[བརྡ་ཆད་གཙོ་བོ།] སྒྲུང་གཏམ། ཆོས་ལུགས་མི་སྣ། དད་འབངས། རང་བཞིན།
[དངོས་གཞི་ནང་དོན།] དང་པོ། སྤྱིར་ཚེ་རིང་དོན་གྲུབ་ཀྱི་བརྩམས་སྒྲུང་ཁྲོད་ཀྱི་མི་སྣའི་སྣང་བརྙན་ལ་དཔྱད་པ།
དང་པོ། སྤྱིར་ཚེ་རིང་དོན་གྲུབ་ཀྱི་བརྩམས་སྒྲུང་ཁྲོད་ཀྱི་མི་སྣའི་སྣང་བརྙན་ལ་དཔྱད་པ།
དེ་ཡང་སྙན་ངག་པ་ལྗང་བུས་ཚེ་རིང་དོན་གྲུབ་ནི་བརྩམས་སྒྲུང་ཁོ་ན་འབྲི་མཁན་གྱི་རྩོམ་པ་པོའི་རིགས་སུ་གཏོགས་ཞེས་གསུངས་པ་བཞིན་ཁོང་ལ་ད་སྔོན་བོད་ཡིག་གི་ལམ་ནས་དུས་དེབ་དུ་བཀོད་པ་བདམས་སྒྲིག་བྱས་པའི་སྒྲུང་ཐུང་དེབ་གཉིས་དང་སྒྲུང་འབྲིང་དེབ་གཅིག་ཡོད་ལ།སྒྲུང་རིང་དེབ་གསུམ་ཡོད་པ་མ་ཟད།རྒྱ་ཡིག་གིས་བྲིས་པའི་བརྩམས་སྒྲུང་དང་ལྷུག་རྩོམ་ཡང་དེབ་གཅིག་ཏུ་ལོང་པ་ཞིག་ཡོད་པ་ལས་གཞན།ད་དུང་ས་གནས་ལོ་རྒྱུས་དང་རྩོམ་རིག་སོགས་ཁོང་གིས་གཙོ་སྒྲིག་བྱས་པའི་རྒྱ་བོད་ཡིག་རིགས་གཉིས་ཀ་དེ་བཅུ་ཡས་མས་ཤིག་ཡོད་པ།བརྩམས་སྒྲུང་དེ་རིགས་ནང་དོན་གྱི་ཆ་ནས་བོད་མིའི་འཚོ་སྟངས་འགྲོ་ལུགས་དང་།དད་སྲོལ་སྲིད་ལུགས།བསམ་སྟངས་སྒྲུབ་ཚུལ་སོགས་ཐད་ཀྱི་བརྗོད་བྱ་གྱ་ནོམ་པོ་ཞིག་མཚོན་ཞིང་།ང་ཚོས་ཚེ་རིང་དོན་གྲུབ་ཀྱི་བརྩམས་སྒྲུང་ཁྲོད་ཀྱི་མི་སྣའི་སྣང་བརྙན་དཔྱད་ཞིབ་བྱེད་ཚེ་ཁོང་གི་མི་ཚེའི་ལོ་རྒྱུས་དང་སྐབས་དེའི་སྤྱི་ཚོགས་ཀྱི་རྒྱབ་ལྗོངས་དང་ནི་ཁ་བྲལ་ཐབས་མེད་པ་ཞིག་རེད།དེ་བས་ཚེ་རིང་དོན་གྲུབ་ཀྱི་རྩོམ་གྱི་བརྗོད་བྱ་ཡང་ཏག་ཏག་དེ་ནས་འགོ་བརྩམས་འདུག དེ་ཡང་ཁོང་གི་རྩོམ་གྱི་བརྗོད་བྱ་དང་ང་ཚོ་འཚོ་གནས་ཀྱི་སྤྱི་ཚོགས་ཁོར་ཡུག་གཉིས་ལ་ཐུན་མོང་གི་གཞིར་ཡོད་ཚེ། དེའི་ཁྲོད་ཀྱི་བདེ་སྡུག་དང་རྣམ་པ་ཁ་ཤས་ལ་མྱོང་ཚུལ་ནན་པོ་ཞིག་ཐོབ་ཀྱི་འདུག ཁོང་གི་བརྩམས་སྒྲུང་ཕལ་ཆེར་གྱིས་སྤྱི་ཚོགས་ཀྱི་ཡར་ཐོན་ལ་བཀག་འགོག་བྱེད་པའི་གོམས་སྲོལ་རྙིང་པ་དང་།རང་ཉིད་ཀྱི་འོས་མཐུན་ཐོབ་ཐང་།རང་གི་ཁེ་དབང་སྲུང་སྐྱོབ་བྱེད་མི་ཕོད་པའི་སྡར་མ།མི་དམངས་ཀྱི་དད་སེམས་ལ་རང་མཁོའི་རྐང་སྟེགས་འཆའ་བའི་ཧམ་པ་ཅན། ཁྲིམས་ལུགས་ལ་རྡོག་བརྫིས་གཏོང་མཁན་ཁྲིམས་འཛིན་པ།མདོར་ན་ཚུལ་མིན་གྱི་ནག་ཉེས་དང་ཐ་ཤལ་གྱི་སྤྱོད་ངན་དེ་དག་ལ་ཐེར་འདོན་དང་སོན་འབྱིན་བྱས་ཡོད་དོ།དེ་ཡང་དེ་རིགས་ཁོང་གི་བརྩམས་སྒྲུང་དངོས་དང་སྦྲགས་ནས་བཤད་ན་འདི་ལྟར་ཏེ། ཁོང་ཉིད་ཀྱི་གསར་བརྩམས་ཀྱི་དམིགས་སྒོའི་འཕེལ་རིམ་གྱི་ཆ་ནས་ཕལ་ཆེར་དུས་རིམ་གཉིས་སུ་དབྱེ་ཡོད་དེ། དུས་རབས་ཉི་ཤུ་པའི་ལོ་རབས་བརྒྱད་ཅུའི་སྟོད་ནས་ལོ་རབས་དགུ་བཅུ་པའི་སྨད་ཀྱི་བརྩམས་སྒྲུང་ཐུང་འབྲིང་རྣམས་ནི་མཐོ་སྒང་གི་དངོས་ཡོད་ཀྱི་འཚོ་བའི་སྣང་ཚུལ་ལ་དམིགས་ཡོད་པ་དང་།དུས་རབས་ཉི་ཤུ་བའི་ལོ་རབས་དགུ་བཅུ་པའི་དུས་མཇུག་ནས་ད་རེག་གི་བརྩམས་སྒྲུང་མང་ཤོས་ཀྱིས་ནི་སྤྱི་ཚོགས་ཀྱི་འགྱུར་ལྡོག་དང་བསྟུན་ནས་འཚོ་བའི་རྣམ་པ་འདྲ་མིན་སྣ་ཚོགས་བྲིས་ཡོད་དོ།དེ་བས་ཁོང་གི་བརྩམས་སྒྲུང་ཁྲོད་ཀྱི་མི་སྣའི་སྣང་བརྙན་ལའང་འགྱུར་ལྡོག་གི་རང་བཞིན་ལྡན་ཡོད་པ་ནི་སྨོས་མ་དགོས་པ་ཞིག་རེད།དཔེར་ན༼འབྲོག་པ་རླུང་ནག་འཚུབ་མ༽ནི་སྒེར་གཅོད་ལ་གཉའ་མི་སྒུར་བའི་མཚོ་བོད་མཐོ་སྒང་གི་འབྲོག་པ་ཞིག་གི་སྣང་བརྙན་ཡིན་ལ།དེ་མ་ཚད་བོད་ཀྱི་སྤྱི་ཚོགས་རྙིང་པའི་ནང་གི་ཇག་པའི་ལམ་སྲོལ་ཆེས་ཆེར་དར་མྱོང་བའི་སྤྱི་ཚོགས་ཀྱི་ཆ་ཕྲན་ཞིག་ཀྱང་ར་སྤྲོད་བྱས་ཡོད་དོ།ད་དུང་དཔའ་ངལ་དང་དཔང་ཤུགས་ཀྱིས་ཁ་གྲགས་པའི༼ཡ་ང་བའི་སྐྱ་རིང༽ནང་གི་མི་སྣ་དཔལ་བཟང་ལྟ་བུ།དེའི་རྒྱུད་ལས་བོད་ཀྱི་སྤྱི་ཚོགས་རྙིང་པའི་ན་དུ་རྨ་པུ་ཧྥང་གིས་གཉའ་མནོན་དང་བཤུ་བཞོག་མང་པོ་བྱས་ནས་བོད་མི་དམངས་སྡུག་བསྔལ་གྱི་རྒྱ་མཚོར་བཅུག་པའི་ལོ་རྒྱུས་ཀྱི་གནས་སྟངས་དེའང་བསྟན་ཡོད་དོ། གཞན་ཡང་ཆེས་གྲགས་ཆེ་བའི༼ར་ལོ༽ཞེས་པའི་སྒྲུང་འབྲིང་ནང་གི་ར་ལོའི་སྣང་བརྙན་ལ་ནི་གཅིག་བསྡུས་ཀྱི་རང་བཞིན་ལྡན་པས། བོད་མི་སྤྱིའི་སྐྱོན་ཆ་དང་ཐུན་མོང་གི་མི་ཚེའི་སྤྱོད་སྟངས་ཞིག་མཚོན་ཡོད་ལ། དེའི་ནང་གི་ར་ལོ་ལ་མཚོན་ན་འཚོ་བའི་མྱོང་རྒྱུད་རེ་རེའི་ཁྲོད་ནས་བསླབ་བྱ་དང་ཉམས་མྱོང་བསྡུ་ལེན་མི་བྱེད་པ། མི་ཚེ་ལ་འགྱུར་ལྡོག་གང་མང་བྱུང་ཡང་རང་གཤིས་འགྱུར་བཅོས་བྱས་ནས་འཚོ་བ་སྔར་ལས་ལྷག་པར་བྱེད་པའི་བསམ་པ་ཡེ་ནས་མེད་པ། ཆུང་ངུ་དུས་ཀྱི་ར་ལོ་དང་རྒས་པའི་དུས་ཀྱི་ར་ལོའི་བར་སྣབས་ཀྱི་སྦོམ་ཕྲ་ཙམ་ལས་གཞན་འགྱུར་ལྡོག་གང་ཡང་མེད་པར་ལུས། དེ་བས་ར་ལོའི་གཤིས་ལ་འགྱུར་ལྡོག་དང་འཚོ་བའི་བགོ་སྐལ་གསར་པ་ཞིག་འབྱུང་རྒྱུ་ནི་ད་དུང་ང་ཚོ་དང་རྒྱང་ཐག་ཅུང་རིང་པོ་ཞིག་ཡོད་པ་ནི་བོད་མི་རིགས་ཀྱི་འགྱུར་བ་མི་འདོད་པའི་རང་གཤིས་དེས་ཐག་བཅད་ཡོད་པ་རེད། དེ་དག་ལས་སྤྱི་ཚོགས་རྙིང་པའི་ནང་གི་འགལ་བ་གཙོ་བོ་དེ་མཚོན་ཐུབ་ཀྱི་ཡོད་ལ།དེ་བས་དུས་རབས་གསར་པར་གོམ་པ་སྤོས་པ་ནས་བཟོང་ཁོང་གི་སྒྲུང་གཏམ་ཁྲོད་ཀྱི་མི་སྣ་ལའང་དུས་རབས་གསར་པའི་དྲི་མ་བྲོ་བཞིན་ཡོད། དཔེར་ན༼ལམ༽ནང་དུ་རྣམ་གཡེང་དང་ལེ་ལོས་ཉི་མ་འཁྱོལ་ཐབས་བྱེད་པའི་བཀྲ་ཤིས་ལྟ་བུ་དང་དེ་ལས་ལྡོག་སྟེ་ཤེས་བྱ་རིག་པའི་གནས་ལ་འབད་འབུངས་དང་ཧུར་བརྩོན་བྱེད་བཞིན་ཡ་རབས་ཅན་གྱི་བུ་མེད་ཅིག་གི་མཚན་ཉིད་ཚང་བའི་ཁོའི་སྲིང་མོ་དབང་མོ་ལྟ་བུ་སྣང་བརྙན་བཟོ་བསྐྲུན་བྱས་པ་དེས་གཤིབ་བསྡུར་གྱི་ལམ་ནས་སྤྱོད་པ་མི་འདྲ་བ་གཉིས་ལས་སྤྱི་ཚོགས་ཁྲོད་ཀྱི་མདུན་ལམ་མི་འདྲ་བ་གཉིས་མཚོན་ཡོད་དོ། ད་དུང༼འབུམ་སྐྱབས༽ནང་གི་འབུམ་སྐྱབས་ཀྱི་སྣང་བརྙན་ནི་ལྕགས་ཀྱི་ཁ་ཕོར་སྒྱིད་ལུག་གིས་འཛིན་པའི་ལས་བྱེད་པ་ཞིག་གི་སྣང་བརྙན་སྐྲུན་ཡོད་པ་དང་། ༼ཟླ་འོད་འོག་གི་ཟློས་གར༽ཁྲོད་ཀྱི་མི་སྣ་གཅོད་པ་ནི་གོ་གནས་དང་ཐོབ་ཐང་གི་ཆེད་དུ་བརྩེ་དུང་བརྗེ་རེས་བྱེད་པའི་ཐ་ཤལ་གྱི་མི་སྣ་ཞིག་ཡིན་ལ། དེ་དག་ཚང་མས་སྐབས་དེའི་སྤྱི་ཚོགས་ནང་གི་གནས་ཚུལ་དངོས་དེ་ཕྱིར་འདོན་བྱས་ཡོད་དོ། མ་ཚད་ང་ཚོས་རྩོམ་པ་པོའི་མི་ཚེའི་བརྒྱུད་རིམ་གྱི་ཁྲོད་ནས་ཀྱང་གནས་ཚུལ་དེ་རིགས་ལ་གོ་བ་ཡང་དག་ཞིག་ངེས་ཆོག་ལ། དེ་ཡང་ཁོང་ཉིད་ཆུང་དུས་གནག་རྫི་བྱས་མྱོང་བས་ན་མཐོ་སྒང་གི་འཚོ་བ་ལ་ཆ་རྒྱུས་རྣོན་པོ་ཞིག་ཐོབ་ནས་ད་གཟོད་མཐོ་སྒང་གི་འཚོ་བ་སྟོན་པའི་སྒྲུང་གཏམ་མང་པོ་བྲིས་ཡོད་པ་རེད། འོ་ན་ཕྱིར་ཁོང་ཉིད་སློབ་གྲྭ་ལ་འགྲིམས་ནས་ལས་བྱེད་པའི་གོ་གནས་རགས་པ་དང་ཞོར་དུ་ལས་གནས་མང་པོ་བརྗེ་སྤོར་བྱས་པ་ལས་ལས་བྱེད་པའི་འཚོ་སྟངས་དངོས་དང་ལྕགས་ཀྱི་ཁ་ཕོར་གྱི་ཆེད་དུ་སྤྲེལ་ལད་མང་པོ་འཁྲབ་ཀྱི་ཡོད་པའི་རྣམ་པ་དེ་དག་ད་གཟོད་ཁོང་གི་བྲིས་རྩེར་རྒྱུས་པ་རེད།
གཉིས་པ། སྒོས་སུ་བརྩམས་སྒྲུང་ཁྲོད་ཀྱི་ཆོས་ལུགས་མི་སྣའི་སྣང་བརྙན་ལ་དཔྱད་པ།
༡ ཁོང་གི་བརྩམས་སྒྲུང་ཁྲོད་ཀྱི་ཆོས་ལུགས་མི་སྣའི་ངོས་འཛིན་སྟངས་སྐོར།དེ་ཡང་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་ཆོས་ལུགས་མི་སྣའི་སྣང་བརྙན་ལ་དཔྱད་ཚེ་ཐོག་མར་ཆོས་ལུགས་མི་སྣ་ཞེས་པ་དེ་ལ་ངོས་འཛིན་ཡང་དག་པ་ཞིག་ཡོད་དགོས།དེ་བས་དུས་རྒྱུན་ང་ཚོས་འཚོ་བའི་ཁྲོད་ནས་ཆོས་ལུགས་མི་སྣ་ཞེས་གླེང་མ་ཐག་དེ་ནི་ན་བཟའ་དམར་པོ་མནབས་ནས་དགོན་པ་དང་རི་ཁྲོད་ལ་བཞུགས་པའི་སེར་མོ་བ་ཁོ་ན་ལ་གོ་བཞིན་ཡོད། འོ་ན་ཚེ་རིང་དོན་གྲུབ་ཀྱི་སྒྲུང་གཏམ་ནང་དུ་ཆོས་ལུགས་མི་སྣའི་སྣང་བརྙན་མི་འདྲ་བ་གཉིས་མངོན་གསལ་དུ་འདུག གཅིག་ནི་ཀུན་གྱི་བསམ་ཡུལ་དུ་ཁྲ་ལམ་མེར་ཡོད་པའི་བཅོམ་ལྡན་འདས་ཀྱི་རྗེས་འཇུག་པ་ཞེས་པའི་སེར་མོ་བ་དེ་ཚོ་རེད། ཁོང་གི་སྒྲུང་གཏམ་ཁྲོད་དུ་སེར་མོ་བ་དེ་དག་གི་འཐུས་མི་ནང་བཞིན་ཨ་ལགས་འབྲོང་ཞེས་པ་ཞིག་འདུག དེའི་བྱ་སྤྱོད་དང་བསམ་སྤྱོད་ཀྱིས་རྩོམ་པ་པོའི་ལྟ་བའི་ནང་གི་ཆོས་ལུགས་མི་སྣ་དེ་རིགས་མཚོན་ཡོད་པ་ནི་སྨོས་མ་དགོས་པ་ཞིག་རེད།གཞན་ཡང་ཁོང་གི་སྒྲུང་གཏམ་ཁྲོད་དུ་གྲྭ་པ་དང་བླ་མ་དེ་དག་ལ་ཞབས་འདེབས་སྒྲུབ་མཁན་ནམ་ཨ་ཡ་བྱེད་མཁན་གྱི་ཆོས་ལུགས་མི་སྣ་ཁག་གཅིག་ཡོད་པ་ནི་སྤྱིར་བཏང་གི་མང་ཚོགས་དེ་ཚོ་རེད།དེ་དག་གིས་དད་པ་བཞག་ཚུལ་དང་ཆོས་བྱེད་ལུགས་ཀྱི་རྣམ་པའི་ཐོག་ནས་སྤྱིར་བོད་མི་དམངས་ཀྱི་ཆོས་ལུགས་ཀྱི་ལྟ་བ་དེ་མཚོན་ཡོད་ཀྱང་རྩོམ་པ་པོའི་སྒེར་གྱི་བསམ་ཚུལ་གྱི་ཤན་ཞུགས་ཆེ་དྲགས་པའི་དབང་གིས་སྐྱོན་ཆ་ཁ་ཤས་ཀྱང་ཡོད་སྲིད།
