བོད་ཀྱི་དམངས་གཞས་ཀྱི་གཞས་ཚིག་སྐོར་རགས་ཙམ་གླེང་བ།

དང་པོ། སྣ་མང་ཕུན་སུམ་ཚོགས་པའི་
དམངས་གླུའི་གཞས་ཚིག
        བོད་ཀྱི་དམངས་ཁྲོད་གཞས་ཚིག་ནི་ཚིག་དོན་རྒྱན་གང་གི་ཆ་ནས་ཀྱང་སྣ་མང་ཕུན་སུམ་ཚོགས་པ་ཞིག་ཡིན་པ་སྟེ།
        ཚེག་ཁྱིམ་གྱི་ཆ་ནས་བཤད་ན། དམངས་གླུ་ཆེས་མང་བའི་ཕྱོགས་ནི་ཚེག་ཁྱིམ་དྲུག་ལྡན་ཡིན་པ། དཔེར་ན། ང་ཚོ་འདི་རུ་འཛོམས་འཛོམས། །གཏན་དུ་འཛོམས་རྒྱུ་བྱུང་ན། །གཏན་དུ་འཛོམས་པའི་མི་ལ། །བསྙུན་གཞི་གོད་ཆག་མ་གཏོང་། །ལྟ་བུ་དང་། མང་བའི་ཕྱོགས་ནི་ཚེག་ཁྱིམ་དགུ་ལྡན་ཡིན་པ། །དཔེར་ན། རྟ་ཕོའི་མགོ་དེ་ཚེ་དབང་བུམ་པ་འདྲ། །རྟ་ཕོའི་མིག་དེ་ནག་ཆུང་སྲན་མ་འདྲ། །རྟ་ཕོའི་སྐད་དེ་སེང་གེའི་ངར་སྐད་འདྲ། །རྟ་ཕོའི་ཁ་དེ་གའུ་ཁ་རྦུད་འདྲ། །ལྟ་བུ་དང་། ཉུང་བའི་ཕྱོགས་ནི་ཚེག་ཁྱིམ་བདུན་ལྡན་ཡིན་པ། དཔེར་ན། ཞིང་ཁ་རྒྱ་ཞིང་ཕྲ་མོ་ལ། །ག་རེ་བཏབ་ཀྱང་སྐྱེ་ཡི་ཡོད། །སྲན་མ་བརྩེ་གདུང་ཟབ་མོ་དེ། །ལག་གདང་སྤྲེལ་ནས་སྐྱེ་བཞིན་ཡོད། །ཉུང་མ་ཁ་འབྲས་མཚར་པོ་དེ། །གདོང་ཚོས་བརྒྱབ་ནས་སྐྱེ་བཞིན་ཡོད། །པད་ཁ་ལྟ་བ་མཐོ་པོ་དེ། །འབོག་ཏོ་གོན་ནས་སྐྱེ་བཞིན་ཡོད། ཞེས་པ་ལྟ་བུ། ཆེས་མང་བའི་ཕྱོགས་ནི་ཚེག་ཁྱིམ་བཅུ་དྲུག་ཡིན་པ། དཔེར་ན། དགུང་བསང་མཐོན་པོ་ཨོ་ལོ་སྐྱིད་པའི་ཕ་ཡུལ་མ་རེད། དྲིན་ཅན་ཉི་མ་གཞོན་པ་འགྲོ་བའི་རྟ་ལ་བསྐྱོན་དང་ཕར་ལ་འགྲོ་དུས་འགྲོས་ཆེན་རྟ་ཕོས་སྐྱེས་མ་བྱས་བྱུང་། །ཚུར་ལ་ཡོང་དུས་ཆང་དང་ཇ་ཁྲས་བསུ་བར་སླེབས་བྱུང་། །ཞེས་པ་ལྟ་བུ། ད་དུང་ཚེག་ཁྱིམ་བརྒྱད་པ་དང་། བཅུ་གཅིག་བཅུ་གཉིས་སོགས་འདྲ་མིན་སྣ་ཚོགས་ཡོད་པ་ཚང་མས་མཁྱེན་གསལ་ལྟར་རེད།
