུ་བ་ཟ་མའི་སྐྱོན། །སྟག་དམར་ངར་བཞིན་བུ་བཞིན་འཛིན་རྒྱུ་འདི། །སྟག་རྒན་ལུག་ལ་ཁྱི་ལྟར་འཆོང་པའི་ཉན། །མཁས་པ་འདི་ཡིན་ཞུ་རྒྱུ་མེད་ལགས་ཀྱང་། །དཀར་པོའི་ཐོག་ཏུ་ནག་པོའི་བྲིས་ཆ་གསལ། །ཁ་ཆེ་ཕ་ལུ་ས་འོག་སོང་ན་ཡང་། །རྒྱ་ཤོག་ལོག་གི་སྣག་ཚའི་རི་མོ་འདི། །ས་སྟེང་ཡུན་རིང་གནས་པའི་བཀྲ་ཤིས་ཤོག།ཚང་མའི་ཡིད་དུ་འོང་བའི་བཀྲ་ཤིས་ཤོག །
འཇིག་རྟེན་བལྟ་ལུག་གཅིག་ལ་མཐོང་ལུགས་གཉིས། །བལྟ་ལུགས་གཅིག་ལ་རིགས་ཡང་རིགས་གཅིག་འདུག །ཕ་ཡིས་བུ་དང་བུ་ཡིས་ཕ་བྱེད་པ། །དེ་འདྲ་བསམ་ན་ཐུང་ཐུང་ག་ནས་ཡིན། །མ་བསམ་གྱུར་ན་ཕ་བུའི་དམ་ཚིག་ཉམས། །དམ་ཉམས་ལག་ལེན་འཕྲད་པས་དགྲ་ལ་བསྒྱུར། །ཕྲུ་གུ་ཕ་མ་མེད་པ་མི་སྲིད་ཀྱང་།ལག་ཐོག་སྟོན་རྒྱུ་ཡོད་པ་རེ་རེ་ཙམ། །ཚེ་སྟོད་ཡོད་ཀྱང་ཚེ་སྨད་མེད་པ་མང་། །ཕ་བུའི་དམ་ཚིག་བསྲུང་དུས་བསྲུང་བ་དགའ། །དུས་ཚོད་ཆུ་ཚོད་མ་འགྱངས་གྲོལ་ནས་འགྲོ། །འཐུས་ཤོར་མེད་པ་བུ་ལ་ཡོན་ཏན་སློབ། ཡོན་ཏན་ཀུན་གྱི་རྩ་བ་ཡི་གེ་དང་། །ཡོན་ཏན་ཡོངས་ཀྱི་རྒྱལ་པོ་ཡི་གེ་རེད། །ཕྲུ་གུའི་ཡི་གེ་གསེར་ཁྲིའི་སྟེང་དུ་སྐྱལ། །མེས་པོའི་ཡི་གེ་སྟག་གདན་སྟེང་དུ་འཇོག །བླ་མའི་ཆོས་རར་ཡི་གེ་མེ་ལོང་རེད།།རྒྱལ་པོའི་ཁྲིམས་རར་ཡི་གེ་འབྲས་བུ་རེད། །ཡིག་ཡོད་ཡིག་ཡོད་མཁས་པ་སྤྲུལ་པའི་རྒྱུད། །ཡིག་མེད་ཡིག་མེད་ལོང་བ་ལྐུགས་པའི་རྒྱུད། །ཀྱོག་ཀྱོག་ཡིག་གེ་གཞུ་ལྟར་འཁྱོག་གྱུར་ཀྱང་། །དོན་རྩ་མདའ་ལས་འདྲོངས་བ་དེ་རུ་ཚང་། །ཡོན་ཏན་རིན་ཆེན་དགོས་འདོད་ཀུན་འབྱུང་རེད།།དགོས་འདོད་ཀུན་འབྱུང་དགོས་མི་ཐོགས་པ་མེད། །དོན་དུ་མི་ལ་ཡོན་ཏན་ཚང་བ་དགོས། །ནོར་རྫས་འཚམ་རེ་སོང་འགྲོ་འཚམ་རེ་ཡོང་། །ནོར་ལ་བསྐྱུར་བརླག་རྐུན་མས་འཁྱེར་བའི་ཉེན། །ཡོན་ཏན་རིན་ཆེན་འཛད་མེད་ཕུགས་གི་གཏེར། །ན་སོ་གཞོན་དུས་བུ་ལ་སྦྱོང་བརྡར་སློབ། །ན་སོ་ལོང་ནས་བསླབ་དགོས་མེད་པ་གྱིས། །ལྕང་གསར་གཞོན་དུས་འདྲོངས་ན་འདྲོངས་པ་རེད། །ལྕང་རྒན་སྲོང་སྲོང་མང་ན་ཆག་པའི་ཉེན། ངན་པ་མི་དང་སྡོང་ཞིང་གྲོགས་ཞན་འདྲ། །དུག་དང་སྡོང་ན་དུག་གི་ཁ་རླངས་ཕོག །ངན་པའི་ཚོགས་དང་ནག་པོའི་སོལ་བ་འདྲ།།ཚ་མོ་བསྲེག་ཡོང་གྲང་མོ་རྫས་ཉེན་ཆེ།།ཁེ་དང་གྱོང་གི་བསྐོར་ཕྱོགས་གཏོང་གི་སོང་། །ཡག་དང་ཉེས་ཀྱི་སྐད་ཆ་ཤོད་ཀྱི་སོང་། །ཡག་ན་ཡག་པས་ངོ་བསྟོད་བདག་རྐྱེན་སྤྲོད། །ཉེས་ན་ཉེས་སོང་ཟེར་བས་ཉེས་ཐག་ཐོངས། །ཨ་མའི་ཁ་ལ་སྒོ་ལྕགས་རྒྱབས་དྲག་ན། །ཕྲུ་གུས་ཆག་སྒོའི་རྒྱལ་སྒོ་ཕྱེ་ཉེན་ཆེ། །རྡོ་ལ་ཕྱི་བརྡར་ཐོན་ན་ནོར་བུ་དང་། །ལྕགས་ལ་འཇམ་ཤ་ཐོན་ན་མེ་ལོང་ཡོང་། །ཡོན་ཏན་ཕུན་སུམ་ཚོགས་ན་སྙིང་གི་བུ། །བྱ་ལུགས་བྱེད་ལུགས་ངན་ན་དགྲ་ལས་ངན། །དེ་ཚོ་སེམས་པ་དཀར་བའི་སྐད་ཆ་རེད། །བུ་ཡོད་ཕ་ཚོ་ཐུགས་ལ་དེ་ལྟར་ཞོག །