དུས་ཚོད་ཀྱི་རླུང་བུས་རེག་ཙམ་ནས་འཐོར་འགྲོ་བ་འདྲ།
ལོ་ཟླ་དང་ལྷན་དུ་རྒྱང་རིང་ལ་ཆས་སོང་བའི་མི་མང་བོ་ཞིག
ངའི་དྲན་པའི་མེ་ལོང་དུ་འཚང་ག་བརྒྱབ་བྱུང་།
དེ་དུས། ཏག་ཏག་ཟླ་དགུ་བ་ཡིན་འདུག་པ་ཚོར།
—— སྙན་རྩོམ་འདིའི་སྔོན་འགྲོ།
ཟླ་དགུ་བ། རེ་ཆད་ཀྱི་ཚོས་ཁ་སྟུག་པའི་སྙན་ངག་ཅིག་རེད།
ངས་བཞི་མདོ་རུ་ཁེར་རྐྱང་དུ་ལུས་ཡོད་པའི་རང་ཉིད་མཐོང་།
སྟོན་རླུང་ནི་གཅུ་འཛེར་ཞིག་ལྟར་ངའི་ལུས་ལ་ཟུག་གིན་པ་མཐོང་།
ལམ་ངོས་སུ་འགྱེལ་བའི་གྲིབ་གཟུགས་མཐའ་དག
སྟོན་རླུང་གི་ལག་པས་བསུབ་ཀྱིན་པ་མཐོང་།
ཟླ་དགུ་བ། སྐྲ་ལོ་རིང་བོ་ཅན་གྱི་སྙན་ངག་པ་ཞིག་ལ་མཚོན་ན།
སྟོན་འབྲས་གཡུར་དུ་ཟ་བའི་དུས་ཚིགས་ཡིན་མི་སྲིད།
སྟོན་རླུང་ནི་མིའི་རིགས་ཀྱི་ཧམ་སེམས་ལྟར་ལྡང་དུས།
ང་མེ་འཁོར་ལ་བསྡད་ནས་རང་མལ་སྙེག་གིན་ཡོད།
ཟླ་ཕོགས་ཕྱེད་ཙམ་གྱིས་གླས་པའི་ཁང་མིག་རོ་སྒམ་འདྲ་བོ་དེར།
ངས་ཁང་མིག་འདི་ཡི་གེར་འགོད་དུས།
འདི་ལས་ལྷག་པའི་དཔེ་འཇོག་འོས་མོ་ཞིག་རྙེད་མ་བྱུང་ནའང་།
སྐབས་དེར། ཐོན་བྱུང་ངམ་ཟེར་མཁན་ཞིག་ཡོད་ན།
ཨེ་དཀའ་ཐལ་ཟེར་མཁན་ཞིག་ཡོད་ན།
ངས་ཀྱང་མི་ཚེ་ནི་མེ་ཏོག་ཅིག་ཏུ་འཁྲུལ་ངེས།
ཟླ་དགུ་བ། རྨི་ལམ་ལྟ་བུའི་ལམ་སྒྲོན་མག་མོག་དེའི་མཐའ་ནས།
ངས་གྲང་འདར་རྒྱག་གིན་པའི་དགུན་ཟླ་མཐོང་།
རང་ཉིད་ཀྱི་ངལ་དུབ་སྒྱེ་མོ་ཞིག་ལྟར་འདྲུད་ཞོར།
ཤར་རྒྱུགས་ནུབ་འདུར་བྱེད་ཀྱིན་པའི་མི་དག་མཐོང་།
ཟླ་དགུ་བ། ཆར་ཐིགས་སྔར་བཞིན་བྱ་འདབ་བརྒྱུད་ནས་ཟགས།
ངས་རྫུབ་ཅིང་མཐུག་པའི་རྩི་ཤིང་ལོ་མའི་ཚོགས།
ཇ་ལོ་ཞིག་ལྟར་ཡང་ཡང་སྦངས་ནས་རུལ་གྱིན་པ་མཐོང་།
ཆེས་མཐའ་མཇུག་གི་ཤོག་ལྷེ་དེ་ཕར་ལ་སློག་དུས།
ངས་སྒྲུང་ནང་གི་བུ་མོ་དེ་ལྕེབས་འདུག་པ་མཐོང་།
མཆི་མའི་ཐིགས་པ་འགའ་ངའི་མིག་ཟུང་ལས་མར་འགྲིལ་གྱིན་པ་མཐོང་།
ཟླ་དགུ་བ། དྭངས་ཤིང་གསལ་བའི་མེ་ལོང་ཞིག་དང་འདྲ་བར།
ངས་དེ་ལས་ནག་ནོག་གོས་པའི་རང་གི་མིག་ཟུང་མཐོང་།
ནུར་ཞིང་རལ་བའི་འཛུམ་མདངས་རྙིད་པ་མཐོང་།
ད་དུང་སྙིང་ཉེ་བའི་ཆུང་དུས་ཀྱི་རྩེད་ར་ཇི་བཞིན།
རྨང་ནས་ཞིག་བཞིན་པའི་རྒྱང་རིང་དང་རྨི་ལམ་མཐོང་།
ཟླ་དགུ་བ། ངས་རྒྱང་རིང་སྔར་བཞིན་རྒྱང་རིང་དུ་ཡོད་པ་མཐོང་།
བདེ་སྐྱིད་ཀྱི་བསིལ་རླུང་ཡོད་ཚད་དེ་གར་ལྡང་བཞིན་པ་མཐོང་།
དེ་དག་ང་ལ་འབྲེལ་བ་ཅི་ཡང་མེད་པ་མཐོང་།
འཚོ་བས་ང་ལ་བར་མེད་དུ་འགྲམ་ལྕག་བཞུ་ཀྱིན་པ་ཚོར་ནའང་།
ངས་སྔར་བཞིན་ངོ་ཚ་མེད་པར་སྙན་ངག་འབྲི་བཞིན་པ་མཐོང་།
ཟླ་དགུ་བ། སྐྲ་ལོ་རིང་བོ་ཅན་གྱི་སྙན་ངག་པ་ཞིག་ལ་མཚོན་ན།
ཏག་ཏག་སྙིང་རླུང་ལྡང་བའི་དུས་ཚིགས་ཤིག་ཡིན་འདུག
ཁྱོད་རང་དྲན་དུས།
ངས་ད་གཟོད་སྙན་ངག་བདེ་མོ་རེ་འབྲི་འདོད།
—— སྔོན་དུ་བརྗོད་པ།
ཁྱོད་རང་ཡང་ཡང་དྲན་དོན།
ཆར་གྱིས་རྡེག་ཅིང་རླུང་གིས་བསྣད་པའི་ལོ་མའི་ཚོགས།
ལམ་གྱི་ངོས་སུ་གཏོལ་མེད་དུ་འགྲིལ་ཡོང་བའི་རྐྱེན་ནོ།
ཁྱོད་རང་ཡང་ཡང་དྲན་དོན།
པེ་ཅིང་གི་དགུན་ཟླ་འཁྱག་ཅིང་བཙོག་ནའང་།
ཕྱིར་དྲན་གྱི་མེ་ལྕེ་དེས་ཁོ་བོར་དྲོད་ཁོལ་སྦྱིན་ཡོང་བའི་རྐྱེན་ནོ།
ཁྱོད་རང་ཡང་ཡང་དྲན་དོན།
དཔེ་སྒྲོམ་སྟེང་གི་སྒྲུང་དེབ་དམར་བོ་དེའི་རྐྱེན་ནོ།
དེའི་བར་དུ་བཅུག་པའི་ལོ་མ་སེར་བོ་དེའི་རྐྱེན་ནོ།
ཁྱོད་རང་ཡང་ཡང་དྲན་དོན།
ངའི་རྨི་ལམ་གྱི་མངའ་ཐང་ཇི་འདྲའི་རྒྱ་ཆེ་ཡང་།
དེ་ཉིད་སྔར་བཞིན་ཁྱོད་ཀྱིས་བདག་གིར་བྱས་ཡོད་པའི་རྐྱེན་ནོ།
ཁྱོད་རང་ཡང་ཡང་དྲན་དོན།
ངས་གྲོང་ཁྱེར་འདིའི་ཟ་ཟུར་གང་རུང་ནས།
ཁྱོད་རང་ཉན་རྒྱུར་མོས་པའི་གཞས་དེ་ཐོས་ཡོང་བའི་རྐྱེན་ནོ།
ཁྱོད་རང་ཡང་ཡང་དྲན་དོན།
ཁྱོད་ཉིད་ངའི་ཚེ་སྲོག་གི་སྐུད་རྒྱུན་དང་འབྲེལ་མྱོང་ཞིང་།
ཁལ་ཞིག་གི་ཚུལ་གྱིས་ཁྱོད་གཉིས་ལ་ཡང་ལྕི་ཤོར་མ་མྱོང་བའི་རྐྱེན་ནོ།
ཁྱོད་རང་ཡང་ཡང་དྲན་དོན།
སེམས་པ་གཉིས་ཕན་ཚུན་ཅི་ལྟར་འཁྲེང་ནའང་།
ལས་ཀྱི་རབ་ཁ་ནས་གཏན་དུ་གཤིབ་ཐབས་མ་བྱུང་བའི་རྐྱེན་ནོ།
ཁྱོད་རང་ཡང་ཡང་དྲན་དོན།
གཅིག་ཐང་ན་རྒྱུ་རྐྱེན་གང་ཡང་མེད་པར།
དཔེར་ན་དོ་ནུབ་བཞིན་དྲན་པའི་ནང་ཤུགས་ཀྱིས་འཚང་ཡོང་བ་ལྟ་བུའོ།