ཆོས་ལུགས་མི་སྣ་དེ་གཉིས་ནི་ནམ་ཡང་གཅིག་གྲོགས་གཅིག་རྟེན་གྱི་ཆ་ནས་ཆགས་ཡོད་པ་འདྲ། དེ་བས་ང་ཚོས་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣ་ལ་དཔྱད་ཚེ་མི་སྣ་མི་འདྲ་བ་སྣེ་གཉིས་ལ་དཔྱད་དགོས། གཞན་ཡང་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣ་དེ་གཉིས་ཀྱི་རྣམ་པ་ནི་དུས་ཚོད་ངེས་ཅན་གྱི་དབང་གིས་བཟོ་བསྐྲུན་བྱས་པ་རེད། ཅིའི་ཕྱིར་ཞེ་ན། དེ་ནི་སྐབས་དེའི་སྤྱི་ཚོགས་རྒྱབ་ལྗོངས་དང་འབྲེལ་བ་ངེས་ཅན་ཞིག་ཡོད་ལ། དུས་རབས་སྔོན་མའི་ལོ་རབས་དྲུག་ཅུ་པའི་དུས་སྨད་ནས་བཟུང་རིག་གནས་གསར་བརྗེའི་གོད་ཆག་ཆེན་པོ་མྱངས་པའི་ཀྲུང་གོ་རྒྱལ་ཁབ་འདིར་བཅོས་བསྒྱུར་སྒོ་འབྱེད་དང་དཔལ་འབྱོར་འཛུགས་སྐྲུན་གྱི་ཇུས་ཐབས་ལག་ཏུ་བསྟར་བས། བོད་ཡུལ་འདི་ཡང་འཕེལ་རྒྱས་ཕྱོགས་སུ་གོམ་པ་སྤོ་འགོ་བརྩམས། དེ་བས་དུས་དེར་ཆོས་ལུགས་པ་ཞིག་ཡིན་ཕྱིན་དེའི་བྱ་སྤྱོད་བཟང་ངན་ལ་མི་ལྟ་ནས་དད་འབངས་དེ་ཚོས་དེ་ལ་ཆབས་གཅིག་ཏུ་དད་པ་འཇོག་གི་ཡོད་པ་རེད། དེའི་ཕྱིར་ཆོས་ལུགས་མི་སྣ་དེ་རིགས་ནི་འཚོ་བ་དངོས་དང་བར་ཐག་ཇེ་རིང་དུ་འགྲོ་བཞིན་ཡོད་པ་དང་འཚོ་བ་དངོས་དང་མི་མཐུན་པའི་བྱ་སྤྱོད་མང་པོ་བྱུང་བས་ན་ཚེ་རིང་དོན་གྲུབ་ཀྱི་སྒྲུང་གཏམ་གྱི་སྒྱུ་ཆའང་ཏག་ཏག་དེ་དག་གིས་གྲུབ་ཡོད་པ་རེད།
༢ གོང་བླ་མའི་རུལ་སོང་གི་རང་བཞིན་དང་འོག་དད་འབངས་ཀྱི་རྨོངས་དད་རང་བཞིན་སྐོར།
དེ་ཡང་ང་ཚོས་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣ་ཞེས་པ་དེ་ལ་ངོས་འཛིན་ཡང་དག་ཅིག་བྱས་རྗེས་དེ་དག་གི་སྣང་བརྙན་ལ་ཡང་ཁོང་གི་བརྩམས་སྒྲུང་དངོས་དང་སྦྲགས་ནས་དབྱེ་ཞིབ་ཆ་ཚང་བ་ཞིག་བྱེད་ཆོག
༼༡༽ཚེ་འདི་ཕྱི་གཉིས་ཀྱི་སྐྱབས་གནས་ཟེར་ཡང་གྱོད་འཁོན་རྩ་གཉིས་ཀྱི་འབྱུང་ཁུངས་ཡིན་པ།
༼ཡ་ང་བའི་སྐྱ་རེངས༽དུ་ཡ་ང་བའི་གནས་ཚུལ་འདི་འདྲ་བྱུང་དགོས་པའི་གཞི་རྩ་ནི་དམ་པའི་ཆོས་ཀྱི་བདག་འཛིན་པ་དེ་དག་ལ་ཐུག་ཡོད་དོ།དེ་བས་ང་ཚོས་ཐོག་མར་སྒྲུང་དེའི་ནང་དོན་མ་ཤེས་ན་དཔྱད་པ་གཏོང་དཀའ་བས་དེའི་ནང་དོན་མདོར་བསྡུས་ཙམ་བཤད།སྒྲུང་གཏམ་འདི་ནི་སྐྱོ་གར་ཁྲོད་ཀྱི་སྐྱོ་གར་ཡིན་ལ། དེའི་ནང་དུ་དང་ཐོག་གི་གྱོད་གཞི་ནི་རྟ་ཞིག་གི་ཆེད་དུ་བྱུང་བ་རེད།སྐབས་གཅིག་ལ་ཐམས་ཅད་མཁྱེན་པ་ཞེས་པའི་བླ་མ་ཞིག་སྡེ་དཔོན་ཐུབ་བསྟན་ཉི་མའི་སྡེ་བ་ནང་དུ་ཡོང་ནས་ཆོས་གསུངས་ཤིང་།དེ་དུས་དཔལ་བཟང་གི་སྡེ་བའི་ནང་གི་མི་ཡོངས་རྫོགས་སྡེ་བ་དེའི་ནང་དུ་ཆོས་མཇལ་ལ་ཡོང་བ་མ་ཚད་རང་ལ་འབུལ་བ་ཅི་ཡོད་རེ་ ཐམས་ཅད་མཁྱེན་པ་ལ་འབུལ་ཞིང་། དེའི་ཁྲོད་དུ་དཔལ་བཟང་གི་སྙིང་གི་གཅེས་ནོར་ལྟ་བུའི་རྟ་དེའང་ཡོད། ཐམས་ཅད་མཁྱེན་པས་རྟ་དེ་ནི་ཐུབ་བསྟན་ཉི་མ་ལ་སྤྲད་པ་དེ་དཔལ་བཟང་གིས་ཤེས་ནས་རྟ་དེ་རང་གིས་ཚུར་བླངས་པ། མ་ཚད་དཔལ་བཟང་གི་ཚིག་ལས་ང་ཚོས་ཆོས་ལུགས་མི་སྣའི་སྣང་བརྙན་གསལ་བོར་མཐོང་ཐུབ་ཀྱི་འདུག ཐམས་ཅད་མཁྱེན་པས་ཡར་དཀོན་མཆོག་ལ་མཆོད་པ་མ་ཕུལ། མར་དབུལ་ཕོངས་ལ་སྦྱིན་པ་མ་གནང་བར་ཏག་ཏག་ཟས་སྣོད་ལ་མི་ཆུད་། ཕྱུགས་ས་ལ་མི་ཆུད་པའི་ཕྱུག་པོ་ཁྱོད་ལ་གནང་དོན་ཅི་ཡིན།ཞེས་པའི་ཚིག་འདི་ལས་སྐབས་དེར་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་ཆོས་ལུགས་མི་སྣའི་ནང་གི་བླ་མདེ་དག་ནི་ཕྱུག་པོའི་ཁེ་ཕན་དང་ལངས་ཕྱོགས་གཅིག་ཡིན་པ་དང་ཕྱུག་པོ་དང་ཆབས་གཅིག་སྤྱིར་བཏང་གི་བོད་མི་མང་ཚོགས་ལས་ཅི་ཟ་ཅི་ཐུབ་བྱེད་ཀྱི་ཡོད་པ་ཞིག་རེད། འགལ་བ་གཉིས་པ་དེ་ནི་ནོར་བུ་དང་དཔལ་བཟང་གཉིས་ཀྱི་འགལ་བ་དེ་རེད། དེའི་ནང་གི་ནོར་བུ་ནི་སྡེ་དཔོན་ཐུབ་བསྟན་ཉི་མ་ཚང་གི་གནག་རྫི་ཡིན་པ་དང་། དུས་རྒྱུན་ཐུབ་བསྟན་ཉི་མས་ཁོ་ལ་རྒྱབ་ཀྱི་གོས་དང་ལྟོའི་ཟས་ཅུང་ཙམ་སྦྱིན་གྱིན་ཡོད་པ་དེ་ཕྱིར་ནོར་བུས་ཐུབ་བསྟན་ཉི་མ་རང་གི་དྲིན་ཆེན་ཕ་མ་བཞིན་དུ་བཟུང་གི་འདུག ང་ཚོས་ཁོའི་ཚིག་འདི་ལས་སྐབས་དེའི་ནོར་བུ་བསམ་མནོ་དེ་ཤེས་ཐུབ། ས་རུབ་ནས་རྒྱང་མི་མཐོང་ནའང་ནོར་བུ་བཟའ་ཟླ་གཉིས་ཀྱི་ཁྱིམ་ན་མེ་དམར་ལྷབ་ལྷུབ་འབར་བཞིན་པ་ཕྱོགས་བཞི་ག་ནས་བལྟས་ཀྱང་མཐོང་ཐུབ། ནོར་བུས་ཤིང་ཕུར་ཞིག་གིས་རང་གི་མདུན་ལ་མེ་ཞིག་བདལ་རྗེས་ཐུབ་བསྟན་ཉི་མས་བྱིན་པའི་སློག་པ་དེ་གམ་ལ་བླངས་པ་ན་ཆུང་མ་ཀུན་བཟང་འཚོའང་ཁོའི་གམ་ལ་ནུར་ཞིང་བཟའ་ཟླ་གཉིས་ཀས་མཚམས་རེར་སློག་པའི་སྐྱི་མོ་གོང་མཛུབ་དང་མཐེ་བོང་གཉིས་ཀའི་བར་ལ་བཟུང་ནས་ཕུར་ཕུར་བྱེད་པ་དང་མཚམས་རེར་སློག་པའི་སྤུ་ལ་བྱིལ་བྱིལ་བྱེད། ནོར་བུས་སླར་ཡང་ཤིང་ཕུར་གྱིས་རང་གི་མདུན་ལ་མེ་ཞིག་བདལ་ཏེ་ཨ་ཁུ་ཐུབ་བསྟན་གྱི་དྲིན་ལ་ད་ལོའི་དགུན་འཁྱག་མིག་གིས་མཐོང་མི་དགོས།ངའི་སློག་རྙིང་འདི་ལ་ལྷན་པ་འགའ་བརྒྱབ་སྟེ་མོ་སློག་ཏུ་བསྒྱུར་ན་ཁྱོད་ཀྱིས་ཀྱང་ད་ལོའི་དགུན་འཁྱོལ་ཐུབ་ཟེར། དེའི་ནང་གི་ནོར་བུའི་ཆུང་མ་བཟང་མོ་ནི་དཔལ་བཟང་གི་སྲིང་མོ་ཡིན་པ་མ་ཚད་ཁོ་རང་དང་དཔལ་བཟང་གཉིས་ནི་གྲོགས་པོ་རེད།ཡིན་ཡང་གོང་ནས་བརྗོད་པ་ནང་བཞིན་ཁོས་སྡེ་དཔོན་ཐུབ་བསྟན་ཉི་མ་དྲིན་ཆེན་དུ་བརྩི་བའི་རྐྱེན་གྱིས་ད་གཟོད་དཔལ་བཟང་གི་སར་ཡོང་ནས་རྟ་བརྐུས་པ་དང་དེ་མ་ལོན་ནས་དཔལ་བཟང་དང་ཁྱོད་ཤི་ང་གསོན་གྱི་རྡུང་རེས་བརྒྱབ་མཐར་ཁོ་རང་དཔལ་བཟང་གིས་བསད།རྐྱེན་ངན་དེ་འདྲ་བྱུང་རྗེས་སྡེ་དཔོན་ཐུབ་བསྟན་ཉི་མས་ཁོ་རང་གི་གཅུང་པོ་བླ་མ་ཆོས་ཀྱི་ཉི་མ་ལྐོག་ཏུ་ཟི་ལིང་ཁར་རྨ་པུའུ་ཧྥང་ལ་དཔུང་རོགས་འཚོལ་དུ་མངགས་ནས་དཔལ་བཟང་གསོད་བརྩིས་བྱས། བླ་མ་ཆོས་ཀྱི་ཉི་མས་མང་ཚོགས་ཀྱི་ཁྲོད་ནས་ཁོང་ཉིད་ནི་སྐུ་འབུམ་དུ་ཆོས་འཇལ་བྱེད་དུ་འགྲོ་བ་ལ་ཁ་གཡར། དེ་ལས་ང་ཚོས་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣ་ནི་ཁ་ཁོག་མི་གཅིག་པ་དང་མང་ཚོགས་ཀྱི་དད་སེམས་བེད་སྤྱོད་བྱེད་ནས་མང་ཚོགས་ལ་མགོ་སྐོར་གཏོང་བ་དེ་ཤེས་ཐུབ་བོ།འོ་ན་སྐབས་དེར་ཆོས་ལུགས་མི་སྣ་གཞན་གཅིག་སྟེ་དད་འབངས་དེ་རིགས་ཀྱི་རྣམ་པ་ནི་དཔལ་བཟང་གི་ཚིག་འདི་ལས་གསལ་མོར་ཤེས་ཐུབ་ལ།བླ་མ་ཆོས་ཀྱི་ཉི་མ་ཟི་ལིང་ཁར་རྨ་པུའུ་ཧྥང་ལ་གཏུག་ནས་སོང་བའི་གནས་ཚུལ་དེ་དཔལ་བཟང་གི་གྲོགས་པོ་དག་གིས་ཁོ་རང་ལ་ལབས་ཚེ། དཔལ་བཟང་གིས་ནི་འདི་ལྟར་ལན་བཏབ་པ་ལ། ཨེ་གྲོགས་པོ་བཟང་པོ། དེ་ཁྱོད་འཆུག་སོང་།རྩ་བ་ནས་འཆུག་སོང་། ཆོས་ཀྱི་ཉི་མ་ཚང་ཐུབ་བསྟན་ཉི་མ་དང་གཏན་ནས་མི་མཚུངས།ཁོང་ནི་ཐམས་ཅད་མཁྱེན་པས་ཐུགས་ཐག་བཅད་པ་ཡིན་ཞིང་མ་གྱུར་སེམས་ཅན་ཐམས་ཅད་ལ་ཆགས་སྡང་སྤུ་ཙམ་ཡང་མེད།གལ་ཏེ་ཁོང་ལ་སྡང་ས་གཅིག་ཡོད་ཟེར་ན་དེ་ནི་ཏག་ཏག་མྰ་ཇག་ཚང་ཡིན།ལྷག་པར་དུ་ཁོང་སྐུ་འབུམ་ལ་མཇལ་དུ་ཕེབས་རྒྱུར་དོན་དག་དེ་མ་བྱུང་གོང་ནས་གྲ་སྒྲིག་ཡོད་པ་ངས་གོ་མྱོང་།དེར་ཁྱོད་གཏན་གཏན་ནས་སེམས་ཁྲལ་བྱེད་མི་དགོས།”ཞེས་པའི་ཚིག་འདི་ལས་སྐབས་དེར་ཁོང་གི་སྒྲུང་གཏམ་ཁྲོད་ཀྱི་དད་འབངས་དེ་དག་གི་རྣམ་པ་ནི་རང་མགོ་རང་གིས་གཡོགས་ནས་མཐའ་གཅིག་ཏུ་རྨོངས་པར་དད་པའི་ཡ་ང་བའི་གནས་སྟངས་ཤིག་ཡིན་འདུག
དེ་བས་ང་ཚོས་སྒྲུང་གཏམ་དེའི་ཁྲོད་ནས་ཆོས་ལུགས་མི་སྣའི་སྣང་བརྙན་དེ་གསལ་བོར་མཐོང་ཐུབ་ཀྱི་འདུག དེ་ནི་སྒྲུང་གཏམ་འདིའི་ནང་གི་ཆོས་ལུགས་པའི་སྣང་བརྙན་ཁོ་ན་མ་ཡིན་པར་རྒྱ་ཆེ་བའི་བོད་ཀྱི་སྤྱི་ཚོགས་ནང་གི་ཆོས་ལུགས་མི་སྣའི་ཐུན་མོང་གི་རྣམ་པ་དང་ངོ་བོ་ཞིག་ཡིན་ཤས་ཆེ།