        དོན་གྱི་ཆ་ནས་བཤད་ན། དགའ་བའི་མི་ཡང་འཛོམས་སོང་། །བཙོས་པའི་ཆང་ཡང་ཞིམ་སོང་། །དགའ་པོ་མི་འཛོམས་ཆང་ཞིམ། །གནང་སོ་ཆོག་ག་ཡོད་དོ། ལྟ་བུ་དགའ་སྤྲོ་དང་། ང་ཚོ་སྤུན་མཆེད་རྣམ་པ། །ལས་ལ་ཧུར་ཐག་གནང་དང་། །ཉི་མ་སྤྲིན་པའི་འོག་ནས། ཐར་བའི་དུས་ཤིག་ཡོང་འདྲ། །ལྟ་བུ་རེ་བ་དང་། བྲག་ལ་རྡུང་ཁ་རྒྱག་པར། །ལྕགས་ཀྱི་རྭ་ཅོ་དགོས་ཀྱིས། །ཁྱེད་ཀྱི་ར་མགོ་ལུག་མགོས། ། རྡུང་ཁ་ནུས་ས་མ་རེད། ལྟ་བུ་དཔའ་སྐད་དང་། ཐག་རིང་རྒྱང་ནས་ཕེབས་པའི། །མགྲོན་པོ་སྲན་མའི་མེ་ཏོག །ཁྱེད་རང་ཕེབས་པ་ཡག་བྱུང་། །བཞུགས་གྲལ་འོད་ཀྱིས་ཁེངས་སོང་། ལྟ་བུ་བསྟོད་བསྔགས་དང་། ཕར་ལ་མིག་གིས་བལྟས་པས། །ཚུར་ལ་སྤྱན་གྱིས་གཟིགས་བྱུང་། །སྤྱན་མིག་ཀྲི་གའི་བར་ནས། །ལས་འཕྲོའི་མདུད་པ་ཐེབས་བྱུང་། །ལྟ་བུ་བརྩེ་གདུང་དང་གཙང་ལ་བྱམས་པ་བཞེངས་པས། ། དབུས་པ་སྙིང་རླུང་ལང་སོང་། དབུས་པ་གྱོང་པོ་ཡོད་ན། །བྱམས་པ་སྒལ་པར་འཁུར་དང་། ལྟ་བུ་ཁ་མཆུ་དང་སྟག་ལྤགས་གཟིགས་ལྤགས་འདིང་སར། །རྭ་ལྤགས་ཐལ་འཚུབ་མ་གཏོང་། །བཞེས་ཆས་རྫབ་ཕོར་འཛུགས་སར། །ཕོར་ཀྱོག་འཚང་ཁ་མ་རྒྱག ། ལྟ་བུ་དམའ་འབེབས་དང་། སྡེ་པའི་ནོར་འཛིན་དབྱངས་སྒྲོལ། །གོས་ལ་རས་གོས་རྐྱང་གཅིག ། གནམ་ངན་གཏོང་ཐེངས་རེ་རེར། །སྤྱན་འདྲེན་རེ་རེ་ཕེབས་ཀྱིས། །ལྟ་བུའོ། །
        རྒྱན་གྱི་ཆ་ནས་བཤད་ན། དགུང་བསང་མཐོན་པོ་གསེར་གྱི་གཞོང་པ་འདྲ། །དྲིན་ཅན་ཉི་མ་གཡུ་ཡི་ཕྲ་རྒྱན་བཞིན། །ལྟ་བུ་དཔེ་རྒྱན་དང་། ཉི་མ་ཤར་བའི་དང་པོ། །བྲག་རི་ཡ་གིར་ཤར་སོང་། ང་ནི་བྲག་སྟོད་ཕྱོགས་ཀྱི། །རྒོད་པོ་ཡིན་ན་དགའ་བ། །ལྟ་བུ་སྐབས་མིན་བསྟོད་པའི་རྒྱན་དང་། སྟོད་སྒུར་ཐོག་ཁར་མ་ཐོངས་ཤིག། ཐོག་ཁའི་སྟེང་ནས་མཆོང་མཁན་འདྲ། །མིག་ལྷུག་གཞས་རྭར་མ་ཐོངས་ཤིག གཞས་རྭའི་དཀྱིལ་དུ་ངུ་མཁན་འདྲ། །ལྟ་བུ་བཞད་གད་ཀྱི་ཉམས་དང་། ང་ཡི་ཆུང་འདྲིས་བྱམས་པ། །རྫ་རིའི་འོག་གི་ཆུ་རེད། སིལ་སྒྲ་རྣ་བས་ཐོས་ཀྱང་། །མཇལ་འཕྲད་གསེར་ལས་དཀོན་པ། ལྟ་བུ་ཆོས་ཅན་འགོག་པའི་རྒྱན་དང་། སེམས་པ་སྐྱོ་བའི་སྐད་ཆ། རི་མ་འདབས་སུ་བཤད་པས། །རི་བོ་ས་རྡོ་ཡིན་ཡང་། །དབུ་ཡིས་ལྕོག་ལྕོག་གནང་བྱུང་། ལྟ་བུ་ཏིང་ངེ་འཛིན་གྱི་རྒྱན་དང་། ཞིང་ཆུང་བཏབ་པའི་དཀྱིལ་ལ། །ལམ་པ་གནང་མཁན་ཡོད་ན། །བདག་ནི་བུད་མེད་ཡིན་ཡང་། གྲི་གུ་ལོགས་ནས་བཏོན་ཆོག། ལྟ་བུ་དཔའ་བའི་ཉམས་ལ་སོགས་པ་སྙན་གཞུང་ལས་བསྟན་པའི་རྒྱན་ཐམས་ཅད་དམངས་གཞས་ཀྱི་གཞས་ཚིག་ནང་ཚང་ཡོད་ཅེས་སྨྲས་ཀྱང་མི་འོས་པ་མེད་དོ། །
