ལུང་བ་དེའི་ཕུགས་སུ།
དུད་ཁྱིམ་ཞིག་ཆགས་ཡོད།རྟ་ར་ཞིག་དང་མཛོ་རྡང་འགའ་ཡོད།
ལྷས་འདབས་སུ་ཁྱི་རྒན་ཞིག་ཉལ་ཡོད།
སྒོ་འགྲམ་ན་ཨ་མ་བགྲེས་མོ་ཞིག་ལངས་ཡོད།
ངག་རྒྱུན་དང་ལྷ་སྒྲུང་འདྲེས།
སེམས་ཅན་དང་སེམས་ཅན་འདྲེས།
དུད་ཁྱིམ་གྱི་ཡ་ཕུགས་ན།
མཆོད་སྟེགས་དུད་དྲེག་མ་ཞིག་ཡོད།ཐང་རྙིང་ཞལ་ཁེབས་ཅན་ཞིག་བཤམས་ཡོད།
མཆོད་མེ་རྐོང་བུ་གང་བསྒྲོན་ཡོད།
མུན་པ་དང་འོད་སྣང་འདྲེས།
དངོས་ཡོད་དང་རྨི་ལམ་འདྲེས།
ཆུ་ཁ་ན་རྩེད་མོར་གཡེང་བའི།
བྱིས་པ་རྐང་རྗེན་འགའ་ཡོད།ཐ་གུ་ཁྲ་ཁྲའི་སྐ་རགས་འཆིང་བའི།
བུ་མོ་ཟོ་ཁུར་ཞིག་མཆིས།
རྒྱང་རིང་ནས་མཆེད་པའི་རྟ་ཕོའི་འཚེར་སྐད།
བུ་མོའི་རྣ་རྩར་སྲོད་ཁ་བཞིན་ལྷུང་བས།
ཉི་ཟེར་དང་ཕྱི་མིག་འདྲེས།
ནམ་མཁའ་དང་ས་གཞི་འདྲེས།
ནགས་ཚལ་སྟུག་པོའི་རི་རྩེ་ནས་བལྟས་ཚེ།
ལུང་བའི་ཕུགས་སུ།དུ་བ་ཀྱ་ཀྱུ་ལང་གིན་པ་མཐོང་ཐུབ།
རི་ཞོལ་དུ་བབས་ནས་ཁ་རོག་གེར་ཉན་ན།
ལུང་མཐིལ་གྱི་གྲམ་གཞུང་དུ།
ཆུ་ཕྲན་ལྷུང་ལྷུང་གིས་འབབ་ཀྱིན་པ་ཐོས་ཐུབ།
ལུང་བ་དེའི་ཕུགས་སུ།
དུད་ཁྱིམ་ཞིག་ཆགས་ཡོད།ཆུ་ཕྲན་དེའི་མགོ་ཁུངས་བསྙེགས་ཏེ་སོང་ན་རྙེད་ཐུབ།
ནམ་མཁའ་དང་ས་གཞི་འདྲེས།
ཆུ་ཕྲན་དང་ཟླ་འོད་འདྲེས།
གློ་བུར་རྟ་ནག་མའི་འབྲོག་སྡེ་དྲན་པ།
འབྲོག་སྡེ་ཞིག་གི་ཕྱེད་ཀ་ནུབ་ནས།
གྲོང་རྡལ་དུ་ཆགས་ཀྱིན་པའི།རྡོ་ཁང་དག་གིི་གྲུ་ཟུར་ལས།
མགོ་དཀྲིས་བཅིངས་པའི་འབྲོག་མོ་དག
ཀ་ར་དབུགས་རྒྱག་ལྡད་ཀྱིན།
མངོན་ཆུང་དང་འཛེམ་བག་ཟད་ཀྱིན་འདུག་པ།
རླངས་འཁོར་གྱི་སྒེའུ་ཁུང་ལས་མཐོང་ཐུབ།
རྩྭ་མཛོད་ར་བའི་ནང་དུ་སོང་ན་སྒོར་མོ་དགོས་པས།
གྲོང་ཁྱེར་གྱི་སྤྱོད་ཁང་དྲན་ཡོང་།
མཚོ་སྔོན་པོའི་འགྲམ་གྱི་རྡེའུ་འབུམ་ཞིག
གད་སྙིགས་སུ་འགྱུར་གྱིན་པའི་ན་ཟུག་གིས།རྨི་ལམ་ནང་ནས་ཀྱང་ང་ལྷོད་མྱོང་མེད།
མཚོ་མོའི་རླབས་རྒྱུན་ལང་གིན་པ་དེའང་།