༼༢༽ཡོད་ཚད་སྒོར་མོ་ཡི་དོན་གཡོ་འཚོང་བྱེད་པ་དང་ནང་སྡར་མའི་ངོ་བོ་ཕྱི་སྐྱེས་ཆེན་དམ་པའི་ཚུལ་འཆོས་ཅན།
ཡང་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་ཆོས་ལུགས་མི་སྣའི་ངོ་བོ་གཞན་ཞིག་ནི་ང་ཚོས་ཁོང་གི་སྒྲུང་གཏམ༼རླུང་ནང་འཚུབ་མ༽ཞེས་པ་འདི་ལས་གསལ་བོར་མཐོང་ཐུབ་ཀྱི་འདུག ཐོག་མར་དེའི་ནང་དོན་མདོར་བསྡུས་ཙམ་ངོ་སྤྲོད་བྱེད་པ་དང་སྦྲགས་ནས་ང་ཚོས་ཆོས་ལུགས་མི་སྣ་དེ་དག་གི་སྣང་བརྙན་གསལ་བོར་མཐོང་ཐུབ་བོ། དེ་བས་སྒྲུང་གཏམ་འདི་ནི་སྤྱིར་བཏང་གི་འབྲོག་པའི་ཕོ་མོ་གཉིས་ཀྱི་བརྩེ་དུང་ལས་འགོ་བརྩམས་འདུག དེའི་ནང་གི་ན་གཞོན་མ་དེ་དང་ན་གཞོན་པ་དེ་གཉིས་ནི་ཕན་ཚུན་ལ་བརྩེ་འདང་ཤིན་ཏུ་ཆེ་བའི་ན་གཞོན་ཕོ་མོ་གཉིས་ཡིན་ལ། ན་གཞོན་མ་དེ་ནི་མོ་རང་གི་ཨ་ཕས་འབྲི་གཅིག་གི་ཚབ་ཏུ་སྟོང་དཔོན་ལ་སྟེར་བ་དང་། དེ་བས་ཁོང་གཉིས་ནི་མཉམ་གཅིག་ཏུ་ལྷ་ས་ལ་བྲོས་བརྩིས་བྱས་པ། བྲོས་ཁར་སྡེ་བ་དེའི་བླ་མ་ཨ་ལགས་འབྲོང་གི་དྲུང་ན་སོང་ནས་སྐྱབས་འཇུག་ཞུས་པ་དང་གནས་ཚུལ་ཚང་མ་སྦ་གསང་ཅི་ཡང་མ་བྱས་ནས་ཨ་ལགས་འབྲོང་ལ་ཞུས། དེའི་སྐོར་ནི་འདི་ལྟར་བྲིས་ཡོད་ལ་“ཕངས་པ་ཞིག་ནི་རང་ལ་གནའ་མིའི་གཏམ་དཔེ་ལྟར་མགོ་ན་སྐྲ་ལོ་སྤར་བ་གང་དང་སྐེ་ན་སྲུང་མདུད་སྤར་བ་གང་མ་གཏོགས་ཅི་ཡང་མེད། ཁོས་དེ་ལྟར་བསམ་བ་དང་མཉམ་དུ་ཨ་ལགས་འབྲོང་གིས་བྱིན་པའི་སྲུང་མདུད་དེ་ཡིད་ལ་ཤར་ནས་མྱུར་དུ་ཁོ་མོའི་སྐེ་ལ་མདུད་དེ་འབྲོང་རིན་པོ་ཆེས་འུ་གཉིས་ལ་བར་ཆད་ཉེན་ཁ་ཅི་ཡང་མེད་གསུངས་བྱུང་། ད་ཁྱོད་མ་ངུ་ཟེར་།”དེ་ལས་སྐབས་དེར་ན་གཞོན་ཕོ་མོ་དེ་གཉིས་ཀྱིས་ཨ་ལག་འབྲོང་ནི་རང་གི་མི་ཚེའི་སྐྱབས་གནས་ཀྱི་སར་བཞག་ཡོད་པ་མ་ཚད་མི་ཚེའི་རེ་བའང་ཁོང་ཉིད་ལ་བཅོལ་ཡོདཔ་དེ་ཤེས་ཐུབ། ཨ་ལགས་འབྲོང་གིས་ནི་ཁོ་རང་གཉིས་ཀྱི་གསང་བ་དེ་སྒོར་མོའི་ཆེད་དུ་སྟོང་དཔོན་ལ་བཤད་ནས་ན་གཞོན་མ་དེ་ཕྱིར་འཛིན་བཟུང་བྱས། དེ་རྗེས་ན་གཞོན་དེ་ནི་རྩེ་གཞུང་རྩྭ་ཐང་དུ་གྲགས་པའི་ཇག་པར་གྱུར་ནས་མིང་ལའང་ཇག་པ་རྟ་ནག་ཅན་ནམ་རླུང་ནག་འཚུབ་མར་གྲགས། ཁོ་རང་དུས་རྒྱུན་ཨ་ལགས་འབྲོང་ཡོད་སའི་དགོན་པ་དང་རང་གི་སྙིང་བརྩེ་བའི་ན་གཞོན་མ་ཡོད་སའི་སྟོང་དཔོན་གྱི་ས་ནས་ཕར་འགྲོ་ཚུར་འགྲོ་བྱེད་ནས་ན་གཞོན་མ་དེ་ཚུར་ལེན་པའི་ལས་ལ་འབད་པ་རེད། སྐབས་དེར་ཨ་ལགས་འབྲོང་གིས་ནི་ཡང་མང་ཚོགས་ཐམས་ཅད་ལ་མགོ་སྐོར་བཏང་འདུག སྒྲུང་འདིའི་ནང་ལ་འདི་ལྟར་བྲིས་འདུག “དེ་ལས་ལྡོག་སྟེ་ཨ་ལག་འབྲོང་གིས་དེ་ནི་ཀླ་ཀློའི་ཡུལ་ནས་ཡོང་བའི་འདྲེ་རྒོད་ཅིག་ཡིན་པར་མ་ཟད་ད་རུང་འདུལ་བའི་དུས་ལ་བབས་མེད་པས་ཁོས་ཀྱང་བཏུལ་མ་ཐུབ་ལ་སུས་ཀྱང་འདུལ་མི་ཐུབ་པས་རིམ་གྲོ་རྒྱ་ཆེན་མ་བསྒྲུབ་ན་སེམས་ཅན་ལ་གནོད་པ་ཆེ་རབས་དང་། འདྲེ་རྒོད་དེས་ཁོའི་ཐོད་པར་མེ་མདའ་གཏད་ནས་བརྒྱབ་ནའང་ཆོས་སྐྱོང་སྲུང་མས་དེའུ་བོའུ་ཁོག་གི་མདེའུ་བླངས་སོང་བས་ཁོ་བོར་སྐྱོན་གྱིས་མ་གོས་སྐུ་མདོག་དཀར་ནའང་གཞན་རྣམས་དེ་དང་འཕྲད་ན་དེ་འདྲ་མིན་རབས་བཤད་དེ་རྩེ་གཞུང་སྡེ་བ་གོང་བར་ཞོལ་གསུམ་གྱི་མི་ཁྱི་གཉིས་ཀ་འུར་འུར་ཟིང་ཟིང་བཟོས། ཞེས་པ་འདི་ལས་ཀྱང་ཆོས་ལུགས་མི་སྣའི་ནང་སྡར་མའི་ངོ་བོ་དང་ཕྱི་སྐྱེས་ཆེན་དམ་པའི་ཚུལ་འཆོས་དེ་གསལ་བོར་མཐོང་ཐོབ་བོ།
༼༣༽ཉེས་མེད་ལ་ཉེས་པ་བསྐྱོན་མཁན་དང་ལོང་གཏམ་གྱིས་བུད་མེད་མགོ་སྐོར་གཏོང་མཁན།