        གླུ་ལེན་སྟངས་ཀྱི་ཆ་ནས་བཤད་ན། ཚིག་རྒྱག་གམ། སྒོར་གཞས། གཞས་ཆེན་སོགས་གང་ཞིག་ཡིན་རུང་འགའ་ཞིག་བརྩེ་གདུང་གི་རང་བཞིན་ལྡན་པ་ཕུད། མང་ཆེ་བ་འགྲན་སྡུར་གྱི་རང་བཞིན་ལྡན་པར་མངོན་ཞིང་། དེ་དག་ཀྱང་གཙོ་བོ་གཞས་ཚིག་ལ་བརྟེན་ནས་ཕ་རོལ་པོར་ཁ་གཏད་བཅད་དགོས་པ་སྟེ། དཔེར་ན། ཚིག་རྒྱན་ལེན་རེས་བྱེད་སྐབས་ཕ་རོལ་པོས། གནམ་དང་སྤྲིན་པའི་བར་ལ། །རྒྱ་ནག་གསེར་གྱི་མཆོད་རྟེན། །བསྐོར་བ་གསོག་འདོད་འདུག་ཀྱང་། །ལམ་ཡུལ་སྤྲིན་པས་བསྒྲིབས་སོང་། །ཞེས་བཏང་ན། རང་གིས་ཆུ་མོ་རྐ་མགོ་ཡེ་ནས། ཇི་ལས་རྒྱུ་ལས། མ་ཐོངས། །ཞིང་ཆུང་རྐ་ཐག་རིང་ཡང་། །མཇལ་བའི་དུས་གཅིག་ཡོང་འདྲ། །ཞེས་ལན་ལེན་པ་དང་། ཡང་ཕ་རོལ་པོས་མ་གཞི་ཕོ་རོག་ནག་ཆུང་། །ཤ་ལ་དགའ་པོ་ཡོད་ཀྱང་། །དུག་ཚལ་དམར་པོའི་ཕྱོགས་ལ། །ལྡིང་སྐོར་རྒྱག་གི་མ་རེད། །ཅེས་བཏང་ན། རང་གིས་ལྕགས་ལ་ལྕགས་ཀྱི་ཁ་གཅོད། །ཟངས་ལ་ཟངས་ཀྱི་ཁ་གཅོད། །ཁོག་མ་རྡོ་ཁོག་གྲུ་བཞིར། རྡོ་ཁོག་རང་གི་ཁ་གཅོད། །ཅེས་ལན་ལེན་པ་དང་། དེ་བཞིན་ཁྲུང་སར་གཞས་ཆེན་འགྲན་སྐབས་ཕ་རོལ་པོས། །རྒྱ་ནག་རི་བོ་རྩེ་ལྔ། རྒྱལ་སྲས་འཕགས་པ་འཇམ་དཔལ། །གསོལ་བ་བོད་ནས་བཏབ་པས། །ཐུགས་རྗེ་རྒྱ་ནས་གནང་བྱུང་། །ཞེས་བཏང་ན། རང་གིས་གྲལ་སྟོད་གསེར་ལ་བཞེངས་པའི། །གསེར་གྱི་ཕྱག་ན་རྡོ་རྗེ། །གྲལ་དཀྱིལ་དངུལ་ལ་བཞེངས་པའི། །དངུལ་གྱི་སྒྲོལ་མ་གསུང་བྱོན། གྲལ་སྨད་དུང་ལ་བཞེངས་པའི། །དགོན་པའི་ཚོགས་དུང་དཀར་པོ། །ཞེས་འཇམ་པའི་ལན་དང་། ཡང་ཕ་རོལ་པོས་བཞུགས་གྲལ་ཉི་ཟླ་ཁ་སྤྲོད། ད་ལྟ་འདྲ་པོ་འདུག་ཀྱང་། །འོད་དང་འོད་ཟེར་འདྲ་མིན། རིམ་བཞིན་རིམ་བཞིན་གསལ་ཡོང་། །ཞེས་