ད་ནས་བཟུང་།
འབྲི་ཤོག་ནག་པོ་འདིའི་སྟེང་དུ་ཁང་ཁྱིམ་དཀར་པོ་ཞིག་བཞེངས་དགོས
ཁང་ཁྱིམ་དཀར་པོ་འདིར་སྒོ་དང་སྒེའུ་ཁུང་འབྱེད་དགོས
སྒེའུ་ཁུང་ལས་རླུང་དང་མཁའ་དབུགས གྲང་ངར་དང་ཉི་འོད་དྲན་དགོས
དབུས་ལམ་གྱི་ཉི་མ་ད་དུང་དབུས་ལམ་དུ་དྲོས་དགོས
ཕ་ཡུལ་གྱི་ཟླ་བ་སྔར་བཞིན་ཕ་ཡུལ་དུ་གསལ་དགོས
མགོ་ཐོག་གི་སྐར་ཚོགས་ཀྱང་ནམ་ཡང་སེམས་ཁོང་དུ་འཚེར་དགོས
མུན་པ་ཡོད་ཚད་སྣང་བར་བརྗེ་དགོས
སྣང་བ་ཡོད་ཚད་ཕྱི་གསལ་ནང་གསལ་དུ་བཀྲུ་དགོས
རང་ཉིད་ཀྱང་སྙན་ངག་པ་ཞིག་ལྟར་ཕྱི་གསལ་ནང་གསལ་དུ་འཚོ་དགོས
མི་ཚེ་གཅིག་ལ་རྫོགས་མཐའ་མེད་པའི་འཆར་གཞི་དག་སྙན་ངག་གིས་བྲི་དགོས
སྙན་ངག་ཀྱང་སྙན་ངག་གིས་བྲི་དགོས
སྙན་ངག་མ་ཡིན་པ་ཡང་སྙན་ངག་གིས་བྲི་དགོས
དེ་ནས་ཆང་དཀར་དུ་འོ་མ་ལྟེམས་དགོས
མིག་ཆུ་འཁྱག་པ་དག་ཟུངས་ཁྲག་ཁོལ་མར་བྱོ་དགོས
ཟུངས་ཁྲག་ཁོལ་མ་དག་མེ་ལྕེ་དམར་པོར་སྒྲོན་དགོས
དེ་དག་གིས་མི་ཞིག་གསོན་ཡོད་པ་བདེན་དཔང་བྱེད་དགོས
[ཕྲན་དཔྱད།/ཉྭ་སྲིན་པོ། (ལན་གྲུ)] རྩོམ་པ་པོས་སྙན་ངག་འདི་ཚན་པ་བཞི་རུ་ཕྱེས་ཤིང་། མགོ་ནས་མཇུག་བར་དུ་ཕུགས་འདུན་དང་རྨི་ལམ་ལ་གཏད་པའི་ཁམས་ཤིག་གིས་ཡོངས་སུ་བཏུམས་འདུག སྙན་ངག་པའི་ཕུགས་འདུན་འབྲི་ཤོག་ནག་པོའི་སྟེང་ཁང་ཁྱིམ་དཀར་པོ་བསྐྲུན་ཅིང་སྒོ་དང་སྒེའུ་ཁུང་ཕྱེ་རྗེས། དེ་ལས་རླུང་དང་མཁའ་དབུགས། ཉི་འོད་དང་གྲང་ངར་དྲན་དགོས་པར་བྱས་ལ། དེས་ནི་སྙན་ངག་པའི་ཕུགས་འདུན་ལ་རེ་བས་ཁེངས་ཤིང་དྭངས་གཙང་ལྷད་མེད་དང་། ཡུལ་ཡིད་ཀྱི་འདོད་འདུན་གཅིག་ཏུ་འདྲེས་འགྲོ་བའི་སྣང་ལྗོངས་ཤིག་ཀྱང་བསྐྲུན་ཡོང་།