སྤྱིར་བྱས་ན་བླ་མ་ཞེས་པ་ནི་སེམས་ཅན་ཐམས་ཅད་ལ་མ་ལྟར་བརྩེ་བའི་དོན་ཡིན་ལ། འོ་ན་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་བླ་མ་ནི་རང་གི་ཅི་འདོད་ཀྱིས་ཉེས་མེད་ལ་ཉེས་པ་བསྐྱོན་མཁན་དང་འགྲོ་བ་སེམས་ཅན་རང་གི་བུ་བཞིན་དགོངས་པ་ནི་ཕར་ཞོགས། གཞན་གྱི་ཚེ་སྲོག་ནི་སྣང་མེད་དུ་འཇོག་པ་དང་གཞན་གྱི་རྒྱུ་ནོར་ངོ་ཚ་ཁྲེལ་མེད་ཀྱིས་བགོ་བཤའ་བྱེད་པའི་མི་ངན་ཐ་ཤལ་ཞིག་གི་སྣང་བརྙན་དུ་བཟོས་འདུག དེ་ནི་ང་ཚོས༼རྩེ་ཆུས་ཁྲེལ་དགོད་བྱེད་བཞིན༽དང༼ཡུགས་མོ༽ཞེས་པའི་སྒྲུང་འདི་དག་གི་ནང་ནས་སྣང་བརྙན་དེ་མངོན་གསལ་དོད་པོ་ཞིག་མཐོང་ཐོབ་ཀྱི་ཡོད་ལ།དེ་དག་དང་བསྟུན་ནས་ཅུང་ཙམ་བཤད་ན་འདི་ལྟར་ཏེ། ༼ཡུགས་མོ་༽ཞེས་པའི་སྒྲུང་འདིའི་ནང་གི་མི་སྣ་གཙོ་བོ་དབྱངས་ལོ་ནི་ཐེངས་དགུ་ལ་ཡུགས་མོར་བུད་མྱོང་བ་ཞིག་ཡིན་ལ།ང་ཚོ་བོད་ཀྱི་སྤྱི་ཚོགས་ནང་ནས་དེ་འདྲ་ལ་སྣ་ནག་མ་ཞེས་འབོད་ཀྱི་ཡོད་པ་རེད།དེ་བས་སྒྲུང་གཏམ་དེའི་ཁྲོད་ཀྱི་དབྱངས་ལོ་ནི་ལས་ངན་དེ་འདྲའི་དབང་གིས་སྡུག་བསྔལ་ལྡན་པ་དང་ཡ་ང་བའི་མི་ཚེ་ཞིག་རོལ་དགོས་ངེས་རེད། མོ་རང་སྐབས་དེར་མི་ཚེ་གསར་སྤྱོད་བྱས་ནས་འཚོ་བ་སྔར་ལས་ཅུང་ཙམ་བདེ་སྐྱིད་ལྡན་པ་ཞིག་ཡིན་མོད། འོསྐབས་དེར་སྡེ་བ་དེར་ཆུ་ལོག་བྱུང་ནས་མོ་ཉིད་ཀྱི་ཁྱོ་གའི་ཚེ་སྲོག་ཀྱང་ཤོར་། དེ་ལས་སྙིང་རྗེ་བ་ནི་སྡེ་བ་དེའི་མགོན་སྐྱོབས་ཟེར་བའི་་ཨ་ལགས་འབྲོང་གིས་ལོང་མེད་ཀྱི་རྫུན་ལབས་ནས་མོ་རང་ཉེས་མེད་ཞིག་ལ་ཉེས་པ་བསྐྲུན་པ་རེད།དེའི་སྐོར་ནི་བཀོད་འབྲི་འདི་འདྲ་བྱས་ཡོད། དགོན་པའི་ནང་གི་ཨ་ལགས་འབྲོང་ཚང་གིས་མོ་རྩིས་བྱས་པ་ལྟར་ན།སེར་བ་འདིའི་འབྱུང་གཞི་ཐེངས་དགུ་ལ་ཡུགས་མོར་བུད་པའི་བུད་མེད་ཅིག་སྟེ་གསལ་བོར་བཤད་ན་དབྱངས་ལོ་ཡིན་པར་མ་ཟད།ངེས་པར་དུ་གང་མྱུར་གྱིས་དམོད་མོའི་ཆོ་ག་དང་བཅས་ཁོ་མོ་སྡེ་བ་འདི་ནས་ཕྱིར་མ་བསྐྲད་ན་ང་ཚོའི་སྡེ་བར་འདི་ད་དུང་ཆག་སྒོ་གང་མང་འབྱུང་སྲིད་ཟེར།”ནས་མཐར་དབྱངས་ལོ་རང་ལྕེབས་རྒྱག་དགོས་བྱུང་། འདི་ལས་ང་ཚོས་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་ཨ་ལགས་འབྲོང་ཞེས་པའི་སྣང་བརྙན་དེ་གསལ་བོར་མཐོང་ཐུབ་ལ། གཞན་ཡང༼རྩེ་ཆུས་ཁྲེལ་དགོད་བྱེད་བཞིན༽ཞེས་པའི་ནང་དུ་ཨ་ལགས་འབྲོང་དེ་ནི་ཡང་བུད་མེད་ལ་མགོ་སྐོང་གཏོང་མཁན་ཞིག་ཡིན་ལ།དེའི་ནང་གི་བུད་མེད་ཀླུ་མཚོ་དང་མོའི་ཨ་མ་གཉིས་ནི་དུས་རྒྱུན་ཆོས་ལ་དད་པ་ཡོད་པའི་འབངས་མི་སྤྱིར་བཏང་བ་ཞིག་ཡིན་ལ། དེ་བས་ཁོ་མོ་གཉིས་ཀྱི་འཚོ་བ་དེ་འདྲ་ཆ་རྐྱེན་བཟང་པོ་ཞིག་མིན་ནའང་ནམ་རྒྱུན་ཨ་ལགས་འབྲོང་ལ་ཞོ་དང་འོ་མ་འབུལ་ཀྱི་འདུག ཨ་ལགས་འབྲོང་གིས་ནི་བློ་ལོག་པ་བཅངས་ནས་བུ་མོ་ཀླུ་མཚོ་མགོ་སྐོར་བྱས། དེ་མ་ཚད་ངེས་མེད་ཀྱི་སྤྱོད་ངན་བསྒྲུབས་ཚར་རྗེས་ཐབས་ངན་དེ་ལས་ངན་པ་ཞིག་གིས་སྦ་གསང་བྱེད་རྩིས་བྱས། འོག་གི་ཨ་ལགས་འབྲོང་དང་ཀླུ་མཚོ་གཉིས་ཀྱི་ཁ་བརྡ་འདི་ལས་ཁོ་རང་གི་རང་བཞིན་དེ་གསལ་བོར་མཐོང་ཐུབ་ཀྱི་འདུག “ཀླུ་མཚོའི་གདུང་དམར་པོར་གྱུར་ནས་མགོ་མར་དུད་པ་ལས་ཁ་མ་གྲགས། ཁྱོད་ཀྱི་བྱིས་པའི་ཕ་སུ་ཡིན། ཨ་ཙི། དེ་ཁྱོད་ཀྱིས་གཞན་ལ་བཤད་ཡོད་དམ། མེད། འགྲིག་འདུག དེས་ན་སྐྱོན་མེད”ཚིག་འདི་ལས་ཁོས་སྐྱོན་མེད་ཟེར་དོན་ནི་ཡང་འོག་གི་ཚིག་འདི་ལས་ཤེས་ཐུབ་ཀྱི་འདུག དེ་ནི་ཨ་ལགས་འབྲོང་གིས་ཀླུ་མཚོའི་མ་ལ་བཤད་པའི་སྐད་ཆ་ཞིག་རེད།“ཕྲུ་གུ་འདི་ནི་ཕྱུག་པོ་ཞིག་གི་འདས་པའི་རྣམ་ཤེས་ཡིན་པས་མི་འགྱང་བར་བདག་པོ་འབྱུང་ངེས་དང་། ཁྱོད་རང་དགའ་ནས་འདུག་འོས་ལས་བུ་མོར་ཕྲུ་གུའི་ཕ་སུ་ཡིན་ཟེར་ནས་རྒྱུན་པར་བཙན་འདྲི་བྱས་ན་ཁོ་མོ་ལོ་ཆུང་བས་ངོ་ཚ་ནས་རང་སྲོག་གཅོད་པར་ཉེན་ཁ་ཡོད་ལ། གལ་ཏེ་དེ་ལྟར་གྱུར་ན་མི་སྲོག་གཉིས་ཀྱི་སྡིག་པ་ཁྱོད་ཀྱི་མགོ་ན་ཡོད་པས་ཁྱོད་རང་ཤི་དུས་འགྲོ་ས་གང་ན་ཡོད”ཅེས་པའི་ཚིག་འདི་ལས་ཨ་ལགས་འབྲོང་གིས་རང་གི་སྤྱོད་ངན་གཡོག་པའི་ཁྱེད་དུ་མང་ཚོགས་ལ་རྫུན་ཚད་མེད་ལབས་ཀྱི་ཡོད་པ་དེ་ཤེས་ཐུབ། དེ་ནི་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ཀྱི་ཚོས་ལུགས་མི་སྣའི་སྣང་བརྙན་ཕྱོགས་གཅིག་ཡིན་ནོ།