བཏང་ན། རང་གིས། གཞོན་པ་འགྲོ་ཁར་ཐུག་སོང་། །རྟ་ཕོའི་ཡབ་གཅིག་གནོན་དང་རང་ཡུལ་སྐྱིད་པོ་མེད་ཀྱང་། །འབྲུ་སྣ་ལྔ་ཡི་བང་མཛོད། །གཞན་ཡུལ་བལྟ་བ་མཐོན་པོའི། གཏམ་སྐྱག་འཁུར་དགོས་མེད་དོ། །ཞེས་རྩུབ་པའི་ལན་འདེབས་པ་སོགས་ཐམས་ཅད་གཞས་ཚིག་གི་ནུས་པར་རག་ལས་སོ། །
གཉིས་པ། གནའ་བོའི་དཔེ་ཚོགས་ཁྲོད་ཀྱི་གྲགས་ཅན་གཞས་ཚིག་རང་ཅག་བོད་ཀྱི་སྔོན་བྱོན་མེས་པོས་
མཛད་པའི་དཔེ་ཚོགས་ཇི་སྙེད་ཀྱི་ཁྲོད་དུ་ཕུལ་དུ་
བྱུང་བའི་གཞས་ཚིག་མང་པོ་ཞིག་ཡོད་པ་ནི།
        མགུར་གླུ། ཁོ་བོའི་བསམ་པར་མགུར་གླུ་ཞེས་པ་ནི་གླུའི་ཞེ་ཚིག་ཆེས་མཐོ་བ་ཞིག་ཡིན་ནམ་སྙམ། སྤྱིར་བཏང་གི་གླུའི་ཞེ་ཚིག་ལ་གསུང་གཞས་ཞེས་ཟེར་བ་ཚང་མས་མཁྱེན་གསལ་ལྟར་ཡིན་ཀྱང་། ཆོས་ལུགས་མཁས་ཅན་ནམ་སྐྱེ་བུ་དམ་པ་རྣམས་ལ་གསུང་གཞས་ཞེས་གསོལ་ན་མི་འཚམ་པས་མགུར་གླུའམ་གསུང་མགུར་ཞེས་གསོལ་བར་ངེས། དཔེར་ན། ཚངས་དབྱངས་རྒྱ་མཚོའི་མགུར་གླུ་དང་། རྗེ་བཙུན་མི་ལའི་མགུར་གླུའམ་གསུང་མགུར་ལྟ་བུ། དེ་ཡང་ཚངས་དབྱངས་རྒྱ་མཚོའི་མགུར་གླུ་ནི་སྤྱིར་བརྩེ་གདུང་མཚོ་པའི་གླུ་ཡིན་ཏེ། ཤོ་ལོ་ཀ་ཚང་མའི་ནང་བྱམས་པ་དང་ཆུང་འདྲིས་སོགས་ཡོད་པའི་ཕྱིར། འོན་ཏེ་དེང་གི་མཁས་པ་འགས་གསང་བའི་གོ་བ་གསལ་བར་རྟོགས་ནས་དེ་ནི་འདོད་གླུ་མིན་པར་སྐབས་དེའི་ཆབ་སྲིད་སོགས་ཀྱི་སྐོར་ཡིན་པའི་གསར་འགྲེལ་གནང་བ་བདེན་པ་ཡིན་སྲིད་ཀྱང་། གང་ལྟར་ཚངས་དབྱངས་རྒྱ་མཚོའི་མགུར་གླུ་དམངས་ཁྲོད་དུ་འདོད་གླུ་ཁོ་ནར་བརྩིས་ནས་ཕན་ཚུན་ལེན་རེས་བྱེད་པ་ལས། ཆབ་སྲིད་ཀྱི་གོ་དོན་རྟོགས་མེད་ལ། སྔ་ཕྱིར་མཁས་པ་མང་པོ་བྱུང་མྱངས་ཡོད་ཀྱང་དེ་ལྟའི་འགྲེལ་བ་གནང་མྱངས་མེད་པས་ལྷ་ཁང་རྙིང་པར་གནས་བཤད་གསར་པ་རྒྱག་དགོས་དོན་མེད་སྙམ། མགུར་གླུ་ཞེས་པའི་བོད་ཡིག་གི་ཐ་སྙད་ལ་འདོད་གླུའི་གོ་དོན་མེད་པ་ནི་ཆེས་བདེན་ཡང་སྐབས་དེར་ཚངས་དབྱངས་རྒྱ་མཚོ་ནི་ལེགས་སམ་ཉེས་ཀྱང་བོད་ཀྱི་ཆོས་ལུགས་དང་ཆབ་སྲིད་གཉིས་ཀའི་འགོ་གཙོ་ཡིན་པས་ཚངས་དབྱངས་རྒྱ་མཚོའི་མགུར་གླུ་ཞེས་གསོལ་བ་གོང་ཞུས་ལྟར་གལ་སྲིད་ཁོང་གིས་ཆབ་སྲིད་ཀྱི་སྐོར་རང་གི་ལས་དབང་སྐོར་ནས་གསུང་པ་ཡིན་ན་ཁོང་ནི་སྙན་ངག་ལ་བྱང་ཆུབ་པ་ཞིག་ཡིན་པས་བྱམས་པ་དང་ཆུང་འདྲིས་མིན་པའི་དཔེ་གཞན་དག་ཁོང་ལ་མི་རྙེད་པ་ག་ལ་སྲིད། དེར་མ་ཟད་ཁོང་གིས་འདོད་གླུ་བྲིས་གནང་བར་ཡ་མཚན་རྒྱུ་ཅི། ཆོས་དད་པ་རྣམ་དག་ཅིག་ཡིན་ན་དད་པ་དམ་ཚིག་བརྟན་པོར་དགོས་ཏེ། ཇི་སྐད་དུ། དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་པར་མི་ལྟ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །ཅེས་གསུངས་པ་ལྟར་རོ། །ཁོང་གི་མགུར་གླུ་བདེ་ཞིང་ཚིག་སྙན་པས་གང་སར་ཁྱབ་གདལ་བྱུང་ཚུལ་སོགས་མཁྱེན་གསལ་ལགས་པས་འདིར་ཞུ་དགོས་དོན་མ་མཆིས་སོ། ། དེ་བཞིན་རྗེ་བཙུན་མི་ལའི་གསུང་མགུར་ནི་གཙོ་བོ་འཁོར་བར་ངེས་འབྱུང་གི་མགུར་གླུ་ཡིན་པས་ནང་དོན་གཙོ་བོ་ཆོས་ལུགས་ཡིན་པ་སྨོས་ཅི། འོན་ཀྱང་མགུར་གླུའི་ཚིག་གོ་བདེ་ལ་གནའ་བོའི་མགུར་གླུའི་རྩོམ་སྲོལ་སྤྱད་པར་ཐུན་མིན་གྱི་ཁྱད་ཆོས་ལྡན་ཡོད་ཅིང་། ཚེག་ཁྱིམ་ཡང་བདུན་དགུ་སོགས་འདྲ་མིན་སྣ་ཚོགས་བེད་སྤྱོད་གནང་ཡོད་པ་དཔེར་ན། གཅེས་པ་བཅུ་ཡི་གླུ་ལས། །འཇའ་ཚོན་ལྟ་བུའི་ལྷ་སྐུ་ལ། །ཟུང་འཇུག་རང་བཞིན་སྟོང་པ་གཅེས། འདྲེ་གདོན་སེམས་ཀྱི་ཆོ་འཁྲུལ་ལ། །མེད་སྣང་སྒྱུ་མར་ཤེས་པ་གཅེས། །དྲིན་ཅན་བླ་མ་རྗེ་བཙུན་ལ། །རྒྱུན་ཆད་མེད་པའི་མོས་གུས་གཅེས། །ལྟ་བུ་ནི་སློབ་གསོའི་དོན་སྙིང་ལྡན་ལ་གོ་བདེ་བའི་ཁྱད་ཆོས་ཡོད་པ་ཞིག་སྟེ་གཞིར་འཛིན་ཆོག་པའི་རིན་ཐང་ལྡན་ནོ། །
        ཚོགས་གླུ། ཚོགས་གླུ་ཞེས་པ་སྤྱིར་ཆོས་ལུགས་ཀྱི་ཆོ་གའི་བྱེ་བྲག་ག་གེ་མོ་ཞིག་གྲུབ་རྗེས་ལེན་པའི་གླུ་ཞིག་ཡིན་པས་གཞས་ཚིག་རབ་ཏུ་སྙན་ཞིང་ནང་དོན་ཆུ་ནང་ནས་ལྡེའུ་གསལ་བ་ལྟར་གསལ་བ་ནི་དཔེར་ན། ལས་སྨོན་རྟེན་འབྲེག་དཔལ་བསམ་ལྗོན་ཤིང་གི་སྟེང་ན། །རྒྱ་གར་ཤར་