སྙན་ངག་པ་ཡང་སོ་སྐྱེ་སོ་སོ་བ་ཀུན་དང་འདྲ་བར། འཚོ་བའི་དཀའ་སྡུག་དང་སུན་སྣང་། མུན་ནག་དང་ཡིད་མུག་གིས་རབ་ཏུ་གཙེས་པའི་དུས་ནི་རྣམ་པ་ཀུན་ཏུ་ཡོད་མོད། སྙན་ངག་པས་འབག་བཙོག་ཡོད་ཚད་ལ་རེ་བ་གསར་བ་དང་ཕུགས་འདུན་གྱིས་བལྟས་པ་འདི་ལས་སྙན་ངག་པ་ཁོང་འཚོ་བའི་འགྲུལ་བཞུད་རིང་མོར་འདོད་འདུན་གྱིས་ཁེངས་ཡོད་པ་མཐོང་ཐུབ།
དྲང་མོར་བཤད་ན། ང་ཚོ་མུན་ནག་གི་ནང་དུ་འཚོ་བཞིན་ཡོད་ལ། ང་ཚོས་མུན་ནག་དེ་དག་འོད་སྣང་དུ་འཁྲུལ་ཡོད། འོད་སྣང་དུ་འཁྲུལ་ནས་ཀྱང་དེ་ལ་དད་མོས་དང་རེ་བས་ཁེངས་ཡོད། ཡིན་ན་ཡང་། སྙན་ངག་འདི་ལས། སྙན་ངག་པས་མུན་པ་ཡོད་ཚད་སྣང་བར་བརྗེས་ཏེ། སྣང་བ་དེ་ཉིད་ཀྱང་ཕྱི་གསལ་ནང་གསལ་དུ་ཕྱེས་ཤིང་། རང་ཉིད་ཀྱང་ཡ་ཡོ་དང་རྫབ་རྫུབ། ནག་ནོག་དང་རིང་དུ་གྱེས་པའི་སྙན་ངག་པ་གཤའ་མའི་མདོག་དང་ལྡན་པའི་ཕྱི་གསལ་ནང་གསལ་དུ་འཚོ་འདོད་པའི་ཕུགས་འདུན་བཏེགས་འདུག་པ་འདི་ནི། སྙན་ངག་པ་ཞིག་ལ་མཚོན་ན་ཅིས་ཀྱང་གལ་ཆེ་བར་ཡང་སྙམ་མོ།།
དེ་ལས་ཀྱང་འཚོ་བ་དངོས་ཁྲོད་ཀྱི་ལྷ་ཆེན་རྒྱལ་ཏེ་ཆང་རྫ་ཆུང་ཆུང་ཁོས་ནི། གློ་བུར་ཆང་ཕོར་དུ་འོ་མ་ལྟེམས་འདོད་སྐྱེས་ཤིང་། མིག་ཆུ་འཁྱག་པ་དག་ཟུངས་ཁྲག་ཁོལ་མོར་སྒྲོན་འདོད་སྐྱེས། དེ་དག་ཐམས་ཅད་ནི། མདོར་ན་སྙན་ངག་པ་ཁོང་ཉིད་མདོག་དང་ལྡན་པར་གསོན་འདོད་པའི་རེ་བ་དམར་སྒོང་ངེ་བ་དེ་ཉིད་དུ་འདོད་དོ།།
ད་དུང་སྙན་ངག་འདི་ལས་གལ་ཆེ་བ་གཞན་ཞིག་ནི། ཁོའི་རྫོགས་མཐའ་བྲལ་བའི་མི་ཚེའི་འཆར་གཞི་དང་རྨི་ལམ་གྱི་ཁྲོད་དུ། དབུས་ལམ་དང་ཕ་ཡུལ་ཞེས་པའི་ཐ་སྙད་མཚོན་སྟོབས་ཅན་གཉིས་དྲངས་ཤིང་། དེས་སྙན་ངག་པའི་མི་རིགས་དང་རིག་གནས་སེམས་ཁམས་ཀྱི་གཡོ་སྐྱོམས་གཞན་ཞིག་མངོན་འདུག
མདོར་ན། འདི་ནི་རེ་བ་དང་ཕུགས་འདུན་ལ་བརྒྱུས་པའི་སྙན་ངག་ཅིག་རེད་ལ། སྙན་ངག་འདིའི་མགོ་མཇུག་བར་གསུམ་དུ་སྙན་ངག་པ་ཁོང་རྨི་ལམ་དང་ཕུགས་འདུན་ལ་འཐིམ་འདོད་ཀྱི་རེ་བ་གསལ་ལེར་མངོན། འདི་ནི་དགོས་ཀྱང་དགོས་ལ་གལ་ཆེ་བར་ཡང་སྙམ་མོ།།