གསུམ་པ། ཆོས་ལུགས་མི་སྣའི་སྣང་བརྙན་དེ་དག་གི་རྒྱུད་ནས་མངོན་པའི་དངོས་ཡོད་ཀྱི་འཚོ་བའི་ཆ་ཕྲན་འགའ།
༼༢༽ བོད་སྤྱི་ཚོགས་ཀྱི་ལོ་རྒྱུས་ཀྱི་ཆ་ཕྲན་ཁ་ཤས་སྟོན་ཡོད་པ།
དེ་ཡང་རྩོམ་རིག་དང་ལོ་རྒྱུས་གཉིས་ཀྱི་འབྲེལ་བ་ནི་ཁ་བྲལ་ཐབས་མེད་པ་ཞིག་ཡིན་ལ། རྩོམ་རིག་གཅིག་གི་གོང་འཕེལ་འགྲོ་ཚུལ་དང་ཁ་ཕྱོགས་སྟོན་ཚུལ་སོགས་ལས་མི་རིགས་དེའི་སྤྱི་ཚོགས་ཀྱི་ལོ་རྒྱུས་དེ་སྟོན་གྱི་ཡོད་པ་ནི་སྨོས་མ་དགོས་པ་ཞིག་རེད། དཔེ་དེ་བཞིན་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་དུའང་བོད་ཀྱི་སྤྱི་ཚོགས་ཀྱི་ལོ་རྒྱུས་ཀྱི་ཆ་ཕྲན་ཡང་མངོན་གསལ་དོད་པོ་ཞིག་འདུག དཔེར་ན་གོང་ནས་བཤད་ཚར་བའི༼ཡ་ང་བའི་སྐྱ་རིངས༽ཞེས་པའི་སྒྲུང་གཏམ་ཁྲོད་དུ་བླ་མ་ཆོས་ཀྱི་ཉི་མ་ཟི་ལིང་ཁར་སོང་ནས་རྨ་པུའུ་ཧྥང་ནས་དམག་དྲངས་པའི་སྐོར་ལས་སྐབས་དེའི་མཚོ་བོད་མཐོ་སྒང་གི་སྤྱི་ཚོགས་ཀྱི་གནས་སྟངས་དེ་གསལ་བོར་མཐོང་ཐུབ་ཀྱི་ཡོད་ལ། འོག་གི་སྐད་ཆའི་རྣམ་པ་འདི་ལས་ཆ་ཕྲན་དེ་རིགས་གསལ་བོར་ཤེས་ཐོབ་བོ།“ངས་རྨ་པུའུ་ཧྥང་ལ་དོན་དག་བཤད་དུས་ཁོ་ཧ་ཅང་ཁོང་ཁྲོ་ལངས་ནས་ཁྲལ་མི་འཇལ་བ་དེ་ང་གོ་མིན་སྲིད་གཞུང་ལ་མངོན་སུམ་འཛེམ་མེད་ཀྱིས་ངོ་རྒོལ་བྱས་པ་རེད་ཟེར་ནས་ཁོང་གིས་དངོས་སུ་དམག་ཁྲིད་ནས་ཡོང་རྩིས་བྱས”ཞེས་པའི་ཚིག་འདི་ལས་དེའི་དུས་ཀྱི་མདོ་སྨད་ཀྱི་ས་ཁུལ་ནི་རྨ་པུའུ་ཧྥང་ལ་ཁྲལ་འཇལ་དགོས་པ་མ་ཚད་དེ་མ་འཇལ་ན་ཉེན་ཁ་ཆེ་བའི་གནས་ཚུལ་དེ་དག་ཤེས་ཐུབ་བོ། གཞན་ཡང་མྰ་ཡན་ཀྲང་དང་ཐུབ་བསྟན་ཉི་མ་གཉིས་ཀྱི་ཉེ་འགྲམ་གྱི་ཁྱིམ་ཚང་ཞིག་གི་སྦྲ་ལ་མེ་འབར་བཞིན་ཡོད་པའི་ནང་ནས་ཕོ་གསར་ཞིག་གཅེར་བུར་ཕྱིར་བྲོས་ནས་འགྲོ་བ་དེར་མྰ་ཡན་ཀྲང་གིས་མེ་མདའ་གཅིག་འཕངས་ནས་དེའི་དཔུང་བ་གཡོན་པར་ཕོག་པས་ཁོས་འགྲོ་མཚམས་བཞག་སྟེ་ལག་གཡས་པསརྨ་ཁ་བསྐྱོར་ནས་འདུག་སྐབས་མྰ་ཡན་ཀྲང་གིས་རྟ་སྒའི་འོག་གི་གྲི་རིང་བཏོན་ནས་གཅིག་གཡུག་པ་ན་ཕོ་གསར་དེའི་མགོ་ཆད་ནས་ཐུབ་བསྟན་ཉི་མའི་མདུན་ལ་འགྲིལ་ཡོང་”ཞེས་པ་རྣམ་པ་བཀོད་འབྲི་འདི་ལས་རྨ་པུའུ་ཧྥང་གི་ཆ་ནས་བོད་མི་དམངས་ནི་ཁོའི་རྩེད་ཆ་ཙམ་ལས་མི་གྲས་སུའང་མི་ཐེ་བའི་ཡ་ང་བའི་གནས་ཚུལ་དེ་མཐོང་ཐུབ་ཀྱི་འདུག དེ་རིགས་ནི་སྐབས་དེའི་སྤྱི་ཚོགས་དངོས་ཀྱི་ལོ་རྒྱུས་ཆ་ཕྲན་འགའ་ཡིན་ལ་ང་ཚོས་དེའི་དུས་ཀྱི་བོད་མི་རིགས་ཀྱི་སྐྱིད་སྡུག་དེ་ཚེ་རིང་དོན་གྲུབ་ཀྱི་སྒྲུང་གཏམ་ཁྲོད་ནས་གསལ་བོར་མཐོང་ཐུབ་ཀྱི་འདུག
༼༢༽ བོད་ཀྱི་འཚོ་བ་དངོས་དང་མི་མཐུན་པའི་ཆ་ཁ་ཤས།
སྤྱིར་ཚེ་རིང་དོན་གྲུབ་ཀྱི་སྒྲུང་གཏམ་ལ་བདེན་དོན་གྱི་རིན་ཐང་ཆེན་པོ་ཡོད་ཀྱང་སྐབས་རེར་དེ་ལ་མི་མཐུན་པའི་ཆའང་ཁ་ཤས་ཡོད་སྲིད།དེ་ནི་རྩོམ་པ་པོ་སྒེར་གྱི་བསམ་ཚུལ་གྱི་ཤན་ཞུགས་ཆེ་བའི་དབང་གིས་ཡིན་ཡང་སྲིད། འདི་ལས་ང་ཚོས་རྩོམ་པ་སྒེར་ཚུགས་ཀྱི་རང་བཞིན་དེ་གསལ་པོར་མཐོང་གི་ཡོད་ཀྱང་ཕྱོགས་གཅིག་ ནས་ཀློག་པ་པོ་ཐམས་ཅད་ལྟ་ལོག་ལ་ཁྲིད་པའི་ཉེན་ཁའང་ཆེན་པོ་འདུག དེ་བས་འདིར་རང་གིས་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣའི་སྣང་བརྙན་བརྗོད་པ་བརྒྱུད་ནས་བོད་ཀྱི་སྤྱི་ཚོགས་ཀྱི་གནས་ཚུལ་དངོས་དང་མི་མཐུན་པའི་ཕྱོགས་དེ་སྒྲུང་གཏམ་དངོས་དང་བསྟུན་ནས་ཅུང་ཙམ་བཤད་འདོད།དེ་ཡང་ཁོ་རང་གི་སྒྲུང་གཏམ་ལ་ཐུན་མོང་གི་ཆ་ཞིག་ཡོད་པ་ནི་དེའི་ནང་གི་དད་འབངས་ཕལ་ཆེར་གྱིས་མི་ཚེ་གང་བོར་གསོག་འཇོག་བྱས་པའི་རྒྱུ་ནོར་མཐར་དགོན་པའི་འཛུགས་བསྐྲུན་དང་བླ་མ་ཁྲི་འདོན་བྱེད་ཡ། ཡང་ན་གནས་འཇལ་དུ་འགྲོ་རིན་ལ་རྒྱག་གི་འདུག