གྱི་རྨ་བྱ་གཞོན་ནུ་ཡང་ཕེབས་བྱུང་། །རྨ་བྱའི་ཟློས་གར་དམ་པའི་ཆོས་ཕྱོགས་ལ་བསྒྱུར་དང་། །གཞོན་པ་ང་ཚོས་ཐར་པའི་ལམ་སྣེ་ཞིག་ཟིན་ཡོང་། །བསོད་ནམས་དཔྱིད་ཀྱི་རྒྱལ་མོ་ཤིང་རྟ་ལ་ཕེབས་དང་། །ལྷོ་མོན་ཤིང་ལོའི་ཚལ་གྱི་ཁུ་བྱུག་གི་གསུང་སྙན། །ཡ་གིའི་དྲི་ཟའི་བུ་མོའི་གླིང་བུ་ལས་སྙན་པ། །དབྱར་གསུམ་ནམ་ཟླ་སྤྲོ་བའི་རྟེན་འབྲེལ་ལ་ཡག་བྱུང་། །འདིར་འདུས་ལས་སྨོན་མཐུན་པའི་རྡོ་རྗེ་ཡི་སྤུན་གྲོགས། །ང་ཚོའི་བླ་མ་བཞུགས་པའི་ཆོས་གྲལ་ལ་ཕེབས་དང་། །སྨིན་གྲོལ་བདུད་རྩི་འཐུང་བའི་དགའ་སྟོན་གྱི་ངང་ནས། །ཉམས་དགའ་གླུ་རུ་ལེན་པའི་ཁྱད་ཆོས་ཤིག་ཡོད་དོ། ཞེས་པ་ལྟ་བུའོ། །
        གཅོད་གླུ། དེ་ཡང་གཅོད་ཅེས་པ་ནི། ཕོ་གཅོད་མོ་གཅོད་གཉིས་ཀ གཉན་ས་རི་ཁྲོད་འགྲིམ་པ་ཕྱི་ཡི་གཅོད། ཕུང་པོ་གཟན་དུ་བསྐྱུར་བ་ནང་གི་གཅོད། ཉག་གཅིག་རྩད་ནས་གཅོད་པ་དོན་གྱི་གཅོད། ཅེས་གསུངས་པ་ལྟར་དབྱེ་བ་མང་ཡང་གཙོ་བོ་མ་རིག་པ་དང་འཁྲུལ་སྣང་ཐམས་ཅད་ཀྱི་རྩ་བ་བདག་འཛིན་རྩད་ནས་གཅོད་པ་ལ་ཉག་གཅིག་རྩད་ནས་གཅོད་པ་དོན་གྱི་གཅོད་ཟེར། དེས་ན་གཅོད་ཀྱི་ཚིག་ནི་འདུལ་རྒྱུའི་ལྷ་འདྲེ་འདུལ་བའམ་གཅོད་པ་བྱེད་པའི་ཚིག་ཁོ་ན་ཡིན་ཏེ། དཔེར་ན། ཤར་ཕྱོགས་རྡོ་རྗེ་མཁའ་འགྲོ་མ། །བྱམས་པ་ཆེན་པོའི་ཕུར་པ་ཁྱེར། །ལྷོ་ཕྱོགས་རྡོ་རྗེ་མཁའ་འགྲོ་མ། །བདག་འཛིན་གྱི་མགོ་བོ་དང་། །ལྷུ་ཚིག་བཞི་ལ་བཏབ་པ་ཡིས། གཡོ་འགུལ་མེད་པར་གནས་པར་གྱུར། །གཅེས་འཛིན་གྱི་ཕུང་པོ་སྒྱུ་མའི་འདུས། །མཎྜལ་གྱི་ཚོམ་བུར་རབ་བཀོད་ནས། །བདག་འཛིན་གྱི་རྩ་བ་ཆོད་པར་ཤོག །ལྟ་བུ་གསར་བུ་བ་རྣམས་ལ་ངོ་སྤྲོད་ཞུས་པ་ཙམ་ལགས་སོ། །དེ་བཞིན་གྲགས་ཅན་གྱི་ལོ་རྒྱུས་མཚོན་པའི་སྙན་ངག་རིང་པོ་གེ་སར་སྒྲུང་ནང་གི་གླུ་ཚིག་ནི་བླངས་ན་འཛད་མཐའ་མེད་པའི་གཞས་ཚིག་འབྲི་བའི་སློབ་དེབ་ཅིག་ཡིན་པ་མཁྱེན་གསལ་ལྟར་རོ། །
གསུམ་པ། ཕུལ་བྱུང་གི་གསར་རྩོམ་
གཞས་ཚིག་དཔེ་མཚོན།