སུས་ཀྱང་ཚོར་དུ་མེད་པའི་ན་ཟུག་ལྷག་མ་ཞིགངའི་སྙན་ངག་གིས་ག་ལེར་བསྒུལ་ཐུབ་པའི།
ལུ་གུའི་མེ་ཏོག་གི་མགོ་ལྕོག་དང་འདྲ།
དགུན་གཞུང་རླུང་བུ་དྲག་ཏུ་ལྡང་སྲིད་པའི།
རྟ་ནག་མའི་འབྲོག་སྡེ་ནས།རྡོ་ཁང་འགའ་ལས་ཅི་ཡང་ལུས་མི་སྲིད་པས།
མཚོ་མོ་ཁ་རོག་གེར་ཉལ་འཇོག་པའང་།
དགུན་གཞུང་ལ་མཚོན་ན།
མཛེས་སྡུག་གི་གཏམ་རྒྱུད་གཞན་ཞིག་ཡིན།
འབྲོག་སྡེ་ཞིག་གི་ཕྱེད་ཀ་ནུབ་ཚར་བས།
གྲོང་རྡལ་དུ་ཆགས་ཀྱིན་པའི།རྡོ་ཁང་དག་གི་གྲུ་ཟུར་ལས།
མངོན་ཆུང་དང་འཛེམ་བག་ཟད་ཀྱིན་འདུག་ཨང་།
སྟོན་རུ་ཤོད་ལ་བབས་པ།
ཤ་གཟན་རྒྱ་གླང་འདྲ་བོ་དེ།
མཚེར་ཤ་རུ་བཤས་ཟིན་པས།རུལ་མ་སྤར་མོ་གང་གིས་ལུག་ལྷས་ཇེ་སྲབ་ལ་སོང་ཡོད་ངེས།
འབྲི་མོ་རྭ་གོར་མ་དེ།
བེའུ་ལ་སྦྱིག་ཟིན་པས།འོ་མ་བཞོ་ཟེའུ་རྐེད་ཅིག་གིས་ཇེ་ཉུང་ལ་སོང་ཡོད་ངེས།
ད་ལོའི་འབབ་ཞོད་ཆེ་དྲགས་པས།
ཐབ་ཀ་རློན་པའི་ནང་ལ།ཨོང་བ་རློན་པ་ཇི་ལྟར་དེད་རུང་།
དུ་བ་འཕྱུར་ནས་འབར་རྒྱུ་མི་འདུག་ཅེས།
སྲིང་ཆུང་མའི་མིག་རྩ་དམར་པོར་ཆགས་འདུག
དབྱར་རྩ་དགུན་འབུའི་རིན་གོང་མི་བྲིན་པའི་ད་ལོར།
ཕྱུགས་ཟོག་གི་རིན་གོང་བྲིན་འདུག་མི་ཤེས་མོད།ཞྭ་མོ་དཀར་པོ་གོན་མཁན་དག་གིས།
མན་ཚར་ནག་པོ་ཤད་ཀྱིན།
ཐག་པ་ཁུར་ནས་འབྲོག་སྡེ་ཉུལ་གྱིན་ཡོང་།
སྡེ་བ་ཡར་ནང་མར་ནང་གིས།
སྒོར་མོའི་ཁ་གྲངས་ལ་བལྟས་ཏེ།རྟ་རྒྱུག་འགྲན་སྡུར་བྱེད་ཀྱིན་ཡོད།
ཁྱིམ་མཚེས་བུ་མོ་ལྷ་སྒྲོན།
གནས་ཡུལ་ནས་རང་ཁྱིམ་དུ་སླེབས་ཡོད།
མོའི་མངལ་ལ་བྱིས་པ་འཁོར་ནས།
ཟླ་ངོ་བརྒྱད་དང་ཕྱེད་ཀ་འགོར་ཡོད་ཅེས།དགའ་སྤྲོ་དང་ཉི་འོད་ལྷན་དུ་བསྲེས་ནས་བཤད།
ངེད་ཚང་གི་མི་རྐྱང་ཡིན་ཞེས།
སྲིང་ཆུང་མའི་གམ་ན་གསར་བུ་ཞིག་ཀྱང་ཡོད་འདུག
སྟོན་རུ་ཤོད་ལ་འབབ་དུས།
སྐྱས་ལམ་ན་ཁལ་མ་མང་བོ་མཐོང་རྒྱུ་མི་འདུག་ཅེས།ཨ་ཕའི་ཤུགས་རིང་གིས་ང་དྲག་ཏུ་བསྒུལ་བྱུང་།