དེ་ནི་བོད་ཀྱི་སྤྱི་ཚོགས་ཁྲོད་ཀྱི་སྤྱི་ཁྱབ་ཀྱི་གནས་ཚུལ་དངོས་ཡིན་ལ་ཡ་མཚན་དགོས་རྒྱུ་ཅི་མེད། འོ་ན་རྩོམ་པ་པོས་བྱ་སྤྱོད་དེ་ལ་རྣམ་པ་ཁྱད་མཚར་བ་གཉིས་བསྐྱོན་ཡོད་ལ། གཅིག་ནི་དགོན་པ་སྐྲུན་ཡ་དང་བླ་མ་ཁྲི་འདོན་བྱེད་ཡ་ལ་འབུལ་བའི་རྒྱུ་ནོར་དེ་དག་མང་ཚོགས་ཀྱིས་རང་མོས་བྱས་ནས་འབུལ་བ་མ་ཡིན་པ།དཔེར་ན༼ཏ་སྡེ་བའི་ཀླན་ཀ༽ཞེས་པའི་སྒྲུང་འདི་ལས་སྡེ་དཔོན་བསོད་སྐྱབས་ཀྱིས་སྒོར་མོ་བཙལ་སྐབས་སྐད་ཆ་འདི་འདྲ་ལབས་ཡོད་ལ་ཚང་མས་གོ་དགོས་པ་ནི་ད་ཐེངས་འདུ་ཁང་བཞེང་རྒྱུ་འདི་སྤྱིར་ན་འགྲོ་དོན་ཡིན་པས་གལ་ཏེ་སུ་ཚང་གིས་སྒོར་མོ་མ་ཕུལ་ན་དེ་ཚང་སྡེ་གྲལ་ནས་འཕུད་རྒྱུ་ཡིན”ཞེས་པའི་ཚིག་འདི་ལས་བཙན་དབང་གི་ཆ་ཞིག་ངོམ་ཡོད་ལ། རང་གིས་བསམ་ན་དེ་ནི་བོད་ཀྱི་སྤྱི་ཚོགས་ནང་གི་དངོས་ཡོད་གནས་ཚུལ་དང་མི་མཐུན་ས་གཅིག་རེད། ཕལ་ཆེར་རྩོམ་པོ་པོས་བཀོད་འབྲི་འདི་འདྲ་བྱེད་དགོས་པའི་རྒྱུ་རྐྱེན་ནི་མིག་སྔར་འཚོ་བའི་ཁྲོད་དུ་ཡོད་པའི་ཆོས་ལུགས་པའི་ནག་ཉེས་ཁ་ཤས་ལ་ཐེར་འདོན་བྱེད་དགོས་པའི་ཆེད་དུ་ཡིན་པ་འདྲ། རང་ཉིད་ཀྱིས་བསམ་ན་དེ་ལ་དངོས་ཡོད་ཀྱི་རིན་ཐང་དེ་འདྲ་ཡག་པོ་ཞིག་མི་འདུག ད་དུང་བོད་ཀྱི་གནས་ཚུལ་དང་མི་མཐུན་པའི་ཕྱོགས་གཅིག་ནི་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་པ་དེ་དག་ཕལ་ཆེར་གནས་མཇལ་ལ་འགྲོ་བཞིན་འདུག དེ་ནི་བོད་ལ་ཆ་བཞག་ན་སྤྱིར་སྟངས་ཀྱི་བྱ་སྤྱོད་ཅིག་རེད། རྩོམ་པ་པོས་དེ་དག་ལ་ཐུན་མོང་གི་གྲུབ་འབྲས་ཤིག་ཁ་བསྣོན་བྱས་ཡོད་པ་ན་འགྲོ་མི་ཚང་མ་ལ་འཇུག་འབྲས་ཡག་པོ་བྱུང་མི་འདུག དཔེར་ན༼མེད༽ཅེས་པའི་སྒྲུང་འདིའི་ནང་དུ་འདི་ལྟར་བྲིས་ཡོད་དེ་ཐེངས་དང་པོར་ལྷ་སར་འགྲོ་དུས་ངེད་ཚང་ཡུལ་ཚོ་ཡོངས་ནས་ཆེས་ཕྱུག་པའི་ཁྱིམ་ཚང་ཞིག་ཡིན།ཐེངས་གཉིས་པར་འགྲོ་དུས་ལ་ལི་གོང་མ་ལ་ལི་འོག་མ་ཡིན། ཐེངས་གསུམ་པར་འགྲོ་དུས་ཀྱང་ཕྱུགས་ཚང་མ་བཙོང་ནས་ཕལ་ཆེར་སྒོར་སྟོང་གསུམ་ལྷག་ཡོད་ཅེས་ཟེར། འོན་ཀྱང་ཕངས་སེམས་སྐྱེས་པ་ཞིག་ནི་ཐེངས་གསུམ་པར་ལྷ་ས་འགྲོ་བའི་ལམ་ཁར་རླངས་འཁོར་ཁ་ལོ་འཁོར་ནས་རྒན་པོ་བསྟན་རྒྱམ་གྱི་ལག་མགོ་བཅད།མགོན་པོི་ཆུང་མ་བསད། བུ་མོའི་མགོ་པགས་བཤོས་སོང་ཞེས་ནས་བྲིས་ཡོད་པ་འདི་ལས་ང་ཚོས་གྲུབ་འབྲས་ངན་པ་དེ་གསལ་མོར་མཐོང་ཡོད་ལ། དེ་ནི་སྒྲུང་དེའི་ཁེར་རྐྱང་གི་བཀོད་འབྲི་མིན་ལ་ཚེ་རིང་དོན་གྲུབ་ཀྱི་སྒྲུང་གཏམ་མང་པོའི་ཁྲོད་དུ་དེ་དང་མཐུན་པའི་ཆ་མང་པོ་བཀོད་འབྲི་བྱས་འདུག གནས་ཚུལ་དེ་འདྲ་ནི་ཆེས་ཉུང་ཉུང་ནང་གི་ཉུང་ཉུང་ཡིན་ལ་དེས་ཆོས་ལུགས་མི་སྣའི་སྤྱིའི་གནས་ཚུལ་མཚོན་མི་ཐུབ་པའི་སྐྱོན་ཆ་འདུག གནས་ཚུལ་དེ་གཉིས་ནི་ཁོང་གི་སྒྲུང་གཏམ་ཁྲོད་ཀྱི་མི་འདང་ས་ཁ་ཤས་ཡིན་པར་སྣང་ངོ།།
མཇུག་བསྡུ་བའི་གཏམ།
མི་རིགས་གང་འདྲ་ཞིག་ཡིན་ཡང་དེའི་དུས་སྐབས་སོ་སོའི་རྩོམ་རིག་འཕེལ་འགྱུར་གྱི་ཁ་ཕྱོགས་དང་དེའི་བརྗོད་བྱས་ངེས་པར་དུ་སྐབས་དེའི་སྤྱི་ཚོགས་གྱི་ནང་གི་འགལ་བ་གཙོ་བོ་དེ་མཚོན་ཡོད་ལ།དེ་བས་ཚེ་རིང་དོན་གྲུབ་ཀྱི་སྒྲུང་གཏམ་ལ་དེང་སང་བོད་ཀྱི་རྩོམ་རིག་ཁྲོད་དུ་གདེང་འཇོག་དེ་འདྲ་མཐོན་པོ་ཞིག་ཐོབ་པའི་རྒྱུ་མཚན་ཡང་ཁོང་གི་སྒྲུང་གཏམ་གྱི་བརྗོད་བྱ་ནི་བོད་ཀྱི་སྤྱི་ཚོགས་དངོས་དང་ཁ་མཐུན་པའི་དབང་གིས་ཡིན་རྒྱུ་རེད།ཁོང་གི་སྒྲུང་གཏམ་གྱི་བརྗོད་བྱའི་འཕེལ་རིམ་ཡང་དང་ཐོག་མཚོ་བོད་མཐོ་སྒང་གི་འབྲོག་པའི་འཚོ་བ་དང་དེའི་ནང་དུ་འཚོ་བཞིན་ཡོད་པའི་འབྲོག་མིའི་གཤིས་ཀ་ཞིག་གསར་བསྐྲུན་བྱས་ཡོད་པ་དང་། རྗེས་སུ་དེང་རབས་སྤྱི་ཚོགས་ཁྲོད་ཀྱི་དངོས་ཡོད་ཀྱི་གནས་ཚུལ་སྒྲུང་གི་བརྗོད་བྱར་གྱུར་འདུག དེ་བས་ཁོང་གི་སྒྲུང་གཏམ་ཁྲོད་ཀྱི་ཆོས་ལུགས་མི་སྣའི་སྣང་བརྙན་ནི་མང་ཕལ་ཆེར་ཐེར་འདོན་དང་ཟུར་ཟ་རྐྱང་རྐྱང་སྒོ་ནས་ཡིན་ལ། མ་ཚད་དེའི་ནང་གི་བརྗོད་སྟངས་ཁ་ཤས་ལ་བོད་ཀྱི་དངོས་ཡོད་འཚོ་བ་དང་མི་མཐུན་པ་འང་མང་པོ་ཡོད་ལ། དེ་བས་ང་རང་གིས་བསམ་ན་ང་ཚོས་རྩོམ་པ་པོ་གང་སུ་ལ་གདེང་འཇོག་བྱས་ཀྱང་ངེས་པར་དུ་ཕྱོགས་སོ་སོ་ནས་དཔྱད་པ་ཆ་ཚང་གཏོང་དགོས། །