        དེང་གི་ཆར་བོད་ཡིག་ཐོག་ནས་གསར་རྩོམ་བྱས་པའི་གཞས་ཚིག་ཕུལ་དུ་བྱུང་བ་མི་ཉུང་བ་ཞིག་ཡོད་པ་ལ་རྒྱ་ཆེའི་མང་ཚོགས་ཀྱིས་ཧ་ཅང་དགའ་པོ་བྱེད་པ་མ་ཟད། མི་མང་པོ་ཞིག་གི་བློར་བཟུང་ནས་གཏོང་དང་གཏོང་བཞིན་ཡོད་པ་ནི། དཔེར་ན། ང་ཡི་ལྷ་ས་ཞེས་པའི་གླུ་གཞས་དེ་ནི་ཚིག་དང་གདངས་གཉིས་ཀ་ཆེས་ཕུལ་དུ་བྱུང་བ་ཞིག་ཡིན་པའི་ཞིང་ཁུལ་དུ་ངལ་རྩོམ་བྱེད་སྐབས་ཀྱང་མང་ཚོགས་ཀྱིས་གཞས་དེ་གཏོང་བ་ཁོ་བོས་དངོས་སུ་མཐོང་བྱུང་དེའི་གཞས་ཚིག་ནི་སྤྱིར་ལྷ་ལྡན་གྱི་མཛེས་ལྗོངས་ལ་བསྔགས་པ་བརྗོད་པ་ཞིག་ཡིན་པས་དུས་ནམ་ཞིག་དང་ས་ཆ་གང་ཞིག་ཏུ་གླུ་དེ་འགྱུར་བ་མེད་པའི་གླུ་ཚེ་རིང་ཞིག་ཡིན་པ་དང་། གཞས་ཚིག་ནི་ཤིན་ཏུ་སྙན་པའི་གསལ་བྱེད་རྒྱན་དང་རང་བཞིན་བརྗོད་པའི་རྒྱན་གྱིས་སྤུད་པས་རྣ་བར་འཇེབས་ཤིང་གོ་བདེ་བ་ལ་སོགས་ཁྱད་ཆོས་མང་དུ་མཆིས་པས་བདག་ཅག་ཀུན་གྱིས་མིག་དཔེར་འཛིན་འོས་པའི་གནས་ལགས། དེ་ཡང་འདིར་བོད་ཡིག་ཁོ་ནའི་སྟེང་ནས་ཞུས་པ་ལས་ཡིག་རིགས་གཞན་སྟེང་ནས་བཤད་ན་སྐབས་སུ་མ་བབས་པས་རེ་ཞིག་བཞག་གོ །
གཞན་ཡང་དཔེར་ན་བྱིས་པའི་གླུ། བྱི་བ་གླང་སྟག་ཡོས་འབྲུག་སྦྲུལ། རྟ་ལུག་སྤྲེལ་དང་བྱ་ཁྱི་ཕག་ཅེས་པ་དང་། དེ་བཞིན་ཀ་མད་སུམ་ཅུའི་གླུ་གཞས་དེ་གཉིས་ནི་གཞས་ཚིག་གསར་རྩོམ་བྱས་པ་ཞིག་མིན་ཡང་ཚང་མས་ཧ་ཅང་དགའ་པོ་བྱེད་པ་མ་ཟད། བྱིས་པ་ཚོས་ལོ་འཁོར་བཅུ་གཉིས་དང་ཀ་མད་སུམ་ཅུ་བློར་འཛིན་རྒྱུར་སློབ་ཚན་ཆེད་དུ་ཁྲིད་པ་ལྟ་བུའི་ནུས་པ་ཐོན་བཞིན་འདུག ད་དུང་བརྩེ་གདུང་གི་སྐྱོ་གནས་མཚོན་པའི་གླུ་གཞས་སྐད་ཅིག་གི་འཇའ་ཚོན་ཞེས་པའི་གླུ་དེ་ཤིན་ཏུ་སྙན་ཞིང་བློ་ལ་ཟུག་པའི་ཁྱད་ཆོས་ཡོད་པས་ཤིན་ཏུ་མྱུར་པོས་མང་ཚོགས་ཁྲོད་དུ་ཁྱབ་གདལ་སོང་ཡོད།
བཞི་པ། རྣ་བར་ཅུང་ཟད་མི་སྙན་པའི་
གཞས་ཚིག་དཔེ་མཚོན།
