བཤམས་སྟོན་ཁང་དུ་ཉར་བའི་རིག་གནས་ཤུལ་དངོས་བདག་སྐྱོང་བྱ་ཐབས་།

དོན་ཚན་སོ་དྲུག་པ། དངོས་མང་བཤམས་སྟོན་ཁང་དང་། དཔེ་མཛོད་ཁང་། དེ་བཞིན་རིག་གནས་ཤུལ་དངོས་བསྡུ་ཉར་བྱ་མཁན་སྡེ་ཚན་གཞན་དག་བཅས་སོ་སོས་ཉར་ཚགས་བྱས་པའི་རིག་གནས་ཤུལ་དངོས་རྣམས་ངེས་པར་དུ་རིག་གནས་ཤུལ་དངོས་རིམ་པ་དབྱེ་རྒྱུ་དང་། དེ་དག་སྐོར་གྱི་ཡིག་ཚགས་བཟོ་རྒྱུ། དོ་དམ་ལམ་ལུགས་དམ་ནན་འཛུགས་རྒྱུ་བཅས་དང་འབྲེལ་གཙོ་སྐྱོང་བྱེད་མཁན་རིག་གནས་ཤུལ་དངོས་སྲིད་འཛིན་སྡེ་ཁག་ལ་ཐོ་འགོད་སྙན་སེང་ཞུ་དགོས།
རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་རིག་གནས་ཤུལ་དངོས་སྲིད་འཛིན་སྡེ་ཁག་སོ་སོས་སྲིད་འཛིན་ས་ཁོངས་དེ་གའི་བཤམས་སྟོན་ཁང་དུ་ཉར་ཚགས་བྱས་པའི་རིག་གནས་ཤུལ་དངོས་སྐོར་གྱི་ཡིག་ཚགས་བཟོ་དགོས་པ་དང་། རྒྱལ་སྲིད་སྤྱི་ཁྱབ་ཁང་གི་རིག་གནས་ཤུལ་དངོས་ཉར་ཚགས་བྱས་རིགས་སྐོར་གྱི་ཡིག་ཚགས་དང་དེས་གཙོ་སྐྱོང་བྱེད་པའི་གཞུང་ལ་དབང་བའི་རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱི་བཤམས་སྟོན་ཁང་དུ་ཉར་ཚགས་བྱས་པའི་རིག་གནད་ཤུལ་དངོས་ཀྱི་ཡིག་ཚགས་བཟོ་དགོས།
དོན་ཚན་སོ་བདུན་པ། རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱིས་གཤམ་གསལ་གྱི་བྱ་ཐབས་ལ་བརྟེན་ནས་རིག་གནས་ཤུལ་དངོས་ཐོབ་ཆོག་པ་སྟེ།
（གཅིག）ཉོ་སྒྲུབ་དང་།
（གཉིས།）ལེགས་སྐྱེས་ཕུལ་བ་དང་ལེན་ཞུ་བ།
（གསུམ།）ཁྲིམས་ལྟར་བརྗེ་རེས་བྱེད་པ།
（བཞི།）བཅའ་ཁྲིམས་དང་སྲིད་འཛིན་ཁྲིམས་སྲོལ་ནང་གཏན་འབེབས་བྱས་པའི་བྱ་ཐབས་གཞན་དག་བཅས།
གཞུང་ལ་དབང་བའི་རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱིས་ད་དུང་རིག་གནས་ཤུལ་དངོས་སྲིད་འཛིན་སྡེ་ཁག་གིས་དམིགས་འཛུགས་ཀྱིས་ཉར་ཚགས་དོ་དམ་མམ་གཏོང་སྤྲོད་བྱེད་ཐབས་ལ་བརྟེན་ནས་རིག་གནས་ཤུལ་དངོས་ཐོབ་ཆོག
དོན་ཚན་སོ་བརྒྱད་པ། རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱིས་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་སྲུང་སྐྱོབ་བྱ་རྒྱུའི་དགོས་མཁོར་གཞིགས་ནས་རྒྱལ་ཁབ་ཀྱི་འབྲེལ་ཡོད་གཏན་འབེབས་ལྟར་དོ་དམ་ལམ་ལུགས་འཛུགས་པ་དང་འཐུས་སྒོ་ཚང་དུ་གཏོང་དགོས་པ་མ་ཟད། གཙོ་སྐྱོང་བྱེད་མཁན་རིག་གནས་ཤུལ་དངོས་སྲིད་འཛིན་སྡེ་ཁག་ལ་ཐོ་འགོད་སྙན་སེང་ཡང་ཞུ་དགོས། ཆོག་མཆན་མ་ཐོབ་ན་སྡེ་ཚན་གང་ཞིག་གམ་སྐྱེ་བོ་སུ་ཞིག་གིས་ཀྱང་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་སྐོར་ལེན་བྱས་མི་ཆོག
རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱི་ཁྲིམས་བཀོད་འཐུས་ཚབ་པས་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་ཉེན་མེད་ཡོང་བའི་འགན་འཁུར་དགོས། གཞུང་ལ་དབང་བའི་རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱི་ཁྲིམས་བཀོད་འཐུས་ཚབ་ལས་གནས་ལས་བྲལ་སྐབས་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་རྩིས་སྤྲོད་འགྲོ་ལུགས་འགྲིམས་དགོས།
དོན་ཚན་སོ་དགུ་པ། རྒྱལ་སྲིད་སྤྱི་ཁྱབ་ཁང་གི་རིག་གནས་ཤུལ་དངོས་སྲིད་འཛིན་སྡེ་ཁག་གིས་རྒྱལ་ཡོངས་ཀྱི་གཞུང་ལ་དབང་བའི་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་གཏོང་ལེན་བྱས་མི་ཆོག ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་མི་དམངས་སྲིད་གཞུང་གི་རིག་གནས་ཤུལ་དངོས་སྲིད་འཛིན་སྡེ་ཁག་གིས་སྲིད་འཛིན་ས་ཁོངས་དེ་གས་གཙོ་སྐྱོང་བྱེད་པའི་རིག་གཞུང་ལ་དབང་བའི་རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱི་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་གཏོང་ལེན་བྱས་ཆོག གཞུང་ལ་དབང་བའི་བཤམས་སྟོན་ཁང་ལ་ཉར་ཚགས་བྱས་པའི་རིམ་པ་དང་པོའི་རིག་གནས་ཤུལ་དངོས་གཏོང་ལེན་བྱ་དགོས་ན། རྒྱལ་སྲིད་སྤྱི་ཁྱབ་ཁང་གི་རིག་གནས་ཤུལ་དངོས་སྲིད་འཛིན་སྡེ་ཁག་ལ་ཐོ་འགོད་སྙན་སེང་ཞུ་དགོས།
གཞུང་ལ་དབང་བའི་རིག་གནས་ཤུལ་དངོས་ཉར་ཚགས་བྱེད་མཁན་སྡེ་ཚན་གྱིས་གཞུང་ལ་དབང་བའི་བཤམས་སྟོན་ཁང་ལ་ཉར་ཚགས་བྱས་པའི་རིག་གནས་ཤུལ་དངོས་གཏོང་ལེན་བྱ་རྒྱུའི་རེ་འདུན་ཞུས་ཆོག