        དེང་སྐབས་བློ་མཐུན་ལ་ལས་བོད་ཡིག་གི་གཞས་ཚིག་ལ་དོ་སྣང་གནང་བའམ་མཐོང་ཆུང་གནང་བ་ཅི་སྟེ་གང་ལྟར་གཞས་ཚིག་འགའ་ཞིག་བསྐྱར་ཟློས་མང་བ་དང་ཚིག་འབྲེལ་མི་ཆགས་པས་རྣ་བར་མི་སྙན་པའང་ཐོན་བཞིན་ཡོད་ལ། ཡང་གླུ་གཞས་འགའ་ཞིག་དམངས་གཞས་ཡིན་ཡང་གཞས་ཚིག་བཅོས་པ་མིན་ལ་སྔར་ལྟར་ཡང་མིན་པས་རྣ་བར་མི་སྙན་པའང་འདུག་སྟེ། དཔེར་ན། ང་ཚོ་འདི་རུ་འཛོམས་འཛོམས། །བསྙུན་གཞི་གུད་ཆག་མ་གཏོང་། །ང་ཚོ་ཕ་མ་སྤུན་མཆེད། །བསྙུན་གཞི་གུད་ཆག་མ་གཏོང་ཞེས་གཏོང་བའི་ཚིག་རྐང་ཕྱི་མ་གཉིས་ཡིན་པར་ཆ་བཞག་ཚིག་རྐང་སྔ་མ་གཉིས་ཏེ། ང་ཚོ་འདི་རུ་འཛོམས་འཛོམས། །བསྙུན་གཞི་གུད་ཆག་མ་གཏོང་། །ཞེས་པའི་ཚིག་ནི་སྔ་ཕྱི་གཏན་ནས་མི་འབྲེལ་བ་རྡོ་ཆག་བཙན་སྒྲིག་བྱས་པ་ཞིག་མ་རེད་དམ། དེ་བཞིན་ཡ་གིའི་དགུང་བསངས་མཐོ་པོ། དྲིན་ཅན་ཉི་མ་ཤར་བྱུང་ཞེས་པའི་གླུ་གཞས་ནང་ཚིག་རྐང་དེ་གཉིས་ཁོ་ན་བསྐྱར་ཟློས་ཐེངས་བཞི་ལྔ་བྱས་པས་ཚང་མ་དགོད་ཤོར་བའི་གནས་སུ་གྱུར་ཡོད། རྒྱུ་མཚན་ནི་གཞས་དེ་དམངས་གཞས་ཡིན་ཡང་གཞས་ཚིག་ཚིག་རྐང་གཉིས་ཁོ་ན་ལས་མེད་པ་མ་ཡིན་ཏེ། དགུང་བསངས་དང་དྲིན་ཅན། །གངས་སྟོད་དང་སེང་གེ །སྤང་སྟོད་དང་ཤ་བ། །བྲག་སྟོད་དང་རྒོད་པོ། །མཚོ་སྟོད་དང་ཉ་ཆུང་། །ལྕང་གླིང་དང་བྱི་ཆུང་། །གཞས་རྭ་དང་ཕོ་གཞོན་མོ་གཞོན་ཞེས་དཔེ་དོན་ཕུན་སུམ་ཚོགས་པོ་ཡོད་པ་རྣམས་རྒྱ་ཆེའི་མང་ཚོགས་ཀྱིས་ཤེས་བཞིན་ཡོད་པ་མ་བརྗེད་པ་བྱེད་དགོས་སྙམ། དེ་ལྟར་རྒྱུན་འབྱམས་སུ་སོང་ན་གླུ་མ་མཛེས་མས་རང་གི་པ་ཕར་མཆོད་ཆང་བཀྱག་དུས་ཀྱང་ཆང་གཞས། ཕར་ལ་མིག་གཅིག་བལྟས་པས། ཚུར་ལ་སྤྱན་གཅིག་གཟིགས་བྱུང་། ། སྤྱན་མིག་ཀྲི་གའི་འོག་ནས། ལས་འཕྲོའི་མདུད་པ་ཐེབས་བྱུང་། ཞེས་གཏོང་ཉེན་ཆེ།
        ད་དུང་གསར་དུ་བརྩམས་པའི་གཞས་ཚིག་འགའ་ཞིག་ཀྱང་ཚིག་སྦྱོར་མི་མཛེས་ལ་བརྗོད་དོན་མི་གསལ་བ་ཁུངས་ལུང་མེད་པར་མཐོང་ཡང་དེ་དག་དམར་འདོན་བྱེད་པའི་སྤོབས་པ་ཁོ་བོར་མེད་ལ་དགོས་པའང་མེད་པས་རེ་ཞིག་མགོ་བོ་མལ་སར་འཛུལ་ན་ལྷགས་པ་ཆུང་ཞེས་པའི་དཔེ་ལྟར་ལགས་ན་རང་གདོང་ལ་རང་གིས་ཞིབ་ཏུ་གཟིགས་པར་འཚལ་ཞེས་ཞུའོ། །